1, 2. a) Ès sé pas ou konnèt non a on moun sélèb ou pé di kè ou konnèt-li byen ? Bay on ti èsplikasyon. b) Ka moun ka kwè anrapò èvè Jézi ?

TOUPATOU si latè, ni onlo moun ki sélèb. Pétèt ou konnèt non a yonn adan yo. Men ès sé pas ou konnèt non a-y ou pé di kè ou konnèt-li byen ? Byensouvan, ou konnèt on ti pawsèl a vi a moun-la, men ou pa sav kimoun i yé vréman.

² Ni 2 000 an dè sa, Jézikri té ka viv asi latè (gadé nòt n^o 12 la, paj 211). Sèten ou ja tann palé dè-y. Men on majorité moun pa sav ki jan dè moun i té yé vréman. Ni sa ki ka di kè sété on bon moun. Dòt ka di sété on pwofèt. Dòt ankò ka kwè kè sé-y ki Bondyé. É vou, ka ou ka di ?

3. Poukwa sa enpòwtan kè ou konnèt Jéova é Jézi ?

³ Sa enpòwtan dè konnèt lavérité asi Jézi. Poukisa ? Mi sa Labib ka di : « Mi sa lavi étèwnèl vlé di : fò-yo rivé konnèt-vou, vou, sèl vré Dyé-la, é sila ou voyé la, Jézikri » (Jan 17:3). Si ou konnèt lavérité asi Jéova é asi Jézi, ou ké pé viv pou touttan asi latè adan paradi-la (Jan 14:6). Anplisdisa, si ou konnèt Jézi, sa ké itil ba-w dépi alè. Dayè, pa ni méyè ègzanp ki Jézi pou montré-nou kijan pou nou viv é kijan pou nou aji èvè lézòt (Jan 13:34, 35). Adan  prèmyé chapit-la, nou aprann lavérité asi Bondyé. Adan chapit-lasa, nou kay vwè ka Labib ka aprann-nou asi Jézi.

4. Ka « Mési » é « Kris » vlé di ?

⁴ Plizyè lannné avan Jézi fèt, Jéova pwomèt kè i té ké voyé Lèmési, oben Lèkris asi latè. « Mési » é « Kris », sé dé tit yo ka itilizé pou palé dè on moun Bondyé chwazi pou on misyon èspésyal. Grasa Mési-la, tousa Jéova pwomèt ké fèt.

5. Ès disip a Jézi té ka kwè kè sé li ki té Mési-la ?

⁵ Pou disip a Jézi, sé Jézi ki té Mési-la, sa té klè (Jan 1:41). Pa ègzanp, lapòt Pyè di Jézi : « Ou sé Lèkris » (Matyé 16:16). É nou, kijan nou pé sèten kè Jézi sé Mési-la ?

6. Kijan Jéova édé moun ki sensè rèkonnèt Mési-la ?

⁶ Byen lontan avan Jézi fèt, pwofèt a Bondyé té bay onlo détay pou pèwmèt moun rèkonnèt Mési-la. Kijan sa té ké édé-yo ? Imajiné yo ka voyé-w laéropò chèché on moun ou pa konnèt. Si yo di-w kijan moun-lasa yé, ou ké pé touvé-y fasilman. Menmjan-la, pwofèt a Bondyé ban-nou onlo détay asi sa Mési-la té ké fè é asi sa ki té ké rivé-y. Lè yo ka konstaté kijan tout sé pwofési-lasa réyalizé, moun ki sensè ka rèkonnèt kè Jézi sé Mési-la.

7. Bay dé pwofési ki ka montré kè Jézi sé Mési-la Bondyé té anonsé la.

⁷ An-nou arété-nou si dé pwofési anrapò èvè Mési-la : 1) On pwofèt, non a-y sété Miché, té ja  di, 700 zan avan, kè Mési-la té ké fèt adan on ti vil yo ka kriyé Bétléèm (Miché 5:2). Sé ègzaktèman koté-lasa Jézi fèt ! (Matyé 2:1, 3-9). 2) Ondòt pwofèt, Danyèl, té anonsé kè Mési-la té ké parèt an lan 29 (Danyèl 9:25) (gadé nòt n^o 13 la, paj 211). Sé dé pwofési-lasa, é onlo dòt ankò, ka montré kè Jézi sé Mési-la Bondyé té anonsé la.

8, 9. Ka ki pasé lè Jézi pran batèm ? É ka sa ka montré ?

⁸ Jéova montré on mannyè ki klè kè Jézi té Mési-la. Bondyé pwomèt Jan Lèbatis kè i té ké bay on sign pou édé-y rèkonnèt Mési-la. An lan 29, Jézi mandé Jan batizé-y adan on flèv yo té ka kriyé Lèjourden, é sé a moman-lasa Jan vwè sign-la. Labib ka di-nou sa ki pasé : « Apré i batizé, Jézi sòti tousuit anba dlo-la. Alò syèl-la wouvè, é i vwè lèspri a Bondyé ka désann kon on kolonb é ka vin asi-y. Anplisdisa, on vwa ki sòti an syèl-la di : “Sila sé gason an mwen, sila an enmé fò la, sila an dakò èvè-y la” » (Matyé 3:16, 17). Lè Jan vwè sign-la é lè i tann sa Bondyé di, i konprann kè Jézi sé Mési-la (Jan 1:32-34). Jou-lasa, lè Jéova fè lèspri sen  a-y vin asi Jézi, Jézi vin Mési-la. Sé-y Jéova té chwazi pou i té vin Gid é Wa (Izayi 55:4).

⁹ Pwofési a Labib, sa Jéova di, é sign-la i bay la lè Jézi batizé, ka montré kè Jézi sé Mési-la. Men ola Jézi sòti ? Ki jan dè moun i té yé ? An-nou gadé sa Labib ka di.

10. Ola Jézi té ka viv avan i vin asi latè ?

¹⁰ Labib ka aprann-nou kè Jézi té ka viv dépi on bon moman an syèl-la avan i té vin asi latè. Miché di kè Mési-la té ja ka ègzisté dépi nanni-nannan (Miché 5:2). É plizyè fwa, Jézi ni lokazyon di kè i viv an syèl-la avan i té vin asi latè (li Jan 3:13, Jan 6:38, 62 é Jan 17:4, 5). Avan menm Jézi vin asi latè, lanmityé a-y èvè Jéova té ja solid é vréman èspésyal.

11. Poukwa Jéova ni onlo lanmou pou Jézi ?

¹¹ Jéova enmé Jézi onlo, pas sé-y i kréyé an prèmyé. Sé pousa yo ka kriyé Jézi « prèmyé kréyati Bondyé fè » (Kolosyen 1:15). Anplisdisa, si Jéova ni tousa lanmou pou Jézi, sé pas sé li tousèl i kréyé dirèktèman, kifè yo ka kriyé Jézi « sèl Gason [Bondyé] fè dirèktèman » * (Jan 3:16, nòt). Sèl moun osi ki travay èvè Bondyé pou kréyé tout sélézòt biten-la, sé Jézi (Kolosyen 1:16). É sé li tousèl yo ka kriyé « Pawòl-la ». Yo ka kriyé-y konsa pas Jéova itilizé-y pou palé ba zanj é ba moun asi latè pou di-yo sa i té vlé yo fè (Jan 1:14).

12. Kijan nou fè sav kè Jézi é Bondyé pa menm moun-la ?

¹² Ni moun ka kwè kè Jézi èvè Bondyé sé menm moun-la (gadé nòt n^o 14 la, paj 213). Men a pa sa Labib ka aprann-nou. Labib ka di kè Jéova kréyé Jézi, donk  Jézi ni on komansman. Alòskè Bondyé, ki kréyé tout biten, pa ni komansman (Sòm 90:2). Jézi, Gason a Bondyé, pa jen chèché a pran plas a Papa-y. Labib ka di kè Papa-la pli ho ki Gason-la (li Jan 14:28 ; 1 Korentyen 11:3). Ni onsèl « Dyé Toupuisan », sé Jéova (Jénèz 17:1). Pa ni ponmoun ki pi enpòwtan é ki pi fò ki-y adan tout linivè.

13. Poukwa Labib ka di kè Jézi sé « pòtré a Dyé-la ou pé pa vwè la » ?

¹³ Avan menm Jéova té kréyé syèl-la é tè-la, li é Jézi travay ansanm pannan plizyè milya lanné. Pannan tout tan-lasa, yonn vin enmé lòt fò toubònman ! (Jan 3:35 ; 14:31). Jézi imité kalité a Papa-y tèlman byen kè Labib ka kriyé-y « pòtré a Dyé-la ou pé pa vwè la » (Kolosyen 1:15).

14. Kijan Jézi fè vin asi latè antankè nonm ?

¹⁴ Jézi té dakò pou kité syèl-la é pou vin asi latè antankè nonm. Kijan sa fè fèt ? Jéova fè on mirak : i mèt vi a Gason a-y adan vant a Mari, on jennfi ki té vyèj. Donk a pa té on nonm ki té papa Jézi. Mari fè on tigason ki té pawfè. I kriyé-y Jézi (Lik 1:30-35).

15. Kijan ou pé konnèt Jéova plibyen ankò ?

¹⁵ Ou ké aprann onlo biten asi Jézi, asi vi a-y é asi kalité i ni, lè ou ké li liv a Matyé, Mawk, Lik é Jan adan Labib. Yo ka kriyé sé kat liv-lasa Lézévanjil. Jézi di : « Sila ki vwè-mwen la vwè Papa-la osi » (Jan 14:9). Padavwa Jézi té pòtré a Papa-y, sa ou ké aprann asi-y ké édé-w konnèt Jéova plibyen ankò.

16. a) Ka Jézi anségné ? b) Ola Jézi pran sa i té ka anségné ?

 ¹⁶ Onlo moun té ka kriyé Jézi « Anségnan » (Jan 1:38 ; 13:13). Jézi anségné dé biten ki té ni onlo enpòwtans. Adan yo, té ni « bon nouvèl a Wayòm-la ». Ka wayòm-lasa yé ? Sé on gouvènman ki an syèl-la é kè Bondyé ké itilizé pou dirijé latè. Gouvènman-lasa ké pòté onlo bénédisyon pou moun ki ka kouté Bondyé (Matyé 4:23). Tousa Jézi anségné té ka vin dè Jéova. Jézi di : « Sa an ka anségné pa ka vin dè mwen, men dè sila ki voyé-mwen la » (Jan 7:16). I té sav kè Jéova té vlé moun konnèt bon nouvèl-lasa : wayòm a Bondyé ké gouvèné latè.

17. a) Ki koté Jézi té ka anségné ? b) Poukwa Jézi té ka fè tousa éfò pou anségné moun ?

¹⁷ Ki koté Jézi té ka anségné ? Toupatou i té ka touvé moun : a kaz a yo, lakanpagn, an vil, adan sé vilaj-la, asi mawché,... I pa té ka atann moun vin owa a-y. Sé plito li ki té kay owa sé moun-la (Mawk 6:56 ; Lik 19:5, 6). Jézi fè onlo éfò pou anségné Labib é i pasé onlo tan ka préché. Poukwa ? Pas i té sav kè sé sa Bondyé té vlé i fè, é pas i toujou té ka obéyi Papa-y (Jan 8:28, 29). Jézi té ka préché ba sé moun-la pas i té ka pran penn a yo (li Matyé 9:35, 36). I byen vwè kè sé moun-la ki té antèt a larèlijyon pa té ka anségné lavérité asi Bondyé é asi wayòm a-y. É i té vlé kè on maksimòm dè moun tann bon nouvèl-la.

18. Ki bèl kalité a Jézi ou pi enmé ?

¹⁸ Jézi té enmé sé moun-la é i té ka sousyé-y  dè yo. I té janti é sa té fasil dè palé èvè-y. Menm sé timoun-la té kontan lè yo té èvè-y (Mawk 10:13-16). Jézi toujou té ka montré-y jis. I té hay malonnètté é i té hay lenjistis (Matyé 21:12, 13). An tan a Jézi, moun pa té ni rèspé pou madanm é ni onlo biten sé madanm-la pa té ni dwa fè. Men Jézi toujou té ni onlo rèspé pou yo (Jan 4:9, 27). Jézi pa té ka santi-y pli gran ki lézòt. Pa ègzanp, on jouswa, i lavé pyé a apòt a-y, alòskè nòwmalman sété travay a domèstik (Jan 13:2-5, 12-17).

19. Ki ègzanp ka montré kè Jézi té vlé édé sé moun-la ?

¹⁹ Jézi té sav ka sé moun-la té bizwen é i té vlé édé-yo. Yo té ka konstaté sa lè i té ka sèvi èvè puisans a Bondyé pou géri moun (Matyé 14:14). Pa ègzanp, on jou, on misyé ki té ni on maladi yo ka kriyé lalèp di Jézi : « Si ou vlé, ou pé rann-mwen pwòp. » Lè Jézi vwè jan misyé-la té ka soufè, sa fè-y lapenn é i té vlé édé-y. I lonji men a-y, i touché-y é i di-y : « Wi, an vlé ! Vin pwòp. » É misyé-la géri ! (Mawk 1:40-42). Ès ou ka rivé imajiné sa i rèsanti ?

20, 21. Jézi toujou obéyi Bondyé. Poukisa nou pé di kè sé méyè ègzanp ki ni an domenn-lasa ?

²⁰ Jézi toujou obéyi Bondyé. Sé méyè ègzanp ki ni an domenn-lasa. Menm douvan difikilté, oben kèlkèswa sa lènmi a-y té ka fè-y, i toujou rété fidèl a Papa-y. Pa ègzanp, lè Satan tanté-y, i pa jen péché  (Matyé 4:1-11). Adan pwòp fanmi a-y, ni sa ki pa té ka kwè kè sé-y ki té Mési-la. Yo té ka di kè i fou. Men Jézi kontinyé fè sa Bondyé té vlé (Mawk 3:21). Menm lè lènmi a-y té ka fè-y soufè, i té ka rété fidèl a Bondyé é i pa jen chèché a fè-yo ditò (1 Pyè 2:21-23).

²¹ Jézi soufè onlo avan i té mò. Men i rété fidèl a Jéova (li Filipyen 2:8). Sonjé tousa Jézi sipòté jou-la i mò la. Yo arété-y. Ni moun ki ay di kè i jiré Bondyé. On bann dè jij malonnèt kondanné-y. Onpakèt moun té ka fè jé èvè-y. Sé solda-la fè-y onlo abominasyon é yo kloué-y asi on  poto. Jis avan i mò, Jézi kriyé, i di : « Sa réyalizé ! » (Jan 19:30). Men twa jou apré, Jéova résisité Jézi é i bay on kò èspirityèl, sètadi on kò kon ta sé zanj-la (1 Pyè 3:18). Karant jou apré, Jézi rètouné an syèl-la é i « sizé adwat a Bondyé ». Aprésa, i atann jiskatan Bondyé fè-y vin Wa (Ébré 10:12, 13).

22. Padavwa Jézi rété fidèl a Papa-y, jòdijou, ki posibilité nou ni ?

²² Padavwa Jézi rété fidèl a Papa-y, jòdijou nou pé èspéré viv pou touttan adan paradi-la asi latè. Sé sa Jéova vlé. Adan chapit-la ki ka vin la, nou ké vwè kijan mò a Jézi ka pèwmèt-nou viv pou touttan.