1, 2. (a) Nal ba ama edi mu e teiur hehalal ba hebeli daliela? (b) Nalawuhe tebusan mu Allah de mipidi ba hebeli kul daliela?

NALKANG teiwuda he ama edi? Nal ba ama edi mu wal kul hebeli daliela na. Haba nal ba ama edi omi mikang diy, namati hedi mu nal nuku ba e kul o hiyeng te ya hedi e hekang wofang.

² Nal karikarnuku ba Allah de mipidi nuku he kul po hiyeng te, ba miy afena mihapieti. Heiopi nal ba hebeli kul daliela he Allah de miy amakang heri. Pasal opi homi mia pi miwosakolah Yehuwa dewil neng Yesus Kristus habot sai ba pi birang mihalor kang. (Mihalal Matius 20:28.) Yehuwa de Yesus habot buku tau sai ba tebusan hedi, opi dewotiyeng diy ba Yehuwa mu de amakang mihiyena.

3. Nalawuhe amakang mong?

³ Tebusan mu lela nuku Yehuwa de paneni ba, amakang de hasalah ya mong tanitang do hiring amoni. (Efesus 1:7) Pomong ba pi hiyeng nalawuhe tebusan mu pi wobutuh, heimu tung ribi mihapieti ba nala he taman Eden midaleki pi kul hiyeng te. Pi ketafala ahola, Adam ya Hawa de hasalah mihayei. De hasalah wuhe de mong. Pidi bay pi mong mbeimu Adam ya Hawa hehasalah dopi iti wuhe.​—Hehalal Catatan Hewosik 9.

4. Adam mu ya nala he hopa?

⁴ Leng heimia ba Yehuwa de amakang ahola Adam paneng  de nalkang nuku miy hedi. Birang ba kulrofi Allah de hedi. Hetanut ya he isi mu kulrofi. Dewal hafiy na, dewal fingketa diy na, ya dewal mong na. Yehuwa he, hei paneni hare hedosama Allah mu hema wuda. (Lukas 3:38) Yehuwa leng kopang de Adam hadabesar hemayasing. Nala he Allah domaha Adam de mipaneng, he falaka Allah dewohokafang diy, ya awang kang bay de miy Adam hedi.​—Kejadian 1:28-30; 2:16, 17.

5. Surah Rieling dewofang ”Allah damo puna Adam paneni”. He arti mu nala?

⁵ Adam ”Allah hamo” he puna hei paneni diy. (Kejadian 1:27) Adam he sifat-sifat bay Allah hei wuda, hedosama, kang, tanut daliela, rofi hapuna ya kuasa. Nala he Adam domaha ba mipaneng Allah de habot ba he dong ahiy. Adam mu wal robot wuda na. Heiopi mu kang ya beka hei deinal woheinuk miy kang. Hare asing mia Adam de miahiy ba de Allah heluk birang mihalor ba Firdaus mia de hiyeng kang.

6. Adam dewal Allah heluk na hedimia nala he de hanawi? Hewohaluol nala he pi hadatareu diy?

⁶ Hare heimia Adam dewal Allah heluk na wuhe Allah de hukuman heri ba de mong, hebeli kul daliela hu Adam de wowawi. Yehuwa dilia hanaisena mia ba kulkang nawi, birang ba kulrofi ya hetofa Firdaus bay nawi. (Kejadian 3:17-19) Adam ya Hawa de miahiy ba wal Allah heluk na hare heworumai nahani mu walna. Nala he Adam de mipaneng wuhe, ”ruli taha mia hasalah mu la ama nuku wala peisiyei ba heimu mong, hasalah opi wuhe, mong tanitang amakang dotafuda hadatareu mbeimu dotafuda hasalah paneni”. (Roma 5:12) Adam dong hasalah mihayei wuhe dedi ya pidi de ”balik” ba hasalah ya mong tanitang hehui. (Roma 7:14) Pi worumai dar hadoa rena? Rofi, dar hadoa.

7, 8. Tebusan mu nala?

 ⁷ Tebusan mu nala? Tebusan mu heiyeri nal ayoki. Nuku, Tebusan mu nal hebeli ba wowau ba ama hado hiring amoni diy, namati wai mihawai nal nuku bel kang. Ayoki, Tebusan opi mu nal hebeli wowawi ba mi nal nuku hebeli wosiyer.

⁸ Hasalah lea ba Adam de peisiyei mu pidi bay pi hadatareu, haba amakang nuku bay hasalah ya mong tanitang hedi de wowau beka. Haba Yehuwa de lela tihiri ba hasalah ya mong tanitang mu po hiring amoni. Mie pi wosakolah lateiur te Yehuwa de tebusan opi paneng ya hekang nala he mipidasama.

9. Tebusan mu nala he puna wowawi?

⁹ Birang kulrofi ba Adam de hanau pinaisena mia ama nuku bay de wowau beka. Nalawuhe beka? Heimu potafuda wal ama rofi na. (Mazmur 49:7, 8) Birang ba nawi mu birang kulrofi hare wowau bay birang kulrofi he puna wowau te. Heiwuhe wofang tebusan ba ”ladosama”. (1 Timotius 2:6) Tebusan hefaring mu hedosama birang kulrofi ba Adam de hanau wuda.

10. Yehuwa de lateiur tebusan paneng?

¹⁰ Yehuwa de lateiur tebusan paneng? Yehuwa dewil neng ba dekul mihiyena de habot buku tau sai. Wil neng hedi mbeimu Yesus, Allah hatang pakang ahola. (1 Yohanes 4:9, 10) Yesus domaha Dema ya de yera ba mar surga mia de doiti. (Filipi 2:7) Yesus hebirang ba mar surga mia Yehuwa de miy buku opi do tau sai, ya Yesus hamani diy ba de ama ba kulrofi dewal hasalah na.​—Lukas 1:35.

11. Lateiur ama nuku de amakang faring he hasalah wowawi kang?

¹¹ Amakang ahola ba Adam dewal Allah heluk na, hare he birang ba kulrofi nawi diy hetayek hetamang  wei bay hadou. Na amakang nuku hadoa ba mong tanitang ba Adam hetayek hetamang wei de hadatareu de hanau kang? Rofi. (Mihalal Roma 5:19.) Yesus dewal hasalah mipaneng na, haba domaha de birang ba kulrofi de puna tebusan heri. (1 Korintus 15:45) De birang kulrofi de puna miy mong tanitang ba Adam hetayek hetamang wei de hadatareu hanau.​—1 Korintus 15:21, 22.

12. Nalawuhe Yesus de bekatafiela faring hadatareu?

¹² Surah Rieling de hareng bileng Yesus de dar mong na de nal bekatafiela faring hadatareu. Ama domi kilikil hei cambuk, ama bata tuku mi hatel tilaki diy ya de bekatafiela tau mong diy. (Yohanes 19:1, 16-18, 30) Nalawuhe Yesus dekul bekatafiela faring hadatareu? Heimu Iblis dewal worumai na ama nuku de bekatafiela hadatareu de dar Allah heluk. Yesus de wotiyeng diy, amakang ba kulrofi dekul-kul bekatafiela hadatareu haba de Allah heluk kang. Wotanut, Yehuwa de Yesus hehalal mu dekul wodeikang!​—Amsal 27:11; hehalal Catatan Hewosik 15.

13. Lateiur tebusan wowau?

¹³ Lateiur tebusan opi wowau? Heiopi 14 Nisan, tung 33 M ama Yahudi he kalender haluol Yesus he birang ba kulrofi de miy pi hasalah wosiyer, minuku ba mihalor. (Ibrani 10:10) Leng mi sua Yehuwa deng habirang diy wala he isi amakang puna mihabirang na haba he isi simoi he puna mihabirang diy, hewohaluol de dawai surga yai dema hopa mia he birang kulrofi ba he beli daliela de tebusan hedi ba de miy Yehuwa hatana mi iy. (Ibrani 9:24) Yala tebusan opi wowawi diy wuhe pi leng ba hasalah ya mong tanitang po hiring amoni.​—Mihalal Roma 3:23, 24.

14, 15. Nala he kul pi mipaneng te pi hasalah de wodafang?

¹⁴ Korban tebusan mu nalkang ba Allah de mipidi, hekang pi hiyeng kang. Mie pi wosakolah hekang mu yala ya ariy falaka pi lateiur hiyeng.

¹⁵ Hasalah wotafang. Yala opi leng kopang pi nal kang paneng mu wal terai na. Pi pak pi paneng ya pi loring mani hasalah he pi mipaneng. (Kolose 1:13, 14) Lateiur Allah de pi hasalah wodafang? Hasalah ba pi mipaneng tomi rofi wotarang ba wal mipaneng na, ya pi tomi damasing puna ba Yehuwa hafang de pi hasalah wodafang. Pi heiur mipaneng pi worumai kang ba pi hasalah Allah de wodafang.​—1 Yohanes 1:8, 9.

16. Nala he pi mipaneng te tomi kiding de sani?

¹⁶ Pi tomi kiding ba sani hadoa. Pi hasalah nuku mipaneng pi tomi kiding de teihasalah ping pomahia pong wal rofi na, ya pi worumai bay ngwalna. Haba mitarang na. Pi Yehuwa hafang ba de pi hasalah wodafang, pi worumai de womahiya ya pi hasalah de wodafang kang. (Ibrani 9:13, 14) Yehuwa domaha bekatafiela ya hasalah wei ba pi mipaneng pi doa puna wohokafang. (Ibrani 4:14-16) Hekang mu rama amoni Allah de mipir.

17. Yesus de mong mipidasama oweni nala he pi hiyeng kang?

¹⁷ Pi worumai ba birang mihalor Firdaus mia. ”Hasalah he wowau mu mong tanitang, haba nala he Allah de mipidi heimu birang mihalor ba Yesus Kristus pi Tuan.” (Roma 6:23) Yesus de mong wuhe pi birang mihalor kang ya wal tarik tafiy na. (Penyingkapan 21:3, 4) Haba nala he pi mipaneng te oweni opi pi hiyeng kang?

18. Pi lateiur hiyeng ba Yehuwa mu de mipiyena?

¹⁸ Ama nuku de nalkang nuku edi ko omi kul mikang mihamol. Tebusan mu nalkang nuku wuda ba nal karikarnuku hanaisena mia, ya heimu pi tukai Yehuwa hekang wofang te. Yohanes 3:16 dewobesar ba ”Allah mu dekul amakang mihiyena wuhe dewil neng nuku wala haba de mipidi”. Rofi, Yehuwa dekul mipiyena wuhe dewil mu de habot sai, ya pidi bay pi hiyeng ba Yesus mu de mipiyena wuhe domaha moni ba mipidasama diy. (Yohanes 15:13) Tebusan mu de mitarumai ba Yehuwa ya Yesus mu dekul mipiyena.​—Galatia 2:20.

19, 20. (a) Pi lateiur Yehuwa hemokeni kang diy? (b) E lateiur wotiyeng diy ba Yesus he moni opi e hepaniy?

¹⁹ Yala ong wosakolah ba Allah dekul mi iyena, hare nala he e mipaneng te e hemokeni kang diy? Ama ba e wal hiyeng na mu e mihiyena beka. Yohanes 17:3 dewofang pi Yehuwa hiyeng kang. Heiopi e mipaneng, e kang ba Yehuwa mihiyena mu tukai rumai diy o maha homi hado kang, ya e o maha e he mokeni diy, hare Yehuwa hei ya he Surah Rieling mu e wosakolah iti te.​—1 Yohanes 5:3.

²⁰ Worumai ba mi Yesus he korban tebusan mihadasama te. Surah Rieling dewofang ba ”mahe hewil neng he korban tebusan worumai birang mihalor de hiyeng kang”. (Yohanes 3:36) Pi worumai pi wotiyeng diy mu he arti nala? Heimu nala he Yesus de wopidasakolah ba pi mipaneng, pi kul mipaneng te. (Yohanes 13:15) Pi wofang ba pi Yesus hei worumai mani mu beka. Korban tebusan hekang pi hiyeng temati, nala he pi mipaneng pi worumai wuda te. Yakobus 2:26, pi mihalal  dewofang, ”Worumai haba wal mipaneng na heimu mona.”

21, 22. (a) Nalawuhe tung kopang peringatan ba Yesus mi moni opi pi haluol iti? (b) Pasal 6 ya 7 nala he pi wai wosakolah?

²¹ Peringatan ba Yesus mimoni mu siye te. Akuni ba Yesus dara mong na, de wotadasakolah ba leng ba de moni opi mu pi mipaneng te. Tung kopang pi mipaneng, heiwuhe heiopi hana peringatan , namati ”Perjamuan malam Tuan”. (1 Korintus 11:20; Matius 26:26-28) Yesus he birang ba kulrofi de tebusan heri ba mipidi domaha wopimunang te. Dewofang ba, ”Heiopi mu ri mipaneng iti ba ri nei worimunang.” (Mihalal Lukas 22:19.) Heleng ba de mimoni mia e siye heimu dewotiyeng diy ba korban tebusan ya kang ba kul lea ba Yehuwa ya Yesus de mipidi mu e woamunang wuhe.​—Hehalal Catatan Hewosik 16.

²² Tebusan mu nal ba kul hebeli daliela ba pi hiyeng kang. (2 Korintus 9:14, 15) Nalkang opi ama jutaan ba moni wei bay hekang de hiyeng kang nahani. Pasal 6 ya 7 de wobesar nal hedi de lateiur midalek.