1, 2. (a) Sɛ inyim obi a ɔagye dzin wɔ wiadze yi mu ne dzin a, aso iyi kyerɛ dɛ inyim no ankasa? Kyerɛkyerɛ mu. (b) Ebɛn asɛm na nyimpa binom nyim fa Jesus ho?

NYIMPA pii na wɔagye dzin wɔ wiadze yi mu. Ibia inyim hɔn mu kor bi ne dzin. Naaso, ne dzin kɛkɛ a inyim no nnkyerɛ dɛ inyim no yie. Ɔnnkyerɛ dɛ inyim n’asetsena mu nsɛm nyina nye ne nyimpaban a ɔyɛ.

² Jesus Christ tsenaa asaase do bɛyɛ mfrenhyia 2,000 a etwa mu nye yi. Ibia atse no ho asɛm pɛn. Naaso, nyimpa dodow no ara nnyim nyimpa ban a nna Jesus yɛ. Nyimpa binom kã dɛ nna ɔyɛ nyimpa pa, afofor so kã dɛ nna ɔyɛ nkɔnhyɛnyi, na binom so gye dzi dɛ ɔyɛ Nyankopɔn. Na ɔwo so ɛ, edwen ho dɛn?​—Hwɛ Nsɛm bi a Wɔakyerɛ Mu 12.

3. Ebɛnadze ntsi na ohia dɛ ihu Jehovah Nyankopɔn na Jesus Christ?

³ Ohia dɛ ihu Jesus no ho nokwasɛm. Ebɛnadze ntsi a? Bible no se hɛn dɛ: “Na iyi nye onnyiewiei nkwa, dɛ wobohu ɔwo, nokwar Nyame kor no, nye nyia esomaa no, mekyerɛ Jesus Christ.” (John 17:3) Ɔyɛ ampa dɛ, sɛ inyim Jehovah na Jesus hɔn ho nokwasɛm a, ibotum atsena ase daa wɔ paradise wɔ asaase do. (John 14:6) Afei so, Jesus no ho nokwasɛm a ibohu no bɔboa wo, osiandɛ ɔno na ɔayɛ mbrɛ wɔnye afofor tsena nye mbrɛ wɔnye hɔn dzi ho nhwɛdo a odzi mu ama hɛn. (John 13:34, 35) Yesũaa Nyankopɔn no ho nokwasɛm wɔ Tsir 1 no mu. Afei, yerubosũa dza Bible no kyerɛkyerɛ fa Jesus ho.

4. Nkasafua “Messiah” na “Christ” no kyerɛ dɛn?

⁴ Wɔ mfrenhyia pii ana wɔrowo Jesus no, Jehovah bɔɔ anohoba wɔ Bible no mu dɛ, ɔbɔsoma Messiah anaa Christ no. Kasafua “Messiah” no fi Hebrew kasa mu, na “Christ” no fi Greek kasa mu. Dɛm abɔdzin ebien yi kyerɛ dɛ, Nyankopɔn na ɔbɛpaw Messiah a wɔbɔɔ no ho anohoba no, na ɔaama no dzibea soronko bi. Messiah no bɛma Nyankopɔn n’anohoba ahorow nyina aba mu. Bio so, Jesus botum aboa wo ndɛ. Naaso, ansaana wɔrowo Jesus no, nna nyimpa pii susu dɛ, ‘Woana na ɔbɛyɛ Messiah no?’

5. Aso nna Jesus n’esuafo no gye dzi dɛ, Jesus nye Messiah no?

⁵ Nna Jesus n’esuafo no gye dzi dɛ, Jesus nye Messiah a wɔbɔɔ no ho anohoba no. (John 1:41) Dɛ nhwɛdo no, Simon Peter see Jesus dɛ: “Ɔwo nye Christ” no. (Matthew 16:16) Yebesi dɛn agye edzi dɛ Jesus nye Messiah no?

6. Ebɛn kwan do na Jehovah boa nyimpa anokwafo ma wohu nyia Messiah no yɛ?

⁶ Ber tsentsen ana wɔrowo Jesus no, Nyankopɔn no nkɔnhyɛfo kyerɛɛw nsɛm pii too hɔ a nna ɔbɔboa nkorɔfo ma woeehu Messiah no. Nna iyi besi dɛn aboa? Kaamaa fa no dɛ wɔasoma wo dɛ kɔ hɛn gyinabea a nkorɔfo dzi hɔ akɔnaaba kɛfa obi a innhun no da bra. Sɛ ibotum ehu nyimpa no a, gyedɛ wɔkã mbrɛ nyimpa no tse ho asɛm kyerɛ wo. Dɛm pɛpɛɛpɛr na Jehovah nam no nkɔnhyɛfo do kãa dza Messiah no bɛyɛ nye dza ɔbɔto no ho asɛm. Dɛm nkɔnhyɛsɛm yi a ne nyina aba mu no boa nyimpa anokwafo ma wohu dɛ, Jesus nye Messiah no.

7. Ebɛn nkɔnhyɛsɛm ebien na ɔma yehu dɛ Jesus nye Messiah no?

⁷ Nkɔnhyɛsɛm ahorow no mu ebien nye yi. Odzi  kan, mfrenhyia 700 ansaana wɔrowo Jesus no, Micah hyɛɛ nkɔm dɛ wɔbɔwo Messiah no wɔ kurow ketseaba bi a wɔfrɛ no Bethlehem mu. (Micah 5:2) Na hɔ ara so na wɔwoo Jesus! (Matthew 2:1, 3-9) Otsĩa ebien, Daniel hyɛɛ nkɔm dɛ Messiah no bopuei wɔ afe 29 H.B. (Daniel 9:25) Iyinom yɛ nkɔnhyɛsɛm pii a wɔaba mu no mu ebien a ɔma yehu pefee dɛ, Jesus nye Messiah no.​—Hwɛ Nsɛm bi a Wɔakyerɛ Mu 13.

8, 9. Ber a wonumaa Jesus no, ebɛn asɛm na osii a ɔmaa ɔdaa edzi dɛ ɔno nye Messiah no?

⁸ Jehovah ama ada edzi pefee dɛ Jesus nye Messiah no. Nyankopɔn bɔɔ anohoba dɛ ɔbɛma John Onumanyi no asɛnkyerɛdze mbrɛ ɔbɛyɛ a obohu nyia nna Messiah no yɛ. John hun dɛm asɛnkyerɛdze no ber a Jesus kɔr John hɔ dɛ onnuma no wɔ Jordan Esutsen no mu wɔ afe 29 H.B. no. Bible no kã dza osii ho asɛm kyerɛ hɛn dɛ: “Na Jesus wowiee no numa no, ofii nsu no mu ntsɛmara, na hwɛ, ɔsor buei maa no, na ohun Nyankopɔn Sunsum tse dɛ ebubur risian ba no do; na hwɛ, ndze bi fi sor kãa dɛ, Oyi nye mo Dɔba a ɔsɔ m’enyi.” (Matthew 3:16, 17) Ber a John hun asɛnkyerɛdze yi na ɔtsee ndze no, ohun dɛ Jesus nye Messiah no. (John 1:32-34) Da no ara a Jehovah huee no sunsum guu no do no, nna Jesus bɛyɛɛ Messiah no. Ɔno nye nyia nna Nyankopɔn apaw no dɛ Ɔkandzifo nye Ɔhen.​—Isaiah 55:4.

 ⁹ Bible nkɔnhyɛsɛm, Jehovah noara n’anomu nsɛm, nye asɛnkyerɛdze a Ɔdze mae wɔ ber a wonumaa Jesus no da no edzi dɛ, Jesus nye Messiah no. Naaso, henfa na Jesus fi bae, nna ɔyɛ ebɛn nyimpa? Ma yɛnhwɛ dza Bible no kã.

10. Ebɛnadze na Bible no kyerɛkyerɛ fa Jesus n’asetsena ho ansaana ɔreba asaase do no?

¹⁰ Bible no kyerɛkyerɛ dɛ, Jesus tsenaa sor ber tsentsenntsen ansaana ɔreba asaase do. Micah kãa dɛ Messiah no “no mpuei fir tsetse.” (Micah 5:2) Jesus nankasa kãa no mpɛn pii dɛ ɔtsenaa sor ansaana wɔrowo no dɛ nyimpa wɔ asaase do. (Kenkan John 3:13; 6: 38, 62; 17:4, 5.) Ansaana ɔreba asaase do mpo no, nna Jesus nye Jehovah wɔ ebusuabɔ soronko.

11. Ebɛnadze ntsi na Jesus som bo kɛse dɛm ma Jehovah?

¹¹ Jesus som bo kɛse ma Jehovah. Ebɛnadze ntsi a? Osiandɛ Nyankopɔn dzii kan bɔɔ no ansaana ɔrobɔ biribiara nye nyimpa biara. Dɛm ntsi na wɔfrɛ Jesus “abɔdze nyina abakan” no. * (Colossaefo 1:15) Bio so, Jesus som bo ma Jehovah osiandɛ ɔno nkotsee nye obi a Jehovah bɔɔ no tsenn. Iyi ntsi na wɔfrɛ no ne “Ba a ɔwoo no kor no.” (John 3:16) Afei so, Jesus nkotsee nye obi a Jehovah nam no do bɔɔ ndzɛmba a wɔaka nyina. (Colossaefo 1:16) Nkyii so, Jesus nkotsee na wɔfrɛ no “Asɛm no,” osiandɛ Jehovah nam no do dze ne nsɛm maa abɔfo na nyimpa.​—John 1:14.

12. Yesi dɛn hu dɛ Jesus na Nyankopɔn nnyɛ nyimpa kor?

¹² Nyimpa binom gye dzi dɛ Jesus na Nyankopɔn yɛ nyimpa kor. Naaso, nnyɛ dɛm na Bible no kyerɛkyerɛ. Bible no kyerɛkyerɛ dɛ wɔbɔɔ Jesus. Iyi kyerɛ dɛ nna Jesus wɔ ahyɛse. Naaso, Jehovah a ɔbɔɔ adze nyina no, onnyi ahyɛse. (Ndwom 90:2) Dɛ Nyankopɔn ne Ba no,  Jesus emmbu noho dɛ ɔnye Nyankopɔn bɛyɛ pɛr da. Bible no kyerɛkyerɛ mu ma no mu da hɔ dɛ, Egya no yɛ kɛse sen Ɔba no. (Kenkan John 14:28; 1 Corinthfo 11:3.) Jehovah nkotsee nye “Nyankopɔn Tumfo.” (Genesis 17:1) Ɔno nye obi a ɔkrɔn sen biara na no tum bor adze nyina do wɔ wiadze nyinara mu.​—Hwɛ Nsɛm bi a Wɔakyerɛ Mu 14.

13. Ebɛnadze ntsi na Bible no frɛ Jesus dɛ, “Nyankopɔn a wohu no a ɔnnyɛ ne saso”?

¹³ Jehovah na ne Ba Jesus bɔɔ mu yɛɛ edwuma mfrenhyia ɔpepepem pii ansaana wɔrobɔ ɔsor na asaase. Hwɛ mbrɛ ɔdɔ a nna ɔwɔ hɔn ntamu no mu yɛ dzen fa! (John 3:35; 14:31) Jesus suasuaa n’egya no suban yie ara ma ntsi, Bible no frɛ no “Nyankopɔn a wohu no a ɔnnyɛ ne saso.”​—Colossaefo 1:15.

14. Osii dɛn na wɔwoo Jehovah ne Ba a ɔsom bo no dɛ nyimpa wɔ asaase do?

¹⁴ Nna Jehovah ne Ba a ɔsom bo no wɔ ɔpɛ dɛ obefi sor na ɔaawo no dɛ nyimpa wɔ asaase do. Obesi dɛn na aayɛ yie dɛm? Jehovah nam anwanwa kwan do yii ne Ba no no nkwa fii sor dze bɛhyɛɛ ɔbaabun bi a wɔfrɛ no Mary awotoa mu. Wɔ dɛm kwan yi do no, nna onnhia dɛ Jesus nya honam afamu egya biara. Ntsi, Mary woo abofra a odzi mu na ɔtoo no dzin Jesus.​—Luke 1:30-35.

15. Ibesi dɛn ehu Jehovah yie?

¹⁵ Ibotum esũa nsɛm pii afa Jesus ho, n’asetsena nye no suban ahorow ho dze nam Bible mu nwoma Matthew, Mark, Luke na John a ebɛkenkan no do. Wɔfrɛ dɛm nwoma ahorow no Nsɛmpa no. Afei so, osiandɛ Jesus tse dɛ n’Egya ntsi, dza ebɛkenkan no bɔboa wo  ma eehu Jehovah yie. Dɛm ntsi na Jesus tumii kãa dɛ: “Nyia oehu me no, oehu Egya no” so.​—John 14:9.

16. Ebɛnadze na Jesus kyerɛkyerɛe? Henfa na Jesus ne nkyerɛkyerɛ no fi?

¹⁶ Nna nyimpa pii frɛ Jesus dɛ “Kyerɛkyerɛfo.” (John 1:38; 13:13) Ndzɛmba etsitsir a ɔkyerɛkyerɛe no mu kor nye “ahenman no ho asɛmpa no.” Ebɛnadze nye dɛm Ahenman yi? Ɔyɛ Nyankopɔn no tumdzi a obefi sor edzi asaase nyina do tum na ɔdze nhyira abrɛ nyimpa a wɔyɛ setsie ma Nyankopɔn. (Matthew 4:23) Adze biara a Jesus kyerɛkyerɛe no fi Jehovah hɔ. Jesus kãa dɛ: “Me nkyerɛkyerɛ nnyɛ medze, na nyia ɔsomaa me no dze a.” (John 7:16) Nna Jesus nyim dɛ Jehovah pɛ dɛ nyimpa tse asɛmpa a ɔnye dɛ, Nyankopɔn n’Ahendzi bedzi asaase do tum.

17. Henfa na Jesus kyerɛkyerɛe? Ebɛnadze ntsi na ɔdze n’ahoɔdzen nye mber pii kyerɛkyerɛɛ nkorɔfo?

¹⁷ Henfa na Jesus kyerɛkyerɛe? Beebiara a ohun nyimpa wɔ no. Ɔkyerɛkyerɛe wɔ nkurow akɛse nye nkakraba mu, nkuraase, guamu, asɔrfi nye nhyiamudan mu nye nkorɔfo efie mu. Ɔannhwɛ kwan dɛ nkorɔfo mbra ne nkyɛn. Mpɛn pii no, ɔno na ɔkɔr hɔn nkyɛn. (Mark 6:56; Luke 19:5, 6) Jesus yɛɛ edwumadzen na ɔdze n’ahoɔdzen nye mber pii kyerɛkyerɛɛ nkorɔfo. Ebɛnadze ntsi a? Osiandɛ, nna onyim dɛ Nyankopɔn pɛ dɛ ɔyɛ dɛm. Nkyii so, nna ɔyɛ setsie ma n’Egya ber nyina. (John 8:28, 29) Bio so, osian ayamuhyehye a Jesus nyae maa nkorɔfo ntsi na ɔkãa asɛm no. (Kenkan Matthew 9:35, 36.) Ohun dɛ nna nyamesom akandzifo no nnkyerɛkyerɛ nokwasɛm a ɔfa Nyankopɔn nye n’Ahendzi no ho. Dɛm ntsi, nna ɔpɛ dɛ ɔboa nyimpa pii ma wɔtse asɛmpa no.

18. Jesus no suban mu hendze na w’enyi gye ho paa?

 ¹⁸ Nna Jesus yɛ ɔbarimba a ɔdɔ nyimpa na ɔdwen hɔn ho. Nna ne yamu ye na obiara tum bɛn no. Mbofra mpo pɛɛ dɛ wɔkɔ ne nkyɛn. (Mark 10:13-16) Jesus nye nkorɔfo dzii no wɔ nokwar mu. Nna okyir edwotwa na nsisi. (Matthew 21:12, 13) N’aber do no, nna mbaa nnyi hokwan pii na wobuu hɔn enyimtsia. Naaso, Jesus nye mbaa dzii wɔ obu nye enyidzi mu ber nyina. (John 4:9, 27) Nna Jesus brɛ noho adze ankasa. Dɛ nhwɛdo no, da kor ewimbir bi ɔhohoor n’esuafo no anan ho. Iyi yɛ biribi a akowaa na ɔtaa yɛ.​—John 13:2-5, 12-17.

19. Ebɛn nhwɛdo na ɔkyerɛ dɛ nna Jesus nyim dza nkorɔfo hia ankasa na ɔpɛɛ dɛ ɔboa hɔn?

¹⁹ Nna Jesus nyim dza nkorɔfo hia ankasa na ɔpɛɛ dɛ ɔboa hɔn. Iyi daa edzi pefee ber a ɔnam Nyankopɔn no tum do saa nkorɔfo yarba wɔ anwanwa kwan do no. (Matthew 14:14) Dɛ nhwɛdo no, ɔbarimba bi a ɔyar kwata baa Jesus nkyɛn bɛsee no dɛ: “Sɛ epɛ a, ibotum dɛ ema mo ho san.” Ɔbarimba yi ne yaw nye amandze a nna oruhu no kãa Jesus. Onyaa ayamuhyehye maa no na ɔpɛɛ dɛ ɔboa no. Ntsi, Jesus tseen ne nsa dze kãa ɔbarimba no, na ɔsee no dɛ: “Mepɛ, wo ho nsan.” Ntsɛmara na ɔbarimba no nyaa ayarsa! (Mark 1:40-42) Ana ibotum etwa mbrɛ ɔbarimba no tsee nkã ho mfonyin wɔ w’adwen mu?

20, 21. Ebɛn kwan do na Jesus ayɛ setsie a wɔyɛ ma Nyankopɔn ho nhwɛdo a odzi mu ama hɛn?

²⁰ Jesus ayɛ setsie a wɔyɛ ma Nyankopɔn ho nhwɛdo a odzi mu ama hɛn. Odzii nokwar maa n’Egya ɔmmfa ho  dza ɔtoo no anaa dza n’atamfo dze yɛɛ no no. Dɛ nhwɛdo no, ber a Satan pɛɛ dɛ ɔsɔ no hwɛ no, Jesus annyɛ bɔn. (Matthew 4:1-11) Jesus nankasa n’ebusuafo binom anngye enndzi dɛ nna ɔno nye Messiah no na wɔkãa dɛ, “N’enyi nnyi no ho do” anaa ɔabɔ dam. Naaso, Jesus kɔr do yɛɛ Nyankopɔn n’edwuma. (Mark 3:21) Ber a n’atamfo yɛɛ no ayaayaadze no, Jesus emmpuw hɔn da na mbom, okuraa n’emudzi mu maa Nyankopɔn.​—1 Peter 2:21-23.

²¹ Jesus kuraa n’emudzi mu maa Jehovah ber mpo a wɔyɛɛ no ayaayaadze na owuu owu yaayaw no. (Kenkan Philippifo 2:8.) Susu yaw a nna otwar dɛ ɔfa mu wɔ da a owui no ho hwɛ. Wɔkyeer no, adasetorfo bɔɔ no sombo dɛ ɔyɛ obusuyɛnyi, atsɛmbuafo a wɔyɛ nkontompɔfo buu no kumfɔ, nyimpadɔm sereew no na  nsordaafo yɛɛ no ayaayaadze na wɔdze no bɔɔ dua mu. Ber a oruwu no, ɔtsẽaa mu dɛ: “Woewie!” (John 19:30) Jesus wui ndaansa ekyir no, Jehovah nyaan no na ɔmaa no nkwa wɔ sunsum mu. (1 Peter 3:18) Ndaawɔtwe kakra ekyir no, Jesus sanee kɔr sor na “ɔkɛtsenaa Nyankopɔn nyimfa.” Ɔtsenaa hɔ tweɔnee kesii dɛ, Nyankopɔn yɛɛ no Ɔhen.​—Hebrewfo 10:12, 13.

22. Osiandɛ Jesus kuraa n’emudzi mu maa n’Egya ntsi, ndɛ ebɛn hokwan na yeenya?

²² Osiandɛ Jesus kuraa n’emudzi mu maa n’Egya ntsi, ndɛ yeenya hokwan dɛ yɛbɛtsena ase daa wɔ paradise wɔ asaase do dɛ mbrɛ Jehovah no botae tse no. Jesus no wu no ma yenya hokwan dɛ yɛbɛtsena ase afebɔɔ. Yebosusu asɛm yi ho wɔ tsir a odzi hɔ no mu.