1, 2. (a) Sapos yu save long nem tasol bilong wanpela man i gat biknem, yu ting yu save tru long em? Stori long dispela. (b) Ol man i gat wanem kain tingting long Jisas?

LONG dispela graun i gat planti man i gat nem. Ating yu save long nem bilong wanpela man i gat biknem. Tasol sapos yu save long nem tasol bilong wanpela man i gat biknem, dispela i no makim olsem yu save tru long em. Em i no makim olsem yu save long olgeta samting bilong i stap bilong em na long pasin tru bilong em.

² Ating yu harim stori bilong Jisas Krais, maski em i stap long graun inap 2,000 yia i go pinis. Tasol planti manmeri i no kliagut long Jisas em i wanem kain man tru. Sampela i tok em i wanpela gutpela man, sampela narapela i tok em i wanpela profet, na sampela i bilip olsem em i God. Yu gat wanem tingting?—Lukim Futnot long pes 211.

3. Bilong wanem em i bikpela samting long yu kisim save long Jehova God na Jisas Krais?

³ Em i bikpela samting long yu mas kisim stretpela save long Jisas. Wai? Baibel i tokim yumi olsem: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.” (Jon 17:3) Yes, sapos yu kisim save long Jehova na Jisas tupela i wanem kain man tru, yu inap i stap oltaim long Paradais long graun. (Jon 14:6) Na tu, taim yu kisim save long Jisas, dispela bai helpim yu bikos em i stap nambawan gutpela piksa long pasin  bilong wokabaut stret na long pasin i gutpela long mekim long ol arapela. (Jon 13:34, 35) Long Sapta  1, yumi bin kisim save long God em i wanem kain man tru. Orait nau yumi bai skelim Baibel i tok wanem long Jisas.

4. Wanem mining bilong dispela tupela tok “Mesaia” na “Krais”?

⁴ Planti yia paslain long Jisas i bon, Jehova i mekim tok promis long Baibel olsem em bai salim Mesaia, o Krais i kam. Dispela tok “Mesaia” i kam long wanpela tok Hibru na tok “Krais” i kam long wanpela tok Grik. Dispela tupela biknem i kamapim klia olsem God bai makim Mesaia em i tok promis long en na givim em bikpela namba. Long rot bilong Mesaia olgeta tok promis bilong God bai kamap tru. Yu bai kisim save tu long hau yu inap kisim helpim long nau long ol samting Jisas i mekim taim em i stap long graun. Tasol paslain long Jisas i bon, planti manmeri i laik save, ‘Husat bai kamap Mesaia?’

5. Olsem wanem? Ol disaipel bilong Jisas i bilip tru olsem em i dispela Mesaia?

⁵ Ol disaipel bilong Jisas i no gat tupela tingting olsem em i dispela Mesaia Baibel i tok promis long en. (Jon 1:41) Olsem, Saimon Pita i tokim Jisas: “Yu dispela Krais.” (Matyu 16:16) Tasol olsem wanem yumi inap save tru olsem Jisas em i Mesaia?

6. Olsem wanem Jehova i helpim ol manmeri i gat gutpela bel long luksave long Mesaia?

⁶ Ol profet bilong God husat i bin stap paslain long Jisas i bon, ol i bin raitim planti stori bilong helpim ol manmeri long luksave long Mesaia. Hau dispela inap helpim ol manmeri long luksave long Mesaia? Tingim sapos wanpela man i tokim yu long go long ples balus bilong kisim wanpela man yu no bin lukim em bipo. Em bai gutpela sapos wanpela i stori long yu long sampela  samting bilong dispela man na bai yu inap luksave long em. Na olsem tasol, Jehova i mekim wok long ol profet bilong em long tokim yumi long ol samting Mesaia bai mekim na wanem ol samting bai painim em. Truim bilong ol dispela tok profet bai helpim ol manmeri i gat gutpela bel long save Jisas em i dispela Mesaia.

7. Wanem tupela tok profet i kamapim klia olsem Jisas em i dispela Mesaia?

⁷ Em hia tupela bilong ol dispela tok profet. Namba wan, winim 700 yia paslain long Jisas i bon, Maika i tok profet olsem Mesaia bai bon long liklik taun long Betlehem. (Maika 5:2) Na mama i karim Jisas long dispela taun tasol! (Matyu 2:1, 3-9) Namba tu, Daniel i tok profet olsem Mesaia bai kamap long yia 29 C.E. (Daniel 9:25) Dispela em tupela bilong planti tok profet i kamapim klia olsem Jisas em i dispela Mesaia God i tok promis long en.—Lukim Futnot long pes 211-212.

8, 9. Long taim Jisas i kisim baptais, wanem samting i kamapim klia em i dispela Mesaia?

⁸ Jehova i kamapim klia olsem Jisas em i Mesaia. God i bin tok promis long kamapim wanpela mak na bai Jon Bilong Baptais inap luksave long Mesaia. Taim Jisas i go long Jon bai em i ken kisim baptais long Wara Jordan long yia 29 C.E., Jon i lukim dispela mak. Baibel i tokim yumi long wanem samting i bin kamap: “Jisas i baptais pinis na kwiktaim em i lusim wara na i kam antap, na heven i op na em i lukim spirit bilong God i kam daun long em olsem wanpela pisin balus. Na tu, wanpela nek long  heven i tok: ‘Dispela em i Pikinini bilong mi, mi laikim em tumas na mi amamas long em.’” (Matyu 3:16, 17) Dispela mak Jon i lukim na samting em i harim i helpim em long luksave olsem Jisas em i dispela Mesaia. (Jon 1:32-34) Long dispela de, taim Jehova i kapsaitim spirit bilong em long Jisas, em i kamap Mesaia. Em man God i makim bilong stap Lida na King.—Aisaia 55:4.

 ⁹ Ol tok profet bilong Baibel, tok bilong Jehova yet, na mak Em i kamapim long taim Jisas i kisim baptais, dispela i kamapim klia olsem Jisas em i dispela Mesaia. Tasol Jisas i kam long wanem hap, na em i wanem kain man? Orait nau yumi skelim Baibel i tok wanem long dispela.

10. Baibel i tok wanem long i stap bilong Jisas paslain long em i kam long graun?

¹⁰ Baibel i tok Jisas i bin stap longpela taim long heven paslain long em i kam long graun. Maika i tok profet olsem Mesaia em i bilong “bipo tru.” (Maika 5:2) Planti taim Jisas yet i tok em i bin stap long heven paslain long em i kamap wanpela man long graun. (Ritim Jon 3:13; 6:38, 62; 17:4, 5.) Paslain long Jisas i kam daun long graun, em i pas gut tru wantaim Jehova.

11. Bilong wanem Jisas i dia tumas long Jehova?

¹¹ Jisas i dia tumas long Jehova. Bilong wanem? Long wanem, God i bin wokim em paslain long olgeta samting na ol man. Olsem na Jisas em i “fesbon bilong olgeta samting God i bin wokim.” * (Kolosi 1:15) Jisas em i dia tumas long Jehova, long wanem, Jisas wanpela tasol em samting Jehova yet i bin wokim. Olsem na Baibel i tok em i “dispela Pikinini tru bilong em.” (Jon 3:16) Na tu, Jehova i mekim wok long Jisas tasol taim Em i wokim olgeta arapela samting. (Kolosi 1:16) Na Baibel i kolim Jisas olsem “Tok,” long wanem, Jehova i mekim wok long Jisas bilong givim tok bilong em long ol ensel na ol man.—Jon 1:14.

12. Olsem wanem yumi save Jisas na God i no wanpela tasol?

¹² Sampela i ting Jisas na God i wanpela tasol. Tasol  Baibel i no tok olsem. Baibel i tok olsem God i bin wokim Jisas, olsem na laip bilong Jisas i gat kirap bilong en. Tasol Jehova i bin wokim olgeta samting, na i no gat kirap bilong em. (Song 90:2) Jisas, dispela Pikinini bilong God, i no tingting liklik long i stap olsem God. Baibel i kamapim klia olsem Papa i winim Pikinini. (Ritim Jon 14:28; 1 Korin 11:3.) Jehova wanpela tasol em i “God i Gat Olgeta Strong.” (Stat 17:1) Em wanpela tasol i bikpela na em i gat olgeta strong long heven na graun.—Lukim Futnot long pes 213.

13. Bilong wanem Baibel i tok Jisas “em i piksa tru bilong dispela God ol man i no inap lukim”?

¹³ Jehova na Pikinini bilong em, Jisas, i wok gut wantaim inap planti bilion yia paslain tru long God i wokim heven na graun. Tupela i laikim tru narapela narapela! (Jon 3:35; 14:31) Jisas i bihainim gut ol pasin bilong Papa bilong em, olsem na Baibel i tok “em i piksa tru bilong dispela God ol man i no inap lukim.”—Kolosi 1:15.

14. Olsem wanem gutpela Pikinini bilong Jehova i kamap olsem man long graun?

¹⁴ Gutpela Pikinini bilong Jehova i orait long lusim heven na kam daun long graun bilong stap olsem wanpela man. Olsem wanem dispela samting inap kamap? Jehova i wokim mirakel na em i kisim laip bilong Pikinini bilong em long heven na putim long bel bilong wanpela meri i no bin slip wantaim man, nem bilong em Maria. Long dispela rot, Jisas i no gat papa bilong graun. Olsem na Maria i karim pikinini man i gutpela olgeta na i givim nem Jisas long em.—Luk 1:30-35.

15. Olsem wanem yu inap save gut moa long Jehova?

¹⁵ Yu inap kisim save gut moa long Jisas, laip bilong em, na ol pasin bilong em long rot bilong ritim ol buk  bilong Baibel em Matyu, Mak, Luk, na Jon. Ol i kolim ol dispela buk olsem ol Gutnius. Pasin bilong Jisas i wankain olsem bilong Papa bilong em, olsem na ol tok yu ritim bai helpim yu long save gut moa long Jehova. Long dispela as Jisas inap tok olsem: “Man i lukim mi, em i lukim Papa tu.”—Jon 14:9.

16. Jisas i autim wanem tok? Ol tok em i lainim ol man long en i bilong husat?

¹⁶ Planti man i kolim Jisas olsem “Tisa.” (Jon 1:38; 13:13) Wanpela bikpela samting em i lainim ol man long en em “gutnius bilong Kingdom.” Kingdom em i wanem samting? Em i gavman bilong God i stap long heven na em bai bosim graun olgeta na kamapim planti blesing long ol man i harim tok. (Matyu 4:23) Olgeta samting Jisas i skulim ol man long en i kam long Jehova. Jisas yet i tok: “Tok mi skulim ol man long en i no bilong mi, em bilong man i salim mi i kam.” (Jon 7:16) Jisas i save Jehova i laik bai ol manmeri i harim gutnius olsem Kingdom Bilong God bai bosim dispela graun.

17. Jisas i lainim ol manmeri we? Bilong wanem em i wok hat long lainim ol narapela?

¹⁷ Jisas i lainim ol manmeri we? Long olgeta hap em i painim ol long en. Em i skulim ol man long ol ples na ol taun, long maket, na long haus bilong ol man. Em i no ting ol man i mas kam long em. Planti taim em i go long ol. (Mak 6:56; Luk 19:5, 6) Jisas i wok hat na lusim bikpela haptaim long skulim ol man. Bilong wanem em i mekim olsem? Long wanem, em i save God i laik bai em i mekim olsem na oltaim em i save bihainim tok bilong Papa bilong em. (Jon 8:28, 29) Jisas i autim tok, long wanem, em i sori long ol manmeri. (Ritim Matyu 9:35, 36.) Em i lukim olsem ol bikman bilong lotu i no skulim ol manmeri long tok i tru bilong God na Kingdom  bilong em. Olsem na em i laik helpim planti manmeri long harim gutnius.

18. Yu laikim tru wanem ol pasin bilong Jisas?

¹⁸ Jisas em i man bilong laikim ol manmeri na tingim ol. Em i gat gutpela pasin na ol i no pret long toktok wantaim em. Ol pikinini tu i amamas long stap wantaim em. (Mak 10:13-16) Jisas i mekim wankain pasin long olgeta. Em i nolaik tru long pasin korapsen na pasin i no stret. (Matyu 21:12, 13) Long dispela taim planti man i no rispek long ol meri na ol meri i no gat planti rait long mekim ol samting. Tasol Jisas i soim pasin rispek long ol na mekim gutpela pasin long ol olsem ol i gat nem. (Jon 4:9, 27) Jisas i gat pasin daun tru. Wanpela taim em i wasim lek bilong ol aposel bilong em, em wanpela wok ol wokboi nating i save mekim.—Jon 13:2-5, 12-17.

19. Wanem samting i soim olsem Jisas i save long ol samting ol manmeri i nidim na em i laik helpim ol?

¹⁹ Jisas i save long ol samting ol manmeri i mas i gat, na em i laik helpim ol. Dispela i kamap ples klia taim em i mekim wok long strong bilong God long wokim ol mirakel bilong oraitim ol sikman. (Matyu 14:14) Olsem, wanpela man i gat sik lepra i kam long Jisas na i tok: “Sapos yu laik, yu inap mekim mi kamap klin.” Jisas i pilim tru pen na hevi bilong dispela man. Em i sori tru long em na i laik helpim em. Olsem na Jisas i putim han long dispela man na i tokim em: “Mi laik! Yu ken kamap klin.” Na sik bilong man i pinis! (Mak 1:40-42) Yu inap tingim dispela man i pilim olsem wanem?

20, 21. Olsem wanem Jisas i stap gutpela piksa long pasin bilong bihainim tok bilong God?

²⁰ Jisas i stap nambawan gutpela piksa long pasin  bilong bihainim tok bilong God. Oltaim em i mekim ol samting Papa bilong em i laik em i mas mekim maski wanem samting i painim em na maski ol birua i putim hevi long em. Olsem, Jisas i no mekim sin taim Satan i traim em. (Matyu 4:1-11) Sampela wanblut bilong Jisas i no bin bilip long em, ol i tok “tingting bilong em i paul pinis,” tasol Jisas i mekim yet wok bilong God. (Mak 3:21) Taim ol birua bilong em i mekim nogut long em, em i no traim long bagarapim ol.—1 Pita 2:21-23.

²¹ Oltaim Jisas i save mekim ol samting Papa bilong em i laik em i mas mekim i go inap long em i dai. (Ritim Filipai 2:8.) Tingim ol hevi em i karim long de em i dai. Ol i arestim em, ol witnes giaman i sutim tok long em, ol jas nogut i tok em i gat asua, ol manmeri i tok bilas long em, na ol soldia i givim bikpela pen long em na ol i nilim  em long pos. Taim em i laik i dai, em i singaut olsem: “Em pinis nau!” (Jon 19:30) Tripela de bihain long Jisas i dai, Jehova i kirapim em bek na givim em bodi spirit. (1 Pita 3:18) Sampela wik bihain, Jisas i go bek long heven na “sindaun long rait han bilong God,” na wet long God i mekim em i kamap King.—Hibru 10:12, 13.

22. Jisas i bihainim tok bilong Papa bilong em i go inap long em i dai, na dispela i opim rot yumi kisim wanem samting?

²² Jisas i bihainim tok bilong Papa bilong em i go inap long em i dai, olsem na nau rot i op long yumi ken kisim laip oltaim long Paradais long graun, olsem Jehova i tingting pinis long en long pastaim. Long sapta i kamap bihain, bai yumi skelim olsem wanem dai bilong Jisas i opim rot long yumi inap i stap oltaim.