1, 2. (a) Te yu sabi a nen fu wan pôpi sma, dan dati wani taki dati yu sabi en bun? Fruklari dati. (b) San son sma e taki fu Yesus?

FURU pôpi sma de na grontapu. Kande yu sabi a nen fu sonwan fu den. Ma a no fu di yu sabi a nen fu wan pôpi sma, dan dati wani taki dati yu sabi en bun. Nofo tron yu no sabi ala sani fu a sma libi noso fa a de trutru.

² A kan taki yu yere fu Yesus Krestes, aladi a libi sowan 2000 yari pasa. Ma furu sma no sabi fa Yesus ben de. Son sma e taki dati a ben de wan bun man. Trawan e taki dati a ben de wan profeiti, èn trawan baka e bribi taki en na Gado. San yu e denki?—Luku „Ete wan tu sani” 12.

3. Fu san ede a prenspari fu kon sabi Yehovah Gado nanga Yesus Krestes?

³ A prenspari taki yu kon sabi suma na Yesus. Fu san ede? Fu di Bijbel e taki: „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Iya, efu yu kon sabi Yehovah nanga Yesus, yu kan libi fu têgo na ini wan paradijs na grontapu (Yohanes 14:6). Boiti dati, te yu leri sabi Yesus, dan dati o yepi yu nownow kaba fu abi wan moro bun libi èn yu o leri fa fu libi nanga trawan (Yohanes 13:34, 35). Na ini kapitel 1, wi leri suma na Gado. Now wi o go luku san Bijbel e leri wi fu Yesus.

4. San den wortu „Mesias” nanga „Krestes” wani taki?

⁴ Furu yari fosi Yesus gebore, Yehovah ben pramisi na ini Bijbel taki a ben o seni a Mesias, noso a Krestes kon. A wortu „Mesias” kon fu a Hebrewtongo èn a wortu „Krestes” kon fu a Grikitongo. Den wortu disi e sori go na a sma di Gado ben o teki fu gi en wan spesrutu frantwortu. A Mesias o meki ala den sani di Gado pramisi kon tru. Boiti dati Yesus kan yepi yu nownow kaba. Ma fosi Yesus gebore, furu sma ben e aksi densrefi: ’Suma o de a Mesias?’

5. Den disipel fu Yesus ben e bribi taki a ben de a Mesias?

⁵ Den disipel fu Yesus ben de seiker taki Yesus ben de a Mesias di Gado ben o seni kon (Yohanes 1:41). Wan fu den, Simon Petrus, ben taigi Yesus: „Yu na a Krestes” (Mateyus 16:16). Fa wi kan de seiker tu taki Yesus na a Mesias?

6. Fa Yehovah yepi reti-ati sma fu kon sabi suma na a Mesias?

⁶ Langa ten fosi Yesus gebore, den profeiti fu Gado ben skrifi furu sani di ben o yepi sma fu sabi suma na a Mesias. Ma fa den sani di den profeiti ben skrifi ben o yepi wi? Kon meki wi taki dati yu musu go teki wan sma di noiti yu no miti ete, na wan presi pe furu sma e wakti bus. Efu wan sma fruteri yu finifini fa a sma de noso san a weri, dan yu o man feni a sma. Na a srefi fasi, Yehovah meki den profeiti skrifi san a Mesias ben o du èn san ben o pasa nanga en. Ala den profeititori disi di kon tru, e yepi reti-ati sma fu kon sabi taki Yesus na a Mesias.

7. San na tu profeititori di e sori taki Yesus na a Mesias?

⁷ Meki wi go luku tu fu den profeititori dati.  A fosiwan, na taki 700 yari fosi Yesus gebore, a profeiti Mika ben taki dati a Mesias ben o gebore na ini a pikin foto Betlehem (Mika 5:2). Èn na drape Yesus gebore! (Mateyus 2:1, 3-9) A di fu tu, na taki a profeiti Danièl ben skrifi taki a Mesias ben o kon na ini a yari 29 (Danièl 9:25). Disi na soso tu fu den someni profeititori di e sori krin taki Yesus na a Mesias di ben o kon.—Luku „Ete wan tu sani” 13.

8, 9. San pasa di Yesus dopu èn fa dati e sori taki en na a Mesias?

⁸ Yehovah ben meki sma si krin taki Yesus na a Mesias. Gado ben taigi Yohanes a Dopuman taki a ben o meki a kon sabi suma na a Mesias. Di Yesus go na Yohanes fu dopu na ini Yordan-liba, na ini a yari 29, dan Yehovah sori Yohanes taki Yesus ben de a Mesias. Bijbel e fruteri wi san pasa: „Di Yesus dopu, dan wantewante a opo komoto na a watra. Ne hemel opo èn Yohanes si Gado en yeye saka kon na Yesus tapu leki wan doifi. Boiti dati wan sten komoto na hemel. A taki: ’Disi na mi Manpikin, a lobiwan di mi feni bun’” (Mateyus 3:16, 17). Di Yohanes si èn yere a sani disi, dan a ben sabi taki Yesus na a Mesias (Yohanes 1:32-34). A dei dati, di Yehovah salfu Yesus nanga en santa yeye, dan Yesus tron a Mesias. En ben de a sma di Gado ben teki fu tron Fesiman nanga Kownu.—Yesaya 55:4.

 ⁹ Den Bijbel profeititori, a sani di Yehovah srefi ben taki, èn a sani di a meki Yohanes si di Yesus dopu, e sori taki Yesus na a Mesias. Ma pe Yesus ben komoto? Fa a ben de? Meki wi go luku san Bijbel e taki.

10. Soleki fa Bijbel e leri, dan pe Yesus ben libi fosi a kon na grontapu?

¹⁰ Bijbel e leri taki Yesus ben e libi na ini hemel langa ten fosi a kon na grontapu. Mika ben taki dati Yesus ben „de bun langa kaba” (Mika 5:2). Yesus srefi ben taki furu leisi taki a ben libi na hemel fosi a gebore dyaso na grontapu. (Leisi Yohanes 3:13; 6:38, 62; 17:4, 5.) Srefi fosi Yesus kon na grontapu, en nanga Yehovah ben de bun mati fu makandra.

11. Fu san ede Yehovah lobi Yesus so?

¹¹ Yehovah lobi Yesus trutru. Fu san ede? Fu di Gado meki Yesus fosi ala tra sani. Dati meki Bijbel e kari en „a fosiwan fu ala sani di Gado meki” (Kolosesma 1:15). * Yehovah lobi Yesus tu, fu di na ensrefi meki Yesus, sondro fu sma yepi en. Dati meki Bijbel e kari Yesus a „wan-enkri Manpikin” fu Gado (Yohanes 3:16). Boiti dati, Yesus na a wan-enkri sma di Yehovah gebroiki fu meki ala tra sani (Kolosesma 1:16). Èn na Yesus wawan Bijbel e kari „a Wortu”, fu di Yehovah ben e meki a tyari boskopu gi den tra engel nanga libisma.—Yohanes 1:14.

12. Fa wi du sabi taki Yesus nanga Gado a no a srefi sma?

¹² Son sma e bribi taki Yesus nanga Gado na a srefi sma. Ma dati a no san Bijbel e leri. Bijbel e taki dati na Gado meki Yesus. Dati wani taki dati Yesus ben abi wan bigin. Ma Yehovah di meki ala sani no abi wan  bigin (Psalm 90:2). Leki a Manpikin fu Gado, noiti Yesus pruberi fu teki a presi fu en Papa. Bijbel e sori krin taki a Tata bigi moro a Manpikin. (Leisi Yohanes 14:28; 1 Korentesma 11:3.) Na Yehovah wawan na a „Almaktiwan” (Genesis 17:1). En na a moro maktiwan na hemel nanga grontapu.—Luku „Ete wan tu sani” 14.

13. Fu san ede Bijbel e taki dati Yesus „abi den srefi fasi fu Gado di sma no man si”?

¹³ Fosi hemel nanga grontapu meki, Yehovah nanga en Manpikin Yesus wroko milyunmilyun yari nanga makandra. A musu de so taki den ben abi furu lobi gi makandra! (Yohanes 3:35; 14:31) Bijbel e taki dati Yesus ben „abi den srefi fasi fu Gado di sma no man si”.—Kolosesma 1:15.

14. Fa a du kon taki a lobi Manpikin fu Yehovah gebore leki wan libisma?

¹⁴ A lobi Manpikin fu Yehovah ben de klariklari fu gowe libi hemel fu kon gebore na grontapu leki wan libisma. Fa so wan sani kan? We, Yehovah du wan wondru. A teki a libi fu en Manpikin na ini hemel, dan a poti en go na ini a bere fu Maria, di no ben sribi nanga wan man ete. Na a fasi disi Yesus no ben abi wan libisma papa fanowdu. Na so Maria meki wan manpikin di no ben abi sondu, èn a kari en Yesus.—Lukas 1:30-35.

15. Fa yu kan kon sabi Yehovah moro bun?

¹⁵ Yu kan leri furu fu Yesus, fu a libi fu en, èn fu den fasi fu en te yu e leisi den Bijbel buku Mateyus, Markus, Lukas, nanga Yohanes. Sma sabi den buku disi  leki den Evangelietori. Fu di Yesus abi den srefi fasi fu en Papa, meki yu o kon sabi Yehovah moro bun te yu e leisi den buku disi. Dati meki Yesus ben taki: „A sma di si mi, si a Tata tu.”—Yohanes 14:9.

16. San Yesus ben e leri sma? Pe den sani di Yesus ben e leri sma komoto?

¹⁶ Furu sma ben e kari Yesus „Leriman” (Yohanes 1:38; 13:13). Wan fu den moro prenspari sani di a ben leri sma na „a bun nyunsu fu a Kownukondre”. San na a Kownukondre disi? Na a regering fu Gado na hemel di o tiri heri grontapu èn di o tyari blesi kon gi den sma di e arki Gado (Mateyus 4:23). Ala den sani di Yesus ben e leri sma ben komoto fu Yehovah. Yesus ben taki: „Den sani di mi e leri sma, a no fu misrefi, ma den de fu a sma di seni mi kon” (Yohanes 7:16). Yesus ben sabi taki Yehovah wani meki sma yere a bun nyunsu taki Gado Kownukondre o tiri heri grontapu.

17. Pe Yesus ben e gi sma leri? Fu san ede a ben e wroko so tranga fu gi sma leri?

¹⁷ Pe Yesus ben e gi sma leri? Ala sei pe a ben miti sma. A ben e gi sma leri na den boitipresi, foto, dorpu, wowoyo, presi pe sma ben e anbegi Gado, èn na sma oso. A no ben e wakti fu sma kon na en. Nofo tron na en ben e go na den sma (Markus 6:56; Lukas 19:5, 6). Yesus ben e wroko tranga èn a ben gebroiki furu fu en ten nanga en krakti fu gi sma leri. Fu san ede? Fu di a ben sabi taki na dati Gado ben wani a du, èn ala ten a ben e gi yesi na en Papa (Yohanes 8:28, 29). Yesus ben e preiki tu fu di a ben e sari sma. (Leisi Mateyus 9:35, 36.) A ben e si taki den kerki fesiman no ben e leri sma den tru tori fu Gado nanga en  Kownukondre. Dati meki a ben wani yepi furu sma fu yere a bun nyunsu.

18. Sortu fasi fu Yesus yu moro lobi?

¹⁸ Yesus ben lobi sma èn a ben e broko en ede nanga den. A ben abi switifasi èn sma no ben frede fu taki nanga en. Srefi pikin-nengre ben lobi en (Markus 10:13-16). Noiti Yesus ben e kori sma. A no ben lobi te sma e du kruka sani (Mateyus 21:12, 13). A ben libi na ini wan ten pe umasma no ben abi furu reti èn sma no ben e lespeki den. Ma ala ten Yesus ben e sori lespeki gi umasma (Yohanes 4:9, 27). Yesus ben abi furu sakafasi tu. Fu eksempre, wan neti a wasi den futu fu den apostel fu en. Nofo tron na wan srafu ben e du a sani dati.—Yohanes 13:2-5, 12-17.

19. Sortu eksempre e sori taki Yesus ben sabi san sma abi fanowdu èn taki a ben wani yepi den?

¹⁹ Yesus ben sabi san sma abi fanowdu èn a ben wani yepi den. Dati meki a ben gebroiki a makti fu Gado fu meki sma kon betre (Mateyus 14:14). Fu eksempre, wan man di ben abi gwasi go na Yesus èn a taigi en: „Efu yu wani nomo, yu kan meki mi kon krin.” Yesus ben sari a man fu di a ben e pina, dati meki a ben wani yepi en. Sobun Yesus langa en anu fasi a man èn a taigi en: „Mi wani. Kon krin.” Wantewante a man kon betre! (Markus 1:40-42) Fa yu denki taki a man dati ben e firi?

20, 21. Fu san ede Yesus na a moro bun eksempre fu wan sma di gi yesi na Gado?

²⁰ A moro bun eksempre fu wan sma di gi yesi na Gado, na Yesus. A tan gi yesi na en Papa, awinsi san  ben pasa noso awinsi san den feanti fu en ben du nanga en. Fu eksempre, Yesus no sondu di Satan tesi en (Mateyus 4:1-11). Sonwan fu den famiri fu Yesus no ben e bribi taki a ben de a Mesias. Den ben taki srefi taki a „lasi en frustan”, ma Yesus tan du a wroko fu Gado (Markus 3:21). Di den feanti fu Yesus du ogri-ati sani nanga en, dan a no pruberi fu du den ogri baka, ma a tan du san Gado ben wani.—1 Petrus 2:21-23.

²¹ Srefi di Yesus nyan pina èn dede wan hati dede, toku a tan gi yesi na Yehovah. (Leisi Filipisma 2:8.) Prakseri fa a nyan pina a dei di a dede. Sma grabu en, falsi kotoigi krutu en taki a kosi Gado, kruka krutuman leisi strafu gi en, sma lafu en èn den srudati fon  en, dan den spikri en na wan postu. Di a ben de fu dede a bari: „A kaba!” (Yohanes 19:30) Dri dei baka di Yesus dede, Yehovah wiki en baka èn a gi en wan yeye skin (1 Petrus 3:18). Wan tu wiki baka dati, Yesus drai go baka na hemel èn „a go sidon na a reti-anusei fu Gado”. Drape a wakti teleki Gado meki a tron Kownu.—Hebrewsma 10:12, 13.

22. Sortu okasi wi abi now, fu di Yesus tan gi yesi na en Tata?

²² Fu di Yesus tan gi yesi na en Tata, meki wi abi na okasi now fu libi fu têgo na ini wan paradijs na grontapu, soleki fa Yehovah ben wani. Na ini a tra kapitel, wi o luku fa a dede fu Yesus e meki taki wi kan libi fu têgo.