1, 2. a) ¿Ikatúpa ere reikuaa porãha peteĩ famósope reikuaa haguérente héra? b) ¿Mbaʼépa heʼi la hénte Jesús rehe?

KO MÚNDOPE ningo oĩ heta hénte ifamósova. Oiméne nde reikuaa peteĩ famóso réra. Péro reikuaa haguérente héra ndeʼiséi reikuaa porãha chupe. Katuete ndereikuaapamoʼãi mbaʼeichagua persónapa haʼe ha mbaʼépa ogusta chupe.

² Ojapómarõ jepe 2.000 áñorupi Jesús ou hague ko yvy ape ári, oiméne rehendu heta mbaʼe chugui. Péro heta hénte ndoikuaaporãi Jesúspe. Algúno heʼi hese haʼe hague peteĩ kuimbaʼe ivuenoitereíva, ótro katu heʼi haʼe hague peteĩ proféta, ha oĩ avei opensáva Jesús haʼeha Ñandejára. ¿Ndépa mbaʼe ere? ¿Mávapa Jesucristo? (Ehecha nóta 12).

3. ¿Mbaʼérepa iñimportánte reikuaa Jehová ha Jesucrístope?

³ Iñimportanteterei ningo nde reikuaa porã mávapa añetehápe haʼe Jesús. ¿Mbaʼérepa? La Biblia heʼi: “Umi hénte oikove hag̃ua pára siémpre tekotevẽ ndekuaa ndéve, nde hína Ñandejára teete ha peteĩetéva. Oikuaa vaʼerã avei Jesucrístope, upe nde rembou vaʼekue” (Juan 17:3). Upéicharõ, reikuaa porãramo Jehová ha Jesúspe, ikatúta reikove pára siémpre ko yvy ape ári peteĩ hardín iporãitereívape (Juan 14:6). Reikuaa porãramo Jesúspe, iñehémplo nepytyvõta avei reiko hag̃ua Jehová oipotaháicha ha reikuaa hag̃ua mbaʼéichapa retrata vaʼerã nde rapichápe (Juan 13:34, 35). Kapítulo 1-pe ñaaprende kuri heta mbaʼe Ñandejáragui, koʼág̃a katu jahecháta mbaʼépa ñanemboʼe la Biblia Jesúsgui.

4. ¿Mávarepa oñeʼẽ la Biblia oipurúvo umi palávra Mesías ha Cristo?

⁴ Heta áño Jesús onase mboyve, la Bíbliape Jehová opromete vaʼekue omboutaha pe Mesías térã Crístope. Umi palávra Mesías ha Cristo ojepuru oñeñeʼẽ hag̃ua pe persóna Jehová oiporavóvare omeʼẽ hag̃ua chupe autorida. Pe Mesías rupive oñekumplipaitéta Ñandejára promesakuéra, ha koʼág̃ama voi ikatu rehupyty heta mbaʼe porã reikuaa porãrõ pe Mesíaspe. Jesús onase mboyve, heta hénte oñeporandu vaʼekue: “¿Mávapa oiméne hína pe Mesías?”.

5. ¿Oikuaápa rakaʼe Jesús disipulokuéra mávapa pe Mesías?

⁵ Jesús disipulokuéra oikuaa porã vaʼekue mávapa pe Mesías térã pe persóna Jehová oiporavo vaʼekue (Juan 1:41). Por ehémplo, Simón Pedro heʼi vaʼekue Jesúspe: “Nde hína pe Cristo” (Mateo 16:16). ¿Mbaʼéichapa ñande avei ikatu ñaime segúro Jesús haʼeha pe Mesías?

6. ¿Mbaʼépa ojapo vaʼekue Jehová umi hénte ipyʼaporãva ohechakuaa hag̃ua mávapa pe Mesías?

⁶ Heta tiémpo Jesús onase mboyve, Jehová profetakuéra oskrivíma vaʼekue heta mbaʼe oipytyvõtava la héntepe oikuaa hag̃ua mávapa pe Mesías. Ñantende porãve hag̃ua mbaʼéichapa oipytyvõ chupekuéra upéva, ñamoĩmi peteĩ ehémplo: Ñamoĩ chupe ojejerureha ndéve reho hag̃ua peteĩ persóna piári terminálpe, péro nde ndereikuaái chupe. Upémarõ ojeʼe ndéve mbaʼéichapa upe persóna, por ehémplo iñakãrangue kolór, ipínta ha mbaʼe kolórpa ijao. Upéicha avei, umi proféta rupive, Jehová omombeʼu porãiterei mbaʼépa ojapóta pe Mesías ha mbaʼépa oikóta hese. Ha oñekumplívo umi profesía, umi hénte ipyʼaporãva ikatu kuri opilla Jesús haʼeha pe Mesías.

7. Emombeʼu mokõi profesía ohechaukáva Jesús haʼeha pe Mesías.

 ⁷ Jahechamína mokõi profesía oĩva la Bíbliape. Primero, 700 áño Jesús onase mboyve, proféta Miqueas heʼi pe Mesías onasetaha peteĩ puevloʼi héravape Belén (Miqueas 5:2). Ha upeichaite oiko (Mateo 2:1, 3-9). Segundo, proféta Daniel heʼi áño 29-pe d.C. outaha pe Mesías (Daniel 9:25). Koʼã mokõi profesíante voi ohechaukáma Jesús haʼeha pe Mesías, péro oĩve hína heta profesía oñeʼẽva hese (ehecha nóta 13).

8, 9. ¿Mbaʼépa oiko Jesús ojevautisárõ guare ha mbaʼépa ohechauka upéva?

⁸ Jehová ojapo peteĩ mbaʼe ohechauka porãvéntemava Jesús haʼeha pe Mesías. Jehová opromete vaʼekue Juan el Bautístape oikuaaukataha chupe mávapa pe Mesías. Áño 29-pe d.C., Jesús oho rrío Jordánpe Juan el Bautista ovautisa hag̃ua chupe. La Biblia omombeʼu ñandéve mbaʼépa oiko upérõ: “Jesús ojevautisa rire, osẽre pe ýgui, upepete pe yvága ojeavri, ha Juan ohecha Ñandejára espíritu oguejyha Jesús ári peteĩ palómaicha. Ha yvágagui Ñandejára heʼi: ‘Kóva hína che Raʼy ahayhuetéva ha aguerohorýva’” (Mateo 3:16, 17). Juan ohecha ha ohendúvo koʼã mbaʼe, opilláma Jesús haʼeha pe Mesías (Juan 1:32-34). Upe díape, Jehová omoĩrõ guare ijespíritu sánto  Jesús ári, oiko chugui pe Mesías. Péicha Jehová oiporavo chupe ogoverna hag̃ua Irréino (Isaías 55:4).

⁹ Umi profesía oĩva la Bíbliape, umi mbaʼe Jehová heʼi vaʼekue ha pe oiko vaʼekue Jesús ojevautisárõ guare, ohechauka porã Jesús haʼeha pe Mesías. Péro, ¿moõguipa ou Jesús ha mbaʼeichagua persónapa haʼe? Jahechamína mbaʼépa heʼi la Biblia.

10. ¿Mbaʼépa heʼi ñandéve la Biblia Jesús rehe?

¹⁰ La Biblia omombeʼu ñandéve Jesús ou mboyve ko yvy ape ári oiko hague hetaiterei tiémpo yvágape. Proféta Miqueas heʼi Jesús oikóma hague “ymaite guive” (Miqueas 5:2). Jesús voi omombeʼu vaʼekue haʼe oiko hague yvágape ou mboyve onase peteĩ yvypóraicha (elee Juan 3:13; 6:38, 62; 17:4, 5). Haʼe ou mboyve ko yvy ape ári ojogueraha porãma voi Jehovándi ha oñoamigoite hikuái.

11. ¿Mbaʼérepa Jehová ohayhueterei Jesúspe?

¹¹ Jehová ningo ohayhueterei Jesúspe, pórke chupe raẽvete ojapo vaʼekue. Upévare la Biblia heʼi voi Jesús haʼeha pe “Taʼýra ypykue ojejapo vaʼekue opaite mbaʼe mboyve” * (Colosenses 1:15). Jehová oguerohoryeterei Jesúspe pórke chupe añoite haʼe voi okrea vaʼekue. Upévare oñehenói avei Jesúspe pe ‘Taʼýra peteĩete’ (Juan 3:16). Jesús añoite avei pe omoirũ vaʼekue Jehovápe okrea hag̃ua opaite mbaʼe (Colosenses 1:16). Ha Jesúspe añoite avei oñehenói “pe Ñeʼẽ”, pórke haʼe rupive Jehová oikuaauka hembipota yvyporakuérape ha anhelkuérape (Juan 1:14).

12. ¿Mbaʼéichapa jaikuaa Jesús ha Ñandejára ndahaʼeiha peteĩnte?

¹² Heta hénte opensa Jesús ha Ñandejára peteĩnteha. Péro la Biblia nomboʼéi upéva. La Biblia heʼi Jesús orekoha ijapohare. Jehová katu pe ojapo vaʼekue opa mbaʼe ha ndaipóri ojapo vaʼekue chupe (Salmo 90:2). Jesús ningo Ñandejára Raʼy ha haʼe arakaʼeve ni nopensáiva oiko Ñandejáraramo.  La Biblia heʼi porã voi ñandéve pe Túa tuichaveha pe Taʼýragui (elee Juan 14:28; 1 Corintios 11:3). Jehová añoite ningo pe “Ñandejára Todopoderóso” (Génesis 17:1). Ko univérsope ndaipóri ótro ipoderosovéva chugui (ehecha nóta 14).

13. ¿Mbaʼérepa la Biblia heʼi Jesús rehe haʼeha “Ñandejára jahechaʼỹva joguahaite”?

¹³ Jehová ha Jesús oikóma vaʼekue hetaiterei áñore oñondive okrea mboyve hikuái pe yvága ha ko yvy. Upéicha rupi oiméne ojoayhueterei hikuái (Juan 3:35; 14:31). Jesús ningo osegi Itúa ehémplo opaite mbaʼépe. Upévare la Biblia heʼi voi hese haʼeha “Ñandejára jahechaʼỹva joguahaite” (Colosenses 1:15).

14. ¿Mbaʼépa ojapo Jehová ikatu hag̃uáicha Itaʼýra onase peteĩ yvypóraicha?

¹⁴ Ñandejára Raʼy naiprovlemaiete vaʼekue oheja hag̃ua yvága ha ou hag̃ua onase peteĩ yvypóraicha ko múndope. ¿Mbaʼéichapa oiko vaʼekue upéva? Jehová ojapo peteĩ milágro omoĩ hag̃ua Itaʼýra rekove peteĩ kuña vírhen retepýpe ikatu hag̃uáicha onase peteĩ mitãicha. Jesús túa ndahaʼéi vaʼekue peteĩ yvypóra. Upéicha rupi María oreko peteĩ mitã perfékto ha ombohéra chupe Jesús (Lucas 1:30-35).

15. ¿Mbaʼéichapa ikatu reikuaa porãve Jehovápe?

¹⁵ Releéramo la Bíbliape lívro de Mateo, Marcos, Lucas ha Juan, katuete reikuaa porãvéta mbaʼeichagua persónapa rakaʼe Jesús, mbaʼéichapa oiko ha mbaʼépa ojapo vaʼekue. Jesús ningo ojoguaiterei Itúape opaite mbaʼépe, upéicha rupi, reikuaa porãvévo chupe, reikuaa porãvéta avei Jehovápe. Jesús heʼi vaʼekue voi: “Upe chéve cherecháva ohecháma avei pe Túape” (Juan 14:9).

16. ¿Mbaʼépa omboʼe vaʼekue Jesús ha mávaguipa ou umi mbaʼe omboʼéva?

 ¹⁶ Heta hénte heʼi vaʼekue Jesúspe “Mboʼehára” (Juan 1:38; 13:13). Pe mbaʼe iñimportantevéva Jesús omboʼe vaʼekue haʼe “umi notísia porã oñeʼẽva Ñandejára Rréinore”. ¿Mbaʼépa hína Ñandejára Rréino? Haʼe peteĩ goviérno Ñandejára omoĩtava ogoverna hag̃ua yvága guive ko yvy tuichakuére. Upe goviérno oguerúta heta mbaʼe porã umi hénte iñeʼẽrendúvape (Mateo 4:23). Opa mbaʼe Jesús omboʼe vaʼekue ou Jehovágui. Haʼe heʼi vaʼekue voi: “Che naporomboʼéi chejehegui reínte, síno amboʼe Ñandejára heʼíva, haʼe ningo upe chembou vaʼekue” (Juan 7:16). Jesús oikuaa porã vaʼekue Jehová oipotaha enterovete ohendu umi notísia porã oñeʼẽva Ñandejára goviérnore.

17. ¿Moõ moõpa oporomboʼe vaʼekue Jesús ha mbaʼérepa opredika kyreʼỹ vaʼekue umi héntepe?

¹⁷ Jesús omboʼe vaʼekue oimeraẽ lugár oĩháme hénte. Haʼe omboʼe vaʼekue la héntepe hógape, umi siudaháre, kampañaháre, merkádope, ha umi lugár oñembyatyhápe hikuái omombaʼeguasu hag̃ua Ñandejárape. Haʼe nohaʼarõi vaʼekue umi hénte ou hendápe, síno haʼe voi oho hendapekuéra (Marcos 6:56; Lucas 19:5, 6). Jesús oipurupaite vaʼekue itiémpo ha imbaretekue umi hénte rehehápe, pórke oikuaa porã Ñandejára oipotaha ojapo upéva, ha haʼe iñeʼẽrendu Itúape (Juan 8:28, 29). Jesús opredika kyreʼỹ vaʼekue avei oiporiahuverekógui umi héntepe (elee Mateo 9:35, 36). Haʼe ohecha umi rrelihión omoakãva nomboʼeporãiha la héntepe pe añetegua, haʼekuéra nomboʼéi chupekuéra mávapa Ñandejára ni mbaʼépa pe Irréino. Upévare haʼe ojapo vaʼekue opa ikatúva omombeʼu hag̃ua la héntepe umi notísia porã oúva Ñandejáragui.

18. ¿Mbaʼépa nde remombaʼeve Jesúsre?

 ¹⁸ Jesús ningo ohayhueterei vaʼekue la héntepe. Haʼe imbaʼeporã ha oimeraẽvante ikatu vaʼekue oñeʼẽ hendive. Umi mitã jepe ovyʼa vaʼekue hendive (Marcos 10:13-16). Jesús ihústo ha upévare ndogustaiete vaʼekue chupe pe korrupsión ha umi inhustísia ojejapóva (Mateo 21:12, 13). Jesús tiémpope ndojerrespetái ha noñemombaʼeiete vaʼekue kuñanguérape, péro haʼe siémpre orrespeta ha otrata porã vaʼekue chupekuéra (Juan 4:9, 27). Jesús iñumílde vaʼekue avei. Por ehémplo, peteĩ kaʼarupytũ haʼe ojohéi ijapostolkuérape ipy, ha upéva umi tembiguáinte ojapo vaʼekue yma (Juan 13:2-5, 12-17).

19. ¿Mbaʼérepa ikatu jaʼe Jesús oikuaa hague mbaʼépa oikotevẽ umi hénte ha oipytyvõse hague chupekuéra?

¹⁹ Jesús oikuaa porã vaʼekue mbaʼépa oikotevẽ umi hénte ha oipytyvõse voi chupekuéra. Ñandejára podér rupive haʼe omonguera vaʼekue heta hasývape (Mateo 14:14). Por ehémplo, peteĩ jey ou hendápe peteĩ kuimbaʼe iléprava ha heʼi Jesúspe: “Nde chemongueraséramo ikatu chemonguera”. Haʼe ohecha mbaʼéichapa upe kuimbaʼe osufri ha upévare oiporiahuverekoiterei chupe. Upéicha rupi opoko hese ha heʼi chupe: “Si, romonguerase”. Ha upepete pe kuimbaʼe okuera (Marcos 1:40-42). ¡Epensamíntena mbaʼeichaitépa oiméne ovyʼa raʼe upe kuimbaʼe!

20, 21. ¿Mbaʼeichaite pevépa Jesús iñeʼẽrendu vaʼekue Ñandejárape?

²⁰ Jesús iñeʼẽrendu vaʼekue Ñandejárape ipyʼaite guive. Toiko la oikóva ha oĩramo jepe oñemoĩva hese, haʼe siémpre iñeʼẽrendu Itúape. Por ehémplo, haʼe ndohejái vaʼekue Satanás omoñuhã chupe (Mateo 4:1-11). Ihentekuéra jepe ndoroviái vaʼekue Jesús haʼeha pe  Mesías ha heʼi voi hese hikuái ‘itavyraimaha’. Upéicharõ jepe, haʼe siémpre ojapo Ñandejára rembipota (Marcos 3:21). Iñenemigokuéra ojaʼo vaipárõ guare chupe, haʼe ndojeréi ojaʼo vaipa avei chupekuéra, síno osegi iñeʼẽrendu Jehovápe (1 Pedro 2:21-23).

²¹ Jesús ohasa vaʼekue heta mbaʼe ijetuʼúva iñenemigokuéra káusare, upéicharõ jepe iñeʼẽrendu vaʼekue Jehovápe omano meve (elee Filipenses 2:8). Epensamíntena mbaʼeichaitépa oñembohasa asy ha oñemaltrata vaʼekue chupe ojejuka mboyve. Ojegueraha chupe préso, ojeʼe hese okopiha Ñandejárare, ndojehusgái chupe hekópe, ha umi soldádo otortura ha oklava chupe peteĩ yvyráre. Upéi omano mbotaitévo, Jesús heʼi Ñandejárape: “Ajapopaitéma  umi mbaʼe nde rejerure vaʼekue chéve” (Juan 19:30). Tres día omano haguépe, Jehová omoingove jey Jesúspe, péro ndahaʼevéima peteĩ yvypóraicha, síno peteĩ espírituicha (1 Pedro 3:18). Ha 40 día haguépe, Jesús oho jey yvágape ha “oguapy Ñandejára deréchape” ohaʼarõ aja Ñandejára omoĩ chupe Rréiramo (Hebreos 10:12, 13).

22. ¿Mbaʼépa ikatu jahupyty Jesús iñeʼẽrendu rupi Itúape?

²² Jesús iñeʼẽrendu rupi Itúape, ñande ikatu jaikove opa árare ko yvy ape ári peteĩ hardín iporãitereívape. Jehová ningo péicha voi oipota vaʼekue oiko yvyporakuéra. Pe kapítulo oúvape jahecháta mbaʼéichapa Jesús omano rupi ñanderehehápe ikatúta jaikove opa árare.