1, 2. (a) Ckam yachaspá sutinta huaquin ancha ’rejsisckasmanta, ¿niyta munan ima allít paycunata ’rejsicunqui? Esplícay. (b) Gente Jishumanta, ¿imát creen?

 ASHCA personas ancha ’rejsisckas túcuy mundupi tían. Ckam sutinta huaquin paycunamanta yachayta atinqui. Pero sutisnincuta yachayta mana niyta munan ima paycunata allít ’rejsicunqui. Cá mana niyta munan ima ckam yachanqui imaina cancu ni túcuy causaynincupi ’ruasckancuta.

² Dejuro ckam Jishumanta ’rimayta uyareranqui aunque Ashpapi ancha únay causara. Mana túcuy gente yachan ima laya persona Jishu cara. Huaquin nincu suj alli ckari cara, sujcuna nincu suj profeta cara, y huaquin creencu pay Tata Yaya can. Ckam, ¿imát ninqui? (Ckáay Astaan yacháypaj 12, paginapi 211).

3. ¿Imajchus alli can ckam yachanayquita Tata Yayamanta y Jishumanta?

³ Alli can verda Jishumanta ckam yachanayquita. ¿Ímaj? Biblia niáysh: «Cay niyta munan únay unáypaj causayta, ckamta ’rejsisus seguichuncu, sujlla Yaya verdaderu, y chackaymanta pít ckam cacharanqui, Jesucristu» (Juan 17:3). Chayna can, si ’rejsinqui verda Jehovamanta y Jishumanta, únay unáypaj causayta atinqui, caypi, Ashpapi suj jardín ina ’ruascka (Juan 14:6). Jishumantapas yachayta yanapasun imaraycu pay astaan súmaj ejemplu can imaina causayta y sujcunata  tratayta (Juan 13:34, 35). Capitulopi 1 aprenderáysh verda Tata Yayamanta. Cunan apréndej ’ríysh Biblia nisckanta Jishumanta.

4. ¿Imát niyta munan «Mesías» o «Cristo»?

⁴ Ancha únay manáraj Jishu huachascka captin, Jehová prometera Mesiasta o Cristota cachanman. «Mesías» ckallu hebreomanta amun y «Cristo» ckallu griegomanta amun. Cay íshcay titulus niyta munan Tata Yaya Mesiasta ajllanman rey canánpaj. Mesías túcuy Tata Yaya nisckanta cumplicunanta ’ruanan tiara. Jishu cunan punchaupas yanapasuyta atin. Pero manáraj Jishu huachascka captin ashca gente tapunacora: ‹¿Pichus Mesías cancka?›

5. ¿Jíshup discipulosnin creerancu pay Mesías cara?

⁵ Jíshup discipulosnin seguros tiarancu pay Mesías cara (Juan 1:41). Suj ejemplu, Shimu Pilu Jishút nipora: «Ckam Cristo canqui» (Mateo 16:16). ¿Imaina seguros tiayta atíysh Jishu Mesías can?

6. ¿Imaina Jehová yanapacora picunasta payta casucuyta munancu yachanancunápaj pichus Mesías can?

⁶ Ancha únay manáraj Jishu huachascka captin, Tata Yáyap profetasnin ashca imastis escriberancu gente yachanánpaj pichus Mesías cara. ¿Imaina yachancuman? Por ejemplu, si mañasuncu terminal colectivusmanta ’rinayquípaj maypi ashca gente ’rin, mascanayquípaj suj personát mana ’rejsinqui. Si nisuncu imaina chá persona can, imaina vestiscka amun, ligerót tariyta atinqui. Chaynapas Jehová profetasta utilisara niaanáyshpaj imát Mesías ’ruanman, imát sucedepunman. Cumplimientu túcuy  profeciasmanta yanapanman picunasta Tata Yayát casucuyta munancu yachanancunápaj ima Jishu Mesías can.

7. ¿Mayckan cancu íshcay profecías ima ckaachincu Jishu Mesías casckanta?

⁷ Íshcay cá profeciasmanta ckáaj ’ríysh. Huámaj, 700 huatas manáraj Jishu huachascka captin, Miqueas nera Mesías ciudar Belenpi huachascka canman (Miqueas 5:2). ¡Y chaypi Jishu huachascka cara! (Mateo 2:1, 3-9). Huámaj huasan, Daniel nera Mesías 29 e.c. * huatapi ’ricurinman (Daniel 9:25). Caycuna cancu ishcaylla ashca profeciasmanta ima allít ckaachincu Jishu Mesías casckanta pít Tata Yaya cáchaj ’rera (Ckáay Astaan yacháypaj 13, paginapi 211).

8, 9. ¿Imát sucedera Jishu bautisacuptin ima ckaachin pay Mesías casckanta?

⁸ Jehová allít ckaachera Jishu Mesías casckanta. Tata Yaya Juanchu Bautistata suj señal ckopunanta nipora, yachanánpaj pít cara Mesías. Áicap Jishu Juanchuman ’rera bautisacúypaj mayu Jordanpi, 29 e.c. huatapi, Juanchu chá señal ckaara. Biblia niáysh sucedesckanta: «Jishu bautisascka cas chaymanta, chayllapi yacumanta llojsera; ¡y ckáay! cielos quicharicorancu y pay ckaara Tata Yáyap espíritu santunta paloma ina uraycus paypa saanpi amora. ¡Ckáay! Astaanpas, cielomanta Tata Yaya, nera: ‹Cay huáay can,  pít munani y pít aprobarani›» (Mateo 3:16, 17). Áicap Juanchu cá señal ckaara y uyarera, yachara Jishu Mesías casckanta (Juan 1:32-34). Chá punchaupi, áicap Jehová espiritunta Jíshup saanpi ichara, Jishu Mesías cayta chayara. Pay cara pít Tata Yaya ajllara rey y caudillu canánpaj (Isaías 55:4).

⁹ Profecías Bibliamanta, Jehová nisckanta, y señal ima ckora áicap Jishu bautisacora, ckaachin Jishu Mesías casckanta. Pero, ¿maymanta Jishu amora, imaina cara? Ckáaj ’ríysh Biblia yachachisckanta.

10. Biblia, ¿imát yachachin Jíshup causayninmanta manáraj Ashpaman amuptin?

¹⁰ Biblia yachachin ima Jishu manáraj Ashpaman amus ancha ashca tiempu cielopi causara. Miqueas nera Mesías causara manáraj Tata Yaya Ashpát ’ruaptin (Miqueas 5:2). Jishu ashca cutis nera cielopi causasckanta manáraj Ashpapi huachascka cas suj persona ina (Juan 3:13; 6:38, 62; 17:4, 5 léey). Manáraj Jishu Ashpaman amus ancha súmaj amistar Jehovaan apera.

11. ¿Imajchus Jehová Jishút ashcata munan?

¹¹ Jehová Jishút ashcata munan. ¿Ímaj? Imaraycu Tata Yaya manáraj tucuyta y tucuycunát ’ruas payta ’ruara. Chayraycu Jishu «huamajnin túcuy ’ruasckanmanta» can * (Colosenses 1:15). Jehová Jishút ashcata munan imaraycu payta ’ruara ni pipaspa yanapanuan. Chayraycu huajyancu «Huaan unigenitu» (Juan 3:16). Jishu Jehovát yanapara túcuy imastistas ’ruanánpaj (Colosenses 1:16). Y Jishullát huajyancu «Palabra», imaraycu Jehová payta cachara Jehóvap sutinpi angelesta y personasta ’rimapucunánpaj (Juan 1:14).

12. ¿Imaina yacháysh Jishu y Tata Yaya mana quiquin cancu?

¹² Huaquin personas creencu ima Jishu y Tata Yaya sujlla persona cancu. Pero Biblia chayta mana yachachin. Biblia nin Jishu ’ruascka cara, chá niyta munan Jishu suj ckallariyta apin. Pero Jehová, pi túcuy imastista ’ruara, ni pipas payta ’ruara (Salmo 90:2).  Tata Yáyap huaan ina, Jishu ni aicappas Tata Yaya cayta munara. Biblia allít yachachin Tatan astaan autoridar apin y mana Huaan (Juan 14:28 léey; 1 Corintios 11:3). Jehovalla «Yaya Túcuy Atiyníyoj» can (Génesis 17:1). Pay astaan atiyníyoj can y autoridar apin túcuy cielopi y Ashpapi (Ckáay Astaan yacháypaj 14, paginapi 213).

13. ¿Imajchus Biblia nin ima Jishu Jehovaman llijchacun?

¹³ Jehová y Jishu, ancha ashca huatas cuscas llamcarancu manáraj cielu y Ashpa ’ruascka captin. Chayraycu, ¡ashcata munanacuncu! (Juan 3:35; 14:31). Jishu allít yachapiara imaina tatan cara, chayraycu Biblia paymanta nin: «Llijchacun Yayaman ima mana ckaacun» (Colosenses 1:15).

14. ¿Imaina atera Jehóvap Huaan munascka persona ina huachascka cayta?

¹⁴ Jehóvap huaan dispuestu tiara cielót sackéypaj y Ashpapi persona ina huachascka cayta. ¿Imaina ’ruacunman? Jehová suj milagrót ’ruas, Huaanpa causayninta Máriap huicsanpi churara. Chayna, Jishu mana suj tata humano apiyta presisara. Chayna Maria apera suj huaa mana ucháyoj, y suti Jishu churapora (Lucas 1:30-35).

15. ¿Imaina Jehovát allít ’rejsiyta atíysh?

¹⁵ Jishumanta ashcát aprendeyta atíysh, causayninmanta y cualidaresninmanta, Bibliapi lees, Mateo, Marcos, Lucas y Juan. Chá librus Evangelius huajyasckas cancu. Jishu tatan ina can, leesckayquita yanapasun Jehovát allít ’rejsinayquípaj. Chayraycu Jishu nera: «Pi nockát ckaara Tatayta ckaara» (Juan 14:9).

16. Jishu, ¿imát yachachera? ¿Maymanta amora Jishu yachachisckanta?

 ¹⁶ Ashca personas Jishút «yacháchej» huájyaj carancu (Juan 1:38; 13:13). Suj imasti astaan importante ima pay yachachera «alli noticias Reinumanta» cara. ¿Ima can cá Reinu? Tata Yáyap gobiernun can y túcuy Áshpap saanpi cielomanta gobérnaj ’rin y bendiciones apamoncka túcuy personáspaj ima Tata Yayát casucuncu (Mateo 4:23). Túcuy Jishu yachachisckanta Jehovamanta amora. Jishu nera: «Nocka yachachisckayta mana Nóckap can, manapé can pitmanta cachaara» (Juan 7:16). Jishu yachara ima Jehová munan gente uyarinanta alli noticiasta Tata Yáyap Reinunmanta ima Áshpap saanpi gobérnaj ’rin.

17. ¿Maypi Jishu yacháchej cara? ¿Imajchus esforsacora sujcunasta yachachíypaj?

¹⁷ ¿Maypi Jishu yachachera? Túcuy lauspi, maypi personasta tarera. Pay yachachera pampapi, ciudarespi, pueblospi, mercadospi, lugarespi adoraciunmanta, y personaspa huasisnincupi. Mana súyaj cara gente payman amunanta. Pay paycunaman ’rej cara (Marcos 6:56; Lucas 19:5, 6). Jishu ancha esforsacora personastas yachachíypaj. ¿Ímaj? Yachara ima Tata Yaya munara chayta ’ruananta imaraycu Tatanta casúcoj cara (Juan 8:28, 29). Jishu predicara imaraycu persunasta ancha munara (Mateo 9:35, 36 léey). Ckaara ima yacháchej religiosos mana verdarta yachachishcarancu Tata Yayamanta ni Reinunmanta. Chayna yanapayta munara túcuy personas uyarinancunápaj alli noticiasta.

18. ¿Ima Jíshup cualidaresnin astaan gustasun?

¹⁸ Jishu suj ckari cara gentét munara y paycunaraycu  preocupácoj cara. Amable cara y payuan ’rimayta átej carancu. Huahuitaspas payuan ’rimayta múnaj carancu (Marcos 10:13-16). Jishu tucuypi justo cara. Injusticiát y corrupcionta chéjnej cara (Mateo 21:12, 13). Causara tiempuspi maypi huarmis mana ashca derechos aperancu y mana respetuan tratasckas carancu. Pero, Jishu siempre tratara huarmistas respetuan y dignidaruan (Juan 4:9, 27). Jishu humilde cara. Por ejemplu, suj tuta apostulespa chaquisnincuta mayllapucora, chayta sirvientes ’rúaj carancu (Juan 13:2-5, 12-17).

19. ¿Ima ejemplu ckaachin ima Jishu yachara gente presisasckanta, y chayraycu yanapacuyta munara?

¹⁹ Jishu yachara gente presisasckanta, chayraycu yanapacuyta munara. Cayta ckaachera áicap Tata Yáyap atiyninta utilisara gentét ampicunánpaj (Mateo 14:14). Por ejemplu, suj ckari lepráyoj Jishuman ckemicora y nipora: «Si tan solo munanqui, ampiayta atinqui». Jishu usora chá ckárip usuyninta y nanayninta ckaas. Paycka chá ckariraycu pena apera, chayraycu yanapayta munara. Chayna Jishu maquinta aysaris, ckarít chamcas nipora: «¡Munani! Limpiu cay». ¡Y ckari ampicora! (Marcos 1:40-42). ¿Imát ninqui? ¿Imaina chá ckari senticora?

20, 21. ¿Imajchus Jishu Tata Yayát casucus suj súmaj ejemplu can?

²⁰ Jishu Tata Yayát casucus suj súmaj ejemplu can. Mana importas sucedesckanta o enemigusnin payta ’ruapusckancuta, fiel Tatanta cara. Por ejemplu, Jishu mana uchara áicap Súpay tentachiyta munara (Mateo 4:1-11). Huaquin turasninmanta mana creerancu pay Mesías cara y nerancu «tontoyara», pero Jishu  mana ’ruayta sackera Tata Yaya nipusckanta (Marcos 3:21). Áicap enemigusnin payta usucherancu, Jishu fiel Tata Yayát cara y ni aicappas quiquisitunta ’ruapucuyta munara (1 Pedro 2:21-23).

²¹ Áicap Jishu usora suj sajra huañuyta y ancha nanayuan, fiel Jehovát cara (Filipenses 2:8 léey). Pénsay túcuy aguantanan tiasckanta chá punchau ima huancherancu. Preso pusarancu, llullas testigos nerancu Tata Yayamanta mana allít ’rimara, jueces mana allis condenarancu, gente mana munarancu paymanta asicorancu, y soldados usucherancu, mackas, tockapus y suj caspi ’racupi clavarancu. Áicap huañushcara ckaparera:  «Na ’ruacora» (Juan 19:30). Quimsa punchaus Jishu huañusckanmanta, Jehová causachera y suj cuerpo espiritual mana aichamanta y tullumanta ckora (1 Pedro 3:18). Huaquin semanas chaymanta cieloman voliacora, «Tatanpa checkallanpi tiacora», y suyara Tata Yaya rey ’ruapunancama (Hebreos 10:12, 13).

22. Jishu fiel tatanta casckanraycu, ¿ima suyana apíysh?

²² Imaina Jishu Tatanta fiel cara, chayraycu cunan apíysh suyana únay unáypaj causáypaj Ashpapi suj jardín ina ’ruascka, imaina Jehová munara. Capítulo amojpi, estudiasúysh imaina Jíshup huañuynin yanapaáysh únay unáypaj causayta atináyshpaj.