1, 2. a) Èske i sufi konèt le non in moun sélèb pou di ke nou koné a li bien ? Ésplik. b) Kosa bann domoun i di su Jézu ?

DAN le monn, néna in bonpe domoun konu. Petèt ou koné le non in moun sélèb. Mèm si ou koné son non, i ve pa dir ke ou koné a li bien. Ou koné pa tout sak la éspasé dan son vi é kisa li lé vréman.

² Na 2 000 lané de sa, Jézu Kris la viv su la tèr (regard la not n^o 12). Ou la finn surman antann parlé de li. Mé in bonpe domoun, i koné pa kisa li lété vréman. Désèrtin i di ke li lété in bon bonom. Dot i di ke li lété in profèt. Dot ankor i kroi ke li lé Bondieu. É ou mèm, kosa ou pans de li ?

3. Pou kosa lé inportan ke ou koné Jéova é Jézu.

³ Lé inportan konèt la vérité su Jézu. Pou kosa ? La Bib i di : « Ala kosa i ve dir la vi pou toultan : ke zot i aprann konèt a ou, le seul vré Bondieu, é sèk ou la anvoiyé, Jézu Kris » (Jan 17:3). Si ou koné la vérité su Jéova é Jézu, ou poura viv pou toultan dan in Paradi su la tèr (Jan 14:6). An plus, konèt Jézu i sra vréman util pou ou ojourdui. Jézu la mont a nou koman viv é konport a nou avèk lé zot. Na poin méyeur légzanp ke li (Jan 13:34, 35). Dann chapit 1, nou la aprann la vérité su Bondieu.  Dann chapit la, nou sar konèt sak la Bib i ansègn su Jézu.

4. Kosa i ve dir « Mési » é « Kris » ?

⁴ Lontan avan la nésans Jézu, Jéova lavé promèt ke li va anvoiy le Mési ou le Kris, su la tèr. Le mo « Mési » i sort dan la lang ébreu é le mo « Kris » i sort dan la lang grèk. I apèl Jézu komsala, é sa i ve dir « oin », sétadir choizi par Bondieu pou in rol éspésial. Tout bann promès ke Jéova la di, va réalizé gras le Mési.

5. Èske bann disip Jézu té sur ke Jézu lété le Mési ?

⁵ Bann disip Jézu lété sur ke li lété le Mési (Jan 1:41). Par égzanp, lapot Pièr la di avèk li : « Ou lé le Kris » (Matieu 16:16). É nou, koman nou pe èt sur ke Jézu lé bien le Mési ?

6. Koman Jéova la èd bann domoun ke na in keur antié rekonèt le Mési ?

⁶ Lontan avan la nésans Jézu, bann profèt Bondieu la donn bonpe détay su le Mési pou ke bann domoun i ariv rekonèt a li. Alon prann in légzanp : I demann a ou alé rejouèn in moun ke ou koné pa dan in laréopor ke lé plin. Si i ésplik a ou le moun koman i lé, ou pouré rekonèt a li. Lé parèy, Jéova la ansèrv son bann profèt pou donn a nou bann détay su sak le Mési té sar fé é sak noré ariv a li. Kom tout bann profési la réalizé, sa i èd bann moun ke na in keur antié konprann ke Jézu lé le Mési.

7. Ou pe donn 2 profési ke i prouv Jézu lé bien le Mési.

 ⁷ Ala 2 profési su le Mési : 1) Le profèt Miché la anonsé 700 zan a lavans ke le Mési té sar nèt dan le ti vil Bètléèm (Miché 5:2). É sé la mèm ke Jézu lé né ! (Matieu 2:1, 3-9). 2) Le profèt Danièl la anonsé ke le Mési té sar arivé dann lané 29 (Danièl 9:25) (regard la not n^o 13). Bann 2 profési la, kom dot ankor, i prouv ke Jézu lé bien le Mési ke té anonsé.

8, 9. Kosa la éspasé kan Jézu la pran son batèm ? É kosa i prouv sa ?

⁸ Jéova la fé konèt in fason bien klèr ke Jézu lété le Mési. Li lavé promèt Jan Batis ke li té sar donn a li in sign pou rekonèt le Mési. Jan la vu sign la kan Jézu la pran son batèm. Dann lané 29, Jézu la demann Jan batiz a li dan in gran rivièr, le Jourdin. La Bib i rakont kosa la éspasé : « Apré ke la batiz a li, toutsuit Jézu la sort sou d’lo. Alor le sièl la rouvèr, é li la vu léspri Bondieu désann kom in kolonm é té i vien su li. An plus ke sa, in voi la sort depui dann sièl la di : “Sa lé mon Garson, le bien émé, ke ma la aprouvé” » (Matieu 3:16, 17). Kan Jan la vu é la antandu sign la, li la konpri ke Jézu lété le Mési (Jan 1:32-34). Le jour la, kan Jéova la anvoiy son léspri su Jézu, li lé devnu le Mési.  Jézu lété sak Jéova lavé choizi pou èt Gid é Roi (Izai 55:4).

⁹ Bann profési la Bib, sak Jéova la di é bann sign ke li la doné le jour batèm Jézu, i prouv ke Jézu lé bien le Mési. Mé ousa Jézu i sort ? Koman li lété ? Alon voir kosa la Bib i di.

10. Ousa Jézu la viv avan vnir su la tèr ?

¹⁰ La Bib i ansègn ke Jézu la viv pandan lontan dann sièl, avan ni su la tèr. Miché la di ke le Mési té i égzis « depui dann tan lontan » (Miché 5:2). É Jézu la di in bonpe d’foi ke li la viv dann sièl avan ni su la tèr (lir Jan 3:13, Jan 6:38, 62 é Jan 17:4, 5). Avan ke Jézu i vien su la tèr, le lien ke li lavé avèk Jéova lété éspésial é vréman solid.

11. Pou kosa Jéova i ièm in bonpe Jézu ?

¹¹ Jéova i ièm in ta Jézu parske sé sad li la kré an premié. Sé pousa ke i apèl Jézu « le premié né dan tout la kréasion » (Kolosien 1:15). An plus, Jéova i ièm in bonpe Jézu parske Jézu lé le seul ke Jéova la kréé dirèkteman. Sé pousa ke i apèl Jézu le « seul Garson * » (Jan 3:16). Jézu lé osi le seul ke Jéova la utilizé pou kré tout lé zot choz (Kolosien 1:16). A li touseul lé aplé « la Parol ». I apèl a li komsa parske Jéova la utiliz a li pou donn bann mésaj é bann zinstruksion pou bann zanj é bann zumin (Jan 1:14).

12. Koman nou koné ke Jézu é Bondieu sé pa le mèm pèrsonn ?

¹² Désèrtin, i kroi ke Jézu é Bondieu lé le mèm pèrsonn (regard la not n^o 14). Mé lé pa sa ke la Bib i ansègn. Li di ke Jézu la été kréé. Donk, li néna in komansman. Mé Bondieu ke la kré tout zafèr, la poin in komansman (Psom 90:2). Jézu, le Garson  Bondieu, la jamé ésèy prann la plas son Papa. Dapré la Bib, le Papa lé plu gran ke le Garson (lir Jan 14:28 ; 1 Korintien 11:3). Jéova lé le seul « Bondieu Toupuisan » (Jenèz 17:1). Li lé la pèrsonn le plu inportan é le plu puisan dan lunivèr.

13. Pou kosa la Bib i di ke Jézu lé « la resanblans le Bondieu invizib » ?

¹³ Avan kré le sièl é la tèr, Jéova é Jézu la travay min dan la min pandan bann miliar d’zané. In lamour vréman for la grandi ant zot 2 pandan tout pèryod la ! (Jan 3:35 ; 14:31). Jézu la imit bann joli kalité son Papa tèlman bien, ke la Bib i apèl a li « la resanblans le Bondieu invizib » (Kolosien 1:15).

14. Koman Jézu la gingn ni viv su la tèr kom in moun ?

¹⁴ Jézu lété paré pou kit le sièl é pou viv su la tèr kom in moun. Koman sa lété posib ? Jéova la fé in mirak : li la mèt la vi son garson dan le vant in fiy vièrj ke té apèl Mari. Akoz sa mèm, Jézu lavé pa bezoin in papa kom nout tout néna. Mari la donn nésans in garson parfé. Èl la apèl a li Jézu (Luk 1:30-35).

15. Koman ou pe mieu konèt Jéova ?

¹⁵ Bann liv Matieu, Mark, Luk é Jan lé aplé bann Zévanjil. Kan ou va lir bann liv la, ou va aprann in bonpe zafèr su Jézu, son vi é son bann joli manir. Jézu la di : « Sak la vu a moin la vu mon Papa osi » (Jan 14:9). Jézu la di sa, parske li resanm in bonpe son Papa. Sak ou lir su Jézu va èd a ou mieu konèt Jéova.

16. a) Kosa Jézu la ansénié ? b) Ousa Jézu té i tir son bann zansègnman ?

 ¹⁶ In bonpe domoun té apèl Jézu « Lansénian » (Jan 1:38 ; 13:13). Parmi bonpe zafèr inportan ke li la ansénié, néna « la bonn nouvèl le Roiyom ». Kosa i lé se roiyom la ? Sé in gouvèrnman ke lé dann sièl é ke Bondieu va utilizé pou dirij la tèr. Se gouvèrnman va aport bann bienfé pou bann domoun ki obéi Bondieu (Matieu 4:23). Tout sak Jézu té ansègn té i sort èk Jéova. Jézu la di : « Sak mi ansègn i vien pa de moin, mé i sort avèk sak la anvoiy a moin » (Jan 7:16). Li té koné ke Jéova té ve ke bann domoun i antan bonn nouvèl la : le roiyom Bondieu va dirij la tèr.

17. a) Kèl landroi Jézu té ansègn ? b) Pou kosa Jézu la fé in bonpe zéfor pou ansègn bann domoun ?

¹⁷ Ousa Jézu té ansègn bann domoun ? Partou ousa li té trouv banna : zot kaz, ousa lavé plantasion agrikol, dan bann vil, dan bann vilaj, dan bann marché forin é dann landroi ousa domoun té sa va ador Bondieu. Li té atann pa ke bann domoun té i vien voir a li. Souvan, sé li ke té sar koz èk banna (Mark 6:56 ; Luk 19:5, 6). Jézu la fé in bonpe zéfor pou ansègn a zot. É li la pas bonpe d’tan pou préché. Pou kosa ? Parske li té koné ke sé sa mèm ke Bondieu té i ve é parske li obéi toultan son Papa (Jan 8:28, 29). Jézu té i prèch osi parske li lavé pitié bann domoun (lir Matieu 9:35, 36). Li la bien vu ke bann chèf la relijion té ansègn pa la vérité su Bondieu é su son roiyom. É li té ve ke in gran kantité domoun i antan la bonn nouvèl.

18. Anparmi bann joli manir ke Jézu néna, kèl ou ièm le plus ?

 ¹⁸ Jézu té ièm bann domoun. Li té fé in kont èk lé zot. Li té janti é lété fasil koz ansanm li. Mèm bann marmay té ièm èt avèk li (Mark 10:13-16). Jézu lété toultan jus. Li té détès bann domoun malonèt é linjustis (Matieu 21:12, 13). Dan son tan, bann madam té pa trété avèk réspé é zot lavé poin le droi fé désèrtin zafèr. Mé Jézu la toultan réspèk a zot (Jan 4:9, 27). Jézu té i mèt pa li dutou su la oteur. Par égzanp, in soir li la lav le pié son bann zapot. Pourtan, dabitud, sé bann sèrviteur ke té doi fé travay la (Jan 13:2-5, 12-17).

19. Kèl légzanp i mont ke Jézu té ve èd bann domoun ?

¹⁹ Jézu té koné kosa bann domoun lavé bezoin é li té ve èd a zot. Sé pousa li té utiliz la puisans Bondieu pou géri banna (Matieu 14:14). Par égzanp, in jour, in moun lavé la lèp la di avèk Jézu : « Si ou ve, ou pe rann a moin pur. » Kan Jézu la vu son soufrans, li la pran pitié le moun é li té ve èd a li. Jézu la touch le moun é la di : « Mi ve ! Devien pur. » É le moun lété géri ! (Mark 1:40-42). Èske ou pe imajiné kosa li la resanti ?

20, 21. Pou kosa nou pe di ke Jézu lé le pluméyeur légzanp dan lobéisans pou Bondieu ?

²⁰ Dan lobéisans pou Bondieu, Jézu lé le pluméyeur légzanp. Mèm kan li té viv bann moman difisil oubien kan son bann zènmi té fé a li le mal, li la rès fidèl son Papa. Par égzanp, kan Satan té ve fé  pèch a li, li la tienbo ansanm (Matieu 4:1-11). Désèrtin dan son fami té kroi pa ke li lété le Mési. Banna té i di ke li lété fou. Mé Jézu la kontinué fé sak son Papa té i ve (Mark 3:21). Kan son bann zènmi té fé souf a li, li té rès fidèl Bondieu é jamé li la ésèy fé a zot le mal (1 Pièr 2:21-23).

²¹ Jézu la soufèr in bonpe, avan li lé mor. Mé li la gard son fidélité pou Jéova (lir Filipien 2:8). Kalkul in kou tout sak li la suporté le jour li lé mor. Li la été arété. Domoun la akuz a li ke li la di bann mové kozman su Bondieu. Bann juj malonèt la kondann a li. Domoun anparmi la foul té ri a li. Bann solda  la maltrèt a li é la klout a li su in poto. Jus avan li lé mor, Jézu la krié : « Sa mèm la réalizé ! » (Jan 19:30). Mé troi jour aprésa, Jéova la résusit Jézu é la donn a li in kor parèy bann zanj (1 Pièr 3:18). Detroi semèn apré, Jézu la artourn dann sièl é li la « asiz a droit Bondieu ». Aprésa, li la atann ke Bondieu i fé a li Roi (Ébreu 10:12, 13).

22. Parske Jézu la rès fidèl son Papa, kosa nou pe ganié ojourdui ?

²² Parske Jézu lé résté fidèl son Papa, nou néna la moiyin viv pou toultan dann paradi su la tèr. Sé sak Jéova i ve. Dann chapit apré, nou va voir pou kosa la mor Jézu va pèrmèt a nou viv pou toultan.