1, 2. (a) Am-ammom kadi a talaga ti maysa a sikat a tao no naganna laeng ti ammom? Ilawlawagmo. (b) Ania ti patpatien ti adu maipapan ken Jesus?

NAGADU ti sikat a tattao iti lubong ita. Mabalin nga ammom ti nagan ti maysa kadakuada ngem saanna a kayat a sawen nga am-ammom a talaga isuna wenno ammom ti amin a detalye maipapan iti biagna ken ania ti klasena a tao.

² Mabalin a nangnangngegmon ti maipapan ken Jesu-Kristo uray no nagbiag ditoy daga agarup 2,000 a tawenen ti napalabas. Ngem saan nga ammo ti kaaduan no ania a klase a tao ni Jesus. Adda dagiti mangibaga a nasayaat a tao isuna, adda met dagiti mangibaga nga isu ket maysa a propeta, ken dadduma ti mamati nga isu ti Dios. Ania ti makunam?​—Kitaen ti Endnote 12.

3. Apay a napateg a maam-ammom ni Jehova a Dios ken ni Jesu-Kristo?

³ Napateg a maammuam ti kinapudno maipapan ken Jesus. Apay? Ibaga ti Biblia: “Maaddaanto iti biag nga agnanayon dagidiay mangam-ammo kenka, ti maymaysa a pudno a Dios, ken ti imbaonmo, ni Jesu-Kristo.” (Juan 17:3) No maammuam ti kinapudno maipapan ken Jehova ken ni Jesus, mabalinka nga agbiag nga agnanayon iti paraiso a daga. (Juan 14:6) Maysa pay, makatulong kenka no maammuam ti maipapan ken Jesus ta impakitana ti kasayaatan a panagbiag  ken panangtrato iti sabsabali. (Juan 13:34, 35) Iti Kapitulo 1, naadaltayo ti kinapudno maipapan iti Dios. Maadaltayo met ita ti isursuro ti Biblia maipapan ken Jesus.

4. Ania ti kayat a sawen ti sasao a “Mesias” ken “Kristo”?

⁴ Adu a tawen sakbay a nayanak ni Jesus, inkari ni Jehova iti Biblia nga ibaonna ti Mesias, wenno Kristo. Ti sao a “Mesias” ket Hebreo ken ti sao a “Kristo” ket Griego. Agpada a tukoyen dagitoy a titulo daydiay pinili ti Dios nga ikkan iti naisangsangayan a posision. Ti Mesias ti mangitungpal iti amin a kari ti Dios. Matulongannaka met ni Jesus uray ita. Ngem sakbay a nayanak ni Jesus, adu ti mangpampanunot, ‘Asino ti agbalin a Mesias?’

5. Namati kadi dagiti adalan ni Jesus nga isu ti Mesias?

⁵ Saan a pinagduaduaan dagiti adalan ni Jesus nga isu ti Mesias. (Juan 1:41) Kas pagarigan, imbaga ni Simon Pedro ken ni Jesus: “Sika ti Kristo.” (Mateo 16:16) Kasanotayo a masigurado a ni Jesus ti Mesias?

6. Kasano a tinulongan ni Jehova dagiti tattao a talaga a mayat a mangammo no asino ti Mesias?

⁶ Sakbay pay a nayanak ni Jesus, nabayagen nga insurat dagiti propeta ti Dios ti adu a detalye a makatulong kadagiti tattao tapno mailasinda ti Mesias. Kasano a makatulong dayta? Ipapanmo a naibaonka a mapan mangsabat iti tao a dimo am-ammo iti terminal ti bus nga adu ti taona. No adda nangibaga kenka no kasanom a mailasin dayta a tao, nalakam la a mabirokan. Kasta met, inusar ni Jehova dagiti propetana a mangibaga kadatayo iti aramiden ti Mesias ken ti mapasamak kenkuana. Ti pannakatungpal dagita a padto ket  makatulong kadagiti talaga a mayat a mangammo no asino ti Mesias.

7. Ania a dua a padto ti mangpaneknek a ni Jesus ti Mesias?

⁷ Dagitoy ti dua kadagita a padto. Umuna, 700 a tawen sakbay a nayanak ni Jesus, impadto ni Mikias a mayanak ti Mesias iti bassit nga ili a Betlehem. (Mikias 5:2) Ket sadiay ti nakayanakan ni Jesus! (Mateo 2:1, 3-9) Maikadua, impadto ni Daniel nga agparang ti Mesias iti tawen 29 C.E. (Daniel 9:25) Dua laeng dagitoy iti adu a padto a nalawag a mangpaneknek a ni Jesus ti naikari a Mesias.​—Kitaen ti Endnote 13.

8, 9. Ania ti napasamak idi nabautisaran ni Jesus a mangpaneknek nga isu ti Mesias?

⁸ Nalawag nga impakita ni Jehova a ni Jesus ti Mesias. Inkari ti Dios nga ikkanna ni Juan a Mammautisar iti pagilasinan tapno maammuanna no asino ti Mesias. Idi nagpabautisar ni Jesus ken ni Juan iti Karayan Jordan iti tawen 29 C.E., nakita ni Juan dayta a pagilasinan. Ibaga ti Biblia no ania ti napasamak: “Idi nabautisaranen ni Jesus, dagus a simmang-at manipud iti danum; ket naglukat ti langit ken nakitana a bumabbaba kenkuana ti espiritu ti Dios a kasla kalapati. Adda met timek manipud langit a nagkuna: ‘Daytoy ti Anakko a dungdungnguek, a pakaragsakak.’” (Mateo 3:16, 17) Idi nakita ken nangngeg ni Juan dayta a pagilasinan, naammuanna a ni Jesus ti Mesias. (Juan 1:32-34) Iti dayta nga aldaw, inikkan ni Jehova ni Jesus iti  nasantuan nga espirituna ket nagbalin ni Jesus a Mesias. Isu ti pinili ti Dios nga agbalin a Lider ken Ari.​—Isaias 55:4.

⁹ Dagiti padto ti Biblia, ti sasao ni Jehova, ken ti pagilasinan nga intedna idi nabautisaran ni Jesus ti mangpaneknek a ni Jesus ti Mesias. Ngem naggapuanna, ken ania a klase a tao ni Jesus? Kitaentayo no ania ti ibagbaga ti Biblia.

10. Ania ti isursuro ti Biblia maipapan iti biag ni Jesus sakbay nga immay ditoy daga?

¹⁰ Isursuro ti Biblia a nabayagen nga adda ni Jesus idiay langit sakbay pay nga immay ditoy daga. Kinuna ni Mikias a ti Mesias ‘ket nagtaud idi un-unana.’ (Mikias 5:2) Namin-adu nga imbaga ni Jesus a nagbiag isuna idiay langit sakbay a nayanak kas tao. (Basaen ti Juan 3:13; 6:38, 62; 17:4, 5.) Sakbay pay nga immay ni Jesus ditoy daga, nadekketdan ken Jehova.

11. Apay nga ipatpateg unay ni Jehova ni Jesus?

¹¹ Ipatpateg unay ni Jehova ni Jesus. Apay? Ngamin, isu ti immuna a pinarsuana. Isu a naawagan ni Jesus iti “inauna iti amin a parsua.” * (Colosas 1:15) Maysa pay, nakapatpateg ni Jesus ken Jehova ta isu laeng ti direkta a pinarsuana. Dayta ti rason a naawagan iti ‘bugbugtong nga Anak.’ (Juan 3:16) Kasta met, ni Jesus laeng ti inusar ni Jehova a mangaramid iti amin a sabali pay a banag. (Colosas 1:16) Ken ni Jesus laeng ti naawagan iti “Sao” ta isu ti inusar ni Jehova a mangted iti mensahe ken instruksion kadagiti anghel ken tattao.​—Juan 1:14.

12. Apay a maibagatayo a ni Jesus ken ti Dios ket saan a maymaysa?

¹² Adda dagiti mamati a ni Jesus ken ti Dios ket maymaysa. Ngem saan a dayta ti isursuro ti Biblia. Kuna ti Biblia a naparsua ni Jesus, kayatna a sawen, adda nangrugianna. Ngem ni Jehova, a nangparsua iti amin a banag, ket awan nangrugianna. (Salmo 90:2) Kas Anak ti Dios, saan a pulos pinanunot ni Jesus ti agbalin a Dios.  Nalawag nga isursuro ti Biblia a nangatngato ti Ama ngem ti Anak. (Basaen ti Juan 14:28; 1 Corinto 11:3.) Ni laeng Jehova ti “Dios a Mannakabalin-amin.” (Genesis 17:1) Isu ti kangatuan ken kabilgan iti uniberso.​—Kitaen ti Endnote 14.

13. Apay nga ibagbaga ti Biblia a ni Jesus “ti ladawan ti di makita a Dios”?

¹³ Nagkadkadua a nagtrabaho ni Jehova ken ti Anakna a ni Jesus iti binilion a tawen sakbay a naparsua ti langit ken daga. Ay-ayatenda la ketdi ti maysa ken maysa! (Juan 3:35; 14:31) Natulad a naimbag ni Jesus dagiti kualidad ni amana isu nga inawagan ti Biblia a “ti ladawan ti di makita a Dios.”​—Colosas 1:15.

14. Kasano a naipasngay kas tao ti ipatpateg nga Anak ni Jehova?

¹⁴ Situtulok ti ipatpateg nga Anak ni Jehova a pumanaw idiay langit ken mayanak ditoy daga kas tao. Kasano a nagbalin a posible dayta? Babaen ti milagro, inyakar ni Jehova ti biag ti Anakna manipud langit iti aanakan ti maysa a birhen nga agnagan iti Maria. Iti kasta a pamay-an, saanen a kinasapulan ni Jesus ti tao nga ama. Isu a nangipasngay ni Maria iti perpekto nga anak ket pinanagananna iti Jesus.​—Lucas 1:30-35.

15. Kasanom a maam-ammo a naimbag ni Jehova?

¹⁵ Adu ti maadalmo maipapan ken Jesus, iti biagna, ken kadagiti kualidadna no basaem dagiti libro ti Biblia a Mateo, Marcos, Lucas, ken Juan. Maawagan dagitoy a libro iti Dagiti Ebanghelio. Gapu ta adu ti pagpadaan ni Jesus ken ti Amana, makatulong dagiti mabasam tapno maam-ammom a naimbag ni Jehova. Dayta ti makagapu a naibaga ni Jesus: “Ti nakakita kaniak nakitana metten ti Ama.”​—Juan 14:9.

16. Ania ti insuro ni Jesus? Naggapuan dagiti pannursuro ni Jesus?

 ¹⁶ Adu ti nangawag ken Jesus iti “Mannursuro.” (Juan 1:38; 13:13) Maysa kadagiti kapatgan nga insurona ket “ti naimbag a damag maipapan iti Pagarian.” Ania daytoy a Pagarian? Daytoy ti gobierno ti Dios idiay langit a mangiturayto iti intero a daga ken mangipaay iti bendision kadagiti tattao a natulnog iti Dios. (Mateo 4:23) Naggapu ken Jehova ti amin nga insuro ni Jesus. Kinuna ni Jesus: “Ti isursurok ket saan a naggapu kaniak, no di ket naggapu iti daydiay nangibaon kaniak.” (Juan 7:16) Ammo ni Jesus a kayat ni Jehova a mangngeg dagiti tattao ti naimbag a damag nga iturayanton ti Pagarian ti Dios ti intero a daga.

17. Sadino ti nangisursuruan ni Jesus? Apay a nagaget a nangisursuro?

¹⁷ Sadino ti nangisursuruan ni Jesus? Iti sadinoman a pakasarakanna iti tattao. Nangisuro kadagiti away kasta met kadagiti siudad, barrio, tiendaan, lugar a pagdaydayawan, ken balbalay. Saanna nga inuray a dagiti tattao ti umasideg kenkuana. Masansan nga isu ti napan kadakuada. (Marcos 6:56; Lucas 19:5, 6) Nagaget ni Jesus ken adu a tiempo ken pigsa ti inusarna a nangisuro kadagiti tattao. Apay? Ngamin, ammona a kayat ti Dios nga aramidenna dayta ken kanayon a nagtulnog iti Amana. (Juan 8:28, 29) Nangasaba met ni Jesus ta naasian kadagiti tattao. (Basaen ti Mateo 9:35, 36.) Nakitana a saan nga isursuro dagiti lider ti relihion ti kinapudno maipapan iti Dios ken iti Pagarianna. Isu a kayatna a tulongan ti amin ken kayatna a mangngegda ti naimbag a damag.

18. Ania dagiti kualidad ni Jesus a kaykayatmo?

¹⁸ Ay-ayaten ni Jesus dagiti tattao ken interesado iti  pagimbaganda. Nasingpet ken nalaka a maas-asitgan. Uray dagiti ubbing, kaykayatda ti makikadua kenkuana. (Marcos 10:13-16) Kanayon a patas ni Jesus. Kagurana ti korapsion ken kinaawan hustisia. (Mateo 21:12, 13) Nagbiag ni Jesus iti tiempo a saan a maresrespeto ken saan unay a nasayaat ti pannakatrato dagiti babbai. Ngem kanayon a rinespeto ken trinatona ida nga addaan iti dignidad. (Juan 4:9, 27) Nakapakpakumbaba met ni Jesus. Kas pagarigan, iti maysa a rabii, binugguanna ti saka dagiti apostolna, a gagangay nga ar-aramiden idi ti maysa nga adipen.​—Juan 13:2-5, 12-17.

19. Ania a pasamak ti mangipakita nga ammo ni Jesus ti talaga a kasapulan dagiti tattao ken kayatna a tulongan ida?

¹⁹ Ammo ni Jesus no ania ti talaga a kasapulan dagiti tattao ken kayatna ida a tulongan. Nalawag daytoy idi inusarna ti pannakabalin ti Dios a mangpaimbag kadagiti tattao babaen ti milagro. (Mateo 14:14) Kas pagarigan, maysa nga agkukutel a lalaki ti immasideg ken Jesus ket imbagana: “Apo, no kayatmo laeng koma, mapaimbagnak.” Narikna ni Jesus ti saem ken rigat a marikrikna daytoy a lalaki. Naasian kenkuana ken kayatna a tulongan. Isu nga inyunnat ni Jesus ti imana, sinagidna ti lalaki, sa imbagana: “Kayatko! Umimbagka.” Ket immimbag ti lalaki! (Marcos 1:40-42) Mailadawanmo kadi ti narikna dayta a lalaki?

20, 21. Apay a ni Jesus ti kasayaatan a pagtuladan iti kinatulnog iti Dios?

²⁰ Ni Jesus ti kasayaatan a pagtuladan iti kinatulnog iti Dios. Aniaman ti napasamak ken aniaman ti inaramid dagiti kabusorna kenkuana, nagmatalek latta iti Amana. Kas pagarigan, saan a timmulok ni Jesus idi  pinadas a sulisogen ni Satanas. (Mateo 4:1-11) Adda pay ketdi dagiti kapamiliana a saan a namati nga isu ti Mesias ken imbagada a “nadadaelen ti panunotna,” ngem intultuloyna latta nga inaramid ti pagayatan ti Dios. (Marcos 3:21) Idi rinanggasan dagiti kabusorna, nagtalinaed a matalek iti Dios ken saanna a pulos dinangran ida.​—1 Pedro 2:21-23.

²¹ Nagtalinaed a matalek ni Jesus uray idi nagpasar iti naranggas ken nasaem a pannakapapatay. (Basaen ti Filipos 2:8.) Panunotem laengen dagiti inibturanna iti aldaw ti ipapatayna. Naaresto, inakusaran dagiti ulbod a saksi nga isu ket agsasao maibusor iti Dios, sinentensiaan dagiti saan a patas nga ukom, kinatkatawaan dagiti naranggas a tattao, ken pinarparigat ken inlansa  dagiti soldado iti kayo a pagtutuokan. Idi dandanin matay, impukkawna: “Natungpalen!” (Juan 19:30) Tallo nga aldaw kalpasan a natay ni Jesus, pinagungar ni Jehova kas espiritu. (1 Pedro 3:18) Sumagmamano a lawas kalpasanna, nagsubli ni Jesus idiay langit, “nagtugaw iti makannawan ti Dios,” ken inurayna a pagbalinen ti Dios kas Ari.​—Hebreo 10:12, 13.

22. Ania a gundaway ti naited kadatayo gapu ta nagmatalek ni Jesus iti Amana?

²² Gapu ta nagtalinaed a matalek ni Jesus iti Amana, adda gundawaytayon nga agbiag nga agnanayon iti paraiso a daga a kas iti pinanggep ni Jehova. Iti sumaruno a kapitulo, pagsasaritaantayo no kasano a posible nga agbiagtayo nga agnanayon gapu iti ipapatay ni Jesus.