1, 2. 1) ¿Kunjamas mä suma regalojja? 2) Jesusar aka oraqer khitanitapajja, ¿kunatsa Jehová Diosan mä jachʼa regalopajja?

 ¿JUMAJJ mä suma regalo katoqerïtati? Kunatï jiwasatak wakiski uk regalapjjestu ukhajja, wal yuspärtanjja. Mä regalojj wal kusisiyistu ukhajja, wali valoranitwa uñjaraktanjja.

² Diosajj walja regalonak churistu. Ukanakat sipansa, kunatï jiwasatak wali wakiskirïki uka jachʼa regalwa Diosajj churistu. Jupajja Jesucristo Yoqaparuw wiñay jakañanïñasatakejj khitani. Uka toqetwa aka yatichäwin yatjjatañäni (Mateo 20:28 liytʼañataki). Diosajja jaqenakar juchat kutsuyañatakiw Jesusarojj aka oraqer khitanïna, ukanwa jiwasar munasitapajj qhan amuyasi.

3. ¿Kunatsa jaqenakajj jiwtanjja?

³ Jehová Diosajja, juchampita jiwañampit kutsuyasaw jaqenakarojj salvistu (Efesios 1:7). Juchampita jiwañampit kutsuyatäñasajj kunatsa munasïna uk sum amuytʼañatakejja, kunas Edén jardinan nayrajj pasäna uk yatjjatañasawa. Adán nayrïr awkisampi Eva nayrïr taykasampiw juchachasipjjäna. Ukham juchachasipjjatap laykuw jiwapjjarakïna. Jiwasajj Adanampi Evampitwa juch katoqtanjja, ukatwa jiwaraktanjja (9 qhanañchäwi uñjjattʼäta).

4. ¿Khitïnsa Adán chachajja, kuna suma regalsa Diosat katoqäna?

⁴ Jehová Diosajj Adán sat nayrïr chachar luräna ukhajja, mä suma regalo jupar churäna. Diosajja Adanarojj jan juchan luräna. Adanan amuyupasa cuerpopasa perfectönwa,  ukhamajj janiw usuntkaspänti, ni chuymankipstkaspänsa, ni jiwkaspänsa. Niyakejjay Jehová Diosajj Adanar lurchïnjja, jupaw Awkipänjja (Lucas 3:38). Diosajj Adanampejj parlapunirïnwa, kunsa lurañapäna ukjja sum qhanañchäna, mä suma trabajo churarakïna (Génesis 1:28-30; 2:16, 17).

5. Diosajj “jupar uñtasitwa” Adanarojj luräna sasajja, ¿kunatsa Bibliajj sispacha?

⁵ Diosajja “jupar uñtasitwa” Adanarojj luräna (Génesis 1:27). Mä arunjja, Adanajj Jehová Diosjam chuyman luratänwa, ukatwa jupajj munasiri, yatiñani, cheqapar uñjiri, chʼamani ukhamänjja. Maysa toqetjja, Diosajja Adanarojj jupa pachpa kun lurañsa ajllir luräna. Adanajj janiw mä maquinjamäkänti, jan ukasti kunatï walïki kunatï jan walïkaraki uk lurañjja jupa pachpaw ajllispäna. Adanatï Diosar istʼañ ajllispäna ukhajja, wiñayatakiw Paraison jakasispäna.

6. 1) Diosar jan istʼasajja, ¿kunanaksa Adanajj aptʼasïna? 2) Adanan juchachasitapatjja, ¿kunjamansa uñjastanjja?

⁶ Adanajj Diosar jan istʼatapatjja, juchañchataw uñjasïna, ukhamatwa Jehová Diosampi sum apasiñsa, jan juchanïñsa, Paraison suma jakasiñsa aptʼasïna (Génesis 3:17-19). Adanampi Evampejj Diosar jan istʼañwa ajllipjjäna, ukhamajj janiw jupanakajj Paraison wasitat jakjjapjjaniti. Adanan juchachasitapatwa “juchajj akapachar mantani, jiwañajj uka juchan utjatapatwa mantaniraki, ukhamatwa jiwañajj taqe jaqenakar katunti, taqenin juchachasipjjatap layku” (Romanos 5:12). Juchachasisajja, juchampina jiwañampina esclavoparuw Adanajj ‘aljantasïna’, jiwasarus ukhamarakiw aljantawayistu (Romanos 7:14). Ukhamäkipansa, ¿jiwasajj paraíso oraqen jakassnati? Jïsa, Jehová Diosaw juchampit jiwañampit kutsuyistu.

7, 8. ¿Kunjamsa maynirojj juchat kutsuyasispa?

 ⁷ ¿Kunjamsa maynirojj juchat kutsuyasispa? Mä katuntat jaqer antutayañatakejja, mä precio pagañaw wakisispa. Jan ukajja maynin jan wali luratapat perdonasiñapatakejja ukhat ukha mä precio pagañaw wakisirakispa.

⁸ Adanan juchachasitapatjja, taqeniw juchampiru jiwañampir katuyatätanjja, janiw khiti jaqes ukatjja kutsuykistaspati. Ukampis Jehová Diosaw juchampita jiwañampita kutsuyatäñasatakejj yanaptʼistu. Jichhajja, kunjamsa Diosajj juchat kutsuyistu, kuna bendicionanaksa katoqsna uk yatjjatañäni.

9. ¿Kunjamatsa jaqenakarojj juchat kutsuyasispäna?

⁹ Adanajj jan juchani jakasiñwa aptʼasïna, janiw jiwasat khitisa kuntï Adanajj aptʼkäna uk kutsuykaspänti. ¿Kunatsa? Taqeniw juchanïtanjja (Salmo 49:7, 8). Jaqenakar juchampita jiwañampit kutsuyañatakejja, jan juchani mä perfecto jaqew munasïna. Jupakiw jakañap “ukhat ukha” churaspäna (1 Timoteo 2:6). Ukhamajja jaqenakar juchat kutsuyañatakejja, Adanjam mä perfecto jaqew munasïna.

10. ¿Kunsa Jehová Diosajj jaqenakar juchat kutsuyañatakejj luräna?

¹⁰ ¿Kunsa Jehová Diosajj jaqenakar juchat kutsuyañatakejj luräna? Wali munat Yoqaparuw aka oraqer khitanïna. Uka Yoqapajj Jesusawa, juparuw Diosajj nayraqat luräna (1 Juan 4:9, 10). Awkipar jaytasinjja, Jesusajj taqe chuymaw alajjpachat aka oraqer jutäna (Filipenses 2:7). Jehová Diosajja, María tawaqon purakaparuw Yoqapan jakäwip uchäna, ukhamatwa Jesusajj perfecto jaqjam aka oraqen nasïna (Lucas 1:35).

11. ¿Kunjamatsa mä sapa jaqejj taqe jaqenakar juchat kutsuyaspäna?

¹¹ Jehová Diosar jan istʼasajja, Adanajj taqe jaqenakaruw  juchampiru jiwañampir aptʼäna. Ukhamasti jaqenakar juchampita jiwañampit kutsuyir mä jaqejj ¿utjaspänti? Jïsa (Romanos 5:19 liytʼañataki). Jesusaw jaqenakar juchat kutsuyañatakejj perfecto jakäwip sacrificiot loqtäna, jupajj janipuniw juchachaskänti (1 Corintios 15:45). Ukhamasti jupaw jakäwipampejj Adanan taqe wawanakaparojj jiwañat kutsuyistu (1 Corintios 15:21, 22).

12. ¿Kunatsa Jesusajj wali tʼaqesiyat uñjasïna?

¹² Janïr jiwayatäkasajja, Jesusarojj wal tʼaqesiyapjjäna sasaw Bibliajj qhanañchi. Jan sinttʼasisaw Jesusar wal jawqʼjapjjäna, mä tʼaqesiñ lawaruw chʼakkatapjjarakïna, ukanwa wali tʼaqesiyat jiwäna (Juan 19:1, 16-18, 30; 15 qhanañchäwi uñjjattʼäta). ¿Kunatsa Jesusajj tʼaqesiyat uñjaspachäna? Amtañäni, mä jaqejj jan walinakan uñjasisajj Diosat jitheqtaspawa sasaw Supayajj säna. Ukampis Jesusajja, mä perfecto jaqejj sinti jan walinakan uñjaskasasa janiw Diosat jitheqtkaspati ukwa uñachtʼayäna. Jehová Diosajja, Jesusar jupat jan jitheqtir uñjasajj ¡walpun kusispachäna! (Proverbios 27:11).

13. ¿Kunjamsa Jesusajj juchat kutsuyistu?

¹³ ¿Kunjamsa Jesusajj juchat kutsuyistu? Jupajj perfecto jakañapwa Awkipar churäna. ¿Kunjamsa uk luräna? Jesusajj 14 de nisán, 33 maranwa jiwäna. Jehová Diosajj janiw Jesusarojj enemigonakapat jarkʼaqkänti (Hebreos 10:10). Kimsa urutsti, Diosaw Jesusar jaktayjjäna. Juparojj janiw jañchi cuerpon jaktaykänti, jan ukasti mä espíritu cuerponwa jaktayäna. Qhepatjja, Jesusajj Awkipan ukaruw alajjpachar kuttʼjjäna, ukanwa jan juchani jakañap Jehová Diosar churjjäna (Hebreos 9:24). Ukhamatwa Jesusajj juchampita jiwañampita kutsuyistu (Romanos 3:23, 24 liytʼañataki).

14, 15. ¿Kunsa perdonatäñatakejj lurañasa?

¹⁴ Diosan wali valorani regalopat walja yanaptʼanakwa katoqtanjja. Jesusan jiwatapajj kunjamsa jichhürunakan yanaptʼistu, jutïrinsa kunjamsa yanaptʼistani ukanakat jichhajj yatjjatañäni.

¹⁵ Juchanakasajj perdonatawa. Kunatï walïki uk lurañajj chʼamakiwa, pantjasiñajj utjakipuniwa, awisajj arumpisa luratanakampisa juchachastanwa (Colosenses 1:13, 14). Ukhamajj ¿kunjamatsa perdonatäsna? Juchanakasatjja taqe chuymaw arrepentisiñasa, humilde chuymampirakiw Jehová Diosar perdón mayisiñasa. Ukhamtï lurañänejja, Jehová Diosajj juchanakas perdonatapatjja janiw pächaskañäniti (1 Juan 1:8, 9).

16. ¿Kunsa suma conciencianïñatakejj lurañasa?

¹⁶ Suma conciencianïtanwa. Chuymasajja jan ukajj concienciasajj jan wali luratasat juchañchistu ukhajja, wali juchanïksnasa, janis kuna suytʼañas utj-jjaspa, janis kunatakis walïksna ukham amuyassna. Ukampis janiw aynachtʼañasäkiti. Jehová Diosarutï taqe chuyma perdón mayisiñäni ukhajja, jupajj istʼistaniwa, perdonarakistaniwa janiw uka toqet pächasiñasäkiti (Hebreos 9:13, 14). Jehová Diosajja, taqe llakinakassa pantjasitanakassa jupar yatiysna ukwa muni (Hebreos 4:14-16). Ukhamatakwa Diosampejj sumankañäni.

17. Jesusan jiwatapatjja ¿kuna bendicionanakas utjani?

¹⁷ Wiñay jakañwa katoqañäni. “Kuntï juchajj pagot churki ukajj jiwañawa, kuntï Diosajj Cristo Jesús Tatitus taypi ukhamak churki ukajja wiñay jakañawa” (Romanos 6:23). Jesusan jiwas layku jiwatapatjja wiñayaw jakasiñäni, janirakiw usuntañas utj-jjaniti (Apocalipsis 21:3, 4). ¿Kunsa uka bendicionanak katoqañatakejj lurañasa?

18. Jehová Diosajj jiwasar wal munasistu, ¿kunjamatsa uk yattanjja?

¹⁸ Mä suma regalo katoqasajj wal kusisirïpachätajja. Taqe regalonakat sipansa Jesusan jiwas layku jiwatapaw jukʼamp valoranejja, ukatwa Jehová Diosarojj wal yuspärañasa. Juan 3:16 qellqatanjja akham siwa: “Diosajj akapachar wal munatap laykuw mä sapa Yoqap churäna” sasa. Jehová Diosajj wal munasistu, ukatwa wali munat Yoqapar aka oraqer khitanïna. Jesusajj ukhamarakiw wal munasistu, ukatwa jiwas layku jiwäna (Juan 15:13). Jesusan jiwatapajja, Jehová Diosasa Jesusasa qhawqsa munasipjjestu ukwa uñachtʼayistu (Gálatas 2:20).

19. ¿Kunjamatsa Jehová Diosan amigopäsma?

¹⁹ Jehová Diosajj qhawqsa munasistu uk yatisajja, juparojj ukhamarakiw munasiñ muntanjja. Ukampis Diosar munasiñatakisa amigopäñatakisa nayraqatajj jupar jukʼamp uñtʼañaw wakisi. Ukatwa Juan 17:3 qellqatajj Jehová Diosar jukʼamp uñtʼañasatak chʼamañchistu. Jumatï Jehová Diosat jukʼampi yateqäta ukhajja jukʼampiw jupar munasïta, jupatakjam sarnaqañwa munarakïta, ukhamatwa Jehová Diosan amigopäjjäta. Ukhamajj Bibliat yatjjataskakim, ukhamatwa Jehová Diosar jukʼamp uñtʼäta (1 Juan 5:3).

20. ¿Kunjamsa Jesusan jiwatapat yuspärsna?

²⁰ Jesusan jiwatapat yuspärapjjañäni. Biblianjja siwa: “Yoqar confiyki ukajja, wiñay jakañwa katoqani” sasa (Juan 3:36). ¿Kunjamsa ‘Yoqar confiyatas’ uñachtʼaysna? Ukatakejja Jesusan yatichäwinakaparjam sarnaqañasawa (Juan 13:15). Janiw aru mayakejj Jesusar creytwa sasajj sañasäkiti, jan ukasti Jesusan jiwatapar confiyatasajj luratanakasanwa qhanäñapa. Santiago  2:26 qellqatajj siwa: ‘Diosar confiyañajj jan luräwinakanïki ukhajj jiwatawa’ sasa.

21, 22. 1) ¿Kunatsa sapa marajj Jesusan jiwatap amtir sarañasa? 2) ¿Kuna toqetsa 6, 7 yatichäwinakan yatjjatañäni?

²¹ Jesusan jiwatap amtir sarañasawa. Janïr jiwayatäkäna uka arumajja, Jesusajj jiwatap amtañatakiw arkirinakapar chʼamañchtʼäna. Jupar istʼasajja, jiwasajj sapa maraw Jesusan jiwatapa, mä arunjja “Tatitun Cenapa” amttanjja (1 Corintios 11:20; Mateo 26:26-28). Jesusajja juchat kutsuyañatakejj jan juchani jakañapwa churäna, jupajj uk amtañaswa muni, ukatwa akham säna: “Akjja nayat amtasisin lurapjjam” sasa (Lucas 22:19 liytʼañataki). Jesusan jiwatap amtir sarasajja, jiwatapat yuspäratasa, Jehová Diosampi Jesusampejj qhawqsa munasipjjestu uk amtataswa uñachtʼaytanjja (16 qhanañchäwi uñjjattʼäta).

²² Jesusajja juchampita jiwañampitwa kutsuyistu, ukajj Jehová Diosan wali jachʼa regalopawa (2 Corintios 9:14, 15). Jehová Diosan uka jachʼa regalopajja, walja millón millón jiwatanakaruw yanaptʼani. Uka toqetwa 6, 7 yatichäwinakan yatjjatañäni.