1, 2. (a) Banci kin ikataken nggo tuhu-tuhu itandaindu sekalak jelma si terkenal adi gelarna ngenca ietehndu? Jelasken. (b) Kai nina nterem jelma kerna Jesus?

MELALA jelma si terkenal i doni enda. Banci saja ietehndu gelar kalak si terkenal e. Tapi, meteh gelarna saja labo berarti nggo tandaindu ia, ntah pe nggo ietehndu kerina kegeluhenna ras ise ia situhuna.

² Amin gia Jesus Kristus nggeluh i doni kira-kira 2000 tahun si nggo lewat, banci saja pernah ibegindu kerna ia. Tapi nterem kal jelma la ietehna ise kin Jesus e. Nina piga-piga kalak, Jesus sekalak dilaki si mehuli, si deban ngatakenca ia nabi, janah si debanna ka ngataken maka ia nge Dibata e. Adi menurutndu uga?​—Nehen Penjelasen tambahen 12.

3. Engkai maka penting nandai Dibata Jahwe ras Jesus Kristus?

³ Penting kal ietehndu ise kin Jesus e situhuna. Nina Pustaka si Badia, ”Kegeluhen si tuhu-tuhu si la erkeri-kerin e: Itandai kalak Kam ngenca Dibata si tuhu-tuhu, dingen itandaina Jesus Kristus si IsuruhNdu.” (Johanes 17:3) Jelaslah, adi itandaindu ise situhuna Jahwe ras Jesus, kam banci nggeluh si rasa lalap i doni si jadi pardis. (Johanes 14:6) Bage pe, nandai Jesus banci nampati kam sabap ia usihen si mehulina i bas ndalani kegeluhen janah uga erurusen ras jelma si deban. (Johanes 13:34, 35) I bas Pasal 1, nggo sipelajari uga situhuna Dibata e. Gundari banci sipelajari kai nina Pustaka si Badia kerna Jesus.

4. Kai erti penggelaren ”Mesias” ras ”Kristus”?

⁴ Ndekah sope Jesus tubuh, Jahwe nggo erjanji i bas Pustaka si Badia maka iutusna nge pagi Mesias ntah pe Kristus. Penggelaren ”Mesias” asalna cakap Heber nari, janah ”Kristus” cakap Junani. Duana penggelaren enda ertina pribadi si ipilih Dibata guna keduduken si istimewa. Mesias pagi si erban kerina janji Dibata terjadi. Jesus pe banci nampati kam gundari. Tapi sope Jesus tubuh, melala jelma tersungkun-sungkun, ’Ise kin Mesias e?’

5. Tek nge ajar-ajar Jesus maka ia me Mesias?

⁵ Ajar-ajar Jesus la sangsi maka Jesus e me Mesias si ipadanken Dibata. (Johanes 1:41) Contohna, nina Simon Petrus man Jesus, ”Kam kap Mesias.” (Matius 16:16) Engkai kita banci tek maka Jesus e me Mesias?

6. Uga Jahwe nampati kalak si tutus guna nandai ise kin Mesias e?

⁶ Ndekah sope Jesus tubuh, nabi-nabi Dibata nulisken keterangen si lengkap si banci nampati manusia guna nandai Mesias. Uga enda banci nampati? Bayangken, kam isuruh lawes ku terminal ngelegi kalak si la pernah kam jumpa. Tapi lit si mereken keterangen lengkap kerna ia, tentu saja reh nukahna akapndu njumpai ia. Bage ka pe, Jahwe nggunaken nabi-nabiNa guna mpebetehken banta kerna kai si ilakoken Mesias ras kai si terjadi man bana. Penggenapen kerina nubuat enda nampati kalak si tutus guna nandai maka Jesus me Mesias.

7. Kai dua nubuat si mbuktiken maka Jesus e Mesias?

⁷ Gundari sibahas dua nubuat kerna Mesias. Si  pemena, 700 tahun sope Jesus tubuh, inubuatken Miha maka Mesias pagi tubuh i kuta Betlehem. (Miha 5:2) Janah i je me Jesus tubuh. (Matius 2:1, 3-9) Si peduaken, inubuatken Daniel maka Mesias pagi reh i bas tahun 29 M. (Daniel 9:25) Dua nubuat saja pe nggo banci mbuktiken maka Jesus e me Mesias si ipadanken Dibata.​—Nehen Penjelasen tambahen 13.

8, 9. Kai si terjadi paksa Jesus iperidiken si mbuktiken maka ia Mesias?

⁸ Jelas kal ikataken Jahwe maka Jesus e me Mesias. Jahwe erjanji mereken sada tanda man Johanes Peridiken guna nampati ia nandai ise Mesias e. Paksa Jesus lawes ku Lau Jordan guna iperidiken Johanes i bas tahun 29 M, iidah Johanes tanda e. Pustaka si Badia ngatakenca kai si terjadi, ”Kenca Jesus iperidikenna, ndarat ia i bas lau nari. Rempet talang langit janah idahna kesah Dibata nusur bagi nderapati ku babona. Jenari terbegi sora i surga nari ngatakenca nina, ’Enda me Anakku si Kukelengi. Ia me si ngena ateKu.’” (Matius 3:16, 17) Paksa Johanes ngidah ras mbegi tanda enda, ietehna maka Jesus e me Mesias. (Johanes 1:32-34) I bas wari e, paksa Jahwe mereken kesah si badia man bana, Jesus jadi Mesias. Ia kap si ipilih Dibata guna jadi Peminpin ras Raja.​—Jesaya 55:4.

 ⁹ Nubuat Pustaka si Badia, kata-kata Jahwe, ras tanda si iberekenNa paksa Jesus iperidiken mbuktiken maka Jesus e me Mesias. Tapi, janari rehna Jesus, janah jelma si uga kin ia? Mari sinehen kai nina Pustaka si Badia.

10. Kai si niajarken Pustaka si Badia kerna kegeluhen Jesus ope denga ia reh ku doni?

¹⁰ Pustaka si Badia ngajarken maka Jesus nggeluh i surga ndekah ope denga reh ku doni. Miha ngatakenca maka Mesias ”asalna i bas adi-adi nari”. (Miha 5:2) Jesus sendiri piga-piga kali ngatakenca maka ia nggo ndekah nggeluh i surga ope denga tubuh jadi manusia. (Oge Johanes 3:13; 6:38, 62; 17:4, 5.) Sope Jesus reh ku doni, hubungenna ras Jahwe seh kal rembakna.

11. Engkai maka meherga kal Jesus iakap Jahwe?

¹¹ Meherga kal Jesus iakap Jahwe. Engkai? Erkiteken Dibata nepa ia ”ope denga ijadiken kerina si nasa lit”. (Kolose 1:15) Emaka, Jesus pe igelari tinepa Dibata si pemena. * Jesus pe meherga iakap Jahwe erkiteken ia ngenca si langsung itepa Dibata. Eme alasenna ia igelari ”anakNa si tonggal”. (Johanes 3:16) Arah Jesus ngenca Jahwe njadiken kerina si nasa lit. (Kolose 1:16) Janah Jesus ngenca si igelari ”Kata” erkiteken arah Jesus me Jahwe mpeseh tenah ras petunjuk man malekat-malekat bage pe man manusia.​—Johanes 1:14.

12. Uga maka banci sieteh Jesus e labo Dibata?

¹² Piga-piga kalak tek maka Jesus e me Dibata. Tapi labo bage si niajarken Pustaka si Badia. Nina Pustaka si Badia Jesus e itepa, ertina Jesus lit permulanna. Tapi, Jahwe si nepa si nasa lit, la lit permulanna. (Masmur  90:2) Selaku anak Dibata, Jesus la pernah ersura-sura gelah seri ras Dibata. Alu jelas Pustaka si Badia ngajarken maka belinen nge Bapa asangken anak. (Oge Johanes 14:28; 1 Korinti 11:3.) Jahwe ngenca ”si Mada Kuasa”. (Kejadin 17:1) Ia me si mbelinna ras si megegehna i bas alam semesta enda.​—Nehen Penjelasen tambahen 14.

13. Engkai maka Pustaka si Badia ngataken Jesus e ”rupa Dibata si teridah”?

¹³ Jahwe ras anakNa, Jesus, ras-ras erdahin jutan tahun dekahna ope denga surga ras doni itepa. Sikeleng-kelengen kal ia duana! (Johanes 3:35; 14:31) Jesus ngusih sifat-sifat Bapana alu sempurna, emaka Pustaka si Badia nggelari ia ”rupa Dibata si teridah”.​—Kolose 1:15.

14. Uga maka banci anak Jahwe si meherga tubuh jadi manusia?

¹⁴ Anak si mehergana kal iakap Jahwe enda nggit nadingken surga janah tubuh jadi manusia i doni. Uga maka banci bage? Alu mukjizat Jahwe mindahken kegeluhen anakNa surga nari ku bertin sekalak singuda-nguda si gelarna Maria. Alu cara bage, Jesus la perlu sekalak bapa manusia. Jadi, Maria mupus anak si sempurna, janah igelarina Jesus.​—Lukas 1:30-35.

15. Uga kam banci nandai Jahwe terbagesen?

¹⁵ Banci ipelajarindu terbuen kerna Jesus, kegeluhenna, ras sifat-sifatna alu ngoge Pustaka si Badia i bas buku Matius, Markus, Lukas, ras Johanes. Buku-buku enda igelari Injil. Erkiteken sifat Jesus bali bagi Bapana, kai si iogendu banci nampati kam guna nandai Jahwe terbagesen. Eme sabapna banci ikataken  Jesus, ”Ise nggo ngidah aku, nggo idahna pe Bapa e.”​—Johanes 14:9.

16. Kai si iajarken Jesus? Janari rehna pengajarenna e?

¹⁶ Melala manusia ngelebuh Jesus ”Guru”. (Johanes 1:38; 13:13) Salah sada ajaren Jesus si pentingna eme ”berita si meriah kerna Kinirajan”. Kai kin Kinirajan e? Pemerentahen Dibata i bas surga nari si nandangi erkuasa i belang-belang doni enda janah mereken pasu-pasu man manusia si patuh nandangi Dibata. (Matius 4:23) Kerina si niajarken Jesus rehna i bas Jahwe nari. Nina Jesus, ”Kai si kuajarken e labo i bas aku nari, tapi i bas Dibata si nuruh aku nari nge.” (Johanes 7:16) Ieteh Jesus maka Jahwe ersura-sura gelah manusia megi berita si meriah kerna Kinirajan Dibata si nandangi erkuasa i doni enda.

17. I ja saja Jesus ngajar? Engkai maka rajin kal ia ngajari jelma si deban?

¹⁷ I ja saja Jesus ngajar? I japa pe. Ia ngajar i kuta-kuta, i kota, pajak, i bas ingan pertoton, bage pe i rumah-rumah. La itimaina kalak reh ku ia. Ia me si rusur ndahi kalak e. (Markus 6:56; Lukas 19:5, 6) Jesus rajin kal erdahin janah igunakenna melala waktu ras gegehna guna ngajari manusia. Engkai? Erkiteken ietehna maka enda me sura-sura Dibata janah ia patuh man Bapana. (Johanes 8:28, 29) Jesus pe erbe-rita si meriah erkiteken mekuah atena manusia. (Oge Matius 9:35, 36.) Idahna melala pemimpin agama la ngajarken kebenaran kerna Dibata ras KinirajanNa. Emaka merhat ia nampati jelma gelah megi berita si meriah enda.

18. Sifat Jesus si apai si ngenana kal atendu?

¹⁸ Jesus ngkelengi manusia ras mperdiateken kalak  e. Ia mehuli janah menukah ideheri. Anak-anak pe meriah akapna ras ia. (Markus 10:13-16) Jesus lalap adil. Nembeh atena kalak si korupsi ras si la adil. (Matius 21:12, 13) Paksa ia nggeluh i doni idahna diberu-diberu iperlakoken la adil ras la iergai. (Johanes 4:9, 27) Tapi Jesus lalap mehuli ras mehamat man diberu. Jesus pe tuhu-tuhu meteruk ukur. Contohna, i bas sada berngi iburihina nahe ajar-ajarna, sada pendahin si biasana ilakoken sekalak budak.​—Johanes 13:2-5, 12-17.

19. Contoh kai si ncidahken maka Jesus meteh keperlun manusia janah nggit nampatisa?

¹⁹ Jesus meteh kai si tuhu-tuhu iperluken manusia, janah ia nggit nampatisa. Enda jelas kal teridah paksa igunakenna gegeh Dibata pepalem jelma si sakit alu mukjizat. (Matius 14:14) Contohna sekalak dilaki si gadamen reh ku Jesus janah nina, ”Bicara nggit kam, ngasup kap kam pepalem aku.” Mekuah ate Jesus ngidah pinakit ras kiniseran dilaki e, janah nggit ia mpepalemsa. Emaka idudurken Jesus tanna, ijemakna dilaki e, janah nina, ”Nggit aku, malemlah kam.” Janah malem me dilaki si sakit e! (Markus 1:40-42) Banci nge bayangkenndu uga perasan dilaki e?

20, 21. Engkai maka Jesus jadi contoh si mehulina kal i bas kepatuhen man Dibata?

²⁰ Jesus usihen si mehulina kal i bas kepatuhen man Dibata. La soal kai si terjadi ntah pe uga perbahanen musuhna man bana, ia terus setia man Bapana. Contohna, Jesus la erdosa paksa ia icubai Setan. (Matius 4:1-11) Piga-piga keluarga Jesus sendiri la tek maka ia Mesias janah ikatakenna ”ia lanai sehsa”,  tapi Jesus tetap ngelakoken dahin si ibereken Bapana. (Markus 3:21) Paksa kejam kal musuh-musuhna man bana, la pernah ilawanna. Tapi Jesus tetap setia man Dibata.​—1 Petrus 2:21-23.

²¹ Aminna pe mesui kal iakap Jesus perpatena, ia tetap setia man Jahwe. (Oge Pilipi 2:8.) Cuba ukurindu uga megenggengna Jesus i bas wari kematenna. Ia itangkap, saksi-saksi palsu nuduh ia numpahi Dibata, hakim si mata duiten ngukum ia, jelma si nterem nawai ia, janah tentera-tentera niksa ras makuken ia bas tiang. Paksa nandangi mate serko ia, nina, ”Enggo dung!” (Johanes 19:30) Telu wari kenca Jesus mate,  Jahwe mpekeke ia janah iberekenNa kula bagi malekat. (1 Petrus 3:18) Piga-piga minggu kenca si e, Jesus mulihken ku surga, ”jenari kundul ia arah kemuhen Dibata,” janah itimaina Dibata njadiken ia Raja.​—Heber 10:12, 13.

22. Kesempaten kai si lit i bas kita gundari erkiteken Jesus setia man Bapana?

²² Erkiteken Jesus tetap setia man Bapana, gundari lit kesempatenta nggeluh si rasa lalap i bas doni si jadi pardis bagi si nggo ijanjiken Dibata. I bas pasal selanjutna banci sipelajari uga kematen Jesus erban kita banci nggeluh si rasa lalap.