1, 2. (a) Ilo, kueile so co ule ore yelen’ o se ngome me nidi mec, ha thu co carajewe ore nidi singeni bon? Dai ie ahnganebut. (b) Ta ngome ci ie ko nge ri poni Iesu?

HMAIAI kore ta ngome me nidi mece ri ten’ ore aw’ om. Bua ngei ha ule ore yele no se ngome me mec. Ke deko ma ko bua ha ule ore yele ni bon, ko bua ha nidi ule roio bon. Bua tha ule ko ore ciroi ni bon, ca ore nidi singeni bon.

² Iesu Keriso hna menenge ome ri ten’ ore awe ha 2000 kore kenereken. Bua ngei ha hna taedrehngi ore ta enengoco ri poni Nubon. Ke hmaiaiil’ ore ngome tha ule ko ore nidi singeni Nubon. Numu ta ngome ci ie ko, Nubone ngome me roi. Osotene ci ie ko Nubone perofeta. Osotene joko ci uane ko, Iesu melei Madaru. Ka bua, nge kore uane ni bua?​—Ule ore Note 12, ri page 241.

3. Wen’ ore nge nidi ace kore co ule kaceni Iehova ne Iesu?

³ Nidi ace kore co carajewe ore seseko ri poni Iesu. Wen’ ore nge? Tusi Hmijoc ci cedi ko: “Omewaore ko re waruma tha thu ase ko, ko, Buice co rowo kaceni bua, o re nidi Madaru me hnasa so, ne Iesu Keriso, o re naeni bua hna siaton.” (Ioane 17:3) Ngei bua ma ule kaceni Iehova  ne Iesu, bua co numu ore waruma tha thu ase ko, ri paradrais ome ri ten. (Ioane 14:6) Ome te, nidi ace joko so bua ri ta ezien’ onom. Iesu hna aehngeni du eje ore la meneng, ne la ruace ne il’ osoten. Iesu kore tu me nidi roi. (Ioane 13:34, 35) Ri Yeno 1, eje hna yenon’ ore seseko ri poni Madaru. Ka ri yeno om, eje co yenone di ore ci ie kei Tusi Hmijoc ri poni Iesu.

4. Ci ie ko nge kore rue hna ato yel “Mesia” ne “Keriso”?

⁴ Hmaiai kore ta kenerekene ri dani Iesu, Iehova ha hna ie koda ko Nubonengo co sian’ ore Mesia, ca Keriso ome ri ten. “Mesia” pene Hebera ka “Keriso” pene Grek. Ore rue hna ato yel’ omelei ci ie ko “aseia”. Melei ci ie ko, hna ureie hnei Madaru son’ o se hnapane me nidi ac. Ore ta hna ie koda hnei Iehova ha co iu so wen’ o Mesia.

5. Ilo, re kokonieni Iesu hna ua sesekone ko, Iesu kore Mesia?

⁵ Re kokonieni Iesu hna ua sesekone ko, Iesu kore Mesia. (Ioane 1:41) Inom’ ore hnei Peteru aposetolo hna ie du Nubone ko: “Buango ko re Keriso.” (Mataio 16:16) Ka eje, korione ke eje co ua sesekone ko, Iesu kore Mesia?

6. Hna korione kei Iehova hna konekatuon’ ore ta ngome me nidi roi ri hnore co acikaceni Mesia?

⁶ Iwe kore ta eziene dan’ ore co hnapo Iesu, ta perofeta ni Madaru hna kanone hmaiai kore  ta kacene ri poni Mesia, bane konekatuon’ ore ngome co acikaceni Nubon. Ome ko se aekoweni: bua co hue i hna avio, ka hmaiai kore ngom, co dakori o se ngome bua me deko sa te hna ule. Ngei ma kanu bua ore ta kacen, melei bua thuni co canga acikaceni bon. Se inomelei, Iehova hna ureie ore ta perofeta, co kanon’ ore ta kacene ri pon’ ore ta ruace ni Mesia, ne ri pon’ ore ta ace co pina du Nubon. Ore hna iu hnen’ ore nodei hna ie koda ri poni Mesia, ci konekatuon’ ore ta ngome me nidi roi ri hnore co carajewe ko, Iesu kore Mesia.

7. Ielo tru kore hna perofetane ci aehngeni ko, Iesu kore Mesia.

⁷ Ome tru kore hna perofetane ri poni Mesia: 1) 700 kore ta kenerekene hna dan, Perofeta Mika hna ie ko, Mesia co hnapo ri menenge me waiami i Bethelem. (Mika 5:2) Ka ri guhne omelei kore hna hnapo Iesu! (Mataio 2:1, 3-9) 2) Perofeta Daniela hna ie ko, Mesia co pina ri kenerekene 29. (Daniela 9:25) Ore rue hna perofetan’ omelei, inom’ ore ta hna perofetan’ osoten, ci aehngeni ko, Iesu kore Mesia inom’ ore hna ie koda.​—Ule ore Note 13, ri page 241.

8, 9. Nge kore ace hna ahnga ri ezien’ ore hna bapataizo Iesu? Ka melei ci asesekoni ore nge?

⁸ Iehova hna ie ahngane ko, Iesu kore Mesia. Iehova hna ie koda du Ioane bapataizo ko, Nubonengo co kanon’ ore kacene bane konekatu bone co acikacen’ ore Mesia. Ioane hna ule ore  kacen’ omelei ri ezien’ ore hna bapataizo Iesu. Ri kenerekene 29, Iesu hna sibo Ioane co bapataizo Nubone ri lacele Jodran. Tusi Hmijoc ci lae natan’ omelei: “Ka ma hna bapataizo Iesu, ile nubonengo me canga erelo thela ri lacele; ka da ule . . . ono re laberede siwa ri awe ci beredon, ko, ‘Ome ko re Tenego me wahnacor, inu ci opodo nubon.’” (Mataio 3:16, 17) Ioane ma hna ule ne hna taedrehngi ore kacen’ omelei, ile bone me carajewe ko, Iesu kore Mesia. (Ioane 1:32-34) Ri ran’ omelei, Iehova hna kanon’ ore Uiewaieni Nubonengo du Iesu, ilei Iesu ma ha Mesia. Iesu kore hna ureie hnei Iehova bane Necene ne bane Doku.​—Isaia 55:4.

⁹ Ore hna perofetane ri Tusi Hmijoc, ne il’ ore hnei Iehova hna ie koda, ne il’ ore kacene Nubonengo hna kanone ri eziene hna bapataizo Iesu, ci aehngeni ko, Iesu kore Mesia. Ke Iesu hna pina sere il? Nge kore singeni Nubon? Eje dai ule ore ci beredrone kei Tusi Hmijoc.

10. Iesu hna menenge ile dan’ ore co pina ome ri ten’ ore aw?

¹⁰ Tusi Hmijoc ci aehngeni ko, ri dan’ ore co  pina ome ri ten’ ore aw, Iesu hna menenge ri aw, iwe kore ta ezien. Mika hna ie ko, Mesia hna menenge ri awe “ri ta nodei eziene koda ko.” (Mika 5:2) Ka Iesu hna iara ie ko, Nubone hna menenge ri awe dan’ ore co ngome ome ri ten. (Ieielo Ioane 3:13; 6:38, 62; 17:4, 5.) Ri dan’ ore  Iesu co icelu ome ri ten, Iesu ne Iehova nidi eaceno. Ri awe ne ri ten’ ore aw, deko ma numu se eala inome bushengon.

11. Wen’ ore nge Iehova ci nidi hnoro Iesu?

¹¹ Iehova ci nidi hnoro Iesu wen’ ore Nubone kore token’ ore hna pupul. Wen’ omelei ci kaio Iesu ko “token’ o re nodei ac’ ileodene hna pupul.” (Kolose 1:15, MN) Ka Iehova ci nidi hnoro Iesu joko wen’ ore Nubonengo odene kore hna puli Iesu. Wen’ omelei ci kaio Iesu ko “Tei Nubonengo xara sa so.” * (Ioane 3:16) Iesu joko kore hnei Iehova hna ureie bane pupul’ ore nodei ac’ ileoden. (Kolose 1:16) Ka Nubone so kore ci kaione ko “Eberedo”. Ci kaio Nubone ko “Eberedo” wen’ ore Iehova hna ure Nubone thu co kanon’ ore ta eberedro, ne ta hnapane son’ ore ta angela ne ta ngom.​—Ioane 1:14, MN.

12. Wen’ ore nge eje ha ule ko, Iesu ne Madaru deko ma ngome me sa so?

¹² Osotene ci uane ko, Iesu ne Madaru ngome me sa so. Ke deko ma ci ie inomelei kei Tusi Hmijoc. Tusi Hmijoc ci ie ko, Iesu hna puze hnei Madaru. Nubone numu hna whan. Ke Madaru di, ore hna thati pupul’ ileoden, deko ma numu hna whan. (Ta Salamo 90:2) Iesu, Tenengoieni Madaru, deko sa te hna uane co yose ore guhne ni Cecewaien.  Tusi Hmijoc ci ie ko, Cecewaiene hma ri poni Tenengoien. (Ieielo Ioane 14:28; 1 Korinito 11:3.) Iehova so kore “Thati Thu Niton.” (Genese 17:1) Nubonengo kore Madaru me nidi ac, ne nidi engetace ri awe ne ten’ ore aw.​—Ule ore Note 14, ri page 243.

13. Wen’ ore nge Tusi Hmijoc ci ie ko, Iesu kore “yeahngani Madaru me tha thu ahnga ko”?

¹³ Ri dan’ ore hna pupul’ ore awe ne ten’ ore aw, Iehova ne Iesu hna ruace sese ta milliards kore ta kenereken. Whane ri ezien’ omelei, nidi hma kore ci eala bushengon! (Ioane 3:35; 14:31) Iesu nidi hna yose roion’ ore tu nore singeni Cecewaien. Koiko, Tusi Hmijoc ci ie ko “Nubonengo ko re yeahngani Madaru me tha thuni ko co ule.”​—Kolose 1:15, MN.

14. Hna korione kei Iesu co ngomebuti di ome ri ten?

¹⁴ Iesu hna canga ibetu co nue ore awe ha thu co ngomebuti di ome ri ten. Korione komelei? Iehova hna rue sa kore ace me tha thuni ko co ie pengen. Iehova hna ane ore ciroi ni Tenengoieni Nubonengo ri canga hna hnapo no se cenewe gupa, yelene Maria. Deko ma cahmane kore ceceni Iesu. Maria hna hnapon’ ore tenene aicahmane me deko yenian, yelene ko Iesu.—Luke 1:30-35.

15. Korione ke bua co nidi ule kaceni Iehova?

¹⁵ Ore so tusi Mataio, Mareko, Luke ne Ioane  ci kaione ko Evangelia. Bua ma ieie ore so tusi omelei, melei bua co yeno roion’ ore ciroi ni Iesu, ne il’ ore ta singeni Nubon. Iesu hna ie ko “ono re ngome ci ule nu, nubone se ci ule te o re Cecewaien.” (Ioane 14:9) Iesu hna ie inomelei wen’ ore Nubone nidi ineluko i Cecewaien. Ore bua co ieie ri poni Iesu, melei co konekatu bua co nidi ule kaceni Iehova.

16. Nge kore nata me roi Iesu hna pulon? Wenei la kore ta ininata ni Iesu?

¹⁶ Hmaiaiil’ ore ngome hna kaio Iesu ko “Thu Yeno.” (Ioane 1:38; 13:13) Ono re “nata me roi no re baselaia” kore ace me nidi ace Iesu hna pulon. Nge kore Baselaia? Melei hna doku me ile ri aw, ka Madaru hna aseri ore hna doku omelei bane musion’ ore ten’ ore aw. Ore hna doku omelei co hnahneon’ ore ta ngome ci ninen’ o Madaru. (Mataio 4:23) Ileoden’ ore ta eberedro hnei Iesu hna pulon, wenei Iehova so. Iesu hna ie ko “deko wene inu kore ci ininata, roi di siwai Nubonengo o re thu siato nu”. Iesu ha ule ko, Iehova ci alane kore ngome co taedrehngi ore nata me roi omelei: ore Baselaia ni Madaru co musion’ ore ten’ ore aw.

17. Iesu ci ininata il? Wen’ ore nge Iesu hna ruace tace ha thu co ininatan’ ore ngom?

¹⁷ Iesu ci ininata il’ ore ngom? Ri ta guhne ileodene Nubone hna uni ore ngom: ri ta hnamenenge ni buic, ri ta meneng, ri ta gula nod, ri ta  hna maketre ne ta guhne re hmi. Iesu deko hna abungi ko ngome co huebuti du Nubon. Nubone hna iara hue jeu’ ore ngom. (Mareko 6:56; Luke 19:5, 6) Iesu hna ruace tace ha thu co ininatan’ ore ngom, ka se nidi hna pule joko. Wen’ ore nge? Nubone ha carajewe ko, melei alatone ni Madaru, ka Nubone hna iara ninen’ o Cecewaien. (Ioane 8:28, 29) Iesu hna pule joko wen’ ore Nubone hna ran’ ore ngom. (Ieielo Mataio 9:35, 36.) Iesu hna ule roione ko, ta naca hmi deko ma ie ore seseko ri poni Madaru, ne ri pon’ ore Baselaia. Ka Iesu hna alane ko, co hmaiai kore ngome co taedrehngi ore nata me roi omelei.

18. Nge kore ta singeni Iesu bua ci nidi hnoron?

¹⁸ Iesu hna hnoron’ ore ngom, ka hna didio buice joko. Nubone hna ngome me roi, ka deko ma ushiwa co ethanata ne Nubon. Ehna morowe joko hna hnorone co hue du Nubon. (Mareko 10:13-16) Iesu hna iara netiti so. Nubone hna nidi kecon’ ore ta ruace me kugu, ne ta ruace me deko ma netiti. (Mataio 21:12, 13) Ri eziene Iesu hna menenge ome ri ten, melei ore ngome deko hna hmijocon’ ore ta mohmenew, ka se deko kan’ o wathebo me netiti so buic. Ke roidi, Iesu hna iara hmijoc’ o buic. (Ioane 4:9, 27) Iesu lata me waami joko. Inome ri se lakid, Nubone hna hneie ore nodei wata nore re kokonieni Nubon. Ke roidi, inom’ ore hna acidanon, melei ruace nore ta sinemeneng.​—Ioane 13:2-5, 12-17.

19. Nge kore hnei Iesu hna rue thu co aehngeni ko, Nubone hna alane co konekatuon’ ore ngom?

 ¹⁹ Iesu ha ule ore roi son’ ore ngom, ka Nubone hna alane co konekatu buic. Melei hna ahnga, wen’ ore Iesu hna aroini ore ta uedre hnen’ ore Uiewaieni Madaru. Inome ri se ran, se lepera hna ie du Iesu ko: “Kacene bua ci alatone bua ha thu nitone co aburuiani nu”. Iesu ma hna ule ore ci jo nore ngom’ omelei, Iesu hna ra bon, ka Nubone hna alane co konekatu bon. Iesu hna rue bon, ile Nubone me ie ko: “Inu ci alan, buruiabote ke nubo.” Hale ma ha roi kei lepera! (Mareko 1:40- 42) Da uanelo ke bua ore hnei lepera hna uane ri hnore ni bon?

20, 21. Wen’ ore nge eje ci ie ko, Iesu kore tu me nidi roi ri ci ninen’ o Madaru?

²⁰ Iesu kore tu me nidi roi ri ci ninen’ o Madaru. Kacene me hna pina kore ta nur, ca ngei me hna nia ngom’ o Nubone kore ta icuhma, Iesu hna menenge seseko ko du Cecewaien. Ma hna tubuhnidi Iesu kei Satana, Nubone deko hna rue ore nia (Mataio 4:1-11) Ta re kani Iesu deko hna ua sesekone ko, Nubone kore Mesia. Buice hna ie ko,  Nubone ha on. Ke roidi, Iesu hna tace ko co rue ore alatone ni Madaru. (Mareko 3:21) Ngei ma hna ajoni Iesu kore ta icuhma, Nubone hna menenge seseko ko du Madaru, ka deko lo te ke Nubone hna rue ore nia du buic.​—1 Peteru 2:21-23.

²¹ Ri dan’ ore co tango, Iesu nidi hna jo. Ke roidi, Nubone hna menenge seseko du Iehova. (Ieielo Filipi 2:8.) Dai uanelo ore hna jo hnei Nubone ri rane Nubone co tango! Ta icuhma hna cori Nubon. Ta ngome hna ikiwata ko Nubone hna iala nia Madaru. Ta thu hnengone me ci ruace kugu hna iala nia Nubon. Xaranumu kore ngome hna teo Nubon. Ta shoja hna ridi nia Iesu, ne hna dengi watutu o Nubone ri serei. Ri dan’ ore co tango, Iesu hna kaieti ko “Ha as!” (Ioane 19:30) Ke therion’ ore rane thubenelo ore hna tango kei Iesu, Iehova hna aroini Iesu lo yawe ri uien, inom’ ore ta angela. (1 Peteru 3:18) Ma hue kore ta wiik, Iesu hna icelo ri awe ne “ci mune podilu ri gula nata ni Madaru”. Aselo, Iesu hna abungi ore eziene Madaru co adokuni Nubon.​—Hebera 10:12, 13.

22. Iesu hna menenge seseko du Cecewaien. Nge kore eje thuni co uroion’ onom?

²² Wen’ ore Iesu hna menenge seseko du Cecewaien, ha ile eje me thuni co numu ore waruma tha thu ase ko ri paradrais ome ri ten. Melei kore alatone ni Madaru. Eje thuni co uroion’ ore waruma tha thu ase ko, hnen’ ore tango ni Iesu. Eje co ule omelei ri Yeno 5.