1, 2. a) Kumanyik diijin dya muut muy lutumb, i kuk kumvumvwiij neey udy mumumanyik bilengel eeny? Umvwiij. b) Baat baleeleeb biny habitaatal Yeez?

HA BULAB, hady baat bavul bay lutumb. Udy mwa kwiikal mumanyik diijin dya Muut muy lutumb. Kumanyik diijin dya muut oow kakwiin kumvwiij neey udy mumumanyik bilengel. Kwiin mumanyik byoos bitaatal shikacil indiy ni cidyey menmen.

² Yeez Krist waakady ni buumy ha bulab kukady mivw 2 000. Ukady mumvw cya biin-biin biisaamb bwindiy. Ki baat bavul kabiish bamanyik cyaakadyey menmen. Baat bakwaabw baleeleeb neey waakady muut mulengel. Bakwaabw baleeleeb neey waakady muprofet. Ki bakwaabw naabw bitaatab neey i yiy Mawej. Ki uw naabw ulalang bicy?​—Bal Dimanyish dya ku bulekel 12.

3. Bwabiny i bya buseeb bwa kumanyik Yehow ni Yeez?

³ I bya buseeb bwa kumanyik biin-biin habitaatal Yeez. Bwabiny? Bibl waalalabul nook: “Bwiin buumy bwa mwendelel oobw i bwa kukumanyikobw uw Mawej a biin-biin, Mawej aakaabumw ni kumanyikobw Yeez Krist uwutumin.” (Jah 17:3) Uw mumanyik biin-biin habitaatal Yehow ni Yeez, udy mwa kuhet buumy bwa mwendelel mu paradiz ha bulab. (Jah 14:6) Cikwaabw, kumanyik Yeez kwiikaakal ni buseeb kuwudy teng kabaak. Yeez i cileejel cilengel cyeeh, bwaal i mwiituleej mushind a kushikat ni baat ni mushind a kwiibalongel myand. (Jah 13:34, 35) Mu Shapitil 1 tudy balong  biin-biin habitaatal Mawej. Mu shapitil oow, twiiyiiy tulong cidy Bibl ulongweesh habitaatal Yeez.

4. Myanz eey: “Mesih” ni “Krist” yumvumvwiij biny?

⁴ Mivw ivul kuhal kwa kulelobw Yeez, Yehow ulayil neey wiiyiiy kutum Mesih eeny Krist a bulab. “Mesih” waalalukil mu ciin ebreh ni “Krist” waalalukil mu ciin krek. Myanz eey yumvumvwiij neey Mawej wiiyiiy kunoon Mesih waakadyey mulay ni kumwaakish mwaanz wa habwend. Malay moos ma Yehow miiyiiy kukumban ku dyambulwiish dya Mesih.

5. Biiyij ba Yeez baakady batwiishibw neey Yeez waakady Mesih eeny?

⁵ Biiyij ba Yeez baakady batwiishibw neey, Yeez waakady Mesih. (Jah 1:41) Cileejel: mupostol Pyeel wambil Yeez neey: “Uw udy Krist.” (Matewus 16:16, NWT) I mushind kaay utudy mwaakwiikal batwiishibw neey Yeez i yiy Mesih?

6. I mushind kaay udy Yehow mwambulwiish baat ba meej malengel bwa kumanyikobw Mesih?

⁶ Mivw yivul kuhal kwaakulelobw Yeez, baprofet ba Mawej baakady bumvwiij myand yivul yitaatal Mesih bwa kumumanyikobw. Twangat cileejel: babw bakwambil bwa kuy kasambakeen muut uwudy kuy mwanj kutaloh a stasion wa Mashiny adyakal baat bavul. Muut yiy mukwambil bimanyin bya muut aaw, wiiyiiy kumumanyik bilengel. Mu mushind aakaabumw, Yehow ukadil mudimw ni Baprofet bindiy bwa kuleej cikal Mesih ni bwa kulong ni myand yikal mwa ku mufikil. Kukumban kwa malay aam kwambambulwiish baat ba meej malengel bwa bamanyik neey Yeez i yiy Mesih.

7. Teel malay mabidy maleeleej neey Yeez i yiy Mesih.

⁷ Tal malay mabidy mataatal Mesih. Mulay wa kuhal:  muprofet Mikah ulayil mivw 700 kuhal kwa kulelobw Mesih neey, waakady mwa kuledibw mu cibunj cikeeh cya Betelem. (Mikah 5:2) Ki cyaab cyaakadyobw baleel Yeez. (Matewus 2:1, 3-9) Mulay mwiibidy: muprofet Danyel umanyishil neey Mesih waakady mwa kumweek mu muvw a 29. (Danyel 9:25) Malay mabidy aam ni makwaabw mavul, majaajadik neey Yeez i yiy Mesih ulayilobw.​—Bal Dimanyish dya ku bulekel 13.

8, 9. I biny bilongokel ciisang cyaakady Yeez mutambul? Bileeleej biny?

⁸ Yehow waakady mulej hatook neey Yeez i yiy Mesih. Ulayil bwa kwaakish Jah batist cimanyin bwindiy kumanyikey Mesih. Jah waakady mutal cimanyin eecy atambwiishiley Yeez mu muvw a 29. Yeez ulombel Jah bwa kumutambwiishey mu musul a Yurdan. Bibl uloolond cilongekel: “Yeez muman kutambul, ujukil musang aakaabumw mu mwanz. Diiwul kubulukedy, ni yiy kutal spirit a Mawej uweek bu Kony ka Dikucy kiiy ku dyey. Cikwaabw diiy dyalukil mu diiwul dileeb neey: ‘Mwiinoow i yiy mwaan a mim unady mukat ni mumwanyish.’” (Matewus 3:16, 17, NWT) A tadil Jah cimanyin ni umvwiiley diiy aady, yiy kumanyikey neey, Yeez waakady Mesih. (Jah 1:32-34) Hakady spirit a Yehow mwiitulukil Yeez, Yeez wiiyil Mesih teng diifuk aady. Waakady muut waakady Yehow munoon bwaakwiikaley mukaleng ni kalombol.​—Yeshaay 55:4.

⁹ Malay ma mu Bibl maakady Yehow muleeb ni cimanyin citwaadiley ciisang cyaakady Yeez mutambul,  bileeleej neey Yeez i Mesih. Yeez waakady mwaalukil kweeh? Waakady muut a mushind kaay? Tutalay cileeleeb Bibl.

10. Yeez waakady kweeh kuhal kwa kwiiyey ha bulab?

¹⁰ Bibl uloolongweesh neey kuhal kwa Yeez kwiiyey ha bulab waakady ni buumy mu diiwul koos aak. Mikah uleebel neey Mesih waakadyok “kal ni kaleel.” (Mikah 5:2) Yeez uleebel misang ivul neey waakady mu diiwul  kuhal kwa kumulelobw muut ha bulab. (Bal Jah 3:13; 6:38, 62; 17:4, 5.) Kuhal kwa Yeez kwiiyey ha bulab, bakady baswiikakan mu bulund bukasakan ni Yehow.

11. Bwabiny Yehow i mukat Yeez bikasakan?

¹¹ Yehow i mukat Yeez bikasakan bwaal i yiy uhangiley kuhal kwa byoos. Ki bwa biny babibikan Yeez neey “Mwaan-a-but udy ku mut kwa biit byoos bihangil Mawej.” (Kolos 1:15) Cikwaabw, Yehow i mukat Yeez bikasakan bwaal i yiy waakadyey mwiihangiley kayend kend. Ki bwabingany babibikan Yeez neey “Mwaan indiy a diimung” * (Jah 3:16) Yehow ukadil mudimw teng ni Yeez kayend bwa kuhangey biit bikwaabw byoos eeby. (Kolos 1:16) Teng yiy kayend ki udyobw babikan neey “Diiy.” Bwaal Yehow ukadil nend mudimw, bwa kutwaaley mikenj ni may makulond kudy banjel ni baat.​—Jah 1:14.

12. I mushind kaay utudy bamanyik neey Yeez ni Mawej kabiin muut aakaabumw?

¹² Baat bakwaabw bitaatab neey Yeez ni Mawej i muut aakaabumw. Ki Bibl naabw kiin ulongweesh naak. Uleeleeb neey Yeez baakady ba muhang. Naak udy ni butambwiil bwindiy. Ki Mawej hang a byoos kiin ni butambwiil. (Misambw 90:2) Yeez, Mwaan a Mawej, kiin mwanj kuteetoh bwa kwangat cyaab cya Taat indiy. Bilondeshel Bibl,Taat i muhitok Mwaan. (Bal Jah 14:28; 1 Biin Korent 11:3) Yehow kayend ki “Mawej mwiin Bukash Boos.” (Kutang kwa Bwanjil 17:1) I yiy muut a buseeb buvul ni Bukash buvul menmen mu diiwul ni ha bulab.—Bal Dimanyish dya ku bulekel 14.

13. Bwabiny Bibl uleeleeb bwa Yeez neey i “ciifwaany cileeleej hatook Mawej utudy katuy batal ni mees”?

 ¹³ Yehow ni Yeez ibakal mudimw hamw mukacy mwa mivw milyar ni milyar kuhal kwa kuhangobw diiwul ni bulab. Baakady bakatangan bibiin byeeh. (Jah 3:35; 14:31) Yeez i mwiidikij bikadil bya Taat indiy, ki bwabiny Bibl umubibikan neey “ciifwaany cileeleej hatook Mawej utudy katuy batal ni mees.”​—Kolos 1:15.

14. I mushind kaay wiiyilobw kulel Yeez bu muut ha bulab?

¹⁴ Yeez waakady mwiitab bwa kwaalukey mu diiwul ni kwiiy bwa kumulelobw bu muut ha bulab. Byakady mwa kulongek bicy? Yehow ulongel cishim: umbil buumy bwa mwaan indiy mu diifw dya mwaan mukaj waakady kaay mwanj kumanyik baan balum, waakadyobw babikan neey Mariy. Yeez kaakadyoh bend ukaam kwiikal ni Taat a ha bulab. Mariy waakady mulel Mwaan mulum muwaakan, umubiken neey Yeez.​—Luuk 1:30-35.

15. I mushind kaay uwudy mwa kumanyik Yehow bilengel byeeh?

¹⁵ Hawubabal mikand ya mu Bibl eey: Matewus, Mark, Luuk ni Jah, yidyobw babikan neey musah mulengel, wiiyiiy kulong myand yivul habitaatal Yeez, shikacil indiy ni bikadil bindiy. Yeez uleebel neey: “Woos baamaan kuutal i muman kutal Taat.” (Jah 14:9) Yeez uleebel nook bwaal i mufwaanakan ni Taat indiy bikasakan. Myand yiwubabal mu Bibl habitaatal Yeez, yiiyiiy kukukwaajok bwa kumanyik Yehow bilengel byeeh.

16. a) I biny byaakady Yeez ulongweesh? b) Malongweesh mindiy maakady malukil kweeh?

¹⁶ Baat bavul baakady babikan Yeez neey “Mulongweesh.” (Jah 1:38; 13:13) Bwaal bumw bwa ku  myand ya buseeb buvul bwaakadyey ulongweesh i “musah mulengel a Bukaleng.” Bukaleng oobw i biny? I mbulmatady udy mu diiwul udy Mawej wiiy kukal nend mudimw bwa kulombol bulab. Mbulmatady oow wiiyiiy kutwaadil baat bakokoyel Mawej musangal. (Matewus 4:23) Byoos byaakady Yeez ulongweesh byakady byalukil kudy Yehow. Yeez waakady muleeb nook: “Myand yinaloolongweesh kayiishoh bend yaalukil kunady, yaalaalukil kudy Mawej udy muutum.” (Jah 7:16) Waakady mumanyik neey Yehow i mukat bwa baat bumvw musah mulengel oow: Bukaleng bwa Mawej bwiiyiiy kulombol bulab.

17. a) Yeez waakady ulongweesh kweeh? b) Bwabiny Yeez waakady wiitacish bikasakan bwa baat?

¹⁷ Yeez waakady ulongweesh baat kweeh? Cyaab cyoos cyaakadyey uhet baat, bu mudy ku mazubw maababw, ku madimy, mu bibunj bikeeh ni bitam, mu bisal ni mu byaab bya kuhambidil (bitand). Kaakadyoh bend windil bwa baat kwiiyobw kudyey. Misang yoos waakady uy kudyobw. (Mark 6:56; Luuk 19:5, 6) Yeez waakady wiitacish bikasakan bwa baat baakadyey ulongweesh. Waakady uhitish meeb mavul bwa kudiil baat musah. I bwabingany? Bwaal waakady mumanyik neey ki cyaakady Mawej mukat ni bwaal waakady teng ukooyel Taat indiy. (Jah 8:28, 29) Yeez waakady udiil baat musah bwaal waakady wibumvwiil lus. (Bal Matewus 9:35, 36.) Waakady utal bilengel mwaakady bafumw ba bitendelel kabay balongweesh biin-biin habitaatal Yehow ni bukaleng bwindiy. Waakady mukat bwa baat bavul bumvw musah mulengel.

18. I bikadil kaay bya Yeez biwudy mukat bikasakan?

¹⁸ Yeez waakady mukat baat ni waakady wiitacish bwa babw. Waakady muut mulengel ni wa kukwaascil  myand. Nansh baan batofw baakady bakat kushikat nend. (Mark 10:13-16) Waakady teng muwaakan. Waakady mukin kukos kwa mishik ni kabow. (Matewus 21:12, 13) Mu ciisang cindiy aacy, baat kaabakadyoh banemek baan bakaj ning bicy ni kaabakadyoh bibangat ni buseeb. Ki Yeez waakady teng wiibanemek. (Jah 4:9, 27) Yeez waakady ni kwiihweekesh kwa biin-biin. Cileejel diifuk dikwaabw kawul, waakady mowesh bapostol bindiy mwanz ku makas. I mudimw waakadyobw mwa kukal kudy mwiin mudimw.​—Jah 13:2-5, 12-17.

19. I cileejel kaay cileeleej neey Yeez waakady mukat kukwaajok baat?

¹⁹ Yeez waakady mumanyik byaakady baat bakaam ni waakady mukat kwiibakwaajok. Byaakady bimweekel ku mushind waakadyey ondah baat ni bukash bwa kudy Mawej. (Matewus 14:14) Cileejel, diifuk kahand mubeel a nyaw mukwaabw wambil Yeez neey: “Awiikal mukat, bukaanyoh.” Atadil Yeez mal ma muut oow, yiy kumumvwiil lus ni kukatey bwa kumukwaajok. Yiy kumutengok ni wa mwambil neey: “Nady mukat, kasakanaak!” Mwiin nyaw aaw waakady mondayibw. (Mark 1:40-42) Udy mwa kulang mwaakadyey mwa kwiiyumvw eeny?

20, 21. Bwabiny tudy mwa kuleeb neey Yeez i cileejel cilengel cyeeh cya kukooyel Mawej?

²⁰ Yeez i cileejel cilengel cyeeh cya kukooyel Mawej. Waakady mushaal ni lulamat kudy Taat indiy ning hakadyey muhet makab eeny akady balwiish bindiy bamulongel bibiih. Cileejel, akady Sataan mumuteet kaakadyoh bend mulong pekaat. (Matewus 4:1-11) Baan baabw bakwaabw kabakadyoh bend bitab neey waakady Mesih. Baakady baleeb neey i mubeel a  lubangul. Ki Yeez waakady mutungunuk ni kulong cyaakady Mawej mukat. (Mark 3:21) Hakadyobw ba mukengesh kudy balwiish bindiy, waakady mushaal mulaamat teng Mawej ni kaakady muteet ning bicy bwa kwiibalongel bibiih.​—1 Pyeel 2:21-23.

²¹ Kuuhal kwa yiy kufw, Yeez umwenen makab mavul. Ki waakady mushal ni lulamat kudy Yehow. (Bal Filipw 2:8.) Lang bwa myand yoos yaakady Yeez mutaatamen diifuk dya lufw lwindiy. Baakady bamukwaat. Baat kumufundomw neey waakady uboy Mawej. Bamazuj baakadyobw bakosol mishik ku mufundilobw cibaw cya lufw. Bamusekel kudy baat. Basalay kumukengeshobw ni kumuhohel ha mutond a makab ni mal. Kuhal kwa kufweey, Yeez uleebeel neey: “Myand yoos yibaawaakan.”  (Jah 19:30) Mafuk masat hanyim ha lufw lwindiy, Yehow ubushil Yeez ku lufw ni kumwaakishey nyeet ya mu spirit, i bwiin kuleeb neey nyeet ya bwiin ya Banjel. (1 Pyeel 3:18, NWT) Yeeng yikeeh hanyim ha kubukey ku lufw, Yeez uhingil mu diiwul ni “kuunyim ushikacil ku ciludy cya Mawej.” Kushaley mwindil bwa kumutekobw Mukaleng kudy Mawej.​—Ebreh 10:12, 13.

22. Bu mwaakady Yeez mushaal ni lulamat kudy Taat indiy, tudy bahet mushind a kulong biny leeloow?

²² Bu mwaakady Yeez mushal ni lulamat kudy Taat indiy, tudy ni mushind a kuhet buumy bwa mwendelel mu Paradiz ha bulab. Ki cidy Yehow mukat. Mu shapitil uloolond, twiiyiiy kutal bwa biny lufw lwa Yeez lwiitwaakakish mushind a kuhet buumy bwa mwendelel.