1, 2. 1) ¿Tleka amo uelis tikijtos kuali ikaj tikixmati tla san tikmati itoka? 2) ¿Tlen kijtoaj miakej itech Jesús?

SEKIMEJ miakej kinmixmatij uan tejuatsin xamo tikmati ken intoka sekimej pero ¿kijtosneki kuali tikinmixmati? Amo. ¿Tleka? Porque amo tikmati ken kipiaj inyelis nion tlen kichiuaj.

² Yikipia kanaj dos mil xiuitl Jesús okatka nikan tlaltikpak uan xamo itech yomitstlapouijkej. Pero miakej amo kimatij akin Jesús. Sekimej kijtoaj san okatka se tlakatl yolkuali. Oksekimej kijtoaj okatka se profeta. Oksekimej kijtoaj Jesús ye toTajtsin Dios. ¿Tejuatsin tlen tikijtoa? (Xikita nota 12).

3. ¿Tleka moneki timomachtis tlen kijtoa Biblia itech Jehová uan Jesús?

³ Moneki kuali xikixmati Jesús. ¿Tleka? Biblia kijtoa: “Tla mitsixmatiskeh sanwel Tejwatsi n de milajka Dios, iwa Cristo Jesús, Akin Tejwatsi otikwaltítlanki, kipiaskeh n yolílistli tlan ayik tlamis” (Juan 17:3). Uelis tiyoltos nochipa itech xochitlali tla timomachtis tlen kijtoa Biblia itech Jehová uan Jesús (Juan 14:6). Axkan noijki mitspaleuis timomachtis itech Jesús porque ye kuali omouikaya iuan oksekimej uan noijki chipauak okatka inemilis (Juan 13:34, 35). Itech tlamachtil 1 yotimomachtijkej tlen melauak itech toTajtsin Dios. Axkan timomachtiskej tlen kijtoa Biblia itech Jesús.

4. ¿Tlen kijtosneki “mesías” uan “cristo”?

⁴ Ijkuak opoliuiaya miak xiuitl para nesiskia Jesús, Jehová okijto kiualtitlaniskia Mesías noso Cristo. Tlajtoli “mesías” kisa itech tlajtoli hebreo uan tlajtoli “cristo”, kisa itech tlajtoli griego. Ninmej tlajtolmej kijtosneki toTajtsin Dios ikaj kipejpenaskia para ma kichiua se tekitl miak ipati. Satepan Mesías noijki kichiuas nochi tlen yokijto toTajtsin Dios.

5. ¿Okineltokayaj imachtijkauan Jesús ye okatka Mesías?

⁵ Imachtijkauan Jesús ika nochi inyolo okineltokayaj ye melauak Mesías (Juan 1:41). Tlatitlanil Pedro okilui Jesús: “Tejwatsi Ti Cristo” (Mateo 16:16). Ma tikitakan tleka tejuan noijki uelis tikneltokaskej Jesús ye Mesías.

6. ¿Ken techpaleuia Jehová ma tikmatikan akin Mesías?

⁶ Ijkuak ayamo onesiaya Jesús, sekimej profetas okijtojkej seki tlamantli tlen kinpaleuiskia miakej ma kimatikan akin yetoskia Mesías. ¿Ken okinpaleui? Ma tikijtokan ikaj moneki tiktemoti tiankistli pero ompa katej miakej. Mitspaleuis san niman xikajsi tla mitsiluiskej ken tlakentok. Noijki ijkon Jehová okinmilui sekimej profetas tlen kichiuaskia Mesías uan tlen kipanoskia. Profecías tlen omochijkej itech Jesús kinpaleuia akinmej yolkualmej ma kimatikan ye Mesías.

7. ¿Tlen ome profecías techpaleuiaj ma tikmatikan Jesús ye Mesías?

⁷ Ma tikinmitakan ome profecías. Se okijkuilojkej kanaj 700 xiuitl achto nesiskia Jesús. Miqueas  okatka profeta uan okijto Mesías nesiskia ompa Belén (Miqueas 5:2). Melauak ompa oneski (Mateo 2:1, 3-9). Okse profecía okijkuilo profeta Daniel. Ye okijto itech xiuitl 29 momatiskia akin Mesías (Daniel 9:25). Melauak omochi non profecía. * Onka okseki profecías tlen noijki techpaleuiaj ma tikmatikan Jesús ye Mesías tlen omoijto ualaskia.

8, 9. Tlen opanok ijkuak omoapolakti Jesús, ¿ken okiteititi ye Mesías?

⁸ Jehová noijki okitematilti Jesús ye Mesías. ToTajtsin Dios okilui Juan akin oteapolaktiaya kimatiltiskia akin Mesías. Itech xiuitl 29 Jesús oyajki itech aueyatl Jordán uan okilui Juan ma kiapolakti. Ijkuakon Juan itlaj okitak. Biblia kijtoa tlen opanok: “Ijkuak Jesús okiski de ijtik atl, okitak owalmotlapo n ilwikak iwa Iespíritu n Dios owaltemok ipan Jesús kemi se palomatsi. Iwa itech ilwikak omokak se tlájtoli non okijtoaya: —Ye nin Nokone non saikpanoa niktlasojtla, iwa satlawel nechyolpaktia” (Mateo 3:16, 17). Tlen okitak uan okikak Juan okipaleui ma kineltoka Jesús ye Mesías (Juan 1:32-34). Non tonal Jehová okimakak espíritu santo Jesús. Jehová okipejpenki Jesús ma yeto ueyi tekiua uan ma techyekana (Salmo 2:6; Isaías 55:4).

 ⁹ Profecías tlen katej itech Biblia, nochi tlen Jehová okijto uan tlen okichi ijkuak omoapolakti iKone, kiteititia Jesús ye Mesías. Pero ¿kanin ouala? ¿Ken okipiaya iyelis? Ma tikitakan tlen kijtoa Biblia.

10. ¿Kanin okatka Jesús achto ualaskia tlaltikpak?

¹⁰ Biblia kijtoa achto ualaskia Jesús tlaltikpak yimiak xiuitl okatka iluikak. Profeta Miqueas okijto Mesías yokatka yiuejkika (Miqueas 5:2). Jesús noijki miak uelta okijto yokatka iluikak achto ualaskia tlaltikpak (xiktlajtolti Juan 3:13; 6:38, 62, uan 17:4, 5). Ijkuak Jesús okatka iluikak, kuali omouikaya iuan Jehová.

11. ¿Tleka Jehová sapanoa kitlasojtla Jesús?

¹¹ Jehová melauak kitlasojtla Jesús. ¿Tleka? Porque “ye itlayekankone itech nochi tlen okichijchi”. Kijtosneki ye akin achto okichijchi (Colosenses 1:15, TNM). * Noijki sapanoa kitlasojtla porque san “Ye se Ikone”. Non kijtosneki Jehová ineuian okichijchi Jesús uan amikaj okipaleui (Juan 3:16). Noijki san ye Jesús okipaleui Jehová ijkuak okichijchi nochi tlen onka (Colosenses 1:16, TNM). San ye Jesús kiluiaj “Tlájtoli”, porque Jehová okinauati ma kinmilui seki tlamantli sekimej ángeles uan tlaltikpaktlakamej (Juan 1:14).

12. ¿Ken tikmatij Jesús amo toTajtsin Dios?

¹² Sekimej kijtoaj Jesús ye toTajtsin Dios pero Biblia amo ijkon tlamachtia (xikita nota 14). Biblia kijtoa Jehová okichijchi Jesús, kijtosneki achto amo okatka. Pero Jehová nochipa kajki uan ye okichijchi nochi tlen onka (Salmo 90:2). Biblia kijtoa toTajtsin Dios okachi ueyititok. Jesús amo keman  okinek ueyititos ken iTajtsin (xiktlajtolti Juan 14:28; 1 Corintios 11:3). San ye Jehová “toTajtsin Dios akin kipia sapanoa miak chikaualistli” (Génesis 17:1). San ye akin okachi ueyititok uan san ye kipia sapanoa miak chikaualistli.

13. ¿Tleka Biblia kijtoa Jesús “okimokixti toTajtsin Dios”?

¹³ Jehová uan Jesús san sekan otekipanojkej sapanoa miak xiuitl, achto kichijchiuaskiaj tlaltikpak uan iluikak. Ouejka san sekan okatkaj, ik non, okachi omotlasojtlakej (Juan 3:35; 14:31). Biblia kijtoa Jesús “okimokixti toTajtsin Dios”. ¿Tleka? Porque Jesús kipia iyelis ken Jehová uan okiteititi ika tlen okichi (Colosenses 1:15, TNM).

14. ¿Ken oneski Jesús?

¹⁴ Jesús okika nochi tlen okipiaya iluikak uan ouala nikan tlaltikpak. Pero ¿ken oneski? Jehová okichi se milagro. Okitlali iyolilis iKone ijtik se ichpochtli tlen omotokayotiaya María. ITajtsin Jesús amo okatka se tlakatl. Ik non, ijkuak María okipixki, amo okipiaya tlajtlakoli uan okitokayoti Jesús (Lucas 1:30-35).

15. ¿Ken uelis okachi kuali tikixmatiskej Jehová?

¹⁵ Jesús okijto: “Akin yonechitak kijtosneki yokitak Notajtsi” (Juan 14:9). Jesús kipia iyelis ken Jehová, ik non, tla okachi timomachtis itech Jesús, okachi tikixmatis Jehová. Tla tikintlajtoltis Evangelios tlen okijkuilo Mateo, Marcos, Lucas uan Juan, okachi tikmatis ken okipiaya iyelis uan inemilis Jesús.

16. 1) ¿Tlen otlamachtiaya Jesús? 2) ¿Akin iaxka tlen otlamachtiaya?

 ¹⁶ Miakej okiluiayaj Jesús “Tlamachti” (Juan 1:38; 13:13). Jesús otlamachti miak tlamantli tlen miak ipati, noijki okitematilti “kualitlájtoli” itech Tekiuajkayotl. ¿Tlen Tekiuajkayotl? ITekiuajkayo toTajtsin Dios tlen ualtlanauatis nikan tlaltikpak uan kinteochiuas akinmej kitlakamatij (Mateo 4:23). ¿Akin iaxka tlen otlamachtiaya Jesús? Jehová. Jesús okijto: “Notemachtilis amo Ne noaxka, yej de Akin onechaltítlanki” (Juan 7:16). Jesús okimatiaya toTajtsin Dios kineki nochtin ma kimatikan iTekiuajkayo ualtlanauatis nikan tlaltikpak.

17. 1) ¿Kanin otlamachtiaya Jesús? 2) ¿Tleka Jesús omochijchika tlamachtis?

¹⁷ ¿Kanin otlamachtiaya Jesús? Itech altepemej, itech tiankistli, itech teokali uan noijki tekalijtik. Okintemoaya akinmej kintlapouiskia, amo omochiaya yejuan ma kitemotij (Marcos 6:56; Lucas 19:5, 6). Jesús nochipa omochijchika tlamachtis. Ijkon okichi porque ijkon okinekiaya toTajtsin Dios uan ye nochipa kitlakamati (Juan 8:28, 29). Noijki otlamachtiaya porque oteiknomatiaya (xiktlajtolti Mateo 9:35, 36). Jesús okitak teopixkej otlamachtiayaj tlen amo melauak itech toTajtsin Dios uan iTekiuajkayo. Ik non, okinekiaya miakej kintlapouis kuali tlajtolmej itech Tekiuajkayotl.

18. ¿Tlen okachi mitspaktia itech iyelis Jesús?

¹⁸ Jesús nochtin okintlasojtlaya uan okinekiaya kinpaleuis, ik non, miakej okinekiayaj iuan motlapouiskej. Konemej noijki okinpaktiaya iuan yetoskej  (Marcos 10:13-16). Nochi okichiuaya ika melajkayotl uan amo okipaktiaya ikaj ma kichiua tlen amo kuali (Mateo 21:12, 13). Ijkuak Jesús okatka nikan, siuamej amo okinkauiliayaj ma kichiuakan seki tlamantli uan amo okintlakaitayaj. Pero Jesús nochipa okintlakaitak uan okipatioitaya tlen okichiuayaj (Juan 4:9, 27). Jesús noijki melauak okatka yolyamanki. Se tonal okinmikxipajpakak itlatitlaniluan. Non tekitl san okichiuayaj tlakeualmej (Juan 13:2-5, 12-17).

19. ¿Ken okiteititi Jesús okimatiaya tlen okinpoloaya sekimej?

¹⁹ Jesús okimatiaya tlen okinpoloaya sekimej uan okinekiaya kinpaleuis. Ijkon okiteititi ijkuak okitekitilti chikaualistli tlen toTajtsin Dios okimakak uan sekimej okinpajti (Mateo 14:14). Ijkon opanok ijkuak se tlakatl tlen okipiaya lepra oyajki kanin okatka Jesús uan okilui: “Tla tikmonekiltia weletis techchipawas de nokokolis”. Jesús okiknomatki non tlakatl porque sapanoa otlajyouijtoka. Ijkuakon, “okitelko iwa okili: —Ne nikmonekiltia. ¡Ximochipawa!”. ¡Tlakatl san niman opajtik! (Marcos 1:40-42). ¿Timokuayejyekoa ken omomachili?

20, 21. ¿Ken tikmatij Jesús nochipa okitlakamatki iTajtsin?

²⁰ Jesús kuali otechmachti ken tiktlakamatiskej toTajtsin Dios. Amo okika Jehová uan otlaxiko ijkuak okixnamik ouijkayotl uan maski sapanoa okitlajyouiltijkej akinmej okikokoliayaj. Jesús amo okikakili Satanás ijkuak okinekiaya ma tlajtlakolchiua  (Mateo 4:1-11). Sekimej ikalchanejkauan Jesús amo okineltokayaj ye okatka Mesías uan okijtoayaj okuatlapolo. Pero Jesús nochipa okitlakamatki Jehová (Marcos 3:21). Ijkuak okitlajyouiltijkej, amo okika toTajtsin Dios uan amo omomakopki (1 Pedro 2:21-23).

²¹ Maski sapanoa okitlajyouiltijkej Jesús ijkuak okimiktijkej, ye amo okika Jehová (xiktlajtolti Hebreos 5:8). Ximokuayejyeko nochi tlen okixiko: okikitskijkej, sekimej okijtojkej okiuijuikalti toTajtsin Dios, sekimej jueces amo yolkualmej okijtojkej ma kimiktikan, okipinauijkej, sekimej soldados okiuitekej uan okipilojkej itech se tlaketsali. Ijkuak  Jesús yiixpoliuiskia, chikauak okijto: “¡Nochi yomochi!” (Juan 19:30). Ijkuak opanok eyi tonal, Jehová okiyoliti para yaskia iluikak (1 Pedro 3:18). Opanok seki semanas uan oyajki iluikak, ompa omotlali “iyekma Totajtsi Dios” uan omochixki ma kitlali iTajtsin ken ueyi tekiua (Hebreos 10:12, 13).

22. Jesús nochipa okitlakamatki Jehová, ik non, ¿ken techpaleuis?

²² Jesús nochipa okitlakamatki Jehová, ik non, tejuan uelis tiyoltoskej nochipa itech xochitlali, ijkon ken kineki Jehová. Itech okse tlamachtil tikitaskej imikilis Jesús uelis techpaleuis ma tiyetokan itech xochitlali.