1, 2. (a) Ü ˗bhaa ˈgü ˈsaamɛn ˈtɔ dɔ ˗sü ˈpö ˈtɔ˗ ˗a ꞊dede dɔ ˗sü ˗ee? ˗A ˈgü ˈˈpʋ. (b) Mɛn ˗nu ˗wa ˗pö Yesu ˗bha ꞊dhɛ?

MƐN ˗nu ˈö ˈsaa˗ ˈdhö ˗an ˗ta, ˗wo ꞊va ˈˈkpɔnŋ ꞊taa. ˗A ˈbha ꞊ya kë kö ü˗ mɛn do ˈtɔ ˗dɔ. ˈˈKɛɛ ˗a ˗mɛn ˈtɔ dɔ ˗sü ˈyaa ˈnën ˗tɔ ˗a ˗mɛn ˗dɔ ˗së ˈka ˗sü. ˗A ˈtɔ dɔ ˗sü ˈyaa ˈnën ˗tɔ ˈwɔn ˈˈpɛpɛ ˈö ˗gban ˗a ˗bha ˗tosɛta ˗bha, ɛɛnˈˈ ˈmɛn ˈö˗ ˈka ꞊dedewo ˗a dɔ ˗sü.

² ˈKö ˗kë ꞊dhɛ ˈdhɛ Yesu Klito ˗kë ˈˈkpɔnŋ ꞊taa ꞊ya ˗mɔɔn ˗kwɛ 2.000 ˗bha ꞊dɛɛ, ˗a ˈbhaa ꞊ya ˗kë kö ˈwɔn ˈö ˗gban ˗a ˗bha ˈbha˗ man. ˈˈKɛɛ mɛn suu ꞊dede ˈö Yesu kun˗ ˈka, mɛn ꞊vadhɛ ˈwaa˗ dɔ. Mɛn ˈbhaa ˗nu ˗wa ˗pö ˈˈklʋʋsëmɛn ˗mü, ˈö mɛn ˈbhaa ˗nu ˗wa ˗pö ˗Zlan ˗wodhiʋ̈lomɛn ˗mü, ˈö mɛn ˈbhaa ˗nu ˗wa pö ˈzü ˗Zlan ˗mü. Ü ü ˗bhaa ˗pö ˗a ˈgü ꞊dhɛ?˗Bhö kpɔɔˈˈ ˗zoto ˗a ˈˈpiʋ̈ ˗wɔn 12˗bha.

3. ˗Mën ˈö ˗kë Zoova waa Yesu Klito ˗an dɔ ˗sü ˈdhö ˗së ü ˗bhaa ˈka?

³ ˗Yö ˗së ü ˗bhaa ˈka kö gagade ˈö ˗gban Yesü ˗bha ˈü˗ dɔ. ˗Mën ˈö ˗kë? Biblö ˗ya ˗pö kwa ˗dhɛ: ‘꞊Sii ˈö ˈyaa yën ˈˈdhʋ̈ bha˗ ˗nu ˗a ˗nu ˗dhɛ ˗kɔ ˈö ˈdhö yö mü ꞊dhɛ kö ˈmɛ ˈwo ˈˈdhʋ̈ bha ˗wo bhi ˈö ˈi ˗kë ˗Zlan doseng ˈö ˈdhö ˗a ˈka bha bhi ꞊në i dɔ, kö ˗wo mang Yesu Klisi ˗mɛ ˈi n bɔ bha n dɔ ˈpö.’ (Zan 17:3) Kö gagade ˈö ˗gban Zoova waa Yesu ˗an ˗bha ˈü˗ dɔ, ü ˗dho ꞊mɔɔn˗ ˗bha ˈü ˗tosɛta ˗kë ꞊bhɔɔ ˈˈsɛ ˗ta yi ꞊gban ˈka. (Zan 14:6) ꞊Ya ˈgo˗ ˈgü ˈzü, Yesu dɔ ˗sü ꞊mɔɔn˗ ˗bha ˈö ü ˗takun, ˈyö ˗tɔ ꞊dhɛ yö ˈnën ˗tosɛta kë ˗kɔ waa mɛn ˗nu ˈkun ˗kɔ ˈwɔnzuan ˗së ˈka. (Zan 13:34, 35) Gagade ˈö ˗gban ˗Zlan ˗bha kwa˗ ˗draan ˈwɔn ˗gɔ 1ˈgü. ˈPë Biblö ˗ya pö Yesu ˗bha, ˈyö ˈkwa ˗dho ˗a draanˈˈ ˈwɔn ˗gɔ ˈdhɛ ˈö yö˗ ˈgü.

4. ˗Wo ˗nu ˈwo ˗kë “Mesi” waa “Klito” ˗an ˈka bhë, ˗an ˈklɔɔ˗ ˈtɔ˗ ˗mën?

⁴ Zoova ˗yö ˗kwɛ ꞊va ˗to Yesu bhɔ ˗sü ˈˈdhiʋ̈, ˈö˗ ˈˈplüün bho Biblö ˈgü ꞊dhɛ ö ˗dho ö ˗bha Mesi ɛɛnˈˈ Klito bɔ. ˗Wo kpö ˈö ˗kë “Mesi” ˈka bhë, ˗yö ˗go Eblö ˗wo ˈgü, ˈö˗ ˈdhɛ ˗kë “Klito” ˈka, ˈö go Glɛkö ˗wo ˈgü. Mɛn ˗zë ˈtɔ ˈka ˗wo ꞊plɛ ˈwo bhë, ˗an ˗gɛn ˈtɔ˗ ꞊dhɛ ˗Zlan ˗dho ö ˗kɔ ˈˈyɛ Mesi ˗bha, kö ˈö ˗yɛɛ ˈˈkpii˗ ˈö ö ˗de ˗ta ˗a nu ˗a ˗dhɛ. ˗Zlan ˗bha ˗Yamɛn ˗dho ˗a kë ˈö pë ˈˈpɛpɛ ˈö ˗Zlan ˗yö ˗an ˈˈplüün bho ˈwo ˗kë gagade ˈka. Yesu ˗mɔn ˗a ˗bha ˈzü ˈö ü ˗takun ˈˈtʋ̈ŋ yö˗ ˈgü. Kö Yesu yö ˈti bhɔ ꞊köŋ, mɛn ꞊vadhɛ wo ˗de dhɛɛˈˈ ˗kpɔ ꞊dhɛ: ‘De ˈö ˗dho kë Mesi ˈka?’

5. Yesu ˗bha gwëëˈˈ ˗nu ˗wa ˗yö ꞊dhɛ Mesi ˈdhö ˗ee?

⁵ Yesu ˗bha gwëëˈˈ ˗nu wo ˈti dɔ ˈdudhö ꞊dhɛ yö ˈnën ˗tɔ ˗Zlan ˗bha ˗Yamɛn ˈö˗ ˈˈplüün bho. (Zan 1:41) ˗A ˈwɔnzuan ˈnën ˗tɔ Simɔn Piɛdhö ˗ya ˗pö Yesu ˗dhɛ ꞊dhɛ: “˗Zlan ˗bha ˗Yamɛ ˈö˗ bɔ yö ˗mü i ˈka.” (Matiö 16:16) ˗Mën ˈö ˗dho ˗a ˗zɔn kwa ˗dhɛ ˈkpakpadhö ꞊dhɛ Yesu ˈnën ˗tɔ ˗Zlan ˗bha ˗Yamɛn?

6. Zoova ˗yö zuʋ̈puumɛn ˗nu ˗takun ˗kɔ ˗kë ꞊dhɛ kö ˗wo Mesi dɔ?

⁶ ˗Zlan ˗wodhiʋ̈lomɛn ˗nu Yesu bhɔ ˈˈtʋ̈ŋ ˗to ˈˈdhiʋ̈ ꞊gblɛɛn, ˈö ˈwo ˈwɔn ˗nu ˈwo ˗gban Mesi ˗bha ˗an ˗bɛn zë, kö ˗wo mɛn ˗nu ˗takun kö ˗wa dɔ. ˗Yö ˗kë ˈˈdhʋ̈ ˗kɔ ˗kë ꞊dhɛ? Kö ˗wa pö ü ˗dhɛ ˈü ˈdho mɛn ˈö ˈbhaa˗ dɔ ˗a ˗gɔ ʒiaan˗ gɔsüdhɛ ˈö mɛn ˗nu ˈdhö mü ꞊va ˗a ˈgü, ü ˗dho ˗a kë ꞊dhɛ? Kö ˗kɔ ˈö˗ ˗mɛn ˈdhö˗ ˗bha ˗wa ˗bhokoo kë ü ˗dhɛ ˗së ˈka, ü ꞊mɔɔn˗ ˗bha ˈü˗ ˗mɛn ꞊slɔɔ. ˗Kɔ do ˈö bhë ˗a ˈgü, Zoova ˗bɔ ö ˗wodhiʋ̈lomɛn ˗nu ˗ta ˈö ˈwɔn ˈö Mesi dho ˗a kë, waa ˈwɔn ˈö ˗dho kë ˗a ˈka ˗an ꞊blɛɛ kwa ˗dhɛ. ˗Wo ˈˈpɛpɛ ˈwo ˗an to ˈˈdhiʋ̈ ˈwo ˗an ꞊blɛɛ bhë, ˗an ˗bha kë ˗sü ˗yö zuʋ̈puumɛn ˗nu ˗takun ˈö ˈwo˗ ˈwɔn dɔ ꞊dhɛ Yesu ˈnën ˗tɔ Mesi.

7. ˈWɔn ꞊plɛ ˗mɛɛn ˈwo ˗an to ˈˈdhiʋ̈ ˈwo ˗an ꞊blɛɛ ˈö ˈwo˗ ˗zɔn ꞊dhɛ Yesu ˈnën ˈtɔ˗ Mesi?

 ⁷ ˗Wo ˗nu ˈwo ˗an to ˈˈdhiʋ̈ ˈwo ˗an ꞊blɛɛ bhë, ˗an ꞊plɛ ꞊nɛn: ˗A ˗blɛɛsü ˈgü, ˗Zlan ˗wodhiʋ̈lomɛn Mika ˗yö ˗kwɛ 700 ˗to Yesu bhɔyi ˈˈdhiʋ̈ ˈyö˗ pö ꞊dhɛ Mesi ˗dho bhɔ ˈpödhɛ ˈnën ˈdɛdɛ ˈwo˗ ˗dhɛ Betedhɛmö bhë˗ ˈgü. (Mika 5:2) ˗Dhɛ ꞊dede ˈö bhë, ˈyö Yesu bhɔ ˗a ˗bha. (Matiö 2:1, 3-9) ˗A ꞊plɛ ˗bhaa ˗naan ˈnën ˗tɔ ꞊dhɛ, Daniɛdhö ˗ya ˗to ˈˈdhiʋ̈, ˈö˗ pö Mesi ˗dho ˗wo zaŋta ˗kwɛ 29 ˈka K.Y. (Daniel 9:25) ˗Wo ꞊vadhɛ ˗nu ˈwo ˗an to ˈˈdhiʋ̈ ˈwo ˗an ꞊blɛɛ, ˈö ˈwo˗ ˗zɔn ꞊dhɛ Yesu ˈnën ˗tɔ Mesi, ˗an ꞊plɛ ˈnën ˈwo bhë.—Bhö kpɔɔˈˈ ˗zoto ˗a ˈˈpiʋ̈ ˗wɔn 13˗bha.

8, 9. ˗Mën ˈö ˗kë Yesu ˗bɔyibhaa ˈˈtʋ̈ŋ ˈka ˈö˗ ˗zɔn ꞊dhɛ Yesu ˈnën ˗tɔ Mesi?

⁸ Zoova ˗ya ˗zɔn ˈˈpuu ˈka ꞊dhɛ Yesu ˈnën ˗tɔ Mesi. ˗Zlan ˗ya pö Zan mɛnbɔyibhaamɛn ˗dhɛ ꞊dhɛ, ö ˗dho pë do ˈbha ˗zɔn ˗a ˗dhɛ kö ˗yö Mesi dɔ. ˈDhɛ ˈö Yesu ˗yö dho Zan mɛnbɔyibhaamɛn ˈˈpiʋ̈ kö ˗yö ö bɔ ˈˈyiëë˗ Zuudɛn ꞊bhaa ˗kwɛ 29 ˈka K.Y, Zan ˗yö pë ˈö bhë ˗a yö. Pë ˈö ˗kë mü Biblö ˗ya ˗pö kwa ˗dhɛ: “꞊Dhɛ ˈö Yesu ˈdhö ˈgo sië ˈˈyi ꞊bhaa (kö Zan ꞊ya bo˗ ˈˈzu ˗sü ˈka), ˈö dho ˗dhɛ ˗ga kö dhang˗ ˈˈdhi ꞊ya ˈˈpʋ ˗a wëëdhö kö ˗Zlan ˗bha ˈnii˗ ˗yö ˈgo sië dhang˗ ˈgü ˈö ꞊lɔɔ˗ ˗ta ꞊dhɛ ˗tong ˈdhö, ˈyö˗ ˈˈtʋ ˈdhö ˗da ˈzü ˗wʋ do ˈbha ˈgü kö ˗yö ˈˈwɩ sië dhang˗ ˈgü ˈö˗ pö: ‘N Gbö doseng ˈö n ˗gɔ ˈyö dɔ bha, ˗a ˗dhɔ ˈö n ˗kë ˗a ˈˈsinma ˈyaa ˈdhö.’” (Matiö 3:16, 17) ꞊Dhɛ ˈö Zan ˗yö ˗kpan pë ˈö bhë˗ ˗bha, ˈö ˗wo bhë˗ man, yö˗ ˈwɔn ˗dɔ ꞊dhɛ Yesu ˈnën ˗tɔ Mesi. (Zan 1:32-34) ˗Dhɛkpaɔyi ˈö bhë˗ ˈka, ˈdhɛ Zoova ˗yö ö ˗bha ˗zuu ˈˈslʋ̈ʋ̈slʋ̈  ꞊yɔɔ˗ ˗ta, ˈyö Yesu ˗kë Mesi ˈka. Yö ˈnën ˈö ˗Zlan ö ˗kɔ yɛ ˗a ˗bha kö ˗yö kë ˗Gblüdë ˈka. —Isaïe 55:4.

⁹ ˈPë ˗nu ˈö Biblö ˗yö ˗an to ˈˈdhiʋ̈ ˈö ˗an ꞊blɛɛ, ˈpë zoova yöö ꞊dede ˈö˗ pö, waa pë ˈö˗ ˗zɔn Yesu ˗bha ˗bɔyibhaa ˈˈtʋ̈ŋ ˈka, ˗wa ˗zɔn ꞊dhɛ Yesu ˈnën ˗tɔ Mesi. ˈˈKɛɛ Yesu ˗go ˈˈmɛn? ˗Yö ˗kun ˗kɔ ˗kë ꞊dhɛ? Pë ˈö Biblö ˗ya pö, ˗kwaa ˗ga.

10. ˗Mën ˈö Biblö ˗ya pö Yesu ˗bha ˗tosɛta ˈö˗ ˗kë kö ˗yö ꞊kun nu ˈˈkpɔnŋ ꞊taa ˗a ˗bha?

¹⁰ Biblö ˗ya ˗pö ꞊dhɛ Yesu ˗kë dhaŋ˗ ˈgü ˈˈtʋ̈ŋ ꞊gblɛɛn ˈˈpiʋ̈ ˈyö ꞊kun nu ˗ni ˈˈkpɔnŋ ꞊taa. Mika ˗ya ˗pö ꞊dhɛ Mesi bhë, “ˈˈtʋ̈ŋ zii ˈgü” ˗mɛn ˗mü. (Mika 5:2) Yesu yöö ꞊dede ˗ya ˗pö ˗gɛn ˗ɲan ˈka ꞊va ꞊dhɛ ö ˗kun dhaŋ˗ ˈgü ˈyö ꞊kun bhɔ ˗ni ꞊dhɛ mɛnbhɩɩdhe ˈdhö ˈˈkpɔnŋ ꞊taa. (Zan 3:13; 6:38, 62; 17:4, 5 ˗wo pö.) ˗A ˗de ˗ʒian ˗mlɛɛn ˗detasü ˗kun Yesu waa Zoova ˗an ꞊zinŋ ˈgü ˈyö ꞊kun nu ˗ni ˈˈkpɔnŋ ꞊taa.

11. ˗Mën ˈö ˗kë Yesu ˗wɔn ˈdhö ˈˈgbɩɩ˗ Zoova ˗gɔ?

¹¹ Yesu ˗wɔn ˗yö Zoova ˗gɔ ˈˈgbɩɩ˗ ꞊dedewo. ˗Mën ˈö ˗kë? ˗A ˗gɛn ˈtɔ˗ ꞊dhɛ ˗Zlan ˗ya ˗da pë ˈˈpɛpɛ ɛɛnˈˈ mɛn ꞊gban ˈˈpɛpɛ ˈˈdhiʋ̈. ˗A ˗wɔn ˈgü, ˗wo Yesu ˗dhɛ “˗Zlan ˗bha ˈnë ˗blɛɛzë.” * (Kodhɔsö 1:15) Yesu ˗wɔn ˗yö Zoova ˗gɔ ˈˈgbɩɩ˗ ˈzüzü, ˈyö ˗tɔ ꞊dhɛ yöö dosɛnŋ ˈnën Zoova ˗ya ˗da vɛɛdhö. ˈYö ˈnën˗ ˗wɔn ˈgü ˈyo ˈwo˗ ˗dhɛ ˗Zlan ˗bha “ˈNë ga do.” (Zan 3:16) Yesu yöö dosɛnŋ ˈnën Zoova bɔ ˗a ˗ta ˈzü ˈyö pë ꞊gban ˈˈpɛpɛ ˗da. (Kodhɔsö 1:16) Yö do ˈö bhë ˈzü ˈyö ˈwo˗ ˗dhɛ “˗Zlan ˗Wo,” ˈyö ˈtɔ˗ ꞊dhɛ ˗Zlan ˗yö ˗bɔ ˗a ˗ta ˈyö ö ˗bha nɔɔnwo waa ö ˗bha ˗dhioo ˗nu ˈˈdhiʋ̈ ˗lo ö ˗bha ˈˈkiö ˗nu waa mɛnbhɩɩdhe ˗nu ˗bha.—Zan 1:14.

12. Kwa˗ ˈwɔn ˗dɔ ˗kɔ ˗kë ꞊dhɛ ꞊dhɛ Yesu waa ˗Zlan ˈwaa do?

¹² Mɛn ˈbhaa ˗nu wo ˗zota ꞊dhɛ Yesu waa ˗Zlan ˗wo do. ˈˈKɛɛ Biblö yö ˈti˗ pö ˈˈdhʋ̈. Biblö ˗ya ˗pö ꞊dhɛ ˗Zlan ˈnën Yesu ˗da. ˗Ya ˗zɔn ꞊dhɛ Yesu ˗bha ˗tosɛta züdɔdhɛ ˗yö ˗dhö. ˈˈKɛɛ Zoova ˈö  pë ˈˈpɛpɛ ˗da bhë, ˗a ˗bha ˗tosɛta züdɔdhɛ ˈyaa ˈdhö. (Psaume 90:2) Yesu ˈö ˗kë ˗Zlan Gbö ˈka bhë, ö ˗de ˗zɔn ˗Zlan ˈka ˗sü yö ˈti nu ˗a ˗zo ˈˈpiʋ̈ do toŋtoŋdhö. Biblö ˗ya ˗pö ˈˈpuu ˈka ꞊dhɛ ˗a Dë ˗duɛɛ ˗yö ˈkpii˗ ö gbö ˗bha. (Zan 14:28 ˗wo pö; 1 Kodhɛngtö 11:3.) Zoova yöö dosɛnŋ ˈnën ˗tɔ “ ˈˈPiigbeedë ˗Zlan.” (ˈWunzüdɔdhɛ 17:1) Yö ˈnën ˗tɔ pë ˈˈpɛpɛ ˈwo ˈdhö, ˗an ˈkpiisü waa˗ ˈˈpiigbɩɩsü ꞊dede.—Bhö kpɔɔˈˈ ˗zoto ˗a ˈˈpiʋ̈ ˗wɔn 14˗bha.

13. ˈMën ˗kë ˈö Biblö ˗ya pö ꞊dhɛ Yesu ˈnën ˗tɔ “˗Zlan ˈö mɛ gbɛ ˈyan ˈyaa ˗kpën ˗a ˗bha ˗a ˈbin”?

¹³ Zoova waa ö Gbö Yesu ˗wo yökë wo ˈko ˈˈpiʋ̈ ˗kwɛ ˈˈmliya ꞊va ꞊dede ˈˈpiʋ̈, ˈyö ˈwo ꞊kun ˈˈsɛ waa dhaŋ˗ ˗an ˗da ˗ni. ˗An ˗dhɔ ˗yö ˗kun ˗an ˈko kë ˗ni ˈgü ꞊dedewo! (Zan 3:35; 14:31) Yesu ˗yö ˗to ö Dë ˗bha ˈˈklʋʋsë ˗nu ˈˈpiʋ̈, ˗a ˗wɔn ˈgü Biblö ˗ya ˗dhɛ “˗Zlan ˈö mɛ gbɛ ˈyan ˈyaa ˗kpën ˗a ˗bha ˗a ˈbin.”—Kodhɔsö 1:15.

14. Zoova Gbö ˈö˗ ˗wɔn ˈdhö˗ ˗gɔ ˈˈgbɩɩ˗ bhë, ˗yö ˗bhɔ ꞊dhɛ mɛnbhɩɩdhe ˈdhö ˗kɔ ˗kë ꞊dhɛ?

¹⁴ Zoova Gbö ˈö˗ ˗wɔn ˈdhö˗ ˗gɔ ˈˈgbɩɩ˗ ˗bhë, ˗yö ˗we ˗a ˗bha kö ˈö ˈgo dhaŋ˗ ˈgü, kö ˈö bhɔ ˈˈkpɔnŋ ꞊taa, kö ˈö kë mɛnbhɩɩdhe ˈka. ˗Yö ˗kë ˈˈdhʋ̈ ˗kɔ ˗kë ꞊dhɛ? ˗Dhidha ˈnën Zoova ˗ya ˗kë. ˗Yö ö Gbö ˗bha ˗tosɛta ˗bɔ ˈnëndhebɔnën do ˈö ˈyaa gɔn ˗wɔn dɔ ˈwo˗ ˗dhɛ Madhi ˗a ˈˈgblüü. ˗A ˗kë ˈˈdhʋ̈ ˗sü ˈgü, Yesu dë yö ˈti kë mɛnbhɩɩdhe ˈka. ˈDhɛ ˈö ˗kë ˈˈdhʋ̈ ˈyö Madhi ˗yö ˈnën gɔɔn˗ ˈˈslʋ̈ʋ̈slʋ̈ kpɔ ˈyö ˈwo˗ ˗dhɛ Yesu.—Dhukö 1:30-35.

15. Ü ˗dho Zoova dɔ ˗së ˈka ˗kɔ ˗kë ꞊dhɛ?

¹⁵ ˈWɔn ˗nu ˈwo ˗gban Yesu ˗bha, ˈwo ˗gban ˗a ˗bha ˗tosɛta waa˗ ˗bha ˈˈklʋʋsë ˗nu ˗bha, ü ꞊mɔɔn˗ ˗bha ˈü ˗an ꞊draan Biblö ˈgü ˈsëëdhɛ ˗be ˗nu ˈwo ˗an ˗dhɛ Matiö, Makö, Dhukö waa Zan bhë, ˗an ˗wo pö ˗sü ˈka. ˗A ˈsëëdhɛ ˗be ˗nu ˗bhë, ˗wo ˗an ˗dhɛ Nɔɔn˗ ˗së ˗nu. ˈDhɛ ˈö ˗kë ꞊dhɛ Yesu ˗yö ˗bhɔ ö Dë ˗bha bhë, pë ˗nu ˈü ˗dho ˗an  ˗wo pö, ˗wo ˗dho ü ˗takun ˈpö kö ˈü Zoova dɔ ˗së ˈka. Yö ˈnën˗ ˗wɔn ˈgü ˈö Yesu ˗ya pö: “ˈMɛn ˈbha n yö kö ˈbha n Dë yö.”—Zan 14:9.

16. ˗Mën ˗wɔn ˈö Yesu kun mɛn ˗nu ꞊klaŋ ˗kë ˗ni ˈgü ˗a ˈka? ˗A ˗bha mɛn ꞊klaŋ kë ˗wo ˗nu ˗go ˈˈmɛn?

¹⁶ Mɛn ꞊vadhɛ ˗wo Yesu ˗dhɛ “˗Gɔmɛ.” (Zan 1:38; 13:13) ˈWɔn ꞊bhlëësü ˈö kun mɛn ˗nu ꞊klaŋ kë ˗ni ˈgü˗ ˈka bhë, ˗a do ˈtɔ˗ ‘ˈwɔn ˗taɔng ˗së ˈö ˗gban ˗Zlan ˗bha ˗Gblüdëdhɛ ˗bha.’ ˗Mën ˈö ˗tɔ ˗Zlan ˗bha ˗Gblüdëdhɛ? ˗Zlan ˗bha ˗Gblüdëdhɛ ˈnën ˗tɔ ˗Zlan ˗bha mɛnkɔɔnmɛn ˗nu sü ˈwo dhaŋ˗ ˈgü, ˈö ˗dho ˈˈkpɔnŋtaadhɛ ˗todhʋ̈sü ꞊kɔɔn, ˈö ˗dho ˈwɔn ˗së kë mɛn ˈˈpɛpɛ ˈwo ˈwɔn man ˗Zlan ˗ta ˗an ˗dhɛ. (Matiö 4:23) ˈWɔn ˈˈpɛpɛ ˈö Yesu mɛn ꞊klaŋ ˗kë ˗an ˈka bhë, ˗wo ˗go Zoova ˈˈpiʋ̈. Yesu ˗ya ˗pö: “˗Wʋ ˗nu ˈa mɛ ꞊klang kë sië˗ ˈka bha ˈˈwii ˈgo n ˗de ˈgü, ˗Zlan ˈö n bɔ bha ꞊në˗ dɔ n ˈˈdhi.” (Zan 7:16) Yesu ˗ya ˈwɔn dɔ ꞊dhɛ Zoova ˗ya ˈˈpiʋ̈ kö nɔɔnwo ˗së ˈö ˗kë ꞊dhɛ ˗Zlan ˗bha ˗Gblüdëdhɛ ˗dho ˈˈkpɔnŋtaadhɛ ꞊kɔɔn ˈka bhë, mɛn ˗nu ˗wa man.

17. Yesu ˗yö ˗kun mɛn ˗nu ꞊klaŋ kë ˗ni ˈgu ˈˈmɛn? ˈYö ˗mën ˈö ˗kë ˈö ö ˈgü dɔ ˈˈgbɩɩ˗ kö ˈö mɛn ˗nu ꞊klaŋ kë?

¹⁷ Yesu ˗yö ˗kun mɛn ˗nu ꞊klaŋ ˗kë ˗ni ˈˈmɛn? ꞊Dhɛ ˈˈoo ˗dhɛ ˈö mɛn ꞊slɔɔ ˗a ˗bha ˗a ˈgü. ˗Yö mɛn ˗nu ꞊klaŋ ˗kë gbɛɛtadhɛ ˗nu, ˈˈkwipö ˗nu, ˈpödhɛ ˗nu, ˈˈdhookwaadhɛ ˗nu, ˗zlandhɔkëdhɛ ˗nu waa mɛn ˗nu ˗bha ˈkɔɔdhɛ ˗nu ˈgü. Yesu yö ˈti ö ˈˈɲan ˈto kö mɛn ˗nu nu ö ˈˈpiʋ̈. Yö ˈnën dho ˗an ˈˈpiʋ̈ ꞊shiö ꞊shiö. (Makö 6:56; Dhukö 19:5, 6) Yesu ˗yö ö ˈgü ˗dɔ ˈˈgbɩɩ˗ ˈö ˈˈtʋ̈ŋ ꞊va sü, ˈö ö ꞊faan dɔ mɛn ˗nu ꞊klaŋ kë ˗sü ˗bha. ˗Mën ˈö ˗kë ˈö˗ ˗kë ˈˈdhʋ̈? ˗A ˗gɛn ˈtɔ˗ ꞊dhɛ ˗ya ˈwɔn dɔ ꞊dhɛ pë ˈö ˗Zlan ˈdhö˗ ˈˈpiʋ̈ kö ˗ya ˗kë ˈyö bhë. ꞊Ya ˈgo mü ˈzü, Yesu ˗yö ˈwɔn ˗man ö Dë ˗ta ˈˈtʋ̈ŋ ꞊gban ˈka. (Zan 8:28, 29) Yesu ˗yö ˗zlanwopö, ˈyö ˗tɔ ꞊dhɛ mɛn ˗nu ˗wëë ˗ya ˗kë ˈzü. (Matiö 9:35, 36 ˗wo pö.) ˗Ya ˗yö ꞊dhɛ ˗zlanwo ˗gɔdhiʋ̈mɛn ˗nu ˈwaa kun mɛn ˗nu ꞊klaŋ kë ˗ni ˈgü gagade ˈö ˗gban ˗Zlan waa˗ ˗bha ˗Gblüdëdhɛ ˗bha bhë˗ ˈka. ˗A ˈwɔn ˈgü, ˗yö ˗kun ˗a ˈˈpiʋ̈ ꞊dhɛ ˈö mɛn ꞊vadhɛ ꞊dede ˗takun kö ˗wo nɔɔnwo ˗së ˈö bhë ˗a man.

18. Yesu ˗bha ˈˈklʋʋsë ˗nu ˗mɛɛn ˈö ˗an ˗dhɔ ü ˗kë ꞊dedewo?

 ¹⁸ Yesu ˗yö ˗kun ˈmɛn ˈö mɛn ˗nu ˗dhɔ ˗ya ˗kë, ˈö ö ˈˈtʋ̈ŋ kë ˗an ˈgü ˗a ˈka. ˗A ˈˈgblü ˗kun ˗së, ˈö ˈwɔn ˗blɛɛ ˗a ˗dhɛ ˗sü ˈyaa kun ˈˈgbɩɩ˗. ˗A ˗dee ˗ʒiaan ˗kë ˗a ˈˈpiʋ̈ ˗sü ˗kun ˈnën ˗nu ˗dhɛ ˗së. (Makö 10:13-16) Yesu ˈyaa kun bɔ ˗ni ˈgü mɛn ˈbha ˈka ꞊flüü ˗ta. ꞊Flüüpë waa pë ˈyaa kpɛnŋdhö, ˗an ˗san ˗ya ˗kë. (Matiö 21:12, 13) ˗A ˗bha ˈˈtʋ̈ŋ ˈgü, ˗wo dhebɔ ˗nu ˗kɔ ˗bho ˈwɔn ꞊vadhɛ ˈgü, ˈö ˈwaa ꞊bhlëë ˗ya ˗an ˗bha. ˈˈKɛɛ Yesu ˗zë, ˗yö dhebɔ ˗nu ˗sü ˗së ˈˈtʋ̈ŋ ꞊gban ˈgü, ˈö ꞊bhlëë ˗ya ˗an ˗bha. (Zan 4:9, 27) Yesu ˗yö ˗kun ˗dekëtɩtɩmɛn ˈka ꞊dedewo. ˗A ˈwɔnzuan ˈtɔ ꞊dhɛ gbeŋ do ˈka, ˗yö ö ˗bha bɔmɛn ˗nu ˗gɛndhɛ ˗zu, ˈˈkɛɛ kö ꞊dhuëŋ ˗nu ˈnën ˗an këyö ˈdhö bhë ˗be.—Zan 13:2-5, 12-17.

19. ˈWɔnzuan ˗mɛɛn ˈö˗ ˗zɔn ꞊dhɛ Yesu ˗kun ö ˈˈtʋ̈ŋ kë ˗ni mɛn ˗nu ˗bhawɔn ꞊dede ˈgü, ˈyö kun ˗a ˈˈpiʋ̈ ꞊dhɛ ˈö ˗an ˗takun?

¹⁹ Pë ˈö mɛn ˗nu ˗bhawɔn kun ˗a ˗bha ꞊dedewo Yesu ˗ya ˗dɔ, ˈyö kun ˗a ˈˈpiʋ̈ ꞊dhɛ ˈö ˗an ˗takun. Kwa˗ ˗dhɛ ˗yö ˈkpakpadhö ˗Zlan ˗bha ˈˈpiigbɩɩdhe ˈö˗ sü ˈö ˈˈyua bho mɛn ˗nu ˈgü ˗dhidha ˈka bhë ˗a ˗bha. (Matiö 14:14) ˗A ˈwɔnzuan ˈtɔ˗ ꞊dhɛ ꞊weeyuamɛn do ˗yö ˗ɲɔɔn Yesu ˗bha ˈö˗ pö˗ ˗dhɛ: “N Dëmɛ a ˗nu kö ˈüën n dha. ꞊Ya kë ꞊dhɛ ˈbha ˈwe ˗a ˗bha, ˗bhö n bun kë ˈslööslö!” ˈˈYua ˈö kun gɔndë ˈö bhë ˗a kë ˗ni ˈgü waa ˈˈsaan ˈö kun ˗a wo ˗ni ˈgü, yö ˈnën Yesu zë ˗a ˗wɔn ˗dhɛ ˈyö ˗takun. ˗A ˗wëë ˈnën˗ ˗kë, ˈyö kun ˗a ˈˈpiʋ̈ ꞊dhɛ ˈö˗ ˗takun. ˈYö Yesu ö ˗kɔ pa ˗a ˈka ˈyö˗ pö˗ ˗dhɛ: “꞊Ya ga n ˈgü, ˗dhɛ ˈö ˈˈdhʋ̈ ˗bhö kë ˈˈklʋ̈ʋ̈klʋ̈.” ˈMɛn ˈö bhë ˗yö ˗to ˗dhɛ do ˈö bhë˗ ˈgü, ˈö˗ ˗bha ˈˈyua bo. (Makö 1:40-42) Ü ˗bha ˈgü gɔndënën ˈö bhë ˗yö ˗dho kë ö ˗de ˈgü ˗kɔ ˗kë ꞊dhɛ?

20, 21. Yesu ˗kë ˈwɔn ˗man ˗Zlan ˗ta ˗sü ˈwɔnzuan ˗së ˈka ˗kɔ ˗kë ꞊dhɛ?

²⁰ Yesu ˗yö ˈwɔn ˗man ˗Zlan ˗ta ˗sü ˈwɔnzuan ˗tiaandhö ˈka. ˈKö pë ˈˈpɛpɛ ˗kë, ɛɛnˈˈ ˈö˗ ˈyɔɔ˗ ˗nu pë ˈbha kë˗ ˈka, ˗yö ˗to ˗klu ˗sü ˈka ö Dë ˗bha. ˗A ˈwɔnzuan ꞊nɛn: ˈDhɛ ˈö Sɔtraan ˗ya ˈgüdan, Yesu yö ˈti ˈwɔn yaa ˈbha kë.  (Matiö 4:1-11) Yesu ˗de ˗bha ˈkɔdhigümɛn ˈbhaa ˗nu ˈwo ˈti ˈdhaŋ˗ bho ˗a ˈˈdhiʋ̈ ꞊dhɛ ˗Zlan ˗bha ˗Yamɛn ˈdhö. ˈYö ˈwo˗ pö ꞊dhɛ “pë ꞊në ˗ya ˗da ˈˈyan ˈgü.” (Makö 3:21) ˈDhɛ ˈö˗ ˈyɔɔ˗ ˗nu ˗wo pë ˈˈdhiʋ̈˗ ˗kë ˗a ˈka, Yesu ˗yö ˗to ˗klu ˗sü ˈka ˗Zlan ˗bha, yö ˈti˗ ˈˈslö mɛɛnˈˈ kö ˈö˗ ˈˈyoo bho ˗an ˗gɔ toŋtoŋdhö.—1 Piɛdhö 2:21-23.

²¹ ˗A ˗dee ˗ʒiaan ˈˈtʋ̈ŋ ˈö ˈwo˗ saanˈˈ ˗kë wo˗ ˈka, ˈö ˈwo˗ zë ˗kɔ yaa ˗kë ˗a ˈka bhë, ˗yö ˗to ˗klu ˗sü ˈka Zoova ˗bha. (Fidhipö 2:8 ˗wo pö.) ˗Dhɛkpaɔyi ˈwo˗ zë ˗a ˈka, ˈwɔn ˈwo˗ ˗wɔ ˗a ˗ta, bhi ꞊dede ü ˗zota ˗a ˈgü. ˗Wa ˗kun, ˈwo ꞊sua ˗ya ˗a ˗bha ꞊dhɛ ꞊ya ˈsi bho ˗Zlan ˗gɔ. ˈYö zakanmɛn ꞊flüüsü ˗nu ˗wo za ˗pö ˗a ˗ta, ˈyö mɛn ˗nu ˗wo ꞊wɛɛ dɔ˗ ˗bha, ˈyö ˈˈsɔla ˗nu ˗a ˗wëë ˗kë wo, ˈyö ˈwo˗ dɔ ˈˈdhü ˗bha. ˈDhɛ ˗dho ga,  ˈyö ˗gbla ˈö˗ pö: “Pë ˈplɛ ˈdhiö ꞊ya ꞊mɔ ˈkuë.” (Zan 19:30) ˈDhɛ Yesu ga ˗a ˗dhɛkpaɔyi ˗yaaga ˗bha ˗naan ˈka ˈyö Zoova ˗a bho ga ˈgü, ˈyö˗ ˗kë ˗zuu ˈka. (1 Piɛdhö 3:18) ˈDhɛ ˈˈdhoogɔ ˈbhaa ˗yö ˗ʒiö, ˈyö Yesu ˗yö ö yɛɛ ˗kë dhaŋ˗ ˈgü, “ˈyö ˗ya ˗duɛ ꞊bhlëësü ˈö ˗Zlan ˈˈsɔɔ bha˗ ˈgü”, ˈyö ö ˈˈɲan to kö ˗Zlan ˗ya kë ˗Gblüdë ˈka.—Eblö 10:12, 13.

22. Yesu ˗bha ˈto ˈö˗ ˗wo ˗klu ˗sü ˈka ö Dë ˗bha bhë, ˗mën ˗wɔn ˗së ˈö ˈkwa ꞊mɔɔn˗ ˗bha ˈkwa˗ ꞊slɔɔ ˗a ˈgü ꞊dɛɛ?

²² ˈDhɛ ˈö ˗kë ꞊dhɛ Yesu ˗yö ˗to ˗klu ˗sü ˈka ö Dë ˗bha bhë, kwa ꞊mɔɔn˗ ˗bha ˈö ˈkwa ˗tosɛta ˈö ˈyaa ɲën ˗a kë ꞊bhɔɔ ˈˈsɛ ˗ta ꞊dhɛ ˗kɔ ˈö Zoova ˗ya ˗ya ö ˗zo ˈˈpiʋ̈ ˗be bhë ˗a ˈdhö. ˈWɔn ˗gɔ ˈö ˈkwa ˗dho yö˗ ˗bha bhë ˗a ˈgü, ˗kɔ ˈö Yesu ˗bha ga ˗ya kë˗ ˗bha, ˈö ˈkwa ˗dho ˗tosɛta kë yi ꞊gban ˈka bhë, kwa ˗dho ˗a ˈˈdoo dɔ.