1–2. a) Kodo, ke zhanas lesko anav, kodo sikavel, ke vi pinzhares les? Phen vorba! b) So gindinen le manusha pal o Jezush?

BUT bare manusha si ande luma. Butzhenenge shajke zhanes lengo anav. De kodo, ke zhanes lengo anav, inke nashtig phenes, ke pinzhares len. Chi zhanes sar trajin pengo trajo, thaj chi kodo chi zhanes soske manushaj vi chaches.

² Shajke aba shundan po Jezush Kristush, kon 2000 bershenca angla kado trajindas pe phuv. Le majbutzhene chi zhanen, sosko manush sas. Si kon feri jekh lashe manusheske gindil les, kavera jekh profetake phenen les, thaj si kon kodo gindin, voj si o Del. Tu so gindis? (Dikh: Informaciovo 12, Jezush Kristush.)

3. Sostar trubul te pinzhares le Jehova Devles, thaj le Jezush Kristushes?

³ Trubul te pinzhares, so si o chachipo pal o Jezush. Sostar? E Biblia kado phenel: „Pasha kodo, varikon mindig te trajil, kodo trubul, te pinzharen tut, le korkoro chache Devles, thaj kodoles, kas bishaldan, le Jezush Kristushes” (Janosh 17:3). Te pinzhares o chachipe pal o Jehova thaj pal o Jezush, atunchi shaj trajis lungo trajo pe shukar phuv (Janosh 14:6). Thaj vi anda kodo mishtoj te pinzhares le Jezushes, ke voj sikavel o majlasho drom, sar te trajinas amaro trajo, thaj sar te grizhinas pe kaverende (Janosh 13:34, 35). Andar o 1. kotor zhanglam, so sityarel amenge e Biblia pal  o Del. Akanak pale pe kodo avla vorba, so sityarel e Biblia pal o Jezush.

4. So sikaven o „Messiashi” thaj o „Kristush” vorbi?

⁴ Butesa angla kodo, ke rakhadyilas o Jezush, o Jehova shinadas ande Biblia, ke bishavela le Messiashes, le Kristushes. O „Messiashi” vorba pe heberecko shib si, thaj o „Kristush” vorba pe gricko shib si. Selduj vorbi tele boldo „opre makhlo” si, kado sikavel, ke o Del jekh bari butyi mukhlas pe leste. O Messiashi andre pherdyarela le Devlesko sako shinaipe, thaj vi akanak shaj zhutil tut. De angla soste rakhadyilas o Jezush, butzhene pe kodo gindinaspe, ke kon avla o Messiashi.

5. Le Jezusheske sityarde zhanenas ke voj si o Messiashi?

⁵ Le Jezusheske sityarde zhanenas, ke voj si o Messiashi (Janosh 1:41). O Simon Peter kado phendas le Jezusheske: „Tu san o Kristush” (Mate 16:16). Ame kathar shaj zhanas ke o Jezush si o Messiashi?

6. Sar zhutindas o Jehova le chache jileske manushenge, ke opre te pinzharen le Messiashes?

⁶ Bute bershenca angla kodo, ke o Jezush rakhadyilas, le Devleske profeti but iskirinde tele, so zhutindas le manushenge, opre te pinzharen le Messiashes. Sar zhutindas lenge? Phenas, mangen tu te zhas avri pala varikaste, kaj but manusha si, thaj busura tordyon. Kadale manushes inke chi dikhlan. Te denas tu pe leste but informaciovura sar dichol avri, atunchi rakhesas les. Vi kade o Jehova peske profetenca zhanavadas amenca, ke so kerela o Messiashi, thaj so avla lesa. Ke andre pherdyile kadal profeciji, zhutin le chache jileske manushenge opre te pinzharen, ke o Jezush si o Messiashi.

7. Phen duj profeciji, so sikaven, ke o Jezush si o Messiashi!

 ⁷ Dikhas akanak duj profeciji. O angluno: 700 bershenca angla kodo, ke o Jezush kerdyilas, o Mikeash pa kodo vorbindas, ke o Messiashi ande jekh cino foro, ando Betlehem rakhadyola (Mikeash 5:2). Thaj vi kade pelas! (Mate 2:1, 3–9). O dujto: O Daniel anglal phendas, ke o Messiashi pala Kristush, ando 29 bersh avela (Daniel 9:25). Kadal numa duj si anda kodol but profeciji, so uzhes sikaven, ke o Jezush si o shinado Messiashi. (Dikh: Informaciovo 13, Profecija po 70 kurko.)

8–9. So pelaspe, kana o Jezush boldaspe, so kodo sikavel, ke voj si o Messiash?

⁸ O Jehova zhutindas opre te pinzharen, ke o Jezush si o Messiashi. O Del shinadas le Bolari Janosheske, ke sikavela leske, kon si o Messiashi. O Janosh atunchi dikhlas kado, kana o Jezush leste gelas pala Kristush, ando 29 bersh, te bolelpe ando Jordani. E Biblia phenel amenge, so pelaspe: „Pala soste boldaspe o Jezush, sigo opre avilas andar o paji, thaj atunchi puterdyilas o cheri, thaj dikhlas, ke le Devlesko duxo tele avilas, sar jekh gulumbo, thaj pe leste uralas. Thaj vi glaso shundyilas andar o cheri, so kade shundyilas: »Kadoj muro kamado Shavo, ande kaste muri voja rakhav«” (Mate 3:16, 17). Kana o Janosh dikhlas kado, thaj shundas le Devleski vorba, zhanglas, ke o Jezush si o Messiashi (Janosh 1:32–34). O Jezush atunchi kerdyilas o Messiashi, kana o Jehova avri shordas pe leste pesko duxo.  O Del les vazdas avri, te tradel thaj kraj t’avel (Izaiash 55:4).

⁹ La Bibliake profeciji, le Jehovaske vorbi, thaj so sikadas o Jehova, kana o Jezush boldaspe, sa kodo sikaven, ke o Jezush si o Messiashi. De kathar avilas o Jezush thaj sosko manush sas? Dikhas, so phenel pa kado e Biblia.

10. E Biblia so sityarel pa kodo, kaj sas o Jezush angla kodo kana rakhadyilas pe phuv?

¹⁰ E Biblia kodo sityarel, ke o Jezush but vrama trajindas ando cheri, angla soste pe phuv avilas. O Mikeash kodo phendas, ke o Messiashi „aba dulmut kerdyilas, ande dulmutane dyesa” (Mikeash 5:2). Vi o Jezush butivar phendas, ke aba ando cheri trajilas, angla kodo, kana rakhadyilas pe phuv. (Ginav: Janosh 3:13; 6:38, 62; 17:4, 5!) Aba angla soste ke pe phuv avilas, zuralo kamipe sas les le Jehovasa.

11. O Jehova sostar kamel le Jezushes?

¹¹ O Jehova zurales kamelas le Jezushes. Sostar? Ke o Del majanglunes les kerdas angla sogodeste. Anda kado phenen po Jezush, ke „voj kerdyilas anglunges angla sakofelo” (Kolosse 1:15). * O Jezush vi anda kodo dragoj le Jehovaske, ke feri les kerdas korkoro. Anda kado phenen leske, ke voj si le Devlesko angluno Shavo (Janosh 3:16). O Jehova feri le Jezushesa kerdas sogodi kavera (Kolosse 1:16). Thaj feri voj bushol kade: e „Vorba”, ke o Jehova lesa das perdal vorbi le andyalonge, thaj le manushenge (Janosh 1:14).

12. Kathar zhanas, ke o Jezush, thaj o Del na jekh si?

¹² Si kon ande kodo patyan, ke o Jezush thaj o Del jekh si. De e Biblia na kado sityarel. E Biblia kodo phenel, ke le Jezushes kerdas varikon, so kodo sikavel, ke sas vrama, kana rakhadyilas. Le Jehovas, kon sakofelo kerdas, nas vrama, kana kerdyilas, voj mindig sas  (Asharimata 90:2). O Jezush, kon le Devlesko Shavo si, soha chi avilas leske aminti, te kamel Del t’avel. E Biblia uzhes sityarel, ke o Dad majbaroj sar o Shavo (ginav: Janosh 14:28; 1Korintus 11:3). Korkoro o Jehova si „o majbaro Del” (1Mozesh 17:1). Voj majopral si pa sakoneste, thaj les si majbari zor pe intrego luma. (Dikh: Informaciovo 14, O xoxamno sityaripe, ke Trin Del si.)

13. Sostar phenel e Biblia, ke o Jezush „vorta kasavoj, sar o Del, kas nashtig dikhen”?

¹³ O Jehova thaj lesko Shavo, o Jezush angla soste kerde o cheri, thaj e phuv but milliardura bersha kethane kerenas butyi. Chaches bares kamenas jekhavres! (Janosh 3:35; 14:31). Ande le Jezushesko trajo kade sikadyilas, ke soskoj o Del, ke e Biblia kodo phenel pe leste, ke „vorta kasavoj, sar o Del, kas nashtig dikhen” (Kolosse 1:15).

14. Sar shaj rakhadyilas o Jezush pe phuv, sar jekh manush?

¹⁴ Le Jehovasko Shavo gata sas kothe te mukhel o cheri, thaj te rakhadyol sar jekh manush pe phuv. Sar sas kado? O Jehova le Jezushesko trajo perdal shutas andar o cheri ande jekh patyivali zhuvji, ande Maria. Anda kadi le Jezusheske chi trubundas manush t’avel lesko dad. E Maria jekh bidoshake shaves andas pe luma, thaj o Jezush anav das leske (Lukach 1:30–35).

15. Sar shaj pinzhares majfeder le Jehovas?

¹⁵ But shaj sityos pa Jezush, pa lesko trajo, te ginaves andar e Biblia o Mate, o Marko, o Lukach thaj le Janoshesko evangeliumo. So ginaves, vi ande kodo zhutin tut, majfeder te pinzhares le Jehovas, ke o Jezush  kasavoj, sar pesko dad. Anda kado phendas o Jezush: „Kon man dikhlas, dikhlas vi le Dades” (Janosh 14:9).

16. So sityardas o Jezush? Thaj kathar sas leske sityaripe?

¹⁶ Butzhene „sityari” phende le Jezusheske (Janosh 1:38; 13:13). O krajipo sas o majbaro, pa soste o Jezush sityardas. So si kado krajipo? Le Devlesko rajipo, so andar o cheri tradela e intrego phuv, but aldashi anela pe kodola manusha, kon le Devlesko muj patyan (Mate 4:23). Sogodi, so o Jezush sityardas, kathar pesko Dad sas. O Jezush kado phendas: „So sityarav, na mandar si, kathar kodoj, kon bishaldas man” (Janosh 7:16). Zhanglas, ke o Jehova kodo kamelas, ke le manusha te shunen pa kodi lashi vorba, ke le Devlesko krajipo tradela pe intrego phuv.

17. Kaj sityarelas o Jezush? Sostar sityardas but le manushen?

¹⁷ Kaj sityarelas o Jezush? Pe sako than, kaj manushen rakhelas. Ande gava, ande forura, ande khangeri, ande le zhinagogi, thaj kaj le khera. Chi zhukarelas kodo, ke le manusha te zhan leste. Butivar voj rodelas len opre (Marko 6:56; Lukach 19:5, 6). But vrama thaj zor boldelas pe le manushengo sityaripo. Sostar? Ke zhanglas, ke o Del kado kamel, thaj mindig kodo kerdas, so lesko Dad kamel (Janosh 8:28, 29). O Jezus vi anda kodo ingerdas e vorba, ke sunujas le manushen. (Ginav: Mate 9:35, 36!) Dikhlas, ke le rashaja na o chachimo sityaren pal o Del, thaj pal o krajipo. Anda kado, butezhenenca kamelas te ulavel e lashi vorba.

18. So fajil tuke ando Jezush majfeder?

¹⁸ O Jezush kamelas le manushen, thaj grizhilas pe lende. Drago sas, thaj nas pharo te vorbinen lesa. Vi le shavora losshasa sas lesa (Marko 10:13–16). O Jezush  mindig patyivalo sas. Xojajvelas po korrupciovo, thaj po bichachimo (Mate 21:12, 13). Ande kasavi vrama trajilas, kana le zhuvjan chi denas patyiv. De o Jezush mindig uzho sas karing lende, thaj inkerdas lengi patyiv (Janosh 4:9, 27). Pasha kado vi tele bandyolas angla kaverende. Jekh ratyi thodas le aposhtolenge punre, so le slugi sityile te keren (Janosh 13:2–5, 12–17).

19. Phen, kana zhanglas o Jezush, so trubul le manushenge, thaj vi kamlas te zhutil lenge!

¹⁹ O Jezush zhanelas, so trubul chaches le manushen, thaj vi kamelas te zhutil len. Kado sikadyilas anda kodo, ke le Devleska zorasa sastyarelas le manushen (Mate 14:14). Kana jekh leprasho mursh gelas kaj o Jezush, kado phendas leske: „Te kames, zhanes te uzhares man.” Le mursheski dukh zurales reslas le Jezushes. Sunundas les, thaj kamlas te zhutil pe leste. Anda kado avri lunzhardas pesko vast, leste unzilas, thaj kado phendas leske: „Kamav! Av uzho!” O nasvalo mursh sastyilas (Marko 1:40–42). Perdal zhanes te hatyares, so shaj hatyardas kado manush?

20–21. Sostar si o Jezush e majlashi pelda ande kodo, muj te patyas le Devleske?

²⁰ O Jezush sikavel o majlasho drom, sar te inkras ame pasha o Del. Vi te pelaspe variso, vaj te kerde lesa variso leske xojarde, voj mindig patyivalo ashilas karing pesko Dad. Kana o Beng zumadas les, chi atunchi chi kerdas bezex (Mate 4:1–11). Inke vi ande le Jezusheski familija chi patyandas sakono, ke voj si o Messiashi, thaj kodo phende, ke gelastar leski godyi  (Marko 3:21). Chi atunchi chi muklas opre le Devleske butyasa. Kana leske xojarde nasul sas karing leste, voj patyivalo ashilas karing o Del, thaj soha chi zumadas nasul peske xojardenge (1Peter 2:21–23).

²¹ O Jezush inke vi atunchi patyivalo ashilas karing o Jehova, kana brutalisha sas lesa, thaj dukhasa trubundas te merel. (Ginav: Filippi 2:8!) Gindin perdal, soske but nasulimo sas les, zhi kaj mulas! Xutyilde les, xoxamne vorbi phende pe les, bangi krisi shinde pe les, avri assande les, le ketani marde les, thaj opre kecinde les. Kana pashadyolas karing o merimo, kade cipindas opre: „Andre pherdyilas!” (Janosh 19:30). Pa trine dyese  o Jehova opre ushtyardas les, thaj duxosko trajo das les (1Peter 3:18). Na butara pala kado o Jezush palpale gelas ando cheri, „tele beshlas pe le Devleski chachi rig” thaj zhukardas pe kodo, ke o Del krajeske te shol les (Heberenge 10:12, 13).

22. Ande soste zhutil amenge kodo, ke o Jezush patyivalo ashilas karing pesko Dad?

²² Ke o Jezush patyivalo ashilas karing pesko Dad, anda kodo shaj trajinas pe jekh shukar phuv, thaj te na meras, sar o Jehova vi kamlas. Anda kaver kotor shaj zhanas, sar zhutil amenge le Jezushesko merimo ande kodo, ame te shaj trajinas.