1, 2. a) Ina guti lina nya muthu a gu ni ndruma so yeyedza gu khiso u ngu muti gwadi? Tshamuseya. b) Ginani egi vathu va gi khodwago khu Jesu?

GU NA ni vathu nya vangi nya ndruma mafuni. Adzina u nguti lina nya muthu nya ndruma. Ganiolu guti basi lina laye kha si thuli gu khiso u ngu muti gwadi. Kha si thuli gu khiso u nguti satshavbo si yelanago ni womi waye ni edzi uye khu lisine a gu idzo.

² Si nga girega nu pwide gilogyo khu Jesu Kristo, ambari olu gu vbindrago 2.000 myaga na vbanyide mafuni. Ganiolu vathu nya vangi kha va dziti gu khavo Jesu a di khade kharini. Vathu nyo khaguri vari khavo a diri muthu nya wadi, vambe vari khavo a diri muprofeti, vambe gambe vo khodwa gu khavo uye Nungungulu. Khu mevbini mawonelo yago? — Wona Tshamuselo 12.

3. Khu ginani si gu na ni lisima guti lisine khu Jehovha Nungungulu ni Jesu Kristo?

³ Si na ni lisima guti lisine khu Jesu. Khu ginani? Bhibhiliya yo hi embeya khiyo: “Guvbanya nya gupindruge khogu: vati uwe basi kha nga Nungungulu nya lisine, ni guti Jesu Kristo, a gu uye u nga mu rumelago.” (Johane 17:3) Khu lisine, wa guti lisine khu Jehovha ni Jesu, u nga vbanya paradhesini mafuni kala gupindruga. (Johane 14:6) Gimbe gambe, guti Jesu gu nga gu phasa kholu uye giyeyedzo nya gyadi ngudzu nya ndziya nyo vbanyisane khiyo ni vambe. (Johane 13:34, 35) Omu nya Gipimo 1, hi hevbude lisine khu Nungungulu. Olu hi na hevbula esi Bhibhiliya yi si hevbudzago khu Jesu.

4. Malito “Mesiya” ni “Kristo” mo thula ginani?

⁴ Na gu nga tshade myaga nya yingi gasi gu Jesu a velegwa,  Jehovha tumbiside omu nya Bhibhiliya gu khuye a na rumeya Mesiya, mwendro Kristo. Lito “Mesiya” la guta khavba nya lidimi nya giHebheru, gasi lito “Kristo” la guta khavba nya lidimi nya giGreki. Malito yaya ya mavili mo tshamuseya gu khayo Nungungulu a di hadzi gu hatha Mesiya a tumbisidwego a bwe a mu ninga gikhalo nyo hathege. Mesiya a na tadzisa situmbiso satshavbo sa Nungungulu. Jesu gambe a ngu kodza gu gu phasa olu. Ganiolu, na si gu velegwi Jesu, vathu nya vangi va di gu dzi wudzisa khavo, ‘Khu mani a na khalago Mesiya?’

5. Ina vapizane va Jesu va di khodwe gu khavo uye khuye Mesiya?

⁵ Vapizane va Jesu kha va nga kanakana gu khavo uye a diri Mesiya a tumbisidwego. (Johane 1:41) Khu giyeyedzo, Simoni Pedro a di khuye ga Jesu: “Uwe khuwe Kristo.” (Matewu 16:16) Hi nga tiyisega kharini gu khethu Jesu khuye Mesiya kamo?

6. Jehovha phaside kharini vathu nyo tumbege guti Mesiya?

⁶ Na gu ngo keneleya tepo nya yingi gasi Jesu a velegwa, vaprofeti va Nungungulu va lovide mahungu nya mangi ma nga hadzi gu phasa vathu gu tugula Mesiya. Si di hadzi phasa kharini isoso? Nga pimisa khu gu ba u lombidwe gu khinga muthu parajitunu nya sibhomba, nari gu gima u di si mu woni muthu yoyo. Go manega muthu nyo gu tshamuseye gwadi makhalelo nya muthu yoyo, u di hadzi gu mu mana. Khu gufana, Jehovha thumiside vaprofeti vaye gasi gu hi embeya esi Mesiya a nga hadzi gu si gira nesi si nga hadzi gu mu dugeleya. Gutadzisega nya siprofeto soso satshavbo gu phaside vathu nyo tumbege guti gu khavo Jesu khuye Mesiya.

7. Khu sevbini siprofeto sivili si yeyedzago gu khiso Jesu khuye Mesiya?

⁷ Hi na bhula khu sivili nya siprofeto soso. Gupheya, na gu nga tshade 700 myaga gasi Jesu a velegwa, Mikeya profetide khuye Mesiya a di hadzi gu velegwa  gidhoropanani gya Bhetlehema. (Mikeya 5:2) Nigu khu lisine Jesu velegedwe iyoyo! (Matewu 2:1, 3-9) Nya wuvili, Dhaniyeli profetide khuye Mesiya a di hadzi gu vboha khu mwaga nya 29 E.C. (Dhaniyeli 9:25) Esi siprofeto sivili basi ndrani nya singi sakona si yeyedzago guagani gu khiso Jesu khuye Mesiya a tumbisidwego. — Wona Tshamuselo 13.

8, 9. Ginani gi dugeledego gubhapatiswatunu ga Jesu gi yeyedzago gu khigyo Jesu khuye Mesiya?

⁸ Jehovha si vegide gwadi guagani gu khuye Jesu khuye Mesiya. Nungungulu a di tumbiside Johane Mubhapatisi gu mu ninga giwonegiso a nga hadzi gu muti khigyo oyu a gu Mesiya. Tepo Jesu a nga hongola ga Johane gasi gu ya bhapatiswa Tsongoni wa Joridhani khu mwaga nya 29 E.C., Johane gi wone giwonegiso gyogyo. Bhibhiliya yi ngu hi embeya esi si dugeledego: “Jesu na bhapatisidwe, a di duga khu matini. Avbovbo Ndzadzini gu di tulega, a wona Liphuvbo la Nungungulu na li gu relela kha nga lituva, li ta mbaka vbatshani gwaye. Khavbo lito nya gute khu Ndzadzini li di, khilo: ‘Oyu khu Mwamana wangu nya guhaladzege ngudzu, a nengedzisago monyo wangu.’” (Matewu 3:16, 17) Tepo Johane a wonidego ni gupwa giwonegiso gyogyo, a di dzegeya gu dziti gu khuye Jesu a diri uye Mesiya. (Johane 1:32-34) Litshigu lolo, tepo Jehovha a guhudego liphuvbo laye vbatshani gwaye, Jesu a di khala Mesiya. Khuye a nga ba a hathidwe khu Nungungulu gasi gu khala Muthangeyi ni Pfhumu. — Isaya 55:4.

⁹ Siprofeto nya Bhibhiliya, malito ya Jehovha wutumbu ni giwonegiso a gi yeyedzidego gubhapatiswatunu ga Jesu si tiyiside gu khiso Jesu khuye Mesiya. Ganiolu a di guta khu hayi Jesu, nigu a di khade kharini? Hongoleni hi wone esi Bhibhiliya yi si tshamuseyago.

10. Ginani egi Bhibhiliya yi gi hevbudzago khu Jesu na si guti Mafuni?

¹⁰ Bhibhiliya yo hevbudza gu khiyo Jesu vbanyide tepo nyo laphe ngudzu ndzadzini na a si guti mafuni. Mikeya ganede khuye Mesiya a di romo “gukhegela gikhatini gya gale.” (Mikeya 5:2) Jesu abune ganede khu guwuyedzeya  khuye vbanyide ndzadzini vathu na va si gu vangwi. (Leri Johane 3:13; 6:38, 62; 17:4, 5.) Ambari na si guti mafuni Jesu a diri ni gupwanana nya gukhongolo ngudzu ni Jehovha.

11. Khu ginani Jesu a godwago ngudzu khu Jehovha?

¹¹ Jesu muthu a godwago ngudzu khu Jehovha. Khu ginani? Kholu Nungungulu mu vangide na a si gu vangi gimbe gilo. Khu kharato o ranwa pwani matewula nya sivangwa satshavbo kholu “velegidwe khu Babe na li si gu vangwi litigo.” * (Vakolosi 1:15) Jesu gambe muthu a godwago ngudzu khu Jehovha kholu khuye enga a vangidwego khu mandza ya Jehovha. Khu gighelo gyogyo a ranwago pwani i “Mwanaye wa moyo.” (Johane 3:16) Jesu gambe khuye enga a thumisidwego khu Jehovha gasi gu vanga silo satshavbo. (Vakolosi 1:16) Nigu khu Jesu enga a ranwago “Lito,” kholu Jehovha thumiside uye gasi gu vbohiseya dzingilozi ni vathu mahungu ni sileletelo. — Johane 1:14.

12. Ho dziti kharini gu khethu Jesu ni Nungungulu khandri muthu moyo?

¹² Vambe vathu vo khodwa gu khavo Jesu ni Nungungulu muthu moyo. Ganiolu isoso khandriso si hevbudzwago khu Bhibhiliya. Iyo yari khiyo Jesu a di vangwa, esi si tshamuseyago gu khiso Jesu na ni maphelo. Ganiolu Jehovha, a gu uye a vangidego silo satshavbo mwalo maphelo. (Dzindzimo 90:2) Kha nga Gyanana gya Nungungulu, Jesu gima kha pimisa gu zama gu khala Nungungulu. Bhibhiliya yi ngu hevbudza khu ndziya nyo pwisisege gu khiyo Babe khongolo ga Gyanana. (Leri Johane 14:28; 1 Vakorinto 11:3) Khu Jehovha enga a gu “Nungungulu  nya Tshivba Yatshavbo.” (Genesi 17:1) Uye khongolo guvbindra vatshavbo nigu muthu nya tshivba nya yikhongolo ga vatshavbo ndzadzini ni mafuni. — Wona Tshamuselo 14.

13. Khu ginani Bhibhiliya yi ganeyago khiyo Jesu khuye “giwonelo nya Nungungulu a si wonegigo”?

¹³ Jehovha ni Mwanaye, Jesu, va thumide vatshavbo vbafuvbi ni vbafuvbi khu dzibhiliyoni nya myaga ndzadzini, mafu na ma si gu vangwi. Kha si kanakanisi gu avo va di gu golana ngudzu! (Johane 3:35; 14:31) Jesu pimedzede gwadi makhalelo ya Babe waye avba nya gu Bhibhiliya yi mu rana khiyo “giwonelo nya Nungungulu a si wonegigo.” — Vakolosi 1:15.

14. Si kodzegide kharini gu Gyanana gya Jehovha a gi golago ngudzu gi velegwa kha nga muthu nya nyama?

¹⁴ Gyanana gya Jehovha a gi golago ngudzu gi dzi emisede gu khuga ndzadzini gi ta velegwa mafuni kha nga muthu nya nyama. Si kodzegide kharini isoso? Khu ndziya nya giliwugiso, Jehovha ruriside womi wa Mwanaye khu ndzadzini a wu yisa ndrani nya mbiri yi ranwago Mariya. Khu ndziya yoyo, kha ga vbwetega gu Jesu a manega ni Babe nya nyama. Khavbovbo, Mariya velegide gyanana gi vbeledego, a gi riya khuye khigyo Jesu. — Luka 1:30-35.

15. U nga si kodza kharini guti gwadi Jehovha?

¹⁵ U nga hevbula nya singi khu Jesu, mavbanyelo yaye, ni makhalelo yaye khu gu leri dzilivru nya Bhibhiliya nya nga Matewu, Marko, Luka ni Johane. Dzilivru dzodzo dzo ranwa pwani dziIvhangeli. Kha nga olu Jesu a fanago gwadi ni Babe waye, esi u si hevbulago si na gu phasa gambe gu muti gwadi Jehovha. Khigyo gighelo gi nga gira Jesu a ganeya khuye: “Uye a nyi wonago, a ngu wona Babe.” — Johane 14:9.

16. Ginani egi Jesu a gi hevbudzidego? Sihevbudzo sa Jesu si di ba sita khu hayi?

 ¹⁶ Vathu nya vangi va ranide Jesu khavo “Muhevbudzi.” (Johane 1:38; 13:13) Gimwegyo nya silo nya lisima a si hevbudzidego gu diri “Mahungu nya Yadi nya mufumo.” Ginani Mufumo wowo? Mufumo wa Nungungulu wu emisidwego ndzadzini wu no fumeyago mafu yatshavbo ni gu resa makategwa ga vathu va engisago Nungungulu. (Matewu 4:23) Satshavbo esi Jesu a si hevbudzidego sa guta khu ga Jehovha. Jesu a di khuye: “Gihevbudzo gegi khandri gyangu, khya wule a nga nyi rumelago.” (Johane 7:16) Jesu a di gu dziti gu khuye Jehovha o vbweta gu khuye vathu vapwa mahungu nya yadi nya gu khayo Mufumo wa Nungungulu wu na fumeya mafu.

17. Jesu hevbudzide hayini? Khu ginani a dzi garadzedego ngudzu gu hevbudza vathu?

¹⁷ Jesu hevbudzide hayini? Ni hayini a nga ba a mana vathu. Hevbudzide vbavbandze nya madhoropa ambari madhoropani, sidhoropanani, dzibazarini, malangani nya wukhozeli ni dzindrangani nya vathu. A di si vireyi gu vathu vata gwaye. A di gu oloveya gu va yela. (Marko 6:56; Luka 19:5, 6) Jesu dzi garadzide ngudzu a bwe a vbedza tepo ni tshivba nya yingi gasi gu hevbudza vathu. Khu ginani? Kholu a di gu dziti gu khuye Nungungulu a di gu vbweta gu a gira isoso nigu tepo yatshavbo a di gu engisa Babe waye. (Johane 8:28, 29) Gimbe gambe gi giridego Jesu a tshumayela khugu uye a di gu pweya wusiwana vathu. (Leri Matewu 9:35, 36.) A di gu wona khuye vathangeyi nya wukhongeli va di si va hevbudzi lisine khu Nungungulu ni Mufumo waye. Khu kharato, a di gu vbweta gu va phasa khavba si kodzegago khavbo gasi vapwa mahungu nya yadi.

18. Khu mevbi makhalelo ya Jesu u ma golago ngudzu?

¹⁸ Jesu a di gu haladza vathu a bwe a va khathaleya. A  diri muthu nya wadi nigu si di gu vbevbuga gu bhula naye. Ambari sanana si di gu gola gu khala naye. (Marko 10:13-16) Tepo yatshavbo Jesu a di gu phara gwadi vathu. A di gu venga gukanganyisa ni gukalaveya. (Matewu 21:12, 13) Vbanyide khu tepo eyi vanyamayi va nga ba vari mwalo dzifanelo nya dzingi nigu va di gu pharwa khu ndziya nya mba na githawo. Ganiolu tepo yatshavbo Jesu a di gu phara vanyamayi khu ndziya nyo zundzege ni githawo. (Johane 4:9, 27) Jesu gambe a di gu dzi nogisa khu lisine. Khu giyeyedzo, wutshigu nyo khaguri hambiside migondro vapostoli vaye, si gu silo si nga ba si oloveya gu girwa khu githumi. — Johane 13:2-5, 12-17.

19. Gigiro muni gi yeyedzago gu khigyo Jesu a di gu siti esi vathu khu lisine va nga ba va si vbweta nigu a di gu vbweta gu va phasa?

¹⁹ Jesu a di gu siti esi khu lisine vathu va nga ba va si vbweta nigu uye a di gu vbweta gu va phasa. Isoso si wonegide guagani tepo a thumisidego tshivha ya Nungungulu gasi gu vbanyisa vathu khu ndziya nya giliwugiso. (Matewu 14:14) Khu giyeyedzo, mwama nyo khaguri a nga ba a dwala khu sokono yede Jesu a ya mu embeya khuye: “Pfhumu, wa gu dzina nyi agise.” Jesu khutidwe monyo khu wuvi ni gutshaniseka ga mwama yoyo. Mu pwede a bwe a vbweta gu mu phasa. Khu kharato, Jesu a di thawuludza libogo, a khuha mwama wule a bwe a mu embeya khuye: “Nyi ngu dzina. Agiswa.” Khavbovbo, mwama yoyo nya mudwali a di hawuluga! (Marko 1:40-42) U ngu kodza gu dundrugeya edzi mwama yoyo a dzi pwidego khidzo?

20, 21. Jesu giyeyedzo nya tshukwana nyo engise Nungungulu khu ndziya muni?

²⁰ Jesu khuye giyeyedzo nya tshukwana ga satshavbo avba nya gu engise Jehovha. Ambari olu a nga ba a  dugeledwa khu sigaradzo mwendro gu garadzwa khu valala, uye tumbegide ga Babe waye. Khu giyeyedzo, Jesu kha ghoha tepo Sathane a nga mu linga. (Matewu 4:1-11) Vambe valongo va Jesu kha va nga ba va khodwa gu khavo uye a diri Mesiya nigu va di gu khavo uye “a di handruga,” ganiolu Jesu simamide gu gira thumo wa Nungungulu. (Marko 3:21) Tepo valala vaye va nga ba va mu tshanisa, uye simamide gu tumbega ga Nungungulu nigu gima kha zama gu va gireya guvivba. — 1 Pedro 2:21-23.

²¹ Ambari tepo Jesu a nga songwa khu ndziya nyo vbise ni xapi, simamide gu tumbega ga Jehovha. (Leri Vafilipi 2:8.) Nga dundrugeya edzi gu vbwetegidego khidzo gutimiseya tshigu a fudego. A di modwa, a singedzwa gu ba a vade Nungungulu khu dzifakazi nya malipha, a konwa khu valamuli nya vakanganyisi, a hegwa khu vathu nya vangi, a tshaniswa khu masotshwa ma nga bwe ma mu  khokhotheya vbasimbotunu. Tepo a nga ba afa, kwangulugide khuye: “Satshavbo si tadzisegide”! (Johane 19:30) Matshigu mararu hwane nya gufe ga Jesu, Jehovha mu wuside khu ga vafudego a mu ninga givili nya liphuvbo. (1 Pedro 3:18) Dzisemana dzidugwana hwane nya isoso, Jesu bwelede ndzadzini, “aya khala nyamudye ga Nungungulu,” a vireya gu Nungungulu a mu gira Pfhumu. — Vahebheru 10:12, 13.

22. Lithomo muni hi gu nalo ethu muhuno kholu Jesu a tumbegidego ga Babe waye?

²² Olu Jesu a simamidego gu tumbega ga Babe waye, ethu hi na ni lithomo muhuno nyo vbanye mafuni nya paradhesi, kha nga edzi Jehovha a nga ba a si vbwetide khidzo. Omu nya gipimo gi landreyago, hi na ganeya khedzi gufa ga Jesu gu girago khidzo gu si kodzega gu ethu hi vbanya kala gupindruga.