1, 2. (1) ¿Imanirtaq juk reqishqa nunapa o warmipa jutinta musyanqantsikllawanqa “alleqmi reqï” nishwantsu? (2) Wakinkunaqa, ¿ima niyantaq Jesuspaq?

MËTSIKAQ nunakunam y warmikunam alläpa reqishqa kayan. Itsachi qampis juk reqishqa nunata o warmita jutimpa reqinki. Peru ¿jutinta musyarllatsuraq “alleqmi reqï” ninkiman? Manachi. Alleq reqinëkipaqqa llapan vïdanta y imanö nuna o warmi kanqantaran alleq musyanëki.

² Diospa Tsurin Jesus Patsaman shamunqampitaqa 2.000 watanam pasarishqa, y itsachi qampis pëpaq parlayaqta wiyashqanki. Peru mëtsikaqmi Jesus pï kanqanta musyayantsu. Wakinqa juk alli nuna kanqanllatam pensayan. Wakinnam, “Diospa willakoqninmi karqan” niyan. Y wakinnam, Dios kanqanta pensayan. ¿Qamqa ima ninkitaq? (Rikäri 12 kaq nötata).

3. ¿Imanirtaq precisan Jehoväta y Jesucristuta alleq reqinëki?

³ Alläpam precisan Jesusta alleq reqinëki. Porqui Bibliam kënö nin: “Këmi imëyaqpis kawakïman chätsikun, qam japallan rasumpa kaq Diosta reqikäyäshunqëki, y qam kachamunqëki Jesucristuta reqikäyanqan” (Juan 17:3). Awmi, Jehoväta y Jesusta alleq reqirqa, mana wanushpa kawakïmanmi chëta  puëdinki (Juan 14:6). Jinamampis, Jesusta alleq reqinqëkiqa kanan tiempupis yanapashunkim, porqui pëpitam yachakunki imanö portakïta y nuna mayikita imanö tratëta (Juan 13:34, 35). Diosnintsikpitaqa 1 kaq capïtuluchönam alleq yachakurqunki. Kë capïtuluchöqa Jesuspaq Biblia ima ninqantam yachakunki.

4. ¿Ima ninantaq mesïas y cristu nishqan palabrakuna?

⁴ Jesus manaraq yurikuptinmi Jehoväqa Bibliachö willakurqan Mesïasta o Cristuta kachamunampaq kaqta. Hebreu idiömachö mesïas nishqan palabra, y griëgu idiömachö cristu nishqan palabraqa, Diospa Akrashqan ninanmi. Diosnintsikqa juk akrashqantam kachamunan karqan juk precisaq rurëta ruranampaq. Shamoq tiempuchöqa pëmi ruramunqa Diosnintsik llapan änimanqantsikkunata.

5. Jesuspa qateqninkunapaqqa, ¿pitaq Diospa Akrashqan karqan?

⁵ Jesuspa qateqninkunaqa alleqmi musyayarqan Diospa Akrashqanqa Jesus kanqanta (Juan 1:41). Juk kutim apostol Pëdru, “qamqa Cristum kanki” nirqan Jesusta (Mateu 16:16). ¿Y noqantsikqa imanötaq musyantsik Diospa Akrashqanqa Jesus kanqanta? Tsëta rikärishun.

6. ¿Imatataq Jehovä rurarqan Diospa Akrashqan pï kanqanta musyayänampaq?

⁶ Jesus yurikunampaq mëtsika watakunaraq pishikaptinmi,  Diospa willakoqninkunaqa willakuyarqan Diospa Akrashqan pï kanqanta imanö musyayänampaq kaqta. ¿Y imanirtaq tsëta rurayänan precisarqan? Këman pensarishun: juk mana reqinqëki nunata shuyänëkipaq juk agenciaman kachayäshunkiman. ¿Imaraq yanapashunkiman tsë nunata reqinëkipaq? Tsë nuna imanö kanqanta y imanö vistishqa kanqanta willayäshunqëkichi yanapashunkiman ¿aw? Tsënöllam Jehoväpis willakoqninkunata mandarqan, Diospa Akrashqan imakunata ruranampaq kaqta y imakunapa pasanampaq kaqta willakuyänampaq. Tsë willakïkuna cumplikaqta rikarmi, Diosta rasumpa kuyaqkunaqa musyayänan karqan Diospa Akrashqan pï kanqanta.

7. ¿Ima ishkë willakïkunataq rikätsikun Diospa Akrashqanqa Jesus kanqanta?

⁷ Ishkë willakïkunata rikärishun. Juk willakïtaqa Jesus yurikunampaq 700 wataraq pishikaptinmi escribiyarqan. Diospa willakoqnin Miquëasmi nirqan, Diospa Akrashqanqa Belen jutiyoq takshalla markachö yurikunampaq kaqta (Miquëas 5:2). ¡Y tsëchömi Jesusqa yurikurqan! (Mateu 2:1, 3-9). Juknin kaq willakïtaqa Diospa willakoqnin Danielmi escribirqan. Diospa Akrashqan pï kanqanqa 29 watachö musyakänampaq kaqtam nirqan (Daniel 9:25). Y tsëpis cumplikarqanmi. * Peru mas willakïkuna cumplikanqanmi rikätsikun Diospa Akrashqanqa Jesus kanqanta.

8, 9. ¿Imataq pasakurqan Jesus bautizakuriptin? Y ¿imatataq tsëqa rikätsikurqan?

 ⁸ Jehoväqa alleq clärum musyatsikurqan pë akranqanqa Jesus kanqanta. Bautizakoq Juantam nirqan, Diospa Akrashqanta reqinampaqqa juk señalta rikänampaq kaqta. Jesusqa 29 watachömi Juan bautizanampaq Jordan mayuman ëwarqan, y tsëchömi Juanqa juk señalta rikärirqan. Bibliam kënö nin: “Bautizariptinnam Jesusqa jinan höra yakupita yarqëkämurqan; y, ¡rikë!, ciëlum kichakärirqan, y Diospa santu espïrituntam paluma niraqta jananman shamïkaqta rikärirqan. ¡Rikë! Jina ciëlupitam kënö neq wiyakarqan: ‘Këmi Tsurï, kuyë Tsurï, pëpitam alläpa kushikü’” (Mateu 3:16, 17). Tsënöpam Juanqa alleq musyarirqan Diospa Akrashqanqa Jesus kanqanta (Juan 1:32-34). Tsë junaqmi Jehoväqa santu espïritunta Jesusman churarqan, y tsë höram Diospa Akrashqan këman chärirqan. Tsënömi Diosnintsikqa Mandakoq kanampaq y sirweqninkunata diriginampaq Jesusta akrarqan (Salmus 2:6; Isaïas 55:4).

⁹ Biblia willakunqankuna, y Jesus bautizakunqan junaq Jehovä ruranqankunam rikätsikun Diospa  Akrashqanqa Jesus kanqanta. Peru ¿mëpitataq pëqa shamurqan? ¿Imanö nunataq karqan? Biblia ima ninqanta rikärishun.

10. ¿Patsaman manaraq shamur Jesus mëchö y imanö kawanqantataq Biblia yachatsikun?

¹⁰ Bibliaqa yachatsimantsik Jesusqa ciëluchö mëtsika tiempupa kawanqantam, y tsëpitaraq Patsaman shamunqantam. Diospa willakoqnin Miquëasmi nirqan, Diospa Akrashqan kanampaq kaqqa, ‘unë witsampitana’ kawanqanta (Miquëas 5:2). Kikin Jesuspis atska kutichömi nirqan Patsaman manaraq shamurnin ciëluchö mëtsika tiempupa kawashqa kanqanta (leyi Juan 3:13; 6:38, 62, y 17:4, 5). Ciëluchö kawanqan witsanqa alläpa shumaqmi Jehovä Dioswan kawakuyarqan.

11. ¿Imanirtaq Jehoväqa Jesusta alläpa kuyan?

¹¹ Jehoväqa alläpam Jesusta kuyan. Porqui Jesusqa “llapan kamashqa kaqkunapita mas punta kaq” Tsurinmi. Jehoväqa pëtam llapampitapis mas puntata kamarqan (Colosensis 1:15). * Jina ‘japallan Tsurin’ kaptinmi Jesustaqa Diosnintsik alläpa kuyan. Porqui Diosnintsikqa japallanmi Jesusta kamarqan (Juan 3:16). Jinamampis Jesusllam imëkata rurëchö Jehoväta yanaparqan (Colosensis 1:16). Y Bibliaqa Jesusllatam ‘Palabra’ nishpa qayan, porqui pëtam Jehovä utilizarqan angelkunata y nunakunata imatapis musyatsinampaq (Juan 1:14).

12. ¿Imanötaq musyantsik Dioswan Jesusqa jukllëlla mana kayanqanta?

 ¹² Wakinqa pensayan Dioswan Jesus, ishkan jukllëlla kayanqantam, peru Bibliaqa manam tsënötsu yachatsikun (rikäri 14 kaq nötata). Antis Bibliaqa nin Jesustaqa Diosnintsik kamanqantam, tsëmi rikätsikun Jesusqa Diosnintsik kamariptinraq kawar qallanqanta. Peru Jehoväqa imëpis kawashqam. Y pëmi llapan imëkata kamashqa, peru pëtaqa manam pipis kamarqantsu (Salmus 90:2). Bibliaqa alleq clärum nin Diosnintsikqa Jesuspita mas puëdeq kanqanta. Y Jesusqa manam imëpis Dioswan igual tukurqantsu (leyi Juan 14:28; 1 Corintius 11:3). Jinamampis Jehovällam “Llapanta Puëdeq Diosqa” (Genesis 17:1). Pëllam pipitapis mas puëdeq y mas precisaq.

13. ¿Imanirtaq Bibliaqa nin Jesusqa ‘Dios niraq’ kanqanta?

¹³ Ciëlutawan Patsata manaraq kamarmi Jehoväwan Jesusqa mëtsika watakunapa juntu trabajayarqan. Tsënö mëtsika watakunapa juntu kashqa këkarqa alläpachi kuyanakuyarqan (Juan 3:35; 14:31). Bibliam nin Jesusqa ‘Dios niraq’ kanqanta. Porqui Jesusqa imëkachömi Teytannö karqan (Colosensis 1:15).

14. ¿Imatataq Diosnintsikqa rurarqan nunanö Jesus yurikunampaq?

¹⁴ Jesusqa nunakunata kuyarmi kë Patsaman shamurqan. Peru ¿imatataq Diosnintsik rurarqan nunanö yurikunampaq? Juk milagrutam rurarqan. Ciëluchö këkaq Tsurimpa vïdantam Marïa jutiyoq  shipashpa pachanman churarqan. Tsëmi Jesuspa teytanqa juk nunatsu karqan. Marïaqa juk jutsannaq llullutam qeshpikurqan, y Jesus nishpam jutin churarqan (Lücas 1:30-35).

15. ¿Imanirtaq Jesuspita alli yachakïta procuranëki?

¹⁵ Kikin Jesusmi, “noqata rikämashqa kaqqa, Teytatapis rikashqam” nirqan (Juan 14:9). Jesusqa imëkachömi Teytannö karqan, tsëmi pëpita yachakurqa Teytan Jehoväta maslla reqinki. Jesus imanö kawanqanta y imanö nuna kanqanta yachakunëkipaq leyi Bibliachö këkaq Mateu, Marcus, Lücas y Juan librukunata.

16. (1) ¿Imapitataq Jesus yachatsikurqan? (2) ¿Pipita yachakunqantataq Jesusqa yachatsikurqan?

¹⁶ Jesustaqa pï mëmi “Maestru” nishpa reqiyaq (Juan 1:38; 13:13). Pëqa “Diospa Gobiernumpita alli willakïkunata” yachatsikurmi masqa pureq. Porqui tsë Gobiernum ciëlupita patsë kë Patsata gobernamunqa, y llapan cäsukoq nunakunapaqmi imëka allikunata ruramunqa (Mateu 4:23). ¿Pipita yachakunqantataq Jesusqa yachatsikurqan? Pëqa llapantapis Jehoväpitam yachakurqan. Tsëmi, “yachatsikunqäqa manam noqapatsu, sinöqa kachamaqnïpam” nirqan (Juan 7:16). Jehoväqa munarqan, Diospa Gobiernun entëru Patsata gobernamunampaq kaqta llapan nunakuna musyayänantam, y tsëtam Jesusqa alleq musyarqan.

17. (1) ¿Mëkunachötaq Jesusqa yachatsikurqan? (2) ¿Imanirtaq nunakunata yachatsinampaq alläpa kallpachakurqan?

 ¹⁷ ¿Mëkunachötaq Jesus yachatsikurqan? Karu sitiukunachö, më tsë markakunachö, cällikunachö, mercädukunachö, templuchö, Diosta adorayänan wayikunachö y wayin wayinmi. Awmi, më tsëchömi yachatsikurqan. Manam nunakuna ashiyänantatsu shuyararqan, sinöqa kikinmi nunakunata ashirqan (Marcus 6:56; Lücas 19:5, 6). Jesusqa llapan tiempunwan y kallpanwanmi yachatsikurqan, porqui Teytan tsëta munanqantam musyarqan, y pëqa Teytan mandanqantam imëpis ruraq (Juan 8:28, 29). Jina nunakunata alläpa ankuparmi (llakiparmi) shumaq yachatsirqan (leyi Mateu 9:35, 36). Tsë tiempu religiösukunaqa manam rasumpa kaqtatsu Diospita y Gobiernumpita yachatsikuyaq. Tsëmi Jesusqa Diospa Gobiernumpita alli willakïkunata llapan nunakunata willarqan.

18. ¿Jesus imanö kanqantaq qamtaqa mas gustashunki?

¹⁸ Jesusqa alläpam nunakunata kuyaq, y alläpam pëkunapaq yarpachakoq. Y kuyakoq kaptinmi pï mëpis parlapëta munaq. Hasta wamrakunapis yachanäyaqmi (Marcus 10:13-16). Jesusqa alli kaqtam imëpis ruraq. Engañakïta y mana alli rurëkunataqa chikeqmi (Mateu 21:12, 13). Jesus kawanqan tiempuqa alläpa mana allipam warmikunata tratayaq, peru Jesusqa llapan warmikunatam alläpa respëtuwan tratarqan (Juan 4:9, 27). Jinamampis, pëqa alläpa humildim karqan. Tsëmi juk kuti apostolninkunapa chakinta paqapurqan (awipurqan), y tsë  tiempuqa sirwipakoqkunallam tsëtaqa mas rurayaq (Juan 13:2-5, 12-17).

19. ¿Imanötaq musyantsik Jesusqa nunakunata ankupanqanta y yanapëta procuranqanta?

¹⁹ Jesusqa musyarqanmi nunakunata imanö yanapëta, y llapankunata yanapëtam procurarqan. Tsëmi Diosnintsik qonqan poderwan mëtsikaq nunakunata kachakätsirqan (Mateu 14:14). Juk kutim lepra qeshyayoq nuna kënö nirqan: “Qam munarninqa kachakäratsimankimanmi”. Tsënam Jesusqa alläpa sufreqta rikarnin shonqupita patsë ankuparqan (llakiparqan), y “yatëkurmi kënö nirqan: ‘¡Munämi kachakänëkita!’”. Y jinan höram kachakärirqan  (Marcus 1:40-42). Pensari, ¿imanöraq tsë nuna sientikurqan?

20, 21. ¿Imatataq Jesuspita yachakuntsik?

²⁰ Jesuspitaqa yachakuntsik Diosnintsikta imëpis cäsukunapaqmi. Jesusqa imëka mana allipa pasëkarpis, y chikeqninkuna sufrikätsiyaptimpis, Teytan mandanqantam imëpis rurarqan. Diablu tentëta munaptimpis alleqmi tsarakurqan (Mateu 4:1-11). Jinamampis, wakin familiankunaqa manam creiyarqantsu Diospa Akrashqan kanqanta, antis löcu tikrashqa kanqantam pensayarqan. Peru  Jesusqa Jehovätam imëpis cäsukurqan (Marcus 3:21). Chikeqninkuna mana allipa tratëkäyaptimpis Diosnintsik munanqannömi imëpis portakurqan, tsëmi chikeqninkunapita vengakurqantsu (1 Pëdru 2:21-23).

²¹ Alläpa sufritsirnin wanutsiyänan kaptimpis, Jesusqa manam Jehoväta cäsukïta jaqirirqantsu (leyi Filipensis 2:8). Pensari wanutsiyanqan junaq imakunapa pasanqanman: mana allita ruraqtanömi prësuyarqan, “¡Diostam ofendishqa!” nirmi tumpayarqan, jutsannaqtam juezkuna condenayarqan, pï mëmi pëpita burlakuyarqan, wakin soldädukunam maqayarqan y juk qerumanmi clavayarqan. Jesusqa wanunampaqna këkarmi, “¡cumplikärishqam!” nirqan (Juan 19:30). Y wanutsiyanqampita kima (kimsa) junaqtam Jehoväqa kawariratsirqan, peru espïritu cuerpuyoqtanam kawaritsirqan (1 Pëdru 3:18). Y juk ishkë semänakuna pasariptinmi ciëluta kutikurqan, “y Diospa derëcha kaq lädunmanmi” täkurirqan Mandakoq kanampaq Teytan churanqanyaq (Hebrëus 10:12, 13).

22. ¿Imanö kawakïtataq puëdishun Teytanta Jesus llapanchö cäsukunqanrëkur?

²² Këyaq rikanqantsiknöpis, Jesusqa llapanchömi Teytan Jehoväta cäsukurqan. Y tsënö cäsukunqanrëkurmi juk shumaq Patsachö mana wanushpa kawakïta puëdishun, y tsëtam Jehovä Diosqa imëpis munashqa. Qateqnin kaq capïtuluchönam yachakurishun, tsënö kawakunapaq Jesus wanunqan imanö yanapamanqantsikta.