1, 2. (a) Makaingon ba ka nga nakaila gyod ka sa usa ka tawong sikat kon ngalan ra niya ang imong nailhan? Ipatin-aw. (b) Para sa kadaghanan, kinsa si Jesus?

DAGHAN ang sikat nga tawo sa kalibotan. Nakaila tingali ka sa ngalan sa uban. Pero wala magpasabot nga nakaila na gyod ka nila tungod lang kay nakaila ka sa ilang ngalan. Wala ka mahibalo sa tanang detalye sa ilang kinabuhi ug kon kinsa gyod sila.

² Nakadungog na tingali ka bahin kang Jesu-Kristo, bisag nabuhi siya dinhi sa yuta mga 2,000 ka tuig na ang milabay. Pero daghan kaayo ang wala makaila kon kinsa gyod si Jesus. Ang uban moingon nga siya usa ka maayong tawo, naa poy moingon nga propeta siya, ug ang pipila nagtuo nga siya ang Diyos. Para nimo, kinsa si Jesus?​—Tan-awa ang Endnote 12.

3. Nganong importante nga makaila ka kon kinsa si Jehova nga Diyos ug si Jesu-Kristo?

³ Importanteng makaila ka kon kinsa gyod si Jesus. Ngano? Ang Bibliya nag-ingon: “Aron ilang mabatonan ang kinabuhing walay kataposan, kinahanglan silang makaila kanimo, ang bugtong matuod nga Diyos, ug sa imong gipadala, si Jesu-Kristo.” (Juan 17:3) Oo, kon imong mailhan si Jehova ug si Jesus, makapuyo ka sa paraisong yuta hangtod sa hangtod. (Juan 14:6) Makatabang sad nimo karon kon imong mailhan si Jesus kay siya ang pinakamaayong panig-ingnan kon unsaon pagkinabuhi ug pagtratar ang uban. (Juan 13:34, 35) Sa Kapitulo 1, nakakat-on ta bahin sa Diyos. Karon atong sayron ang gitudlo sa Bibliya bahin kang Jesus.

4. Unsay ipasabot sa pulong “Mesiyas” ug “Kristo”?

⁴ Daghang katuigan sa wala pa matawo si Jesus, gisaad na ni Jehova diha sa Bibliya nga ipadala niya ang Mesiyas, o Kristo. Ang pulong “Mesiyas” gikan sa Hebreohanong pinulongan, ug ang “Kristo” gikan sa Grego. Kining mga tituloha nagpasabot nga “Dinihogan” (gipili sa Diyos para sa usa ka espesyal nga katungdanan). Tumanon sa Mesiyas ang tanang saad sa Diyos. Pero sa wala pa matawo si Jesus, daghan ang naghunahuna, ‘Kinsa kaha ang Mesiyas?’

5. Mituo ba ang mga tinun-an ni Jesus nga siya ang Mesiyas?

⁵ Wala gayod magduhaduha ang mga tinun-an ni Jesus nga siya ang gisaad nga Mesiyas. (Juan 1:41) Pananglitan, si Simon Pedro miingon kang Jesus: “Ikaw mao ang Kristo.” (Mateo 16:16) Nganong makaseguro ta nga si Jesus ang Mesiyas?

6. Sa unsang paagi gitabangan ni Jehova ang sinserong mga tawo aron mailhan ang Mesiyas?

⁶ Daghang katuigan sa wala pa matawo si Jesus, ang mga propeta sa Diyos nagsulat ug daghang detalye nga makatabang aron mailhan ang Mesiyas. Sa unsang paagi kini makatabang? Pananglit gisugo ka nga sugaton ang usa ka tawo nga wala pa nimo makita sukad diha sa terminal sa bus nga daghag tawo. Kon dunay mohatag nimog klarong detalye bahin sa maong tawo, seguradong mailhan nimo siya. Sa susama, gigamit ni Jehova ang mga propeta aron sultihan ta kon unsay buhaton sa Mesiyas ug unsay mahitabo kaniya. Kay natuman kang Jesus ang maong mga tagna, nakatabang kini sa sinserong mga tawo nga mahibaloan nga siya ang Mesiyas.

7. Paghisgot ug duha ka tagna nga nagpamatuod nga si Jesus ang Mesiyas.

 ⁷ Hisgotan nato ang duha sa maong mga tagna. Una, 700 ka tuig sa wala pa matawo si Jesus, gitagna ni Miqueas nga ang Mesiyas matawo sa Betlehem, nga usa ka gamayng lungsod. (Miqueas 5:2) Ug tuod man, didto natawo si Jesus! (Mateo 2:1, 3-9) Ikaduha, gitagna ni Daniel nga ang Mesiyas motungha sa tuig 29 C.E. (Daniel 9:25) Duha lang kini sa daghang tagna nga klarong nagpamatuod nga si Jesus ang gisaad nga Mesiyas.​—Tan-awa ang Endnote 13.

8, 9. Unsay nahitabo sa bawtismo ni Jesus nga nagpamatuod nga siya ang Mesiyas?

⁸ Giseguro gyod ni Jehova nga mahibaloan sa mga tawo nga si Jesus ang Mesiyas. Ang Diyos misaad nga hatagan niyag ilhanan si Juan nga Tigbawtismo aron mailhan niya kon kinsa ang Mesiyas. Dihang miadto si Jesus kang Juan aron magpabawtismo sa Suba sa Jordan niadtong 29 C.E., nakita ni Juan ang maong ilhanan. Gisulti sa Bibliya kon unsay nahitabo: “Human mabawtismohi, si Jesus mihaw-as dayon sa tubig; ug tan-awa! ang langit nabuksan, ug iyang nakita ang espiritu sa Diyos nga nanaog samag salampati ug kini mikunsad kaniya. Dihay tingog usab gikan sa langit nga nag-ingon: ‘Kini mao ang akong Anak, ang akong gihigugma, nga akong giuyonan.’” (Mateo 3:16, 17) Pagkadungog ug pagkakita ni Juan niini nga ilhanan, nahibalo siya nga si Jesus gyod ang Mesiyas. (Juan 1:32-34) Nianang adlawa,  dihang gibubo ni Jehova kang Jesus ang iyang espiritu, si Jesus nahimong Mesiyas. Siya ang gipili sa Diyos nga mahimong Pangulo ug Hari.​—Isaias 55:4.

⁹ Ang mga tagna sa Bibliya, ang giingon ni Jehova, ug ang ilhanan nga Iyang gihatag dihang gibawtismohan si Jesus nagpamatuod nga si Jesus ang Mesiyas. Pero diin man gikan si Jesus, ug unsa may iyang kinaiya? Atong susihon ang giingon sa Bibliya.

10. Unsay gitudlo sa Bibliya bahin kang Jesus sa wala pa siya moanhi sa yuta?

¹⁰ Ang Bibliya nagtudlo nga si Jesus dugay na kaayong nagpuyo sa langit sa wala pa siya moanhi sa yuta. Si Miqueas miingon nga ang Mesiyas “gikan pa sa karaang kapanahonan.” (Miqueas 5:2) Si Jesus mismo kadaghan miingon nga nagpuyo na siya sa langit sa wala pa ipanganak ingong tawo. (Basaha ang Juan 3:13; 6:38, 62; 17:4, 5.) Busa sa wala pa moanhi si Jesus sa yuta, siya duna nay espesyal nga relasyon kang Jehova.

11. Nganong gimahal kaayo ni Jehova si Jesus?

¹¹ Gimahal kaayo ni Jehova si Jesus. Ngano? Kay siya ang kinaunhang gilalang sa Diyos. Busa si Jesus gitawag “ang panganay sa tanang kalalangan.” * (Colosas 1:15) Gawas pa, si Jesus lang ang direktang gilalang ni Jehova. Busa gitawag siya nga “bugtong nga Anak.” (Juan 3:16) Si Jesus lang ang gigamit ni Jehova sa paghimo sa tanang ubang butang. (Colosas 1:16) Ug si Jesus lang ang gitawag “ang Pulong,” kay gigamit siya ni Jehova aron hatagag mensahe ug instruksiyon ang mga anghel ug mga tawo.​—Juan 1:14.

12. Nganong nahibalo ta nga si Jesus ug ang Diyos managlahi nga persona?

¹² Daghan ang nagtuo nga si Jesus ug ang Diyos mao ra nga persona. Pero dili na maoy gitudlo sa Bibliya. Ang Bibliya nag-ingon nga si Jesus gilalang, busa si Jesus dunay sinugdanan. Pero si Jehova, nga maoy naglalang sa tanang butang, walay sinugdanan. (Salmo 90:2) Ingong  Anak sa Diyos, si Jesus wala gyod maghunahuna nga mahimong sama sa Diyos. Tin-awng gitudlo sa Bibliya nga ang Amahan labaw kay sa Anak. (Basaha ang Juan 14:28; 1 Corinto 11:3.) Si Jehova lang ang “Diyos nga Labing Gamhanan.” (Genesis 17:1) Siya ang kinalabwan ug labing gamhanang persona sa uniberso.​—Tan-awa ang Endnote 14.

13. Nganong ang Bibliya nag-ingon nga si Jesus “ang larawan sa dili makita nga Diyos”?

¹³ Si Jehova ug ang iyang Anak, si Jesus, nagkauban na sa binilyong katuigan sa wala pa lalanga ang langit ug yuta. Seguradong gimahal kaayo nila ang usag usa! (Juan 3:35; 14:31) Nasundog pag-ayo ni Jesus ang kinaiya sa iyang amahan mao nga ang Bibliya nag-ingon nga siya “ang larawan sa dili makita nga Diyos.”​—Colosas 1:15.

14. Sa unsang paagi gipanganak ingong tawo ang minahal nga Anak ni Jehova?

¹⁴ Kinasingkasing nga mibiya sa langit ug nagpakatawo dinhi sa yuta ang minahal nga Anak ni Jehova. Sa unsang paagi? Pinaagig milagro, gibalhin ni Jehova ang kinabuhi sa iyang Anak gikan sa langit ngadto sa tagoangkan sa dalagang si Maria. Tungod niini, si Jesus wala matawo pinaagig tawhanong amahan. Busa si Maria nanganak ug hingpit nga bata, ug ginganlan niya kinig Jesus.​—Lucas 1:30-35.

15. Sa unsang paagi mas mailhan nimo si Jehova?

¹⁵ Daghan pa kag makat-onan bahin kang Jesus, sa iyang kinabuhi, ug sa iyang kinaiya kon imong basahon ang Mateo, Marcos, Lucas, ug Juan. Kini nga mga basahon gitawag nga mga Ebanghelyo. Gisundog pag-ayo ni  Jesus ang iyang Amahan, mao nga ang imong mabasa makatabang nimo nga mas mailhan si Jehova. Kini ang rason kon nganong si Jesus miingon: “Kadtong nakakita kanako nakakita usab sa Amahan.”​—Juan 14:9.

16. Unsay gitudlo ni Jesus? Diin gikan ang mga gitudlo ni Jesus?

¹⁶ Daghan ang nagtawag kang Jesus nga “Magtutudlo.” (Juan 1:38; 13:13) Usa sa pinakaimportante niyang gitudlo mao ang “maayong balita sa Gingharian.” Unsa ni nga Gingharian? Gobyerno ni sa Diyos nga magmando sa tibuok yuta gikan sa langit. Ang mga masinugtanon sa Diyos panalanginan niini. (Mateo 4:23) Ang tanang gitudlo ni Jesus naggikan kang Jehova. Si Jesus miingon: “Ang akong gitudlo dili akoa, kondili iya sa nagpadala kanako.” (Juan 7:16) Nahibalo si Jesus nga gusto ni Jehova nga madungog sa mga tawo ang maayong balita nga ang Gingharian sa Diyos magmando sa yuta.

17. Diin nanudlo si Jesus? Nganong naghago siya sa pagtudlo sa uban?

¹⁷ Diin nanudlo si Jesus? Bisan diin nga naay tawo​—sa siyudad, baryo, merkado, dapit sa pagsimba, ug kabalayan. Wala siya maghulat nga duolon sa mga tawo. Sagad, siya gyod ang moduol nila. (Marcos 6:56; Lucas 19:5, 6) Si Jesus naghago ug naggahin ug daghang panahon sa pagtudlo sa mga tawo. Ngano? Kay mao nay gusto sa Diyos nga iyang himoon ug kanunay niyang gisunod ang iyang Amahan. (Juan 8:28, 29) Nagsangyaw sad si Jesus kay naluoy siya sa mga tawo. (Basaha ang Mateo 9:35, 36.) Nakita niya nga ang mga lider sa relihiyon wala magtudlo sa kamatuoran bahin sa Diyos ug sa iyang Gingharian. Busa kutob sa mahimo, gusto niyang daghan ang matabangan nga makadungog sa maayong balita.

18. Unsang mga kinaiya ni Jesus ang gusto kaayo nimo?

 ¹⁸ Si Jesus nahigugma ug naluoy sa mga tawo. Buotan siya ug daling duolon. Bisan ang mga bata ganahang moduol niya. (Marcos 10:13-16) Si Jesus walay gipaboran. Gidumtan niya ang korapsiyon ug inhustisya. (Mateo 21:12, 13) Sa iyang panahon, ang mga babaye wala kaayo hatagig katungod ug wala kaayo respetoha. Pero kanunayng girespeto ni Jesus ang mga babaye ug gihatagag dignidad. (Juan 4:9, 27) Mapainubsanon sab siya. Pananglitan, dihay gabii nga gihugasan niya ang tiil sa iyang mga apostoles, nga sagad ginahimo lang sa usa ka sulugoon.​—Juan 13:2-5, 12-17.

19. Unsay nagpakita nga nahibalo si Jesus kon unsa gyoy gikinahanglan sa mga tawo ug nga gusto siyang motabang nila?

¹⁹ Nahibalo si Jesus kon unsa gyoy gikinahanglan sa mga tawo, ug gusto siyang motabang nila. Ato kanang nakita dihang gigamit niya ang gahom sa Diyos sa pag-ayo sa mga tawo. (Mateo 14:14) Pananglitan, miduol kang Jesus ang usa ka sanlahon ug miingon: “Kon gusto lang nimo, ikaw makahinlo nako.” Nakita ni Jesus ang pag-antos sa sanlahon maong naluoy siya ug gustong motabang. Busa iyang gihikap siya ug giingnan: “Gusto ko! Mamahinlo ka.” Ug naayo ang sanlahon! (Marcos 1:40-42) Mahunahuna ba nimo ang gibati sa maong tawo?

20, 21. Kon bahin sa pagsunod sa Diyos, nganong si Jesus ang pinakamaayong ehemplo?

²⁰ Kon bahin sa pagsunod sa Diyos, si Jesus ang pinakamaayong ehemplo. Bisag unsay nahitabo o bisag unsay gihimo kaniya sa mga kaaway, nagmatinumanon  siya sa iyang Amahan. Pananglitan, si Jesus wala magpatental kang Satanas. (Mateo 4:1-11) Ang ubang membro sa pamilya ni Jesus wala motuo nga siya ang Mesiyas ug miingon nga “nabuang na siya,” pero si Jesus padayong nagtuman sa sugo sa Diyos. (Marcos 3:21) Dihang gibinuangan siya sa iyang mga kaaway, si Jesus nagmatinumanon sa Diyos ug wala gyod mobalos.​—1 Pedro 2:21-23.

²¹ Bisag si Jesus gipaantos pag-ayo ug gipatay, nagmatinumanon gihapon siya kang Jehova. (Basaha ang Filipos 2:8.) Hunahunaa ang iyang giantos sa adlaw nga siya gipatay. Gidakop siya, giakusahan nga nagpasipala, gihukman sa korap nga mga huwes, gibugalbugalan sa mga tawo, gipaantos sa mga sundalo, ug gilansang sa  estaka. Dihang siya hapit nang mamatay, siya miingon: “Natuman na!” (Juan 19:30) Tulo ka adlaw human mamatay si Jesus, gibanhaw siya ni Jehova ingong espiritu. (1 Pedro 3:18) Paglabayg pipila ka semana, mibalik si Jesus sa langit, “milingkod sa tuong kamot sa Diyos,” ug naghulat sa Diyos nga himoon siyang Hari.​—Hebreohanon 10:12, 13.

22. Kay si Jesus nagmatinumanon sa iyang Amahan, unsang kahigayonan ang bukas nato karon?

²² Kay si Jesus nagmatinumanon sa iyang Amahan, naa na tay kahigayonan nga mabuhi sa paraisong yuta hangtod sa hangtod, nga maoy gusto ni Jehova. Hisgotan sa sunod kapitulo kon sa unsang paagi ang kamatayon ni Jesus maghatag ug kinabuhing walay kataposan.