1, 2) (a) Soske oda, hoj džanes, sar pes vičinel varesavo slavno manuš, na znameňinel, hoj les čačes pridžares? Phen priklados. (b) So phenen o manuša, ko hino o Ježiš?

ANDRO svetos hin but slavna manuša. Určiťe džanes, sar pes vičinel varesavo slavno manuš. Ale ada, hoj džanes leskero menos, na znameňinel, hoj imar prindžares, či hino lačho manuš, abo na. Na džanes savoro pal leste, aňi sar dživel.

² O Ježiš Kristus dživelas pre phuv anglo 2000 berša. Andre amari doba but manuša džanen, hoj dživelas, ale na džanen, savo manuš sas. Vareko phenel, hoj o Ježiš sas lačho manuš. Aver phenen, hoj sas prorokos. Abo paťan, hoj hino o Del. So phenes pre ada? (Dikh e poznamka 12.)

3) Soske tuke kampel te prindžarel le Jehovas the le Ježiš Kristus?

³ O čačipen pal o Ježiš kampel te džanel. Soske? E Biblija phenel: „O večno dživipen hin andre ada, hoj furt džanena buter pal tute, so sal ča jekh čačikano Del the pal oda, so les bičhaďal, pal o Ježiš Kristus.“ (Ján 17:3) Te džaneha o čačipen pal o Jehovas the pal o Ježiš, šaj dživeha večňe andro rajos pre phuv. (Ján 14:6) Ada, hoj prindžareha le Ježiš, tuke pomožinela. Hino nekfeder priklados, sar te dživel sar lačho manuš. (Ján 13:34, 35) Andre 1 kapitola pes dodžanľam o čačipen pal o Del. Akana pes dodžanaha, so sikavel e Biblija pal o Ježiš.

4) So znameňinen „Mesijašis“, abo „Kristus“?

⁴ But berša angle ada, sar o Ježiš avľa pre phuv, o Jehovas sľubinďa andre Biblija, hoj avela Mesijašis, čiže o Kristus. O lav „Mesijašis“ hino andal e hebrejsko čhib, „Kristus“ andal e grecko čhib. O Mesijašis, čiže o Kristus hino ajso manuš, saves o Del kidňa avri a diňa les varesavi bari uloha. O sľubimen Mesijašis pomožinela te splňinel savore le Devleskere sľubi. O Ježiš šaj pomožinel the tuke. Ale angle ada, sar pes naroďinďa o Ježiš, but manuša na džanenas, ko ela oda Mesijašis.

5) Paťanas le Ježišoskere učeňika, hoj ov sas o Mesijašis?

⁵ Le Ježišoskere učeňika paťanas, hoj ov hino o sľubimen Mesijašis. (Ján 1:41) Napriklad, o Šimon Peter phenďa le Ježišoske: „Tu sal o Kristus.“ (Matúš 16:16) Sar tuke šaj aves isto, hoj o Ježiš hino o Mesijašis?

6) Sar o Jehovas pomožinďa le uprimne manušenge te sprindžarel, ko hino o Mesijašis?

⁶ But berša angle ada, sar o Ježiš avľa pre phuv, le Devleskere proroka pisinde but pal o Mesijašis. Sar ala spravi pomožinen te prindžarel, ko hino o Mesijašis? Predstavin tuke, hoj tuke vareko phenel, kaj te džas pal varesavo manuš pre autobusovo štacija. Ale tu ole manušes ňigda na dikhľal a pre štacija hin but manuša. Te tuke vareko mište popisinel ole manušes, paľis les sprindžareha. Avka the o Jehovas použinďa le proroken, kaj amenge te pisinen, so kerela o Mesijašis a so savoro zadživela. Sar pes ala proroctva splňinde, uprimna manuša šaj sprindžarde, hoj o Ježiš hino o Mesijašis.

7) Save 2 proroctva sikaven, hoj o Ježiš hino o Mesijašis?

 ⁷ Akana peske phenaha pal o 2 ole proroctvendar. Peršo proroctvos sas pisimen 700 berša anglal, sar pes o Ježiš naroďinďa. O Micheaš anglal phenďa, hoj o Mesijašis pes naroďinela andro cikno foros Betlehem. (Micheáš 5:2) O Ježiš pes odoj čačes naroďinďa! (Matúš 2:1, 3–9) Dujto proroctvos pisinďa o Daňijel. Phenďa, hoj o Mesijašis avela andro berš 29. (Daniel 9:25) Oda hin ča 2 proroctva ole but proroctvendar, so sikaven, hoj o Ježiš hino o sľubimen Mesijašis. (Dikh e poznamka 13.)

8, 9) Akor, sar pes o Ježiš diňa te pokrsťinel, so sikaďa, hoj o Ježiš hino čačes o Mesijašis?

⁸ O Jehovas sikaďa, hoj o Ježiš hino o Mesijašis. Le Janoske Krsťiťeľiske sľubinďa, hoj leske phenela, ko hino o Mesijašis. Andro berš 29 o Ježiš avľa pal o Jan, kaj les te bolel (pokrsťinel) andro Jordan. Sar o Jan prindžarďa, hoj o Ježiš hino o Mesijašis? E Biblija pisinel: „Sar sas o Ježiš pokrsťimen... a avľa avri andal o paňi. Dikh! Phundraďa pes o ňebos a Jan dikhľa, sar o svato duchos avľa tele sar holubica pro Ježiš. Dikh! O hlasos andal o ňebos phenďa: ‚Oda hin miro čhavo. Me les igen rado dikhav a thovav andre leste baripen.‘“ (Matúš 3:16, 17) Sar o Jan ada savoro dikhľa a šunďa, prindžarďa, hoj o Ježiš hino o Mesijašis. (Ján 1:32–34) Oda ďives, sar o Jehovas čhorďa (čhiďa) avri svato duchos pre  leste, o Ježiš ačhiľa Mesijašiske. O Del lestar kerďa le Vodcas the le Kraľis. (Izaiáš 55:4)

⁹ Ada, hoj o Ježiš hino o Mesijašis, sikaven o biblicka proroctva, tiš oda, so phenďa o Jehovas andal o ňebos the oda, so sikaďa o Del le Janoske Krsťiťeľiske. Ale khatar avľa o Ježiš a savo sas? Dikhaha, so pal ada phenel e Biblija.

10) So e Biblija phenel, kaj sas o Ježiš sigeder, sar avľa pre phuv?

¹⁰ E Biblija phenel, hoj sigeder, sar avľa pre phuv, o Ježiš dživelas igen baro časos andro ňebos. O Micheaš phenďa, hoj o Mesijašis sas „sigeder, sar sas o ňebos the e phuv“. (Micheáš 5:2) O Ježiš korkoro phenďa buterval, hoj sigeder, sar pes naroďinďa pre phuv, dživelas andro ňebos. (Pregen Ján 3:13; 6:38, 62; 17:4, 5.) Sigeder, sar avľa pre phuv, o Ježiš kamelas le Jehovas avka sar ňikas avres.

11) Soske hin le Devleske o Ježiš ajso vzacno?

¹¹ O Jehovas igen rado dikhel le Ježiš. Soske? Bo o Del les stvorinďa neksigeder savorestar. Vašoda pes phenel pal o Ježiš, hoj hino „Oda, ko pes naroďinďa sar peršo savorestar, so hin stvorimen“. * (Kolosanom 1:15) O Jehovas korkoro stvorinďa ča le Ježiš. O Ježiš pes vašoda vičinel „jekh (jeďino) splodzimen čhavo“. Vašoda hin le Devleske o Ježiš ajso vzacno. (Ján 3:16) O Jehovas použinďa le Ježiš, kaj te tvorinel aver veci. (Kolosanom 1:16) O Ježiš pes vičinel „Lav“, bo služinelas le Jehovaske avka, hoj phenelas o pokini the o spravi le aňjelenge the le manušenge. (Ján 1:14)

12) Sar džanas, hoj o Ježiš the o Del nane ča jekh osoba, ale hoj on hine duj osobi?

¹² But manuša paťan, hoj o Ježiš the o Del nane duj osobi, ale ča jekh. Paťan hoj o Ježiš hino o Del. E Biblija ada na sikavel. Pisinel, hoj o Ježiš sas stvorimen, čiže hoj les hin začatkos. Ale le Jehovas, čiže  le Devles, so stvorinďa savoro, nane začatkos. (Žalm 90:2) Le Devleskere čhaske le Ježišoske, ňigda aňi pre goďi na avľa, hoj hino o Del. E Biblija sikavel, hoj o Dad hino bareder sar o Čhavo. (Pregen Ján 14:28; 1. Korinťanom 11:3.) Ča o Jehovas hino „Všemohuco Del“. (1. Mojžišova 17:1) Hino nekbareder the nekzoraleder andro calo vesmiris. (Dikh e poznamka 14.)

13) Soske e Biblija phenel, hoj o Ježiš hino „presňe ajso, savo hino o Del, so les našťi o manuša dikhen“?

¹³ Sigeder, sar sas stvorimen o ňebos the e phuv, o Jehovas the leskero Čhavo o Ježiš but milijardi berša kerenas buťi jekhetane. Čačes pes igen rado dikhenas! (Ján 3:35; 14:31) O Ježiš dikhelas, savo hino leskero Dad a sikhľiľa te el ajso sar ov. E Biblija phenel, hoj o Ježiš hino „presňe ajso, savo hino o Del, so les našťi o manuša dikhen“. (Kolosanom 1:15)

14) Sar pes le Jehovaskero vzacno Čhavo naroďinďa sar manuš?

¹⁴ O Ježiš sas ochotno te omukhel o ňebos a te naroďinel pes pre phuv sar manuš. Sar pes ada ačhiľa? O Jehovas kerďa o zazrakos a preľigenďa le Ježišoskero dživipen andal o ňebos andro per la paťivaľa Mariake. Na kampelas manušeskero dad, kaj e Maria te khabňol. La Mariake pes naroďinďa čhavoro. Les na sas ňisavi chiba. Diňa leske o menos Ježiš. (Lukáš 1:30–35)

15) Sar šaj feder sprindžares le Jehovas?

¹⁵ Andro biblicka kňižki Matúš, Marek, Lukáš the Ján šaj genes, sar o Ježiš dživelas a savo sas o manuš. Ala kňižki hine evaňjelija. O Ježiš hino ajso, savo hino leskero Dad. Oda, so geneha pal o Ježiš, tuke pomožinela  feder te prindžarel le Jehovas. O Ježiš phenďa: „Ko dikhľa man, dikhľa the mire Dades“. (Ján 14:9)

16) So o Ježiš sikavelas? Sar džanelas o Ježiš, so te sikavel?

¹⁶ O manuša phenenas pal o Ježiš, hoj hino o „Učiťeľis“. (Ján 1:38; 13:13) Jekh le nekdvoležiteder vecendar, so sikavelas, sas „lačhi sprava pal o kraľišagos“. Pal savo kraľišagos? Oda kraľišagos hino le Devleskeri vlada andro ňebos. Vladňinela caľa phuvake a anela lačhe veci le manušenge, so šunen le Devles. (Matúš 4:23) Savoro, so o Ježiš sikavelas, sas le Jehovastar. Phenďa: „Oda, so sikavav, nane miro, ale hin olestar, ko man bičhaďa.“ (Ján 7:16) O Ježiš džanelas, hoj o Del kamel, kaj pes o manuša te dodžanen e lačhi sprava, hoj le Devleskero kraľišagos vladňinela la phuvake.

17) Kaj o Ježiš sikavelas le manušen? Soske pes snažinelas cale jileha te sikavel avren pal o čačipen?

¹⁷ Kaj o Ježiš sikavelas pal o Del? Všadzik, kaj sas manuša. Andro fori, pro gava, pro pľaci, andro chramos, abo andro sinagogi the andro khera, kaj bešenas običajna manuša. Na užarelas, hoj o manuša avena pal leste, ale furt džalas pal lende. (Marek 6:56; Lukáš 19:5, 6) Rado kerelas phari buťi. Peskero časos the peskeri zor delas, kaj te sikavel le manušen. Soske? Džanelas, hoj o Del ada kamel a šunelas peskere Dades. (Ján 8:28, 29) O Ježiš tiš sikavelas le manušen, bo leske sas pharo vaš lenge, sar dikhelas, sar dživen. (Pregen Matúš 9:35, 36.) O rašaja na sikavenas čačipen pal o Del, aňi pal leskero kraľišagos. O Ježiš kamelas te pomožinel le manušenge, kaj pes te dodžanen e lačhi sprava.

18) So pes tuke nekbuter pačinel pro Ježiš?

 ¹⁸ O Ježiš rado dikhelas le manušen a na sas leske jekh, sar dživenas. Sas jileskero. O manuša na daranas leha te del duma. The o čhavore sas rado leha. (Marek 10:13–16) O Ježiš sas spravodlivo. Narado dikhelas uplatki the ňespravodlivosť. (Matúš 21:12, 13) Dživelas andre doba, sar zakazinenas le romňijenge te kerel but veci a but manušenge sas jekh, so peske mišľinen o romňija. Ale o Ježiš presikavelas paťiv le romňijenge a vakerelas lenca šukares. (Ján 4:9, 27) Sas pokorno andro jilo. Napriklad, jekhvar raťi thoďa avri (morďa) andro paňi o pindre le apoštolenge. Oda kerenas ča o sluhi. (Ján 13:2–5, 12–17)

19) Savo priklados andal e Biblija amenge sikavel, hoj o Ježiš džanelas, so kampel le manušenge a sar lenge te pomožinel?

¹⁹ O Ježiš džanelas, so kampel le manušenge a pomožinelas lenge. Sas les pre ada zor le Devlestar. Sasťarelas le manušen. Ada sas baro zazrakos. (Matúš 14:14) Napriklad, jekh murš, so les sas dukhade vredi pal calo ťelos, avľa pal o Ježiš a phenďa: „Te bi kamehas, šaj man očistines.“ Le Ježišoske pes ispidenas o apsa andro jakha, sar dikhľa, savi bari dukh les hin a sar pes igen trapinel. Sas leske pharo vaš leske. Pomožinďa leske. Thoďa pre leste o vast, chudňa les a phenďa leske: „Kamav! Av očisťimen.“ A o nasvalo murš takoj (minďar) sasťiľa! (Marek 1:40–42) Džanes tuke te predstavinel, sar sas ale muršeske?

20, 21) Soske hino o Ježiš nekfeder priklados, sar te doľikerel oda, so o Del phenel?

²⁰ O Ježiš hino nekfeder priklados, sar te doľikerel oda, so o Del phenel. Zadživelas nalačho. Nalačhe manuša leske kerenas nalačho, ale the avka sas  verno peskere Dadeske. O Ježiš na kerďa ňisavo binos (hrjechos) aňi akor, sar les o Satan kamelas te scirdel pro nalačho drom. (Matúš 4:1–11) Varesave andal le Ježišoskeri fameľija na paťanas, hoj o Ježiš sas Mesijašis. Phenenas pal leste, hoj leske „prechuťiľa“. The avka o Ježiš furt kerelas oda, so kamelas o Del. (Marek 3:21) Sar les marenas katinenas, o Ježiš the akor sas verno le Devleske. Sas igen nalačhe pre leste, ale ov ňigda pre lende na koškerelas. (1. Petra 2:21–23)

²¹ The akor, sar bara dukhaha merelas, sas verno le Jehovaske. (Pregen Filipanom 2:8.) So nalačho zadživelas posledno ďives anglo meriben? O slugaďa les zaile. O falošna svedki pre leste phende, hoj hino baro hrješňikos. Poťinde le sudcaske, kaj te phenel, hoj o Ježiš  peske zaslužinel te merel. Nalačhe manuša lestar asanas. O slugaďa les marenas avka, hoj lestar čuľalas o rat. Primarde les pro drukos. Akor, sar merelas, o Ježiš zvičinďa: „Oda, so kampelas, pes dokončinďa!“ (Ján 19:30) Pal o 3 ďivesa les o Jehovas vzkrjesinďa a diňa les ajso ťelos, saveha šaj dživel andro ňebos. (1. Petra 3:18) Pal 40 ďivesa o Ježiš geľa pale andro ňebos, „bešľa peske paš le Devleskero pravo vast, a užarelas“, dokim les o Del na kerďa kraľiske. (Hebrejom 10:12, 13)

22) So amen hin alestar, hoj o Ježiš ačhiľa verno peskere Dadeske?

²² Vašoda, hoj sas verno peskere Dadeske, amen šaj dživaha večňe andro rajos pre phuv avka, sar sľubinďa o Jehovas. Andre 5 kapitola pes dodžanaha, sar le Ježišoskero meriben phundraďa o drom ko večno dživipen.