1, 2. (1) ¿Jamüshi nnojoika piʼraajüin wanee wayuu pütüjaale neʼe saaʼu tü nünüliakat? (2) ¿Jamüsü nanüiki waneinnua wayuu nüchiki Jesuu?

WAINMA wayuu eʼraajünaka maʼin sainküin mmaka. Eesüjaʼa pütüjaale saaʼu kasaichin nanülia noʼutku naya wayuukana. Nnojoipejeʼe piʼraajüin wanee wayuu pütüjaale neʼe saaʼu tü nünüliakat, süka jamüin, nnojoluin pütüjaain saaʼu jamüin nukuwaʼipa jee tü kasa naaʼinrakat.

² Alatüirü maʼaka 2.000 juya süchikijee yaajachin Jesukürisüto yaa Mmapaʼa. Eesüjaʼa paapüirüle nüchiki. Wainmapejeʼe na wayuu nnojoliikana eʼraajüin nukuwaʼipa Jesuu. ¿Jamüsü nanüiki nüchiki? «Nia wanee wayuu anamia», eeshii na makana. «Nünüikimaajachi Maleiwa», eeshii eekai namüin. «Niaʼaya neʼe Jesuu chi Maleiwakai», eetaashii joo na makana anüiki. ¿Jaraijaʼa Jesuu saaʼin pümüin? (Paashajeʼera noota 12).

3. ¿Jamüsü pütüjaainjatka saaʼu tü shiimainkat nüchiki Jeʼwaa otta Jesukürisüto?

³ ¿Jamüsü pütüjaainjatka saaʼu tü shiimainkat nüchiki Jesuu? Anuu sünüiki tü Wiwüliakat: «Kateerü noʼu waneepia chi wayuu eekai niʼraajüin pia, chi waneeshikai sünain Maleiwain otta eekai niʼraajüin Jesukürisüto chi püjünalakai» (Juan 17:3, TNM). Pütüjaale saaʼu tü shiimainkat nüchiki Jeʼwaa otta Jesuu, kateerü poʼu waneepia saaʼu tü Mmakat paʼaraiisüpa shia (Juan 14:6, TNM). Piʼraajüle nukuwaʼipa Jesuu eʼreechi pia kasa anasü maaʼulu otta pütüjaweerü aaʼu tü pukuwaʼipainjatkat sümüin wayuu, süka jamüin, niain Jesuu anakai süpüla washatüin akuwaʼipa (Juan 13:34, 35). Wekirajaaitpa  anain suluʼu ekirajaaya 1 tü shiimainkat nüchiki Maleiwa. Otta sünain ekirajaayakat tüü, wekirajaajeerü anain tü sümakat tü Wiwüliakat nüchiki Jesuu.

4. ¿Jamaluʼut tü pütchikat Mesías otta Kürisüto?

⁴ Süpülapünaa nüntüin Jesuu yaa mmapaʼa, nüküjatüjülia Jeʼwaa suluʼu tü Wiwüliakat nüntajachin chi Mesíaskai jee chi Kürisütokai. Tü pütchikat Mesías shia wanee pütchi hebreo otta tü pütchikat Kürisüto shia wanee pütchi griego. ¿Jamaluʼulu tia piamasükat pütchi? Chi nüneekajalakai Maleiwa süpüla wanee aʼyatawaa anaka maʼin maluʼulu tia. Ekeraajüinjatü mapeena süpüshuaʼale tü nümakat Maleiwa nükajee chi Mesíaskai.

5. ¿Natüjaa aaʼuche na nikirajüinkana Jesuu niain Jesuu chi Mesíaskai?

⁵ Natüjaa aaʼu na nikirajüinkana Jesuu niain Jesuu chi Mesías aküjünakai achiki paala (Juan 1:41). Anuu nünüiki Pedro nümüin Jesuu: «Pia Cristokaʼaya» (Mateo 16:16). Wekirajaainjatü anain jooluʼu jamüin watüjaaka saaʼu niain Jesuu chi Mesíaskai.

6. ¿Kasa naaʼinraka Jeʼwaa süpüla niyaawatünüinjachin chi Mesíaskai?

⁶ ¿Jamüshi niyaawatünaka aaʼu niain Jesuu chi Mesíaskai? Shia sutuma tü kasa naküjakat na nünüikimaajanakana Maleiwa wainma juya süpülapünaa jemelin Jesuu. Jamüshijaʼa püsaajinnüle wanee wayuu nnojoikai piʼraajüin eejee süshaʼwajülee wuusü, aküjünajatü pümüin motsochonle nia, miyoʼusenuule nia jee kasatarüle nüsheʼin, mayaa piyaawateechi aaʼu jaralin nia. Müsia neʼe sukuwaʼipa tü naaʼinrakat Jeʼwaa süpüla niyaawatünüin chi Mesíaskai. Nüküjain Jeʼwaa nakajee na nünüikimaajanakana tü naaʼinrajatkat chi Mesíaskai otta tü alatajatkat nümüin. Neʼrapa na wayuu oonoweekana sümaa nünüiki Maleiwa sünain shikeraajüin  nutuma Jesuu tü aküjünakalü achiki paala, nayaawatüin aaʼu niain Jesuu chi Mesíaskai jee chi Kürisütokai.

7. Püküja piamasü pütchi ekeraajaka nünain Jesuu ayaawatünaka aaʼu niain chi Mesíaskai.

⁷ Wekirajaa sünain piamasü pütchi ekeraajaka nutuma Jesuu. Tü palajatkat shia tü ashajünakat 700 juya süpülapünaa jemelin nia. Nüküjain Miqueas, chi nünüikimaajachikai Maleiwa, jemelinjachin chi Mesíaskai suluʼu tü pueulokot Belén (Miqueas 5:2). Ekeraajüsü tia pütchikat, jemeishi Jesuu suluʼu tü pueulokot Belén (Mateo 2:1, 3-9). Tü wane pütchikat shia tü nüshajakat Daniel. Nüküjain Daniel niyaawatünüinjachin chi Mesíaskai soʼu juyaka 29 (Daniel 9:25). Ekeraajüsü tiaya. * Tia piamasükat pütchi, süpüshi neʼe tü pütchi wayaawatakalü aaʼujee niain Jesuu chi Mesías aküjünakai achiki paala.

8, 9. ¿Kasa alataka wanaa sümaa woutiisain Jesuu niyaawatünaka aaʼujee niain chi Mesíaskai?

⁸ Pansaasü maʼin tü nümakat Jeʼwaa sünain niain Jesuu chi Mesíaskai. Nüküjain Jeʼwaa tü niʼrüinjatkat Juan chi Awoutisaajüikai süpüla niyaawatüin chi Mesíaskai. Soʼu juyaka 29, antüshi Jesuu eemüin tü süchikat Jordán süpüla nuwoutisaajünüin nutuma Juan. Niʼraka Juan shikeraajüin tü nümatüjütkalia Jeʼwaa nümüin süpüla niyaawatüinjachin chi Mesíaskai. Müsü tü Wiwüliakat: «Kettaapa nuwoutisaajünüin Jesús, ashaʼwalaa müshia nia shirokujee tü wüinkat. Je wanaa maʼi sümaa tia, eerulaasü tü sirumakat chaa iipünaa. Niʼrakalaka  Jesús chi Naaʼinkai Maleiwa sünain ashakataa nünainmüin sünain müin aka saaʼin wane moʼuwa. Saapünakalaka joo wane pütchi chaa iipünaajee sünain maa: ‹Anii chi Tachonkai aishikai tapüla. Talatüshi maʼi taya nümaa›» (Mateo 3:16, 17). Sutuma tü niʼrakat jee tü naapakat Juan soʼu kaʼikat tia, niyaawatüin niain Jesuu chi Mesíaskai. Soʼu tia, ashakatüshi chi naaʼinkai Maleiwa naaʼumüin Jesuu. Mayaa, niaichipa Jesuu  chi Mesíaskai jee chi Kürisütokai (Juan 1:32-34). Nia chi nüneekakai Maleiwa süpüla Nuluwataainjachin jee Wekiipüʼüinjachin nia (Isaías 55:4).

⁹ Ayaawatüna aaʼuchi niain Jesuu chi Mesíaskai sutuma tü aküjünatüjütkalia suluʼu tü Wiwüliakat, sutuma tü nümakat Jeʼwaa otta tü naaʼinrakat wanaa sümaa woutiisain chi Nüchonkai. Wekirajaa sünain tü sümakat tü Wiwüliakat süchiki jalapuʼuin kepiain Jesuu otta tü nukuwaʼipakat yaaiwaʼaya nia Mmapaʼa.

10. ¿Jamüsü sünüiki tü Wiwüliakat süchiki jalapuʼuin Jesuu süpülapünaa nüntüin Mmapaʼamüin?

¹⁰ Saashin tü Wiwüliakat, chapuʼushi Jesuu chaa iipünaa süpülapünaa nüntüin Mmapaʼamüin. Nüküjain Miqueas, chi nünüikimaajachikai Maleiwa, eetüjüiya chi Mesíaskai süpülapünaa kasa süpüshuaʼa (Miqueas 5:2). Akaʼaya Jesuu nüküjain kojuyatua chapuʼuin nia iipünaa süpülapünaa nüntüin Mmapaʼamüin (paashajeʼera Juan 3:13; 6:38, 62; 17:4, 5). Aleewapuʼushi maʼin Jesuu nümaa Jeʼwaa chaa iipünaa.

11. ¿Jamüshi aika maʼin Jesuu nüpüla Jeʼwaa?

¹¹ Aishi maʼin Jesuu nüpüla Jeʼwaa süka niain «chi niʼirumakai». Nukumajala nia süpülapünaa kasa süpüshuaʼa (Colosas 1:15, TNM). * Jee müsia, aishi maʼin nia nüpüla süka niain «chi waneeshikai Nüchoin», chi nukumajalakai nümüiwaʼa (Juan 3:16, TNM). Nia neʼe Jesuu akaaliijaka Jeʼwaa sünain akumajaa kasakalüirua süpüshuaʼa (Colosas 1:16). «Pütchi» münüshi Jesuu süka nüküjain tü nümakat Jeʼwaa namüin na aapieekana otta na wayuukana (Juan 1:14).

12. ¿Jamüsü watüjaaka saaʼu nnojoluin niain neʼe Jesuu chi Maleiwakai?

 ¹² Eeshii wayuu eekai namüin niain neʼe Jesuu chi Maleiwakai. Nnojotpejeʼe süküjain tia tü Wiwüliakat. Saashin tü Wiwüliakat, akumajuushi Jesuu. Aluʼusaʼa Jeʼwaa eetüjüiya nia otta nukumajüin kasa süpüshuaʼa (Salmo 90:2). Saashin tü Wiwüliakat, nia laülaaka Maleiwa nuulia chi Nüchonkai. Nnojotsü kachiiruain naaʼin Jesuu laülawaa wanaa nümaa chi Nüshikai (paashajeʼera Juan 14:28; 1 Corinto 11:3). Nia neʼe Jeʼwaa «chi Maleiwa Pülashikai maʼi» (Génesis 17:1). Nnojoishi eein wanee eekai müin aka naaʼin Jeʼwaa, laülaashi nia saaʼu kasa süpüshuaʼa otta pülashi maʼin nia. (Paashajeʼera noota 14).

13. ¿Jamüsü wanaawaka nukuwaʼipa Jesuu nümaa Maleiwa saashin tü Wiwüliakat?

¹³ Süpülapünaa sukumajünüin tü sirumatuʼukat jee tü Mmakat, aʼyataajiraashi Jesuu nümaa Jeʼwaa soʼu wainma maʼin juya müshiijeseʼe aijiraain maʼin naya (Juan 3:35; 14:31). Saashin tü Wiwüliakat, wanaawasü nukuwaʼipa Jesuu nümaa Maleiwa. ¿Jamüsü wanaawaka nukuwaʼipa nümaa? Shia süka ayatashaatain nukuwaʼipa Jeʼwaa nünain Jesuu (Colosas 1:15).

14. ¿Jamakuwaʼipai süpüla wayuuinjachin Jesuu?

¹⁴ Anasü nümüin Jesuu antaa saʼakamüin wayuu. ¿Jamakuwaʼipai süpüla wayuuinjachin Jesuu süchikijee chapuʼuin nia iipünaa? Eesü wanee kasa pülasü naainjaka Jeʼwaa. Nukumajeʼerüin Maleiwa joʼuuin chi Nüchonkai suluʼumüin süchonla wanee majayüt kanüliasü María, nnojotsü shia nünainpünaain wanee wayuu toolo. Makalaka niain Jesuu wanee wayuu maainjalasai (Lucas 1:30-35).

15. ¿Kasa paaʼinrajatka süpüla piʼraajüin maʼin nukuwaʼipa Jeʼwaa?

¹⁵ «Chi eekai niʼrüin taya, niʼrüin chi Tashikaʼiya», müshi Jesuu (Juan 14:9). Süka wanaawain nukuwaʼipa Jesuu  nümaa chi Nüshikai, piʼraajeerü maʼin nukuwaʼipa Jeʼwaa pikirajaale nüchiki Jesuu. Pikirajaale sünain tü karaloʼutakat Mateo, Marcos, Lucas otta Juan, pütüjaweerü saaʼu tü kasa naaʼinrapuʼukat jee tü nukuwaʼipakat Jesuu.

16. (1) ¿Kasa nikirajapuʼuka maʼin anain Jesuu? (2) ¿Jarai nütüjaka anainjee Jesuu tü nikirajapuʼukalü anain?

¹⁶ «Ekirajüikalee», wainma na wayuu mapuʼukana nümüin Jesuu (Juan 1:38; 13:13). Tü kasa nikirajapuʼukat maʼin anain Jesuu shia süchiki nukuwaʼipa Maleiwa sünain Aluwatawaa. Aluwataainjachi Maleiwa sirumatuʼujee saaʼumüin tü Mmakat otta naapüinjatü wainma kasa anasü namüin na oonookana sümaa nünüiki (Mateo 4:23). ¿Jarai nütüjaka anainjee Jesuu tü nikirajapuʼukalü anain? Nütüjain nünainjee Jeʼwaa. Anuu nünüiki Jesuu süchiki tia: «Tü tekirajakat anain, nnojotsü pütchin taleʼeruʼujeejatü neʼe, naapajala tamüin chi kajünalakai taya» (Juan 7:16). Nütüjaa aaʼu Jesuu keeʼireein naaʼin Jeʼwaa saapajüinjatüin tü wayuukalüirua süchiki Nuluwataainjachin Maleiwa saaʼu tü Mmakat.

17. (1) ¿Jalapuʼushi ekirajüin Jesuu? (2) ¿Jamüshi nikirajaka maʼin wayuu Jesuu?

¹⁷ ¿Jalapuʼushi ekirajüin Jesuu? Ekirajapuʼushi nia eepünaale eein wayuu nüpüla. Anouishiipaʼa, pueulopaʼa, metkaaruluʼu, suluʼu tü aʼwaajüleekat Maleiwa, suluʼu tü ekirajüleekat judío otta sainküin piichi. Nnojotsü antüin neʼe wayuu nümaʼanamüin, nia oʼunaka sümaʼanamüin tü wayuukalüirua (Marcos 6:56; Lucas 19:5, 6). Aʼyataashi maʼin Jesuu sünain ekirajaa wayuu süka shiain tü keeʼireekat naaʼin Maleiwa otta oonooshi nia waneepia sümaa nünüiki Maleiwa (Juan 8:28, 29). Nikirajüinya Jesuu tü wayuukalüirua süka sümülialaain naaʼin saalin (paashajeʼera Mateo 9:35, 36). Na nekiipüʼükana na judíokana nnojoishii nekirajüin na wayuukana süchiki tü shiimainkat nüchiki Maleiwa otta süchiki tü Nuluwataayakat. Müshijeseʼe nüküjeein  maʼin Jesuu süchiki tü kasa anasü eeinjatkat nutuma Maleiwa Nuluwataapeena.

18. ¿Jarat nukuwaʼipa Jesuu kamalainka pümüin?

¹⁸ Aishii na wayuukana nüpüla Jesuu otta kapülasü naaʼin nakuwaʼipa. Kamaneeshi nia otta kamalainsü sümüin wayuu yootoo nümaa. Jaʼitakajaʼa na tepichikana, anasü naaʼin nümaa Jesuu (Marcos 10:13-16). Naainjain waneepia tü kasa anasükat, niyoutuin müliain wayuu atumawaa otta saainjünüin kasa mojusü (Mateo 21:12, 13). Mojutsat tü jieyuukalüirua soʼu yaajachin Jesuu Mmapaʼa. Akaisaʼa Jesuu kojutushaatashii na jieyuukana nümüin (Juan 4:9, 27). Nnojotsü yaletüin naaʼin Jesuu. Soʼu wanee kaʼi, nuʼlojuin nooʼui na nikirajüinkana. Tia naaʼinrapuʼuin neʼe na achepchieekana (Juan 13:2-5, 12-17).

19. Püküja süchiki wanee kasa naainjaka Jesuu süpüla nükaaliijain wayuu.

¹⁹ Nütüjaa aaʼu Jesuu kasain choʼujaain sümüin wayuu otta nükaaliijain shia. Naainjain tia wanaa sümaa niiyajüin wayuu sükajee tü nüpülainkat Maleiwa (Mateo 14:14). Müsü nünüiki wanee wayuu ajaʼttaa atachi nümüin Jesuu: «Müinka pücheküle, piiyaja taya». Aisü nümüin Jesuu nümüliala chia wayuukai. «Nümüliajakalaka naaʼin Jesús chi ayuuishikai sünain niyurulain nütüna nünainmüin sünain naapaain nia: ‹Tacheküin süpüleerua anainjachin pia›, nümakalaka» (Marcos 1:40-42). Anaka chia wayuukai suulia tia ayuuliikat. Talatakajasaʼa maʼin naaʼin, ¿aashimüin?

20, 21. ¿Jamüsü anaka maʼin washatüle nukuwaʼipa Jesuu?

²⁰ Anasü maʼin washatüle nukuwaʼipa Jesuu süka noonooin waneepia sümaa nünüiki Maleiwa. Waneepiashi nia nümaa Maleiwa mayaainjeʼe wainmain kasa mojusü alataka nümüin jee müliain nia natuma na nüʼünüükana. Jamüshijaʼa nia nnojoishi kaainjalain wanaa sümaa  nuuʼulakünüin aaʼin nutuma Satanaa (Mateo 4:1-11). Eeshii waneinnua nüpüshi nnojoliikana anoujain sünain niain chi Mesíaskai. «Maaʼinkai cheje aaʼin nia», müshii naya nümüin. Ayatapejeʼe oonooin Jesuu waneepia sümaa nünüiki Jeʼwaa (Marcos 3:21). Mayaainjeʼe müliain maʼin nia natuma na nüʼünüükana, ayatüshia waneepiain nia nümaa Maleiwa otta nnojoishi achajaain pasalawaa (1 Pedro 2:21-23).

²¹ Waneepiashi Jesuu nümaa Jeʼwaa mayaainjeʼe niʼrüin nümüliala wanaa sümaa nuʼutunuin aaʼin (paashajeʼera Filipos 2:8, TNM). Jülüja paaʼin tü aainjünakat nüka Jesuu süpülapünaa nuʼutunuin aaʼin: ataʼünüshi nia, aküjünüsü perulaa nüchiki sünain mojuin nünüiki nümüin Maleiwa, aapünaa ekiichi nia natuma nekiipüʼü na judíokana, meeʼerapalashi nia, müliashi nia sutuma surulaat otta akachennüshi  nia sünain wunuʼu. Anuu nünüiki Jesuu süpülapünaa outuin nia: «Kettaaitpa tatüma» (Juan 19:30). Apünüin kaʼi süchikijee outuin Jesuu asoʼireʼennüsü naaʼin nutuma Jeʼwaa suluʼu meʼrujuin nia (1 Pedro 3:18). Shiasaʼa maʼaka jeʼra semaana süchikijee tia, aleʼejüshi Jesuu iipünaamüin süpüla joyotuin nia «nikialuʼujee chi Maleiwakai». Otta naʼatapajüin süpüla saapünüin nümüin Aluwatawaa nutuma chi Nüshikai (Hebreokana 10:12, 13).

22. ¿Kasa anasü weʼreetka sutuma waneepiain Jesuu nümaa chi Nüshikai?

²² Süka waneepiain Jesuu nümaa chi Nüshikai, eʼreena waya kataa oʼuu waneepia suluʼu tü Mmakat paʼaraiisüpa shia. Tia shia tü keeʼireetüjütkalia naaʼin Jeʼwaa. Sünain tü wane ekirajaayakat, wekirajaajeerü anain kateerüin woʼu waneepia sutuma outuin Jesuu waaʼu.