1, 2. (a) Nsene wa diva edina lyagumwe ogu ga divikwa ngoso wa mu diva nawa ndi? Faturura. (b) Yisinke va pura vantu kuhamena Jesus?

VANTU vanzi va divikwa mouzuni. Nampo wa diva edina lyagumwe. Nampili ngomu wa diva edina lyendi kapi yina kutanta asi wa mu diva nawa. Kapi wa diva nkareso zendi ntani nomu a paruka.

² Nampo wa zuvha kuhamena Jesus Kristusa, nampili moomu ga parukire pevhu nomvhura 2 000 da ka pita. Nye vantu wovanzi kapi va diva sili Jesus. Vamwe kutanta asi age kwa kere muntu gomuwa, ano vamwe asi muporofete, ntani vamwe kwa pura asi Jesus Karunga. Ove yisinke wa pura?—Tara Mauzera 12.

3. Morwasinke ya karera nomulyo koge o dive Jehova Karunga naJesus Kristusa?

³ Morwasinke ya karera nomulyo koge o dive usili kuhamena Jesus? Morwa Bibeli kutanta asi: “Mwenyo gwanarunye yigo ogu asi va ku dive asi nyovelike Karunga gosili, nogu wa tuma, Jesus Kristusa.” (Johanesa 17:3) Nsene o diva usili kuhamena Jesus kuvhura ngo ka paruke narunye pevhu moparadisa. (Johanesa 14:6) Kudiva Jesus ngayi ku vatera, morwa age ga tura po sihonena sosiwa omu natu kara novakwetu. (Johanesa 13:34, 35) MEgaununo 1 twa lirongere usili kuhamena Karunga. Ngesi tatu ka lironga eyi azi rongo Bibeli kuhamena Jesus.

4. Yisinke adi tanta nonkango “Mesiyasa” ntani “Kristusa”?

⁴ Komeho Jesus va ya mu hampuruke, Jehova kwa tumbwidilire moBibeli asi nga tuma Mesiyasa ndi Kristusa. Nkango “Mesiyasa” kwa tunda keraka lyoRuhebeli ano nkango “Kristusa” keraka lyoRugereka. Nonkango odo kutanta asi Karunga ga horowora Mesiyasa nokumupa sirugana somulyo unene. Mesiyasa nga sikisa mo nayinye eyi ga tumbwidira Karunga. Kuvhura o gwanene mo uwa naina kweyi ga rugene Jesus. Komeho Jesus va mu hampuruke, vantu wovanzi ngava lipura asi: ‘Yilye nga kara Mesiyasa?’

5. Varongwa vaJesus va yi pulire asi yige Mesiyasa ndi?

⁵ Varongwa vaJesus va yi pulire asi Jesus yige Mesiyasa. (Johanesa 1:41) Pasihonena Simoni Peturusa kwa tanterere Jesus asi: “Nyove sa Mesiyasa.” (Mateusa 16:16) Ngapi nose natu diva sili asi Jesus yige Mesiyasa?

6. Ngapi Jehova ga vaterere vantu va dimburure Mesiyasa?

⁶ Komeho a wize Jesus pevhu, vaporofete vaKarunga kwa tjenge nombudi dononzi edi da vaterere vantu va dimburure Mesiyasa. Mokuyifanekesa, nsene va ku tuma oku ava rondere vantu o ka simbe muntu ogu wa dira kumona rumwe, ntudi gumwe a ku fatwilire omu ga fana ntani no ka mu diva. Jehova nage yiyo ga rugene, age kwa ruganesere vaporofete va pumbe eyi ga ya rugene Mesiyasa ntani neyi ya ya mu horokerere. Esikomo lyomauporofete ogo kuvatera vantu va dive asi Jesus yige Mesiyasa.

7. Mauporofete musinke gavali ga likida asi Jesus yige Mesiyasa?

⁷ Koneka gamwe gomauporofete ogo gavali.  Wokuhova nomvhura 700 komeho Jesus va mu hampuruke, Mika kwa pumbire asi Mesiyasa ngava mu hampurukira moBeterehema. (Mika 5:2) Ano yimo va ya mu hampurukilire! (Mateusa 2:1, 3-9) Uporofete wauvali, Ndaniyera kwa pumbire asi Mesiyasa nga ya moneka momvhura 29 komeho zokuwiza Jesus pevhu. (Ndaniyera 9:25) Aga gamwe gomauporofete aga ga likida asi Jesus yige Mesiyasa.—Tara Mauzera 13.

8, 9. Yisinke ya likidire asi Jesus Mesiyasa pekuho lyendi?

⁸ Jehova ga yi zeresere asi Jesus yige Mesiyasa. Karunga kwa tumbwidilire Johanesa Mukuhwi asi nga mu pa sidiviso a dimburure Mesiyasa. Johanesa ga mwene sidiviso oso apa ga kuhwire Jesus. Bibeli kutanta asi: “Jesus kwa pwa tupu kumukuhwa, makura ta zauka mo momema. Va tara ko, eguru lina mu zegurukire, makura ta mono Mpepo zaKarunga tazi mu hegumukire peguru lyendi ngwendi nkutji. Meguru tamu tundu ezwi lina kutanta asi: ‘Ogu yige Munwange ogu na hara, ga za nge komutjima.’” (Mateusa 3:16, 17) Apa Johanesa ga mwene sidiviso oso ga divire asi Jesus kwa kere Mesiyasa. (Johanesa 1:32-34) Lyoolyo ezuva va mu gwavekere Jesus nompepo zokupongoka yipo ga kere Mesiyasa. Jehova kwa mu horowora a kare Mupangeli ntani Hompa.—Jesaya 55:4.

⁹ Mauporofete gomoBibeli, nononkango edi ga  uyungire Jehova, ntani nosidiviso esi ga geve pekuho lyaJesus, nayinye kulikida asi Jesus yige Mesiyasa. Nye kupi ga tundililire Jesus ntani muntu musinke ga kere? Tu tareni eyi azi uyunga Bibeli.

10. Kuliza noBibeli, kupi ga hovere kukara Jesus komeho zokuwiza pevhu?

¹⁰ Bibeli kutanta asi Jesus kwa kere meguru  komeho zokuwiza pevhu. Muporofete Mika kwa tente asi Mesiyasa “gemezimo lyokutunda kwanare.” (Mika 5:2) Jesus mwene kwa tente asi kwa kere meguru komeho zokuwiza pevhu. (Resa Johanesa 3:13; 6:38, 62; 17:4, 5.) Age kwa kere nelikwatakano lyewa naJehova.

11. Morwasinke Jehova ga harera unene Jesus?

¹¹ Jehova kwa hara unene Jesus. Morwasinke? Morwa yige ga hovere kusita. Jesus kumutumbura asi “mbeli, muhoverera goyisitwa nayinye.” * (Vakorosi 1:15) Jehova kwa hara hena Jesus morwa yige gelike ga sitire pwagelike. Yiyo Jesus ava mu tumbwire asi “Munwendi gelike a huru.” (Johanesa 3:16) Jesus gelike ga ruganesere Jehova mokusita yisitwa nayinye. (Vakorosi 1:16) Ntani Jesus gelike ava tumbura asi “Nkango” morwa Jehova ga mu ruganesere a tware nombudi nomapukururo gendi kovaengeli nokovantu.—Johanesa 1:14.

12. Ngapi za likida Bibeli asi Jesus naKarunga kapisi muntu gumwe tupu?

¹² Vantu vamwe kwa pura asi Jesus ntani Karunga muntu gumwe tupu. Nye Bibeli kapi azi kwatesa ko erongo olyo. Azo kutanta asi Jesus kwa mu sitire, kulikida asi ga kara netameko. Nye Jehova ogu ga sita yininke nayinye kapi ga kara netameko. (Episarome 90:2) Jesus ga yi divire asi kapi ga hetakana naKarunga. Bibeli kuturonga asi Guhya ga pita Muna.  (Resa Johanesa 14:28; 1 Vakolinte 11:3.) Jehova gelike “Karunga Munankondo nadinye.” (Genesis 17:1) Age munankondo po gomunene mouzuni mudima.—Tara Mauzera 14.

13. Morwasinke Jesus ava mu tumbwire asi “sihwi saKarunga ogu a dili kumoneka.”?

¹³ Jehova naMunwendi Jesus kwa rugene kumwe nomvhura dononzi komeho zesito lyeguru nevhu. Awo kwa lihere unene. (Johanesa 3:35; 14:31) Jesus kwa honene nawa-nawa yikara yoGuhwe, yiyo azi mu tumbwire Bibeli asi “sihwi saKarunga ogu a dili kumoneka.”—Vakorosi 1:15.

14. Yisinke ga rugene Jehova yipo Jesus va mu hampuruke pevhu ngomuntu?

¹⁴ Jesus kwa tundire meguru va ya mu hampuruke ngomuntu pevhu. Ngapi omu ya horokere? Jehova kwa rugene sitetu pokurundurura eparu lyaMunwendi a li ture momukoga gwaMariya. Jesus kapi ga kere noguhwe wopanyama. Mariya ga ya retere munwa gokusikilira mo, makura ta mu ruku Jesus.—Rukasa 1:30-35.

15. Yisinke no rugana yipo o dive nawa Jehova?

¹⁵ Nsene ono hara kulironga kuhamena eparu noyikara yaJesus resa monobuke ne, Mateusa naMarukusa naRukasa ntani Johanesa. Jesus kwa honenene nawa-nawa oGuhwe, yiyo ga uyungilire asi: “Ogu ga mona nge, ga mona hena Tate.” (Johanesa 14:9) Yipo nye pokulironga kuhamena Jesus, ngo diva hena yoyinzi kuhamena Jehova.

16. Yisinke nga rongo Jesus? Erongo lyendi kupi lya tundire?

 ¹⁶ Jesus ngava mu tumbura asi “Murongi.” (Johanesa 1:38; 13:13) Sininke somulyo esi nga rongo kwa kere “Mbudi zoNgwa zoUntungi” ndi Uhompa. Yisinke Uhompa? Alyo epangero lyaKarunga eli ngali pangera evhu mudima kutundilira meguru nokuretera matungiko vantu ava ava limburukwa Karunga. (Mateusa 4:23) Yininke nayinye eyi ga rongere Jesus kwa tundire kwaJehova. Jesus kwa tente asi: “Erongo lyange kapisi lyanyamwange, nye lyogu ga tuma nge.” (Johanesa 7:16) Jesus ga yi divire asi Jehova ana hara vantu va zuvhe mbudi zongwa asi Uhompa ngau ya pangera evhu mudima.

17. Kupi nga rongere Jesus? Morwasinke ga litulilire mo unene kuronga vantu?

¹⁷ Kupi nga rongere Jesus? Nkenye oku nga gwana vantu. Age nga rongo monomukunda nomoyitata nopomarandesero nokomavango oku vantu ngava karere Karunga ntani momambo. Kapi nga ndindire vantu va mu wizire, nye nga va zire. (Marukusa 6:56; Rukasa 19:5, 6) Jesus kwa litulire mo unene mokuzuvhisa mbudi zongwa. Morwasinke? Morwa ga yi divire asi Jehova kwa mu harerere a zuvhise mbudi zongwa ntani Jesus nkenye apa nga limburukwa oGuhwe. (Johanesa 8:28, 29) Jesus nga zuvhisa hena morwa kwa fililire vantu nkenda. (Resa Mateusa 9:35, 36.) Ga yi divire asi vapitisili womaukareli kapi ngava rongo usili kuhamena Karunga noUhompa wendi. Age kwa here vantu wovanzi va zuvhe mbudi zongwa.

18. Yikara musinke yaJesus ono hafere?

¹⁸ Jesus kwa here vantu nokuvapakera mbili. Age  kwa kere nonkenda ntani nkenye ogu nga manguruka kuuyunga nendi. Nampili vanona kwa here kukara nage. (Marukusa 10:13-16) Jesus nga tekura nawa vantu, age kwa nyengere kufukira ntani nokurugana momudona wopeke. (Mateusa 21:12, 13) Siruwo sina vakadi ngava dili kuvafumadeka nokuvatekura momudona, nye Jesus nga va tekura nefumadeko. (Johanesa 4:9, 27) Jesus kwa kere muntu gokulinunupika. Ezuva limwe kwa kuhwire nompadi dovarongwa vendi, sirugana esi ngava rugana vapika.—Johanesa 13:2-5, 12-17.

19. Sihonena musinke asi likida asi Jesus ga divire eyi va hepere vantu ntani ga here kuvavatera?

¹⁹ Jesus ga divire eyi va hepere vantu ntani ga here kuvavatera. Yipo nye ga ruganesere nonkondo edi ga gwene kwaKarunga a verure vantu. (Mateusa 14:14) Pasihonena mugara ogu ga verere yingondwe kwa wizire kwaJesus ta mu hundire asi: “Sinene o yi panga, kuvhura kuverura nge.” Apa ga mwene Jesus uvera wendi, ta mu fire nkenda ntani ga here kumuvatera. Jesus ta kwata mugara gwina ta mu tantere nombili asi: “Nina yi panga, veruka.” Mugara makura ta veruka. (Marukusa 1:40-42) Ngapi ono kugazara ga lizuvhire mugara gwina?

20, 21. Ngapi Jesus ga tura po sihonena sosiwa sokulimburukwa Karunga?

²⁰ Jesus kwa tura po sihonena sosiwa sokulimburukwa Karunga. Age kwa limburukwire oGuhwe momaukaro nagenye. Pasihonena, Jesus kapi ga zonene apa ga mu hetekere Satana. (Mateusa 4:1-11)  Vamwe vekoro lyaJesus kapi va pulire asi age Mesiyasa ntani va tente asi “ana piyagana,” nye Jesus ga twikilire kurugana sirugana saKarunga. (Marukusa 3:21) Apa va mu tekwire momudona ava va mu nyengere, Jesus kapi ga va tengwidire kuwoko.—1 Peturusa 2:21-23.

²¹ Apa va mu hepekere nokumudipaga monkedi zokukora, Jesus ga twikilire kulimburukwa Jehova. (Resa Vafilipi 2:8.) Ezuva eli ga fire ga ligwanekerere nomaudigu gomanzi. Age kwa mu kwete nokumurundira asi munzoni, nokumupangura vapanguli wovadona, mbunga kwa mu zorere ntani vakwayita va mu toonene nokumupampara. Apa ga fire kwa zigilire asi:  “Yina siki mo.” (Johanesa 19:30) Konyima zomazuva gatatu, Jehova ta mu vhumbura morutu ropampepo. (1 Peturusa 3:18) Ano konyima zoyivike yongandi, Jesus ta tengura meguru, ‘makura yiyo ga ka hingilire korulyo rwaKarunga,’ nokukandindira Karunga a mu ture a kare Hompa.—Vahebeli 10:12, 13.

22. Yisinke ngatu ka gwana morwa Jesus ga limburukwire oGuhwe?

²² Morwa Jesus ga limburukwire oGuhwe, ngatu ka gwana mwenyo gwanarunye moparadisa pevhu, moomu ga yi tumbwidira Jehova. Megaununo lyokukwama ko ngatu ka zogera omu nomfa daJesus da gava mpito kwetu yipo tu ka gwane mwenyo gwanarunye.