1, 2. а) Дали чаче џанеа шукар несаве пенџарде мануше, ако џанеа само лескоро анав? Објаснин. б) Со мислинена о мануша башо Исус?

ИСИ бут пенџарде мануша ко свето. Ту шај џанеа несаве пенџарде манушескоро анав. Ама, ако џанеа само лескоро анав, на значинела кај пенџареа ле шукар или кај џанеа са баши лесте.

² Шај шунѓан башо Исус Христос иако ов живинѓа ки Пхув англедер 2.000 берша. Ама бут мануша на џанена саво сине о Исус. Несаве пхенена кај сине шукар мануш, јавера кај сине пророко, а несаве верујнена кај тано Девел. Со мислинеа ту башо Исус? (Дикх и 12 фуснота.)

3. Соске тано важно те пенџара е Јехова хем е Исусе?

³ Соске тано важно те џане о чачипе башо Исус? И Библија вакерела аменге: „Те шај те добинен вечно живото ваљани шукар те пенџарен тут, е јекхе чачутне Девле, хем околе со бичхалѓан ле, о Исус Христос“ (Јован 17:3). Оја, ако џанеа о чачипе башо Јехова хем башо Исус, ка шај вечно те живине ко рај ки Пхув (Јован 14:6). Исто аѓаар, адава со ка џане башо Исус ка поможинел тут соске ов тано најшукар пример сар те живина хем сар те понашина амен е јаверенцар (Јован 13:34, 35). Ко прво поглавје амен сиклилем о чачипе башо Девел. Акана ка дикха со сикавела амен и Библија башо Исус.

4. Со значинена о лафија „Месија“ хем „Христос“?

⁴ Бут берша англедер те бијанѓовел о Исус, о Јехова ки Библија ветинѓа кај ка бичхалел е Месија, или е Христосе. О лафи „Месија“ авела тари хебрејско чхиб, а о лафи „Христос“ тари грчко. Солдуј титуле значинена кај о Девел ка биринел кој ка овел о ветимо Месија хем ка дел ле посебно положба. Са со ветинѓа о Девел англедер, о Месија ка керел те овел адава чаче. Ама, исто аѓаар, о Исус шај те поможинел туке авдиве да. Англедер о Исус те бијанѓовел, бут мануша пучена пе сине: „Кој ка овел о Месија?“.

5. Дали е Исусескере ученикија верујнѓе кај ов тано о Месија?

⁵ Е Исусескере ученикија сине сигурна кај ов тано о ветимо Месија (Јован 1:41). На пример, о Симон Петар пхенѓа е Исусеске: „Ту сиан о Христос“ (Матеј 16:16). Сар шај амен да те ова сигурна кај о Исус тано о Месија?

6. Сар о Јехова поможинѓа е искрена манушенге те џанен кој сине о Месија?

⁶ Бут берша англедер те бијанѓовел о Исус, е Девлескере пророкија пишинѓе бут буќа со ка поможинен е манушенге те пенџарен кој тано о Месија. Сар ка поможинел лен сине адава? Замислин туке кај ваљани те џа ки несави автобуско станица пхерди манушенцар хем те аџикере некас со никогаш на дикхљан ле. Ако некој англедер вакерѓа туке сар изглединела адава мануш, тегани ка овел туке полокхо те аракхе ле. Исто аѓаар, о Јехова да користинѓа е пророкон те вакерен аменге со ка керел о Месија хем со ка овел леа. Адалеа со ка исполнинен пе сине са адала пророштвија, о искрена мануша ка шај сине те џанен кај о Месија тано о Исус.

7. Кола дуј пророштвија сикавена кај о Исус тано о Месија?

 ⁷ Акана ка дикха дуј таро адала пророштвија. О прво пророштво, 700 берша англедер те бијанѓовел о Исус, о пророко о Михеј вакерѓа кај о Месија ка бијанѓовел ки јекх тикни диз Витлеем (Михеј 5:2). О Исус чаче бијандило ко адава тхан! (Матеј 2:1, 3-9). О дујто пророштво, о пророко о Даниел вакерѓа кај о Месија ка појавинел пе ко 29 берш амари ера (Даниел 9:25). Акала тане само дуј таро бут пророштвија со сикавена кај о Исус тано о Месија. (Дикх и 13 фуснота.)

8, 9. Кеда крстинѓа пе о Исус, со сикавѓа кај ов тано о Месија?

⁸ О Јехова бут јасно сикавѓа кај о Исус тано о Месија. О Девел вакерѓа е Јованеске кова со крстинела сине е манушен, кај ка дел ле знако колеа со ка сикавел леске кој тано о Месија. Кеда ко 29 берш амари ера о Исус гело ко Јован те крстинел ле ки река Јордан, о Јован дикхља адава знако. И Библија вакерела аменге со уло: „Кеда крстинѓа пе, о Исус одма уштило таро пани. Хем дикх, о небо пхравдило хем о Јован дикхља сар е Девлескоро духо хулела сар гулуби хем авела ко Исус. Хем дикх, шундило гласо таро небо со вакерѓа: ,Акава тано мло мангло чхаво, кова со радујнела ман‘“ (Матеј 3:16, 17). Кеда о Јован дикхља акава знако, тегани ов џанѓа кај о Исус тано о Месија (Јован 1:32-34). Ко исто диве кеда крстинѓа пе о Исус, о Јехова денѓа ле таро пло свети дух, хем о Исус уло Месија. Ов сине адава  кова со о Девел биринѓа ле те овел Водачи хем Цари (Исаија 55:4).

⁹ О библиска пророштвија, е Јеховаскере лафија хем о знако со денѓа ле кеда о Исус крстинѓа пе, сикавена кај о Исус тано о Месија. Ама, котар ало о Исус хем саво сине ов? Те дикха со вакерела и Библија башо адава.

10. Со вакерела и Библија башо е Исусескоро живото англедер те авел ки Пхув?

¹⁰ И Библија вакерела кај бут време англедер те авел ки Пхув, о Исус живинѓа ко небо. О Михеј пхенѓа кај о Месија постојнела сине одамна (Михеј 5:2). О Исус да бут пути пхенѓа кај живинѓа ко небо англедер те бијанѓовел сар мануш. (Читин Јован 3:13; 6:38, 62; 17:4, 5.) Англедер те авел теле ки Пхув, о Исус сине бут паше е Јеховаја.

11. Соске о Исус тано бут важно е Јеховаске?

¹¹ О Исус тано бут важно е Јеховаске. Соске? Соске о Девел англедер те керел са, керѓа прво лесте. Адалеске башо Исус вакерела пе кај тано „првобијамо таро са сој кердо“ (Колошаните 1:15). * О Исус исто аѓаар тано бут важно е Јеховаске соске само лесте керѓа ле директно ов. Адалеске баши лесте вакерела пе кај тано „единствено бијамо чхаво“ (Јован 3:16). Исто аѓаар, о Јехова само е Исусеа заедно керѓа са о буќа (Колошаните 1:16). Хем само башо Исус вакерела пе кај тано „о Лафи“, соске о Јехова преку лесте керела сине лафи хем дела сине упатствија е ангеленге хем е манушенге (Јован 1:14).

12. Котар џанаја кај о Девел хем о Исус нане јекх личност?

¹² Несаве мануша верујнена кај о Исус хем о Девел тане јекх личност. Ама и Библија на сикавела аѓаар. Ој вакерела кај о Исус сине кердо, адава значинела кај е Исусе сине ле почеток. Ама е Јехова, кова со керѓа са о буќа, нане ле почеток (Псалм 90:2). Е Девлескоро  Чхаво о Исус никогаш ни на мислинѓа песке те овел Девел. И Библија сикавела кај о Дад тано побаро е Чхавестар. (Читин Јован 14:28; 1. Коринќаните 11:3.) Само о Јехова тано „Семоќно Девел“ (1. Мојсеева 17:1). Ов тано најбаро хем најсилно. (Дикх и 14 фуснота.)

13. Соске и Библија вакерела кај о Исус тано „и слика е Девлескири касте со нашти те дикха ле“?

¹³ О Јехова хем лескоро чхаво о Исус, милијарде берша сине заедно англедер те керен о небо хем и Пхув. Сигурно машкар ленде сине баро мангипе! (Јован 3:35; 14:31). О Исус добором шукар сикавела сине пле дадескере особине, со и Библија вакерела кај ов сине „и слика е Девлескири касте со нашти те дикха ле“ (Колошаните 1:15).

14. Сар керѓа о Јехова лескоро Чхаво те бијанѓовел ки Пхув сар мануш?

¹⁴ Е Јеховаскоро мангло Чхаво сине спремно те мукхел о небо хем те бијанѓовел ки Пхув сар мануш. Сар уло адава? О Јехова керѓа јекх чудо. Ов леља е Исусескоро живото таро небо хем чхивѓа ле ко воги јекхе чхајаке со викинела пе сине Марија. Адалеске е Исусе на сине ле манушикано дад. И Марија бијанѓа совршено чхаво хем денѓа ле о анав Исус (Лука 1:30-35).

15. Котар шај те сикљове повише башо Исус?

¹⁵ Шај повише те сикљове башо Исус, башо лескоро живото хем саво сине ов ако читинеа о библиска лила Матеј, Марко, Лука хем Јован. Акала лила викинена пе Евангелија. Адалеске со о Исус тано сар по Дад, адава со ка читине повише баши лесте, ка поможинел тут те пенџаре пошукар е Јехова.  О Исус пхенѓа: „Кој дикхља ма ман, дикхља ме Даде да“ (Јован 14:9).

16. Башо со сикавела сине о Исус хем котар авела сине адава?

¹⁶ Бут мануша викинена сине е Исусе „Учителе“ (Јован 1:38; 13:13). Јекх таро најважна буќа со сикавела сине о Исус, сине „о шукар хабери башо Царство“. Сој тано адава Царство? Ов тано е Девлескири влада која со таро небо ка владинел упри цели Пхув хем ка анел берекетија е манушенге со шунена е Девле (Матеј 4:23). Са со сикавѓа о Исус авела сине таро Јехова. О Исус вакерѓа: „Адава со сикавава е манушен нане мандар, него авела адалестар со бичхалѓа ман“ (Јован 7:16). О Исус џанља кај о Јехова мангела о мануша те шунен о шукар хабери кај е Девлескоро Царство ка владинел упри цели Пхув.

17. Коте проповединела сине о Исус? Соске дела сине пестар са те сикавел е манушен?

¹⁷ Коте проповединела сине о Исус? Сегде коте со сине мануша — ко гава хем ко дизја, ко пазарија, ко тхана коте со обожавинена сине е Девле, хем ко ленгере кхера. Ов на аџикерела сине о мануша те авен ки лесте, него бут пути ов џала сине ки ленде (Марко 6:56; Лука 19:5, 6). О Исус денѓа пестар са те сикавел е манушен. Соске керела сине адава? Адалеске со џанела сине кај о Девел мангела ов те сикавел е манушен хем ов секогаш шунела сине пле Даде (Јован 8:28, 29). О Исус, исто аѓаар, проповединела сине соске сине леске жал е манушенге. (Читин Матеј 9:35, 36.) Ов дикхља кај о религиозна водачија на сикавена сине е манушен о чачипе башо Девел хем башо лескоро Царство. Адалеске, ов мангља кобор со шај повише мануша те шунен о шукар хабери.

18. Саве особине е Исусескере туке тане најшуже?

 ¹⁸ О Исус мангела сине е манушен хем грижинела пе сине ленге. Ов сине љубезно хем локхо сине те керел пе леа лафи. Чак о чхаве да мангена сине те керен леа лафи (Марко 10:13-16). О Исус секогаш сине праведно. Ов мрзинела сине и корупција хем и неправда (Матеј 21:12, 13). О Исус живинѓа ко време кеда на поштујнена сине е џувљен хем кеда на сине лен бут правија. Ама, о Исус секогаш поштујнела лен сине (Јован 4:9, 27). Ов исто аѓаар сине чаче понизно. На пример, јекх рат тховѓа е апостоленгере пре, бути со керела ла сине несаво слуга (Јован 13:2-5, 12-17).

19. Кова пример сикавела кај о Исус џанела сине со ваљани е манушенге хем кај мангела сине те поможинел лен?

¹⁹ О Исус џанља со ваљани е манушенге, хем адалеске ов мангља те поможинел лен. Адава јасно дикхела пе сине кеда е Девлескере силаја сасљарѓа е манушен (Матеј 14:14). На пример, јекх мануш со сине ле лепра, ало ко Исус хем пхенѓа: „Те мангљан, ту шај те сасљаре ман“. О Исус осетинѓа лескири дукх хем мука. Сине леске жал хем мангља те поможинел ле. Адалеске ов пружинѓа пло вас, пипинѓа ле хем вакерѓа леске: „Мангава, сасљов!“. Хем о насвало мануш састило! (Марко 1:40-42). Шај ли те замислине туке сар сине леске?

20, 21. Соске о Исус тано најшукар пример сар ваљани те овел пе послушно е Девлеске?

²⁰ О Исус тано најшукар пример сар ваљани те овел пе послушно е Девлеске. Бизи разлика со уло леа или со керѓе леске о душмања, ов сине верно пле Дадеске. На пример, о Исус на грешинѓа кеда о  Сатана искушинѓа ле (Матеј 4:1-11). Несаве тари е Исусескири фамилија на верујнена сине кај ов тано о Месија хем вакерена сине кај тано делино, ама ов понадари да керела сине и служба (Марко 3:21). Кеда лескере душмања сине бут лошна леа, ов ачхило верно е Девлеске хем никогаш на иранѓа ленге лошнипаја (1. Петрово 2:21-23).

²¹ О Исус ачхило верно е Јеховаске чак кеда цидинѓа бут дукха хем мударѓе ле. (Читин Филипјаните 2:8.) Замислин туке кобор сине леске пхаро ко диве кеда муло. Ов сине пханло, сведочинѓе против лесте ховавне сведокија, сине осудимо таро румиме судие, о мануша асана леске сине, о војникија мучинѓе ле хем ковинѓе ле ко стубо. Џикоте мерела  сине вакерѓа: „Завршинѓа!“ (Јован 19:30). Трин диве пало е Исусескоро мерибе, о Јехова ваздинѓа ле таро муле хем денѓа ле духовно тело (1. Петрово 3:18). Пало некобор курке, кеда о Исус иранѓа пе ко небо „бешља тари десно страна е Девлескири“ хем аџикерѓа о Девел те керел ле Цари (Евреите 10:12, 13).

22. Саво живото шај те овел амен ки иднина адалеске со о Исус ачхило верно пле Дадеске?

²² Адалеске со о Исус ачхило верно пле Дадеске, амен шај засекогаш те живина ко рај ки Пхув, исто сар со мангља о Јехова. Ко јавер поглавје ка дикха сар шај е Исусескоро мерибе те дел амен вечно живото.