1, 2. (a) Hadia sindruhu-ndruhu aboto ba dödöu niha si no tehöngö na ha töinia niʼilamö? Tutunö. (b) Hadia zi faduhu dödö niha sanandrösa khö Yesu?

ATO niha si tehöngö ba gulidanö si no öʼila töi. He na no öʼila döira, tenga eluahania no aboto ba dödöu haniha ira. Tenga göi eluahania öʼila waö-waö waʼaurinia awö zomasi ia.

² Te no irai örongo sanandrösa khö Yesu Keriso. Hewaʼae no irai möi ia ba gulidanö 2.000 fakhe si lalö, ato zi lö aboto ba dödö haniha sindruhunia Yesu andrö. So zangumaʼö Yesu andrö niha si sökhi, so göi zangumaʼö samaʼeleʼö ia, so göi zi faduhu tödö wa yaʼia andrö Lowalangi. Hewisa moloʼö yaʼugö?​—Faigi Gonönöta 12.

3. Hana wa moguna aboto ba dödöda Lowalangi Yehowa ba Yesu Keriso?

³ Moguna aboto ba dödöu haniha Yesu. Hadia mbörö? Imane Sura Niʼamoniʼö, ”Daʼö waʼauri si lö aetu, enaʼö aboto ba dödöra ndraʼugö, Lowalangi sindruhu andrö, si ha sambua, ba enaʼö, aboto ba dödöra zinengeu andrö, Yesu Keriso.” (Yohane 17:3) Na so khöu waʼaboto ba dödö sanandrösa khö Yehowa ba Yesu, tola ösöndra waʼauri si lö aetu ba waradaiso. (Yohane 14:6) Na aboto ba dödöu haniha Yesu, öʼila hadia zinangea öfalua ba waʼauriu, hegöi ba niha tanö böʼö, börö me yaʼia andrö duma-duma  si sökhi khöda. (Yohane 13:34, 35) Ba Faza 1, no tafahaʼö ita zindruhu sanandrösa khö Lowalangi. Iadaʼa, tafahaʼö ita göi hadia niwaʼö Zura Niʼamoniʼö sanandrösa khö Yesu.

4. Hadia geluaha wehede ”Mesia” ba ”Keriso”?

⁴ Haʼuga fakhe fatua lö si tumbu Yesu, no ifabuʼu Yehowa ba Zura Niʼamoniʼö wa ifatenge dania Mesia mazui Keriso. Ba li Heberaiʼo, lafotöi ia ”Mesia”, ba li ndrawa Heleni lafotöi ia ”Keriso”. Eluaha döinia si dombua andre zangoromaʼö wa Mesia nifili Lowalangi ba wangokhögö dadaoma sebua hegöi ba wamalua fefu si no ifabuʼu Lowalangi. Tola göi itolo ndraʼugö Yesu iadaʼa. Fatua lö si tumbu Yesu, ato niha sanofu-nofu, ’Haniha zi tobali Mesia?’

5. Hadia faduhu dödö ndra nifahaʼö wa Yesu andrö Mesia?

⁵ Faduhu dödö ndra nifahaʼö wa Yesu zi tobali Mesia. (Yohane 1:41) Duma-dumania, imane Simoni Fetero khö Yesu, ”Keriso ndraʼugö.” (Mataiʼo 16:16) Hana wa faduhu dödöra wa Yesu andrö Mesia?

6. Hewisa wanolo Yehowa niha sadölö tödö enaʼö laʼila haniha Mesia?

⁶ Ara fatua lö si tumbu Yesu, oya dandra si no lasura ira samaʼeleʼö khö Lowalangi enaʼö aboto ba dödö niha haniha Mesia. Hana wa laʼila? Duma-dumania, lawaʼö khöu wamaondragö niha si lö irai falukha khöu ba terminal. Na lafatunö khöu hewisa khala-khalania, aoha khöu wangiʼila yaʼia na falukha ami. Simanö göi nifalua Yehowa, iʼogunaʼö ndra samaʼeleʼö ba wamatunö hadia nifalua Mesia ba hadia zalua  khönia. Faʼalua zi no mufaʼeleʼö andrö zanolo niha sadölö tödö ba wangiʼila wa Yesu andrö Mesia.

7. Hadia zi dombua nifaʼeleʼö sangoromaʼö wa Yesu andrö Mesia?

⁷ So dombua zi no mufaʼeleʼö. Si oföna, 700 fakhe fatua lö si tumbu Yesu, no ifaʼeleʼö Mikha wa ba Mbetilekhema tumbu Mesia. (Mikha 5:1) Sindruhu ba daʼö tumbu Yesu! (Mataiʼo 2:1, 3-9) Si dua, no ifaʼeleʼö Danieli wa ba ndröfi 29 M tohare Mesia. (Danieli 9:25) Awena dombua niʼilada wamaʼeleʼö sanandrösa khö Yesu wa yaʼia Mesia si no mufabuʼu.​—Faigi Gonönöta 13.

8, 9. Hadia zalua khö Yesu me labayagö ia idanö sangoromaʼö wa yaʼia Mesia?

⁸ Ihaogö wangombakha Yehowa wa Yesu andrö Mesia. Ifabuʼu Lowalangi khö Yohane Samayagö Idanö wa ibeʼe dandra enaʼö iʼila haniha Mesia. Me labayagö idanö Yesu ba Yoridano me döfi 29 M, iʼila Yohane dandra daʼö. Ifatunö Sura Niʼamoniʼö hadia zalua, ”Ba me no mubayagö idanö Yesu, ba iʼanemaʼö möi miyawa moroi ba nidanö; ba hiza, tebokai mbanua si yawa, ba iʼila geheha Lowalangi, si möi mitou, hulö marafadi, weʼamöi khönia. Ba hiza li, si otarai zorugo, imane: ’Onogu daʼö, ono omasiʼö, waʼomasigu.’” (Mataiʼo 3:16, 17) Me iʼila Yohane dandra awö li nirongonia, aboto ba dödönia  wa Yesu andrö Mesia. (Yohane 1:32-34) Me luo ibeʼe gehehania Yehowa khö Yesu, ba daʼö tobali ia Mesia. Yaʼia nifili Lowalangi tobali Salawa ba Razo.​—Yesaya 55:4.

⁹ Famaʼeleʼö ba Zura Niʼamoniʼö, fehede Yehowa, ba tandra nibeʼenia me tebayagö idanö Yesu, zangoromaʼö wa Yesu andrö Mesia. Hizaʼi, hezo moroi  mböröta Yesu, ba hewisa gamuatania? Datafaigi niwaʼö Zura Niʼamoniʼö.

10. Hadia nifahaʼö Zura Niʼamoniʼö sanandrösa ba waʼauri Yesu fatua lö möi ia ba gulidanö?

¹⁰ Ifahaʼö ita Sura Niʼamoniʼö wa no arara auri Yesu ba zorugo fatua lö möi ia ba gulidanö. Imane Mikha, Mesia andrö ”meföna saʼae mbörötania”. (Mikha 5:1) Yesu zangumaʼö wa no arara auri ia ba zorugo fatua lö tumbu ia ba gulidanö. (Baso Yohane 3:13; 6:38, 62; 17:4, 5.) Fatua lö möi Yesu ba gulidanö, no fahuwu ira Yehowa.

11. Hana wa iʼomasiʼö sibai Yesu andrö Yehowa?

¹¹ Iʼomasiʼö sibai Yesu andrö Yehowa. Hadia mbörö? Börö me yaʼia zi oföna ifazökhi Lowalangi moroi ba danö böʼö fefu. Andrö wa lafotöi Yesu andrö ”siaʼa moroi ba nifazökhi andrö, fefu hadia ia”. * (Kolose 1:15) Iʼomasiʼö sibai göi Yesu andrö Yehowa börö me yaʼia samösa zomböi. Andrö wa lafotöi ia ’Ono si ha sambua’. (Yohane 3:16) Yesu niʼogunaʼönia ba wamazökhi tanö böʼö. (Kolose 1:16) Ha Yesu nifotöi ’Taromali’, börö me yaʼia niʼogunaʼö Yehowa ba wamaʼema oroisania khö ndra malaʼika hegöi ba niha.​—Yohane 1:14.

12. Hana wa taʼila tenga ha sambua boto ira Yesu Lowalangi?

¹² Ato zi faduhu tödö wa ha sambua mbotora Lowalangi ba Yesu. Tobali, tenga simanö niwaʼö Zura  Niʼamoniʼö. Imane wa Yesu andrö nifazökhi, eluahania so mbörötania. Börö me Yehowa zomböi fefu hadia ia andrö wa lö börötania. (Zinunö 90:2) Hewaʼae Ono Lowalangi Yesu, lö irai tumbu ba dödönia wombaliʼö yaʼia si fagölö khö Lowalangi. Imane Sura Niʼamoniʼö wa ebua Nama moroi khö Nono. (Baso Yohane 14:28; I Korindro 11:3.) Ha Yehowa ”Lowalangi si Lö Ambö Faʼabölö”. (I Moze 17:1) Ha yaʼia wondrege zebua ba samatörö banua siawa awö danö.​—Faigi Gonönöta 14.

13. Hana wa iwaʼö Sura Niʼamoniʼö Yesu andrö ”famaedo Lowalangi si lö oroma”?

¹³ No falulu fohalöwö Yehowa khö Nononia Yesu ba zorugo miliaran fakhe waʼara, fatua lö mufazökhi mbanua siawa awö danö. Faoma laʼomasiʼö nawöra! (Yohane 3:35; 14:31) Iʼoʼö gamuata namania Yesu, andrö wa iwaʼö Sura Niʼamoniʼö wa yaʼia ”famaedo Lowalangi si lö oroma”.​—Kolose 1:15.

14. Hewisa wa tola tobali niha gulidanö Nono niʼomasiʼö Yehowa?

¹⁴ Ono Yehowa andrö itehegö iröi nahiania ba zorugo ba tumbu ia ba gulidanö tobali niha. Hewisa wa tola? Ifalua dandra sahöli-höli dödö Yehowa, ifawuʼa waʼauri Nononia ba dalu nono alawe sotöi Maria. Andrö lö amania ba gulidanö. Iʼadonogö nono soʼahonoa Maria, ba tebeʼe töinia Yesu.​—Luka 1:30-35.

15. Hewisa enaʼö aboto ba dödöu haniha Yehowa?

¹⁵ Tola öfahaʼö ndraʼugö ba gamuata hegöi ba waʼauri Yesu na öbaso Zura Niʼamoniʼö simane sura Mataiʼo, Mareko, Luka, ba Yohane. Lafotöi  mbuku andrö Injil. Börö me fagölö gamuatara Yesu Namania, andrö wa tola aboto ba dödöu Yehowa na öbaso waö-waö waʼauri Yesu. Andrö wa iwaʼö Yesu, ”Si no mangila yaʼo, ba no iʼila Nama.”​—Yohane 14:9.

16. Hadia nifahaʼö Yesu? Ba hezo moroi wamahaʼönia andrö?

¹⁶ Ato niha samotöi Yesu ”Samahaʼö”. (Yohane 1:38, 39; 13:13) Sambua wamahaʼö sabölö moguna nibeʼenia yaʼia daʼö ”turia somuso dödö, turia Mbanua Lowalangi”. Hadia geluaha Mbanua Lowalangi? Yaʼia daʼö famatörö Lowalangi moroi ba zorugo ba samatörö ba gulidanö sameʼe howu-howu ba niha soloʼö khönia. (Mataiʼo 4:23) Fefu wamahaʼö Yesu moroi khö Yehowa. Imane Yesu, ”Tenga khögu wamahaʼögu andrö, khö zamatenge yaʼo.” (Yohane 7:16) Iʼila Yesu wa omasi Yehowa na larongo niha duria Mbanua Lowalangi samatörö ba zi sagörö ulidanö.

17. Hezo manö manuriaigö Yesu? Hana wa iforege wamahaʼö niha tanö böʼö?

¹⁷ Hezo manö mamahaʼö Yesu? Gofu hezo falukha ia niha, he ba mbanua sigide-ide, ba mbanua sebua, ba harimbale, ba nahia wamosumange Lowalangi, hegöi ba nomo misa. Lö ibaloi wa laʼondrasi ia niha. Yaʼia zangondrasi yaʼira. (Mareko 6:56; Luka 19:5, 6) Iforege wohalöwö Yesu, ibeʼe ginötönia ba faʼabölönia ba wamahaʼö niha. Hadia mbörö? Börö me iʼila omasi Lowalangi na ifalua halöwö simane daʼö, ba omasi ia iʼoʼö zomasi Namania. (Yohane 8:28, 29) Wa manuriaigö Yesu, börö waʼahakhö dödönia niha. (Baso Mataiʼo 9:35, 36.) Iʼila Yesu wa ira sondröniaʼö  ba agama lö lafahaʼö zindruhu sanandrösa khö Lowalangi hegöi ba Mbanua Lowalangi. Andrö wa omasi ia itolo niha sato enaʼö larongo duria si sökhi.

18. Hadia gamuata Yesu sabölö adöni dödöu?

¹⁸ Iʼomasiʼö ba iʼosinangegö fefu niha Yesu. Sökhi gamuatania ba lö ataʼu niha fahuwu khönia. Iraono manö omasi ira fahuwu khönia. (Mareko 10:13-16) Lö ebua zambuana dödönia. Fatuwu ia niha sangokhögö si tenga khönia hegöi ba niha solau si lö atulö. (Mataiʼo 21:12, 13) Ba ginötö so Yesu ba gulidanö, lö laʼosinangegö ndra alawe. Hizaʼi, Yesu samösa iʼosinangegö sibai ndra alawe. (Yohane 4:9, 27) So khönia wangide-ngideʼö. Duma-dumania, samuza inötö, isasai gahe ndra nifahaʼönia, halöwö si toʼölö lafalua sawuyu.​—Yohane 13:2-5, 12-17.

19. Hadia duma-duma sangoromaʼö wa iʼila Yesu zabölö moguna ba niha, ba omasi ia itolo ira?

¹⁹ Iʼila Yesu zabölö moguna ba niha, ba omasi ia itolo ira. Oroma khöda me iʼogunaʼö waʼabölö Lowalangi ba wamalua tandra sahöli-höli dödö ba wamadöhö sofökhö. (Mataiʼo 14:14) Duma-dumania, samösa ndra matua si göna bou auri si möi khö Yesu imane, ”Na edöna ndraʼugö, ba öʼila öfadöhö wökhögu.” Ifaedogö ba dödönia Yesu waʼafökhö nitaögö ndra matua andrö. Faʼahakhö dödö zamarou Yesu ba wanolo niha andrö. Iʼoroʼö dangania, itufa ndra matua andrö, ba imane, ”Edöna ndraʼo, yadöhö!” Iʼanemai döhö wökhö ndra matua andrö! (Mareko 1:40-42) Hadia tola ökhalaigö waʼomuso dödö ndra matua andrö?

20, 21. Hana wa Yesu zi tobali duma-duma ba woloʼö khö Lowalangi?

²⁰ Yesu zi tobali duma-duma khöda ba woloʼö khö Lowalangi. Lö faröi ia khö Namania he na oya wamakao nitaögönia. Duma-dumania, lö alau ia ba wanandraigö Zatana. (Mataiʼo 4:1-11) So ba gotalua nösi nomonia zi lö faduhu tödö wa yaʼia Mesia, labaliʼö ia ’sowöhö’. Hewaʼae simanö, lö ibato wamalua somasi Lowalangi. (Mareko 3:21) Me lafakao ia si faʼudu khönia, lö faröi ia khö Lowalangi, ba lö isulöni khöra.​—I Fetero 2:21-23.

²¹ Hewaʼae lafakao Yesu ba mate ba waʼafökhö, lö faröi ia khö Yehowa. (Baso Filifi 2:8.) Khalaigö hawaʼoya wamakao nitaögö Yesu fatua lö mate ia.  Laraʼu ia, laböbögö khönia zi lö duhu, laʼohe ia föna zanguhuku si lö sökhi fangera-ngera, laʼoʼaya ia niha sato, lafakao ia ira saradadu, ba laʼosö ia ba döla geu. Fatua lö mate, muʼao ia imane, ”No awai!” (Yohane 19:30) Tölu hari aefa daʼö, isusugi ia Yehowa ba mboto eheha. (I Fetero 3:18) Haʼuga migu aefa daʼö, manahae Yesu ba zorugo, ”mudadao ia ba gambölö Lowalangi”, ba ibase-baseʼö hawaʼara ibeʼe khönia dadaoma Waʼarazo Lowalangi.​—Heberaiʼo 10:12, 13.

22. Hadia zi tola tasöndra me lö faröi Yesu khö Namania?

²² Börö me lö faröi Yesu khö Namania, andrö wa tola takhamö waʼauri si lö aetu ba gulidanö faradaiso simane ohitö dödö Yehowa. Ba faza aefa daʼa, tafatunö hana wa tasöndra waʼauri si lö aetu me no mate Yesu.