1, 2. а) Луоз-а вераны, кинлэсь ке нимзэ тодӥськоды ке, тӥ соин матысь тодмо шуыса? Валэктэ. б) Мар малпало адямиос со сярысь, кин со Иисус Христос?

ДУННЕ вылын трос нимо-дано адямиос. Куд-огъёссэ тӥ нимзыя тодӥськоды, луоз. Но тӥ туж ӧжыт тодӥськоды ке соослэн улонзы сярысь но со сярысь, кыӵе со адямиос, луоз-а вераны, тӥ соосын матысь тодмо шуыса?

² Тӥляд Иисус Христос сярысь но кылэмды вань, дыр, со ог 2 000 аръёс талэсь азьло улӥз ке но. Тросэз адямиос уг тодо, кин вал со зэмзэ ик. Куд-огъёсыз верало, со умой адями вал шуыса, мукетъёсыз сое пророкен лыдъяло, нош куинетӥосыз сое Инмар шуо. Нош тӥ мар верасалды? (Учке 12-тӥ ватсам валэктонэз.)

3. Малы Инмар но Иисус Христос сярысь тодон-валан басьтыны кулэ?

³ Малы кулэ тодыны, кин со Иисус Христос? Библиын верамын: «Та быронтэм улон луэ: соос мед тодозы Тонэ, одӥг гинэ зэм Инмарез, но Тонэн ыстэм Иисус Христосэз» (Иоанн 17:3). Иегова но Иисус сярысь тодон-валан басьтӥды ке, тӥледлы луонлык усьтӥськоз рай музъем вылын пумтэм вапумъёс ӵоже улыны (Иоанн 14:6). Эшшо одӥгез муг, малы Иисус сярысь  тодыны кулэ — Иисус туж умой пример возьматӥз, кызьы улоно но кызьы астэ адямиосын возёно (Иоанн 13:34, 35). Нырысетӥ люкетысь ми тодӥмы, кин со Инмар. Табере ойдолэ тодомы, мар вера Библия Иисус Христос сярысь.

4. Мае возьмато «Мессия» но «Христос» кылъёс?

⁴ Библия пыр Иегова кылзэ сётӥз, музъем вылэ Мессия, яке Христос, лыктоз шуыса. «Мессия» еврей кылысь пыремын, нош «Христос» — грек кылысь. Кыкез ик та кылъёс возьмато сое, кинэ Инмар бырйиз нимысьтыз ужез быдэстон понна. Мессия Инмарлэсь вань кыл сётонъёссэ быдэстоз. Со сяна, со, мае Мессия лэсьтӥз ини, тӥлесьтыд улондэс туннэ ик ини воштыны быгатэ. Иисус вордӥськемлэсь азьло тросэзлэн юанзы кылдылӥз: кин меда Мессия луоз?

5. Оско вал-а Иисуслэн дышетскисьёсыз, Иисус — со Мессия шуыса?

⁵ Иисуслэн дышетскисьёсыз оско вал, Иисус — со Мессия шуыса (Иоанн 1:41). Кылсярысь, Симон Пётр шонерак вераз Иисуслы: «Тон — Христос» (Матфей 16:16). Нош малы ми оскыны быгатӥськомы, Иисус — со Мессия шуыса?

6. Кызьы Иегова Мессияез тодманы юрттӥз адямиослы, кудъёсызлэн сое зэмзэ ик тодэмзы потӥз?

⁶ Иисуслэн вордӥськемезлэсь трослы азьлогес  Инмарлэн пророкъёсыз Мессия сярысь трос азьпалзэ ивортонъёс гожтӥзы. Со азьпалзэ ивортонъёс валаны юрттысалзы, кин Мессия луоз. Эскеромы одӥг примерез. Тӥледыз вокзалын одӥг адямиез пумитаны куризы, кудзэ тӥляд ноку но адӟылэмды ӧй вал. Мар юрттоз тӥледлы сое тодманы? Тӥледлы пыр-поч веразы ке, кыӵе со. Со выллем ик, Иегова пыр-поч вераз милемлы Мессия сярысь аслаз пророкъёсыз пыр. Со вераз, мар кароз Мессия но мар соин луоз. Вань со азьпалзэ ивортонъёс Иисус вылын быдэсмизы. Табере котькуд адями, кудӥзлэн зэмзэ ик тодэмез потӥз, быгатоз тодыны, сӥзем Мессия со Иисус вал шуыса.

7. Кыӵе кык азьпалзэ ивортонъёс возьмато, Иисус — со Мессия шуыса?

⁷ Эскеромы кык азьпалзэ ивортонъёсты. Нырысетӥез: Иисус вордӥськемлэсь 700 арлы азьлогес Михей пророк вераз, Мессия пичи гинэ Вифлеем карын вордӥськоз шуыса (Михей 5:2). Нош кытын Иисус вордӥськиз? Вифлеемын! (Матфей 2:1, 3—9). Кыкетӥез: Даниил пророк азьло ик вераз, Мессия асьме вакытысь 29-тӥ арын лыктоз шуыса (Даниил 9:25). Туж трос азьпалзэ ивортонъёс пӧлысь, кудъёсыз возьмато, Иисус — со сӥзем Мессия шуыса, та кыкез гинэ. (Учке 13-тӥ ватсам валэктонэз.)

8, 9. Кызьы со, мар луиз Иисус пылатӥськыку, возьматэ, Иисус Мессия вал шуыса?

 ⁸ Со сяна, ачиз Иегова вераз, Иисус — со Мессия шуыса. Инмар вераз Иоанн Пылатӥсьлы, со солы Мессияез возьматӥсь тодмет сётоз шуыса. Асьме вакытысь 29-тӥ арын, Иисус Иорданын пылатӥськыны лыктэм бере, Иоанн со тодметэз адӟиз. Тани мар верамын со сярысь Библиын: «Пылатӥськем бераз соку ик Иисус вуысь потӥз — соку Со азьын инбам усьтӥськиз. Иоанн дыдык выллем васькись Инмарлэсь Духсэ адӟиз, Со Иисус вылэ лэзиськиз. Соку инмысен куара кылӥськиз: „Та Мынам Яратоно Пие, Со бордын Мынам ӟеч эрике“» (Матфей 3:16, 17). Озьы Иоанн валаз, Иисус со Мессия ик вань шуыса (Иоанн 1:32—34). Ӵапак со нуналэ, куке Иисус вылэ Иеговалэн духез лэзиськиз, со Мессия луиз. Иисус луиз со, кинэ Инмар Азьветлӥсе но Эксэе бырйиз (Исаия 55:4).

⁹ Озьыен, Библиысь азьпалзэ ивортонъёс, аслаз Иеговалэн кылъёсыз но Иисус пылатӥськыку сётэм инмысь тодмет возьмато, Иисус сӥзем Мессия вал шуыса. Нош табере ойдолэ тодомы, кытысь Иисус лыктӥз но кыӵе со адями вал.

10. Мар верамын Библиын Иисус Христослэн музъем вылэ лыктэмезлэсь азьло улонэз сярысь?

¹⁰ Библиын верамын, музъем вылэ лыктэмезлэсь азьло Иисус Христос кема дыр ӵоже инмын улӥз шуыса. Михей Мессия сярысь вераз: «Со пумтэм вапумъёслэн кутсконазы ик  вал» (Михей 5:2). Иисус ачиз но трос пол вералляз, музъем вылын вордӥськемезлэсь азьло инмын улӥз шуыса. (Лыдӟе Иоаннлэсь 3:13; 6:38, 62; 17:4, 5.) Музъем вылэ лыктэмезлэсь азьло ик ини Иисуслэн Иеговаен матысь кусыпъёсыз вал.

11. Малы Иегова Иисусэз туж дунъя?

¹¹ Иегова туж дунъя Иисусэз. Малы? Малы ке шуоно Иегова сое нырысь ик кылдытӥз, куке нокин но, номыр но кылдытэмын ӧй вал на. Тӥни малы со сярысь «вань кылдытэм макеослэсь азьвыл вордскемын» шуыса верамын (Колоссыослы 1:15) *. Иегова Иисусэз яратэ на, малы ке шуоно со одӥгез гинэ, кинэ Иегова ачиз кылдытӥз. Библиын Иисус «одӥг вордӥськем Пи» шуыса нимамын (Иоанн 3:16). Иисусэз гинэ Иегова аслыз юрттӥськись кариз, куке ваньзэ мукетсэ кылдытӥз (Колоссыослы 1:16). Озьы ик, Иисусэз гинэ Библия «Кыл» шуыса нима. Со возьматэ, Иегова кылчинъёслы но адямиослы Иисус пыр ивор вералляз шуыса (Иоанн 1:14).

12. Кытысь ми тодӥськомы, Иисус Христос но Инмар одӥг ӧвӧл шуыса?

¹² Куд-ог адямиос малпало, Иисус Христос но Инмар — со одӥг шуыса. Нош мар вера со сярысь  Библия? Иисус кылдытэмын вал, озьыен, солэн кутсконэз вал. Нош Иеговалэн кутсконэз ӧй вал, со ачиз ваньзэ кылдытӥз (Псалтирь 89:3). Иисус ноку но Инмарлэсь интызэ басьтыны ӧз тыршы. Со вала вал, со Инмарлэн Пиез гинэ шуыса. Библия шонерак вера, Атай Пилэсь бадӟымгес шуыса. (Лыдӟе Иоаннлэсь 14:28; 1 Коринфъёслы 11:3.) Иегова — одӥгез гинэ, кинэ Библия «Ваньмызлэсь Кужмо Инмар» шуэ (Улон-вылон 17:1). Быдэс Дуннеын Иегова кадь быдӟым но кужмо нокин ӧвӧл ни. (Учке 14-тӥ ватсам валэктонэз.)

13. Малы Библиын верамын, Иисус «адскисьтэм Инмарлэн тусбуез луэ» шуыса?

¹³ Инэз но музъемез кылдытэмзылэсь азьло Иегова но солэн Пиез трос миллиард аръёс ӵоже валче ужазы. Веранэз ӧвӧл, со дыр куспын соос ог-огзэс туж яратӥзы! (Иоанн 3:35; 14:31). Иисус быдэсак Атаез кадь. Соин ик Библиын верамын: «Со адскисьтэм Инмарлэн тусбуез луэ» (Колоссыослы 1:15).

14. Кызьы Инмарлэн Пиез адями луыса вордӥськыны быгатӥз?

¹⁴ Иеговалэн яратоно Пиез дась луиз инмысь васькыны но музъем вылэ лыктыны. Со понна солы адями луыса вордӥськоно вал. Кызьы со луиз? Иегова паймымон уж лэсьтӥз: Мария нимо нылмурт секытэн луиз, со пиосмуртэн кӧламын ӧй вал на ке но. Озьы Мария тырбыдэс пинал вайиз но солы Иисус ним понӥз (Лука 1:30—35).

15. Кызьы тӥ Иегова сярысь тросгес тодыны быгатоды?

¹⁵ Библиысь Матфейлэсь, Марклэсь, Лукалэсь но Иоаннлэсь Ӟеч Иворез, яке Евангелиосты, лыдӟыса, тӥ быгатоды тросгес тодыны Иисус сярысь, солэн улонэз но сямъёсыз сярысь. Со сяна, тӥ тросгес тододы Иегова сярысь, малы ке шуоно Иисус туж кельше Атаезлы. Одӥг пол Иисус вераз: «Монэ адӟись мурт Атаез адӟиз» (Иоанн 14:9).

16. Малы дышетӥз Иисус? Кинлэсь вал солэн дышетонъёсыз?

¹⁶ Тросэз адямиос Иисус Христосэз «Дышетӥсь» шуылӥзы (Иоанн 1:38; 13:13). Малы дышетӥз Иисус? Нырысь ик со «Эксэйлыклэсь Евангелизэ» тодытӥз. Мар со Эксэйлык? Со Инмарлэн кивалтэтэз, кудӥз инмысен музъемен кивалтоз но ваньзэс, кинъёс Инмарлэсь кылзӥсько, бакель кароз (Матфей 4:23). Ваньмыз, малы дышетӥз Иисус, Иеговалэсь вал. Иисус ачиз вералляз: «Мынам дышетонэ — Мынам ӧвӧл, Монэ Ыстӥсьлэн со» (Иоанн 7:16). Иисус вала вал, адямиос Эксэйлык сярысь ӟеч иворез кылыны кулэ шуыса, малы ке шуоно со Иеговалэн эрикез.

17. Кытын дышетӥз Иисус? Малы со дырзэ но, кужымзэ но ӧз жаля адямиосты дышетон понна?

¹⁷ Кытын дышетӥз Иисус? Котькытын, кытын адямиос вал: каръёсын но гуртъёсын, сӥнагогаосын но храмын, калык люкаськон интыосын но улон коркаосын. Со уг возьма вал,  адямиос со доры лыктозы шуыса, со ачиз соос доры мынэ вал (Марк 6:56; Лука 19:5, 6). Адямиосты дышетон понна Иисус дырзэ но, кужымзэ но ӧз жаля. Малы? Малы ке шуоно со тодэ вал, со Инмарлэн эрикез шуыса. Нош Иисус котьку Инмарлэсь кылзӥськиз (Иоанн 8:28, 29). Со сяна, Иисус ӟеч иворез вераса ветлӥз на, малы ке шуоно со адямиосты жаляз. (Лыдӟе Матфейлэсь 9:35, 36.) Со адӟиз, религиозной кивалтӥсьёс адямиослы Инмар сярысь но Эксэйлык сярысь ӟеч иворез уг верало шуыса. Соин ик, ӟеч иворез вераса, Иисуслэн адямиослы юрттэмез потэ вал.

18. Иисус Христослэн кыӵе сямъёсыз тӥледлы тужгес но кельшо?

¹⁸ Иисус адямиосты яратэ но соос сярысь сюлмаське вал. Со вал лякыт, но соин вераськыны капчи вал. Нылпиос гинэ но со доры кыстӥськизы (Марк 10:13—16). Со котькин шоры одӥг кадь учкиз, нокинэ но улӥё-вылӥё ӧз кары. Со адӟемпотостэм кариз асьсэлы пайда утчасьёслэсь кузьым октэмзэс но котькуд шонерлыктэм ужез (Матфей 21:12, 13). Иисус улон нуналъёсы кышномуртъёсты ӧз гажалэ, но соослэн правооссы ӧжыт вал. Нош Иисус дунъяз но гажаз соосты (Иоанн 4:9, 27). Озьы ик, Иисус туж зӥбыт-востэм вал. Одӥг пол со апостолъёсызлэсь пыдъёссэс миськиз — кариз сое, мае ляльчиос каро вал (Иоанн 13:2—5, 12—17).

19. Кыӵе учыр возьматэ, Иисус вала вал шуыса, мар кулэ адямиослы, но солэн соослы юрттэмез потэ вал шуыса?

 ¹⁹ Иисус тодэ вал, мар адямиослы кулэ, но солэн соослы юрттэмез потэ вал. Со сярысь верало солэн паймымон ужъёсыз, кудъёссэ со Инмарлэн кужымезлы луыса лэсьтэ вал (Матфей 14:14). Тани одӥг учыр. Одӥг пол Иисус доры гижлочерен висись мурт лыктӥз но шуиз: «Чылкытатэмед потӥз ке, Тынад монэ чылкытатэмед луоз». Иисуслы туж вӧсь вал адӟыны, макем курадӟе со адями. Со жаляз сое но солы юрттэмез потӥз. Иисус со борды йӧтӥськиз но шуиз: «Мынам чылкытатэме потэ, чылкыта».  Со вакытэ ик гижлочерен висись мурт йӧназ! (Марк 1:40—42). Малпалэ ай, макем со шумпотӥз!

20, 21. Малы вераны луоз, Иисус самой умой пример возьматӥз шуыса, кызьы Инмарлэсь кылзӥськоно?

²⁰ Иисус самой умой пример возьматӥз, кызьы Инмарлэсь кылзӥськоно. Кыӵе гинэ югдуре медаз сюры, мар гинэ солэн тушмонъёсыз солы медаз каре, со котьку Атаезлэсь кылзӥськиз. Иисус ӧз сьӧлыка, куке Шайтан солэсь визьзэ сыназ (Матфей 4:1—11). Со Инмарлэсь  ужзэ быдэстэмысь ӧз дугды соку но, куке солэн матысь адямиосыз, солэн ӵыжы-выжыосыз, ӧз оске, со Мессия шуыса (Иоанн 7:5). Тушмонъёсыз сое курадӟытӥзы ке но, Иисус Инмарлы оскымон кылиз — со соослы пунэмзэ ӧз берыкты (1 Пётр 2:21—23).

²¹ Туж курадӟыса кулыкуз но, Иисус оскымон кылиз (Филиппыослы 2:8). Малпалэ ай, мае чидано луиз Иисуслы музъем вылын улонэзлэн берпуметӥ нуналаз: сое кырмизы, янгыше уськытӥзы, пӧяськись судьяос кулыны судъязы, калык сое серекъяз, рим ожгарчиос туж курадӟытӥзы но юбое кортӵогазы. Кулыкуз Христос шуиз: «Быдэсмиз!» (Иоанн 19:30). Кулэмез бере куинетӥ нуналаз Иегова сое улӟытӥз. Со солы духовной мугор сётӥз (1 Пётр 3:18). Кӧня ке арня ортчыса, Иисус инме тубиз но «Инмарлэн бурпалаз пуксиз». Со возьмаз, ку Инмар сое Эксэй кароз (Еврейёслы 10:12, 13).

22. Кыӵе луонлык сётӥз милемлы Иисуслэн Атаезлы оскымон кылемез?

²² Иисус Атаезлы оскымон кылемен, милям музъем вылын пумтэм вапумъёс ӵоже улыны луонлыкмы вань. Ӵапак сыӵе улон сётэмез потэ вал Инмарлэн адямиослы. Мукет люкетысь ми тодомы, кызьы пумтэм вапумъёсы улыны осконмы Христослэн кулонэныз герӟаськемын.