1, 2. (a) Sô pamodi bu sabe nómi di un algen famozu krê fla ma bu konxe-l? Splika. (b) Kuzê ki pesoas ta fla sobri Jizus?

TEN txeu algen famozu na mundu. Talvês bu sabe nómi di algun algen famozu. Má sô pamodi bu sabe se nómi ka krê fla ma bu konxe-l dretu. Ka krê fla ma bu sabe tudu kuza di se vida i ken ki el é di verdadi.

² Dja ten uns 2 mil anu ki Jizus Kristu vive na Téra, má simé, talvês dja bu obi ta faladu na el. Má maioria di pesoas ka sabe ki tipu di algen Jizus éra. Alguns ta fla ma el éra sô un algen dretu, otus ta fla ma el éra un proféta i otus ta kridita ma el é Deus. I bo? Kuzê ki bu ta atxa? — Djobe párti PRENDE MÁS n^u 12.

3. Pamodi ki é inportanti bu konxe Jeová i Jizus Kristu?

³ É inportanti bu sabe kal ki é verdadi sobri Jizus. Pamodi? Bíblia ta fla-nu: ‘Vida itérnu é kel-li: pa es konxe-u abo, úniku Deus verdaderu, i kel ki bu manda, Jizus Kristu.’ (João 17:3) Sin, si bu sabe verdadi sobri Jeová i Jizus, bu ta pode vive na paraízu na Téra pa tudu ténpu. (João 14:6 ) Tanbê, konxe Jizus ta djuda-u pamodi el é midjór izénplu pa nu imita na manera di vive i di trata otus algen. (João 13:34, 35 ) Na kapítlu 1, nu prende verdadi sobri  Deus. Gósi nu ta ben prende kuzê ki Bíblia ta inxina sobri Jizus.

4. Kuzê ki palavras “Misías” i “Kristu” krê fla?

⁴ Txeu anu antis di Jizus nase, Jeová dja prometeba na Bíblia, ma el ta mandaba kel ki ta binha ser Misías, ô Kristu. Palavra “Misías” ta ben di língua ebraiku i palavra “Kristu” ta ben di língua gregu. Es dôs palavra krê fla ma Deus skodje kel Misías ki el promete i el da-l un trabadju spesial. Kel Misías ta ben kunpriba tudu promésas di Deus. Tanbê bu ta ben prende modi ki bu pode tra pruvetu gósi di kel ki Jizus faze kantu el staba na Téra. Má antis di Jizus naseba, txeu algen ta perguntaba: ‘Ken ki ta ben ser kel Misías?’

5. Disiplus di Jizus ta kriditaba ma el éra Misías?

⁵ Disiplus di Jizus ka tinha ninhun dúvida ma el éra Misías. (João 1:41 ) Pur izénplu, Simon Pedru fla Jizus: ‘Abo é Kristu’. (Mateus 16:16 ) Modi ki nu pode ten sertéza ma é Jizus ki é Misías?

6. Modi ki Jeová djuda pesoas ki tinha un bon korason odja ken ki éra Misías?

⁶ Txeu ténpu antis di Jizus nase, profétas di Deus skrebe txeu kuza ki ta djudaba pesoas sabe ken ki éra Misías. Modi ki kel-li ta djudaba es? Imajina ma bu mandadu ba buska un algen ki bu ka konxe, na un aeroportu ô kais ku txeu movimentu. Si bu fladu dretu modi ki kel algen é, óras ki bu ba buska-l bu ta konxe-l lógu ki bu odja-l. Di mésmu manera, Jeová uza se profétas pa fla-nu kuzê ki Misías ta  fazeba i kuzê ki ta kontiseba ku el. Sima kes profesia ba ta kunpri, pesoas ki tinha un bon korason konsigi odja ma Jizus éra Misías.

7. Kal ki é dôs profesia ki ta prova ma Jizus é Misías?

⁷ Nu ben odja dôs di kes profesia. Primeru, 700 anu antis di Jizus nase, proféta Miqueias dja skrebeba ma Misías ta naseba na un sidadi pikinoti ki txomaba Belen. (Miqueias 5:2 ) I é la ki Jizus nase! (Mateus 2:1, 3-9 ) Sugundu, Daniel dja skrebeba ma Misías ta parseba na anu 29. (Daniel 9:25 ) Kes-li é sô dôs di kes monti profesia ki ta prova klaru ma Jizus é kel Misías ki Jeová prometeba. — Djobe párti PRENDE MÁS n^u 13.

8, 9. Kuzê ki kontise na batismu di Jizus ki ta prova ma el é Misías?

⁸ Jeová mostra klaru ma Jizus é Misías. Deus promete da Juan Batista un sinal pa el pode odjaba ken ki éra Misías. Kantu Jizus bai atxa Juan pa batiza-l na riu Jurdon na anu 29, Juan odja kel sinal. Bíblia ta fla-nu kuzê ki kontise: ‘Dipôs ki el batizadu, Jizus sai lógu di agu, i na kel mésmu óra Séu abri, i el odja spritu di Deus ta dixi pa riba di el sima un ponba. Tanbê, un vós ki ben di Séu fla: ‘Kel-li é nha fidju ki N ta ama, ki ta da-m txeu alegria.’’ (Mateus 3:16, 17 ) Kantu Juan odja i obi kel sinal li, el ntende lógu ma Jizus éra Misías. (João 1:32-34 ) Na kel dia, kantu Jeová da Jizus se spritu santu, el bira  Misías. El éra kel ki Deus skodje pa ser Líder i Rei. — Isaías 55:4.

⁹ Profesias di Bíblia, kuzê ki Jeová fla i sinal ki El da kantu Jizus batiza prova ma Jizus é Misías. Má di undi ki Jizus ben i modi ki el éra? Nu ben odja kuzê ki Bíblia ta fla.

10. Kuzê ki Bíblia ta inxina sobri vida di Jizus antis di el ben pa Téra?

¹⁰ Bíblia ta inxina ma Jizus dja ta viveba na Séu txeu ténpu antis di el ben pa Téra. Proféta Miqueias fla ma Misías ta izistiba ‘désdi ténpu antigu’. (Miqueias 5:2 ) Jizus tanbê fla txeu bês ma el ta viveba na Séu antis di el nase na Téra. (Lé João 3:13; 6:38, 62; 17:4, 5.) Mésmu antis di el ben pa Téra, Jizus tinha un amizadi spesial ku Jeová.

11. Pamodi ki Jeová ta ama Jizus rei di txeu?

¹¹ Jeová ta ama Jizus rei di txeu. Pamodi? Pamodi Deus kria-l antis di el kria tudu kes otu kuza i pesoas. Nton, Jizus ta txomadu di ‘primeru di tudu kriason’. * (Colossenses 1:15 ) Jeová tanbê ta ama Jizus txeu pamodi é sô el ki Jeová kria ku se mô. É pur isu ki el ta txomadu di ‘Fidju unijénitu’. (João 3:16 ) É sô Jizus ki Jeová uza pa kria tudu kes otu kuza. (Colossenses 1:16 ) I é sô Jizus ki ta txomadu di ‘Palavra’ pamodi Jeová uza-l pa leba mensajis i instrusons pa anjus i umanus. — João 1:14.

12. Modi ki nu sabe ma Jizus ku Deus é ka mésmu algen?

¹² Alguns algen ta kridita ma Jizus ku Deus é mésmu pesoa. Má é ka kel-la ki Bíblia ta inxina. Bíblia ta fla ma Jizus kriadu i kel-la krê fla ma Jizus tevi un komésu. Má Jeová, ki kria tudu kuza, el é ka tevi komésu. (Salmo 90:2 ) Jizus é Fidju di Deus pur isu nunka el ka pensa na tenta ser Deus. Bíblia ta  mostra klaru ma Pai é más grandi ki Fidju. (Lé João 14:28; 1 Coríntios 11:3.) Sô Jeová ki é ‘Deus Tudu-Poderozu.’ (Génesis 17:1 ) El é algen más grandi i más poderozu na Séu ku na Téra. — Djobe párti PRENDE MÁS n^u 14.

13. Pamodi ki Bíblia ta txoma Jizus di ‘imaji di kel Deus ki nu ka ta pode odja’?

¹³ Jeová ku se Fidju, Jizus, pasa bilhons di anu ta trabadja djuntu, antis di es faze Séu ku Téra. Duránti tudu es ténpu, imajina modi ki es fika ta ama kunpanheru txeu! (João 3:35; 14:31 ) Jizus imita manera di ser di se pai dretu ti ki Bíblia ta txoma-l di ‘imaji di kel Deus ki nu ka ta pode odja’. — Colossenses 1:15.

14. Modi ki Fidju di Jeová, ki el ta ama txeu, nase kómu umanu?

¹⁴ Kel Fidju ki Jeová ta ama txeu staba prontu pa dexa Séu i ben nase na Téra kómu umanu. Modi ki kel-la ta kontiseba? Jeová faze un milagri. El poi vida di se Fidju ki staba na Séu, na bariga di un vírjen, ki txomaba Maria. Asi, Jizus ka tevi un pai umanu. Nton, Maria tevi un fidju perfetu i el pô-l nómi Jizus. — Lucas 1:30-35.

15. Modi ki bu pode konxe Jeová midjór?

¹⁵ Bu pode prende txeu sobri Jizus, se vida i se manera di ser si bu lé livrus di Mateus, Marcos, Lucas i João ki sta na Bíblia. Kes livru li ta txomadu di Ivanjélhu. Kel ki bu prende sobri Jizus ta djuda-u konxe Jeová midjór, pamodi Jizus é sima se Pai.  É pur isu ki Jizus fla: ‘Kenha ki odja-m, dja odja nha Pai tanbê.’ — João 14:9.

16. Kuzê ki Jizus inxina? Kes kuza ki Jizus inxina ben di kenha?

¹⁶ Txeu algen ta txomaba Jizus di ‘Instrutor’ ô profesor. (João 1:38; 13:13 ) Un di kes kuza más inportanti ki el inxina foi ‘notísias sábi di Reinu’. Kuzê ki é kel Reinu li? El é un govérnu di Deus ki la di Séu ta ben governa Téra interu i ta ben bênsua tudu kenha ki obi ku Deus. (Mateus 4:23 ) Tudu kel ki Jizus inxina ben di Jeová. Jizus fla: ‘Kel ki N ta inxina é ka di meu, má é di kel ki manda-m.’ (João 7:16 ) Jizus sabeba ma Jeová krê pa tudu algen obi notísias sábi di Reinu di Deus ki sta ta ben governa Téra interu.

17. Na undi ki Jizus ta inxinaba? Pamodi ki el ta trabadjaba duru pa inxinaba pesoas?

¹⁷ Na undi ki Jizus ta inxinaba? Na kalker lugar ki el ta atxaba algen. El ta inxinaba na aldeias, na sidadis, na vilas, na merkadus, na lugaris undi pesoas ta ba adoraba Deus i na kazas di pesoas. El ka ta speraba pa pesoas binha na el, el ki ta ba atxaba es. (Marcos 6:56; Lucas 19:5, 6) Jizus ta trabadjaba duru i el ta gastaba txeu ténpu i forsa na inxina pesoas. Pamodi ki el ta fazeba kel-la? Pamodi el sabeba ma é kel-la ki Deus kreba pa el faze i pamodi sénpri el ta obiba ku se Pai. (João 8:28, 29 ) Jizus tanbê ta pregaba pamodi el ta xintiba péna di pesoas. (Lé Mateus 9:35, 36.) El ta odjaba ma xéfis di relijion ka staba ta inxina pesoas verdadi sobri Deus i se Reinu. Nton, el ta fazeba tudu kel ki el pode pa djudaba pesoas obi kes notísia sábi.

18. Kuzê ki más bu gosta na manera di ser di Jizus?

 ¹⁸ Jizus éra un ómi ki ta amaba pesoas i el ta preokupaba ku es. El ta trataba es dretu i tudu algen ta xintiba avontádi na pâpia ku el. Ti kriansas ta gostaba di sta djuntu ku el. (Marcos 10:13-16 ) Jizus éra sénpri justu. El ta odiaba korupson i injustisa. (Mateus 21:12, 13) Na kel ténpu mudjeris ka tinha txeu direitu i es ka ta tratada ku ruspetu. Má Jizus sénpri ta trataba mudjeris ku ruspetu i el ta daba es valor. (João 4:9, 27 ) Jizus éra umildi di korason. Pur izénplu, un bês el laba pé di se apóstlus, ki éra un trabadju pa un npregadu fazeba. — João 13:2-5, 12-17.

19. Ki izénplu ta mostra ma Jizus sabeba kuzê ki pesoas mesteba di verdadi i ma el krê djudaba es?

¹⁹ Jizus sabeba kuzê ki pesoas mesteba di verdadi i el kria djudaba es. Kel-la fika klaru kantu el uza puder ki Deus da-l pa kura pesoas. (Mateus 14:14) Pur izénplu, un ómi ki tinha lépra txiga na Jizus i el fla-l: ‘Si nhu krê nhu ta faze-m bira linpu.’ Dór i sufrimentu di kel ómi toka korason di Jizus. El xinti péna i vontadi di djuda-l. Nton Jizus stika mô, el toka na kel ómi i el fla-l: ‘N krê! Bira linpu.’ I kel ómi ki staba duenti fika kuradu. (Marcos 1:40-42 ) Bu ta imajina modi ki kel ómi xinti?

20, 21. Pamodi ki Jizus é midjór izénplu di algen ki obi ku Deus?

²⁰ Jizus é midjór izénplu di algen ki ta obi ku Deus. Ka ta nportaba kuzê ki kontiseba ô kuzê ki se inimigus fazeba ku el, Jizus foi fiel pa se Pai. Pur izénplu, Jizus ka kai na kes tentason di Satanás i el  ka peka. (Mateus 4:1-11 ) Alguns família di Jizus ka ta kriditaba ma el éra Misías i es fla ma el ‘staba dodu.’ Má simé Jizus kontínua ta faze trabadju ki Deus da-l. (Marcos 3:21 ) Kantu se inimigus maltrata-l, Jizus mante fiel pa Deus i nunka el ka tenta diskonta. — 1 Pedro 2:21-23.

²¹ Mésmu kantu Jizus staba ta sufri un mórti kruel i xeiu di dór, el mante fiel pa Jeová. (Lé Filipenses 2:8.) Imajina kuzê ki el tevi di aguenta na dia ki el móre. El podu prézu, pesoas akuza-l di mostra falta di ruspetu pa Deus, kes juís koruptu kondena-l, pesoas goza ku el, soldadus tortura-l i es prega-l na un pósti di madera. Kantu el staba ta  móre el fla: ‘Dja sta!’ (João 19:30 ) Três dia dipôs ki Jizus móre, Jeová resusita-l ku un korpu spritual. (1 Pedro 3:18 ) Dipôs di alguns simana, Jizus bai pa Séu otu bês, el ‘xinta na ladu direita di Deus’ ta spéra pa Deus da-l puder pa ser Rei. — Hebreus 10:12, 13.

22. Ki oportunidadi nu ten gósi pamodi Jizus foi fiel ku se Pai?

²² Gósi nu ten oportunidadi di vive pa tudu ténpu na un paraízu na Téra, sima Jeová kreba désdi komésu, pamodi Jizus mante fiel ku se Pai. Na kapítlu 5 nu ta ben odja modi ki mórti di Jizus ta pô-nu vive pa tudu ténpu.