1, 2. (a) Ipedori kereka ijo aijen itunganan yenejenara cut obe arai ijeni ijo ekekiror bon? Kitetem. (b) Anyoika bo nuiyuunitos icetunga kanuikamunitos Yesu?

IPU itunga luejenara kotoma akwap. Aticepak ipedori ijo aijen ekiror itunganan kayen ejenara. Konye mam ngin itodunit ebe ijeni ijo itunganan ngin cut ejok. Mam erai ebe ijeni ijo akiro nuipu nuikamunitos aijar naka itunganan kangin ka ikeponesio.

² Aticepak ipupunitor ijo nuikamunitos Yesu, karaida ajai ngesi toma akwap ikar nepetai 2,000 luatuboros. Konye itunga luipu mam ejenete iponesio luka Yesu cut obe. Ebakasi icetunga ebe arai Yesu etunganan loajok, ebakasi ice ebe arai ngesi enaabi, ido iyuunitos icetunga ebe erai ngesi Edeke. Iwomit ijo biai?—Koany Nuengesete 12.

3. Kanukinyo ibusakinitor ijo ajenun abeit naka Edeke Yawe ka Yesu Kristo?

³ Ibusakinit ijo ajenun abeit naikamunit Yesu. Kanukinyo? Isisianakini oni Ebaibuli ebe: ‘Aijar namam edaun nges na ebe, kojenutu jo Edeke ediopet lokabeit, ka Yesu Kristo lokijukuni.’ (Yokana 17:3) Eebo, arai ijenu ijo abeit naikamunit Yawe ka Yesu, ibuni ijo aijar ikar kere kotoma paradais kakwap. (Yokana 14:6) Bobo da, ajenun Yesu epedori aingarakin ijo naarai erai ngesi aanyunet najokan noi naitodikini ijo eipone loebeitor ijo aijar ka ayait luce. (Yokana 13:34, 35) Kotoma  Osula losodit, apotu oni kesisiautu abeit naikamunit Edeke. Konye kwana ibuni oni amisiikin nuisisianakini Ebaibuli nuikamunitos Yesu.

4. Anyoin apolou naka akiro “Mesia” keda “Kristo”?

⁴ Ikar luipu eroko keuruna Yesu, abu Yawe kisumun kotoma Obaibuli ebe ebuni ngesi aijukun Mesia, arai bo Kristo. Akirot “Mesia” elomunit kotoma angajep naka Aburanian, ido akirot “Kristo” elomunit kotoma angajep naka Ayonanin. Apolou akiro kanu ngesi na ebe abu Edeke koseu Mesia loesumunitai kosodi aijaikin nges adoketait naitegelikina. Ebuni Mesia aitodolikin aisumununeta nuka Edeke kere. Epedori Yesu aingarakin ijo kwape kwana. Konye eroko euruna Yesu apodonokinos itunga luipu ebe, ‘Ingai bo ebuni araun Mesia?’

5. Acamunito kereka ikesisiak luka Yesu ebe erai ngesi Mesia?

⁵ Mam ikiyakia luka Yesu abuonokinos ebe erai Yesu Mesia loesumunitai. (Yokana 1:41) Kwape aanyunet, abu ekiyakia Simon Petero kolimok Yesu ebe: “Irai ijo Kristo.” (Matayo 16:16) Eipone bo ani ipedoria oni ajenun ebe erai Yesu Mesia?

6. Eipone bo ani engarakina Yawe itunga luemunoko ajenun Mesia?

⁶ Ikar luipu eroko keuruna Yesu, ewadikatos inaabin luka Edeke akiro nuipu nuepedorete aingarakin itunga ajenun Mesia. Koipone bo ani apotu ngun kingarakiniata? Koomoom ber ijo bala elimokinitai ijo alosit aboisit naepaanakinete abaasin kanu aisiriam itunganan yenimam ijo iwanyunitor. Arai itetemikin ijo eipone lo ejaar itunganan ngin ejok, epatanikini ijo adumun nges. Kwape kwangin, abu Yawe kitosom ikenaabin kanu  alimokin oni iboro luabeit Mesia aswam ka nuabeit atakanikin nges. Aitodolinikineta nuka adwareta kanu ingarakinete itunga luemunoko ajenun ebe Yesu ngesi Mesia.

7. Anyoika bo adwareta aarei nuitogogongitos ebe erai Yesu Mesia?

⁷ Aanyutu ber oni adwareta aarei. Nasodit, Ikar 700 eroko keuruna Yesu. Abu Mika kodwarite ebe abeit Mesia alomun ko Betelekem. (Mika 5:2) Ido nepenen aponi kourikinai Yesu! (Matayo 2:1, 3-9) Nakiyareit, abu Daniel kodwarite ebe ebuni Mesia atakanun toma okar 29  A.N.Y. (Akaulo Nakeurunere Yesu). (Daniel 9:25) Eraasi nu adwareta aarei kotoma adwareta nuipu nuitogogongitos ebe Yesu ngesi Mesia loesumunitai.—Koany Nuengesete 13.

8, 9. Inyoin bo abu kotakanu akaulo naebatisaunor Yesu?

⁸ Abu Yawe kitacau cut ebe erai Yesu Mesia. Esumunikit Edeke Yokana ekebatisan aanyunet naitejenuni Mesia. Nalosio Yesu nejai Yokana kanu aibatisaun kocilet loka Yorodan kokaru lo 29 Akaulo Nakeurunere Yesu, abu Yokana koany aanyunet ngin. Elimokinit oni Ebaibuli nuapotu kotakanutu: “Nakedaunia Yesu aibatisao, atipet kodoku kakipi: ido koany, kopukokin akuj, koany Emoyo loka Edeke ijesun kwape ajele, ebuni mamakeng, ido koany kobu eporoto kokuju ebe ‘Lo nges Okokuka, lominat, loalelia eong noi.’” (Matayo 3:16, 17) Nakedaunia Yokana aanyun aanyunet ngin, abu kojenu  ebe Yesu nges Mesia. (Yokana 1:32-34) Apak ngin ngesi kenyonyokina Yawe Yesu Emoyo lokalaunan, ido abu Yesu koraun Mesia. Yesu ngesi loabu Edeke koseu kwape Engarenon ka Ekabaka.—Isaia 55:4.

⁹ Adwareta nuka Obaibuli, eporoto loka Yawe, kaijesun naka Emoyo lokalaunan itogogongitos ebe erai Yesu Mesia. Konye ai bo abunio Yesu, inyoika bo  iponesio luka Yesu? Aanyutu ber nuisisianakini Ebaibuli.

10. Ayoika nuisisianakini Ebaibuli nuikamunitos Yesu eroko nges ebunio akwap?

¹⁰ Isisianakini Ebaibuli ebe ajai Yesu toma akuj eroko ebunio toma akwap. Adwarit Mika ebe ajai Mesia “ameun apengo.” (Mika 5:2) Kinerit Yesu irwan ipu ebe erai ngesi loeboit kotoma akuj eroko nges ebunio kotoma akwap. (Kosiom Yokana 3:13; 6:38; 17:4, 5.) Ajaatar Yesu keda eidicane nepepe ka Yawe eroko nges ebunio toma akwap.

11. Kanukinyo eraar Yesu loepol etiai noi kanejai Yawe?

¹¹ Erai Yesu loepol etiai noi kanejai Yawe. Kanukinyo? Naarai abu Edeke kosub ngesi eroko esuba idiobore ka idiotunganan kere. Ngesi enyaritere Yesu ekiyai loka isuban.” * (Ikolosain 1:15) Erai bobo Yesu loketiai kanejai Yawe naarai nges bon esubit Yawe keda akekanin. Nges enyaritere Yesu “Okokuke loteluna.” (Yokana 3:16) Yesu bon ngesi abu Yawe kitosom kanu aisub iceboro. (Ikolosain 1:16) Yesu bon enyaritai “Akirot,” naarai abu Yawe kitosom nges kanu aitijenikinia imalaikan ka itunga akiro ka aicoreta.—Yokana 1:14.

12. Eipone bo ani ijenunia oni ebe mam Yesu eriakasi ka Edeke?

¹² Iyuunitos icetunga ebe eriakasi Yesu keda Edeke. Konye mam Ebaibuli isisianakini kwangin. Isisianakini Ebaibuli ebe erai Yesu loesubunitai, apolouke ebe ejai ngesi ageunet. Konye Yawe Lokasuban iboro  kere emameotor kageunet. (Isabulin 90:2) Kwape Okoku loka Edeke, mam Yesu etamitor ariakuun ka Edeke. Isisianakini Ebaibuli ebe epol Papa adepar Okoku. (Kosiom Yokana 14:28; 1 Ikorinton 11:3.) Yawe bon nges “Edeke Lokapedor kere.” (Ageun 17:1) Erai ngesi lokapolon ido lokapedor kere kotoma akuj ka akwap.—Koany Nuengesete 14.

13. Kanukinyo enyaritor Ebaibuli Yesu “Aput naka Edeke lomam etakani”?

¹³ Eswamatos Yawe ka Okokuke, Yesu adaun apak naepol noi eroko kesuba akuj ka akwap. Keminanara kesi noi! (Yokana 3:35; 14:31) Abu Yesu koputo iponesio luka papake ejok noi nges enyaritor Ebaibuli ngesi “aput naka Edeke lomam etakani.”—Ikolosain 1:15.

14. Koipone bo ani aurunere Okoku loka Yawe loepol etiai kwape etunganan?

¹⁴ Abu Okoku loka Yawe kocam aijal akuj kosodi abunere toma akwap kwape etunganan. Koipone bo ani keswamaunotor ngun? Koipone kalo eumokina, abu Yawe kijesu aijar naka okokuke toma akoik naka abekot nanyaritai Mariam. Kanuka ngun, mam aurio naka Yesu akoto Papa lotunganan. Abu Mariam kouru ikoku yenikadoliton, konyara nges Yesu.—Luka 1:30-35.

15. Eipone bo ani ipedoria ijo ajenun Yawe ejok?

¹⁵ Ipedori ijo aisisiaun nuipu nuikamunitos aijar naka Yesu ka iponesioke, koipone lo aisiom itabon luka Obaibuli kwape nat Matayo, Marako, Luka ka Yokana. Enyaritai itabon ngun itabon luka Eijiri. Naarai eputosi Yesu ka papake kotoma oponesio, arai kisisiau ijo nuikamunitos Yesu ijenuni ijo Yawe ejok. Nges abalar Yesu  ebe: “Yenikaanyunit eong, eanyunit Papa.”—Yokana 14:9.

16. Anyoika akiro nukesisianakini Yesu? Ai bo keponiata aisisianakineta nuka Yesu?

¹⁶ Anyaritos itunga luipu Yesu kwape “Ekesisianakinan.” (Yokana 1:38; 13:13) Akiro nuapolok nukesisianakini Yesu araasi “akiro nukajokak nuka Ajakanut.” Inyoin bo Ajakanut ngin? Erai apugan naejai toma akuj naebeit aipuga akwap kere ido eyangaun arerengusio nejaasi itunga luerimaaritos Edeke. (Matayo 4:23) Akiro kere nukesisianakini Yesu aponitos kama ejai Yawe. Abala Yesu ebe: “Akaisisianakin mere nakang, dimarai naka ngol lokejukuni.” (Yokana 7:16) Ajeni Yesu ebe akote naka Yawe kanu itunga nges kesi aiirar akiro nukajokak nuka Ajakanut naka Edeke naebuni aipuga akwap kere.

17. Ai bo kesisisanakina Yesu? Kanukinyo kiswama ngesi kagogong aisisianakin itunga?

¹⁷ Ai bo kesisianakina Yesu? Kanginiboisit kere nadumakini ngesi itunga. Esisianakini ngesi kotoma obomai, kocaloi, kosokonin, aiboisio nuka aima, ka oreria kec. Mam nges edareuni itunga abunere nejai ngesi. Alosi ngesi neajaas kesi. (Marako 6:56; Luka 19:5, 6) Abu Yesu kopal akepak ka akegogong naepol kanu aisisianakin itunga. Kanukinyo? Naarai ajeni ngesi ebe akoto Edeke nges aswam kwangin. Ido naarai arimaarit ngesi Papake duc. (Yokana 8:28, 29) Arai bobo Yesu loalimonokini naarai kajaasi ngesi kaitim mama ejaasi itunga. (Kosiom Matayo 9:35, 36.) Abu ngesi koany ebe mam engarenok luka idiinin esisianakinete abeit naikamunit Edeke ka Ajakanutuke. Kanuka ngun, akoto ngesi aisiirikin itunga luipu akiro nukajokak.

18. Inyoika iponesio luka Yesu lueminakinitos ijo?

 ¹⁸ Arai Yesu etunganan loamina itunga ido kopodokinite kes. Arai ngesi loasiana ka loapatana ainerar. Idwe da apatanikit adolokin nges. (Marako 10:13-16) Arai Yesu loayait itunga ejok. Alait ngesi aronis ka amamus etube. (Matayo 21:12, 13) Kapakio numam ejaikinitere angor ayongit ka apedorosiokec, abu Yesu kijaik angor ayongit ka angosibib. (Yokana 4:9, 27) Arai bobo Yesu loeyapepera. Kwape aanyunet, adiope tibong, abu ngesi kilot akeje nuka ikiyakia, aswam naduc eswamaenenete ibulesin.—Yokana 13:2-5, 12-17.

19. Anyoin aanyunet naitodunit ebe ajeni Yesu ipudesia luka itunga ido epuda ngesi aingarakin kesi!

¹⁹ Ajeni Yesu ipudesia luka itunga, ido epuda ngesi aingarakin kes. Abu ngesi ingarak itunga koipone kalo aitosom apedor naejaikinit ngesi Yawe kanu aitangaleununa itunga. (Matayo 14:14) Kwape aanyunet, abu etunganan loadeka atapon kolimok Yesu ebe: “Arai ikoto ipedori aiswagar eong.” Abu Yesu kopup apipil ka aiticanitoi naka etunganan kalo. Kitim Yesu etunganan ngon ido kokotokin ngesi aingarakin nges. Kanuka ngun, abu Yesu korio akekan, kotiro nges kobala ebe: “Akoto, kiswagar.” Kongaleu etunganan lokatapon! (Marako 1:40-42) Koomoom ber ijo eipone lo abu etunganan ngon kiyalamikinor?

20, 21. Eipone bo ani eraar Yesu aanyunet naitelekarit kakere naka arimaarit Edeke?

²⁰ Erai Yesu aanyunet naitelekaarit kakere naka arimaarit Edeke. Karaida ketamitos lukasurupike aiswamakin ngesi nueroko, amunokina ngesi nejai Papake. Kwape aanyunet, mam Yesu abu kodiaka nacodunia  ngesi Satan. (Matayo 4:1-11) Mam icetunga luka okale loka Yesu eyuunitos ebe erai Yesu Mesia ido abakasi kesi ebe “amunaar” Yesu akou, konye abu Yesu kinyikok aswam naka Edeke. (Marako 3:21) Naesiriebata ngesi lukasurupoke, abu Yesu komunokin Edeke ido mam abu kiswamak kes aronis.—1 Petero 2:21-23.

²¹ Karaida naketereikinor Yesu katwanare naepipil, abu ngesi kosal emunokina nejai Yawe. (Kosiom Ipilipin 2:8.) Komoom ber ijo nuabu Yesu kotitingik kaparaan natwanareke. Aponi kikamunai, kitoronata ajenak lukaisab kanumam ngesi iswamat, kotubokisi ikatubok nuamamei abeit, aponi kokwenare ngesi, ido apotu isirikalei kitisilasi ka aibubukin ngesi okitoi. Neatwania ngesi abu kotema atiar: “Angetakinos!” (Yokana 19:30)  Akaulo naka apaarasia auni, abu Yawe kitajaru Yesu kosodi aijaikin ngesi akuan namoyo. (1 Petero 3:18) Ketuboros isabiitin idis, abu Yesu kodoka kuju, “kiboikin akan nakoteten naka Edeke,” kosodi aidareun kitoni nakitaraunia Edeke ngesi Ekabaka.—Iburanian 10:12, 13.

22. Anyoin arereng ijaatar oni naarai abu Yesu kosalak emunokina nejai Papake?

²² Naarai abu Yesu kosalak emunokina nejai Papake, ejai kwana oni ka arereng naka aijar ikar kere kwape alosikinitor Yawe. Kosula loetupakini, Ibuni oni aisisiaun eipone loijaikinia atwanare naka Yesu oni arereng naka aijar ikar kere.