1, 2. а) Ноға кемнің-де адын на пілгені аны чахсы таныпчатханын таныхтабинча? Чарыда чоохтап пиріңер. б) Иисус Христосты кемге санапчалар?

ЧИР-ЧАЛБАХТА саблығ кізі кӧп. Піреелерінің аттарын пілче поларзар. Сынында олардаңар паза оларның чуртастарынаңар пір дее ниме пілбинчетсер, оларны чахсы таныпчазар тирге чарир ба?

² Иисус Христос 2 000-ҷа чыл мының алнында чуртаан полза даа, аннаңар пірее ниме искезер, арса? Сынында ол хайдағ кізі полғанын кӧбізі пілбинче. Кем-де аны олаңай ла чахсы кізі полған тіпче, кем-де аны ухаанҷы полған тіпче, піреезі, тізең, аны Худайға санапча. Сірер чи Иисустаңар ниме сағынчазар? (12 приложениені кӧріңер.)

3. Худайдаңар паза Иисус Христостаңар піліс аларға ноға кирек?

³ Иисус Христос кем полчатханын ноға пілерге кирек? Библияда чоохталча: «Мӧгі чуртас Сині — чалғыс сын Худайны — паза Син ысхан Иисус Мессий-Христос полчатханын пілчеткені полча» (Иоанн 17:3). Иеговадаңар паза Иисустаңар сын пілістер алзар, чирде, райда мӧгі чуртап поларзар (Иоанн 14:6). Ағаа хоза, Иисустаңар пілістерні аларға ноға кирек? Хайди чуртирында паза хайди кізілерге хайарында Иисус иң чахсы кӧзідім нооза (Иоанн 13:34, 35). 1-ғы пастағдаң Худайдаңар сынны піліп алғабыс. Пу пастағда, тізең, Иисус Христостаңар Библияда ниме пазылчатханын піліп аларбыс.

4. «Мессий» паза «Христос» тіп сӧстер ниме таныхтапчалар?

⁴ Библияда Иегованың Мессийні алай Христосты чирзер ызарға молҷаанынаңар пазылча. «Мессий» — еврей тілінең, «Христос», тізең, грек тілінең алылған сӧстер. Пу сӧстер Худайның кӧңнін толдырарға турғызылған кізіні таныхтапчалар. Мессий Худайның прай молҷағларын толдыр салар. Ағаа хоза, Иисус сірерге пӱӱнӧк полыс полар. Че Иисус тӧрир алнында, кӧп кізі кем Мессий поларын піліп аларға хынған.

5. Иисустың ӱгренҷілері ол Мессий полчатханында ікінҷілееннер бе?

⁵ Иисустың ӱгренҷілері ол Мессий полчатханында ікінҷілебееннер (Иоанн 1:41). Кӧзідімге, Симон Пётр кӧні чоохтаан: «Син — Мессий-Христоссың» (Матфей 16:16). Иисус Мессий полчатханында піске ноға ікінҷілебеске чарир?

6. Иегова азых чӱректіг кізілерге «Мессий» кем полчатханын піліп аларға хайди полыс пирген?

⁶ Худайның ухаанҷылары, Иисус тӧрир алнындох, кем Мессий поларын піліп аларға полысчатхан кӧп ухаанҷыластар пас салғаннар. Пір кӧзідім кӧр кӧреелер. Сірерні вокзалда таныс нимес кізіні удурлирға сурынғаннар. Аны таап аларға ниме полыс пирер? Ол кізінің тастындағы кӧрімін чахсы иде чоохтап пирзелер, аны таап аларға оой полар. Ідӧк Иегова Мессий ниме идерін паза аннаң ниме поларын ухаанҷыларның пастыра чахсы иде чоохтап пирген. Прай ол ухаанҷыластарның толғаны Иисус Мессий полчатханын азых чӱректіг кізілерге піліп аларға полысча.

7. Иисус Мессий полчатханын хайдағ ікі ухаанҷылас кӧзітче?

⁷ Ікі ухаанҷылас кӧр кӧреелер. Пастағы ухаанҷылас: Михей, Иисус тӧрирінең 700 чыл алнында, Мессий  Вифлеем тіп кічиҷек саарда тӧрир тіп ухаанҷылаан (Михей 5:2). Иисус хайда тӧреен? Сах ол саарда! (Матфей 2:1, 3—9). Ікінҷі ухаанҷылас: Даниил п. э. 29 чылда Мессий килер тіп ухаанҷылаан (Даниил 9:25). Піс ікі ле ухаанҷылас кӧрібістібіс. Иисус молҷалған Мессий полчатханын уғаа кӧп ухаанҷыластар кӧзітчелер. (13 приложениені кӧріңер.)

8, 9. Иисус кіреске тӱскен туста полған кирек хайди ол Мессий полчатханын киречілепче?

⁸ Иисус Мессий полчатханын Иегова позы киречілеен. Худай Кіреске тӱзірҷең Иоаннға кем Мессий поларын кӧзітчеткен танығ пирілер тіп молҷаан. П. э. 29 чылда Иисус Иордан суғзар кіреске тӱзерге килгенде, Иоанн ол танығны кӧр салған. Библияда аннаңар піди пазылча: «Иисус, кіреске тӱзіп, суғдаң сыххандох, тигір Ағаа азыл парған, олох туста Иоанн Худай Худы Иисуссар тахырах хус чіли тӱзіп, Ағаа одырыбысханын кӧр салған. Ол туста тигірдең ӱн истілген: — Пу Минің хынған Оолғым, Ол Минің кӧңніме тың кірче» (Матфей 3:16, 17). Іди Иоанн Иисус Мессий полчатханын піліп алған (Иоанн 1:32—34). Иисусха Иегованың худы тӱскен кӱнде ол Мессий пол парған. Аны Иегова Устағҷаа паза Ханға турғыс салған (Исаия 55:4).

 ⁹ Библиядағы ухаанҷыластар, Иегованың сӧстері паза Иисус кіреске тӱскен туста тигірдең пирілген танығ Иисус молҷалған Мессий полчатханын киречілепчелер. Амды Иисус Христос хайдаң килгенін паза хайдағ кізі полғанын піліп алаалар.

10. Иисус Христостың чирзер килер алнындағы чуртазынаңар Библияда ниме чоохталча?

¹⁰ Библияда Иисус Христос чирзер килер алнында тигірде ӱр тус чуртаан тіп чоохталча. Михей ухаанҷы Мессий «хас-хаҷаннаң» полған теен (Михей 5:2). Иисус позы даа, чирде тӧрир алнында, тигірде чуртаам тіп нинҷе-де хати чоохтаан. (Иоанн 3:13; 6:38, 62; 17:4, 5 хығырыбызыңар.) Чирзер килер алнындох, Иисустаң Иегованың аразында уғаа пик палғалыс полған.

11. Ноға Иегова Иисусты тың аарлапча?

¹¹ Иегова Иисусты уғаа аарлыға санапча. Ноға? Иегова аны прай нимені чайир алнында чайап салған. Аннаңар «Ол ноо даа чайаахтаң пурун тӧреен тун Оолғы» тіп адалча (Колосстағыларға 1:15) *. Ағаа хоза, Иегова Иисусты ла чалғысхан чайап салған, аннаңар ол ағаа хынча. Библияда Иисус Худайның «чалғыс Оолғы» тіп адалча (Иоанн 3:16). Иегова прай пасха нимелерні чайапчатханда, Иисусты ла позына полыстырған (Колосстағыларға 1:16). Ідӧк Библия Иисусты ла «Сӧс» тіп адапча. Анзы Иегова Иисустың пастыра ангеллерге паза кізілерге хабарлар, чахығлар читіргенін таныхтапча (Иоанн 1:14).

12. Иисус Христос Худай нимес. Піс аны хайдаң пілчебіс?

¹² Пірее кізілер Иисус Христос Худай тіп киртінчелер. Че аннаңар Библия ниме чоохтапча? Иисус чайалған, аннаңар аның чуртазы хаҷан-да пасталған.  Иегова, тізең, хаҷан даа полған, ол позы прай нимені чайап салған (Псалом 90:2). Иисус, Худайның оолғы полчатханын пілген, аннаңар Худай поларға пір дее сағынмаан. Библия кӧні чоохтапча: Пабазы Оолғынаң илбек. (Иоанн 14:28 хығырыбызыңар; 1 Коринфтегілерге 11:3.) Библия Иегованы ла «Прай нимедең кӱстіг Худай» тіп адапча (Бытие 17:1). Иегованаң пірдеезі тиңнес полбас. Прай тилекейде аннаң пӧзік личность чоғыл. (14 приложениені кӧріңер.)

13. Ноға Библияда Иисустаңар «кӧрінмес Худайның омазы полча» тіп пазылча?

¹³ Иегова паза аның Оолғы чирнең тигірні пӱдірер алнында нинҷе-нинҷе миллиард чыллар хада тоғынғаннар. Ікінҷілес чоғыл, анҷа тусха оларның аразында хыныс уғаа пик пол парған! (Иоанн 3:35; 14:31). Иисус Пабазына прай хыринаң тӧӧй, аннаңар Библияда «ол кӧрінмес Худайның омазы полча» тіп пазылча (Колосстағыларға 1:15).

14. Хайди Худайның оолғы, кізі полып, тӧреен?

¹⁴ Иегованың хынчатхан оолғы позының кӧңнінең тигірдегі чуртазын артыс салып, чирзер килген. Чирзер килер ӱчӱн, ағаа, кізі полып, тӧрирге кирек полған. Че хайди ол кізі полып тӧреен? Иегова хайхас идіп, позының оолғының чуртазын Мария тіп хыстың істіне сал салған. Аннаңар Иисустың пабазы кізі полбаан. Іди Мария чазых чох пала тапхан. Ол аны Иисус тіп адап салған (Лука 1:30—35).

15. Иеговадаңар хайди кӧп арах піліп аларға?

¹⁵ Иисустаңар, аның чуртазынаңар паза аның хылиинаңар, Матфей, Марк, Лука паза Иоанн пасхан  кинделерні хығырып, піліп аларзар. Ол кинделер Чахсы Хабарлар тіп адалчалар. Ідӧк ол кинделердең Иеговадаңар кӧп арах піліп аларзар, Иисус Пабазына уғаа тӧӧй нооза. Пірсінде Иисус теен: «Мині кӧрген кізі, Пабамны даа кӧрген полча» (Иоанн 14:9).

16. Иисус нимее ӱгреткен? Ол ӱгредіглер кемни полғаннар?

¹⁶ Кӧп кізі Иисус Христосты «Ӱгретчім» тіп адаҷаң (Иоанн 1:38; 13:13). Нимее ол ӱгреткен? «Тигір хан-чирінеңер Чахсы Хабар» аның ӱгредіглерінің иң аарлығ ӱгредии полған. «Тигір хан-чирі» нимедір ол? Ол Худайның ӱлгӱзі. Ол ӱлгӱ тигірдең прай чирнең устир паза Худайның чооғын исчеткеннерге алғастар ағылар (Матфей 4:23). Иисустың прай ӱгредіглері Иеговани полғаннар. Иисус позы теен: «Пу ӱгредіг — Мини нимес, Мині ысхан Худайни» (Иоанн 7:16). Иегова аның Хан-ӱлгӱзінеңер чахсы хабарны кізілерге искірерге хынчатханын Иисус пілген.

17. Иисус хайда ӱгреткен? Ноға ол кізілерні ӱгредерге тузына паза кӱзіне айабаан?

¹⁷ Иисус хайда ӱгреткен? Хайда кізі пар, анда ӱгреткен: саарларда паза аалларда, синагогаларда паза храмда, садығ орыннарында паза кізілернің иблерінде. Кізілер андар килерлерін сахтап одырбаҷаң, ол позы оларзар парҷаң (Марк 6:56; Лука 19:5, 6). Кізілерні ӱгредерге Иисус тузына паза кӱзіне айабаан. Ноға? Худай Иисусты кізілерні ӱгретсін тіп хынған, Иисус, тізең, аның чооғын хаҷан даа исчең (Иоанн 8:28, 29). Ағаа хоза, Иисус кізілерге айаҷаң, аннаңар оларға Худай сӧзін искірҷең. (Матфей 9:35, 36 хығырыбызыңар.) Худайдаңар паза аның Хан-ӱлгӱзінеңер чахсы хабарны искіріп, Иисус оларға полызарға хынған. Религиознай ӱгретчілер анзын итпинчеткеннерін ол пілген нооза.

18. Иисус Христостың хайдағ хылии кӧңніңерге иң тың кірче?

 ¹⁸ Иисус Христос кізілерге хынҷаң паза оларға сағыссыраҷаң. Ол паарсах паза ачых-чарых кізі полған. Палалар даа андар тартылҷаңнар (Марк 10:13—16). Иисус прайзына пір тиң хайҷаң, садынҷах паза хайдағ даа сыны чох тудынысты хырт кӧрҷең (Матфей 21:12, 13). Иисус чуртаан туста ипчілерні нимее салбаҷаңнар, оларның праволары асхынах полған. Иисус, тізең, ипчілерні улуғлаҷаң (Иоанн 4:9, 27). Ідӧк Иисус уғаа пазымнығ кізі полған. Пірсінде ол илҷілернің азахтарын чуубысхан. Ол тоғыс, тізең, сӱмекчілернің тоғызы полған (Иоанн 13:2—5, 12—17).

19. Кізілернің кирексіністерін Иисус чахсы пілгенін паза оларға полызарға хынғанын хайдағ кӧзідім кӧзітче?

¹⁹ Кізілернің кирексіністерін Иисус чахсы пілген, аннаңар оларға полыс пирерге тың хынған. Аның Худай кӱзінең иткен хайхастары анзын кӧзіткеннер (Матфей 14:14). Кӧзідімге, пірсінде Иисуссар чызығ палығлығ кізі пастыр киліп теен: «Хынзаң, мині арығлап поларзың». Ол кізінің ирееленчеткенін кӧрерге Иисусха аар полған, аннаңар, ағаа айап парып, полыс пирерге идібіскен. Иисус, холын сунып, ағаа теертібізіп, теен: «Хынчам, арығ пол пар». Чызығ палығлығ кізі сах андох хазых пол парған! (Марк 1:40—42). Сағын на кӧріңер, хайди ол кізі ӧрінген полар!

20, 21. Ноға Иисус Худайның сӧзін истерінде иң чахсы кӧзідім артысхан тирге чарир?

²⁰ Худайның чооғын истерінде Иисус иң чахсы кӧзідім полған. Хайдағ даа сидіктерде, ыырҷыларға иреелеттірзе дее, ол Пабазына киртістіг халҷаң. Кӧзідімге, Сайтан аны хыҷаландырғанда, Иисус пір дее чазых  итпеен (Матфей 4:1—11). Аның чағыннары, туғаннары ол Мессий полчатханына киртінмезелер дее паза аны алҷаах парған тіп сағынзалар даа, Худайның чахиин толдырарын тохтатпаан (Марк 3:21). Ыырҷылар аны иреелеен ӱчӱн, Иисус, олардаң ӧс албин, Худайға киртістіг халған (1 Петрның 2:21—23).

²¹ Иисус, хазыр паза иреелестіг ӧлімнең ӧлзе дее, Иеговаа киртістіг халған. (Филипптегілерге 2:8 хығырыбызыңар.) Иисус чирдегі халғанҷы кӱнінде ниме кӧргенінеңер сағын кӧріңер: аны тудып алғаннар, Худайны сӧклепче тіп пыролааннар, садынҷах чарғыҷылар ӧлімге чарғылааннар, чон ағаа кӱлген, Рим чааҷылары иреелееннер, халғанҷызын, тӧгее хазап салып, ӧдір салғаннар. «Полҷаң ниме пол парды!» —  тіп хысхырыбызып, ӱреп парған (Иоанн 19:30). Ӱреен соонда ӱс кӱн пазынаң Иегова аны, кізее кӧрінмес хут идіп, тіргізіп алған (1 Петрның 3:18). Хырых кӱн пазынаң Иисус тигірзер нандыра парып, Худай аны Ханға турғыс саларын сахтап, «Худайның оң саринда одыр салған» (Еврейлерге 10:12, 13).

22. Иисус Пабазына киртістіг халған ӱчӱн, піске хайдағ ізеніс пар?

²² Иисус Пабазына киртістіг халған ӱчӱн, піске чирдегі райда мӧгі чуртаҷаң оңдай пол парған. Иегованың кізілердеңер сағын салған сағызы пастағызынаң сығара андағ полған. Пістің мӧгі чуртасха ізенізібіс Христостың ӧлімінең хайди палғалыстығ полчатханын мының соондағы пастағдаң піліп аларбыс.