1, 2. (a) Khanst tuu saan tas tuu yemant, woo aarich pekhant is, khënst ploos wayl tuu tëm sayn naame weest? Lee aus. (b) Was saan ëtliche layt iwer Yeesus?

ES KËPT fiil pekhante layt in te wëlt. Sicher khënst tuu te naame fon yemant woo aarich pekhant is. Awer, khanst tuu saan tas tuu tee kuut khënst, ploos wayl tuu tëm sayn naame weest? Kewis nët. Tas petayt nët tas tuu ales iwer sayn leepe weest un wii tee wërklich is.

² Opwool Yeesus Kristus foer unkefeer 2 tausent yoere uf te ëyert keleept hot, host tuu sicher xon etwas iwer tëm keheert. Awer ti mëyeste layt wise nët was fer een mënx Yeesus waar. Ëtliche saan tas er een kuute man waar, anere saan tas er een profeet waar un noch anere klaape tas er Kot is. Was mënst tuu? (Kuk ti Noote 12)

3. Fer was is es important tas tuu Yeehoowa Kot un Yeesus Kristus khënst?

³ Fer was is es important tas tuu ti woerheet iwer Yeesus weest? Ti Piipel leet aus: “Tas petayt tas eewiche leepe: tas se tich khëne tuun, tee eensiche woere Kot, un tee woos tuu kexikt host, Yeesus Kristus.” (João 17:3) Tës weeche, wëns tuu ti woerheet iwer Yeehoowa un Yeesus weest, khanst tuu fer imer in een paratiis uf te ëyert leepe. (João 14:6) Un mee iwer Yeesus wise khan teer hëlfe, wayl er tas pëste payxpiil këp hot, wii ma kuut leepe un mit anere um keen khan. (João 13:34, 35) Im kapitel 1 hon mer ti woerheet iwer Kot kelërnt. Yets tuun mer lërne was ti Piipel iwer Yeesus saat.

4. Was tuun ti wërter “Mesias” un “Kristus” petayte?

⁴ Fiile yoere eep Yeesus uf ti wëlt khom is, hot Yeehoowa in te Piipel ferxproch tas ëyer te Mesias, orer Kristus, xike teet. “Mesias” is een hepreeyx wort un “Kristus” is een kreekix wort. Tiise tswaay thitele petayte “kesalpter”, yemant woo fon Yeehoowa fer een ëkstra aarwayt raus kesuucht is. Te Mesias tuut ale ferxprëche fon Kot erfiile, un tee khan tich aach hayt hëlfe. Awer eep Yeesus uf ti wëlt khom is, hon fiil layt sich xon kefroot: ‘Weer wërt te Mesias sin?’

5. Hon Yeesus sayn tisipele keklaapt tas ëyer te Mesias waar?

⁵ Yeesus sayn tisipele waare sich sicher tas ëyer te ferxprochne Mesias waar. (João 1:41) Tsum payxpiil, Simon Pheeter hot fer Yeesus kesaat: “Tuu pist te Kristus.” (Mateus 16:16) Wii khëne mer sicher sin tas Yeesus te Mesias is?

6. Wii hot Yeehoowa eerliche layt keholef se wise weer te Mesias is?

⁶ Lang tsayt eep Yeesus uf ti wëlt khom is, hon Kot sayn profeete fiil tetalie kexrip woo ti layt hëlfe khënte se wise weer te Mesias wëyer. Wii khont tas hëlfe? Xtël teer mool foer tas tuu yemant, woos tuu nët khënst, in een kroos onipus xtatsioon hoole must. Wën yemant tee kuut fer tich pexraype teet, teest tuu tee fine. Kraat soo, hot Yeehoowa ti profeete penutst fer uns se saan was te Mesias mache un was mit tëm pasiire teet. Wayl tiise profetsiie sich al erfiilt hon, khëne eerliche layt wise tas Yeesus te Mesias is.

7. Was fer profetsiie pewayse tas Yeesus te Mesias is?

 ⁷ Hiir sin tswaay fon tiise profetsiie. Ëyerstens, 700 yoere eep Yeesus kepoer is, hot Mikëyas kesaat tas te Mesias in te kleen xtat Petleheem uf ti wëlt khome teet. (Miqueias 5:2) Un kenau tat is Yeesus kepoer këp! (Mateus 2:1, 3-9) Tsweetens, hot Taniël kesaat tas te Mesias im yoer 29 tsum foer xayn khome teet. (Daniel 9:25) Tas sin ploos tswaay fon fiile profetsiie woo taytlich pewayse tas Yeesus te ferxprochne Mesias is. (Kuk ti Noote 13)

8, 9. Was is in Yeesus sayn taaf pasiirt, woo tsaycht tas er te Mesias is?

⁸ Yeehoowa hot kans taytlich ketsaycht tas Yeesus te Mesias is. Kot hot fer Yohanes te Taafer ferxproch tas ëyer tëm een sinaal këpe teet. Soo khënt tee wise weer te Mesias waar. Wii Yeesus tsu Yohanes khom is, fer sich im Yortan flus taafe lose, im yoer 29, hot Yohanes tiise sinaal kesiin. Ti Piipel saat uns was pasiirt is: “Noo tëm Yeesus ketaaft këp is, is er klaych aus tëm waser raus kang, un in tëm momënt sin ti himele uf kang, un ëyer hot Kot sayn kayst wii een taup uf tee runer khome, kesiin. Too waar aach een xtim, woo fom himel kesaat hot: ‘Tas is mayn Soon, te keliipte, woo ich aan kenom hon’”. (Mateus 3:16, 17) Wii Yohanes tas sinaal kesiin un keheert hot, waar ëyer sich sicher tas Yeesus te Mesias waar. (João 1:32-34) Aan tëm taach, wii Yeehoowa sayn hayliche kayst  uf Yeesus ketuun hot, is er te Mesias këp. Soo, is Yeesus tee woo Kot raus kesuucht hot fer Fiirer un Kheenich se sin. (Isaías 55:4)

⁹ Piiplixe profetsiie, Yeehoowa sayn aychne wërter un tas sinaal woo Ëyer in Yeesus sayn taaf këp hot, tsayche tas Yeesus te Mesias is. Awer fon woo is Yeesus khom? Was fer een mënx waar Yeesus? Wole mer siin was ti Piipel saat.

10. Was saat ti Piipel iwer Yeesus sayn leepe eep ëyer uf ti ëyert khom is?

¹⁰ Ti Piipel tuut in lërne tas eep Yeesus uf ti ëyert khom is, hot ëyer een lang tsayt im himel keleept. Te profeet Mikëyas hot kesaat tas te Mesias “fon te friirixe tsayte” waar. (Miqueias 5:2) Yeesus sëlepst hot oft mools kesaat tas er im himel keleept hot eep ëyer wii een mënx uf ti wëlt khom is. (Lees João 3:13; 6:38, 62; 17:4, 5) Eep Yeesus uf ti ëyert khom is, hat ëyer xon een spetsiaal ferpiinung mit Yeehoowa.

11. Warom is Yeesus soo spetsiaal fer Yeehoowa?

¹¹ Yeesus is aarich spetsiaal fer Yeehoowa. Warom? Wayl Yeehoowa tee foer ale anere tinge un mënxe kemacht hot. Tës weeche, wërt Yeesus “te ëyerst kepoorene fon ales woo kemacht këp is”, kenënt. * (Colossenses 1:15) Yeesus is aach spetsiaal fer Yeehoowa wayl ëyer ti eensich kriatuer is, woo Yeehoowa aleen kemacht hot. Tës weeche, is er “eensich kepoorene Soon” kenënt. (João 3:16) Yeesus is te eensiche woo Yeehoowa penutst hot fer ales anere se mache. (Colossenses 1:16) Un ploos Yeesus is “tas Wort” kenënt, wayl Yeehoowa tee penutst hot fer oter un instrutsioone fer ëngele un mënxe se këpe. (João 1:14)

12. Wii wise mer tas Yeesus un Yeehoowa nët ti sëlwich persoon sin?

¹² Ëtliche layt mëne tas Kot un Yeesus ti sëlwich persoon sin. Awer ti Piipel tuut tas nët in lërne. Ti Piipel saat tas Yeesus kemacht këp is, un tas petayt tas ëyer een aanfang hat. Awer Yeehoowa, woo  ales kemacht hot, hat khee aanfang. (Salmo 90:2) Opwool Yeesus Kot sayn Soon is, hot ëyer sich nii iwerleet Kot se sin. Ti Piipel saat kans taytlich tas te Fater kreeser wii te Soon is. (Lees João 14:28; 1 Coríntios 11:3) Ploos Yeehoowa is “te Ale Mëchtiche Kot”. (Gênesis 17:1) Tee is te kreeste un mëchtichste fom uniwërsum. (Kuk ti Noote 14)

13. Warom saat ti Piipel tas Yeesus “tas pilt fom Kot woo mer nët siin khëne”, is?

¹³ Yeehoowa un sayn Soon, Yeesus, hon pilioone yoere mitsamer kexaft eep se ti himele un ti ëyert kemacht hon. Ti tuun eene te anere aarich liipe! (João 3:35; 14:31) Yeesus hot ti kwaliteete fon sayn Fater soo kuut noo kemacht tas ti Piipel saat tas ëyer “tas pilt fom Kot woo mer nët siin khëne”, is. (Colossenses 1:15)

14. Wii khont te keliipte Soon fon Kot wii een mënx uf ti wëlt khome?

¹⁴ Yeehoowa sayn keliipte Soon, hot fraywilich sayn plats im himel kelos fer wii een mënx uf ti wëlt se khome. Wii waar tas meechlich? Torich een wuner hot Yeehoowa tas leepe fon sayn Soon in te layp fon een meete, woo Maria keheest hot, rin ketuun. Soo, is Maria sayn khint perfëkt uf ti wëlt khom wayl es khee mënxliche fater hat. Tii hot tas khint Yeesus kenënt. (Lucas 1:30-35)

15. Wii khanst tuu Yeehoowa pëser khëne?

¹⁵ Wëns tuu ti Piipel piicher fon Mateus, Marcos, Lucas un João leest, tuust tuu fiil iwer Yeesus, sayn leepe un sayn kwaliteete lërne. Tiise piicher sin wii ti Ewankeelie pekhant. Wëns  tuu iwer Yeesus leest, tuust tuu aach Yeehoowa pëser khëne, wayl Yeesus aarich eenlich wii sayn Fater is. Yeesus khont saan: “Weer mich siit, siit aach mayn Fater.” (João 14:9)

16. Was hot Yeesus in kelërnt un fon weem is tas khom?

¹⁶ Fiile layt hon Yeesus “Leerer” kenënt. (João 1:38; 13:13) Een fon te wichtichste tinge woo ëyer in kelërnt hot, waare “ti kuute oter fon Kot sayn Raych”. Was is Kot sayn Raych? Es is Kot sayn rechiirung, woo fom himel palt ti kans ëyert rechiire tuut. Es pringt seechne fer tii woo Kot aan heere. (Mateus 4:23) Ales was Yeesus kesaat hot, hot er fon Kot kelërnt. Ëyer wust tas Yeehoowa hon wolt tas ti layt tiise kuute oter heere solte, un hot kesaat: “Was ich in lërne is nët mayn, awer keheert tëm woo mich kexikt hot.” (João 7:16)

17. Woo hot Yeesus in kelërnt? Warom hot ëyer sich soo aan kextrëngt fer ti layt in se lërne?

¹⁷ Woo hot Yeesus in kelërnt? Iweraal woo ëyer layt aan ketrof hot. Ëyer hot se in te kolonii, xtate, kexëft plëtse, plëtse woo ti layt Kot aan kepeet hon un in tëne sayn hayser in kelërnt. Tee hot nët kewaart tas tii tsu tëm khom sin. Tee is oft mools tsu tëne kang. (Marcos 6:56; Lucas 19:5, 6) Yeesus hot sich aarich aan kextrëngt fer ti layt in se lërne. Warom? Wayl ëyer wust tas Kot tas hon wolt, un wayl ëyer sayn Fater imer aan keheert hot. (João 8:28, 29) Yeesus hot aach kepreeticht wayl ëyer ti layt ketauert hot. (Lees Mateus 9:35, 36) Tee hot kesiin tas ti relichioons xëfe nët ti woerheet iwer Kot un sayn Raych in kelërnt hon. Soo, wolt ëyer soo fiil layt wii meechlich hëlfe, ti kuute oter se heere.

18. Was fer kwaliteete fon Yeesus tuun teer pëser kefale?

 ¹⁸ Yeesus hot ti mënxe keliipt un sich mit tëne kekhimert. Tee waar liip un yeete eene khont mit tëm xprëche. Soo kaar ti khiner wolte pay tëm plaype. (Marcos 10:13-16) Yeesus hot nii yemant unkerëcht pehantelt un ëyer hot aach koruptsioon nët aan kenom. (Mateus 21:12, 13) In sayn tsayt, hate ti fraae weenich rëchte un sin nët mit respëkt pehantelt këp. Awer Yeesus hot fraae imer mit respëkt pehantelt. (João 4:9, 27) Yeesus waar wërklich teemuutich. Tsum payxpiil, aan een aamt hot er ti fiis fon sayn aphostele kewëxt, etwas woo een knëcht kemacht hot. (João 13:2-5, 12-17)

19. Was fer een payxpiil tsaycht tas Yeesus wust was ti layt prauchte un tas er tëne hëlfe wolt?

¹⁹ Yeesus wust was ti layt wërklich prauchte un wolt tëne hëlfe. Tas khont ma kenau siin wii ëyer mit Kot sayn macht, mënxe torich wuner kesunt kemacht hot. (Mateus 14:14) Tsum payxpiil, een man woo lëpra hat, is tsu Yeesus khom un hot kesaat: “Wëns tuu ploos wilst, khanst tuu mich rayn mache.” Ti phayn un tas eelent fon tiise man hon Yeesus soo layt ketuun tas ëyer tee man hëlfe wolt. Too hot Yeesus sayn hant aus kextrëkt, te man aan kekrif un fer tee kesaat: “Ich wil es! Këp rayn.” Un too is te man kesunt këp! (Marcos 1:40-42) Khanst tuu teer foer xtële wii froo te man këp is?

20, 21. Warom is Yeesus tas pëste payxpiil fon yemant woo Kot aan heert?

²⁰ Yeesus is tas pëste payxpiil fon yemant woo Kot aan keheert hot. Es waar een tuun was pasiirt is orer was sayn faynte kemacht hon, Yeesus waar imer troy tsu sayn Fater. Tsum payxpiil, wii Yeesus fom Taywel fersuucht këp is, hot ëyer nët kesint.  (Mateus 4:1-11) Ëtliche parente fon Yeesus hon nët keklaapt tas er te Mesias waar un hon kesaat tas er “te ferxtant ferloer” hat. Awer Yeesus hot wayter Kot sayn wile kemacht. (Marcos 3:21) Wii sayn faynte aarich xlëcht mit tëm waare, is Yeesus wayter troy tsu Kot keplip un hot tii nii xlëcht pehantelt. (1 Pedro 2:21-23)

²¹ Yeesus hot fiil phayn mit kemacht eep er kextorep is. Awer ëyer is pis aans ën troy tsu Yeehoowa keplip. (Lees Filipenses 2:8) Tënk mool was Yeesus am taach woo ëyer kextorep is, aus hale must. Tee is in kexpërt këp, falxe tsayer hon kesaat tas er Kot nët respëktiirt hot un korupte richter hon tee konteniirt. Too, hon ti layt tee aus kelacht un soltaate hon tee kekweelt un aan een phool kenaachelt. Wii ëyer am xtërpe waar hot  er kesaat: “Es is erfiilt!” (João 19:30) Tray taache noo tëm Yeesus kextorep is, hot Yeehoowa tee fom toot uf keruuft un tëm een kaystlich khërper këp. (1 Pedro 3:18) Phaar woche tëm noo, is Yeesus tsurik tsum himel kang, un hot “sich tsu te rëchte sayt fon Kot kesëtst” un kewaart pis Kot tee tsum Kheenich kemacht hot. (Hebreus 10:12, 13)

22. Was fer een oportuniteet hon mer yets wayl Yeesus troy tsu sayn Fater keplip is?

²² Wayl Yeesus troy tsu sayn Fater waar, hon mer ti oportuniteet fer imer im paratiis uf te ëyert se leepe, soo wii Yeehoowa es wolt. Im neekste kapitel, tuun mer siin wii Yeesus sayn toot uns tiise oportuniteet këpt.