1, 2. (a) Kon nahibaluan mo ang ngalan sang bantog nga tawo, buot bala silingon kilala mo na gid sia? Ipaathag. (b) Ano ang pagpati sang mga tawo parte kay Jesus?

MADAMO sang bantog nga tawo sa kalibutan. Basi nahibaluan mo ang ngalan sang isa sa ila. Pero indi buot silingon nga nahibaluan mo ang iya ngalan, kilala mo na gid sia. Indi man buot silingon nga nahibaluan mo ang tanan parte sa iya kag kon ano sia nga klase sang tawo.

² Mahimo nabatian mo na ang parte kay Jesucristo, bisan pa mga 2,000 ka tuig na ang nagligad sang nagkabuhi sia sa duta. Pero madamo ang wala nakahibalo kon ano nga klase sang persona si Jesus. Siling sang iban maayo sia nga tawo, para sa iban isa sia ka propeta, kag ang iban nagapati nga sia ang Dios. Ano sa banta mo?—Tan-awa ang Endnote 12.

3. Ngaa importante nga makilala mo si Jehova nga Dios kag si Jesucristo?

³ Importante nga mahibaluan mo ang kamatuoran parte kay Jesus. Ngaa? Ginasilingan kita sang Biblia: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.” (Juan 17:3) Huo, kon nahibaluan mo ang kamatuoran parte kay Jehova kag kay Jesus, mahimo ka mabuhi sing wala katapusan sa paraiso sa duta. (Juan 14:6) Isa pa, ang pagkilala kay Jesus makabulig sa imo kay sia ang pinakamaayo nga halimbawa kon paano magkabuhi kag makigbagay sa iban.  (Juan 13:34, 35) Natun-an naton sa Kapitulo 1 ang parte sa Dios. Aton naman subong hibaluon kon ano ang ginatudlo sang Biblia parte kay Jesus.

4. Ano ang buot silingon sang tinaga nga “Mesias” kag “Cristo”?

⁴ Madamo nga tinuig antes matawo si Jesus, gintagna ni Jehova sa Biblia nga magapadala sia sing Mesias, ukon Cristo. Ang tinaga nga “Mesias” naghalin sa Hebreo nga lenguahe, kag ang “Cristo” naman sa Griego. Ini nga mga titulo pareho nga nagakahulugan nga ang Dios nagpili sang ginpromisa nga Mesias kag hatagan sia sang pinasahi nga posisyon. Tumanon sa ulihi sang Mesias ang tanan nga promisa sang Dios. Mabuligan ka man ni Jesus subong. Pero antes natawo si Jesus, madamo ang nagapalibog, ‘Sin-o ang Mesias?’

5. Nagapati bala ang mga disipulo ni Jesus nga sia ang Mesias?

⁵ Nagapati gid ang mga disipulo ni Jesus nga sia ang Mesias. (Juan 1:41) Halimbawa, si Simon Pedro nagsiling sa iya: “Ikaw ang Cristo.” (Mateo 16:16) Ngaa masiling naton nga si Jesus amo ang Mesias?

6. Paano ginbuligan ni Jehova ang sinsero nga mga tawo nga makilala ang Mesias?

⁶ Madugay pa antes matawo si Jesus, ginsulat sang mga propeta sang Dios ang mga detalye parte sa Mesias nga makabulig sa mga tawo nga makilal-an sia. Paano? Ibutang ta nga may tabuon ka nga tawo sa estasyon sang bus nga madamo sing tawo, pero wala mo pa gid sia makilala. Sigurado nga makilala mo sia kon may magsugid sa imo kon ano ang hitsura sina nga tawo. Amo man sini kay Jehova, gingamit niya ang iya mga propeta para isugid sa aton kon ano ang himuon sang Mesias kag kon ano ang matabo sa iya. Ang katumanan sining tanan nga  tagna makabulig sa sinsero nga mga tawo nga makilala si Jesus bilang Mesias.

7. Ano ang duha ka tagna nga nagapamatuod nga si Jesus amo ang Mesias?

⁷ Ari ang duha ka tagna. Una, 700 ka tuig antes matawo si Jesus, gintagna ni Miqueas nga ang Mesias matawo sa gamay nga banwa sang Betlehem. (Miqueas 5:2) Sa sina mismo nga banwa natawo si Jesus! (Mateo 2:1, 3-9) Ikaduha, gintagna ni Daniel nga sa tuig 29 C.E. magua ang Mesias. (Daniel 9:25) Duha lamang ini sa madamo nga tagna nga nagapamatuod nga si Jesus amo ang ginpromisa nga Mesias.—Tan-awa ang Endnote 13.

8, 9. Ano ang natabo sang ginbawtismuhan si Jesus nga nagapamatuod nga sia ang Mesias?

⁸ Gin-athag ni Jehova nga si Jesus amo ang Mesias. Nagpromisa ang Dios nga hatagan niya sing tanda si Juan nga Manugbawtismo para makilala niya ang Mesias. Sang nagkadto si Jesus kay Juan para magpabawtismo sa Suba Jordan sang 29 C.E., nakita ni Juan ina nga tanda. Ginsugid sa aton sang Biblia kon ano ang natabo: “Pagkatapos mabawtismuhan si Jesus, nagtakas sia gilayon sa tubig; kag ang langit nabuksan, kag nakita niya ang espiritu sang Dios nga nagapanaug kaangay sang salampati kag nagkunsad [ukon, nagkadto] sa iya. Kag may nabatian nga tingog halin sa langit nga nagasiling: ‘Ini ang akon Anak, ang hinigugma, nga ginakahamut-an ko.’” (Mateo 3:16, 17) Sang nakita kag nabatian ni Juan ang tanda, sigurado na sia nga si Jesus amo ang Mesias. (Juan 1:32-34)  Sadto nga adlaw, sang ginbubo ni Jehova ang iya espiritu kay Jesus, nangin Mesias sia. Sia ang isa nga ginpili sang Dios nga mangin Lider kag Hari.—Isaias 55:4.

⁹ Ginapamatud-an sang mga tagna sa Biblia, sang mga pulong ni Jehova, kag sang mga tanda nga ginhatag Niya sang ginbawtismuhan si Jesus, nga si Jesus amo ang Mesias. Pero diin naghalin si Jesus, kag ano sia nga klase sang tawo? Tan-awon naton kon ano ang ginasiling sang Biblia.

10. Ano ang ginatudlo sang Biblia parte sa kabuhi ni Jesus antes sia nagkabuhi sa duta?

¹⁰ Ginatudlo sang Biblia nga madugay na nga nagkabuhi si Jesus sa langit antes sia nagkadto sa duta. Nagsiling si Miqueas nga ang ginhalinan sang Mesias “halin pa sang una.” (Miqueas 5:2) Madamo nga bes nga nagsiling si Jesus nga nagkabuhi na sia sa langit antes pa sia nangin tawo. (Basaha ang Juan 3:13; 6:38, 62; 17:4, 5.) Antes nagkadto si Jesus sa duta, suod na sia kay Jehova.

11. Ngaa palangga gid ni Jehova si Jesus?

¹¹ Palangga gid ni Jehova si Jesus. Ngaa? Kay sia ang una gid nga gintuga sang Dios. Gani gintawag si Jesus nga “ang panganay sa tanan nga tinuga.” * (Colosas 1:15) Ang isa pa ka rason amo nga si Jesus lamang ang direkta nga gintuga ni Jehova. Amo nga gintawag sia nga “bugtong nga Anak.” (Juan 3:16) Kag si Jesus lamang ang gingamit ni Jehova sang gintuga niya ang iban pa nga butang. (Colosas 1:16) Dugang pa, si Jesus lamang ang gintawag nga “ang Pulong,” bangod gingamit sia ni Jehova para maghatag sang mga mensahe kag mga instruksion sa mga anghel kag mga tawo.—Juan 1:14.

12. Ngaa masiling naton nga si Jesus kag ang Dios indi isa ka persona?

¹² Ang pila nagapati nga si Jesus kag ang Dios isa lang ka persona. Pero indi amo sina ang ginatudlo sang Biblia. Ginasiling sang Biblia nga gintuga si Jesus, gani may ginsuguran sia. Pero si Jehova, nga nagtuga sang tanan nga butang, wala sing ginsuguran. (Salmo 90:2) Bilang Anak  sang Dios, wala gid nagpensar si Jesus nga mangin Dios sia. Maathag nga ginatudlo sang Biblia nga ang Amay labaw pa sa Anak. (Basaha ang Juan 14:28; 1 Corinto 11:3.) Si Jehova lamang “ang Dios nga Labing Gamhanan.” (Genesis 17:1) Sia ang pinakagamhanan nga persona sa uniberso.—Tan-awa ang Endnote 14.

13. Ngaa gintawag sang Biblia si Jesus nga “ang larawan sang indi makita nga Dios”?

¹³ Binilyon na ka tuig nga nag-updanay si Jehova kag ang iya Anak nga si Jesus antes gintuga ang langit kag ang duta. Palangga gid nila ang isa kag isa! (Juan 3:35; 14:31) Ginsunod gid sing maayo ni Jesus ang mga kinaiya sang iya amay, amo nga gintawag sia sang Biblia nga “ang larawan sang indi makita nga Dios.”—Colosas 1:15.

14. Paano nangin tawo ang pinalangga nga Anak ni Jehova?

¹⁴ Ang pinalangga nga Anak ni Jehova handa nga magbiya sa langit para mangin tawo sa duta. Paano ina natabo? Paagi sa milagro, ginsaylo ni Jehova ang kabuhi sang iya Anak sa langit sa tiyan sang birhen nga si Maria. Paagi sini, indi kinahanglan ni Jesus sang tawo nga amay. Gani nagbun-ag si Maria sang perpekto nga anak, kag ginngalanan niya sia nga Jesus.—Lucas 1:30-35.

15. Paano mo pa gid makilala si Jehova?

¹⁵ Madamo ka sing matun-an parte kay Jesus, sa iya kabuhi, kag sa iya mga kinaiya paagi sa pagbasa sang mga libro sang Biblia nga Mateo, Marcos, Lucas, kag Juan. Ginatawag ini nga mga Ebanghelyo. Bangod si Jesus pareho sa iya Amay, ang pagbasa sini nga mga libro makabulig man sa imo nga makilala pa gid si Jehova. Amo nga si Jesus nakasiling: “Ang bisan sin-o nga nakakita sa akon nakakita man sa Amay.”—Juan 14:9.

16. Ano ang gintudlo ni Jesus? Diin naghalin ang mga panudlo ni Jesus?

 ¹⁶ Ginatawag sang madamo si Jesus nga “Manunudlo.” (Juan 1:38; 13:13) Ang isa sa pinakaimportante nga butang nga gintudlo niya amo ang “maayong balita sang Ginharian.” Ano ini nga Ginharian? Gobierno ini sang Dios sa langit nga magagahom sa bilog nga duta kag magahatag ini sang pagpakamaayo sa mga nagatuman sa Dios. (Mateo 4:23) Ang tanan nga gintudlo ni Jesus naghalin kay Jehova. Si Jesus nagsiling: “Ang akon ginatudlo wala naghalin sa akon, kundi sa nagpadala sa akon.” (Juan 7:16) Nahibaluan ni Jesus nga gusto ni Jehova nga mabatian sang mga tawo ang maayong balita nga ang Ginharian sang Dios magagahom sa bilog nga duta.

17. Diin nagtudlo si Jesus? Ngaa nagtinguha gid sia nga tudluan ang iban?

¹⁷ Diin nagtudlo si Jesus? Bisan diin lang nga may tawo. Nagtudlo sia sa mga uma, mga siudad, mga baryo, mga baligyaan, sa duog sang pagsimba, kag sa mga balay. Wala niya ginahulat nga magpalapit ang mga tawo sa iya. Sia ang nagakadto sa ila. (Marcos 6:56; Lucas 19:5, 6) Nagtinguha gid si Jesus kag naggamit sang daku nga tion kag kusog para tudluan ang mga tawo. Ngaa? Kay amo ini ang gusto sang Dios nga himuon niya kag pirme gid niya ginatuman ang iya Amay. (Juan 8:28, 29) Ginbantalaan man ni Jesus ang mga tawo kay naluoy sia sa ila. (Basaha ang Mateo 9:35, 36.) Nakita niya nga wala ginatudlo sang mga lider sang relihion ang kamatuoran parte sa Dios kag sa iya Ginharian. Gani gusto niya buligan ang mas madamo nga tawo nga mabatian ang maayong balita.

18. Ano nga mga kinaiya ni Jesus ang nanamian mo gid?

 ¹⁸ Palangga gid ni Jesus ang mga tawo kag nagaulikid sia sa ila. Mahapos sia palapitan kag istoryahon. Bisan ang mga bata gusto mag-upod sa iya. (Marcos 10:13-16) Matarong sia. Indi niya gusto ang korapsion kag inhustisya. (Mateo 21:12, 13) Sang nagkabuhi sia, diutay lang ang kinamatarong sang mga babayi kag wala sila ginarespeto. Pero pirme gid niya sila ginarespeto kag ginapabaloran. (Juan 4:9, 27) Mapainubuson man si Jesus. Halimbawa, isa ka gab-i ginhinawan niya ang tiil sang iya mga apostoles, nga masami nga ginahimo sang ulipon.—Juan 13:2-5, 12-17.

19. Paano ginpakita ni Jesus nga nahibaluan niya ang kinahanglan sang mga tawo kag gusto niya sila buligan?

¹⁹ Nahibaluan ni Jesus kon ano gid ang kinahanglan sang mga tawo, kag gusto niya sila buligan. Makita ini sang gingamit niya ang gahom sang Dios para ayuhon sila. (Mateo 14:14) Halimbawa, ang tawo nga may aro nagpalapit kay Jesus kag nagsiling: “Kon luyag mo gid, matinluan mo ako.” Naluoy si Jesus sa kasakit kag pag-antos sang tawo. Gusto gid niya sia buligan. Gani gintandog ni Jesus ang tawo, kag nagsiling sa iya: “Luyag ko! Magmatinlo ka.” Kag nag-ayo ang tawo! (Marcos 1:40-42) Sigurado nga nalipay gid ang tawo!

20, 21. Ngaa si Jesus ang pinakamaayo nga halimbawa sang pagtuman sa Dios?

²⁰ Si Jesus ang pinakamaayo nga halimbawa sang pagtuman sa Dios. Bisan ano man ang matabo ukon himuon sang iya mga kaaway, matutom sia gihapon sa iya Amay. Halimbawa, sang ginsulay sia ni Satanas, wala sia nagpakasala. (Mateo 4:1-11) Bisan pa wala nagpati ang  pila sa pamilya ni Jesus nga sia ang Mesias kag nagsiling nga “nagbuang sia,” padayon nga ginhimo ni Jesus ang hilikuton sang Dios. (Marcos 3:21) Sang ginpintasan sia sang iya mga kaaway, nangin matutom gihapon sia sa Dios kag wala niya gintinguhaan nga halitan sila.—1 Pedro 2:21-23.

²¹ Bisan pa nag-antos si Jesus sing mapintas kag masakit nga kamatayon, nangin matutom gihapon sia kay Jehova. (Basaha ang Filipos 2:8.) Grabe gid ang iya ginbatas sang adlaw nga napatay sia. Gin-aresto sia, ginbutangbutangan sia sang indi matuod nga mga saksi, ginpakalain sang korap nga mga hukom, ginkadlawan sang mga tawo, kag ginsakit sang mga soldado kag ginlansang sa usok. Sang dali na lang sia mapatay nagsinggit  sia: “Natuman na!” (Juan 19:30) Pagligad sang tatlo ka adlaw sa tapos napatay si Jesus, ginbanhaw sia ni Jehova bilang isa ka espiritu. (1 Pedro 3:18) Pila ka semana sang ulihi, nagbalik si Jesus sa langit, “nagpungko sa tuo sang Dios,” kag naghulat nga himuon sia sang Dios nga Hari.—Hebreo 10:12, 13.

22. Bangod matutom si Jesus sa iya Amay, ano nga paglaum ang mahimo naton mabaton?

²² Padayon nga nangin matutom si Jesus sa iya Amay, gani may paglaum kita nga mabuhi sing wala katapusan sa paraiso sa duta, suno sa katuyuan ni Jehova. Sa masunod nga kapitulo, hibaluon naton kon paano ang kamatayon ni Jesus naghatag sa aton sing paglaum nga mabuhi sing wala katapusan.