1, 2. а) Цӕхуӕндӕр зундгонд адӕймагӕн ӕ ном ке зонис, е уобӕл дзорӕг ӕй, ӕма ’й ӕцӕгӕйдӕр зонис? Ба ’й лӕдӕрун кӕнӕ. б) Йесо ка ӕй, уой туххӕй адӕн ци гъуди кӕнунцӕ?

ЗӔНХӔБӔЛ берӕ зундгонд адӕн ес. Ӕма си беретӕн сӕ нӕмттӕ дӕр фӕззонӕн. Фал е уобӕл дзорӕг нӕй, ӕма син сӕхе дӕр зонӕн, зӕгъӕн, сӕ еугур хабӕрттӕ, удта ӕцӕгӕй цӕхуӕн ӕнцӕ, уой.

² Йесо Киристе зӕнхӕбӕл 2 000 анзей размӕ цардӕй, фал ин уӕддӕр, ӕвӕдзи, ӕ хабар фегъустай. Фулдӕр адӕн ӕй нӕ зонунцӕ, Йесо цӕхуӕн адӕймаг адтӕй, уой. Еуӕй-еуетӕ ’й хонунцӕ уотид хуарз адӕймаг, иннетӕ ба – пахампар, кадӕртӕ ба ма ’й Хуцаубӕл дӕр нимайунцӕ. Дӕумӕ ба куд кӕсуй? (Кӕсӕ 12 уӕлӕнхасӕн.)

3. Йеговӕ ӕма Йесо Киристе ка ’нцӕ, уой зонун цӕмӕн гъӕуй?

³ Йесо ка ӕй, уой зонун цӕмӕн гъӕуй? Библий финст ӕй: «Цӕмӕй адӕймаг ӕносмӕ цӕра, уой туххӕй гъӕуама базона дӕу, еунӕг ӕцӕг Хуцауи, ӕма ду ке рарвистай, еци Йесо Киристей» (Иоанни 17:3). Йеговӕ ӕма Йесо ӕцӕгӕй ка ’нцӕ, уой ку базонай, уӕд дин фӕззиндзӕй нифс, ӕносмӕ зӕнхӕбӕл дзенети ке цӕрдзӕнӕ, уомӕй (Иоанни 14:6). Нӕ цард куд аразгӕ ’й ӕма иннети хӕццӕ куд цӕргӕ ’й, уой нин Йесойӕй хуӕздӕр неке бавдиста, ӕма ’й уомӕ гӕсгӕ дӕр гъӕуй базонун (Иоанни 13:34, 35). Фиццаг сӕрӕй базудтан, Хуцау ка ӕй, уой.  Нур ба базондзиан, Библий Йесой туххӕй ци финст ес, уой дӕр.

4. Дзурдтӕ «Мессийӕ» ӕма «Киристе» ци нисан кӕнунцӕ?

⁴ Йесой райгурцӕй берӕ ӕнзтӕ раздӕр Йеговӕ Библий ниффинсун кодта, зӕнхӕмӕ Мессийи, кенӕ Киристей, ке рарветдзӕй. Дзурд «Мессийӕ» рацудӕй дзиуиттаг ӕвзагӕй, «Киристе» ба – грекъаг. Дууӕ дзурди дӕр нисан кӕнунцӕ «Исӕрст» ӕма амонунцӕ, Хуцау ӕхсидзгӕ гъуддагӕн ке равзурста, еци адӕймагмӕ. Мессийӕ Хуцауи зӕрдӕвӕрдтӕ еугурӕйдӕр исӕнхӕст кӕндзӕй. Удта Йесо Киристе ци искодта, е абони дӕуӕн дӕр устур пайда ӕрхӕсдзӕй.

5. Йесо, Мессийӕ ке адтӕй, уобӕл ахуркӕнуйнӕгтӕ гурусхӕ кодтонцӕ?

⁵ Хуцау зӕрдӕ кӕмӕй байвардта, еци Мессийӕ Йесо ке адтӕй, уобӕл ахуркӕнуйнӕгтӕ нӕ гурусхӕ кодтонцӕ (Иоанни 1:41). Зӕгъӕн, Симон Петур Йесойӕн загъта: «Ду дӕ Киристе» (Матфеййи 16:16). Мах бон ба цӕмӕн ӕй федарӕй ӕууӕндун, Йесо Мессийӕ ке ӕй, уобӕл?

6. Йеговӕ сӕрниллӕг адӕнӕн Мессийи базонунмӕ куд ӕнхус кӕнуй?

⁶ Йесой райгурцӕй дзӕвгарӕ раздӕр Хуцауи пахампартӕ Мессийи туххӕй берӕ листӕг хабӕрттӕ ниффинстонцӕ. Уони фӕрци адӕнӕн сӕ бон адтайдӕ Мессийи базонун. Ӕрхӕссӕн еу цӕветтон. Зӕгъӕн, кадӕр дин баихӕс кодта, цӕмӕй автостанций фембӕлай, ке некӕдма фӕууидтай, уӕхӕн  адӕймаги хӕццӕ. Ӕма дин, бакастӕй цӕхуӕн ӕй, уой ку радзора, уӕд ӕй берӕ адӕни астӕу дӕр иссердзӕнӕ. Гъе уотӕ Йеговӕ дӕр ӕ пахампарти фӕрци радзурдта, Мессийӕ цӕхуӕн гъуддӕгтӕ искӕндзӕй ӕма ибӕл ци ’рцӕудзӕй, уой. Ӕма еци пахампарӕдтӕ ӕгасӕйдӕр ке исӕнхӕст ӕнцӕ, уой фӕрци сӕрниллӕг адӕни бон ӕй балӕдӕрун, Йесо Мессийӕ ке ӕй, уой.

7. Йесо Мессийӕ ке ӕй, уой цӕхуӕн дууӕ пахампаради ӕвдесунцӕ?

⁷ Ӕркӕсӕн еци пахампарӕдтӕй дууемӕ. Фиццаг: Йесой райгурцӕй 700 анзи раздӕр пахампар Михей ниффинста, Мессийӕ минкъий горӕт Вифлееми ке райгурдзӕй (Михей 5:2). Ӕма Йесо ӕцӕгӕйдӕр уоми райгурдӕй! (Матфеййи 2:1, 3–9). Дуккаг: пахампар Данел ниффинста, Мессийӕн ӕ лӕггадӕ нӕ эри 29 анзи ке райдайдзӕй (Данел 9:25). Аци пахампарӕдтӕй уӕлдай ма, берӕ ӕндӕр пахампарӕдтӕ ӕвдесунцӕ, Йесо Мессийӕ ке ӕй. (Кӕсӕ 13 уӕлӕнхасӕн.)

8, 9. Йесо донаргъуд ку райста, уӕд ци ’рцудӕй ӕма уомӕй куд зиннуй, Йесо Мессийӕ ке ӕй?

⁸ Йесо Мессийӕ ке ӕй, уой Хуцау ӕхуӕдӕг дӕр балӕдӕрун кодта. Йеговӕ Иоаннӕн зӕрдӕ байвардта, нисан ин ке ратдзӕй, ӕма еци нисанмӕ гӕсгӕ Иоанн Мессийи ке базондзӕй. Гъема нӕ эри 29 анзи Йесо Иордани цӕугӕдонмӕ донаргъуд райсунмӕ ку ’рбацудӕй, уӕд Иоанн еци нисан фӕууидта. Ци ’рцудӕй, уой туххӕй Библий кӕсӕн: «Йесо куддӕр аргъуд райста, уотӕ донӕй  рахизтӕй, ӕма уӕд арв фегон ӕй, ӕма ин Иоанн ӕ сӕрмӕ фӕууидта Хуцауи сугъдӕг хъаурӕ бӕлӕуи хузи ӕрцӕйцӕугӕ. Ӕма уӕларвӕй ӕригъустӕй гъӕлӕс: „Айӕ ӕй мӕ Фурт, берӕ ке уарзун ӕма арази кӕмӕй дӕн, еци Фурт“» (Матфеййи 3:16, 17). Иоанн еци нисан ку фӕууидта, ӕма Хуцауи дзурдтӕ ку фегъуста, уӕд ӕй балӕдӕрдтӕй, Йесо Мессийӕ ке ӕй (Иоанни 1:32–34). Еци бон, Йесобӕл Йегови сугъдӕг хъаурӕ ӕрцудӕй ӕма иссӕй Мессийӕ. Хуцау ӕй равзурста Хецауӕй ӕма Паддзахӕй (Исай 55:4).

⁹ Йесо Мессийӕ ке ӕй, е бӕрӕг ӕй Библий пахампарӕдтӕй, Йегови дзурдтӕй, удта Йесо донаргъуд ку иста, уӕд Йеговӕ ци нисан равардта, уомӕй. Фал Йесо кӕцӕй ӕрцудӕй ӕма цӕхуӕн адӕймаг адтӕй? Ӕркӕсӕн, уой туххӕй Библий ци финст ес, уомӕ.

10. Йесо зӕнхӕмӕ ку нӕма ӕрцудӕй, уӕд кӕми адтӕй? Библи уой туххӕй ци зӕгъуй?

¹⁰ Библи куд зӕгъуй, уомӕ гӕсгӕ, Йесо зӕнхӕмӕ ку нӕма ӕрцудӕй, уӕд берӕ рӕстӕг уӕлӕрвти  цардӕй. Зӕгъӕн, пахампар Михей ма никкидӕр загъта, Мессийӕ «рагидзамантӕй» ке адтӕй (Михей 5:2). Удта Йесо ӕхуӕдӕг дӕр берӕ хӕттити дзурдта, раздӕр уӕлӕрвти ке цардӕй, уой туххӕй.  (Бакӕсӕ Иоанни 3:13; 6:38, 62; 17:4, 5.) Йесо зӕнхӕмӕ ку нӕма ӕрцудӕй, уӕд дӕр Йеговӕмӕ хъӕбӕр хӕстӕг адтӕй.

11. Йесо Йеговӕн уотӕ хъазар цӕмӕн ӕй?

¹¹ Йесо Йеговӕн хъӕбӕр хъазар ӕй. Цӕмӕн? Уомӕн ӕма тӕккӕ фиццаг уой сфӕлдиста. Библий Йесой туххӕй финст ӕй, е ӕй, «Хуцау цидӕриддӕр сфӕлдиста, уонӕй фиццаг», зӕгъгӕ (Колоссӕгтӕмӕ 1:15, феппайуйнаг) *. Йесо ма Йеговӕн хъазар ӕй, ӕхуӕдӕг ӕй ке сфӕлдиста, уой туххӕй дӕр. Ӕма уомӕ гӕсгӕ хуннуй «еунӕгигурд Фурт» (Иоанни 3:16, феппайуйнаг). Уомӕй уӕлдай ма, уой фӕсте Йеговӕ цидӕриддӕр сфӕлдиста, уони сфӕлдиста Йесой хӕццӕ (Колоссӕгтӕмӕ 1:16). Удта ӕрмӕстдӕр Йесо хуннуй, «Дзурд», уомӕн ӕма Йеговӕ изӕдтӕмӕ дӕр ӕма адӕнмӕ дӕр цӕхуӕндӕр хабари кенӕ амундти хӕццӕ Йесой рарветидӕ (Иоанни 1:14).

12. Йесо Киристе Хуцау ке нӕй, уой кӕцӕй зонӕн?

¹² Еуӕй-еуети гъудимӕ гӕсгӕ Йесо Киристе Хуцау ӕй. Фал Библи уотӕ нӕ зӕгъуй. Библи зӕгъуй, уомӕ гӕсгӕ Йесой Хуцау сфӕлдиста, гъома Йесойӕн адтӕй райдайӕн. Фал, алцидӕр ка сфӕлдиста, еци Хуцау Йеговӕн ба райдайӕн н’ адтӕй (Псалом 90:2). Йесо Хуцауи Фурт ӕй, фал ӕ Фиди бунатмӕ некӕд гъавта. Библий комкоммӕ финст ӕй,  Фидӕ Фуртӕй уӕлдӕр ке ӕй. (Бакӕсӕ Иоанни 14:28; 1 Коринфӕгтӕмӕ 11:3.) Ӕрмӕстдӕр Йеговӕ ӕй «Алцигъон Хуцау» (Райдайӕн 17:1). Дун-дуйней уомӕй хъаурӕгиндӕр нӕййес. (Кӕсӕ 14 уӕлӕнхасӕн.)

13. Библи уотӕ цӕмӕн зӕгъуй, ӕма Йесо, «цӕстӕй фӕууинӕн ке нӕййес, еци Хуцауи хузӕн» ӕй?

¹³ Арв ӕма зӕнхӕ искӕнуни размӕ дӕр Йеговӕ ӕма Йесо миллиардгай ӕнзти дӕргъи еумӕ хъиамӕт кодтонцӕ. Еци рӕстӕгмӕ кӕрӕдзей хъӕбӕр бауарзтонцӕ! (Иоанни 3:35; 14:31). Йесо алли гъуддаги дӕр ӕ Фиди хузӕн ӕй ӕма Библи дӕр уомӕ гӕсгӕ зӕгъуй: «Е ӕй, цӕстӕй фӕууинӕн ке нӕййес, еци Хуцауи хузӕн» (Колоссӕгтӕмӕ 1:15).

14. Хуцауи Фурт зӕнхӕбӕл кутемӕй райгурдӕй?

¹⁴ Йеговӕн ӕ хъазар Фурт арази адтӕй, цӕмӕй ӕ уӕларвон цард ниууагътайдӕ ӕма зӕнхӕбӕл адӕймагӕй райгурдайдӕ. Цума уомӕн куд адтӕй гӕнӕн? Йеговӕ ӕ Фурти цард дессаги хузи уӕларвӕй рахаста ӕнӕвнӕлд кизгӕ Марийи губунмӕ. Уомӕ гӕсгӕ, цӕмӕй Йесо райгурдайдӕ, уой туххӕй ӕй зӕнхон Фидӕ нӕ гъудӕй. Марийӕн райгурдӕй ӕнхӕст фурт, ӕма ’й исхудта Йесо (Лукай 1:30–35).

15. Дӕ бон куд ӕй Йегови хуӕздӕр базонун?

¹⁵ Йесойӕн ӕ царди туххӕй, удта, цӕхуӕн адӕймаг адтӕй ӕма имӕ цӕхуӕн менеугутӕ адтӕй, уой туххӕй берӕ цидӕртӕ базонӕн ес Матфеййи, Марки, Лукай ӕма Иоанни финст киунугутӕй,  хуннунцӕ Евангелитӕ. Йесо алцӕмӕйдӕр ӕ Фиди хузӕн ӕй. Мадта Евангелити ци бакӕсай, уой фӕрци Йегови дӕр хуӕздӕр базондзӕнӕ. Йесо дӕр уомӕ гӕсгӕ загъта: «Мӕн ка фӕууидта, е фӕууидта Фиди дӕр» (Иоанни 14:9).

16. Йесо адӕни цӕбӕл ахур кодта? Цӕбӕл сӕ ахур кодта, е кӕмӕй цудӕй?

¹⁶ Йесо зӕнхӕбӕл ку лӕггадӕ кодта, уӕд ӕй беретӕ худтонцӕ «Ахургӕнӕг» (Иоанни 1:38; 13:13). Адӕнӕн ци ӕхсидзгӕ хабӕрттӕ дзурдта, уонӕй еу адтӕй «Хуцауи паддзахади туххӕй хуарз хабар». Еци Паддзахадӕ ци ӕй? Е ӕй Хуцауӕй ӕвӕрд хецауадӕ. Еци хецауадӕ уӕлӕрвтӕй разамунд дӕтдзӕй ӕнӕгъӕнӕ зӕнхӕн дӕр ӕма устур арфӕдзийнӕдтӕ ӕрхӕсдзӕй, Хуцауӕн коммӕгӕс ка ӕй, еци адӕнӕн (Матфеййи 4:23). Йесо цидӕриддӕр амудта, е адтӕй Йеговӕй. Йесо загъта: «Ӕз цӕбӕл ахур кӕнун, е мӕхецӕй нӕй, фал мӕ ка рарвиста, уомӕй» (Иоанни 7:16). Е ӕй зудта, Йегови уотӕ ке фӕндуй, цӕмӕй адӕн фегъосонцӕ, ӕгас зӕнхӕ дӕр Хуцауи Паддзахади дӕлбарӕ ке исуодзӕй, еци хуарз хабар.

17. Йесо адӕни кӕми ахур кодта? Иннети ахур кӕнунмӕ ӕ рӕстӕг ӕма ӕ хъауритӕ цӕмӕн не ’вгъау кодта?

¹⁷ Йесо адӕни кӕми ахур кодта? Кӕмидӕриддӕр сӕбӕл ӕмбалдӕй, уоми – гъӕути, горӕтти, базарти, ковӕндони, ӕмбурдгӕнӕнти ӕма хӕдзӕртти. Адӕн имӕ сӕхуӕдтӕ кӕд ӕрбацӕудзӕнцӕ, уомӕ не ’нгъӕлмӕ кастӕй. Арӕхдӕр сӕмӕ ӕхуӕдӕг цудӕй (Марки 6:56; Лукай 19:5, 6).  Йесо адӕни ахур кӕнунмӕ ӕ рӕстӕг ӕма ӕ хъауритӕ не ’вгъау кодта. Цума цӕмӕн? Уомӕн ӕма ’й зудта, е Хуцауи фӕндон ке адтӕй, уой. Йесо ба алкӕддӕр ӕ Фидӕмӕ игъуста (Иоанни 8:28, 29). Йесо ма хуарз хабар игъосун кодта, адӕнӕн тӕрегъӕд ке кодта, уой туххӕй дӕр. (Бакӕсӕ Матфеййи 9:35, 36.) Уидта ӕй, дини разамонгутӕ син Хуцауи ӕма ӕ Паддзахади туххӕй рӕстдзийнадӕ ке нӕ амонунцӕ, ӕма ’й фӕндадтӕй, цӕмӕй хуарз хабар фулдӕр адӕн фегъустайуонцӕ.

18. Йесой менеугутӕй дӕ зӕрдӕмӕ хъӕбӕрдӕр кӕцитӕ цӕунцӕ?

¹⁸ Йесо адӕни уарзта ӕма сӕбӕл тухстӕй. Хӕларзӕрдӕ адӕймаг ке адтӕй, уомӕ гӕсгӕ адӕнӕн ӕ хӕццӕ ӕнцон адтӕй. Сувӕллӕнттӕ дӕр имӕ сӕхе ивазтонцӕ (Марки 10:13–16). Йесо алкӕддӕр рӕстӕй архайдта. Хӕран ӕма мӕнгард гъуддӕгтӕй е ’сӕфт уидта (Матфеййи 21:12, 13). Еци рӕстӕги силгоймӕгтӕн, зӕгъӕн ес, ӕма нецӕхуӕн бартӕ адтӕй ӕма сӕ беретӕ нецӕмӕ дардтонцӕ. Фал сӕ Йесо нимадта ӕма син кадӕ кодта (Иоанни 4:9, 27). Йесо ма адтӕй хъӕбӕр сӕрниллӕг. Зӕгъӕн, еухатт ӕ апостолти къӕхтӕ нихснадта. Еци куст ба уӕди рӕстӕги лӕггадгӕнгутӕ кодтонцӕ (Иоанни 13:2–5, 12–17).

19. Йесо адӕни хуарз ке зудта ӕма ’й банхус кӕнун ке фӕндадтӕй, е цӕмӕй бӕрӕг ӕй?

¹⁹ Йесо хуарз зудта, адӕн ци гъӕуагӕ адтӕнцӕ, уой ӕма ’й фӕндадтӕй банхус кӕнун. Е бӕрӕг ӕй, Хуцауи хъаури фӕрци берети дессаги хузи ке  исдзӕбӕх кодта, уомӕй (Матфеййи 14:14). Еухатт имӕ еу хъотургин лӕг ӕрбацудӕй ӕма ин загъта: «Ӕрмӕстдӕр дӕ бафӕндӕуӕд, ӕма мӕ исдзӕбӕх кӕндзӕнӕ». Еци адӕймаг куд гъезӕмарӕ кодта, уой Йесо ку фӕууидта, уӕд ибӕл ӕ зӕрдӕ фӕрристӕй. Хъӕбӕр ин ӕртӕрегъӕд кодта ӕма ’й бафӕндадтӕй банхус кӕнун. Йесо имӕ ӕ къох бадардта, ба ибӕл ӕмбалдӕй ӕма ин загъта: «Фӕндуй мӕ. Исдзӕбӕх уо». Ӕма сӕйгӕ исдзӕбӕх ӕй (Марки 1:40–42). Расагъӕс кӕнӕ, еци адӕймаг куд цийнӕ кодтайдӕ!

20, 21. Уотӕ зӕгъӕн цӕмӕн ес, ӕма Хуцауӕн Йесой хузӕн коммӕгӕс неке адтӕй?

²⁰ Хуцауӕн Йесой хузӕн коммӕгӕс неке адтӕй. Цийфӕнди зин уавӕрти ма бахаудтайдӕ ӕма ин е знӕгтӕ цийфӕнди ма кодтайуонцӕ, уӕддӕр ӕ Фидӕбӕл ӕ зӕрдӕ не ’сӕййивта. Зӕгъӕн, Сайтан ӕй ку фӕлвардта, уӕд Йесо тӕрегъӕд не ’скодта (Матфеййи 4:1–11). Ӕ бийнонтӕй кадӕртӕ ба ӕууӕндгӕ дӕр нӕ кодтонцӕ, Мессийӕ ке ӕй, уобӕл, ӕма си дзурдтонцӕ, «сӕрӕй фӕккуддӕр ӕй»,  зӕгъгӕ. Фал Йесо идарддӕр дӕр Хуцауи гъуддаг хаста (Марки 3:21). Кӕд ин е знӕгтӕ фудмиутӕ кодтонцӕ, уӕддӕр си ӕ маст нӕ иста ӕма Хуцаубӕл еузӕрдонӕй байзадӕй (1 Петури 2:21–23).

²¹ Йесо гъезӕмайраг мӕлӕт ку бавзурста, уӕд дӕр Йеговӕбӕл еузӕрдонӕй байзадӕй. (Бакӕсӕ Филиппӕгтӕмӕ 2:8.) Ци бон рамардӕй, еци бон берӕ цидӕртӕ бавзурста. Ӕрахӕстонцӕ ӕй, мӕнгӕ ӕвдесӕнтӕ ӕй фӕффудгин кодтонцӕ, зӕгъгӕ, дан, Хуцауи фаудта, мӕнгард тӕрхонгӕнгутӕ ин мӕлӕти тӕрхон рахастонцӕ, адӕн ибӕл худтӕнцӕ, удта ин ӕфсӕддонтӕ фудмиутӕ кодтонцӕ ӕма ’й гъӕдӕбӕл ниййауигътонцӕ. Ӕма мӕлгӕ ку кодта, уӕд ма исдзурдта: «Цидӕриддӕр мин бафӕдзахстай, уой исӕнхӕст кодтон!» (Иоанни 19:30). Ӕртӕ боней фӕсте ӕй Йеговӕ райгас кодта, ӕма ин равардта уӕларвон бауӕр (1 Петури 3:18). Уобӕл цалдӕр къуӕрей ку рацудӕй, уӕд Йесо уӕлӕрвтӕмӕ раздахтӕй, «Хуцауи рахес фарс» исбадтӕй ӕма гъе уой фӕсте ӕнгъӕлмӕ кастӕй, Хуцау ӕй Паддзахӕй кӕд исӕвӕрдзӕй, еци рӕстӕгмӕ (Дзиуиттӕгтӕмӕ 10:12, 13).

22. Йесо ӕ Фидӕбӕл еузӕрдонӕй ке байзадӕй, уой фӕрци нин цӕхуӕн фадуат ес?

²² Йесо ӕ Фидӕбӕл еузӕрдонӕй ке байзадӕй, уой фӕрци махӕн дӕр ес дессаги фадуат – нӕ бон ӕй ӕносмӕ зӕнхӕбӕл дзенети цӕрун, Йегови куд фӕндадтӕй, уотӕ. Иннӕ сӕри радзордзиан, Йесой мӕлӕти фӕрци нин ӕносмӕ цӕруни фадуат кутемӕй фӕззиндтӕй, уобӕл.