1, 2. (a) Okutjiwa ena romundu omutjiukwa ku heya kutja ove mo mu tjiwa tjiri? Kahurura. (b) Ovandu ve kambura kutja Jesus wa ri omungendu?

MOUYE mu novandu ovengi ovatjiukwa. Ove ngahino mo tjiwa ena romundu omutjiukwa. Nungwari okutjiwa ena romundu omutjiukwa uriri kaku hee kutja ove tjiri u tjiwa omundu ngo. Kaku hee kutja ove u tjiwa oviṋa avihe mehupo re nokutja eye omundu wotjikaro tji tja sana pi.

² Ove ngahino wa rora okuzuva ohunga na Jesus Kristus, nandarire kutja eye wa hupire ozombura ape 2 000 nḓa kapita. Posi yokutja ovandu ovengi kave tjiwa kutja Jesus tjiri wa ri omungendu. Tjiva ve tja eye wa ri omundu omuwa uriri, varwe ve tja eye wa ri omuprofete nu varwe ve kambura kutja eye oMukuru. Ove u muna kutja eye wa ri omungendu?—Tara kOmambo wokehi 12.

3. Ongwaye tje ri ohepero kove okutjiwa Jehova Mukuru na Jesus Kristus?

³ Ove mo hepa okutjiwa ouatjiri ohunga na Jesus. Omena ratjike? Ombeibela mai tja: “Nomuinyo waaruhe okwo ngwi okutja owo ve tjiwe Ove, ngu u ri Ndjambi watjiri, nokutja ve tjiwe Jesus Kristus ngu wa hinda.” (Johanes 17:3) Tji wa tjiwa ouatjiri ohunga na Jehova na Jesus, mo kahupa nga aruhe moparadisa kombanda yehi. (Johanes 14:6) Okutjiwa Jesus wina maku ku vatere, orondu eye wa yandja otjihorera otjisembasemba ohunga nomuano mbu twa sokuhupa nokutja varwe twa sokuvetjinda vi. (Johanes 13:34, 35) MEkondwa 1 rembo ndi, twe rihonga ouatjiri  ohunga na Mukuru. Nambano matu rihongo kutja Ombeibela i honga tjike ohunga na Jesus.

4. Omambo nga “Messias” na “Kristus” ye heya tjike?

⁴ Ozombura ozengi ngunda Jesus e hiya kwatwa, Jehova wa hunganeka mOmbeibela kutja ma hindi Messias, poo Kristus. Embo ndi “Messias” ra za kOtjiheberi, nu embo ndi “Kristus” ra za kOtjigrike. Omaisaneno ayeevari nga ye heya kutja Mukuru ma toorora Messias omukwizikwa nu e mu pe otjihako tjapeke. Messias ma yenenisa omakwizikiro waMukuru aehe. Jesus wina ma yenene okukuvatera nai. Nungwari ngunda Jesus e hiya kwatwa, ovandu ovengi aave ripura kutja, ‘Owaṋi ngu ma karira Messias?’

5. Ovahongewa vaJesus va ri nongamburiro kutja eye ongu ri Messias poo indee?

⁵ Ovahongewa vaJesus va ri nongamburiro okuura kutja eye ongwa ri Messias ngwa hunganekwa. (Johanes 1:41) Okutara kotjihorera, Simon Petrus wa raera Jesus kutja, “OOve Kristus.” (Mateus 16:16) Matu yenene vi okukara nongamburiro kutja Jesus ongu ri Messias?

6. Jehova wa vatera vi ovandu vomitima omiwa okutjiwa kutja Messias ouṋe?

⁶ Ozombura ozengi komurungu wongwatero yaJesus, ovaprofete vaMukuru va tjanga ohunga noviṋa ovingi mbi mavi vatere ovandu okutjiwa Messias. Omomuano uṋe mu vya vatera ovandu? Ngatu tje ove wa ningirwa okukapaha omundu ngu mu hiya rora okuhakaena kotjikuturiro tjozombesi. Indu tji wa pewa ovikaṋena ku mo zemburukire ko omundu ngu mo sokukapaha, mavi ku vatere okumumuna oupupu. Momuano otjingewo, Jehova wa ungurisa ovaprofete ve okuturaera ohunga na imbi Messias mbi me yekutjita nokutja maku yekutjitwa tjike ku ye.  Omayenenisiro womaprofetero aehe ngo, ye vatera ovandu vomitima omiwa okutjiwa kutja Jesus ongu ri Messias.

7. Omahunganekero yeṋe yevari nge raisa kutja Jesus ongu ri Messias?

⁷ Tara ku yevari womahunganekero ngo. Omatenga, ozombura 700 komurungu wongwatero yaJesus, Mika wa hunganeka kutja Messias ma kakwaterwa mokahuro okaṱiṱi kena Betlehem. (Mika 5:2) Nu ihi ootjihuro Jesus ma kwaterwa! (Mateus 2:1, 3-9) Oyetjavari, Daniel wa hunganeka kutja Messias ma tjiukwa mombura ndji 29 O.Z. (Daniel 9:25) Inga omahunganekero yevari uriri nge raisa oukahu kutja Jesus ongu ri Messias omukwizikwa.—Tara kOmambo wokehi 13.

8, 9. Pa tjitwa tjike pombapitisimo yaJesus tji tja raisa kutja eye ongu ri Messias?

⁸ Jehova wa raisa oukahu kutja Jesus ongu ri Messias. Mukuru wa kwizikira Johanes Omupapitise kutja me mu pe otjiraisiro tji ma yenene okuzemburukira ko Messias. Indu Jesus tja ya ku Johanes kutja me mu papitise mOnḓonḓu Jordan mombura ndji 29 O.Z., Johanes wa muna otjiraisiro ho. Ohunga na imbi mbya tjitwa, Ombeibela i tja: “Tjimanga Jesus tja za nokupapitisiwa wa pita momeva. Tjazumba eyuru ari Mu paturukire, nu Johanes a munu Ombepo yaNdjambi amai rauka tjimuna onguti nu amai ya kombanda yaJesus. Indino arire tji pa hungire eraka okuza meyuru ari tja: ‘Ingwi Eye Omuna wandje omusuverwa Ami mu mbi nonyuṋe.’” (Mateus 3:16, 17) Kombunda yokumuna nokuzuva imbi mbya tjitwa, Johanes kena pa keyakeya kutja Jesus ongu ri Messias. (Johanes  1:32-34) Meyuva ndo, indu Jehova tja tirira ombepo ye kombanda yaJesus, eye otja rira Messias. Eye ongwa toororwa i Mukuru kutja ma rire Omuhongore nOmbara.—Jesaja 55:4.

⁹ Omayenenisiro womahunganekero wOmbeibela nomambo waJehova omuini notjiraisiro Eye tja yandja pombapitisimo yaJesus, vya raisa oukahu kutja Jesus ongu ri  Messias. Nu hapo Jesus wa zire pi, nu wa ri omungendu? Ngatu tare kutja Ombeibela mai tja vi.

10. Ombeibela i honga tjike ohunga nehupo raJesus ngunda e hiye ya kombanda yehi?

¹⁰ Ombeibela i honga kutja Jesus wa ri meyuru oure wozombura ozengi ngunda e hiye ya kombanda yehi. Mika wa tja Messias wa za “koruveze orukuru.” (Mika 5:2) Povikando ovingi Jesus omuini aa tja wa ri meyuru komurungu wokuyekukwatwa otjomundu. (Lesa Johanes 3:13; 6:38, 62; 17:4, 5.) Nandarire ngunda e hiye ya kombanda yehi, Jesus wa ri noupanga wapeke kuna Jehova.

11. Ongwaye Jesus tje ri omuingona tjinene nao ku Jehova?

¹¹ Jesus omuingona tjinene ku Jehova. Omena ratjike? Omena rokutja Mukuru we mu uta omutenga poviṋa avihe poo pu ngamwa omundu. Kunao, Ombeibela i tja Jesus ‘ongwa ri po komeho yoviutwa avihe.’ * (Ovakolose 1:15) Jesus wina omuingona ku Jehova mena rokutja eye erike ongwa memwa i Jehova omuini. Mena ranao eye u isanewa kutja “Omuna we omukwatwaerike.” (Johanes 3:16) Jesus erike ongwa ungurisiwa i Jehova okumema oviṋa avihe vyarwe. (Ovakolose 1:16) Jesus erike wina ongu isanewa “Embo,” mena rokutja Jehova ee mu ungurisa okutwara ozombuze nomirari vye kovaengeli novandu.—Johanes 1:14.

12. Matu tjiwa vi kutja Jesus na Mukuru kamundu umwe?

¹² Ovandu tjiva ve kambura kutja Jesus na Mukuru omundu umwe. Nungwari Ombeibela kai hongo nao. Ombeibela i tja Jesus wa memwa, pu mape hee kutja eye  u nombutiro. Posi yokutja Jehova ngwa uta oviṋa avihe, ke nombutiro. (Epsalme 90:2) OtjOmuna waMukuru, Jesus kena pa rorere okuvanga okurira Mukuru. Ombeibela i honga oukahu kutja Ihe omunene pOmuna. (Lesa Johanes 14:28; 1 Ovakorinte 11:3.) Jehova erike ongu ri “Ndjambi Omunamasaaehe.” (Genesis 17:1) Eye eemundu omunenenene nu omunamasa tjinene mouye.—Tara kOmambo wokehi 14.

13. Ongwaye Ombeibela tji i tja Jesus ‘osaneno yaNdjambi ngu ha munika’?

¹³ Jehova nOmuna we Jesus, va ungura pamwe oure wozombura omatau omengi ngunda eyuru nehi avi hiya memwa. Owo tjiri va suverasanene tjinene! (Johanes 3:35; 14:31) Jesus aa horere ovikaṋena vyaIhe nawa ngandu Ombeibela tji i tja eye ‘osaneno yaNdjambi ngu ha munika.’—Ovakolose 1:15.

14. Hapo pe ya vi Omuna waJehova omuhuze me yekukwatwa otjomundu?

¹⁴ Omuna waJehova omuhuze we riyandjera okuisa omaturiro we womeyuru kutja me yekukwatwa otjomundu kombanda yehi. Nu hapo pe ya vi otjiutwa tjombepo tji yekukwatwa otjomundu? Jehova wa tjita otjihimise na tanaurire omuinyo wOmuna we mezumo romusuko wena Maria. Momuano mbwi Jesus kaa hepa okukara na ihe womundu. Okutja Maria wa panduka omuatje omuzandu ohomonena, neye we mu ruka Jesus.—Lukas 1:30-35.

15. Mo yenene vi okutjiwa Jehova nawa?

¹⁵ Mo yenene okurihonga ovingi ohunga na Jesus, ehupo re novikaṋena vye, mokulesa omambo wOmbeibela nga: Mateus, Markus, Lukas na Johanes. Omambo ngo ye isanewa Omaevangeli. Mena rokutja Jesus wa ri otja Ihe, oviṋa mbi matu lese ohunga na ye wina mavi tu vatere  okutjiwa Jehova nawa. Jesus opaa zokutja: “Auhe ngwa munu Ami wa munu Tate.”—Johanes 14:9.

16. Jesus aa hongo tjike? Omahongero we ya zire pi?

¹⁶ Ovandu ovengi aave isana Jesus kutja “Muhonge.” (Johanes 1:38; 13:13) Otjiṋa tjimwe otjinanḓengu tjaa hongo ya ri “Ombuze Ombwa youhona.” Hapo Ouhona mbwi otjikeṋa? Owo ohoromende yaMukuru ndji mai kahonapara kombanda yehi arihe okuza keyuru nu ndji mai kaeta ozondaya ku imba mbe nonḓuviro ku Mukuru. (Mateus 4:23) Oviṋa avihe Jesus mbyaa hongo vya zire ku Jehova. Jesus wa tjere: “Imbi mbi me hongo ovandu ovyo kavyomahongero wandje omuini, nungwari mavi zu ku Ndjambi ngwe Ndji hinda.” (Johanes 7:16) Jesus aa tjiwa kutja Jehova u vanga kutja ovandu ve zuve ohunga nombuze ombwa yOuhona waMukuru mbu mau kahonaparera ehi.

17. Jesus ovandu ee ve hongere pi? Ongwaye tjaa kondjo tjinene nao okuhonga varwe?

¹⁷ Jesus ovandu ee ve hongere pi? Akuhe kaa vaza ko ovandu. Eye ee ve hongere motukondo twomahi, movihuro, movirongo, potuveze twomarandisiro, potuveze twomerikotameneno na wina mozondjuwo zawo. Jesus kaa undjire ko kutja ovandu ve ye ku ye. Eye potuingi aai ku wo. (Markus 6:56; Lukas 19:5, 6) Jesus aa kondjo tjinene nu aa ungurisa oruveze oruingi nomasa we okuhonga ovandu. Ongwaye tjaa tjiti nao? Orondu eye aa tjiwa kutja Mukuru aa vanga kutja ma tjite nao, na wina mena rokutja eye aruhe aa tjiti ombango yaIhe. (Johanes 8:28, 29) Jesus wina aa zuvarisa mena rokutja aa ṱondjenda novandu. (Lesa Mateus 9:35, 36.) Eye aa munu kutja ovahonge vozongamburiro kaave ve hongo ouatjiri ohunga na Mukuru nOuhona we. Okutja aa vanga okuvatera ovandu ovengi kutja ve zuve ombuze ombwa.

18. Ovikaṋena viṋe vyaJesus mbi ku tjatera tjinene?

 ¹⁸ Jesus wa ri omundu ngwa suverere ovandu tjiri nu ngwee rikendere ku wo. Eye wa ri nomutima omuwa nu ya ri oupupu okuhungira kuna ye. Nandarire ovanatje va suverere okukara puna ye. (Markus 10:13-16) Jesus ka ri nombangu. Eye wa tondere ouhasemba. (Mateus 21:12, 13) Eye aa hupu moruveze indu ovakazendu tji ve ha ri nousemba ouingi otjovandu, nu tjaave tjindwa nokuhina ondengero. Posi yokutja Jesus aruhe aa tjindi ovakazendu nondengero. (Johanes 4:9, 27) Jesus tjiri wa ri omurisusuparise. Okutara kotjihorera, ongurova imwe eye wa koha ozombaze zovaapostele ve, otjiungura tjaatji ungurwa i ovakarere.—Johanes 13:2-5, 12-17.

19. Otjihorera tjiṋe tji matji raisa kutja Jesus aa tjiwa nawa kutja ovandu tjiri aave hepa tjike, nokutja aa vanga okuvevatera?

¹⁹ Jesus aa tjiwa nawa kutja ovandu tjiri aave hepa tjike, nu aa vanga okuvevatera. Ihi aatji munika momuano omuhimise mbwaa verukisa ovandu nomasa wombepo yaMukuru. (Mateus 14:14) Okutara kotjihorera, omurumendu ngwa ri nomutjise wongana we ya ku Jesus na tja: “Tji wa vanga, Ove mo sora okundjiverukisa.” Omuhihamo nouzeu womurumendu ngwi wa ṱuna ku Jesus tjinene. Eye we mu ṱira ondjenda nu aa vanga okumuvatera. Okutja Jesus otja roporora okuoko kwe a ṱunu komurumendu na tja ku ye: “Ami me vanga, veruka!” Nomurumendu ngwa verere wa veruka! (Markus 1:40-42) Ripura uriri kutja otjiṋa hi tja ṱuna vi komurumendu ngwi!

20, 21. Omomuano uṋe Jesus me ri otjihorera otjisembasemba tjonḓuviro ku Mukuru?

²⁰ Jesus wa raisa otjihorera otjisembasemba tjonḓuviro ku Mukuru. Nakombanda yoviṋa avihe mbya tjitwa poo ovanavita na ye mbi va tjita ku ye, eye wa ṱakama mu Ihe.  Okutara kotjihorera, Jesus kena pa katuka indu Satan tja kondjisa okumurorera kouvi. (Mateus 4:1-11) Ovazamumwe vaJesus tjiva kaave kambura kutja eye ongu ri Messias nu nandarire aave tja eye ‘wa vera oviyoze.’ Posi yokutja Jesus wa kayenda komurungu okuungura oviungura vyaMukuru. (Markus 3:21) Indu ovanavita na ye tjaave mu tatumisa, Jesus wa ṱakama mu Mukuru nu kena pa kondjisa okuvehihamisa.—1 Petrus 2:21-23.

²¹ Nandarire ponḓiro ye ombi nondetarise, Jesus wa ṱakama mu Jehova. (Lesa Ovafilipi 2:8.) Ripura uriri kutja omauzeu nge ṱa pi ngaa sokutjinda meyuva ronḓiro ye. Eye wa kamburwa, a kumininwa kutja wa yamburura Mukuru, a pangurwa i ovapangure vovineya, a nyekererwa i ovandu, a tatumisiwa i ovarwe vovita nave mu papere  komuti. Indu tja ri pokuṱa wa ravaerera na tja: “Tja tjitwa tja yenene!” (Johanes 19:30) Omayuva yetatu kombunda yonḓiro yaJesus, Jehova we mu pendura ne mu pe orutu rwombepo. (1 Petrus 3:18) Ovivike oviṱiṱi kombunda yanao, Jesus wa yaruka keyuru, wa “kakara pehi kokunene kwaNdjambi” na undju kutja Mukuru me mu zike otjOmbara.—Ovaheberi 10:12, 13.

22. Mena rokutja Jesus wa ṱakama mu Ihe, eṱe nai tu noruveze rwokutjita tjike?

²² Mena rokutja Jesus wa ri omuṱakame ku Ihe, eṱe nai matu yenene okuhupa nga aruhe moparadisa kombanda yehi, otja kondando yaJehova. Mekondwa ndi mari kongorere ko matu kerihonga kutja onḓiro yaJesus mai tu vatere vi okuhupa nga aruhe.