1, 2. a) Munduibi ricsishca runahua shutita yachashalla, ima tunu runa ashcata yachana ushanchichu. b) Runagunaga Jesusmanda imatata ninaun.

MUNDUIBIGA ashca ricsishca runaguna tiyanaun. Maicangunaga paiguna quiquin llactallaita ricsishca manaun. Shuccuna randiga mundu intiruibi ricsishca manaun. Paiguna shutita yachashalla, alitami ricsini ninguimachu. Mana. Pai imasa, ima tunu runa ashcata, mana yachashcamandami mana alitachu ricsini ninguima.

² 2.000 huataguna huashamami Jesus cai Allpaibi causara. Jesusmanda uyashcanguichari. Chasna ashahuas, Jesus ima tunu runa ashcata runaguna mana yachanaunzhu. Maicangunaga ali shungu runa mara ninaun. Shuccunaga rimashcata pasachingahua shamuc o profeta runa mara ninaun. Huaquingunaga Jesusca Dios man ninaunmi. Canga imatata pinsangui (nota 12​ta ricui).

3. Imaraicuta Jehovata, Jesusta alita ricsina angui.

³ Jesusmanda yachanaga balishca man. Bibliaga ninmi: Huiñai causaita charingahua ‘Yaya Diosta ricsisha quirina man, chasnallata can cachashca Jesucristotahuasʼ (Juan 17:​3). Jehovamanda, Jesusmanda sirtuta yachashaga paraiso gustu Allpaibi huiñaibac causangui (Juan 14:​6). Chimandahuas, Jesusmanda yachashaga, cunan imasa alita causanata, shuccunata  imasa tratanatas yachangui (Juan 13:​34, 35). Punda capituloibiga Dios imasa ashcata yacharanchi. Cai capituloibiga Biblia Jesusmanda imata nishcata yachashun.

4. Mesias y Cristo nishcaga imatata nisha nin.

⁴ Ashca huataguna huashama, Jesus chara mana pagarishcallaita, Jehovaga Mesias o Cristo nishca shamunata nira. Bibliaibiga hebreo shimibi Mesias nin, griego shimibiga Cristo nin. Mesias o Cristo nishaga Dios munashcata pactachingahua anllashcata nin. Chasnallata Diospa Reinoibi mandangahua anllashca man. Chimandahuas, shamuc punzhagunaibi Dios rimashcata Jesus pactachinga.

5. Jesusta ñaupa caticcunaga pai Mesias ashcata quirinaurachu.

⁵ Jesusta ñaupa caticcunaga pai Mesias ashcata quirinaurami (Juan 1:41). Por ejemplo, apostol Pedro Jesusta nira: “Canga quishpichic Cristo mangui” nisha (Mateo 16:16). Cunanga, ñucanchihuas Jesus sirtu Mesias acta, imahua quirina ashcata yachashun.

6. Jehovaga imasata Mesias pi ashcata ricsichi tucunchi.

⁶ Jesus chara mana shamugllaita, Mesias pi ashcata runaguna musiangahua, profetaguna paimanda quillcanaura. Caita yachanaga imasata yanapara. Intindingahuaga caibi yuyashun. Terminalbi mana ricsishca runata tupangahua riushaga, imatata ranguima. Cai runa imasa ashcata, pai ima llachapahuan aucta tapunguima. Caita rasha, chi runata tupangui. Chasna shinami, Jehovaga Mesias imata ranata, pai ima tucunatas profetagunata quillcachira. Profetaguna rimashca huin pactarishcata yachasha, ali shungu runaguna Mesias o Cristo, Jesus ashcata quirina ushanaura.

7. Jesus Mesias ashcata yachangahua ishcai profeciagunata rimai.

 ⁷ Dios ñaupata rimashcagunata o profeciagunata yachashun. Punda profeciataga Jesus chara mana shamugllaita 700 huata huashama quillcanaura. Profeta Miqueasga, Mesias Belen llactaibi pagarinata rimara (Miqueas 5:​2). Miqueas rimashca pactaricpimi Jesusca Belen llactallaibi pagarira (Mateo 2:​1, 3-9). Catic profeciata ricushun. Profeta Danielga Mesias huata 29bi ricuringa nira (Daniel 9:​25). Pai rimashcahuas pactarirami. * Jesus Mesias ashcata yachangahua, Bibliaibi mas quillcashcaguna tiyan.

8, 9. Jesus bautizariushcaibi ricurishca imasata pi Mesias ashcata ricuchin.

⁸ Jehovaga Jesus Mesias ashcata pasacta intindichira. Diosca Bautisac Juanda Mesias pi ashcata musiachun ricuchira. Huata 29bi Jesusca Juan bautizachun nisha Jordan yacuma rira. Chibimi Juanga Mesias ashcata musiara. Bibliaga nin: Jesus bautizarisha ‘yacumanda pai llucshiushcai ahuapacha pascarira, chimanda Diospa Samai shuc palomacuinta uraicumucta ricura, Jesuspa ahuaibi shayarira. Chi huashalla shuc rimashca ahuapachamanda uyarira casna nisha: Caimi ñuca llaquishca churi, ñuca canda cushihuan apiraniʼ (Mateo 3:​16, 17). Juan chita ricusha, uyashami Jesus Mesias acta quirira (Juan 1:​32-​34). Jehovahua samai  espiritu Jesuspa ahuaibi shayarishcaibi Mesias o Cristo tucura. Diosca Jesusta Pushac Rey tucuchun anllashca (Salmo 2:​6; Isaias 55:​4).

⁹ Jehova paiba Churi bautizariushcaibi rimashcamanda Jesus Mesias ashcata yachanchi. Chasnallata, Bibliaibi rimashca profeciaguna pactarishcamanda Jesusta Dios anllashcata quirinchi. Cunanga Jesus  maimanda shamushcata, ima tunu runa ashcatas Bibliaibi yachashun.

10. Jesuspa causai cieloibi imasa ashcamanda Bibliaga imatata yachachin.

¹⁰ Bibliaga Jesus cai allpama chara mana shamushallata cieloibi causac mara nin. Por ejemplo, profeta Miqueasca “ñaupa timpumanda” causac runa man nira (Miqueas 5:​2). Chasnallata Jesusca allpama mana shamushallata cieloibi causashcata nira (Juan 3:​13; 6:​38, 62; 17:​4, 5 leipai). Jesusca cieloibi Jehovahuan alita apanacuc mara.

11. Jehovaga Jesusta imaraicuta yapacta llaquin.

¹¹ Jehovaga Jesusta yapactami llaquin. Imahuata chasna ninchi “Jesucristo ñaupapunda churi”ashcamanda. Caiga Jehova punda rashcatami nin (Colosenses 1:​15). * Chasnallata Jesusca Dios llaquishca “shuclla churi man”. Jehovaga Jesusta sapallami rara (Juan 3:​16). Chimandahuas Jesusllami cai munduta rangahua Jehovata yanapara (Colosenses 1:​16). Chasnallata Jesustallami “causac shimi ninchi”, runagunata, angelgunata Jehova Jesusta rimacachashcamandami chasna ninchi (Juan 1:​14).

12. Imahuata Jesusca Dioshuan mana chillata chanaun ninchi.

¹² Maican runagunaga Dios, Jesus chillata man nisha pinsanaun. Chasna acpihuas, Bibliaga mana chita yachachinzhu (nota 14​ta ricui). Bibliaga ninmi Jesustaga Diosmi rara nisha. Randi Jehovataga mana pihuas  rashcachu. Chimandahuas tucui cai munduibi tiyactaga Jehovami rashca (Salmo 90:​2). Bibliaga ninmi Jehovaga Jesusmanda yali man nisha. Chasnallata Jesusga mana paiba yayamanda yali tucuna munarachu (Juan 14:28 leipai; 1 Corintios 11:​3). Jehovallami “tucui ushayuc Dios” an (Genesis 17:​1). Paillami balishca, tucuigunamandas mas yali ushayuc Dios an.

13. Jesustaga imahuata Diosta asirtangahua runa shina tucura ninchi.

¹³ Chara mana cai Allpata, cielota rashcallaita Jeho­vaga Jesushuan ashca huaranga huatata tarabanaura. Ashca timputa pasashca asha alita apanacuc anaura (Juan 3:35; 14:31). Bibliaga nin: ‘Dios mana ricuibac acpimi paihua churi aicha shina tucura Diosta asirtangahua’. Jesus alita rac ashcamanda Jehova imasa ashcata yachanchi (Colosenses 1:15).

14. Jesusca imasata runa shina tucusha pagarira.

¹⁴ Jesusca cielota saquisha cai Allpama shamurallami. Chasna ashahuas, imasata runa shina tucusha pagarira. Jehovami milagrota rasha paiba Churita Mariahua huicsaibi churara. Chiraicumi Jesuspa yayaga mana runa yaya ara. Chasna asha Mariaga ucha illac huahuata pagarichira. Cai huahuataga Jesus nisha shutichira (Lucas 1:​30-35).

15. Jehovata imasata mas alita ricsina ushangui.

¹⁵ Jesus nirami: “Maican ñucata ricucca Yayatahuas ricushcami” (Juan 14:9). Jesusmanda yachasha Jehova imasa ashcata mas intindingui. Jesuspa causaimanda, pai imasa ashcamandas mas ricsingahua Mateo, Marcos, Lucas, Juan librogunata leingui.

16. a) Jesusca imatata yachachic ara. b) Jesustaga pita yachachira.

 ¹⁶ Ashca runagunami Jesusta “Yachachic” nic anaura (Juan 1:38; 13:13). Jesusca “Diospa ali mandanamanda” yachachira. Ima Mandana tara. Diospa ali Mandana mara. Diosta casuc runagunata cai Allpaibi mandanga (Mateo 4:23). Jesustaga pita yachachira. Jehovami yachachira. Jesusca nirami: ‘Ñuca yachachishcaga mana ñuca yuyaimandallachu, randi ñucata cachac Yaya yachachishcatami yachachiuniʼ (Juan 7:16). Jesusca Diospa mandana, cai Allpaibi runagunata mandangahua shamunata yacharami.

17. a) Jesusca maibita yachachic ara. b) Imaraicuta yachachingahua timputa surcura.

¹⁷ Jesusca maibita yachachic ara. Runaguna mai tiyashcaibi yachachic ara. Atun llactagunaibi, ichilla llactagunaibi, mercadogunaibi, judioguna tandarina huasigunaibihuas yachachic mara. Jesusca runaguna paita mascanauchun nisha mana saquic chara. Astahuanbas paillata mascangahua ric ara (Marcos 6:​56; Lucas 19:​5, 6). Jesusca runagunata yachachingahua timputa surcusha yanapac mara. Dios runagunata yachachina munashcata Jesusca yacharami. Chiraicu Jesusca tucui uras paiba Yayata casura (Juan 8:​28, 29). Chimandahuas runagunata llaquishcamanda yachachic ara (Mateo 9:​35, 36 leipai). Chi timpuibi religionda pushaccuna Diosmanda, paiba Reinomandahuas mana sirtuta yachachicta ricura. Chiraicumi tucui yachana munac runagunata Diospa Reinomanda gustu cuintashcata yachachira.

18. Jesusmanda imatata mas gustai tucungui.

¹⁸ Jesusca runagunata llaquisha yapa pinsaric mara. Llaquic runa ashcamanda, runaguna Jesushuan cuintanacunata  munac anaura. Huahuagunahuas paima caillayanata gustac manaura (Marcos 10:​13-​16). Jesusca alita rac runa mara. Paiga mana ali ranagunata mana gustac chara (Mateo 21:​12, 13). Jesuspa timpuibiga huarmigunata mana respetasha mana alita tratac anaura. Chasna acpihuas Jesusca huarmigunata respetasha balichic mara (Juan 4:​9, 27). Chimandahuas, Jesusca mansu shunguyuc mara. Por ejemplo, shuc cutinga paiba apostolgunahua chaquita maillara. Chaquitaga sirviccunallami maillac anaura (Juan 13:​2-5, 12-​17).

19. Ima ejemplota Jesus runagunata yanapana munac ashcata ricuchin.

¹⁹ Jesusca runaguna imata minishtishcata yacharami. Chiraicu yanapanata munara. Dios cushca ushaihuan runagunata ambisha, Jesusca yanapana munashcata ricuchira (Mateo 14:14). Por ejemplo, lepra nishca ungüihuan ac runa Jesusta caillayasha nira: “Can munashaga ñucata ambinata ushahuangui”. Cai runa turmintarishcata ricusha Jesusca shungüibi nanarira. Chiraicu Jesusca paita llaquisha yanapara. “Paihua maquihuan chi runata llangasha rimara: ‘Munani, ambishca tucunguimi’ ”. Chi ungushca runaga chi ratu ambirira (Marcos 1:​40-42). Yuyari, chi runaga ambirishca huasha imasashi sintirira.

20, 21. Jesus rashcamanda imatata yachanchi.

²⁰ Jesusca Diosta casunata yachachi tucunchi. Paiba enemigoguna mana alita tratacpihuas Jesusca Jehovata mana saquirachu. Por ejemplo, Supai uchai urmachisha nicpiga Jesusca mana saquirachu  (Mateo 4:​1​-​11). Chimandahuas, maican aillugunaga pai Mesias ashcata mana quirisha lucuyashcami ninaura. Chasna rimacpihuas, Jesusca Jehovata casusha catira (Marcos 3:​21). Paiba enemigoguna mana alita tratacpihuas, Diosta mana saquirachu, paita mana alita raccunata mana piñarachu (1 Pedro 2:​21-​23).

²¹ Jesusca paita turmintachisha huanchicpihuas Jehovata mana saquirachu (Filipenses 2:⁠8). Jesus huañuna punzha tucuita ahuantashcata yuyai: Paita preso apanaura, yanga llullasha rimaccuna Diosta camira nisha llullanaura, apugunahuas yangalla uchachinaura. Chasnallata soldadoguna macasha shuc caspibi clavanaura. Huañungaraushcaibi Jesusca casna nisha caparira: ‘Tucuita pactachishcanimiʼ (Juan 19:30). Huañushcamanda quimsa punzha huasha, Jehovaga Jesusta samaita shina causachira (1 Pedro 3:​18). Chi huasha, Jesusca cielota tigrara, “Diospa ali maqui partima” tiyarisha paiba Yaya Reyta shutichinagama chapara (Hebreos 10:​12, 13).

22. Jesus tucuibi Jehovata casushcamanda imatata charishun.

²² Jesus Diosta tucuibi casushcamanda, paraiso gustu Allpaibi huiñai causanata ushanchi. Jehovaga callarimanda ñucanchi chasna causanata munara. Catic capituloibiga Jesus huañushca imasa yanapangaraushcata yachashun.