1, 2. (a) ǂAnǂansa khoe-e amabes ǃnâ ǂan î du a ǁî-i ǀons ǀguisa du ga ǂan o? Mîǃgāǃgā re. (b) Khoena tae-e Jesub xa ra ǂgom?

ǃHŪBAIB ǃnân ge ǂgui ǂanǂansa khoena hâ. ǀNîsi du ge ǂanǂansa khoe-e ǁî-i di ǀons ai a ǂan. Xawe ǁî-i di ǀonsa du ǂan ǃkhais ǃaroma du ge a mî ǁoa, ǁî-e du ǃgâise a ǂan ti. Nēs ge ǂâibasen tama hâ ǃnāsase du ǁî-i di ûib xa a ǂan tsî mati i ǁî-e amabes ǃnâ īs tsîna.

² Sadu ge ǀnîsi Jesub Xristub xa ge ǁnâu, hîna ge 2 000 kurigu ǃkharu hâse ǃhūbaib ai hâ ība. Xawe ǃnāsa khoen ge a ǀū Jesub ge tae ǃnôa khoe īsa. ǀNîn ge ra mî, ǁîb ge ǃgâi khoe-i, kēbo-ao-i tsî ǀnîn ge ra ǂgom ǁîb a Elo ǃkhaisa. Sado tae-e ra ǂâi?—12ǁÎ ǀArosa ǃgāsasiba mû re.

3. Tae-i ǃaroma i a ǂhâǂhâsa Jesub xa hâ amaba ǁkhāǁkhāsensa?

³ Kaise i ge a ǂhâǂhâsa Jesub xa hâ amaba ǂansa. Mati i io? Elobmîs ge ra mîba da: “Tsî nēb ge ǀamo ûiba, sats ǀguise ama-ai Elots, tsî sats ge sîb Jesub Xristub onan nî ǂan ǃkhaisa.” (Johaneb 17:3) Î, Jehovab tsî Jesub xa hâ amaba du ga ǂan o, o du ge paradais ǃhūbaib ai ǀamosib kōse a ûi ǁkhā. (Johaneb 14:6) Jesub xa ǂans ge nî hui du, ǃgâi aiǁgausab ge ǁgau da amaga mati da nî ûis tsî nau khoen ǀkha da nî sîsenǁae ǀgaus tsîna. (Johaneb 13:34, 35) ǂGuro danaǃâs ǃnâ da ge go ǁkhāǁkhāsen Elob xa hâ amaba. Nēsi da ge nî ǁkhāǁkhāsen Elobmîs tae-e Jesub xa ra ǁkhāǁkhāsa.

4. “Mesiab” tsî “Xristub” di hâ ǂgaiǀonra tae-e ra ǂâibasen?

⁴ ǂGui kurigu Jesub nî ǃnaehes aiǃâb ge Jehovaba Elobmîs ǃnâ ge mîmâi Mesiab tamas ka io Xristub nî hāsa. “Mesiab” ti hâ mîs ge Hebregowaba xu ra hā tsî “Xristub” ti hâ mîs ge Grikegowaba xu ra hā. Nē ǀgam ǂgaiǀonra ge ra ǂâibasen Elob mîmâisa Mesiaba ǁhûi hâ tsî ǁîba ǀō-aisa ǃharosa nî māsa. Mesiab ge Elob di hoa mîmâide nî ama kai. Sadu ge nēs xa ǃnāsase nî ǁkhāǁkhāsen sao ra danaǃâdi ǃnâ. Sadu tsîn ge nî ǁkhāǁkhāsen matib Jesuba nēsi a hui du ǁkhā ǀgausa. Xawe Jesub nî ǃnaehes aiǃân ge ǂgui khoena gere ǂhâ, ‘hamma nî Mesia ī?’

5. Jesub di ǁkhāǁkhāsabega ǂgom î gu gere ǁîb a Mesia ǃkhaisa?

⁵ Jesub di ǂguro ǁkhāǁkhāsabeb ge ge îganǀgē tama hâ i, ǁîb a mîmâisa Mesia ǃkhaisa. (Johaneb 1:41) Aiǁgause, Simon Petrub ge Jesub ǃoa ge mî: ‘Xristuts . . . kom satsao.’ (Mateub 16:16) Jesub di ǁkhāǁkhāsabegu khami mati da nî ǂan Jesub a Mesia ǃkhaisa?

6. Jehovaba mati ǂhauǃnâ khoena ge hui în Mesiaba ǂanǂui?

⁶ Gaxuǁaeba Jesub nî ǃnaehes aiǃâgu ge Elob kēbo-aoga ǂgui ǃgāsasiba ge xoamâi khoena nî huiba în Mesiaba ǂanǂui. Matis nēsa a hui ǁkhā? Aiǁgause mîhe i ga o, tātsē du sado ûib ǃnâ mû tama hâ khoe-e bēgu ra mâpa sī ū re ti. Khoe-i ga ǃgāsase mîǃāba du tama io, o du ge ǁnā khoe-e hōǁkhā tide. ǁKhā ǀgaub aib ge Jehovaba kēbo-aoga gere sîsenū î gu ǃgāsasiba mā Mesiab tae-e nî dī tsî tae-i ǁîb ǀkha nî īs tsîna. Dīǀoaǀoas nē kēbodi dis ge ǂhauǃnâ khoena ge hui în ǂan Jesub amabes ǃnâ a Mesia ǃkhaisa.

7. Mâ ǀgam kēbora Jesub a mîmâisa Mesiasa ra ǁgaura?

⁷ Nē ra ge ǀgam kēbora. ǂGurose, 700 kurigu Jesub  nî ǃnaehes aiǃâb ge Mixaba ge kēbo Mesiab ǂkhari ǃās Betlehems ǃnâ nî ǃnaehesa. (Mixab 5:1) Tsî Jesub ge ǁnā ǃās ǃnâ ge ǃnaehe! (Mateub 2:1, 3-9) ǀGamǁîse, Danieli ge ge kēbo Mesiab 29ǁî kurib ai nî ǂhaisa. (Danieli 9:25) Nē ra ge ǀgam kēbora ǂguide xu, ǁgau ra de ǃgāsase Jesub a mîmâisa Mesiasa.—13ǁÎ ǀArosa ǃgāsasiba mû re.

8, 9. Tae-e Jesub di ǁāǁnâs tawa ge ī, ǁgau ra-e ǁîb a Mesia ǃkhaisa?

⁸ Jehovab ge ge ǃgāsa kai Jesub a Mesia ǃkhaisa. Elob ge ge mîmâi ǁîb nî Johaneb ǁĀǁnâ-aoba ǁgauǁgausa māsa îb Mesiaba ǂanǂui. Jesub ge Johaneb ǁāǁnâ-aob ǃoa Jordanni ǃāb tawa sī kurib ge ge 29ǁî kuri i tsî Johaneb ge ǁnā ǁgauǁgausa ge mû. Elobmîs ge ra mîba da tae-i ge īsa: “Tsî Jesub ge ǁāǁnâhe, ob ge ǁnātimîsi ǁgamma xu ge ǂoaxa, tsî mû, ǀhomgu ge ge ǁkhowa-amsenba bi, tsîb ge Elob Gagaba ǂnabu-i ase ǁgôaxa tsî ǁîb ǂama ra hāse ge mû. Tsî mû! dom-i ge ǀhomma xu ge ǀkhī, nēti ra mî-e: Nēb ge ti ǀgôab, ǀnam ta aba, ǃgâiǃgâibasensa ta ūǃnâ hâba.” (Mateub 3:16, 17) Johaneb ge mû tsî ǁnâu o nē ǁgauǁgausa, ob ge ge ǂan i Jesub a Mesia ǃkhaisa. (Johaneb 1:32-34) ǁNā tsēs aib ge Jehovaba ǁîb gagaba ǁîb ai ǁhōǂui o, ob ge Jesuba ge Mesia kai. Elob ge ǁîba ge a ǁhûi îb ǂGaeǂgui-ao tsî Gao-ao kai.—Jesajab 55:4.

⁹ Elobmîs kēbodi, Jehovab mîdi tsî ǁgauǁgaus hînab ge Jesub ǁāǁnâs tawa mās ge ra ǁgau Jesub a Mesia  ǃkhaisa. Xawe Jesuba mapa xu ra hā tsî tae ǃnôa khoe ge ība? Hā re î da kē Elobmîs tae-e ra mîsa.

10. Elobmîsa tae-e ra ǁkhāǁkhā Jesub xa ǃhūbaib ǃoab nî hās aiǃâ?

¹⁰ Elobmîs ge ra ǁkhāǁkhā Jesub ge ǀhommi ǃnâ ǁan hâ isa ǃhūbaib ǃoab nî hās aiǃâ. Mixab ge ge mî Mesiab  “hugasa xu” hâsa. (Mixab 5:1) Jesub ǂûb tsîn ge gere mî ǁîb ge ǀhommi ǃnâ ǁan hâ isa khoeseb nî ǃnaehes aiǃâ. (Khomai re Johaneb 3:13; 6:38, 62; 17:4, 5.) ǃHūbaib ǃoab nî hās aiǃâb ge Jesuba ǀō-aisa ǃgaeǀhaosa Jehovab ǀkha ge ūhâ i.

11. Tae-i ǃaromab Jesuba Jehovab di ǀnamǀnamsa ǀgôa?

¹¹ Jesub ge kaise Jehovaba ge ǀnamǀnamsaba i. Tae-i ǃaroma? Elob ge ǁîba hoa xūn aiǃâ kuru amaga. Jesub ge ‘kurusaben hoan di ǂGuroǃnaesabeb’ di ra ǂgaihe. * (Koloseǁîn 1:15) Jesub tsîn ge a ǀnamǀnamsa Jehovab ge ǁîba aitsama kuru amaga. ǁNā-amagab ge ‘ǀguise ǃnae hâ ǀGôab’ di ra ǂgaihe. (Johaneb 3:16) Jehovab ge Jesuba gere sîsenū nau hâ xūn hoana kurus ǀkha. (Koloseǁîn 1:16) Tsî Jesub ǀguib ge “Mîs” di ra ǂgaihe, Jehovab ge ǁîba gere sîsenū amaga îb ǀhomǃgān tsî khoen tsîna haisi-amdi tsî ǁguiǂamdi tsîna mā.—Johaneb 1:14.

12. Mati da a ǂan Jesub tsî Jehovab tsîn ǀgui khoe tamasa?

¹² ǀNî khoen ge ra ǂgom Jesub tsî Elob tsîn a ǀgui khoe ǃkhaisa. Xawe Elobmîs ge ǁnāsa ǁkhāǁkhā tama hâ. Elobmîs ge ra mî Jesub ge kuruhesa, ǁnās ge ra ǂâibasen Jesub ge tsoatsoasa ūhâ isa. Xawe Jehovab hîna ge hoa xūna kurub ge tsoatsoa-e ūhâ tama hâ. (Psalmdi 90:2) Elob ǀGôab aseb ge Jesuba tātsēs tsîna ǂâi tama hâ îb Elo kai. Elobmîs ge ǃgāsase ra ǁkhāǁkhā da ǁGûb, ǀGôab xa a kaisa. (Khomai re Johaneb 14:28; 1 Korinteǁîn 11:3.) Jehovab ǀguib ge “Hoaǀgaixa” Eloba.  (Genesis 17:1) ǁÎb ge a kai tsî ǃnāsase a ǀgaisa ǀhommi tsî ǃhūbaib ai.—14ǁÎ ǀArosa ǃgāsasiba mû re.

13. Tae-i ǃaromas Elobmîsa ra mî Jesub a “mûheǁoasa Elob di ǀguiti-īb” ti?

¹³ Jehovab tsî ǁîb ǀGôab Jesub ge biliundi kuriga ǀguiba gere sîsen ǀhommi tsî ǃhūbaib tsîn nî kuruhes aiǃâ. ǁÎkha ge kaise ge ǀnamgu i! (Johaneb 3:35; 14:31) Jesub ge ǁîb di Dadab ǀgauga ǃamkuse gere ǁgae, ǁnā-amagas ge Elobmîsa “mûheǁoasa Elob di ǀguiti-īb” di ra ǂgai bi.—Koloseǁîn 1:15.

14. Matib ge Jehovab di ǀnamǀnamsa ǀGôaba khoese ǃnaehe?

¹⁴ Jehovab di ǀnamǀnamsa ǀGôab ge māsenxase ǀhomma xu ge ǁgôaxa tsî ǃhūbaib ai khoese hā ge ǃnaehe. Matis ge ǁnāsa ī ǁkhā i? Jehovab ge buruburuxa ǀgaub ai ǁîb di ǀGôab ûiba ǀhomma xu ū tsî Marias di ra ǂgaihe ǂkhamkhoes ǁhās ǃnâ ge ǂgā. Nē ǀgaub aib ge Jesuba khoesi dadasa-e ge ǂhâ tama hâ i. ǁNās ǀkhas ge Mariasa dīǀoaǀoasa kurusa ūhâ ǀgôaba ge hō tsî Jesub di ge ǂgai bi.—Lukab 1:30-35.

15. Mati du Jehovaba ǃamkuse a ǂan ǁkhā?

¹⁵ Jesub di ûib xa du ge ǃnāsase a ǁkhāǁkhāsen ǁkhā tsî ǁîb di ǀgaugu xas tsîna sao ra Elobmîs ǂkhanide du ga khomai o, Mateub, Markub, Lukab tsî Johaneb ǃnâ. Nē ǂkhanidi ge ǃGâiǂhôas ǂkhanidi di ra ǂgaihe. Jesub ge ǁîb di Dadasab khami ǀgui ī ǁnā-amagan ge khomai du ra xūna nî hui du î du Jehovaba ǃamkuse ǂan. ǁNā-amagab ge Jesuba ge mî: “Tita ra mû-i kom ǁGûba ra mû-eo.”—Johaneb 14:9.

16. Jesuba tae-e gere ǁkhāǁkhā? Jesub di ǁkhāǁkhāsa mapa xu gere hā?

 ¹⁶ ǂGui khoen ge Jesuba “ǁkhāǁkhā-aotse” di gere ǂgai. (Johaneb 1:38; 13:13) ǀGui ǂhâǂhâsa xū-i ǁîb gere ǁkhāǁkhā i ge “ǃgâiǂhôas gaosib disa.” Nē Gaosiba a tae? Nēb ge Elob di ǂhanuba hoaraga ǃhūbaiba ǀhomma xu nî ǂgaeǂguiba tsî Eloba ra ǁnâuǀnam khoena ǂgui ǀkhaega nî ǀkhī-ūba ǂhanuba. (Mateub 4:23) Jesub gere ǁkhāǁkhā xūn hoan ge Jehovaba xu gere hā. Jesub ge ge mî: “ǁKhāǁkhās âtas ge ti tama hâ, xawes ge a tita ge sîb di.” (Johaneb 7:16) Jesub ge ge ǂan i, Jehovab ta ǂhâbasa în khoena ǃgâiǂhôasa ǁnâu, Elob Gaosib ǃhūbaiba nî ǂgaeǂguis diba.

17. Jesuba mapa gere ǁkhāǁkhā? Tae-i ǃaromab gere ǁguiǂgāsen khoena ǁkhāǁkhās ǃnâ?

¹⁷ Jesuba mapa gere ǁkhāǁkhā? Khoenab gere ǀhao-ū ǃkhai-i hoa-i tawa. ǁÎb ge ǃādi, ǂkhari ǃādi, ǁamaxūǃkhaidi, ǃoaba ǃkhaigu tsî khoen di omdi ǃnâs tsîna gere ǁkhāǁkhā. ǁÎb ge ge ǃâubasen tama hâ i, în khoena ǁîb ǃoa hā. ǁÎb ge hoaǁae ǁîn ǃoa gere ǃgû. (Markub 6:56; Lukab 19:5, 6) Jesub ge ǃgarisase gere sîsen tsî ǃnāsa ǁaeba ǁkhāb as kōse khoena gere ǁkhāǁkhā. Tae-i ǃaroma? ǁÎb ge ge ǂan i Elob ǁnāsa ra ǂhâbasa tsîb ge ǁîba hoaǁae ǁGûba gere ǁnâuǀnam. (Johaneb 8:28, 29) Jesub ge khoena gere aoǁnâba, ǁînab gere ǀkhom amaga. (Khomai re Mateub 9:35, 36.) ǁÎb ge gere mû ǂgomdi ǂgaeǂgui-aogu ge Elob tsî ǁîb Gaosib xa amaba ǁkhāǁkhā tama hâ i ǃkhaisa. ǁNās ǀkhab ge ǂgui khoena ǁkhāb as kōse gere hui, în ǃgâiǂhôasa ǁnâu.

18. Mâ ǀgaugu Jesub digu xa du ǃnāsase a ǃgâibahe?

¹⁸ Jesub ge khoena ge ǀnam i tsî gere tsâba. ǁÎb ge ge khoexaǃnâ i tsî supuse ge ǃhoa-ūhe ǁkhā i. ǀGôaron tsîn  ge ge ǃgâibahe i ǁîb ǀkha ǀguiba hâsa. (Markub 10:13-16) Jesub ge hoaǁae ǀgora-e khoen ǁaegu ge ūhâ tama hâ i. ǁÎb ge ǁgaoǁgaosib tsî ǂhanuoǃnâsib tsîkha ge ǃhui hâ i. (Mateub 21:12, 13) ǁÎb ge ûi hâ i ǁaeb ai di ge tarekhoede ǂgui ǂhanuga ge ūhâ tama hâ i tsî ǃgôasib ǀkha ge sîsenūhe tama hâ i. Xawe Jesub ge tarekhoede ǃgôasib ǀkha hoaǁae gere sîsenū. (Johaneb 4:9, 27) Jesub ge amabes ǃnâ ǃgamǃgamsenxa ǀgauba ge ūhâ i. Aiǁgause, ǀgui ǃuib ge ǁîb di apostelgu di ǂaide ge ǁā, nē i ge xū-i hîna ǃgā-i xa ǀgui gere dīhe-e.—Johaneb 13:2-5, 12-17.

19. Mâ aiǁgausa ra ǁgau Jesub ge ǂan isa tae-en khoena amabes ǃnâ ǂhâ hâsa tsîb gere ǁîna hui ǂgaosa?

¹⁹ Jesub ge ge ǂan i khoen tae-e amabes ǃnâ ǂhâ hâsa tsî ǁîb ge gere hui nî ǂgao. Nēs ge kaise ge ǃgāsa i Elob di ǀgaibab gere sîsenū o khoena buruxa ǀgaub ai ǂuruǂurus ǀkha. (Mateub 14:14) Aiǁgause, ǃomamaxa ǁōsa ūhâ khoeb ge Jesub ǃoa hā tsî ge mî: “ǂGaots ka ots kom a ǃanuǃanu te ǁkhāo.” Jesub ge nē khoeb di tsûb tsî ǃgommi xa ge tsâǀkhāhe. ǁÎb ge ge ǀkhomxa bi tsî gere hui bi ǂgao. Ob ge Jesuba ǀkhomxa bi tsî ǁîb ǃomma ǀhōǂui, tsî tsâǀkhā bi tsî ǁîb ǃoa ge mî: “ǂGao ta ra, ǃanu!” Tsîb ge nē ǀaesen hâ khoeba ge ǂuru! (Markub 1:40-42) ǂÂi re ǁnā khoeb gere mati tsâ ǀgausa?

20, 21. Jesuba mati a ǃgâi aiǁgau ǁnâuǀnamxasib diba Elob ǃoa-ai?

²⁰ Jesub ge ǃgâi aiǁgauba Elob ǃoa-ai ǁnâuǀnamxase hâs diba. Tae-i ǀgui-i ga ī tamas ka io ǁîb khākhoen ge dīn ǂamaib ge ǂgomǂgomsase ge hâ ǁîb Îb ǃoa-ai. Jesub ge ge ǁore tama hâ i, Satanni ge ǃâitsâ bi o. (Mateub 4:1-11) Jesub di ǀaokhoen ǀnîn tsîn ge ge ǂgom tama hâ  i ǁîb a Mesia ǃkhaisa tsî gere mî “ǃkhaub kom hâo, ti” xaweb ge Jesuba Elob sîsenni ǀguiba gere dī. (Markub 3:21) ǁÎb khākhoen ge karoǂgaoxa i ǁîb ǃoa-ai xaweb ge ǂgomǂgomsase Elob ǃoa-ai ge hâ tsî tātsēs tsîna ge dītsâ tama hâ i ǁîna tsûtsûsa.—1 Petrub 2:21-23.

²¹ Jesub ge ǁgai tsî tsûtsûsa ǁōba ǁō xaweb ge ǂgomǂgomsase Jehovab ǃoa-ai ge hâ. (Khomai re Filipeǁîn 2:8.) ǂÂis ǀguisa dī re taen hoanab ge ǁîb di ǁōb tsēs ai tanisa. ǃKhōhe, ǂhumiǂgā-am-aon xa ǀhapiǂgā-amhe ǃkhāǃkhās ǃaroma, ǁgai ǀgoraǃgâ-aogu xa ǀgoraǃgâhe, khoen xa âiǂuihe tsî soldagu xa gunihe tsîb ge ǃgâuhaib ai ge ǃgâuhe. Xawe Jesub ge ǂgomǂgomsase ge mâǀgai Jehovab ǃoa-ai. ǁNā-amagab ge ǁōb gere o ge  mî: “Dītoahe go!” (Johaneb 19:30) ǃNona tsēdi Jesub ǁōb khaoǃgâb ge Jehovaba khâisa ge mā bi tsî gagasi sorosa ge mā bi. (1 Petrub 3:18) ǁNās khaoǃgâb ge Jesuba ǀhommi ǃoa ge oa, tsî “Elob amǀkhāb ǁôab” ai sī ge ǂnû tsî ge ǃâu Elob xab nî Gao-aose ǁgaumâihes kōse.—Hebreǁîn 10:12, 13.

22. Tae-i ǃēsa da nēsi ūhâ Jesub ge ǂgomǂgomsase mâǀgai ǃkhais ǃaroma, ǁîb Îb ǃoa-ai?

²² Jesub ge ǁîb Îb ǃoa-ai ǂgomǂgomsase mâǀgai ǃkhais ǃaroma da ge sada nētsē ǃēsa ūhâ paradais ǃhūbaib ai ǀamosib kōse ûisa, Jehovab ge ǂâibasen hâ i khami ǀgui. Sao ra danaǃâs ǃnâ da ge nî ǁkhāǁkhāsen matib ge Jesub di ǁōba a ī ǁkhā kaisa î da ǀamosib kōse ûi.