1, 2. (a) Conoce ba gayot tu con el un conocido persona si el de suyu nombre lang tu sabe? Explica. (b) Cosa ta creé el maga gente acerca con Jesus?

MANADA maga conocido gente na mundo. Siguro, sabe tu el nombre del uno kanila. Pero gendeh quierre decir cay sabe tu el de suyu nombre, conoce ya gayot tu con ele. Gendeh se quierre decir que sabe tu el cada detalle del de suyu vida y si quien gayot le.

² Siguro ya puede ya tu oi acerca con Jesucristo maskin pa 2,000 año ya el ya pasa cuando ya vivi le qui na tierra. Pero, mayoria del maga gente no sabe si cosa clase de persona si Jesus. El cuanto ta habla que buen gente le, el otro ta habla que profeta le y el otro ta creé que ele el Dios. Cosa el de tuyu opinion?—Mira con el Endnote 12.

3. Porque importante que conocé tu con Dios Jehova y con Jesucristo?

³ Importante que sabé tu el verdad acerca con Jesus. Porque? El Biblia ta habla kanaton: “Este amo el Vida hasta para cuando: Que ay conoce sila con Uste, el unico y deverasan Dios, y que ay conoce tamen sila con Jesus, el Cristo, con quien Uste ya imvia.” (Juan 17:3) Si sabe tu el verdad acerca con Jehova y con Jesus, puede tu vivi hasta para cuando na paraiso tierra. (Juan 14:6) Puera con ese, el buen ejemplo de Jesus puede ayudá contigo si paquemodo trata con otro y vivi na justo manera.  (Juan 13:34, 35) Na Capitulo 1, ya aprende kita el verdad acerca con Dios. Ahora, hay sabé kita si cosa ta enseña el Biblia acerca con Jesus.

4. Cosa quierre decir del maga palabra “Mesias” y “Cristo”?

⁴ Cuanto año antes de nace si Jesus, ya promete si Jehova na Biblia que hay imbia le con el Mesias o Cristo. Estaba na Hebreo lengguaje el palabra “Mesias” mientras el palabra “Cristo” estaba na Griego. Este dos titulo quierre decir que el Dios el iscuji con el Mesias y dale con ele un especial posicion. Hay cumpli el Mesias con el todo promesa del Dios. Puede tambien tu beneficia ahora na cosa ya hace si Jesus cuando taqui pa le na tierra. Pero antes de nace si Jesus, manada gente el ta pensa, ‘Quien queda el Mesias?’

5. Ya creé ba el maga dicipulo de Jesus que ele el Mesias?

⁵ Asigurao el maga dicipulo de Jesus que ele el Mesias. (Juan 1:41) Por ejemplo, ya habla si Simon Pedro con Jesus: “Uste amo el Cristo.” (Mateo 16:16) Paquemodo kita puede asigura que si Jesus el Mesias?

6. Paquemodo ya ayudá si Jehova con el maga sincero gente para conocé con el Mesias?

⁶ Largo tiempo antes de nace si Jesus, el maga profeta del Dios ya escribi manada detalle que puede ayudá con el maga gente conocé con el Mesias. Paquemodo este puede ayudá? Pone kita que ya manda contigo anda incuntra na terminal del bus con el un persona que no conoce tu. Si tiene quien hay dale contigo especifico detalle acerca con aquel persona, hay puede tu incuntra con ele. Na igual manera, el Dios ya usa con el de suyu maga profeta para habla kanaton si cosa hace el Mesias y si cosa pasa con ele. El todo profecia que ya  cumpli ya ayudá con el maga sincero gente para conocé que si Jesus el Mesias.

7. Cosa el dos profecia que ta dale prueba que si Jesus el Mesias?

⁷ Discuti kita el dos na maga profecia. Primero, 700 año antes de nace si Jesus, si profeta Miqueas ya habla que hay nace el Mesias na Belen. (Miqueas 5:2) Y alla mismo ya nace si Jesus! (Mateo 2:1, 3-9) Segundo, si profeta Daniel ya habla que aparece el Mesias na año 29 C.E. (Daniel 9:25) Dos lang este na manada profecia que ta dale prueba que si Jesus el Mesias.​—Mira con el Endnote 13.

8, 9. Cosa ya sucede na bautismo de Jesus que ya dale prueba que ele el Mesias?

⁸ Ya hace gayot claro si Jehova que si Jesus el Mesias. Ya promete el Dios que hay dale le señal con Juan Bautista para conocé le si quien el Mesias. Cuando ya anda si Jesus con Juan para bautiza na Rio de Jordan del año 29 C.E., ya mira si Juan con aquel señal. El Biblia ta habla kanaton si cosa ya sucede: “Cuando ya acaba bautiza con Ele, si Jesus ya sale na agua. Entonces el cielo ya abri y ya mira Le el Espiritu del Dios ta abaja na ichura de un paloma, y ta anda con Ele. Entonces un voz ya sale na cielo y ya habla: ‘Este amo el dimio anak con quien ta ama gayot yo. Bien alegre yo con Ele.’” (Mateo 3:16, 17) Cuando ya mira y ya oi si Juan con este señal, ya conocé le que si Jesus el Mesias. (Juan 1:32-34) Na aquel dia, cuando ya bacia si Jehova el de suyu espiritu  con ele, si Jesus ya queda el Mesias. Con ele ya iscuji si Jehova para queda Lider y Rey.​—Isaias 55:4.

⁹ El maga profecia na Biblia, mismo palabra de Jehova y el señal que ya dale le na bautismo de Jesus ta dale prueba que si Jesus el Mesias. Pero, onde estaba si Jesus y cosa clase le de persona? Mira kita si cosa el Biblia ta habla.

10. Cosa ta enseña el Biblia acerca na vida de Jesus antes le de bene aqui na tierra?

¹⁰ El Biblia ta enseña que ya queda si Jesus por largo tiempio na cielo antes de bene aqui na tierra. Asegun con Miqueas, el Mesias “estaba pa del tiempo antigua.” (Miqueas 5:2) Mismo si Jesus manada beses ya habla que ya queda le na cielo antes le nace como un gente. (Le con el Juan 3:13; 6:38, 62; 17:4, 5.) Maskin antes de bene na tierra, tiene ya especial relacion si Jesus con Jehova.

11. Porque bien precioso si Jesus con Jehova?

¹¹ Bien precioso si Jesus con Jehova. Porque? Cay ya crea con ele si Jehova antes de crea con todo las cosas. Poreso, ta llama con Jesus “el primero na entero creacion.” * (Colosa 1:15) Precioso tambien si Jesus con Jehova cay con ele lang directa ya crea si Jehova. Poreso, ta llama con ele el “Unico Anak.” (Juan 3:16) Con Jesus lang tambien ya usa si Jehova para crea con el todo otro cosas. (Colosa 1:16) Y con Jesus lang ya llama “el palabra” cay ya usa con ele si Jehova para dale mensaje y instruccion na maga angel y gente.​—Juan 1:14.

12. Porque kita puede habla que si Jesus y el Dios gendeh un persona?

¹² El cuanto maga gente ta creé que un persona lang si Jesus y el Dios. Pero, gendeh ese el cosa ta enseña el Biblia. El Biblia ta habla que ya crea con Jesus. Este quierre decir que tiene principio el vida de Jesus. Pero  si Jehova, el quien ya crea con el todo las cosas, nuay principio el vida. (Salmo 90:2) Como el Anak del Dios, nuay pensa si Jesus queda igual con Dios. Claro ta enseña el Biblia que el Tata mas alto que con el Anak. (Le con el Juan 14:28; 1 Corinto 11:3.) Solamente si Jehova el “Dios Todopoderoso.” (Genesis 17:1) Ele el de con todo alto y poderoso persona na universo.​—Mira con el Endnote 14.

13. Porque ta llama na Biblia con Jesus ‘el imagen del Dios’?

¹³ Si Jehova y el de suyu Anak, si Jesus, ya trabaja junto por billones de año antes de crea con el cielo y tierra. Asigurao que ta ama gayot sila con uno’y otro! (Juan 3:35; 14:31) Ya puede gayot imita si Jesus con el maga calidad del de suyu tata poreso ta llama con ele na Biblia “el ichura [imagen, NW] del Dios.”​—Colosa 1:15.

14. Paquemodo el precioso Anak de Jehova ya nace como un gente?

¹⁴ El precioso Anak de Jehova con todo voluntad ya deja con el cielo para nace aqui na tierra como un gente. Paquemodo quel ya queda posible? Ya hace milagro si Jehova para transfiri el vida del de suyu Anak estaba na cielo para na vientre del un virgen, si Maria. Na ese manera, si Jesus nuay necesitá tata de aqui na tierra. Poreso ya pari si Maria un perfecto anak y ya llama con ele, Jesus.​—Lucas 1:30-35.

15. Paquemodo tu puede conocé mas con Jehova?

¹⁵ Puede tu sabé mas acerca con Jesus, de suyu vida y maga calidad si le tu con el libro de Mateo, Marcos, Lucas y Juan na Biblia. Ya llama con este maga Evangelio. Ciendo el maga calidad de Jesus igual del de suyu Tata, el cosa tu le puede ayudá contigo conocé mas con  Jehova. Poreso si Jesus ya puede habla: “Quien ya mira conmigo, ya mira ya tamen con el Tata.”​—Juan 14:9.

16. Cosa ya enseña si Jesus? Onde estaba el de suyu enseñanza?

¹⁶ Manada gente ya llama con Jesus “Maestro.” (Juan 1:38; 13:13) Uno del maga importante cosas que ya enseña le amo “el Buen Noticia del Reino.” Cosa este Reino? Este el gobierno del Dios na cielo que hay rula con el entero mundo y bendici con el maga gente quien ta obedece con Dios. (Mateo 4:23) Estaba con Jehova el todo cosa ya enseña si Jesus. Si Jesus ya habla: “El dimio insiñanza gendeh dimio gayot, sino de Aquel quien ya imvia conmigo.” (Juan 7:16) Sabe si Jesus que quierre si Jehova que oi el maga gente con el buen noticia que el Reino del Dios hay rula con el entero mundo.

17. Onde ya enseña si Jesus? Porque le ya hace gayot esfuerzo para enseña con otro?

¹⁷ Onde ya enseña si Jesus? Maskin onde tiene gente. Ya enseña le na maga barrio, ciudad, tianggue, lugar de adoranza y na maga casa. Gendeh le ta espera que el maga gente pa anda con ele. Ele mismo ta anda kanila. (Marcos 6:56; Lucas 19:5, 6) Ya hace gayot esfuerzo si Jesus y ya dale su tiempo para enseña con el maga gente. Porque? Cay sabe le que ese el cosa quierre el Dios y pirmi le ta obedece con su Tata. (Juan 8:28, 29) Ya predica tambien si Jesus cay tiene le lastima con el maga gente. (Le con el Mateo 9:35, 36.) Ya puede le mira que el maga lider del religion gendeh ta enseña el verdad acerca con Dios y con el de suyu Reino. Poreso, quierre le ayudá con el maga gente para sabé sila el buen noticia.

18. Cosa maga calidad de Jesus el quierre tu?

¹⁸ Si Jesus interesao y ta ama con el maga gente.  Buen gente le y facil con ele converza. Maskin el maga bata quierre man junto con ele. (Marcos 10:13-16) Igual el tratamiento de Jesus na maga gente. No quierre le corapcion y injusticia. (Mateo 21:12, 13) Ya vivi le na tiempo cuando nuay derecho el maga mujer y gendeh kanila ta respeta. Pero si Jesus pirmi kanila ta trata con respeto y dignidad. (Juan 4:9, 27) Humilde tambien si Jesus. Por ejemplo, un noche, ya laba le el pies del de suyu maga apostoles. Un cosa que ayudante lang ta hace.​—Juan 13:2-5, 12-17.

19. Cosa ejemplo el ta dale mira que sabe si Jesus si cosa gayot ta necesitá el maga gente y quierre le ayudá kanila?

¹⁹ Sabe si Jesus si cosa gayot ta necesitá el maga gente y quierre le ayudá kanila. Gane, ya usa le el poder del Dios para curá con el maga gente. (Mateo 14:14) Por ejemplo, un gente leproso el ya atraca con Jesus y ya habla: “Si quiere Uste, puede Uste cura conmigo.” Ya tiene lastima si Jesus cay ya sinti le el dolor y sufrimiento del gente y quierre le ayudá. Poreso, ya istira si Jesus el de suyu mano, ya agarra con el gente y ya habla: “Siempre, quiere Yo! Queda tu bueno!” Y ya queda bueno el gente! (Marcos 1:40-42) Ta puede ba tu imagina si cosa ya sinti aquel gente?

20, 21. Porque si Jesus bien buen ejemplo na obediencia con Dios?

²⁰ Bien buen ejemplo si Jesus na obediencia con Dios. Maskin cosa ya pasa o maskin cosa ya hace el de suyu enemigo con ele, fiel siempre le con el de suyu Tata. Por ejemplo, nuay culpá si Jesus cuando ya pruba tenta si Satanas con ele. (Mateo 4:1-11) El cuanto na maga familia de Jesus gendeh ta creé que ele el  Mesias y ya habla que “loco” ya le. (Marcos 3:21) Pero ya continua siempre hace si Jesus el voluntad del Dios. Cuando ya maltrata con ele el de suyu maga enemigo, ya esta fiel si Jesus con Dios y nuay man balus kanila.​—1 Pedro 2:21-23.

²¹ Maskin ya sufri si Jesus, ya esta le fiel con Jehova hasta na su muerte. (Le con el Maga Hebreo 5:8.) Imagina si cosa le ya experienciá na dia del de suyu muerte. Ya aresta con ele, ya acusa con ele blasfemia el maga falso testigo, ya condena con ele el maga mal juez, ya ganguia con ele el maga gente, ya sufri le na mano del maga soldao y ya clava con ele na estaca. Cuando para muri ya le, ya grita le: “Cumplido ya todo.” (Juan  19:30) Tres dia despues ya muri si Jesus, ya resucita con ele si Jehova como un espiritu persona. (1 Pedro 3:18) Cuanto semana despues, ya bira si Jesus na cielo, “ya sinta . . . na lao derecha del Dios” y ya espera que hace con ele Rey el Dios.​—Maga Hebreo 10:12, 13.

22. Cosa oportunidad kita tiene ahora cay ya este fiel si Jesus con el de suyu Tata?

²² Cay ya esta fiel si Jesus con el de suyu Tata, tiene kita ahora el oportunidad que vivi hasta para cuando na paraiso tierra como cosa el proposito de Jehova. Na siguiente capitulo, hay discuti kita si paquemodo el vida hasta para cuando ya queda posible por medio na muerte de Jesus.