1, 2. (a) K’erhi wakamanya izino ly’omuntu omanyikine bwenene, ka wanaderha oku omumanyire bwinja? Ohugûle. (b) Bici bantu banji baderha okubiyerekire Yezu?

OMW’igulu, muba bantu banji bamanyikine bwenene. Omanyire nkaba izino lya muntu muguma omanyikine. Cikoki arhali mpu bulya omanyire izino lyage, kw’okuderha oku omumanyire bwinja. Orhamanyiri binji okubiyerekire akalamo kage na gurhi ayorha.

² Hamagera myaka 2 000 kurhenga Yezu arhenzire ah’igulu. (olole amahugûlo nomero 12 gali oku bukurasa bwa 211) Onayumve bamuderhakwo bwenene. Cikoki bantu banji barhayishi ye wâli ndi. Bantu baguma na baguma banaderhe mpu âli muntu mwinja. Abandi banaderhe mpu âli mulebi. Ciru n’abandi babà bayemire oku aba Nyamuzinda. Gurhi nawe ocikebwa?

3. Bulya gurhi kuli kwa bulagirire okumanya bwinja Yehova na Yezu?

³ Kuli kwa bulagirire okumanya okuli okubiyerekire Yezu. Bulya gurhi? Ebibliya eshuzize: “Akalamo k’ensiku n’amango kuli kukumanya, w’oyo Nyamuzinda w’okuli wenene n’oyu warhumaga, Yezu Kristu.” (Yowane 17:3) Erhi wakamanya okuli okubiyerekire Yehova na Yezu, wanayish’ilama ensiku n’amango omu Paradizo. (Yowane 14:6) Okumanya Yezu kurhangira ene, kuli kwa bulagirire kuli we. Yezu arhuyeresire gurhi rhwakalama na gurhi rhwakakajirira abandi. Ye lwiganyo lushinganine. (Yowane 13:34, 35) Omu cigabi ca 1,  rhwayizîre okuli okubiyerekire Nnamahanga. Mw’eci cigabi, rhwayiga ebi Ebibliya erhuyigirizize okubiyerekire Yezu.

4. Amazino g’obukulu “Masiya” na “Kristu,” kw’okuderha gurhi?

⁴ Myaka minji embere z’okuburhwa kwa Yezu, Yehova âli amalaganya oku Masiya, erhi Kristu akayishîre ah’igulu. “Masiya” lir’izino lya cihabraniya na “Kristu” lir’izino lya cigiriki. Ago mazino gw’obukulu kw’okuderha “mushige amavurha,” Nnamahanga acishozîre ye oku ajîre omukolo gwago-gwago. Masiya ye wanâhikirize, ebiragane byoshi bya Yehova.

5. K’abaganda ba Yezu bâl’iyemire n’obwalagale oku Yezu ye Masiya?

⁵ Abaganda ba Yezu bâl’imanyire n’obwalagale oku Yezu ye Masiya. (Yowane 1:41) Kwa lwiganyo, Simoni Petro abwîra Yezu n’obwalagale: “We Kristu.” (Mateyo 16:16) Gurhi nirhu rhwakayemera n’obwalagale oku Yezu ye Masiya?

6. Gurhi Yehova arhabazîzemwo abantu birhohye bamanye Masiya?

⁶ Embere Yezu aburhwe, abalebi ba Nnamahanga bâl’iganirire kwa buliri okubiyerekire Masiya ly’abantu bamumanya. Rhurhole olwiganyo: Bakubwire oku ocilinga omuntu orhasag’ibona bundi oku parkingi/ahabalingira omutuga, aho hali bantu banji bwenene orhamanyiri. Cikoki erhi bakakuhugûlira kwa buliri okubiyerekire oyo muntu, k’orhakamumanya? Neci. Ntyo, kwo Yehova, akolesâgya abalebi bage lyo barhuhugûlira kwa buliri okubiyerekire ebi Masiya akajijîre n’ebyakamuhikire. Okuhikirira kw’ago malebi kunarhabale abantu birhohye bamanye oku Yezu ye Masiya.

7. Malebi abirhi gahi gayerekine oku Yezu ye Masiya?

 ⁷ Ololage amalebi abirhi gahikirire okubiyerekire Masiya: (1) Myaka 700 embere Yezu aburhwe, omulebi Mikeyo alêba oku Masiya akaburhirwe omu lugo lunyi lw’Ebetelehemu. (Mikeyo 5:2, NWT) Eyo munda yo na Yezu aburhirwe! (Mateyo 2:1, 3-9) (2) Omulebi Daniyeli alêba oku Masiya akabonekine omu mwaka gwa 29. (Daniyeli 9:25) (olole amahugûlo nomero 13 gali oku bukurasa bwa 211) Ago malebi abirhi, n’agandi malebi manji gayerekine oku Yezu ye Masiya.

8, 9. Bici byabîre erhi Yezu abatizibwa? Na bici okwo kwakarhuyemeza?

⁸ Yehova amanyisize n’obwalagale oku Yezu ye Masiya. Âl’ilaganyize Yowane mubatiza oku amuyeresa ecimanyiso c’amurhabaza amanye Masiya bwinja. Yowane abwîne eco cimanyiso erhi Yezu abatizibwa. Omu mwaka gwa 29, Yezu abwira Yowane oku ajimubatigiza omu lwishi lunene lwe Yordani. Ebibliya eganirire ebyabîre olo lusiku: “Erhi Yezu ayus’ibatizibwa, arhenga omu lwishi. Ahwo honanênê empingu yayiguka, anacibona iroho lya Nnamahanga lyamuyandagalira omu nshusho y’engûku, yamujakwo.” Muli akwo kasanzi izu lyarhenga empingu, lyadêrha, erhi: “Oyu ye Mugala wani, omuzigirwa, oyu nyemîre.” (Mateyo 3:16, 17, NWT) Erhi Yowane abona eco cimanyiso n’okuyumva izu ayemera oku Yezu ye Masiya. (Yowane 1:32-34) Olo lusiku iroho lya Yehova lyamuyandagaliragâkwo, Yezu aba Masiya. Ye Yehova acisozîre mpu abe Cirongozi na Mwami.​—Izaya 55:4.

 ⁹ Amalebi g’Ebibliya, ebi Yehova adesîre n’ecimanyiso ayeresâgya Yowane erhi Yezu abatizibwa byayerekine oku Yezu ye Masiya. Cikoki ngahi Yezu arhengaga? Âli muntu wa gurhi? Rhubonage ebi Ebibliya eganire.

10. Ngahi Yezu âl’ilamire embere ayishe ah’igulu?

¹⁰ Ebibliya eyigirizize oku embere Yezu ayishe ah’igulu, âl’ilamire nsiku nyinji empingu. Mikeyo  adesire oku Masiya ayorhag’ahaba “kurhenga mira.” (Mikeyo 5:2,NWT) Na Yezu akag’iderha kanji kanji oku âl’ilamire empingu embere ayishe ah’igulu. (Osome Yowane 3:13; 6:38, 62; 17:4, 5) Yezu agwêrhe obwira bw’okunali haguma na Yehova embere ayishe omw’igulu.

11. Bulya gurhi Yehova azigira Yezu bwenene?

¹¹ Yehova azigira Yezu bwenene bulya ye arhangig’ilema. Co cirhuma Yezu ahamagalwa “Nfula omu biremwa byoshi.” (Abakolosi 1:15) Na kandi Yehova azigira Yezu bwenene bulya ye murhanzi alemâga yene n’amaboko gage. Oko kokurhuma Yezu ahamagalwa “Mugala cusha.” * (Yowane 3:16) Yezu yene kandi wakolesibwe n’Ishe omu kulema ebindi bintu byoshi, empingu n’ah’igulu. (Abakolosi 1:16) Yene ye hamagalwa “Luderho.” Ahamagirwe ntyo bulya Ishe amukolesîze omu kuhekera ba malahika na bene bantu emyanzi n’amarhegeko gage.​—Yowane 1:14.

12. Gurhi rhumanyiremwo oku Yezu na Nnamahanga barhaba muntu muguma?

¹² Bantu baguma na baguma babà bayemîre oku Yezu na Nnamahanga babà muntu muguma. (olole amahugûlo nomero 14 gali oku bukurasa bwa 212) Cikoki, arhali ntyo kw’Ebibliya eyigirizize. Edesire oku Yezu alemîrwe. Kw’okuderha oku ajira omurhondêro. Cikoki Nnamahanga walemâga byoshi, arhajira murhondêro. (Ennanga 90:2) Yezu Mugala wa Nnamahanga, arhazig’irhanya ciru n’olusiku luguma mpu abe  aka Nnamahanga. Ebibliya edesire, okw’Ishe ye mukulu kulusha Omugala. (Osome Yowane 14:28; 1 Abakorinti 11:3) Yehova Yene ohamagalwa “Nnamahanga Ogala Byoshi.” (Omurhondêro 17:1, NWT) Yehova ye muntu w’obulagirire bwenene na wa buhashe bunene omw’igulu n’omu mpingu.

13. Bulya gurhi Ebibliya edesire oku Yezu aba “nshusho ya Nyamuzinda orhabonekana?”

¹³ Myaka minji embere empingu n’igulu bilêmwe, Yehova na Yezu bakag’ikola haguma. Muli akwo kasanzi, obuzigire bwabo bwagendekera bwazibuha lusiku oku lundi! (Yowane 3:35; 14:31) Yezu ayizîre bwinja amorhere g’Ishe, co cirhuma Ebibliya emuhamagala “nshusho ya Nyamuzinda orhabonekana.”​—Abakolosi 1:15.

14. Gurhi Yezu ayishir’ibamwo mwene-omuntu?

¹⁴ Yezu ayemîre okurhenga empingu n’okuyisha ah’igulu abe mwene-omuntu. Gurhi byakahashikine ntyo? Yehova ajîra ecisomerine: ahamikiza obuzîne bw’Omugala omu nda y’omukazi mubikira ohamagalwa Mariya. Yezu arh’âl’ilagirire oku mubusi wa mwene-muntu. Mariya aburha omwana mwimana. Amuyirika izino lya Yezu.​—Luka 1:30-35.

15. Gurhi wakamanya Yehova bwinja?

¹⁵ Ecitabu ca Mateyo, Marko, Luka n’eca Yowane binaderhwe bitabu bya Injili. Omu kusoma ebyo bitabu, wamanya binji okubiyerekire Yezu, akalamo kage n’amorhere gage. Yezu adesîre ntya: “Ombwine, erhi abwine na Larha.” (Yowane 14:9) Yezu adesîre ntyo bulya aba ashushir’Ishe bwenene. Ebi oli wasoma okubiyerekire Yezu, byakurhabala omanye Yehova bwinja.

16. (a) Mwanzi guhi Yezu akag’iyigiriza? (b) Ngahi Yezu akag’ikula ebi akag’iyigiriza?

 ¹⁶ Bantu banji bakag’ihamagala Yezu mpu “Mwigiriza.” (Yowane 1:38; 13:13) Omwanzi g’obulagirire akag’iyigiriza gwâl’igudesirwe: “omwanzi gw’akalembe g’Obwami.” Obwami bwa Nnamahanga byo bici? Buli burhegesi bw’empingu Nnamahanga ayish’ikolesa ly’arhambul’igulu. (Mateyo 4:23) Byoshi Yezu akag’iyigiriza byakag’irhenga emwa Yehova. Yezu adêrha: “Enyigirizo zani zirhali zani, ci z’olya wantumaga.” (Yowane 7:16) Âl’imanyire oku Yehova âl’ilonzize abantu bayumve ogo mwanzi gw’akalembe: Obwami bwa Nnamahanga bwayish’irhambula igulu.

17. (a) Ngahi Yezu akag’iyigirigiza? (b) Kunganaci Yezu acihanganyire lyayigiriza abantu?

¹⁷ Ngahi Yezu akag’iyigirigiza abantu? Ngasi hoshi akag’ibugana abantu: ahamwababwe, omu ngasi lugo, omu cirungu, omu cibuye, n’ah’abantu bakag’ishengera. Arhakag’ihamagala abantu n’omudende mpu bayishage abayigirize. Akâg’igenda abalonza lyabayigiriza. (Marko 6:56; Luka 19:5, 6) Yezu akag’icihangana bwenene okuyigiriza abantu. Agezize kasanzi kanji omu kuyigiriza. Bulya gurhi? Bulya âl’imanyire oku bwâli bulonza bwa Nnamahanga na kandi akag’ikenga Ishe. (Yowane 8:28, 29) Kandi Yezu akag’iyigiriza abantu bulya akag’ibayumviza obonjo. (Osome Mateyo 9:35, 36) Akabôna abigiriza b’amadîni barhali bayigiriza okuli okubiyerekire Nnamahanga n’okubiyerekire Obwami bwage. Âl’ilonzize bantu banji bayumve emyanzi y’akalembe.

18. Morhere gahi ga Yezu oshagulukire bwenene?

¹⁸ Yezu akag’izigira abantu n’okubashibirira. Âli mushagalusi na kandi kwâli kulembu okumuganiza.  Ciru n’abana bakag’ishagalukira okumuyegerera. (Marko 10:13-16) Yezu âli mushinganyanya. Akag’ishomba ebituliro n’obubule bw’obushinganyanya. (Mateyo 21:12, 13) Omukasanzi ka Yezu, abakazi barhâl’ikenzirwe banakâg’ibonererwa bwenene. Cikoki Yezu yehe âli bakenzire. (Yowane 4:9, 27) Yezu kobinali ali mwirhohye. Kwa lwiganyo, bijingo biguma, ashûka abaganda bage amagulu. N’obwo, eyo mund’emwabo, ogo mukolo gwâli gwa bajà.​—Yowane 13:2-5, 12-17.

19. Lwiganyo luhi luyerekine oku Yezu akag’irhabala abantu?

¹⁹ Yezu âl’imanyire amalagirire g’abantu anakâg’ilonza okubarhabala. Okwo kwakâg’ibonekana amango akâg’ikolesa emisi ya Nnamahanga omu kufûmya abantu. (Mateyo 14:14) Kwa lwiganyo, lusiku luguma, omushomyo abwîra Yezu: ‘Okalonza, wananfûmya’ Erhi abôna gurhi ali alibuka, Yezu amufâ-bwonjo, alambula okuboko amuhumakwo. Anamubwira erhi: ‘Nnonzize, fûmaga’ Ho na halya olushomyo lw’olya muntu lwazimangana, afûma! (Marko 1:40-42) Gurhi orhanyize oyo mushomyo aciyumvirhe?

20, 21. Bulya gurhi rhwakaderha oku Yezu ye lwiganyo lwinja lw’okukenga Nnamahanga?

²⁰ Yezu ahanyîre olwiganyo lwinja lw’okukenga Nnamahanga. Ciru omu rhusanzi rhuzibu erhi abashombanyi bage bakamujirîra amabi, agendekêra abêra mwishwekerezi kul’Ishe. Kwa lwiganyo, erhi Shetani amurhângula, Yezu arhajirâga caha. (Mateyo 4:1-11) Baguma na baguma b’omulala gwage barhakag’iyemera oku Yezu ye Masiya. Bakadêrha oku anasirahire. Cikoki Yezu agendekera ajira obulonza bwa Nnamahanga. (Marko 3:21) Erhi abashombanyi bage  bakamulibûza, agendekera abera mwishwekerezi kuli Nnamahanga, ntalusiku ciru n’oluguma abajirîre amabi.​—1 Petro 2:21-23.

²¹ Yezu âl’irhindibusire bwenene embere afê. Cikoki abera mwishwekerezi kuli Yehova. (Osome Abafilipi 2:8) Orhanye kuli ebyo byoshi byahikire Yezu na kunganaci alembîre olusiku l’okufâ kwage. Ashwekwa. Abantu bamushobeka mpu anajacire Nnamahanga. Abazuzi bahâbwa ebituliro, bamutwira olubanja kubi. Ehitu hy’abantu hyarhangira hyamushekera. Abasoda bamuhumbagulîza banamumanîka oku murhi. Embere Yezu afê ayakûza n’izu linene: “Hoshi aho, kwamahikirira!” (Yowane 19:30, NWT) Cikoki, Yehova  amufûla enyuma lya nsiku isharhu, amûha omubiri g’obunya mûka, kuli kuderha, omubiri guli aka ogwa bamalahika. (1 Petro 3:18) Migobe misungunu enyuma z’aho, Yezu ashubîra empingu “acitamalira ebwa kulyo kwa Nyamuzinda.” Alindirira oku Nnamahanga amujira Mwami.​—Abahabraniya 10:12, 13.

22. Bulya Yezu abezîre mwishwekerezi kul’Ishe, bulangalire buci rhugwerhe ene?

²² Bulya Yezu abezîre mwishwekerezi kul’Ishe, rhugwerhe obulangalire bw’okulama ensiku n’amango omu Paradizo hanw’igulu. Ntyo kwo Yehova alonzize. Omu cigabi cikulikire, rhwabona bulya gurhi olufû lwa Yezu lurhurhabire rhulam’ensiku n’amango.