1،‏ 2.‏ (‏الف)‏ کیہہ کسے دا ناں جانن دا مطلب ایہہ وے کہ تُسی اوہنوں چنگی طرحاں جان دے او؟‏ (‏ب)‏ لوکاں دے خیال چ یسوع مسیح کون نیں؟‏

دُنیا چ مشہور لوکاں دی کمی نئیں۔‏ شاید تُسی وی کسے مشہور ہستی دا ناں جان دے ہووو۔‏ پر کسے دا ناں جانن دا مطلب ایہہ نئیں کہ تُسی اوہنوں چنگی طرحاں جان دے او تے توانوں پتہ اے کہ اوہ کیہو جیہا انسان اے۔‏

² تُسی یسوع مسیح بارے وی سُنیا ہونا اے بھانویں کہ اوہ اَج توں تقریباً 2000 سال پہلے زمین تے رہندے سن۔‏ پر بوہت سارے لوکاں نُوں پتہ نئیں کہ اوہ کیہو جہے انسان سن۔‏ کجھ کہندے نیں کہ اوہ نیک انسان سن،‏ کجھ کہندے نیں کہ اوہ نبی سن تے کجھ کہندے نیں کہ اوہ خدا سن۔‏ تواڈے خیال چ یسوع مسیح کون سن؟‏—‏کتاب دے آخر چ نکتہ نمبر 12 نُوں ویکھو۔‏

3.‏ یہوواہ خدا تے یسوع مسیح دے بارے جاننا کیوں ضروری اے؟‏

³ یسوع مسیح دے بارے جاننا بوہت ضروری اے۔‏ پر کیوں؟‏ پاک کلام چ دَسیا گیا اے کہ ہمیشاں دی زندگی صرف اوہ لوک پاؤن گے جیہڑ‌ے تینوں یعنی اِکو تے سچے خدا نُوں تے یسوع مسیح نُوں چنگی طرحاں جانن گے جنہوں تُوں گھلیا اے۔‏ (‏یوحنا 17:‏3‏)‏ واقعی جے تُسی یہوواہ خدا تے یسوع مسیح دے بارے تلیم حاصل کرو گے تے تُسی عدن وانگوں سوہنی زمین تے ہمیشاں لئی زندہ رہ سکو گے۔‏ (‏یوحنا 14:‏6‏)‏ ایہدے علاوہ،‏ تُسی یسوع مسیح دی مثال تے غور کرکے سکھو گے کہ تُسی دُوجیاں نال چنگی طرحاں کیویں پیش آ سکدے او تے زندگی چ خوشی کیویں حاصل کر سکدے او۔‏ (‏یوحنا 13:‏34،‏ 35‏)‏ باب نمبر 1 چ اَسی خدا دے بارے سکھیا سی۔‏ پر ایس باب چ اَسی سکھاں گے کہ پاک کلام چ یسوع مسیح دے بارے کیہہ دَسیا گیا اے۔‏

4.‏ لفظ مسیح دا مطلب کیہہ اے؟‏

⁴ یسوع دے پیدا ہون توں کئی سال پہلاں یہوواہ خدا نے وعدہ کیتا سی کہ اوہ مسیح نُوں زمین تے گھلے گا۔‏ لفظ مسیح دا مطلب اے مسح کیتا ہویا یعنی اِک ایسا بندہ جنہوں کسے خاص کم لئی مسح کیتا گیا اے یاں چُنیا گیا اے۔‏ یسوع نُوں ایہہ لقب ایس لئی دِتا گیا اے کیونکہ یہوواہ خدا نے اوہناں نُوں اِک خاص کم لئی چُنیا اے تے اوہناں نُوں اِک خاص رُتبہ دِتا اے۔‏ مسیح دے ذریعے ای خدا دے سارے وعدے پورے ہون گے۔‏ پر اوہ اَج وی تواڈی مدد کر سکدا اے۔‏ یسوع دے پیدا ہون توں پہلے بوہت سارے لوک ایہہ سوچدے سن کہ مسیح آخر کون ہوئے گا؟‏

5.‏ کیہہ یسوع دے شاگرد ایہہ من دے سن کہ یسوع ای مسیح نیں؟‏

⁵ یسوع دے شاگرداں نُوں پورا یقین سی کہ یسوع ای مسیح نیں۔‏ (‏یوحنا 1:‏41‏)‏ مثال دے طور تے شمعون پطرس نے یسوع نُوں کہیا سی کہ تُسی مسیح او۔‏ (‏متی 16:‏16‏)‏ اَسی ایہہ یقین کیوں رکھ سکنے آں کہ یسوع ای مسیح نیں؟‏

6.‏ یہوواہ خدا نے کیہہ کیتا تاکہ لوک مسیح نُوں پچھان لین؟‏

⁶ یسوع دے پیدا ہون توں بوہت پہلے خدا دے نبیاں نے کجھ ایسیاں گلاں دَسیاں سن جنہاں توں لوک مسیح نُوں پچھان سکدے سن۔‏ ایس گل نُوں سمجھن لئی اِک مثال تے غور کرو۔‏ فرض کرو توانوں سٹیشن تے کسے ایسے بندے نُوں لین لئی گھلیا جاندا اے جنہوں تُسی پہلے کدی نئیں ملے۔‏ پر توانوں اوہدے بارے کجھ ایسیاں گلاں دَسیاں جاندیاں نیں جنہاں توں تُسی اوہنوں پچھان سکدے او۔‏ ایسے طرحاں یہوواہ خدا نے اپنے نبیاں دے ذریعے پہلے توں دَس دِتا سی کہ مسیح کیہہ کجھ کرے گا تے اوہدے نال کیہہ کجھ ہووے گا تاکہ لوک مسیح نُوں پچھان سکن۔‏ جیہڑ‌ے لوک سچے دل نال مسیح دے بارے جاننا چاہندے نیں،‏ اوہ ایس گل تے غور کردے نیں کہ مسیح دے بارے پیشین‌گوئیاں کیویں پوریاں ہوئیاں۔‏ اِنج اوہناں نُوں پتہ لگ جاندا اے کہ یسوع ای مسیح نیں۔‏

7.‏ کیہڑیاں دو پیشین‌گوئیاں توں ثابت ہوندا اے کہ یسوع ای مسیح نیں؟‏

 ⁷ آؤ مسیح دے بارے دو پیشین‌گوئیاں تے غور کرئیے۔‏ یسوع دے پیدا ہون توں 700 سال پہلاں میکاہ نبی نے پیشین‌گوئی کیتی کہ مسیح بیت‌لحم دے چھوٹے جہے قصبے چ پیدا ہوئے گا۔‏ (‏میکاہ 5:‏2‏)‏ تے یسوع اوسے قصبے چ پیدا ہوئے۔‏ (‏متی 2:‏1،‏ 3-‏9‏)‏ فیر دانی‌ایل نبی نے پیشین‌گوئی کیتی کہ مسیح 29 عیسوی چ ظاہر ہوئے گا۔‏ (‏دانی‌ایل 9:‏25‏)‏ تے بالکل اِنج ای ہویا۔‏ پاک کلام چ ایہناں دو پیشین‌گوئیاں دے علاوہ ہور وی بوہت ساریاں پیشین‌گوئیاں نیں جنہاں توں ثابت ہوندا اے کہ یسوع ای مسیح نیں۔‏—‏کتاب دے آخر چ نکتہ نمبر 13 نُوں ویکھو۔‏

8،‏ 9.‏ یسوع دے بپتسمے تے کیہہ ہویا جدے توں ثابت ہوندا اے کہ اوہ ای مسیح نیں؟‏

⁸ یہوواہ خدا نے ایہہ گل صاف ظاہر کر دِتی کہ یسوع ای مسیح نیں۔‏ اوہنے یوحنا بپتسمہ دین والے نال وعدہ کیتا کہ اوہ اوہناں نُوں اِک نشانی وکھائے گا جدے توں یوحنا نُوں پتہ لگ جائے گا کہ مسیح کون اے۔‏ جدوں یسوع 29 عیسوی چ یوحنا کولوں دریائےیردن چ بپتسمہ لین آئے تے خدا نے یوحنا نُوں اوہ نشانی وکھائی جدا اوہنے وعدہ کیتا سی۔‏ بائبل چ لکھیا اے کہ بپتسمہ لین توں بعد یسوع فوراً پانی توں باہر آئے تے ویکھو اسمان کُھل گیا تے اوہناں نے ویکھیا کہ خدا دی روح کبوتر وانگوں اوہناں تے اُتر رہی اے۔‏ تے ایہدے نال ای اسمانوں ایہہ آواز وی آئی کہ ایہہ میرا پیارا پُتر اے جدے توں مَیں خوش آں۔‏ (‏متی 3:‏16،‏ 17‏)‏ یوحنا نُوں ایہہ نشانی ویکھ کے تے اسمانوں آؤن والی آواز سُن کے پتہ چل گیا کہ یسوع ای مسیح نیں۔‏ (‏یوحنا 1:‏32-‏34‏)‏ اوس دن یہوواہ نے یسوع تے اپنی پاک روح نازل کرکے اوہناں نُوں مسح کر دِتا۔‏ ایس طرحاں اوہ مسیح بن گئے۔‏ یہوواہ نے اوہناں نُوں اِک رہنما تے بادشاہ دے طور تے چُن لیا۔‏—‏یسعیاہ 55:‏4‏۔‏

⁹ بائبل چ لکھیاں پیشین‌گوئیاں،‏ اسمان توں یہوواہ خدا دی آواز تے یوحنا نُوں وکھائی گئی نشانی  توں ثابت ہوندا اے کہ یسوع ای مسیح نیں۔‏ پر یسوع کتھوں آئے سن تے اوہ کیہو جہے انسان سن؟‏ آؤ ویکھئے کہ بائبل ایہدے بارے کیہہ دَسدی اے۔‏

10.‏ پاک کلام دے مطابق یسوع مسیح زمین تے آؤن توں پہلے کتھے رہندے سن؟‏

¹⁰ پاک کلام چ دَسیا گیا اے کہ یسوع مسیح زمین تے آؤن توں پہلے اسمان تے رہندے سن‏۔‏ میکاہ نبی نے لکھیا کہ مسیح قدیم‌اُلایّام یعنی پُرانے زمانے توں سی۔‏ (‏میکاہ 5:‏2‏)‏ یسوع مسیح نے وی کئی  واری دَسیا سی کہ اوہ زمین تے آؤن توں پہلے اسمان تے رہندے سن۔‏ ‏(‏یوحنا 3:‏13؛‏ 6:‏38،‏ 62؛‏ 17:‏4،‏ 5 نُوں پڑھو۔‏)‏ زمین تے آؤن توں پہلاں وی یسوع مسیح دا یہوواہ خدا نال بڑا گُوڑھا رشتہ سی۔‏

11.‏ یہوواہ خدا یسوع مسیح نُوں بوہت پیار کیوں کردا اے؟‏

¹¹ یہوواہ خدا یسوع مسیح نُوں بوہت پیار کردا اے۔‏ ایہدی اِک وجہ ایہہ وے کہ یہوواہ خدا نے یسوع مسیح نُوں ساریاں چیزاں توں پہلے بنایا سی۔‏ ایس لئی یسوع نُوں پہلوٹھا کہیا گیا اے۔‏ * (‏کُلسّیوں 1:‏15‏)‏ یہوواہ خدا یسوع نُوں ایس لئی وی پیار کردا اے کیونکہ اوہنے صرف یسوع نُوں اپنے ہتھاں نال بنایا اے۔‏ ایس لئی یسوع نُوں اِکلوتا پُتر کہیا گیا اے۔‏ (‏یوحنا 3:‏16‏)‏ نالے یسوع ای اوہ واحد ہستی نیں جنہاں دے ذریعے یہوواہ خدا نے باقی ساریاں چیزاں بنائیاں نیں۔‏ (‏کُلسّیوں 1:‏16‏)‏ ایہدے علاوہ بائبل چ صرف یسوع نُوں ای کلام کہیا گیا اے کیونکہ اوہناں دے ذریعے یہوواہ نے فرشتیاں تے انساناں نُوں اپنے پیغام دِتے۔‏—‏یوحنا 1:‏14‏۔‏

12.‏ سانوں کیویں پتہ اے کہ خدا تے یسوع مسیح اِک ای ہستی نئیں؟‏

¹² کجھ لوک من دے نیں کہ خدا تے یسوع مسیح اِک ای ہستی نیں۔‏ پر پاک کلام دی تلیم ایہہ نئیں۔‏ پاک کلام چ دَسیا گیا اے کہ یسوع مسیح نُوں خلق کیتا گیا سی یعنی اوہناں دی زندگی دی شروعات ہوئی سی۔‏ پر یہوواہ خدا دی شروعات نئیں ہوئی کیونکہ اوہ آپ ساریاں چیزاں دا خالق اے۔‏ اوہ ہمیشاں توں موجود اے۔‏ (‏زبور 90:‏2‏)‏ یسوع مسیح نے کدی وی خدا دی برابری کرن دی کوشش نئیں سی کیتی سگوں اوہناں نے آپ کہیا سی کہ باپ میتھوں وڈا اے۔‏ (‏یوحنا 14:‏28 نُوں پڑھو؛‏ 1-‏کُرنتھیوں 11:‏3‏)‏ صرف یہوواہ خدا ای لامحدود طاقت دا مالک اے۔‏ (‏مکاشفہ 15:‏3‏)‏ پوری کائنات چ خدا نالوں وڈی تے طاقت‌ور ہستی ہور کوئی نئیں۔‏—‏کتاب دے آخر چ نکتہ نمبر 14 نُوں ویکھو۔‏

13.‏ پاک کلام چ ایہہ کیوں کہیا گیا اے کہ یسوع مسیح بالکل اَن‌دیکھے خدا وانگوں نیں؟‏

 ¹³ اسمان تے زمین نُوں بناؤن توں پہلے یہوواہ خدا تے یسوع مسیح نے لکھاں کروڑاں سال تک کٹھے کم کیتا۔‏ ذرا سوچو کہ اوہ اِک دُوجے نال کِنّاں زیادہ پیار کردے ہون گے۔‏ (‏یوحنا 3:‏35؛‏ 14:‏31‏)‏ یسوع مسیح نے اپنے باپ دِیاں خوبیاں نُوں اینی چنگی طرحاں ظاہر کیتا کہ پاک کلام چ دَسیا گیا اے کہ اوہ بالکل اَن‌دیکھے خدا وانگوں نیں۔‏—‏کُلسّیوں 1:‏15‏۔‏

14.‏ یسوع مسیح اِک انسان دے طور تے کیویں پیدا ہوئے؟‏

¹⁴ یسوع مسیح زمین تے آ کے اِک انسان دے طور تے رہن لئی تیار سن۔‏ پر ایہہ کیویں ہو سکدا سی؟‏ یہوواہ خدا نے اِک معجزہ کیتا۔‏ اوہنے اپنے بیٹے دی زندگی نُوں اِک کنواری کُڑی دے رحم چ پا دِتا جدا ناں مریم سی۔‏ یسوع دا باپ کوئی انسان نئیں سی ایس لئی اوہ گناہ توں بالکل پاک پیدا ہوئے۔‏ تے فرشتے دی ہدیت دے مطابق مریم نے اوہناں دا ناں یسوع رکھیا۔‏—‏لُوقا 1:‏30-‏35‏۔‏

15.‏ تُسی یہوواہ خدا نُوں چنگی طرحاں کیویں جان سکدے او؟‏

¹⁵ تُسی بائبل چ متی،‏ مرقس،‏ لُوقا تے یوحنا دِیاں کتاباں چوں یسوع مسیح،‏ اوہناں دی زندگی تے اوہناں دِیاں خوبیاں بارے بوہت کجھ سکھ سکدے او۔‏ ایہہ کتاباں انجیلاں کہلاؤندیاں نیں۔‏ یسوع مسیح بارے سکھن نال تُسی یہوواہ خدا نُوں وی چنگی طرحاں جان سکو گے کیونکہ یسوع مسیح بالکل اپنے باپ وانگوں نیں۔‏ ایسے لئی یسوع نے کہیا سی کہ جنہے مینوں ویکھیا اے اوہنے باپ نُوں وی ویکھیا اے۔‏—‏یوحنا 14:‏9‏۔‏

16.‏ (‏الف)‏ یسوع مسیح خاص طور تے لوکاں نُوں کدے بارے سکھاؤندے سن؟‏ (‏ب)‏ یسوع مسیح دی تلیم کدے وَلّوں سی؟‏

¹⁶ یسوع مسیح نُوں بوہت سارے لوک اُستاد کہندے سن۔‏ (‏یوحنا 1:‏38؛‏ 13:‏13‏)‏ اوہ خاص طور تے لوکاں نُوں بادشاہی دے بارے سکھاؤندے سن۔‏ پر کیہڑی بادشاہی بارے؟‏ خدا دی بادشاہی  بارے۔‏ ایہہ اِک ایسی حکومت اے جیہڑ‌ی اسمان توں زمین تے حکمرانی کرے گی تے جدے ذریعے اوہناں لوکاں نُوں برکتاں مِلن گیاں جیہڑ‌ے خدا دے حکماں تے چلدے نیں۔‏ (‏متی 4:‏23‏)‏ یسوع مسیح دی تلیم خدا وَلّوں سی۔‏ ایس لئی اوہناں نے کہیا سی کہ مَیں جیہڑ‌ی تلیم دینا واں اوہ میری نئیں سگوں اوہدی اے جنہے مینوں گھلیا اے۔‏ (‏یوحنا 7:‏16‏)‏ یسوع مسیح جان دے سن کہ خدا دی مرضی ایہہ وے کہ لوکاں نُوں خوش‌خبری سنائی جائے کہ خدا دی بادشاہی بوہت چھیتی زمین تے حکمرانی کرے گی۔‏

17.‏ (‏الف)‏ یسوع مسیح کتھے کتھے تلیم دیندے سن؟‏ (‏ب)‏ یسوع مسیح نے لوکاں نُوں تلیم دین لئی اینی محنت کیوں کیتی؟‏

¹⁷ یسوع مسیح کتھے کتھے تلیم دیندے سن؟‏ اوہ ہر اوس تھاں تے تلیم دیندے سن جتھے اوہناں نُوں لوک مِلدے سن۔‏ اوہ شہراں چ،‏ پنڈاں چ،‏ بازاراں چ،‏ عبادت‌گاہواں چ تے لوکاں دے گھراں چ تلیم دیندے سن۔‏ اوہ ایہہ نئیں سوچدے سن کہ لوکاں نُوں اوہناں کول آؤنا چاہی دا اے سگوں اوہ آپ لوکاں کول جا کے تلیم دیندے سن۔‏ (‏مرقس 6:‏56؛‏ لُوقا 19:‏5،‏ 6‏)‏ یسوع مسیح نے لوکاں نُوں تلیم دین لئی بوہت محنت کیتی تے ایس کم لئی اپنا بوہت سارا وقت استمال کیتا۔‏ پر اوہناں نے اِنج کیوں کیتا؟‏ کیونکہ اوہ ہمیشاں اپنے باپ دا کہنا من دے سن نالے جان دے سن کہ خدا دی مرضی ایہہ وے کہ اوہ لوکاں نُوں خدا بارے سکھاؤن۔‏ (‏یوحنا 8:‏28،‏ 29‏)‏ یسوع مسیح لوکاں نُوں ایس لئی وی تلیم دیندے سن کیونکہ اوہناں نُوں لوکاں تے ترس آؤندا سی۔‏ ‏(‏متی 9:‏35،‏ 36 نُوں پڑھو۔‏)‏ اوہناں نُوں پتہ سی کہ مذہبی عالم لوکاں نُوں خدا تے اوہدی بادشاہی بارے سچی تلیم نئیں دیندے۔‏ ایس لئی اوہ چاہندے سن کہ بادشاہی دی خوش‌خبری زیادہ توں زیادہ لوکاں تک پونچے۔‏

18.‏ توانوں یسوع مسیح دِیاں کیہڑیاں خوبیاں بوہت پسند نیں؟‏

¹⁸ یسوع مسیح لوکاں دی بڑی فکر رکھدے سن تے اوہناں نُوں بوہت پیار کردے سن۔‏ اوہ بوہت مہربان سن تے لوکاں نُوں اوہناں نال گل کرنا ذرا وی اوکھا نئیں سی لگدا۔‏ بچے وی یسوع نال بڑے خوش رہندے سن۔‏ (‏مرقس 10:‏13-‏16‏)‏ یسوع مسیح بےایمانی تے ناانصافی توں نفرت  کردے سن۔‏ اوہ بڑے انصاف‌پسند سن۔‏ (‏متی 21:‏12،‏ 13‏)‏ اوہناں دے زمانے چ عورتاں دا حق ماریا جاندا سی تے اوہناں نُوں کوئی عزت نئیں سی دِتی جاندی۔‏ پر یسوع مسیح عورتاں نال بڑی عزت نال پیش آؤندے سن۔‏ (‏یوحنا 4:‏9،‏ 27‏)‏ یسوع بڑے خاکسار وی سن۔‏ اِک واری تے اوہناں نے اپنے شاگرداں دے پیر دھوتے بھانویں کہ ایہہ کم عام طور تے نوکر کردے سن۔‏—‏یوحنا 13:‏2-‏5،‏ 12-‏17‏۔‏

19.‏ کیس مثال توں پتہ چلدا اے کہ یسوع مسیح لوکاں دی مدد کرنا چاہندے سن؟‏

¹⁹ یسوع مسیح لوکاں دِیاں لوڑاں نُوں سمجھ دے سن تے اوہناں دی مدد کرنا چاہندے سن۔‏ ایس گل دا ثبوت ایہہ وے کہ اوہناں نے خدا دی طاقت نال بوہت سارے بیماراں تے معذوراں نُوں شفا دِتی۔‏ (‏متی 14:‏14‏)‏ مثال دے طور تے اِک واری اِک کوڑھی یسوع مسیح کول آیا تے اوہناں نُوں کہن لگا کہ جے تُسی چاہوو تے تُسی مینوں ٹھیک کر سکدے او۔‏ یسوع نُوں اوہدے تے بوہت ترس آیا کیونکہ اوہ بوہت تکلیف چ سی۔‏ ایس لئی یسوع اوہدی مدد کرنا چاہندے سن۔‏ اوہناں نے اپنا ہتھ ودھا کے اوس کوڑھی نُوں چُھویا تے کہیا کہ مَیں تینوں ٹھیک کرنا چاہنا واں۔‏ تُوں ٹھیک ہو جا۔‏ تے اوہ کوڑھی بالکل ٹھیک ہو گیا۔‏ (‏مرقس 1:‏40-‏42‏)‏ ذرا سوچو کہ اوس ویلے اوہ بندہ کِنّاں خوش ہویا ہووے گا۔‏

20،‏ 21.‏ یسوع مسیح نے خدا دے فرمانبردار رہن دے سلسلے چ ودھیا مثال کیویں قائم کیتی؟‏

²⁰ یسوع مسیح نے خدا دے فرمانبردار رہن دے سلسلے چ بوہت ودھیا مثال قائم کیتی۔‏ اوہ ہر طرحاں دی مشکل چ خدا دے وفادار رہے۔‏ مثال دے طور تے جدوں شیطان نے اوہناں نُوں گمراہ کرن دی کوشش کیتی تے اوہ اوہدے جال چ نہ پھسے۔‏ (‏متی 4:‏1-‏11‏)‏ یسوع دے کجھ اپنے رشتےداراں نے اوہناں نُوں مسیح منن توں انکار کر دِتا تے کہیا کہ اوہدا تے دماغ خراب ہو گیا اے۔‏ فیر وی یسوع اوہ کم کردے رہے جیہڑ‌ا خدا نے اوہناں نُوں دِتا سی۔‏ (‏مرقس 3:‏21‏)‏ اوہ اوس ویلے  وی خدا دے وفادار رہے جدوں اوہناں دے دُشمناں نے اوہناں نُوں سخت تکلیف دِتی پر اوہناں نے بدلہ لین دی کوشش نہ کیتی۔‏—‏1-‏پطرس 2:‏21-‏23‏۔‏

²¹ بھانویں کہ یسوع نُوں بوہت دردناک موت دِتی گئی پر اوہ فیر وی خدا دے وفادار رہے۔‏ ‏(‏فِلپّیوں 2:‏8 نُوں پڑھو۔‏)‏ ذرا سوچو کہ یسوع نُوں اپنی موت والے دن کِنّی تکلیف سہنی پئی سی۔‏ سپاہیاں نے اوہناں نُوں گرفتار کیتا،‏ جھوٹھے گواہواں نے اوہناں تے کفر بکن دا الزام لایا،‏ بےانصاف ججاں نے اوہناں نُوں سزا سنائی،‏ لوکاں نے اوہناں دا مذاق اُڈایا،‏ سپاہیاں نے اوہناں نُوں ماریا کٹیا تے سُولی چڑھا دِتا۔‏ مردے ویلے یسوع نے اُچی آواز چ کہیا کہ سب کجھ مکمل ہو گیا اے۔‏ (‏یوحنا 19:‏30‏)‏ یسوع دی موت دے تِن دن بعد یہوواہ خدا نے اوہناں نُوں روح دے طور  تے زندہ کر دِتا۔‏ (‏1-‏پطرس 3:‏18‏)‏ ایہدے کجھ ہفتے بعد یسوع مسیح اسمان تے واپس چلے گئے تے خدا دے سجے ہتھ بیٹھ کے اوس ویلے دا انتظار کرن لگ پئے جدوں خدا اوہناں نُوں بادشاہ بنائے گا۔‏—‏عبرانیوں 10:‏12،‏ 13‏۔‏

22.‏ سانوں کیہڑا موقع مِل گیا اے؟‏

²² خدا دا مقصد اے کہ انسان عدن ورگی سوہنی زمین تے ہمیشاں تک زندہ رہن۔‏ کیونکہ یسوع مسیح یہوواہ خدا دے وفادار رہے ایس لئی انساناں نُوں زمین تے ہمیشاں تک زندہ رہن دا موقع مِل گیا اے۔‏ اگلے باب چ اَسی سکھاں گے کہ یسوع مسیح دی قربانی دے ذریعے ساڈے لئی ہمیشاں تک زندہ رہن دی راہ کیویں کُھل گئی اے‏۔‏