1, 2. (a) Yu rili no pɔsin we ɔlman sabi if na in nem nɔmɔ yu no? Ɛksplen. (b) Wetin pipul dɛn biliv bɔt Jizɔs?

BƆKU pipul dɛn de we pipul dɛn sabi ɔlsay na di wɔl. Yu go mɔs no pɔsin in nem we ɔlman sabi. Bɔt jɔs bikɔs yu no in nem, nɔ min se yu rili sabi am. I nɔ min se yu sabi ɔltin bɔt in layf ɛn uskayn pɔsin i rili bi.

² Yu go mɔs dɔn yɛri bɔt Jizɔs Krays, pan ɔl we i dɔn pas lɛk 2,000 ia we i bin de na di wɔl. Bɔt bɔku pipul dɛn nɔ no udat Jizɔs rili bi as mɔtalman. Sɔm pipul dɛn se in na bin gud man, sɔm dɛn se in na bin prɔfɛt, ɛn ɔda wan dɛn biliv se in na Gɔd. Wetin yu tink?—Luk Ɛndnot 12 na pej 211.

3. Wetin mek i impɔtant fɔ mek yu no bɔt Jiova Gɔd ɛn Jizɔs Krays?

³ I impɔtant fɔ mek yu no di tru tin bɔt Jizɔs. Wetin mek? Di Baybul tɛl wi se: “Fɔ gɛt da layf de, we go de sote go, dɛn fɔ no yu, we na di wangren tru Gɔd, ɛn dɛn fɔ no Jizɔs Krays, we yu sɛn kam to dɛn.” (Jɔn 17:​3) Fɔ tru, if yu no di tru tin bɔt Jiova ɛn Jizɔs, yu go gɛt layf we go de sote go na Paradays. (Jɔn 14:​6) We yu no bak bɔt Jizɔs, dat go ɛp yu bikɔs in na di bɛst ɛgzampul bɔt aw fɔ liv wit ɔda pipul dɛn ɛn aw fɔ trit dɛn. (Jɔn 13:​34, 35) Insay Chapta 1, wi bin lan di tru tin bɔt Gɔd. Naw wi go lan wetin di Baybul de tich bɔt Jizɔs.

4. Wetin “Mɛsaya” ɛn “Krays” min?

⁴ Ivin bifo dɛn bɔn Jizɔs, Jiova bin dɔn prɔmis insay di Baybul se i go sɛn di Mɛsaya, ɔ Krays. Di wɔd “Mɛsaya” kɔmɔt frɔm di Ibru langwej, ɛn di wɔd “Krays” kɔmɔt frɔm di Grik langwej. Ɔl tu dɛn taytul ya min se Gɔd go pik di Mɛsaya we i bin dɔn prɔmis ɛn gi am spɛshal pozishɔn. Di Mɛsaya go mek ɔl wetin Gɔd dɔn prɔmis kam tru. Jizɔs kin ɛp yu rayt naw. Bɔt bifo dɛn bɔn Jizɔs, bɔku pipul dɛn bin de wɔnda, ‘Udat go bi di Mɛsaya?’

5. Yu tink se Jizɔs in disaypul dɛn bin biliv se na in na di Mɛsaya?

⁵ Jizɔs in disaypul dɛn nɔ bin gɛt wan dawt se na in na di Mɛsaya. (Jɔn 1:​41) Fɔ ɛgzampul, Saymɔn Pita bin tɛl Jizɔs: “Yu na di Mɛsaya.” (Matyu 16:​16) Aw wi shɔ se na Jizɔs na di Mɛsaya?

6. Aw Jiova bin ɛp ɔmbul pipul dɛn fɔ no di Mɛsaya?

⁶ Lɔng tɛm bifo dɛn bɔn Jizɔs, Gɔd in prɔfɛt dɛn bin dɔn rayt wetin go ɛp pipul dɛn fɔ no di Mɛsaya. Aw dis go ɛp? Lɛ wi se, dɛn aks yu fɔ go tek pɔsin we yu nɔ wande sabi na bɔs steshɔn usay bɔku pipul dɛn de. If dɛn tɛl yu smɔl tin bɔt di pɔsin, yu go ebul fɔ no di pɔsin. Semweso, Jiova bin yuz in prɔfɛt dɛn fɔ rayt plɛnti tin dɛn bɔt wetin di Mɛsaya go du ɛn wetin go apin to am. We ɔl wetin dɛn bin tɔk bɔt di Mɛsaya apin, dis bin ɛp pipul dɛn we ɔnɛs fɔ no se na Jizɔs na di Mɛsaya.

7. Us tu tin dɛn we dɛn bin dɔn tɔk bɔt Jizɔs we pruv se na in na di Mɛsaya?

⁷ Lɛ wi si tu pan di tin dɛn we dɛn tɔk bɔt di  Mɛsaya. Fɔs, 700 ia bifo dɛn bɔn Jizɔs, prɔfɛt Mayka bin se dɛn go bɔn di Mɛsaya na wan smɔl tɔŋ insay Bɛtliɛm. (Mayka 5:​2) Ɛn na da tɔŋ de Jizɔs bin bɔn! (Matyu 2:​1, 3-9) Sɛkɔn, di prɔfɛt Daniɛl bin rayt se di Mɛsaya go apia insay di ia 29. (Daniɛl 9:​25) Dis na jɔs tu pan di bɔku bɔku tin dɛn we dɛn bin rayt se go apin, we sho klia wan se Jizɔs na di Mɛsaya we dɛn bin dɔn tɔk se go kam.—Luk Ɛndnot 13 na pej 211.

8, 9. Wetin bin apin di tɛm we Jizɔs bin baptayz we pruv se na in na di Mɛsaya?

⁸ Jiova bin dɔn sho klia wan se na Jizɔs na di Mɛsaya. Gɔd bin prɔmis fɔ gi sayn to Jɔn we de baptayz pipul dɛn, we go ɛp am fɔ no udat na di Mɛsaya. We Jizɔs bin go to Jɔn fɔ baptayz na di Jɔdan Riva insay di ia 29, Jɔn bin si di sayn. Di Baybul tɛl wi wetin bin apin, we i se, as “Jɔn baptayz Jizɔs so, Jizɔs kɔmɔt insay di wata. Gɔd opin di klawd mek i si, ɛn i si Gɔd in Spirit de kɔmɔt ɔp kam pan am lɛkɛ aw dɔv kin kam dɔŋ. Dɔn dɛn yɛri vɔys we kɔmɔt ɔp na ɛvin we se, ‘Dis na mi Pikin we a lɛk, a gladi fɔ am.’” (Matyu 3:​16, 17) We Jɔn bin yɛri ɛn si di sayn, i bin no se na Jizɔs na di Mɛsaya. (Jɔn 1:​32-34) Na frɔm da de de we Jiova put in spirit pan Jizɔs, na in i bi di Mɛsaya.  Na in na di wan we Gɔd bin dɔn pik fɔ bi Lida ɛn Kiŋ.—Ayzaya 55:​4.

⁹ Di tin dɛn we di Baybul tɔk se go apin, wetin Jiova bin tɔk, ɛn di sayn we I bin gi di tɛm we Jizɔs baptayz pruv se na Jizɔs na di Mɛsaya. Bɔt usay Jizɔs bin kɔmɔt ɛn aw i bin tan lɛk? Lɛ wi si wetin di Baybul se.

10. Wetin di Baybul se bɔt Jizɔs in layf bifo i kam na di wɔl?

¹⁰ Di Baybul se Jizɔs bin de na ɛvin fɔ lɔng tɛm bifo i kam na di wɔl. Mayka bin tɔk se di Mɛsaya bin dɔn de lɔng tɛm bifo Gɔd mek di wɔl. (Mayka 5:​2, NW) Jizɔs insɛf sɛf bin tɔk plɛnti tɛm se na ɛvin i bin de bifo dɛn bɔn am as mɔtalman. (Rid Jɔn 3:​13; 6:​38, 62; 17:​4, 5.) Ivin bifo Jizɔs kam na di wɔl, in na bin spɛshal pɔsin to Jiova.

11. Wetin mek Jizɔs rili spɛshal to Jiova?

¹¹ Jizɔs na spɛshal pɔsin to Jiova. Wetin mek? Na bikɔs “nain fɔs bin de bifo Gɔd mek ɛnitin we de na di wɔl.” Na in na Gɔd in fɔs Pikin. * (Lɛta Fɔ Kɔlɔse 1:​15) Di ɔda tin we mek Jizɔs spɛshal to Jiova na bikɔs na Gɔd in wangren mek am. Na dat mek di Baybul kɔl Jizɔs, Gɔd in “wangren Pikin.” (Jɔn 3:​16) Na Jizɔs nɔmɔ Jiova yuz fɔ mek ɔl ɔda tin. (Lɛta Fɔ Kɔlɔse 1:​16) Dɔn na Jizɔs nɔmɔ di Baybul kɔl “di Wɔd” bikɔs na in Gɔd bin de yuz fɔ gi mɛsej ɛn fɔ tɛl di enjɛl dɛn ɛn mɔtalman dɛn wetin fɔ du.—Jɔn 1:​14.

12. Aw wi no se Jizɔs ɛn Gɔd nɔto di sem pɔsin?

¹² Sɔm pipul dɛn tink se Jizɔs ɛn Gɔd ikwal. Bɔt nɔto dat di Baybul de tich. Di Baybul se na Gɔd mek Jizɔs. Dat min se Jizɔs gɛt biginin, bɔt Jiova we mek ɔltin nɔ gɛt biginin. (Sam 90:​2) As Gɔd  in Pikin, Jizɔs nɔ ɛva tray fɔ mek insɛf lɛk Gɔd. Di Baybul tich wi klia wan se Jizɔs ɛn in Papa nɔ ikwal. (Rid Jɔn 14:​28; Fɔs Lɛta Fɔ Kɔrint 11:​3.) Na Jiova nɔmɔ na “GƆD Ɔlmayti.” (Jɛnɛsis 17:​1) So in ɛn nɔbɔdi nɔ ikwal, ɛn i gɛt pawa pas ɔlman na di wɔl.—Luk Ɛndnot 14 na pej 213.

13. Wetin di Baybul min we i se Jizɔs ‘na in mek wi no aw Gɔd tan’?

¹³ Jiova ɛn in Pikin, Jizɔs, bin dɔn de wok togɛda fɔ lɔng tɛm bifo dɛn mek di ɛvin ɛn di wɔl. Dɛn go mɔs dɔn lɛk dɛnsɛf gud gud wan! (Jɔn 3:​35; 14:​31) Jizɔs bin falamakata in Papa in kwaliti dɛn gud gud wan, na dat mek di Baybul se: “Krays we pipul dɔn si, nain mek wi no aw Gɔd, we wi nɔ de si, tan.”—Lɛta Fɔ Kɔlɔse 1:​15.

14. Aw Jiova in Pikin we i lɛk pasmak bin kam na di wɔl as mɔtalman?

¹⁴ Jiova in spɛshal Pikin bin rɛdi fɔ lɛf ɛvin ɛn kam na dis wɔl as mɔtalman. Aw dat pɔsibul? Jiova bin du mirekul fɔ tek di layf we in Pikin bin gɛt na ɛvin ɛn put am insay wan vajin we nem Meri, in bɛlɛ. Na dis mek Jizɔs nɔ bin nid fɔ gɛt mɔtalman papa. So Meri bin bɔn pafɛkt pikin, ɛn i kɔl am Jizɔs.—Lyuk 1:​30-35.

15. Aw yu go no Jiova gud gud wan?

¹⁵ Yu kin lan bɔku tin bɔt Jizɔs, in layf, ɛn in kwaliti dɛn we yu rid dɛn Baybul buk ya, Matyu, Mak, Lyuk, ɛn Jɔn. Dɛn kɔl dɛn buk dɛn ya di Gɔspɛl. Bikɔs Jizɔs fiba in Papa, wetin yu go rid go ɛp yu bak fɔ no Jiova gud gud wan. Na dat mek  Jizɔs bin se: “Ɛnibɔdi we dɔn si mi, dɔn si mi Papa.”—Jɔn 14:​9.

16. Wetin Jizɔs bin de tich? Na udat bin de tɛl am wetin fɔ tich?

¹⁶ Bɔku pipul dɛn bin de kɔl Jizɔs, “Ticha.” (Jɔn 1:​38; 13:​13) Wan pan di men tin dɛn we i bin de tich na “di Gud Nyuz bɔt di tɛm we Gɔd de kam rul.” Wetin na Gɔd in Kiŋdɔm? Na Gɔd in gɔvmɛnt we go rul oba di wan ol wɔl frɔm ɛvin ɛn briŋ blɛsin to di pipul dɛn we obe Gɔd. (Matyu 4:​23) Ɔltin we Jizɔs bin de tich kɔmɔt frɔm Jiova. Jizɔs bin se; “Nɔto mi yon sɛns a de tek lan una, bɔt na Gɔd we sɛn mi tɛl mi wetin a fɔ lan una.” (Jɔn 7:​16) Jizɔs bin no se Jiova want mek pipul dɛn yɛri di gud nyuz se Gɔd in Kiŋdɔm go rul oba di wɔl.

17. Usay Jizɔs bin de tich? Wetin mek i bin de wok tranga wan fɔ tich ɔda pipul dɛn?

¹⁷ Usay Jizɔs bin de tich? I bin de tich pipul dɛn ɛnisay we i mit dɛn. I bin de tich na tɔŋ, vilej, makit ples dɛn, ples dɛn usay dɛn de wɔship, ɛn na os dɛn. I nɔ bin de wet fɔ mek pipul dɛn kam to am. Plɛnti tɛm na in bin de go mit dɛn. (Mak 6:​56; Lyuk 19:​5, 6) Jizɔs bin de wok tranga wan ɛn i bin spɛn bɔku tɛm ɛn trɛnk fɔ tich pipul dɛn. Wetin mek? Na bikɔs i bin no se Gɔd bin want am fɔ du dat, ɛn i bin want fɔ obe in Papa ɔltɛm. (Jɔn 8:​28, 29) Jizɔs bin de prich bikɔs i bin de sɔri bak fɔ pipul dɛn. (Rid Matyu 9:​35, 36.) I bin de si se di bigman dɛn pan Gɔd biznɛs nɔ bin de tich di pipul dɛn di tru tin bɔt Gɔd ɛn in Kiŋdɔm. So i bin want fɔ ɛp bɔku pipul dɛn fɔ yɛri di gud nyuz.

18. Us kwaliti dɛn we Jizɔs gɛt we yu lɛk pas ɔl?

 ¹⁸ Jizɔs na bin man we bin lɛk ɛn kia fɔ pipul dɛn. I bin gud ɛn izi fɔ tɔk to. Ivin pikin dɛnsɛf bin lɛk fɔ de wit am. (Mak 10:​13-16) Jizɔs nɔ bin de tek wan pɔsin impɔtant pas ɔda pɔsin. I et we pipul dɛn nɔ de du wetin rayt. (Matyu 21:​12, 13) Insay Jizɔs in tɛm, dɛn nɔ bin de rɛspɛkt uman dɛn, ɛn uman dɛn nɔ bin gɛt bɛtɛ rayt. Bɔt Jizɔs bin de trit uman dɛn ɔltɛm wit rɛspɛkt ɛn sho se dɛn valyu. (Jɔn 4:​9, 27) Dɔn Jizɔs bin rili ɔmbul. Fɔ ɛgzampul, wan ivintɛm i bin was in disaypul dɛn fut. Dis na wok we savant dɛn kin du.—Jɔn 13:​2-5, 12-17.

19. Us ɛgzampul we sho se Jizɔs bin no wetin pipul dɛn bin nid ɛn i rili bin want fɔ ɛp dɛn?

¹⁹ Jizɔs bin no wetin pipul dɛn bin rili nid, ɛn i bin want fɔ ɛp dɛn. I bin de du dis bay we i bin de yuz Gɔd in pawa fɔ mɛn sik pipul dɛn. (Matyu 14:​14) Fɔ ɛgzampul, wan man we bin gɛt wan bad sik we dɛn kɔl lɛprɔsi, bin kam mit Jizɔs ɛn tɛl am se: “If yu gri fɔ mɛn mi, yu ebul mɛn mi ɛn mek a klin.” Jizɔs fil sɔri fɔ di man. So i tɔch di man ɛn tɛl am se: “A want mɛn yu, wɛl naw!” Ɛn wantɛm wantɛm di man wɛl! (Mak 1:​40-42) Yu go ebul imajin aw da man de bin fil?

20, 21. Aw Jizɔs bin sɛt fayn ɛgzampul bɔt aw fɔ obe Gɔd?

²⁰ Jizɔs sɛt fayn ɛgzampul bɔt aw wi fɔ obe Gɔd. Pan ɔl wetin bin apin ɛn wetin in ɛnimi dɛn bin du to am, i bin fetful to in Papa. Fɔ ɛgzampul, Jizɔs nɔ bin sin we Setan bin tray fɔ tɛmt am.  (Matyu 4:​1-11) Sɔm pan Jizɔs in fambul dɛn nɔ bin biliv se na in na di Mɛsaya ɛn dɛn bin ivin tɛl am se, “i de mek lɛkɛ se in ed nɔ de.” (Mak 3:​21) Bɔt Jizɔs bin kɔntinyu fɔ du wetin Gɔd want. We in ɛnimi dɛn bin de du bad tin to am, Jizɔs bin stil fetful to Gɔd, ɛn i nɔ bin tray fɔ du dɛn bad.—Pita In Fɔs Lɛta 2:​21-23.

²¹ Pan ɔl we Jizɔs in ɛnimi dɛn bin mek i rili sɔfa bifo i de day, i bin stil du wetin Jiova want te i day. (Rid Lɛta Fɔ Filipay 2:​8, NW.) Imajin di kayn tin we Jizɔs bin bia di de we i day. Dɛn ol am, kɔl pipul dɛn fɔ kam lay pan am, jɔj dɛn we nɔ de tɔk tru se mek dɛn kil am, pipul dɛn laf am, ɛn sojaman dɛn du am  bad bad tin dɛn. Dɔn, dɛn nel am pan stik. Bifo Jizɔs de day, i ala lawd wan se: “A dɔn dɔn mi wok!” (Jɔn 19:​30) Tri dez afta Jizɔs day, Jiova bin gi am layf bak ɛn gi am spirit bɔdi. (Pita In Fɔs Lɛta 3:​18) Afta lɛk fɔti dez so, Jizɔs go bak na ɛvin, “go sidɔm na Gɔd in raytan,” ɛn wet fɔ mek Gɔd mek am Kiŋ.—Di Ibru Pipul Dɛn 10:​12, 13.

22. Bikɔs Jizɔs bin du wetin in Papa want, us chans wi dɔn gɛt?

²² Bikɔs Jizɔs bin kɔntinyu fɔ du wetin Jiova want, wi dɔn gɛt di chans fɔ liv sote go na Paradays, jɔs lɛk aw Jiova bin want. Na di nɛks chapta, wi go lan bɔt aw Jizɔs in day bin mek am pɔsibul fɔ mek wi go de sote go.