1, 2. 1) Utiaʼal a kʼaj óoltik wa máaxeʼ, ¿baʼaxten maʼ chéen u kʼaabaʼ unaj a wojéeltikiʼ? 2) ¿Baʼax ku tuklik le máakoʼob tu yoʼolal Jesúsoʼ?

YAʼAB máakoʼob jach kʼaj óolaʼanoʼob teʼ yóokʼol kaabaʼ. Maʼ xaaneʼ a wojel u kʼaabaʼ juntúuliʼ. Baʼaleʼ a wojéeltik u kʼaabaʼeʼ maʼ u kʼáat u yaʼal wa a kʼaj óol tubeeliʼ. ¿Baʼaxten? Tumen maʼ a wojel bix u modosiʼ mix a wojel bix u kuxtaliʼ.

² Kex tsʼoʼok u máan 2,000 años taalak Jesús way Luʼumeʼ maʼ xaaneʼ tsʼoʼok a wuʼuyik wa baʼax tu yoʼolal. Baʼaleʼ óoliʼ mix máak u yojel jach máaxiʼ. Ku yaʼalaʼaleʼ chéen juntúul utsul máak, wa chéen juntúul profeta. Yaan xan máax aʼalikeʼ Jesúseʼ Dios. Techeʼ, ¿máax a tuklik? (Ilawil nota 12).

3. ¿Baʼaxten jach unaj a kʼaj óoltik Jéeoba yéetel Jesús?

³ ¿Baʼaxten unaj a wojéeltik u jaajil yoʼolal Jesús? Tumen le Bibliaoʼ ku yaʼalik: «Lelaʼ letiʼe baʼax kun tsʼáaik kuxtal minaʼan u xuul tiʼ le máakoʼoboʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ, bey xan ka u kʼaj óoltoʼob Jesucristo, le máax ta túuxtoʼ» (Juan 17:3). Wa ka kʼaj óoltik Jéeoba yéetel Jesúseʼ jeʼel u yantaltech kuxtal minaʼan u xuul teʼ Paraísooʼ (Juan 14:6). Kéen a kʼaj óolt Jesúseʼ yaan a kanik bix unaj a kuxtal yéetel bix unaj a biskaba yéetel u maasil (Juan 13:34, 35). Teʼ yáax xookoʼ t-kanaj u jaajil yoʼolal Dios. Beoraaʼ yaan k-ilik baʼax ku yaʼalik le Biblia tu yoʼolal Jesúsoʼ.

4. ¿Baʼax u kʼáat u yaʼal «Mesías» yéetel «Cristo»?

⁴ Yaʼab jaʼaboʼob u bin u síijil Jesúseʼ, Jéeobaeʼ tu yaʼalaj teʼ Biblia yaan u túuxtik le Mesías wa Cristooʼ. Le tʼaan «Mesíasoʼ» ich hebreo yaan; le tʼaan «Cristooʼ» ich griego. Le kaʼapʼéel tʼaanoʼobaʼ ku meyajoʼob utiaʼal u yúuchul tʼaan tiʼ máax yéeyaʼan tumen Dios utiaʼal u beetik junpʼéel nojoch meyaj. Le Mesíasoʼ yaan u béeykuntik le baʼaxoʼob u yaʼalmaj Diosoʼ. Baʼaleʼ táanil tiʼ u síijil Jesúseʼ yaʼab máakoʼob taakchaj u yojéeltikoʼob máax le Mesíasoʼ.

5. U discípuloʼob Jesúseʼ, ¿tu creertoʼob wa letiʼ le Mesíasoʼ?

⁵ U discípuloʼob Jesúseʼ jach tu creertoʼob letiʼ le Mesías aʼalaʼanoʼ (Juan 1:41). Apóstol Pedroeʼ tu yaʼalaj tiʼ Jesús: «Teech le Cristooʼ» (Mateo 16:16). Baʼaleʼ ¿bix jeʼel k-ojéeltik wa letiʼ le Mesíasoʼ?

6. ¿Baʼax tu beetaj Jéeoba utiaʼal ka kʼaj óoltaʼak le Mesíasoʼ?

⁶ Yaʼab u bin u síijil Jesús ka aʼalaʼab tumen le profetaʼob bix kun kʼaj óoltbil le Mesíasoʼ. ¿Baʼaxten anchaj u yaʼalaʼal bix kun kʼaj óoltbil? Utiaʼal a naʼatikeʼ máans ta tuukuleʼ ku yaʼalaʼaltech ka xiʼikech a chʼaʼ juntúul máak maʼ a kʼaj óol tiʼ junpʼéel lugar jach chochoʼkil. Wa ka aʼalaʼaktech bix le máakoʼ yéetel baʼax nookʼil u tsʼaameʼ, ¿máasaʼ jeʼel a kʼaj óoltikeʼ? Jéeoba xaneʼ tu beetaj u yaʼalaʼal tumen u profetaʼob baʼax ken u beet le Mesíasoʼ yéetel baʼax kun úuchultiʼ. Beyoʼ kéen ilaʼak tumen le máaxoʼob uts u puksiʼikʼaloʼoboʼ yaan u yojéeltikoʼobeʼ Jesúseʼ letiʼe Mesíasoʼ.

7. Aʼal kaʼapʼéel profecíaʼob eʼesik Jesús le Mesíasoʼ.

⁷ Koʼox ilik kaʼapʼéel profecíaʼob. Yáaxeʼ 700 años  táanil tiʼ u síijil Jesúseʼ profeta Miqueaseʼ tu yaʼaleʼ tu chan kaajil Belén kun síijil le Mesíasoʼ (Miqueas 5:2). Jeʼex aʼalaʼaniloʼ tiʼ síij Jesúsiʼ (Mateo 2:1, 3-9). Daniel xaneʼ tu yaʼaleʼ tu jaʼabil 29 kun chíikpajal le Mesíasoʼ (Daniel 9:25). Lelaʼ chéen kaʼapʼéel tiʼ le yaʼabkach profecíaʼob eʼesik Jesús le Mesíasoʼ (ilawil nota 13).

8, 9. Ka okjaʼanaj Jesúseʼ, ¿baʼax eʼes jach tu jaajil letiʼ le Mesíasoʼ?

⁸ Jéeobaeʼ jach tu yeʼesaj de ke Jesúseʼ letiʼe Mesíasoʼ. Tu yaʼalaj tiʼ Juan Bautista baʼax kun chíikbesik máax le Mesíasoʼ. Ka tsʼoʼok u tsʼáaik Juan u yokjaʼ Jesús tu jaʼabil 29, béeychaj le baʼax aʼalaʼabtiʼoʼ: «Jeʼepaj le kaʼanoʼ ka tu yilaj u yéemel u espíritu santo Dios bey juntúul paloma ku taal tu yóokʼol Jesúseʼ. Teʼ kaʼan xanoʼ jóokʼ junpʼéel tʼaan táan u yaʼalik: ‹Lelaʼ in Hijo, jach in yaabiltmaj, letiʼeʼ jach ku beetik u kiʼimaktal in wóol›» (Mateo 3:16, 17). Yoʼolal le baʼax tu yilaj yéetel tu yuʼubaj Juanoʼ tu tsʼáaj cuenta de ke Jesúseʼ letiʼe Mesíasoʼ (Juan 1:32-34). Ka éem le espíritu santo tu yóokʼoloʼ Jesúseʼ kʼuch u beetuba Mesías wa Cristo, le máax yéeyaʼan utiaʼal u beetik u Reyiloʼ (Isaías 55:4).

⁹ Le profecíaʼoboʼ tu yeʼesoʼob Jesús le Mesíasoʼ, bey xan tu yeʼesil le baʼax tu beetaj yéetel tu yaʼalaj Jéeoba le ka okjaʼanaj Jesúsoʼ. Baʼaleʼ ¿tuʼux yaan Jesús  kaʼachi? ¿Bix u modos? Koʼox ilik baʼax ku yaʼalik le Bibliaoʼ.

10. ¿Baʼax ku kaʼansik le Biblia yoʼolal u kuxtal Jesús táanil tiʼ u taal way Luʼumoʼ?

¹⁰ Teʼ Bibliaoʼ k-kanikeʼ táanil tiʼ u taal Jesús way  Luʼumeʼ teʼ kaʼan kajaʼan kaʼachoʼ. Miqueaseʼ tu yaʼaleʼ «jach úuch yanak» le Mesíasoʼ (Miqueas 5:2). Ka taal way Luʼumeʼ Jesúseʼ yaʼab u téenel tu yaʼaleʼ teʼ kaʼan u taaloʼ (xok Juan 3:13; 6:38, 62; 17:4, 5). Le tiaʼan teʼ kaʼanoʼ jach maʼalob úuchik u biskuba yéetel Jéeoba. 

11. ¿Baʼaxten Jéeobaeʼ maas u yaabiltmaj Jesús?

¹¹ Jéeobaeʼ jach u yaabiltmaj Jesús. ¿Baʼaxten? Tumen letiʼe máax yáax anchaj tu yiknaloʼ. Jesús «yáax beetaʼab» tumen Dios, tsʼoʼoleʼ ka beetaʼab u maasil baʼaloʼoboʼ (Colosenses 1:15). * Jéeobaeʼ jach u yaabiltmaj Jesús tumen mix máak áant u beete. Le oʼolal ku yaʼalaʼaleʼ «u juntúuliliʼ Paal» Dios (Juan 3:16). Tsʼoʼoleʼ chéen Jesús áant Jéeoba u beet tuláakal baʼal (Colosenses 1:16). Chéen tiʼ Jesús ku yaʼalaʼal xan le ‹Tʼaanoʼ›, tumen letiʼ bis u tʼaan Jéeoba tiʼ ángeloʼob yéetel tiʼ wíinikoʼob (Juan 1:14).

12. ¿Baʼaxten k-aʼalikeʼ Jesúseʼ maʼ Jéeobaiʼ?

¹² Yaʼab máax tuklikeʼ Jesúseʼ láayliʼ Jéeobaeʼ. Chéen baʼaleʼ le Bibliaoʼ ku yaʼalikeʼ Jesúseʼ anchaj káajbal tiʼ tumen Jéeoba beete. Baʼaleʼ Jéeobaeʼ maʼ anchaj káajbal tiʼiʼ tumen letiʼ beet tuláakal baʼal (Salmo 90:2). Teʼ Bibliaoʼ k-kanik xaneʼ le Taataoʼ maas nojoch tiʼ le Hijotsiloʼ. Tsʼoʼoleʼ Jesúseʼ mix juntéen tu ketuba yéetel u Taata (xok Juan 14:28; 1 Corintios 11:3). Jéeobaeʼ letiʼe «Dios jach táaj yaan u  poderoʼ» (Génesis 17:1). Minaʼan uláakʼ máax maas yaan u páajtalil ke Dios (ilawil nota 14).

13. ¿Baʼaxten Jesúseʼ ku páajtal u yeʼesik jach bix Jéeoba?

¹³ Jéeoba yéetel Jesúseʼ múul meyajnajoʼob u millonesil jaʼaboʼob táanil tiʼ u beetkoʼob le kaʼan yéetel le Luʼumaʼ. Ichiloʼobeʼ anchaj junpʼéel nojoch yaabilaj (Juan 3:35; 14:31). Jesúseʼ jach tu kʼaj óoltaj Jéeoba, le oʼolal ku páajtal u «jach eʼesik bix le Dios maʼ tu páajtal u yilaʼaloʼ» (Colosenses 1:15).

14. ¿Bix úuchik u síijil Jesús way Luʼumeʼ?

¹⁴ Jesúseʼ yéetel kiʼimak óolal tu pʼataj le kaʼan utiaʼal ka taalak síijil way Luʼumeʼ. ¿Bix túun úuchik? Jéeobaeʼ tu beetaj junpʼéel milagro. Tu chʼaʼaj u kuxtal u Hijoeʼ ka tu tsʼáaj tu jobnel María, juntúul x-chʼúupal virgen. Bey túunoʼ maʼ táakpaj mix juntúul xiibiʼ. Le oʼolal ka síij u chaambal Maríaeʼ, minaʼan u kʼeban; ka tu tsʼáaj u kʼaabaʼt Jesús (Lucas 1:30-35).

15. ¿Bix jeʼel a kʼaj óoltik Jéeoba tubeeleʼ?

¹⁵ Jesúseʼ tu yaʼalaj: «Le máax tsʼoʼok u yilkeneʼ tsʼoʼok xan u yilik le Taataoʼ» (Juan 14:9). Leloʼ u kʼáat u yaʼaleʼ jeʼel u páajtal k-kʼaj óoltik Jéeoba wa k-kaanbal tiʼ Jesúseʼ tumen jach maʼalob tu yeʼesil bix u Taata. Tu Evangelioil Mateo, Marcos, Lucas yéetel Juaneʼ jeʼel u páajtal a xokik le baʼax tu beetaj yéetel tu kaʼansaj Jesúsoʼ.

16. 1) ¿Baʼax tu kaʼansaj Jesús? 2) ¿Tuʼux tu kanaj le baʼax tu kaʼansoʼ?

¹⁶ Úuchjeakileʼ le máakoʼoboʼ «j-Kaʼansaj» u yaʼalikoʼob tiʼ Jesús (Juan 1:38; 13:13). Letiʼeʼ jach tu  kaʼansaj le «baʼaloʼob maʼalobtak ken u beet u Reino Diosoʼ». ¿Baʼax u Reino Dios? Junpʼéel gobierno kun antal kaʼan, yéetel yaan u taasik yaʼab utsil tiʼ le máaxoʼob uʼuyik u tʼaan Diosoʼ (Mateo 4:23). Tuláakal baʼax tu kaʼansaj Jesúseʼ tiʼ Jéeoba tu kanaj. Le oʼolal tu yaʼalaj: «Le baʼax kin kaʼansikoʼ maʼ in tiaʼaliʼ, baʼaxeʼ utiaʼal le máax túuxtenoʼ» (Juan 7:16). Jesúseʼ u yojel Jéeobaeʼ u kʼáat ka ojéeltaʼak baʼax ken u beet u Reino.

17. 1) ¿Tuʼux kaʼansajnaj Jesús? 2) ¿Baʼaxten tu xupuba u kaʼans u maasil?

¹⁷ ¿Tuʼux kaʼansajnaj Jesús? Jeʼel tuʼuxak yaan máakeʼ: tiʼ mejen kaajoʼob, nukuch kaajoʼob, kʼíiwikoʼob, temploʼob yéetel tu yotoch le máakoʼoboʼ. Letiʼ kaxt le máakoʼoboʼ, maʼ chéen kulaj u páaʼtoʼobiʼ (Marcos 6:56; Lucas 19:5, 6). Kex yaan kʼiin kaʼanaʼaneʼ jach tu xupuba u kaʼans le máakoʼoboʼ. ¿Baʼaxten? Tumen jach ku yuʼubik u tʼaan u Taata; u yojel letiʼe baʼax u kʼáat ka u beetoʼ (Juan 8:28, 29). Tu tsikbaltaj xan u tʼaan Dios tiʼ le máakoʼoboʼ tumen tu chʼaʼaj óotsilil tiʼob (xok Mateo 9:35, 36). Tu yileʼ u nuuktakil le religiónoʼoboʼ maʼ táan u kaʼanskoʼob u jaajil yoʼolal Diosiʼ. Le oʼolal taakchaj u tsikbaltik tiʼ tuláakal máak baʼax ken u beet u Reino Dios.

18. ¿Baʼax modosil uts ta wich tiʼ Jesús?

¹⁸ Jesúseʼ jach tu yaabiltaj le máakoʼoboʼ yéetel tu yáantoʼob. Le oʼolal le máakoʼoboʼ jach uts tu tʼaan kaʼach u tsikbaloʼob tu yéetel. Tak mejen paalal ku náatsʼloʼob kaʼach tu yiknal (Marcos 10:13-16). Jesúseʼ mantatsʼ tu beetaj baʼax toj; u pʼeek u beetaʼal baʼax  kʼaas (Mateo 21:12, 13). Tu respetartaj xan le koʼoleloʼob kex suuk u mixbaʼalkúuntaʼaloʼob teʼ kʼiinoʼob jeʼeloʼ (Juan 4:9, 27). Jesúseʼ jach tu yeʼesaj kabal óolal. Juntéenjeakeʼ tu pʼoʼaj u yook u apóstoloʼob, kex le meyajaʼ chéen ku beetaʼal tumen esclavoʼob wa sirvienteʼob (Juan 13:2-5, 12-17).

19. ¿Baʼaxten k-aʼalik Jesúseʼ u yojel baʼax kʼaʼabéet tiʼ le máakoʼoboʼ yéetel u kʼáat u yáantoʼob?

¹⁹ Jesúseʼ u yojel baʼax kʼaʼabéet tiʼ le máakoʼoboʼ yéetel taakchaj u yáantkoʼob. Bey tu yeʼesil le ka tu tsʼakoʼob yéetel le páajtalil tsʼaʼantiʼ tumen Diosoʼ (Mateo 14:14). Juntéenjeakeʼ náatsʼ yiknal Jesús juntúul máak yaan lepra tiʼ, ka tu yaʼalaj: «Wa a kʼáateʼ jeʼel u páajtal a tsʼakikeneʼ». Jesúseʼ yaachaj u yóol ka tu yilaj bix u muʼyaj le máakoʼ. Tu chʼaʼaj óotsilil tiʼeʼ ka «tu tichʼaj u kʼabeʼ ka tu péetsʼkʼabtaj táan u yaʼaliktiʼ: ‹Teneʼ in kʼáat in tsʼakech. Utschajkech›». Tu séebaʼanil ka utschaji (Marcos 1:40-42). ¡Chéen tukult bix tu yuʼubiluba le máakoʼ!

20, 21. ¿Baʼaxten k-aʼalik Jesúseʼ mantatsʼ tu beetaj baʼax ku yaʼalik Jéeoba?

²⁰ Jesúseʼ tu yeʼesaj bix unaj k-uʼuyik u tʼaan Dios. Kex yaʼab baʼaloʼob tu aktáanteʼ chúukpaj u yóol u beet baʼax u kʼáat u Taata. Jeʼex le ka probartaʼab tumen Satanásoʼ maʼ kʼebanchajiʼ (Mateo 4:1-11). Yaan tiʼ u láakʼtsiloʼobeʼ maʼ tu creertoʼob wa letiʼ le Mesíasoʼ. Kʼuch tak u yaʼaloʼob «tsʼoʼok u chokotal u pool», baʼaleʼ Jesúseʼ maʼ xuʼul u meyajtik Diosiʼ  (Marcos 3:21). Ka beetaʼab u sen muʼyajeʼ chúukpaj u yóol u beet baʼax uts tu tʼaan Dios, maʼ tu sutaj u jeel le kʼaas beetaʼabtiʼoʼ (1 Pedro 2:21-23).

²¹ Kex yaj bix úuchik u muʼyaj yéetel u kíimileʼ Jesúseʼ maʼ xuʼul u beetik baʼax uts tu tʼaan Jéeobaiʼ (xok Filipenses 2:8). Chéen tukult bukaʼaj muʼyajnajik le kʼiin ka kíimoʼ: bisaʼab tumen le soldadoʼoboʼ, aʼalaʼab táan u pochʼik Dios, túuxtaʼab kíimsbil tumen kʼasaʼan juezoʼob, sen aʼalaʼab baʼal tiʼ, sen jaʼajatsʼaʼabi yéetel baʼaj teʼ cheʼoʼ. Kex beyoʼ le nukaʼaj kíimiloʼ tu kʼaʼam aʼalaj: «¡Tsʼoʼok u béeychajal tuláakal!» (Juan 19:30). Ka máan óoxpʼéel kʼiineʼ Jéeobaeʼ  tu líiʼsaj yéetel junpʼéel wíinklil maʼ tu páajtal u yilaʼal (1 Pedro 3:18). Ka máan wa jaypʼéel semanaʼobeʼ Jesúseʼ suunaj teʼ kaʼanoʼ ka «kulaj tu x-noʼoj kʼab Dios» u páaʼt u tsʼaʼabal u beet u Reyil (Hebreos 10:12, 13). 

22. ¿Baʼax jeʼel k-kʼamik úuchik u chúukpajal u yóol Jesús u beet baʼax u kʼáat Jéeoba?

²² Jesúseʼ mantatsʼ tu yuʼubaj u tʼaan u Taata, yoʼolal leloʼ jeʼel u páajtal k-kuxtal tiʼ junpʼéel paraíso jeʼex u kʼáat Jéeoba desde ka tu beetaj wíinikoʼ. Tuláakʼ xookoʼ yaan k-ilik baʼaxten jeʼel k-kʼamik kuxtal minaʼan u xuul úuchik u kíimil Jesúsoʼ.