1, 2. (a) Niireke osuwela nsina na mutthu oovuwa onitaphulela wira munnimusuwela saana? Mutthokiherye. (b) Atthu akina anikupali exeeni voohimya sa Yesu?

MOLUMWENKUNI khareere atthu oovuwa. Pooti wira munnaasuwela akina a atthu awo oovuwa. Masi osuwela nsina na mutthu owo khonitaphulela wira munnimusuwela saana. Eyo khentaphulela wira munnisuwela itthu ntoko makhalelo awe, ihuweliwo sawe, mweettelo awe ni itthu sikina.

² Waaniheryasa muhiiwa voohimya sa Yesu Kristu, hata okhanle ene valaponi iyaakha 2.000 sivinre. Masi atthu anceene khanimusuwela oratteene Yesu. Atthu akina anihimya wira owo aari mutthu ooloka, akina anihimya wira aari profeta, nlelo akina anikupali wira owo Muluku. Ankhi nyuwo?​—Nwehe Enoota 12.

3. Xeeni vanitthuneya anyu omusuwela saana Yehova Muluku ni Yesu Kristu?

³ Tthiri ti vootthuneya omusuwela saana Yesu. Nthowa xeeni? Maana Biibiliya onihimya so: “Vano, ekumi yohima t’ila: wosuwelani nyuwo, mukhanle Muluku mmosáru èkekhai, n’omusuwela Yesu Kristu, yowo omurummyanyu”. (Yohani 17:3) Nto, vakhala wira munoomusuwela saana Yehova ni Yesu, nyuwo munookhala mahiku otheene mparayiisu valaponi. (Yohani 14:6) Nave, omusuwela Yesu onimookhaliheryani okhala wira Yesu ntakiheryo noolokexa na moota wookhala ni waathokorerya akina. (Yohani 13:34, 35) Muru 1, nihiixutta ekeekhai voohimya sa Muluku. Vano ninrowa osuwela ele Biibiliya eniixuttiha awe voohimya sa Yesu.

4. Anitaphulela exeeni moolumo oowi: “Mesiya” ni “Kristu”?

⁴ Iyaakha sinceene Yesu ohinatthi oyariwa, Yehova aahileiherya mBiibiliyani wira Yesu aarowa okhala Mesiya aahiiso Kristu. Nuulumo noowi “Mesiya”, mwiihanelo wa eHeeberi ni nuulumo noowi “Kristu”, mwiihanelo wa eKriki. Maihaneliwo ala a nttittimiho anitaphulela wira Muluku oomuthanla Mesiya ni khunvaha muteko wa vameekhaaya. Mesiya onrowa owaakhwaniherya anatiri otheene a Muluku. Nave onimookhaliheryani omusuwela nenna-va. Masi Yesu ohinatthi oyariwa atthu anceene yaanikoha so: ‘Ti pani onrowa okhala Mesiya?’

5. Exeeni awiixutti ale yaakupali aya voohimya sa Yesu?

⁵ Awiixutti a Yesu, yaahikupali wira owo aari tthiri Mesiya aaleiheriwe. (Yohani 1:41) Mwa ntakiheryo, omwaakhulaka Yesu, Simoni Pedru aahimmye so: “Nyuwo mwá Kristu”. (Matheyo 16:16) Ninrowa okupali sai wira Yesu tthiri Mesiya?

6. Moota xeeni Yehova aakhalihenrye awe atthu ooloka omusuwela Mesiya?

⁶ Iyaakha sinci Yesu ohinatthi oyariwa, maprofeta a Muluku yaahilepa itthu sinceene saarowa waakhaliherya atthu omusuwela Mesiya. Moota xeeni? Ntakiherye so: nihimye wira nyuwo nvekeliwe orowa omwaakhela mutthu ohinimusuwela anyu ostasau wowaattiwa. Akhala wira munootthokiheriwa saana mikhalelo sa mutthu owo, nyuwo munoomusuwela. Moolikanasa, Yehova aahaarumeela maprofeta ohimya ele Mesiya yaarowa awe opaka ni itthu saarowa omwiiraneela. Wiiraneya wa iprofesia iyo onnaakhaliherya atthu a mukhalelo wooloka osuwela wira Yesu Mesiya.

7. Iprofesia xeeni piili sinooniherya wira Yesu ti Mesiya?

 ⁷ Nrowe niwehe iprofesia piili. Yoopacerya: Iyaakha 700 Yesu ohinatthi oyariwa, Mikeya aahihimya vahinatthi wira Mesiya aarowa oyariwa muttetthe mwaamukhaani wa oBethelehemu. (Mikeya 5:1) Tthiri, Yesu aayariwe opuro ene yoole! (Matheyo 2:1, 3-10) Yanenli: Daniyeli aahihimya vahinatthi wira Mesiya aamoorwa mwaakha wa 29 EC. (Daniyeli 9:25) Nto iya iprofesia piili paahi mwa iprofesia sinci, sinooniherya oratteene wira Yesu ti Mesiya aaleiheriwe.​—Nwehe Enoota 13.

8, 9. Ele yiiraneyale okathi wa obatizo wa Yesu, enooniherya sai wira owo ti Mesiya?

⁸ Yehova aahooniherya saana wira Yesu ti Mesiya. Muluku aahinvaha Yohani mBatiza ekanyeryo yaarowa omukhaliherya omusuwela Mesiya. Vaavo Yesu aaronwe awe oMuro Yordani wira obatiziwe ni Yohani mwaakha wa 29 EC, Yohani aahiweha ekanyeryo ene. Biibiliya onnihimya ele yiiraneyale oriki: ‘Amalakaru obatiziwa, Yesu ahikhuma mmàsini. Okathi ene yowo, wirimu wahitthukuwa: Yesu ahona eroho [“munepa wa”, BE] Muluku okhuruwaka ntoko epomba, emurwelaka yowo. Vano nsu nikhumaka wirimu nahihimya wira: “Ola mwan’aka onimphentexaka: miyo kosiveliwa ni yowo”’. (Matheyo 3:16, 17) Vaavo Yohani aawenhe awe epomba ele ni wiiwa nsu nne, aahisuwela wira Yesu aari Mesiya. (Yohani 1:32-34) Nihiku nne, Yehova aahimmwarexela Yesu munepa awe wootteela, nto Yesu khukhala Mesiya.  Vano Yesu aahikhala ole Muluku aamuthanlale awe okhala Mukhulupale ni Mwene.​—Yesaya 55:4.

⁹ Tivonto, itthu ntoko iprofesia sa Biibiliya, masu a Yehova, ni ekanyeryo Muluku aavanha awe okathi wa obatizo wa Yesu, sinnooniherya wira Yesu ti Mesiya. Nto Yesu aakhumme woowi ni aari mutthu a mukhalelo xeeni? Nrowe noone ele Biibiliya enihimya awe.

10. Exeeni Biibiliya enniixuttiha awe voohimya sa okumi wa Yesu ohinatthi orwa valaponi?

¹⁰ Biibiliya onniixuttiha wira Yesu aahikhala wiirimu okathi munceene ohinatthi orwa valaponi. Mikeya aahimyale wira ephattuwelo ya Mesiya ti ya “mahiku avinre khalai”. (Mikeya 5:1) Ikwaha sinceene Yesu aahihimya wira aahikhala wiirimu ohinatthi oyariwa ntoko pinaatamu. (Mmusome Yohani 3:13; 6:38, 62; 17:4, 5.) Hata ohinatthi orwa valaponi, Yesu aahikhalana wataana wa vameekhaaya ni Yehova.

11. Xeeni Yesu oryaawe mwaana oophentexiwa a Yehova?

¹¹ Yesu aari mwaana oophentexiwa a Yehova. Moota xeeni? Mwaha woowi Muluku aahimpattuxa ohinatthi opaka khula etthu, nnakhala malaikha aahiiso apinaatamu. Tivonto, Yesu onihimmwa awe wira “t’òpajerya mwa sopattuxiwa sothene”. * (aKolosi 1:15) Nave Yesu mwaana oophentexiwa a Yehova mwaha woowi owo paahi topattuxiwe ni mwaaneene Yehova. Ti nthowa naya vanihimmwa awe okhala “Mwan’awe mmosene”. (Yohani 3:16) Nto Yehova aahimurumeela Yesu wira opattuxe itthu sotheene. (aKolosi 1:16) Yesu paahi tonihimmwa okhala “Nsu”, maana Yehova aamurumeela Yesu wira olavulane aahiiso ovaha malakiheryo malaikha ni apinaatamu.​—Yohani 1:14.

12. Ninsuwela sai wira Yesu ni Muluku khahiyo mutthu mmosa?

¹² Atthu akina anikupali wira Yesu ni Muluku mutthu mmosa. Masi Biibiliya khoniixuttiha siiso. Biibiliya onniixuttiha wira Yesu oroopattuxiwa, nto eyo enitaphulela wira Yesu ookhalana wanipacerya. Masi Yehova yoowo opanke itthu sotheene, khorina wanipacerya. (Esalimo 90:2) Yesu, Mwaana a Muluku, khotonko wuupuwela nnakhala ophavela okhala ntoko Muluku.  Biibiliya onniixuttiha saana wira Tiithi ti muulupale onvikana Mwaana. (Mmusome Yohani 14:28; 1 aKorinto 11:3.) Yehova paahi tori “Muluku Òwerya Sothene”. (Maphattuwelo 17:1) Owo paahi tori Muluku muulupalexa ni oowerya sotheene molumwenkuni.​—Nwehe Enoota 14.

13. Xeeni Biibiliya vanimuhimya awe Yesu okhala “eruku ya Muluku ohinòneya”?

¹³ Yehova ni Mwanawe, eyo piiyo, Yesu, yaanivara muteko hoothe iyaakha ibilyau sinceene ehinatthi opattuxiwa erimu ni elapo ya vathi. Awo yaaniphentana vanceene! (Yohani 3:35; 14:31) Yesu aahitakiha saana mikhalelo sa tiithi awe, tivonto Biibiliya vanimuhimya awe okhala “eruku ya Muluku ohinòneya”.​—aKolosi 1:15.

14. Vaaweryaneyale sai Mwaana a vameekhaawe a Yehova oyariwa ntoko pinaatamu?

¹⁴ Mwaana ola a vameekhaawe a Yehova aaheemererya okhuma wiirimu wira oyariwe ntoko pinaatamu valaponi. Vaaweryaneyale sai? Mwa mwiiriirya, Yehova aahithaamiha okumi wa Mwanawe khuroiha mmirimani mwa mwali iihaniwa Maria. Tivonto, Yesu khaarina tiithi oopinaatamu. Vano Maria aahimuyara mwaana oohittheka, ni khunvaha nsina na Yesu.​—Luka 1:30-35.

15. Nipake exeeni wira nimusuwele saana Yehova?

¹⁵ Munoowerya wiixutta sa okumi wa Yesu ni mikhalelo sawe, musomaka iliivuru iya sa Biibiliya: Matheyo, Marko, Luka ni Yohani. Iliivuru iyo siniihaniwa Ivangelyo. Okhala wira mikhalelo sa Yesu sinoolikana niiye sa Tiithi awe, nto ele enrowa anyu osomaka enimookhaliheryani omusuwela saana Yehova. Ti nthowa naya Yesu aahimyale awe wira: “Ole okònne miyo, owònne Atithi”.​—Yohani 14:9.

16. Exeeni Yesu aixuttiha awe? Mwiixuttiho wa Yesu waakhumme woowi?

 ¹⁶ Atthu anceene yaamusuwenle Yesu ntoko “Mwixuttihi”. (Yohani 1:38; 13:13) Etthu yootepexa otthuneya Yesu yiixuttiha awe yaari “ehapari yorera y’Omwene”. Omwene onitaphulela exeeni? Eguvernu ya Muluku eri wiirimu enrowa olamulelaka elapo yotheene ya vathi, ni oruuha mareeliho wa atthu animwiiwelela Muluku. (Matheyo 4:23) Khuta etthu Yesu aixuttiha awe yaakhuma wa Yehova. Yesu aahimmye so: “Mwixuttiho aka khuhiyó wawaka: onkhuma wa Muluku òkirumme”. (Yohani 7:16) Nto Yesu aahisuwela wira Yehova omphavela wira atthu yiiwe ihapari sooreera sa Omwene wa Muluku onrowa olamulelaka elapo ya vathi.

17. Yesu iixuttiha opuro xeeni? Xeeni ohalaka wiimananiha vanceene owiixuttiha atthu?

¹⁷ Yesu iixuttiha opuro xeeni? Owo aixuttiha khuta opuro aaphwanya awe atthu. Ntoko mmawaani, mpooma, mmittettheni, mmerkaatu, musinagoga, mutemplo, ni khuta empa. Owo khaawehererya atthu omurweela. Masi ikwaha sinceene aarowa opuro waryaaya. (Marko 6:56; Luka 19:5, 6) Yesu aahirumeela ikuru sawe ni okathi awe wira owiixuttihe atthu. Mwaha wa xeeni? Mwaha woowi opaka eyo yaari yootthuna ya Muluku, ni okathi wotheene Yesu aanimwiiwelela Tiithi awe. (Yohani 8:28, 29) Nave Yesu aaniwiixuttiha atthu okhala wira aaniwoonela othunku. (Mmusome Matheyo 9:35, 36.) Aaniweha wira ahooleli a itiini khayiixuttiha ekeekhai voohimya sa Muluku ni Omwene awe. Nto aahiimananiha vanceene wira aakhaliherye atthu wiiwa ihapari sooreera.

18. Mukhalelo xeeni wa Yesu onoovarani murima?

¹⁸ Yesu aari mutthu aaphenta atthu ni waakhapelela.  Aari oreera murima ni ookhweya olavulana. Nave-tho, anamwane vaanaakhweela omwaattamela. (Marko 10:13-16) Khula okathi vaanikhweya olavulana. Yesu khaasiveliwa ni atthu oohiroromeleya ni oohixariya. (Matheyo 21:12, 13) Yesu aakhanle okathi yoole athiyana yahooneliwa aya vatthu ni yahaattittimihiwa aya. Masi Yesu aanaathokorerya athiyana mookhalela ni mwa nttittimiho. (Yohani 4:9, 27) Tthiri Yesu aari oowiiyeviha! Mwa ntakiheryo, okathi omosa owo aahirapiha inawu sa arummwa awe, muteko yoowo okhala wene waavariwa ni murumeyi.​—Yohani 13:2-5, 12-17.

19. Ntakiheryo xeeni nnooniherya wira Yesu aahaamorela ikharari atthu ni onaphavela waakhaliherya?

¹⁹ Yesu aahisuwela ele yaatthuneya wa atthu nto aahiphavela waakhaliherya. Vano aahooniherya eyo okathi yoole aarumenle awe owerya wa Muluku wira aavonihe aretta mwa mwiiriirya. (Matheyo 14:14) Mwa ntakiheryo, mulopwana mmosa namakuttula aahirowa wa Yesu, khwiira: “Mwatthuná vale, munowerya okireriha!” Yesu aahimoonela othunku mutthu ole ahaareere owereiwa ni ohaawa. Aahimmorela ikharari ni onaphavela omukhaliherya. Vano, Yesu aahookola ntata nawe, khumunxaatherya oriki: “Kinnitthuna: murerihiwe!” Tthiri namakuttula ole aahivonihiwa! (Marko 1:40-42) Niireke munniwerya woona ohakalala wa mulopwana ole?

20, 21. Moota xeeni Yesu okhanle awe ntakiheryo nooloka na omwiiwelela Muluku?

²⁰ Yesu ntakiheryo noolokexa na ororomeleya wa Muluku. Moohicikha etthu sa ele yaamwiiraneela aahiiso ele awanani awe yaamwiirinha aya, owo aahiroromeleya  wa Tiithi awe. Mwa ntakiheryo, okathi Satana aamweeherenrye awe, Yesu khaatthenke. (Matheyo 4:1-11) Hata amusi awe akina, yahaakupali wira Yesu aari Mesiya yaahimya wira “orovahuwa”, masi Yesu aahivikaniha ovara muteko wa Muluku. (Marko 3:21) Vaavo awanani awe yaamuhaaxa aya, Yesu aahivikaniha ororomeleya wa Muluku, ni kheerenrye owunlela ikuhu.​—1 Pedru 2:21-23.

²¹ Hata okathi yoole Yesu aahaaxiwa awe ni wiiviwa mootakhala, owo aahiroromeleya wa Yehova. (Mmusome aFilipi 2:8, NM.) Nyuwo pooti wuupuwela owereya aavilenle awe nihiku naakhwiiye awe. Yesu aahitthukiwa, wootheriwa ni atakhali, ophukeliwa moohixariya, otheiwa ni muttitthi wa atthu ootakhala, ohaaxiwa ni atoropa ni okhomeliwa vamwirini wa nihaaxeryo.  Ohalaka okhwa aahikhuwela oriki: “Sothene somaliheriwa!” (Yohani 19:30) Nuuvira mahiku mararu Yesu okhwiiye ene, Yehova aahimuhihimuxa ni erutthu yomunepani. (1 Pedru 3:18) Isumana vakhaani ohoolo waya, Yesu aahitthikela wiirimu ‘khukilathi mono wolopwana wa Muluku’, owehereryaka wira Muluku omukhalihe Mwene.​—aHéberi 10:12, 13.

22. Eparakha xeeni nrina ahu mwaha wa Yesu ororomeleya wa Tiithi awe?

²² Mwaha woowi Yesu aahivikaniha okhala oororomeleya wa Tiithi awe, nto nookhalana eparakha ya okhala mparayiisu valaponi, ntoko Yehova aaleihenrye awe. Muru onittharelana, ninrowa othokorerya moota okhwa wa Yesu onnikhaliherya aya ophwanya okumi woohimala.