MUUYUNI omu na aantu oyendji ya tseyika nawa noya simana. Otashi vulika wu shi edhina lyagumwe gwomuyo. Nonando owu shi edhina lye, itashi ti kutya owu mu shi nawa lela. Itashi ti kutya owu shi kehe shimwe kombinga ye.

1, 2. (a) Mbela uuna wu shi edhina lyomuntu a simana, osha hala okutya owu mu shi nawa? Shi yelitha. (b) Aantu oyi itaala shike kombinga yaJesus?

² Otashi vulika wu uva kombinga yaJesus Kristus, nonando kombanda yevi okwa li ko pwa pita oomvula 2 000 lwaampo. Aantu oyendji inaya tseya kutya Jesus okwa li omuntu a tya ngiini. Yamwe ohaya ti kutya okwa li omulumentu omwaanawa. Yamwe ohaya ti okwa li omupolofeti, omanga yamwe yi itaala kutya oye Kalunga. Ngoye oto ti ngiini? — Tala eyelitho eti-12.

3. Omolwashike sha simana okutseya Jehova Kalunga naJesus Kristus?

³ Okutseya oshili kombinga yaJesus, oshinima sha simana. Omolwashike mbela? Ombiimbeli otayi ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.” (Johannes 17:3) Ngele owa tseya oshili kombinga yaJehova naJesus, oto ka kala nomwenyo sigo aluhe moparadisa. (Johannes 14:6) Okutseya Jesus otaku vulu wo oku ku kwathela, oshoka okwe tu tulila po oshiholelwa oshiwanawa shankene onkalamwenyo yetu yi na okukala. Okwe tu kwathela wo tu mone nkene tu na okuungaunga naantu. (Johannes 13:34, 35)  MOntopolwa yotango, otwi ilonga mo oshili kombinga yaKalunga. Montopolwa ndjika, otatu ki ilonga shoka Ombiimbeli tayi ti kombinga yaJesus.

4. Omadhinasimaneko Mesiasa naKristus otaga ti shike?

⁴ Oomvula odhindji manga Jesus inaa valwa, Jehova okwa li u uvaneke mOmbiimbeli kutya ota ka tuma Mesiasa nenge Kristus. Edhinasimaneko Mesiasa olya za koshitya shOshihebeli nosho wo Kristus olya za koshitya shOshigreka. Omadhinasimaneko agehe ngoka otagu ulike kutya Kalunga okwa hogolola Mesiasa ngoka u uvanekwa note ke mu pa oshilonga sha simana. Mesiasa ota ka gwanitha po ashihe shoka Kalunga u uvaneka. Jesus ota vulu oku ku kwathela ngashingeyi. Manga Jesus inaa valwa, aantu oyendji oya li tayi ipula kutya ‘olye mbela ta ka ninga Mesiasa?’

5. Aalongwa yaJesus oya li ngaa yi itaala kutya Jesus oye Mesiasa?

⁵ Aalongwa yaJesus oya li yi itaala thiluthilu kutya oye Mesiasa ngoka u uvanekwa. (Johannes 1:41) Pashiholelwa, Simon Petrus okwa lombwele Jesus ta ti: “Ongoye Kristus.” (Mateus 16:16) Ongiini tatu vulu okukala nuushili kutya Jesus oye Mesiasa?

6. Jehova okwa li a kwathele ngiini aantu mboka ya hala okutseya oshili ya dhimbulule Mesiasa?

⁶ Aapolofeti yaKalunga oya li ya nyola uuyelele owundji kombinga yaJesus manga inaa valwa, mboka wa li tawu ka kwathela aantu ya dhimbulule kutya oye Mesiasa. Uuyelele mboka owa li tawu ke ya kwathela ngiini? Natu tye ando owa tumwa pomathikameno goombesa wu ka tale po omuntu ngoka kuu shi nale. Ngele owa yelithilwa nawa kutya omuntu ngono okwa tya ngiini, oto ka vula oku mu dhimbulula. Sha faathana, Jehova okwa longitha aapolofeti ye, ye tu lombwele kutya Mesiasa  ota ka longa shike naashoka tashi ke mu ningilwa. Sho omahunganeko agehe ngoka ga gwanithwa, osha kwathele aantu mboka ya hala okutseya oshili ya mone kutya Jesus oye Mesiasa.

7. Omahunganeko gaali geni taga ulike kutya Jesus oye Mesiasa ngoka u uvanekwa?

⁷ Natu taleni omahunganeko gaali. Lyotango, Mika okwa li a hunganeke kutya Mesiasa ota ka valelwa mondoolopa onshona yedhina Betlehem, oomvula 700 manga Jesus inaa valwa. (Mika 5:2) Jesus omo naanaa a ka valelwa shili. (Mateus 2:1, 3-9) Etiyali, Daniel okwa li a hunganeke kutya Mesiasa ota ka holoka momumvo 29. (Daniel 9:25) Ngaka ogo gamwe gomomahunganeko ngoka taga ulike sha yela kutya Jesus oye Mesiasa ngoka u uvanekwa. — Tala eyelitho eti-13.

8, 9. Oshike sha ningwa po sho Jesus a ninginithwa, shoka shu ulike kutya oye Mesiasa?

⁸ Jehova okwe shi yelitha nawa kutya Jesus oye Mesiasa. Kalunga okwa li u uvanekele Johannes Omuninginithi kutya ote ke mu pa endhindhiliko, opo a dhimbulule mo ngoka ta ka ninga Mesiasa. Johannes okwa mono endhindhiliko ndyoka sho Jesus e ya okuninginithwa kuye momulonga gwaJordan, momumvo 29. Ombiimbeli otayi ti: “Nena egulu olye eguluka, nokwa mono Ombepo yaKalunga ya kuluka ya fa onguti e tayi mu lambele. Megulu nomwa zi ewi lya ti: ‘Nguka Omumwandje omuholike nde mu hokwa.’” (Mateus 3:16, 17) Sho Johannes a mono shoka sha ningwa po, okwa dhimbulula  kutya Jesus oye Mesiasa. (Johannes 1:32-34) Sho Jehova a tilile Jesus ombepo ye esiku ndyoka, Jesus okwa ningi Mesiasa. Okwa li a hogololwa kuKalunga a ninge Omuwiliki nOmukwaniilwa. — Jesaja 55:4.

⁹ Omahunganeko ngoka ga nyolwa mOmbiimbeli, oohapu ndhoka Kalunga a popi naashoka sha ningwa po sho Jesus a ninginithwa, oyu ulike kutya Jesus oye Mesiasa. Jesus okwa zile peni, nokwa li omuntu a tya ngiini? Natu taleni shoka Ombiimbeli tayi ti.

10. Ombiimbeli otayi tu lombwele shike kombinga yaJesus manga inee ya kombanda yevi?

¹⁰ Ombiimbeli otayi ti kutya manga Jesus inee ya kombanda yevi, okwa kala megulu uule woomvula odhindji. Mika okwa popi kutya Mesiasa okwa za ‘mezimo lya za koohekulululwa yomuuyuni wonale.’ (Mika 5:2) Jesus naye okwe shi popya olundji kutya manga inaa valwa e li omuntu kombanda yevi, okwa kala megulu. (Lesha Johannes 3:13; 6:38, 62; 17:4, 5.) Manga nokuli inee ya kombanda yevi, okwa kala nale e na ekwatathano lyi ikalekelwa naJehova.

11. Omolwashike Jesus a simana momeho gaJehova?

¹¹ Jesus okwa simana momeho gaJehova. Omolwashike mbela? Omolwaashoka oye a shitwa tango. Onkee ano, Jesus oti ithanwa “omutango gwiishitwa ayihe.” * (Aakolossa 1:15) Jesus okwa simana wo kuJehova, oshoka oye mwene e mu shita. Oti ithanwa “Omwana awike.” (Johannes 3:16) Jesus oye awike a longithwa kuJehova a shite iinima yilwe ayihe. (Aakolossa 1:16) Oye wo awike ti ithanwa “Ohapu,” oshoka Jehova okwe mu longitha a gandje omalombwelo kaayengeli nokaantu. — Johannes 1:14.

12. Otu shi shi ngiini kutya Jesus naKalunga kaye thike pamwe?

¹² Aantu yamwe oyi itaala kutya Kalunga naJesus, omuntu gumwe. Ombiimbeli hasho tayi ti ngawo. Ombiimbeli otayi ti kutya Jesus okwa shitwa, shoka tashi ulike kutya oku na etameko. Jehova ngoka a shita iinima ayihe, ke na etameko. (Episalomi 90:2) Nonando  Jesus Omwana gwaKalunga, ina dhiladhila nando onale a kale e thike puKalunga. Ombiimbeli otayi tu longo sha yela kutya He oku vule Omwana. (Lesha Johannes 14:28; 1 Aakorinto 11:3.) Jehova oye “Kalunga Omunankondoawike.” (Genesis 17:1) Oye awike omunenenene nomunankondo meshito alihe. — Tala eyelitho eti-14.

13. Omolwashike Ombiimbeli tayi ti kutya Jesus “oye olupe lu wetike lwaKalunga”?

¹³ Jehova nOmwana, Jesus, oya kala taya longo pamwe uule woomvula omabiliyona manga ewangandjo nevi inaali shitwa. Oye na okukala ye holathane shili. (Johannes 3:35; 14:31) Jesus okwa holele thiluthilu omaukwatya gaHe, nomolwaashono Ombiimbeli tayi mu popi tayi ti “oye olupe lu wetike lwaKalunga.” — Aakolossa 1:15.

14. Oshe ende ngiini opo Omwana gwaKalunga omuholike a valwe e li omuntu kombanda yevi?

¹⁴ Omwana gwaKalunga omuholike, okwa li a zi megulu nehalo ewanawa e ta valwa e li omuntu kombanda yevi. Shoka oshe ende ngiini? Jehova okwa longo oshikumithalonga sho a lundululile omwenyo gwOmwana moshivalelo shomukadhona Maria okuza megulu. Kungeyi, Jesus ka li a pumbwa he gwopanyama. Onkee ano, Maria okwa vala okanona ka gwanenena e te ka luku Jesus. — Lukas 1:30-35.

15. Oshike tashi vulu oku ku kwathela wu tseye nawa Jehova?

¹⁵ Oto vulu okwiilonga oshindji kombinga yonkalamwenyo yaJesus nomaukwatya ge, mokulesha embo lyaMateus, Markus, Lukas naJohannes ngoka ge li mOmbiimbeli. Omambo ngoka ohagi ithanwa Omavaangeli. Shoka to lesha otashi vulu oku ku kwathela wu tseye nawa Jehova, molwaashoka Jesus okwa fa He. Jesus okwa  ti: “Kehe ngoka a mono ndje, okwa mona wo Tate.” — Johannes 14:9.

16. Jesus okwa li a longo aantu shike, nelongo lye olya za peni?

¹⁶ Aantu oyendji oya li hayi ithana Jesus “Muhongi.” (Johannes 1:38; 13:13) Oshinima shimwe sha simanenena shoka a longo aantu osho “elaka etoye lyOshilongo” nenge lyUukwaniilwa. Uukwaniilwa oshike? Owo epangelo lyaKalunga ndyoka tali ka pangela kombanda yevi okuza megulu. Otali ke etela aantu mboka haya vulika kuye omalaleko nuuyamba ogendji. (Mateus 4:23) Iinima ayihe mbyoka Jesus a longo aantu oya za kuJehova. Jesus okwa ti: “Elongo ndika tandi li longo, kali shi lyandje mwene, ihe olya za kuKalunga, ngoka a tuma ndje.” (Johannes 7:16) Jesus okwa li e shi shi kutya Jehova okwa hala aantu yu uve onkundana ombwanawa kombinga yUukwaniilwa waKalunga mboka tawu ka pangela evi.

17. Jesus okwa li hu uvithile peni? Omolwashike a li a longo nuudhiginini, opo a longe aantu?

¹⁷ Jesus okwa li a longo aantu kehe mpoka e ya adha. Okwa li u uvithile miilando, momikunda nomomagumbo. Ka li ha kala a tegelela aantu ye ye kuye, ihe olundji oye a li ha yi kuyo. (Markus 6:56; Lukas 19:5, 6) Jesus okwa li ha longo nuudhiginini nokwa li ha longitha ethimbo olindji, opo a longe aantu. Omolwashike mbela? Omolwaashoka okwa li e shi shi kutya shoka osho ehalo lyaKalunga. Shimwe ishewe, okwa li ha vulika aluhe kuHe. (Johannes 8:28, 29) Jesus okwa li wo hu uvitha, oshoka okwa li u uvitile aantu olukeno. (Lesha Mateus 9:35, 36.) Okwa li e wete kutya aawiliki yomalongelokalunga kaya li taya longo aantu oshili kombinga yaKalunga nUukwaniilwa we. Onkee ano, okwa li a hala okukwathela aantu oyendji yu uve onkundana ombwanawa.

18. Uukwatya wuni waJesus wu hole unene?

 ¹⁸ Jesus okwa li e hole aantu noku na ko nasha nayo. Okwa li e na ohenda noha popiwa naye nuupu. Aanona nayo oya li ye mu hole nokuli. (Markus 10:13-16) Jesus okwa kala aluhe ha tala ko aantu shi thike pamwe. Okwa li e tonde uulingilingi nokwaanuuyuuki. (Mateus 21:12, 13) Sho a li kombanda yevi, aakiintu kaya li ye na uuthemba washa nokaya li ya simanekwa. Jesus okwa li aluhe e ya simaneka nokwe ya lenga. (Johannes 4:9, 27) Okwa li wo omwiifupipiki shili. Pashiholelwa, esiku limwe okwa li a yogo oompadhi dhaayapostoli ye, oshilonga shoka sha li hashi longwa owala kaayakuli. — Johannes 13:2-5, 12-17.

19. Oshiholelwa shini tashi ulike kutya Jesus okwa li e shi shoka aantu ya pumbwa nokwa li a hala oku ya kwathela?

¹⁹ Jesus okwa li e shi shoka aantu ya pumbwa, nokwa li a hala oku ya kwathela. Okwe shi ulike, sho a longitha oonkondo ndhoka a pewa kuKalunga, a aludhe aantu. (Mateus 14:14) Pashiholelwa, omulumentu gumwe e na uuvu woshilundu okwa li e ya kuJesus, e ta ti: “Ngele owa hala okwaaludha ndje, oto shi vulu.” Uuwehame womulumentu ngoka owa li wa gumu omutima gwaJesus. Okwa li e mu uvitile olukeno nokwa li a hala oku mu kwathela. Onkee ano, Jesus okwa ganeke oshikaha she e te mu gumu. Okwa ti: “Onda hala, yela!” Omulumentu nokwa aluka. (Markus 1:40-42) Sho to dhiladhila, mbela omulumentu ngoka okwa li u uvite ngiini?

20, 21. Jesus okwe tu tulila po ngiini oshiholelwa oshiwanawa shankene tu na okuvulika kuKalunga?

²⁰ Jesus okwe tu tulila po oshiholelwa oshiwanawa shankene tu na okuvulika kuKalunga. Kashi na nduno  mbudhi kutya okwa li monkalo yini nenge aatondi ye oya li ye mu ningile shike, okwa kala aluhe omudhiginini kuHe. Pashiholelwa, Jesus ka li a yono kuKalunga, sho Satana a kambadhala oku mu makela. (Mateus 4:1-11) Aamwayina ye yamwe kaya li yi itaala kutya oye Mesiasa. Oya li nokuli ye mu ula kutya “ota yi oonkwengu!” Nonando ongawo, Jesus ine etha po okulongela Kalunga. (Markus 3:21) Sho aatondi ye ye mu hepeke nonyanya, ka li nando a kambadhala oku ya ningila uuwinayi. Jesus okwa kala omudhiginini kuKalunga. — 1 Petrus 2:21-23. 

²¹ Nonando eso lye olya li enyanyalithi noonkondo, okwa kala omudhiginini kuJehova. (Lesha Aafilippi 2:8.) Dhiladhila nkene a li i idhidhimike esiku ndyoka a sa. Okwa li a tulwa mondholongo, a lundilwa kutya okwa tuka kaKalunga nokwa pangulwa kaashi li pauyuuki.  Aantu oya li ye mu yolo naakwiita oye mu hepeke e taye mu alele komuti gwomahepeko. Sho e li pokusa, okwa popi a ti: “Ayihe ya gwanithwa!” (Johannes 19:30) Konima yomasiku gatatu, Jehova okwe mu yumudha e te mu pe olutu lwopambepo. (1 Petrus 3:18) Konima yiiwike yontumba, Jesus okwa yi megulu, e ta “kuutumba kolulyo lwaKalunga” a tegelela a ningwe Omukwaniilwa. — Aahebeli 10:12, 13.

22. Ngashingeyi otu na ompito yashike omolwuudhiginini waJesus kuHe?

²² Jesus okwa kala omudhiginini kuHe. Ngashingeyi otu na ompito yoku ka kala nomwenyo sigo aluhe moparadisa kombanda yevi, ngaashi Jehova a li a lalakanena. Montopolwa tayi landula, otatu ka konakona nkene eso lyaJesus lye shi ningi tashi wapa, opo tu ka kale nomwenyo sigo aluhe.