1, 2. (a) Be ng’eyo nying ng’at mong’ere ahinya nyiso ni ing’eye maber? Ler ane. (b) Gin paro mage ma ji nigo e wi Yesu?

NITIE ji mang’eny mong’ere ahinya e piny ngima. Nyalo bedo ni ing’eyo nying ng’at moro mong’ere ahinya. Kata kamano, ng’eyo ang’eya nying ng’atno ok nyis ni ing’eye maber. Mano ok nyis ni ing’eyo gimoro amora ma timore e ngimane kata kaka kite chalo.

² Nyalo bedo ni isewinjo weche moko e wi Yesu Kristo kata obedo ni ne odak e piny ka higni ma dirom 2,000 mosekalo. Kata kamano, ji mang’eny ok ong’eyo ni Yesu ne en ng’at ma chalo nade kuom adier. Jomoko wacho ni ne en mana ng’at maber, moko to wacho ni ne en janabi, to moko wacho ni en Nyasaye. In to iparo nade?​—Som Weche Momedore namba 12.

3. Ang’o momiyo dwarore ni ing’e Nyasaye kod Yesu Kristo?

³ Dwarore ahinya ni ing’e adiera e wi Yesu. Nikech ang’o? Muma nyisowa niya: “Ka ng’ato ong’eyi, in Nyasaye makende mar adier kod jal ma ne ioro Yesu Kristo, to en gi ngima ma nyaka chieng’.” (Johana 17:3) Inyalo yudo ngima ma nyaka chieng’ e paradiso ka ing’eyo adiera e wi Jehova kod Yesu. (Johana 14:6) Bende, ng’eyo Yesu biro konyi ng’eyo kaka inyalo dak kod ng’eyo gik monego itimne jomoko. (Johana 13: 34, 35) E Sula mokwongo, ne wapuonjore adiera e wi Nyasaye. Koro wadwaro nono gima Muma puonjo e wi Yesu.

4. Weche motigo ni “Mesia” kod “Kristo” tiendgi ang’o?

⁴ Higni mang’eny ka ne pok onyuol Yesu, Jehova nosingo ni ne odhi oro Mesia, tiende ni Kristo. “Mesia” en wach mowuok e dho Hibrania to “Kristo” owuok e dho Grik. Tiend nyinge ariyogi nyiso ni Nyasaye ne dhi yiero ng’ato kendo wire gi mo mondo omiye migawo makende. Mesia biro miyo singo duto mag Jehova ochop kare. Yesu nyalo konyi gie sani. Kata kamano, ka ne pok onyuol Yesu, ji mang’eny ne penjore niya, ‘En ng’ano ma biro bedo Mesia?’

5. Be jopuonjre Yesu noyie ni Yesu e Mesia?

⁵ Jopuonjre Yesu nong’eyo maler ni Yesu e Mesia ma nosingi. (Johana 1:41) Kuom ranyisi, Simon Petro nowacho ne Yesu niya: “In e Kristo.” (Mathayo 16:16) Ere kaka wanyalo bedo gadier ni Yesu e Mesia?

6. Ang’o ma Jehova notimo mondo okony joma chunygi ni kare fwenyo Mesia?

⁶ Ka ne pok onyuol Yesu, Nyasaye ne otelo ne jonabine mondo gindik weche ma ne dhi konyo ji fwenyo Mesia. Mano ne dhi konyo nade? Wawach ni okwayi ni idhi e stej mar mtokni mondo irom ne ng’at ma ne pok inenoga nyaka nene. Ka po ni onyisi kaka ng’atno chalo, donge nyalo bedoni mayot fwenye? E yo ma chal kamano, Jehova ne otiyo gi jonabine mondo onyiswa gik ma Mesia ne dhi timo kod gik ma ne dhi timorene. Neno kaka gik ma ne okorgo nochopo, konyo joma chunygi ni kare ng’eyo ni Yesu e Mesia.

7. Gin weche ariyo mage ma nokor ma nyiso ni Yesu e Mesia?

 ⁷ We wanon ane ariyo kuom weche ma ne okorgo. Mokwongo, higni 700 ka ne pok onyuol Yesu, Mika nokoro ni Mesia ne idhi nyuol e taon matin miluongo ni Bethlehem. (Mika 5:2) Kanyo e kama ne onyuolie Yesu! (Mathayo 2:1, 3-9) Mar ariyo, Daniel ne okoro ni ne idhi fweny Mesia e higa mar 29 B.K. (Daniel 9:25) Magi gin mana ariyo kuom weche mang’eny ma ne okor ma nyiso maler ni Yesu e Mesia ma nosingi.​—Som Weche Momedore namba 13.

8, 9. Ang’o ma notimore chieng’ ma ne obatis Yesu ma nyiso ni en e Mesia?

⁸ Jehova nonyiso maler ni Yesu e Mesia. Nyasaye nosingo ni obiro miyo Johana Jabatiso ranyisi moro ma ne dhi konye fwenyo Mesia. Johana noneno ranyisino ka ne Yesu odhi ire mondo obatise e Aora Jordan e higa mar 29 B.K. Muma nyisowa gima notimore niya: “Bang’ ka nosebatise, Yesu noa e pi, eka polo noyawore kendo noneno roho mar Nyasaye ka biro kuome e kit akuru. Dwol moro bende noa e polo ka wacho niya: ‘Ma en Wuoda ma ahero kendo ma amorgo.’” (Mathayo 3:16, 17) Ka ne Johana oneno ranyisino kendo winjo dwolno, nofwenyo ni kare Yesu e Mesia. (Johana 1:32-34) Chieng’no, Jehova noolo roho mare kuom Yesu mobedo Mesia. En e ng’at ma  Nyasaye noseyiero mondo obed Jatelo kendo Ruoth.​—Isaya 55:4.

⁹ Weche ma nokor e Muma, weche ma Jehova owuon nowacho, kod ranyisi ma nochiwo, nyiso maler ni Yesu e Mesia. Kata kamano, Yesu noa kanye, to ne en ng’at ma chal nade? Wanon ane gima Muma wacho kuome.

10. Ang’o ma Muma puonjo e wi ngima Yesu ka ne pok obiro e piny?

¹⁰ Muma puonjo ni Yesu ne odak e polo kuom higni mang’eny ka ne pok obiro e piny. Mika nowacho ni Mesia “kar chakruokne osebedoe nyaka nene.” (Mika 5:2) Yesu owuon nowacho ni ne odak e polo ka ne pok onyuole e piny ka. (Som Johana 3:13; 6:38, 62; 17:4, 5.) Yesu ne nigi winjruok makende gi Jehova kata ka pok nobiro e piny.

11. Ang’o momiyo Jehova ohero Yesu ahinya?

¹¹ Jehova ohero Yesu ahinya. Nikech ang’o? Nikech en e ma Nyasaye nokwongo chueye ka pok ochueyo gimoro amora kata ng’ato ang’ata. Mano e momiyo iluongo Yesu ni “jal makayo kuom chuech duto.” * (Jo-Kolosai 1:15) Gimachielo momiyo Jehova ohero Yesu en nikech ne ochueyo Yesu gi lwete owuon. Mano e momiyo iluonge ni “Wuode ma miderma.” (Johana 3:16) Yesu kende e ma Jehova notiyogo e chueyo gik mamoko duto. (Jo-Kolosai 1:16) Bende, Yesu kende e ma iluongo ni “Wach,” nikech Jehova tiyo kode mondo ochiw ote kod puonj ne malaike kod dhano.​—Johana 1:14.

12. Ang’o ma konyowa ng’eyo ni Yesu gi Nyasaye ok en ng’at achiel?

¹² Jomoko paroga ni Yesu gi Nyasaye gin ng’at achiel. Kata kamano, mano ok e gima Muma puonjo. Muma puonjo ni nochue Yesu, omiyo en gi chakruok mare. Jehova Nyasaye ma nochueyo gik moko  duto, to onge gi chakruok. (Zaburi 90:2) Onge kama Yesu Wuod Nyasaye nosetemoe ketre ni en Nyasaye. Muma nyiso maler ni Wuoro duong’ moloyo Wuowi. (Som Johana 14:28; 1 Jo-Korintho 11:3.) Jehova kende e “Nyasaye Manyalo Duto.” (Chakruok 17:1) En e ma oduong’ie moloyo kendo en e ma en gi teko moloyo chuech moro amora e polo gi piny.​—Som Weche Momedore namba 14.

13. Ang’o momiyo Muma wacho ni Yesu e “kido mineno mar Nyasaye ma ok ne”?

¹³ Jehova kod Yesu Wuode notiyo kanyachiel kuom higni bilionde ka pok ochue polo gi piny. Nyaka bed ni ne giherore ahinya! (Johana 3:35; 14:31) Yesu nokawo kit Wuon-gi ndi! To mano e momiyo Muma wacho ni en e “kido mineno mar Nyasaye ma ok ne.”​—Jo-Kolosai 1:15.

14. Yesu Wuod Nyasaye nonyuol kaka dhano e yo mane?

¹⁴ Yesu Wuod Nyasaye nochiwore wuok e polo mondo obi onyuole kaka dhano e piny ka. Ere kaka mano ne otimore? Jehova nogolo Yesu e polo ma okete e i Maria e yor hono. Mano e momiyo Yesu onge gi wuon mare ma dhano e piny ka. Omiyo, Maria nonyuolo wuoyi ma onge richo moluonge ni Yesu.​—Luka 1:30-35.

15. Ang’o ma nyalo konyi ng’eyo Jehova e yo maber?

¹⁵ Inyalo puonjri mathoth e wi ngima Yesu kod kido ma en-go e buge mag Mathayo, Mariko, Luka, kod Johana. Bugego iluongo ni buge mag Injili. Nikech Yesu chal gi Wuon-gi, gik ma ibiro somo kuome biro konyi ng’eyo Jehova e yo maber. Mano e  momiyo Yesu ne nyalo wacho niya: “Ng’at ma osenena, oseneno Wuoro bende.”​—Johana 14:9.

16. Yesu ne opuonjo wach mane? Nogolo puonjgo kanye?

¹⁶ Ji mang’eny ne luongo Yesu ni “Japuonj.” (Johana 1:38; 13:13) Achiel kuom gik madongo ma ne opuonjo ne en “wach maber mar Pinyruoth.” Pinyruodhno en ang’o? En sirkand Nyasaye manie polo ma biro locho e wi piny duto kendo ma biro kelo gueth ne joma luwo chike Nyasaye. (Mathayo 4:23) Gimoro amora ma Yesu ne puonjo ne oa kuom Jehova. Yesu owuon nowacho niya: “Weche ma apuonjo ok gin maga, to gin mag ng’at ma ne oora.” (Johana 7:16) Yesu nong’eyo ni Jehova dwaro mondo ji duto owinj wach maber mar Pinyruoth ma biro locho e wi piny.

17. Yesu ne puonjo kanye? Ang’o momiyo notiyo matek mondo opuonj jomoko?

¹⁷ Yesu ne puonjo kanye? Kamoro amora ma ne ji nitie. Nopuonjo e mier, taonde, gwenge, chirni, kuonde ma ji leme, kod ute ji. Ne ok orit mondo ji obi ire. Ne odhi kama gintiere. (Mariko 6:56; Luka 19:5, 6) Yesu notiyo matek kendo nokawo thuolone mang’eny mondo opuonj ji. Ang’o momiyo notimo kamano? En nikech nong’eyo ni mano e gima Nyasaye dwaro ni otim, kendo nodwaro nyiso ni owinjo Wuon mare kinde duto. (Johana 8:28, 29) Bende, Yesu ne yalo nikech nokecho ji. (Som Mathayo 9:35, 36.) Nofwenyo ni jotend dinde ne ok puonj adiera e wi Nyasaye kod Pinyruodhe. Omiyo, ne odwaro konyo ji mang’eny kaka nyalore mondo giwinj wach maber.

18. Gin kido mage ma Yesu nigo mihero ahinya?

 ¹⁸ Yesu nohero ji kendo nodewogi. Ne omuol kendo wuoyo kode ne yot. Kata mana nyithindo bende nohero dhi ire. (Mariko 10:13-16) Yesu nohero timbe makare. Ne ok ohero mibadhi kendo ne ok obuon ji. (Mathayo 21:12, 13) Yesu ne odak e kinde ma ne orid ne mon chike kendo ne ok migi luor. Kata kamano, Yesu to ne miyo mon luor. (Johana 4:9, 27) Bende, Yesu ne en ng’at ma bolore. Kuom ranyisi, chieng’ moro godhiambo ne oluoko tiende jootene. Mano ne en gima wasumbni e ma ne timoga.​—Johana 13:2-5, 12-17.

19. En ranyisi mane ma nyiso ni Yesu nong’eyo gadier gik ma ji dwaro kendo ni noikore konyogi?

¹⁹ Yesu nong’eyo gik ma ji dwaro kendo noikore mar konyogi. Mano nonenore maler e kinde ma nochango ji e yor hono kotiyo gi teko Nyasaye. (Mathayo 14:14) Kuom ranyisi, ng’at moro ma ne nigi tuo mar dhoho nodhi ir Yesu mosaye niya: “Kidwaro, to mi abed maler.” Yesu noneno ne ng’atno lit nikech rem kod chandruok ma ne en-go. Yesu ne dwaro konye. Omiyo, norieyo luete momule mowachone niya: “Ee, adwaro! Bed maler.” Jal ma ne nigi tuo mar dhohono, nochango gi kanyo! (Mariko 1:40-42) Temie paro kaka jalno nowinjo!

20, 21. Yesu noketo ranyisi maberie moloyo mar luoro Nyasaye e yo mane?

²⁰ Yesu e ma oseketoe ranyisi maberie moloyo mar luoro Nyasaye. Noluwo chike Wuon mare kata mana  e sama timo kamano ne ok yot. Kuom ranyisi, ne ok otimo richo sama Satan ne teme. (Mathayo 4:1-11) Moko kuom joodgi ne ok oyie ni en e Mesia kendo ne giwacho ni “wiye osekethore,” to e ma pod Yesu ne ok oweyo tiyo ne Nyasaye. (Mariko 3:21) Ka ne jowasike sande, ne ok ochulo kuor nikech nodwaro luwo chik Nyasaye.​—1 Petro 2:21-23.

²¹ Yesu norito chike Jehova kata mana e sa ma ne isande malit kod sa ma ne otho tho malit. (Som Jo-Filipi 2:8.) Parie lit ma ne owinjo e odiechieng’ ma ne onege. Ne omake, ne oriambne ni ochayo Nyasaye, jong’ad bura ma jo mibadhi ne ong’adone bura e yo ma ok kare, ji nonyiere, askeche nogoye kendo  ne gigure e yath. Sama notho noywak niya: “Duto oserumo!” (Johana 19:30) Bang’ ndalo adek, Jehova nochiero Yesu ma omiye del mar roho. (1 Petro 3:18) Bang’ jumbe moko, Yesu ne odok e polo “mi ne obet piny e bad Nyasaye korachwich,” korito mondo Nyasaye okete Ruoth.​—Jo-Hibrania 10:12, 13.

22. Bedo ni Yesu norito chike Wuon mare miyo wabedo gi geno mane sani?

²² Nikech Yesu norito chike Wuon mare, koro wan gi geno mar dak e Paradiso ma nobed e piny ka nyaka chieng’ mana kaka Jehova nosesingo. E sula ma luwo mae wabiro nono kaka tho mar Yesu miyo wabedo gi geno mar dak nyaka chieng’.