1, 2. a) ¿Sutinta yachaspallachu pitapas allinta reqsiwaq? b) ¿Ima ninkun askha runakuna Jesusmanta?

KAY mundopiqa kanmi allin reqsisqa runakuna. Yaqapaschá wakinpa sutinta yachanki. Ichaqa, ¿sutinta yachaspallachu niwaq: “Allintan chay runataqa reqsini”, nispa? Manan ¿riki? Manan yachankichu imayna kausasqanta imayna runa kasqantapas.

² Kay allpapi kasqanmanta 2.000 watakunaña pasarun chaypas uyarirankichá Jesusmantaqa. Askha runakunan ichaqa mana yachankuchu pi kasqanta. Chaymi wakinqa ninku: “Jesusqa allin runan karan”, nispa. Jujkunataq ninku: “Profetan karan”, nispa. Wakintaq ninku: “Jesusqa Diosmi”, nispa. Qanri, ¿ima ninkin? (Qhaway 12 willakuyta.)

3. ¿Imaraykun Jehová Diostapas Jesustapas allinta reqsinayki?

³ ¿Imaraykun Jesusta allinta reqsinayki? Biblian nin: “Wiñay kausayta chaskinankupaqqa qan sapallan cheqaq Diostan reqsinanku, reqsinallankutaqmi kachamusqayki Jesucristotapas”, nispa (Juan 17:3). Jehová Diosta Jesustapas allinta reqsispan wiñay kausayta chaskinki (Juan 14:6). Jinaspapas Jesusmanta yachasqaykin yanapasunki allinta kausanaykipaq jujkunata sumaqta tratanaykipaqpas (Juan 13:34, 35). Primer kaq capitulopin yacharanchis Diosmanta, kunantaq Jesusmanta yachasun.

4. ¿Ima ninantan nin Mesías otaq Cristo simikuna?

⁴ Askha watakuna ñaupaqtañan Jehová Diosqa Bibliapi prometeran Mesías otaq Cristo chayamunanta. Hebreo rimaypin Mesías nikun, griego rimaypitaq Cristo nispa, iskaynin simikunan “ajllasqa” ninanta nin. Jesustan Mesías nikun Jehová Dios juj importante llank’ayta ruwananpaq ajllasqanrayku. Jamuq tiempopin Jesusqa Diospa llapa promesankunata cumplichinqa.

5. ¿Imamantan seguro kasharanku Jesuspa discipulonkuna?

⁵ Jesuspa discipulonkunaqa seguron kasharanku Jesuspuni Mesías kasqanmanta (Juan 1:41). Chaymi apóstol Pedropas niran: “Qanqa Criston kanki”, nispa (Mateo 16:16). ¿Imaynapin noqanchispas seguro kasunman Jesuspuni Mesías kasqanmanta? Chaymanta kunan yachasun.

6. ¿Imaynatan Jehová Dios yanapawaranchis Mesiasta reqsinanchispaq?

⁶ ¿Imaynatan mana reqsisqayki runata terminalpi tariwaq? Sichus willasunkikuman imayna p’achasqa kasqanta, imayna uyayoq kasqanta, sayaynintapas chayqa tariwaqmi ¿riki? Chhaynatan Jehová Diospas profetankunawan willachiranña Mesías imakuna ruwananta, imakunachus paywan pasananmantawan. Chay profeciakuna Jesuspi cumplikusqanta rikuspan allin sonqoyoq runakunaqa yachankuman Jesús Mesías kasqanta.

7. ¿Ima profeciakunan rikuchin Jesús Mesías kasqanta?

⁷ Kunan yachasun iskay profeciakunamanta. Jujninmi qelqakuran 700 wata ñaupaqta manaraq Jesús  naceshaqtin, profeta Miqueasmi willaran Belén sutiyoq juch’uy llaqtachapi Mesías nacenanta (Miqueas 5:2). ¡Jesusqa chaypin naceran! (Mateo 2:1, 3-9.) Profeta Danieltaq willaran 29 watapi Mesías rijurimunanta (Daniel 9:25). Chaypas junt’akuranmi. * Jesuspuni Mesías kasqanmantaqa askha profeciakunan kashan, kunanqa iskayllamantan yacharanchis.

8, 9. ¿Jesús bautizakushaqtin imakuna pasasqanmi rikuchiran Jesuspuni Mesías kasqanta?

⁸ Qhawarisqanchis jina Jehová Diosqa sut’itan rikuchiran Jesús Mesías kasqanta. Bautizaq Juanmanpas prometeranmi Mesiasta reqsinanpaq juj señalta rikuchinanpaq. 29 watapin Jesusqa Jordán mayuta riran Juan bautizananpaq, jinan Juanqa chay señalta rikuran. Jesús bautizakushaspa unumanta lloqsimuqtin jinan cielo kicharikuran, jinaspa Juanqa Diospa espiritunta rikuran paloma jina Jesús pataman uraykamushaqta. Chaymantataq cielomanta juj kunka nimuran: “Kaymi Churiyqa, paytan munakuni, payqa sonqoypaq jinan”, nispa (Mateo 3:16, 17). Chayta rikuspa uyarispa iman Juanqa yacharan Jesuspuni Mesías kasqanta (Juan 1:32-34). Chay p’unchaymi Diosqa Jesusman santo espiritunta kachaykamuran, jinan Jesusqa Mesías kapuran. Paytan Diosqa  ajllaran rey umalliq ima kananpaq (Salmos 2:6; Isaías 55:4).

⁹ Bibliapi profeciakuna junt’akusqan, Jesús bautizakushaqtin Diospa ruwasqanpas rimasqanpas sut’itan rikuchiran Jesús Mesías kasqanta. Ichaqa, ¿maymantan Jesús jamuran? ¿Imayna runan karan? Chaymanta kunan yachasun.

10. ¿Ima textokunan rikuchin Jesús manaraq kay allpaman jamushaspa janaq pachapiña kausasqanta?

¹⁰ Biblian willan kay allpaman Jesús manaraq jamushaspa askha watakunaña janaq pachapi kausasqanta. Profeta Miqueaspas willaranmi Mesías ñaupa tiempomantaña kasqanta (Miqueas 5:2, NM). Jesús kikinpunin askha kutita niran manaraq kay allpapi naceshaspa janaq pachapi kausasqanta. Chaypiqa kusisqan papanwan kausaran (leey Juan 3:13; 6:38, 62; 17:4, 5).

11. ¿Imaraykun Jehová Dios Jesusta anchata munakun?

¹¹ Jehová Diosqa anchatan Jesusta munakun, ‘tukuy imamantapas payta ñaupaqta kamasqanrayku’ (Colosenses 1:15). * Chaymantapas Jesustan nikun: ‘Sapallan Churi’, nispa. ¿Imarayku? Mana piqpa yanapayninwan Jehová Dios payta kamasqanrayku (Juan 3:16). Jinaspapas Jesusllan papanta yanaparan tukuy ima kaqkunata kamaypi (Colosenses 1:16). Chaymantapas Jesustan “Simi” nispa nikun, angelkunaman runakunaman imachus ruwanankuta Jehová Dios Jesuswan willachisqanrayku (Juan 1:14).

12. ¿Imaynapin yachanchis Jesuswan Dioswan mana igualchu kasqankuta?

¹² Wakin runakunan piensanku Dioswan Jesuswan kaqlla kasqankuta (qhaway 14 willakuyta). Biblian  ichaqa willan Jesús kamasqa kasqanta. Jehová Diosmi ichaqa karanpuniña, paytaqmi tukuytapas kamaran (Salmos 90:2). Bibliaqa sut’itan willan Churimantaqa Taytan kuraq kasqanta. Jesusqa manan jayk’aqpas papanwanqa igualakuranchu (leey Juan 14:28; 1 Corintios 11:3). Jinaspapas Jehová Diosllan tukuy atiyniyoqqa, manan pipas paymanqa igualanmanchu (Génesis 17:1).

13. ¿Imaraykun Biblia nin: “Jesusqa mana rikuna Diospa rijch’ayninmi”, nispa?

¹³ Manaraq janaq pachata kay allpatapas kamashaspan Dioswan Jesuswanqa millón-millón watakunata kuska llank’aranku. Chay tiempopiqa ¡anchatachá munanakuranku! (Juan 3:35; 14:31.) Biblian nin Jesusqa ‘mana rikuna Diospa rijch’aynin’ kasqanta. ¿Imaraykun chayta nin? Papan jinapuni munakuq sumaq sonqo kasqanrayku (Colosenses 1:15).

14. ¿Imaynapin Jesús runa jina naceran?

¹⁴ Jesusqa munaranpunin kay allpaman jamuyta. Ichaqa, ¿imaynatan kay allpapi runa jina naceran? Jehová Diosmi juj milagrota ruwaspa Churinpa kausayninta Mariaq wijsanman astamuran, chaymi Jesusqa mana juchayoq naceran. Chayraykun Jesuspa papanqa mana juj runachu karan (Lucas 1:30-35).

15. ¿Imaynatan aswan allinta Jehová Diosta reqsiwaq?

¹⁵ Jesusmi niran: “Noqata rikuwaqqa Yayatapas rikullantaqmi”, nispa (Juan 14:9). Jesusqa papan jinapunin munakuq sumaq sonqo khuyapayakuq karan. Chaymi paymanta astawan yachaspa Jehová Diosta  aswan allinta reqsinki. Jesuspa vidanmanta imayna kasqanmantawan astawan yachanaykipaqqa Mateo, Marcos, Lucas, Juan librokunatan leewaq.

16. a) ¿Imamantan Jesús astawan yachachiran? b) ¿Imaraykun Jesús niran: “Yachachisqayqa manan noqaqchu”, nispa?

¹⁶ Askha runakunan Jesustaqa “yachachikuq” niranku (Juan 1:38; 13:13). Jesusqa Diospa gobiernonmantan astawanqa yachachiran. Chay gobiernon janaq pachamanta kay allpaman askha bendicionkunata apamunqa Diosta kasukuq runakunapaq (Mateo 4:23). Jesusqa papanpa yachachisqanman jinan yachachiran, chaymi niran: “Yachachisqayqa manan noqaqchu, aswanpas kachamuwaqniypan”, nispa (Juan 7:16). Diosqa munanmi gobiernonmanta yachanankuta, chaytan Jesusqa allinta yacharan.

17. a) ¿Maykunapin Jesús yachachiran? b) ¿Imaraykun kallpachakuran runakunata yachachinanpaq?

¹⁷ ¿Maykunapin Jesús yachachiran? Runakunaq may kasqanpi: campokunapi, llaqtakunapi, juch’uy llaqtakunapi, mercadokunapi, templopi, sinagogakunapi, wasikunapipas. Payqa manan runakuna maskhanantaraqchu suyaran, aswanpas paymi runakunata maskharan (Marcos 6:56; Lucas 19:5, 6). Papanpa munaynin kasqanraykun Jesusqa kallpachakuran tukuy tiemponwan yachachinanpaq (Juan 8:28, 29). Chaymantapas runakunata khuyapayasqanraykun yachachiran (leey Mateo 9:35, 36). Religionpi umalliqkunaqa manan cheqaqtachu Diosmanta gobiernonmantapas yachachiranku. Chaymi Jesusqa llapa runakunaman Diospa gobiernonmanta yachachiyta munaran.

18. ¿Jesuspa imayna kasqanmi astawan gustasunki?

 ¹⁸ Jesusqa anchatan runakunata munakuran yanapaytataqmi munaranpas, chaymi wawakunapas paywan kayta munaqku (Marcos 10:13-16). Chaymantapas chanintan imatapas ruwaq, cheqnikurantaqmi mana allin ruwaykunata (Mateo 21:12, 13). Jesuspa tiemponpiqa manan warmikunata respetowanchu trataqku, Jesusmi ichaqa warmikunata respetowan trataran (Juan 4:9, 27). Jinaspapas humilden karan, chaymi discipulonkunaq chakinta maqchiran, chaytaqa sirvientekunallan ruwaqku (Juan 13:2-5, 12-17).

19. ¿Ima ejemplon rikuchiwanchis runakunapi Jesús interesakusqanta?

¹⁹ Jesusqa yacharanmi runakuna imachus necesitasqankuta, chaymi yanapayta munaran. Chaytaqa rikuchiran Diospa atiyninwan runakunata qhaliyachispan (Mateo 14:14). Juj kutinmi lepra onqoyniyoq runa Jesusman jamuspa niran: “Munanki chayqa, atinkin qhaliyachiwayta”, nispa. Chay runaq sufrisqanta rikuspan Jesusqa khuyapayaran, makinta jaywarispataq llamiykuran, jinaspa niran: “Arí, munanin, qhali kapuy”, nispa. Jinan chay runaqa qhaliyapuran (Marcos 1:40-42). ¡Chay runaqa anchatachá kusikuran qhaliyapuspaqa!

20, 21. Jesusqa tukuypin papanta kasukuran, ¿imaraykun chayta ninchis?

²⁰ Jesusqa tukuypin Jehová Diosta kasukuran imapiña tarikuspapas enemigonkunaña imaymanata ruwaranku chaypas. Satanás tentaqtinpas manan juchallikuranchu (Mateo 4:1-11). Jinaspapas wakin  hermanonkunan locota jina qhawariranku, manataqmi Mesías kasqanpi iñirankuchu, chaywanpas Jesusqa Diostan kasukushallaran (Marcos 3:21). Enemigonkuna millayta trataqtinkupas manan paykunamanta vengakuranchu (1 Pedro 2:21-23).

²¹ Wañupunan p’unchaymi enemigonkuna Jesusta imaymanawan ñak’arichiranku, chaywanpas wañupunankaman Diosta kasukuran (leey Filipenses 2:8). Chay p’unchaypin suwata jina jap’iranku, yanqamantataq niranku: “Diostan k’amin”, nispa. Mana allin juezkunan wañuchisqa kananpaq condenaranku, runakunan burlakuranku, soldadokunataq ñak’arichispa k’aspipi clavaranku. Wañupunanpaqña kashaqtinmi  Jesusqa niran: “¡Junt’akunñan!”, nispa (Juan 19:30). Kinsa p’unchaymantataq Diosqa espíritu cuerpopi kausarichiran (1 Pedro 3:18). Chaymantan Jesusqa janaq pachaman kutipuspa Diospa paña ladonpi tiyaykuspa suyaran rey kananpaq Dios nombrananta (Hebreos 10:12, 13).

22. ¿Imatan suyakushanchis Jesús tukuypi kasukusqanrayku?

²² Jesusqa wañunankaman tukuypi kasukuran, chaymi kunanqa paraisopi wiñay kausayta suyakushanchis. Chaytan Jehová Diosqa qallariymantapacha munaran. Qatimuqpin yachasun imaynata Jesuspa wañusqanrayku sumaq suyakuyniyoq kasqanchista.