1, 2. (a) No wĩthĩrwe wijĩ bwega muntũ ũrĩ ĩgweta kethĩra wijĩ akĩ riĩtwa rwawe? Taarĩria. (b) Nĩatĩa antũ betĩkĩtie bwegiĩ Jesũ?

 KWĨNA antũ babaingĩ barĩ ĩgweta nthĩgũrũne. No wĩthĩrwe wijĩ riĩtwa rĩa muntũ ũrĩ ĩgweta mono. Ĩndĩ tontũ nĩ wijĩ akĩ riĩtwa rĩawe, tĩkuuga nũmwijĩ bwega. Tĩkuuga nĩ wijĩ mantũ jonthe jegiĩ ũtũũro bwawe, na ũrĩa bungwa akari.

² No wĩthĩrwe wĩgĩtue gũkonia Jesũ Kristũ, kinya kethĩra aatũũraga nthĩgũrũne ta mĩaka 2,000 mĩthiru. Ĩndĩ babaingĩ batijĩ ũrĩa Jesũ aakari arĩ muntũ. Bamwe baugaga aarĩ muntũ ũmwega, bangĩ bakauga aarĩ kĩroria, na kinya bamwe betĩkĩtie we nĩ Mũrungu. Ũũgwe ũthũgaanagia atĩa?—Tega Nteto Irĩa irĩ Mũthia, 12.

3. Nĩkĩ bũrĩ ũntũ bwa bata ũmenye Jehova Mũrungu na Jesũ Kristũ?

³ Nĩ ũntũ bwa bata ũmenye ũmma bwegiĩ Jesũ. Nĩkĩ? Bibiria ĩtwĩraga: ‘Na mwoyo jwa kenya na kenya ni-ri, ni bamenye Gwe uri Murungu wa mma, na bamenye uria watumire, nawe niwe Jesu Kristo.’ (Johana 17:3) Nĩ mma, ũkamenya ũmma bwegiĩ Jehova na Jesũ, no ũtũũre kenya na kenya paradiso nthĩgũrũne. (Johana 14:6) Kinya kũmenya gũkonia Jesũ, gũgagũteethia tontũ nĩwe ngerekano ĩnjega buru ya ũrĩa ũũmba gũtũũra na kũthithĩria bangĩ. (Johana 13:34, 35) Kĩthoomone kĩa 1, twairitanĩre  ũmma bwegiĩ Mũrungu. Nandĩ tũkairitana ũrĩa Bibiria ĩritanaga bwegiĩ Jesũ.

4. Biugo “Mesia” na “Kristo” nĩ kuuga atĩa?

⁴ Mĩaka ĩmiingĩ mbere Jesũ aciarwa, Jehova neekĩte wĩrane Bibiriene atĩ arĩngĩtũma Mesia, kana Kristũ. Riĩtwa “Mesia” riumanĩtie na mũgambo jwa Kĩhibirania, narĩo “Kristo” riumanĩtie na Kĩgiriki. Mariĩtwa jau jojaĩrĩ ja gĩtĩĩo, nĩ kuuga Mũrungu arĩngĩthuura Mũthuure waawe ũrĩa weranĩri na amwee ngũgĩ ya mwanya. Mesia agatũma mawĩrane jonthe ja Mũrungu joojũre. Jesũ oomba gũgũteethia kinya nandĩ. Ĩndĩ mbere ya Jesũ aciarwa, babaingĩ nĩbarigaraga ‘Nũũ we ũkaa Mesia?’

5. Aritwa ba Jesũ-rĩ, nĩbeetĩkĩtie Jesũ nĩwe Mesia?

⁵ Aritwa ba Jesũ bataarĩ na nkaanja nĩwe Mesia ũrĩa weranĩri. (Johana 1:41) Ngerekano, Simioni Petero eerĩre Jesũ: “Gwe nigwe Kristo.” (Mathayo 16:16) Nĩatĩa tũũmba kwĩthĩrwa na mma Jesũ nĩwe Mesia?

6. Nĩatĩa Jehova aatetherie antũ ba nkoro injega kũmenya Mesia?

⁶ Mĩaka ĩmiingĩ mbere ya Jesũ aciarwa, iroria bia Mũrungu nĩbiaandĩkĩre mantũ jamaingĩ jarĩa jarĩngĩteethia antũ kũmenya Mesia. Bũu bũrĩngĩteethia atĩa? Ũthũgaania ũtũmi stĩnji kũthagaana muntũ ũtaatirimana nawe kaĩrĩ. Ũkeerwa bwega ũrĩa muntũ ũu akari, no ũmũmenye na mpwĩ. O ta ũu, Jehova aatumĩĩre iroria biawe gũtwĩra ũrĩa Mesia arĩngĩthithia na ũrĩa kũrĩngĩkarĩka kĩrĩ we. Kũũjũrua kwa moororia jau nĩgũteethagia antũ ba nkoro injega kũmenya Jesũ nĩwe Mesia.

7. Nĩ moororia jarĩkũ jaĩrĩ jarikithagia atĩ Jesũ nĩwe Mesia?

 ⁷ Tiga twone moororia jaĩrĩ kĩrĩ jau. Bwa mbere, mĩaka 700 mbere ya Jesũ gũciarwa, Mika naaroretie Mesia arĩngĩciarĩrwa gataũnine kaniini ka Bethilehemu. (Mika 5:2) Na kũu kungwa nĩku Jesũ aaciarĩĩrwe! (Mathayo 2:1, 3-9) Bwa jaĩrĩ, Danieli aaroretie atĩ Mesia arĩngĩĩja mwakene jwa 29 M.J. (Danieli 9:25) Jaja nĩ moororia jaĩrĩ akĩ kĩrĩ jamaingĩ jarĩa joonanĩtie cararũkũ Jesũ nĩwe Mesia ũrĩa weranĩri.—Tega Nteto Irĩa irĩ Mũthia, 13.

8, 9. Rĩrĩa Jesũ aabatithagua, nĩatĩa gwakarĩkĩre kũrikithia nĩwe Mesia?

⁸ Jehova nonanĩtie bwega buru atĩ Jesũ nĩwe Mesia. Mũrungu neekĩre wĩrane akaa Johana Mũbatithania rwano rũrĩa rũrĩngĩtũma amenya Mesia. Rĩrĩa Jesũ eetĩre kũbatithua nĩ Johana Mũurone jwa Jorodani mwakene jwa 29 M.J., Johana noonere rwano rũu. Bibiria nĩtwĩraga ũrĩa gwakarĩkĩre: ‘Na Jesu aathiria kubatithua, o ndiu aroona kirundu kia Murungu kiinamite ta kijea, kirakinya iguru riawe. Na atiri, kaju karauma iguru gakiugaga, Uju niwe Mutana wakwa uria mpendete mono, uria ngwiragua niwe.’ (Mathayo 3:16, 17) Rĩrĩa Johana aaigĩrue na aroona rwano rũu, naamenyere Jesũ nĩwe Mesia. (Johana 1:32-34) Ntukũ ĩu, Jehova arĩkũmwĩtũũrĩra kĩrundu kĩawe, nĩrĩo aaere Mesia. Nĩwe Mũrungu  aathuurĩte aa Mũtongeeria na Mũnene.—Isaya 55:4

⁹ Moororia ja Bibiria, biugo bia Jehova wengwa, na rwano rũrĩa aaejanĩre ĩgiitene rĩa kũbatithua kwa Jesũ, birikithagia Jesũ nĩwe Mesia. Ĩndĩ-rĩ, nĩkũ Jesũ aaumĩre, na aarĩ muntũ ũkari atĩa? Tiga twone ũrĩa Bibiria yugaga.

10. Bibiria ĩritanaga atĩa bwegiĩ ũtũũro bwa Jesũ mbere ya kwĩja nthĩgũrũne?

¹⁰ Bibiria ĩritanaga Jesũ aatũũraga ĩgũrũ ĩgiita rĩraaja mbere ya kwĩja nthĩgũrũne. Mika aaugĩre Mesia nĩ wa “kuuma karaja mono.” (Mika 5:2) Jesũ wengwa aaugĩre maita jamaingĩ atĩ aatũũraga ĩgũrũ mbere ya gũciarwa arĩ muntũ. (Thooma Johana 3:13; 6:38, 62; 17:4, 5.) Kinya mbere ya kwĩja nthĩgũrũne, Jesũ aarĩ na ngwatanĩro ya mwanya mono na Jehova.

11. Nĩkĩ Jesũ eendi mono nĩ Jehova?

¹¹ Jesũ nendi mono nĩ Jehova. Nĩkĩ? Tontũ Mũrungu aamũũmbĩre mbere ya into bionthe, na mbere ya bangĩ bonthe. Kwou Jesũ etagwa ũrĩa “waciarirwe ari kiranga mbere into bionthe bitiroombwa.” a (Akolosai 1:15) Kaĩrĩ Jesũ nendi mono nĩ Jehova tontũ nĩwe wenka Jehova oombĩre ĩmwe kwa ĩmwe. Nĩkĩo etagwa “Mutanowe-wa-mumwe.” (Johana 3:16) Na Jesũ nĩwe wenka Jehova aatumĩĩre kũũmba into bingĩ bionthe. (Akolosai 1:16) Na Jesũ nĩwe wenka wĩtagwa “Ruteto,” tontũ Jehova naamũtumĩĩre kwejana ntũmwa na mataaro kĩrĩ araĩka na antũ.—Johana 1:14.

12. Nĩatĩa tũkũmenya Jesũ na Mũrungu tĩ muntũ ũmwe?

¹² Antũ bamwe betĩkĩtie Jesũ na Mũrungu nĩ muntũ ũmwe. Ĩndĩ tĩu Bibiria ĩritanaga. Bibiria yugaga Jesũ neka oombĩrwe, na kũu nĩ kuuga ena mwambĩrĩrio. Ĩndĩ Jehova, ũrĩa woombĩre into bionthe ataarĩ na kĩambĩrĩria. (Zaburi 90:2) Arĩ Mũtaana wa  Mũrungu, gũtĩrĩo Jesũ aageria kwaa Mũrungu. Bibiria ĩritanaga cararũkũ atĩ Baaba nĩwe mũnene nkũrũki ya Mũtaana. (Thooma Johana 14:28; 1 Akorintho 11:3.) Jehova wenka nĩwe “Mwene-Inya-Yonthe.” (Kiambiriria 17:1) Nĩwe ũrĩa mũnene na ũrĩ inya nkũrũki, ĩgũrũ na nthĩ.—Tega Nteto Irĩa irĩ Mũthia, 14.

13. Nĩkĩ Bibiria yugaga Jesũ “niwe ung’uanene na Murungu uria utionekaga”?

¹³ Jehova na Mũtaanowe, Jesũ, baaritanĩĩrie ngũgĩ amwe mambirioni ja mĩaka mbere ya ĩgũrũ na nthĩ kũũmbwa. No mwanka bethĩrwe nĩbendanĩĩte mono! (Johana 3:35; 14:31) Jesũ naaigerekanĩrie na nkuma injega cia ĩthe bwega mono, mwanka Bibiria ĩmwĩtaga ũrĩa “ung’uanene na Murungu uria utionekaga.”—Akolosai 1:15.

14. Nĩatĩa kwombĩkĩre Mũtaana wa bata wa Mũrungu aciarwa arĩ muntũ?

¹⁴ Mũtaana wa bata wa Jehova naaciendeere wengwa kuuma ĩgũrũ na gũciarwa nthĩgũrũne arĩ muntũ. Bũu bwombĩkĩre atĩa? Jehova na njĩra ya kĩama, aathaamĩrie mwoyo jwa Mũtaanowe kuuma ĩgũrũ, mwanka kĩune kĩa mwarĩ bikira wetagwa Maria. Tontũ bũu, Jesũ ataarĩ na ũbatu bwa kwĩthĩrwa na ĩthe mũmũciari wa kĩnthĩgũrũ. Kwou, Maria aaciarĩre mũtaana ũmũũjũru, na aramwĩta Jesũ.—Luka 1:30-35.

15. Nĩatĩa ũũmba kũmenya Jehova bwega?

¹⁵ No wiritane nkũrũki bwegiĩ Jesũ, ũtũũro bwawe, na nkuma ciawe na njĩra ya kũthooma mauku ja Bibiria ja Mathayo, Mariko, Luka, na Johana. Tontũ Jesũ  akari ta Ĩthe, kinya kĩrĩa ũkathooma kĩgagũteethia kũmenya Jehova. Nĩkĩo gĩatũmĩre Jesũ auga: “Muntu uria umbonete ni noonete Baaba.”—Johana 14:9.

16. Nĩatĩa Jesũ aaritanaga? Nĩkũ mooritani ja Jesũ jaaumaga?

¹⁶ Antũ babaingĩ beetaga Jesũ “Muritani.” (Johana 1:38; 13:13) Bũmwe bwa mantũ ja gĩtũmi nkũrũki jarĩa Jesũ aaritanaga, bwaarĩ ‘nkuma injega ya Unene.’ Ũnene bũu nĩmbi? Nĩ thirikarĩ ya Mũrungu ĩrĩa ĩkaatha nthĩgũrũ yonthe kuuma ĩgũrũ, na ĩretere barĩa baathĩkagĩra Mũrungu itharimo bibiingĩ. (Mathayo 4:23) Mantũ jonthe jarĩa Jesũ aaritanaga jaumaga kĩrĩ Jehova. Jesũ aaugĩre: “Nteto iria nditanaga ti ciakwa, ni cia uria wantumire.” (Johana 7:16) Jesũ naaijĩ Jehova endaga antũ bonthe baigua nkuma ĩnjega, atĩ Ũnene bwa Mũrungu bũkaatha nthĩgũrũ yonthe.

17. Nĩkũ Jesũ aaritanaga? Nĩkĩ aaciũmagia mono kũritana bangĩ?

¹⁷ Nĩkũ Jesũ aaritanaga? Naarĩa kunthe eethagĩra antũ. Aaritanaga miundene, o na kinya taũnine, ntũũrene, thokoone, iromberone, na nja cia antũ. Ateerĩgagĩĩra antũ beja kĩrĩ we, ĩndĩ kaingĩ nĩwe wetaga kĩrĩ bo. (Mariko 6:56; Luka 19:5, 6) Jesũ aaritĩre ngũgĩ na wĩru, na atumĩra inya na kagiita kaawe akĩritanaga antũ. Nĩkĩ? Tontũ naaijĩ atĩ Mũrungu eendaga athithia ũu, na rĩonthe naathĩkagĩra Ĩthe. (Johana 8:28, 29) Jesũ kinya aatũmagĩĩria tontũ naaigagĩĩrua antũ kĩao. (Thooma Mathayo 9:35, 36.) Noonaga atongeeria ba ndini bataaritanaga ũmma bwegiĩ Mũrungu na Ũnene bwawe. Kwou eendaga gũteethia babaingĩ ũrĩa kũũmbĩka kwigua nkuma iu njega.

18. Nĩ nkuma irĩkũ cia Jesũ wendete mono?

 ¹⁸ Jesũ aarĩ muntũ wendeete antũ na kũbamakĩra. Aarĩ ũmwega na gũtoomi kwaria nawe. Kinya twaana nĩtweendete gũkarania nawe. (Mariko 10:13-16) Jesũ aathithagia na njĩra ya ĩota rĩonthe. Naathwĩre nkukumo na waagi ĩota. (Mathayo 21:12, 13) Aatũũraga ĩgiita rĩrĩa antũaka baainyagĩĩrua na bataejagwa gĩtĩĩo. Ĩndĩ Jesũ rĩonthe aabathithagĩria na njĩra ya gĩtĩĩo. (Johana 4:9, 27) Kamma Jesũ nainyiĩtie. Ngerekano, ũgoro bũmwe naathambĩrie aritwa baawe magũrũ, ũntũ bũrĩa kaingĩ bwathithagua nĩ nkombo.—Johana 13:2-5, 12-17.

19. Nĩ ngerekano ĩrĩkũ ĩkwonania Jesũ naaijĩ moobatu ja antũ kamma, na neendaga kũbateethia?

¹⁹ Jesũ naaijĩ kamma ũbatu bwa antũ, na neendaga kũbateethia. Ũntũ bũũ nĩbwonekanĩre bwega buru rĩrĩa aatumagĩra inya ya Mũrungu, kworia antũ na njĩra ya kĩama. (Mathayo 14:14) Ngerekano, ntomũrũme ũmwe waarĩ na mũtigiri eejĩre kĩrĩ Jesũ aramwĩra atĩrĩ: “Ethirwa nukwenda womba kumboria.” Jesũ naaringithĩrue tontũ bwa rwaakaĩ na kũthangĩka kwa ntomũrũme ũu. Aamwigĩĩrue kĩao na areenda kũmũteethia. Kwou Jesũ aratambũrũkia njara yaawe, aramũringithia, aramwĩra: “Ninkwenda wore.” Na ntomũrũme ũu waajĩtue aroora! (Mariko 1:40-42) Ũthũgaania ũrĩa muntũ ũu aaigĩrue!

20, 21. Nĩatĩa Jesũ arĩ ngerekano ĩnjega buru ya kwathĩkĩra Mũrungu?

²⁰ Jesũ nĩwe ngerekano ĩrĩa njega buru ya kwathĩkĩra Mũrungu. Gũtĩkũmakania ũrĩa gwaakarĩkĩre, kana  ũrĩa anthũ baawe baamũthithĩrie, aarĩ mwĩtĩkua kĩrĩ Ĩthe. Ngerekano, Jesũ ataathithĩrie wĩyia rĩrĩa Shaitani aamũgeragia. (Mathayo 4:1-11) Antũ bamwe ba nja ya Jesũ bateetĩkagia nĩwe Mesia, baaugaga “gaakuuma nthu,” ĩndĩ Jesũ eetĩre na mbere kũrita ngũgĩ ya Mũrungu. (Mariko 3:21) Rĩrĩa anthũ baawe baamũthithĩĩrie bũthũũku, Jesũ aakarĩre arĩ mwĩtĩkua kĩrĩ Mũrungu, na ataageria kũrwa nabo.—1 Petero 2:21-23.

²¹ Kinya rĩrĩa Jesũ aakujaga gĩkuũ kĩa rwaakaĩ, aakarĩre arĩ mwĩtĩkua kĩrĩ Jehova. (Afilipi 2:8) Ũthũgaanĩria jonthe jarĩa aũmĩrĩĩrie ntukũ ĩrĩa aakuĩre. Jesũ naagwatĩrwe, akũũjĩ ba ũrongo bauga akũruma Mũrungu, agaambi ba ũrongo bamũtuĩra ĩgamba bũthũũku, kĩrĩndĩ kĩramũthekera, askarĩ baramũnyamaaria na  baramũcuuria mũtĩne. Rĩrĩa aakujaga aaugĩre na kajũ gakanene: “Bukuujura!” (Johana 19:30) Ntukũ ithatũ nyuma ya Jesũ gũkua, Jehova naamũriũkĩrie na aramwaa mwĩrĩ jwa gĩkĩrundu. (1 Petero 3:18) Nyuma ya biumia biikai, Jesũ naacookere ĩgũrũ, ‘arakara nthi njarene ya urio ya Murungu,’ na areteera Mũrungu amweethie Mũnene.—Ahibirania 10:12, 13.

22. Twĩna kaanya karĩkũ tontũ Jesũ naaere mwĩtĩkua kĩrĩ Ĩthe?

²² Tontũ Jesũ naeere mwĩtĩkua kĩrĩ Ĩthe, nandĩ twĩna kaanya ga gũtũũra kenya na kenya paradiso nthĩgũrũne, o ta ũrĩa mworoto jwa Jehova jwarĩ. Kĩthoomone kĩrĩa kĩthingatĩte, tũkaarĩĩria ũrĩa gĩkuũ kĩa Jesũ gĩtũũmbithagia gũtũũra kenya na kenya.