1, 2. (a) Neereke nyuwo moomusuwela nnene mutthu oovuwa, mwaha woosuwela nsina nawe? Muthalihe. (b) Atthu antxipale arino moonelo heeni voohima sa Yesu?

AAKHALA atthu antxipale oovuwa mulaponi. Ookhala munamuupuwela anyu ori oovuwa. Neereke nyuwo moomusuwela nnene, mwaha wooweera moosuwela nsina nawe? Nyuwo khammusuwenle. Mwaha wooweera nyuwo musuwenle nsinaru, nto weera mmusuwele nnene, ontthuneya osuwela itthu sintxipale s’amutthu owo. Nave osuwela itthu sintxipale sa ekumi awe.

² Yesu Kristu ookhala elapo yela ya vathi ottuli wa iyaaka 2.000. Pooti weera nyuwo mwananto wiiwa suulummwaka sa Yesu. Nto atthu aakhalano moonelo woovirikana voohima sa Yesu. Akina aneera weera owo aari mulopwana ooreera murima, nave akina aneera weera owo aari mProfeti, nto akina aneera owo aari Muluku. Vano nyuwo munuupuwela weera aari taani? — Nwehe Enoota 12.

3. Mwaha wa heeni oraaya wootepa otthuneya omusuwela Yehova ni Yesu Kristu?

³ Omusuwela Yesu etthu yootepa otthuneya vantxipale. Mwaha wa heeni? Mwaha wooweera ontthuneya omusuwela Yehova ni Yesu weera nikhaleno ekumi yoohimala. Biblya onahima weera: “Ela ti ekumi yohimala wi yaale yòsuwenle weyo Muluku mmosá a ekhaikhai ni ole omurummawe, Yesu Kristu.” (Yohani 17:3) Muru 1 nooxuttera ekhaikhai sa Yehova Muluku. Nave onnatthuneya oxuttera tho ekhaikhai voohima sa Yesu, weera niwere okhalano eparakha yookhala mparadiso mahiku oohimala. (Yohani 14:6) Ti vooreera oxuttera sa Yesu, mwaha wooweera owo oovaha ethoonyero yooreera.  Moota woowathokorora atthu ni moota woothokorera ekumi ahu. (Yohani 13:34, 35) Ahéé, vano ninrowa othokorera ele Biblya onthaliha awe voohima sa Yesu.

4. Masu oowera “Mesiya” ni “Kristu” entaphulela heeni?

⁴ Yesu onneriwa Kristu. Masu oweera Kristu ni Mesiya mamoha-moharu. Masu oweera Kristu enkhumelela vaGreguni ni Mesiya, enkhumelela veHeeberini. Masu ala oomeeli entaphulela Ottelihiwa, kapena othanliwa ni Muluku weera avare muteko wootepa otthuneya. Vano, Yesu aathanleliwe opaka eheeni? Weera akwanelihe itthu sootheene Muluku alaaihenraawe. Mene olelova onnanikhavihera. Biblya onoonihera weera Yehova aammana natiri weera ammurumiha Mesiya. Mwa yeeyo, ahinaakuveene oyariwa Yesu, atthu antxipale yaannakoha, taani aneera akhale Mesiya?

5. Neereke oohusera a Yesu yanniroromela weera owo aari Mesiya?

⁵ Oohusera a Yesu yanniroromela weera Yesu aari Mesiya naari Kristu, oothanliwa ni Muluku. (Yohani 1:41) Mwa ntakihero, Simoni Pedru amwerela Yesu: “Weyo wà Kristu.” (Matheyo 16:16) Ankha hiyo nneera hayi? Neereke ninnaroromela weera Yesu “Mesiya” othanliwe ni Muluku?

6. Yehova akhavihenre hayi atthu omusuwela Mesiya?

⁶ Ehuhu ya khalai, Muluku ahaaruma maprofeti olepa itthu saamuthonya Mesiya. Yesu ahinaakuve oyariwa. Nto itthu iyo samwaakhavihera atthu omusuwela Mesiya. Moota heeni? Nkupuwelani wakhanle weera munamurowela mutthu muhitonkwaanyu omoona nipuro ineemela ikaaro. Mwarowa omusuwela hayi vatthu wowaattiwa? Mene akhala mutthu oolenleni moota oraawe, aari ookhuveya naari oorakama ni ikuwo owanraawe, onimookhweelani omphwanya mutthu munamurowelaanyu. Vamoharu, Yehova aharuma maprofeti olepa itthu Mesiya eraawe apake nave itthu seera simukhumelele. Vannikhweya omusuwela  Mesiya, nlikanxeraka ele maprofeti yahimmaaya ni ele Yesu aapankaawe.

7. Muhime soolohera piili sinoonihera weera Yesu Mesiya

⁷ Nrowe noone itthu Muluku aalenlaawe maprofeti olepa. Yoopatxera, iyaakha 700 Yesu ahinaaye oyariwa, yoolohera ya mprofeti Mikeya yahimme weera Mesiya arowa oyariwa muttetthe mukhaanene wa oBethelehemu. (Mikeya 5:1 [5:2 NM]) Nave Yesu aayariwe muttetthene yoole ntoko ssahimmwaaya! (Matheyo 2:1, 3-9) Yanaaveli, yoolohera ya Daniyeli yaanonihera weera Mesiya, aya orwa eyaakha ya 29 EC (Daniyeli 9:25) Yoolohera ele yoheereya, nave sookhala soolohera sintxipale sinoonihera weera Yesu, Mesiya aalaiheriwe. — Nwehe Enoota 13.

8, 9. Yaakhumelenle ti heeni emaara Yesu aaBatizinwaawe, enoonihera weera owo aari Mesiya?

⁸ Etthu ekina yakhumelenle emaara Yesu aBatiziwaawe, ennoonihera weera owo aari Mesiya. Muluku ammana natiri weera Yohani mBatiza, aamoona ethoonyero yaarowa omusuwanyeiha Mesiya. Yaakhumelenle eheeni eyaakha ya 29 EC, emaara Yesu aronwaiye omoolokoni weera aBatiziwe ni Yohani? Mene Biblya onnahima etthu yaakhumelenle emaara Yesu akhumaiye mmaahini. “Àhòna Munepa wa Muluku okhuruwaka ntoko ekhunda emwèmelelaka yowo. Nananoru nsu na wirimu nànèra: “Ola ti Mwan’aka òsiveleyaxa: mwa yowo kinnahakalala’mo.” (Matheyo 3:16, 17) Yohani ahoona ethoonyero ele ya ekhunda ni nsu na Muluku. Oonakaru ithoonyero iye, aaroromela weera Yesu ari Mesiya. (Yohani 1: 32-34) Yesu akhelekaru munepa woottela wa Yehova aakhala Mesiya. Owo mwene oothanliwa ni Muluku — Yesaya 55:4.

⁹ Sookhala ithoonyero sinoonihera weera Yesu aari Mesiya. Yoopatxera (1) soolohera sa mBiblyani, (2) ele Yehova ahimmawe ni (3) ethoonyero yaakhumelenle emaara Yesu aBatizinwaawe. Vano Yesu okhumme woowi? Aari mutthu a moota heeni? Nrowe noone ele Biblya onahimaawe.

10. Biblya onthaliha eheeni voohima sa ekumi ya Yesu ahinakuve orwa elapo ya vathi?

¹⁰ Biblya onhima weera Yesu aakhala wirimu ehuhu yintxipale ahaakunve owa elapo ya vathi. Mprofeti Mikeya oohima eraka, Mesiya anakhale mutthu a “mahiku avinre.” (Mikeya 5:1 [5:2 NM]) Yesu aahima ikwaha sintxipale weera owo aakhala wirimu, ahinakhuve oyariwa elapo ya vathi. (Mmusome Yohani 3:13; 6:38, 62; 17:4, 5.) Nave Yehova aakhalano onthamwene woolipa ni Yesu emaara aaraawe wirimu, eyo tiiyo ahinakhuve oyariwa elapo ya vathi.

11. Heeni Yesu oraawe mutthu otthuneya?

¹¹ Yesu mutthu ootepa ootthuneya vamaithoni va Yehova. Mwaha wa heeni? (1) Mwaha wooweera owo “Mwana òpatxera a sopattuxiwa sothene.” * Eyo entaphulela weera Yesu opattuxiwe vahinakuve opakiwa etthu eri yootheene wirimu ni elapo ya vathi. (Akolosi 1:15) (2) Nave Yesu tootthuneya mwaha woowera “Mwan’awe mmosaru”. Eyo entaphulela weera Yesu opattuxiwe ni muneene Yehova. (Yohani 3:16) (3) Yesu omukhavihera Yehova opaka itthu soothene sa wirimu ni elapo ya vathi. (Akolosi 1:16) (4) Yesu aavahiwa eparakha yolamulela malaika ni atthu a elapo ya vathi. Nto ti yeeyo onihimmwawe okhala “Nsu”. — Yohani 1:14.

12. Ninsuwela hayi weera Yehova ni Yesu eri atthu eeli, ohiya mmoha?

¹² Atthu antxipale aniroromela weera Muluku ni Yesu ori mutthu mmoha, mene kheiyono ti yeeyo Biblya onaxuttihawe. Yesu oropattuxiwa ntoko Biblya onihima awe. Nto Yehova opattunxe itthu sootheene, eyo enoonihera weera  owo okhanle ekhalelo, khapattuxiwe. (Nsalmu 90:2) Yesu khananto wuupuwela okhala Muluku, mwaha wooweera owo mwaana a Muluku. (Mmusome Yohani 14:28; 1 Akorinto 11:3.) Yehova paahi tori “Muluku òwerya.” (Ephattuwelo 17:1) Yehova tori mutthu ootthuneya ni oowera elapo yootheene. — Nwehe Enoota 14.

13. Mwaha wa heeni Biblya onamuhimaawe Yesu okhala “eruku ya Muluku òhòneya”?

¹³ Yehova ni mwanawe Yesu yaavara muteko vamoha iyaakha sintxipale sivinre. Epakaka malaika, ithenyeri, nsuwa, ni itthu ikina. Moone weera aavara ehuhu yiintxipale vamoha, woolipiha nsivelo naya! (Yohani 3:35; 14:31) Yesu annilikanxa mikhalelo sa tiithi awe. Nto ti yeeyo Biblya onihimaawe weera “owo ari eruku ya Muluku òhòneya.” — Akolosi 1:15.

14. Moota heeni mwaana osiveleya a Muluku oyaariwawe ntoko mutthu?

¹⁴ Mwaana osiveleya a Muluku ahakhulela orwa elapo ya vathi. Yereyale moota heeni? Yehova aapanke mwiirira. Owo aathamiha ekumi ya mwanawe ahelaka mmirimani wa mwali eeriwa Maria. Mwaha wa mwiirira ole, Maria aarupala naamwi areene mwali ohipatxeriwa. Mwaana ole okhala weera haakhanleno tiithi a weerutthuni, nto owo aari oomalela. Maria anvaha mwaana ole nsina na Yesu. — Luka 1:30-35.

15. Ninrowa omusuwela hayi nnenesene Yehova?

¹⁵ Hiyo nnoowera osuwela nnene omutthu wa Yesu nisomaka ibuukhu sa mBiblyani. Seiyo sinsuweliwa okhala evanjelyu ya Matheyo, Marko, Luka, ni Yohani. Osoma ni wiiwexexa ibuukhu iya, nnoowera omusuwela nnenesene Yehova nisomaka soopaka sa Yesu. Mene Yesu toolikana ni atiithawe. Owo enre: “Ole okònne miyo, òwòna Atithi.” — Yohani 14:9.

16. Etthu eheeni yootepa otthuneya Yesu uulumaawe? Taani yaamuxuttinhe Yesu wuuluma sa omwene?

 ¹⁶ Atthu antxipale yannamwiitthana Yesu okhala “Muhusiha.” (Yohani 1:38; 13:13) Ikwaha sintxipale Yesu annuluma sa omwene wa Muluku. Eyo yaari etthu yootepa otthuneya aaxuttihaawe. Vano omwene wa Muluku ti heeni? Omwene wa Muluku olamulelo okhanle. Yoowo Muluku onrowaawe ovarela muteko areene wirimu weera alamuleleke elapo ya vathi. Nto atthu anamwiiwelela Muluku anrowa oreelihiwa ni omwene owo. Nikoho tinna, Yesu aaxuttihiwe naani wuuluma sa omwene owo? Moohihovela, omuxuttinhe Muluku. Nave Yesu mwaneene aahimme weera “Nihusiho naka kahiyono nawaka, hoye, mene nawawe ole okirumme.” (Yohani 7:16) Yesu annixuttiha sa omwene, mwaha wooweera aasuwela weera Yehova ontthuna weera atthu ootheene esuwele “Evanjelyu ya omwene.” (Matheyo 4:23) Eyo tiyo, mitthenka sooreera sa omwene wa Muluku, yowo onrowa olamulelaka elapo ya vathi.

17. Mapuro heeni Yesu axuttihawe? Mwaha wa heeni Yesu ahakhulumuwawe waaxuttiha atthu?

¹⁷ Mapuro heeni Yesu aaxuttihaawe? Owo axuttiha mapuro ootheene aaphwanyaawe atthu. Yesu annixuttiha mapuro ntoko mmatta, mmittettheni, ni mapuro ohiyana-hiyana. Nave mapuro atthu yaathukumanaayamo weera envekeleke Muluku ni anneetta empa ni empa. Yesu khaweherera orweliwa weera aaxuttihe atthu, mene owo taarowela owaasa atthu. (Marko 6:56; Luka 19:5, 6) Yesu hakhulumuwa waaxuttiha atthu. Mwaha wa heeni? Mwaha wooweera aasuwela weera eyo etthu aarummwalaawe ni Muluku weera apake elapo ya vathi. Nto Yesu annamwiiwelela emaara yootheene Tiithawe. (Yohani 8:28, 29) Nave Yesu annalaleera mwaha wooweera annaamorela ikharari atthu. (Mmusome Matheyo 9:35, 36) Yesu awoonelela asitokweene a ittiini weera khayaxuttiha ekhaikhai ya Muluku ni omwene awe. Nto owo aatthuna weera aleele atthu ootheene mitthenka sooreera sa omwene.

18. Makhalelo heeni a Yesu anoosivelani vantxipale?

 ¹⁸ Yesu aannapwattha atthu mwaha wooweera owo annaasivela. Owo aari mutthu ovola murima, ni atthu yanikhala ootaphuwa otthekula ni yoowo. Nave anamwaane wannasivela okhala vakhiviru vawe, eyo tiiyo, otthekula ni Yesu. (Marko 10:13-16) Emaara yootheene Yesu aari axariya, nto yannamunanara atthu oohiroromeleya ni oohixariya. (Matheyo 21:12, 13) Ehuhu ya Yesu, athiyana khayattittimihiwa ni khiyarinono otaphuwa. Moovirikana ni atthu a ehuhu ele, Yesu annattittimiha athiyana. (Yohani 4:9, 27) Ntakihero na Yesu, ninnonihera weera owo aari mutthu owiyeviha. Ekwaha emoha Yesu aavara muteko waavariwa ni namuteko, owo arapiha inaani sa oohusera awe. — Yohani 13:2-5, 12-17.

19. Ntakihero heeni nnoonihera weera Yesu annapwattha atthu, ni annatthuna wakhavihera?

¹⁹ Yesu annapwattha atthu nave annatthuna wakhavihera. Eyo yahooneya vanlakani emaara Yesu aapanka awe soowalamiha aretta, avarelaka muteko ikuru sa Muluku. (Matheyo 14:14) Mwa ntakihero, mulopwana mmoha aarino makokho aanvekela Yesu weera amulamihe. Mulopwana ole àmwèrela: “Watthuna, onowerya okirapiha.” Khaavo mutthu aawera omwattamela namakokho, mwaha wooweera eretta ele ti yoowopiha ni ti yoovalihaniwa. Mene Yesu wanvoreya murima omoona mulopwana ole ahaawaka. Nto owo aanvara mulopwana ole ni anamwereela: “Kinnatthuna orapihiweke!” Vohilekela maretta yakhuma mwa yowo ni arapihiwa! (Marko 1:40-42) Nto mulopwana ole aahakalala vantxipale.

20, 21. Heeni Yesu oraawe ntakihero nooreera, na moota woomwiiwelela Muluku?

²⁰ Yesu ohoonihera ntakihero nooreera na omwiiwelela Muluku. Owo khapwattha itthu saamukhumelela, naari emaara iittiwaawe, mene owo aari oororomeleya wa  Atithawe. Eyo yahooneya emaara Yesu ereriwaiye ni Satana, owo khaatthenke. (Matheyo 4:1-11) Mene amusaawe akina khiyaaroromela weera owo aari Mesiya, nave akina yaahima weera Yesu akhwa anepa. Naamwi vareene hiho, owo anniilipihera opaka yootthuna ya Muluku. (Marko 3:21) Nave atthu yamusontta Yesu yaari osareya owali. Nto owo aavirelela okhala oororomeleya ni khatonko ottheka. — 1 Pedru 2:21-23.

²¹ Okhwa wa Yesu khaareere ohaawa. Nto owo aari oororomeleya wa Yehova mpaka otxipha. (Mmusome Afilipi 2:8.) Nkupuwelani weera nihuku aakhwiya awe Yesu, owo haarere ohasuliwa. Nihiku wuulummwaa aya mulattu awe, yaakhalavo anamoona oowootha, yaawo yaahima weera Yesu annanveha Muluku. Nave alipa owuuluma mulattu awe, khiyatthara exariya. Wakhulana waasareya emutheyaka, nto atoropa yaapatxera omweepettha, yamukhomela ni yaamuthomeya  vamwirini wa masoso. Yesu ahinakuve okhwa àhèra: “Yòkwaniheriwa!” Masu awo yaataphulela weera Yesu aaipaka itthu sootheene Muluku aatthuna awe. (Yohani 19:30) Emalakaru mahiku mararu, Yehova anvinyereriha Yesu ni erutthu yoomunepani. (1 Pedru 3:18) Akhalakaru isimana vakhaanene elapo ya vathi owo atthikela wirimu. Awehereraka ovariwa omwene owo, “òkilathi wa mahiku othene mono wolopwana wa Muluku,”. — Aheberi 10:12, 13.

22. Wiiwelela wa Yesu onnivaha eparakha heeni?

²² Ororomeleya wa Yesu ti wootthuneya vantxipale. Nto wiiwelela wa Yesu wooniphwanyiha eparakha yookhala mparadiso mahiku ootheene. Ntoko Yehova aatthunaawe apattuxaka elapo ya vathi. Vanonto muru onittharelana, ninrowa oxuttera moota okhwa wa Yesu onnivaha aya ebarakha ene yeeyo.