1, 2. (a) Paano nagigin mahalaga sa saimo an sarong regalo? (b) Taano ta an pantubos an pinakamahalagang regalo sa sato nin Diyos?

ANO an pinakamagayon na regalo na itinao saimo? Dai man kaipuhan na magin mahal an sarong regalo para magin mahalaga iyan sa saimo. Kun an regalo nakakapaugma saimo o talagang kaipuhan mo, ipagpapasalamat mo iyan.

² Sa gabos na regalong itinao sa sato nin Diyos, igwa nin saro na pinakakaipuhan ta. Iyan an pinakamahalagang regalo nin Diyos sa mga tawo. Sa kapitulong ini, manunudan niyato na isinugo ni Jehova an saiyang Aking si Jesu-Cristo para mabuhay kita nin daing sagkod. (Basahon an Mateo 20:28.) Paagi sa pagsugo ki Jesus sa daga bilang pantubos, pinatunayan ni Jehova na talagang namumutan niya kita.

3. Taano ta nagagadan an mga tawo?

³ An pantubos iyo an paaging ginamit ni Jehova tanganing makabutas kita sa gapos nin kasalan asin kagadanan. (Efeso 1:7) Para masabutan kun taano ta kaipuhan an pantubos, kaipuhan nguna niyatong maaraman an nangyari sa hardin nin Eden pirang ribong taon na an nakaagi. Nagkasala an satong inot na mga magurang na si Adan asin Eva. Huli kaiyan, nagadan sinda. Nagagadan man kita huling nagmana kita nin kasalan hali ki Adan asin Eva.—Hilingon an Dagdag na Impormasyon 9.

4. Siisay si Adan, asin ano an itinao nin Diyos sa saiya?

 ⁴ Kan lalangon ni Jehova an inot na tawo, si Adan, tinawan Niya ini nin sarong mahalagang marhay na regalo. Tinawan Niya si Adan nin perpektong buhay. Igwa siya nin perpektong hawak asin isip. Dai siya magkakahilang, dai siya magurang, asin dai siya magagadan. Si Jehova an naglalang ki Adan kaya masasabing ama niya si Jehova. (Lucas 3:38) Pirming nakikipag-ulay si Jehova sa saiya. Malinaw na ipinaliwanag nin Diyos ki Adan an mga inaasahan Niya saiya asin tinawan Niya siya nin nakakaugmang trabaho.—Genesis 1:28-30; 2:16, 17.

5. Ano an buot sabihon kan sinasabi sa Bibliya na linalang si Adan uyon ‘sa ladawan nin Diyos’?

⁵ Linalang si Adan uyon ‘sa ladawan nin Diyos.’ (Genesis 1:27) Ginibo siya ni Jehova na may mga karakteristiko na kapareho Niya, arog nin pagkamuot, kadunungan, hustisya, asin kapangyarihan. Tinawan niya si Adan nin deretso na gumibo nin sadiring desisyon. Bakong robot si Adan. Linalang siya nin Diyos na may kakayahan na pumili na gibuhon an tama o sala. Kun nagsunod si Adan sa Diyos, mabubuhay kutana siya sa Paraiso nin daing sagkod.

6. Ano an naiwara ni Adan kan suwayon niya an Diyos? Ano an epekto kaini sa sato?

⁶ Kan suwayon ni Adan an Diyos asin masentensiyahan siya nin kagadanan, dakulaon nanggad an naiwara niya. Naiwara niya an espesyal na relasyon niya ki Jehova bilang amigo, an saiyang perpektong buhay, asin an saiyang Paraisong istaran. (Genesis 3:17-19) Pinili ni Adan asin Eva na suwayon an Diyos, kaya mayo na sindang paglaom. Dahil sa ginibo ni Adan, “an kasalan luminaog sa kinaban asin an kagadanan paagi sa kasalan, asin sa siring an kagadanan luminakop sa gabos na tawo huling sinda gabos nagkasala.” (Roma 5:12) Kan magkasala si Adan, “ipinabakal” niya an saiyang sadiri, pati na kita, na magin uripon nin kasalan  asin kagadanan. (Roma 7:14) Igwa pa daw kita nin paglaom? Igwa.

7, 8. Ano an pantubos?

⁷ Ano an pantubos? May duwang panginot na bagay sa ideya nin pantubos. Inot, an pantubos iyo an kantidad na ibinabayad para butasan an sarong tawo o balukaton an sarong bagay. Ikaduwa, an pantubos iyo an kantidad na pantapar, o pambayad, sa danyos.

⁸ Mayong tawo an makakabayad sa grabeng danyos na ginibo ni Adan kan magkasala siya, na nagresulta nin kagadanan sa sato. Pero nagtao si Jehova nin paagi para makabutas kita sa gapos nin kasalan asin kagadanan. Aramon ta kun paano itinao an pantubos asin kun paano kita makikinabang diyan.

9. Anong klaseng pantubos an kaipuhan?

⁹ Mayo sa sato an puwedeng magin pantubos para mabayadan an perpektong buhay na naiwara ni Adan. Taano? Huling gabos kita bakong perpekto. (Salmo 49:7, 8) Dapat perpektong buhay man an ibabayad na pantubos. Kaya inaapod iyan na “katimbang na pantubos.” (1 Timoteo 2:6) An pantubos dapat na kaparehong halaga kan buhay na naiwara ni Adan.

10. Paano itinao ni Jehova an pantubos?

¹⁰ Paano itinao ni Jehova an pantubos? Isinugo ni Jehova sa daga an saiyang pinakanamumutan na Aki. An Aki niyang ini na si Jesus an pinakainot niyang linalang. (1 Juan 4:9, 10) Handang bayaan ni Jesus an saiyang Ama asin an saiyang istaran sa langit. (Filipos 2:7) Ibinalyo ni Jehova an buhay ni Jesus hali sa langit pasiring sa daga, asin namundag si Jesus bilang perpektong tawo, na mayong kasalan.—Lucas 1:35.

11. Paano puwedeng matubos kan sarong tawo an gabos?

¹¹ Naiwara kan inot na tawong si Adan an perpektong buhay  para sa gabos na tawo kan suwayon niya si Jehova. Igwa pa daw nin ibang tawo na makakapagligtas sa mga aki ni Adan sa kagadanan? Igwa. (Basahon an Roma 5:19.) Si Jesus dai nuarin man nagkasala kaya puwede niyang itao an saiyang perpektong buhay bilang pantubos. (1 Corinto 15:45) Paagi kaini, puwedeng mailigtas sa kagadanan an gabos na aki ni Adan.—1 Corinto 15:21, 22.

12. Taano ta kaipuhan pa ni Jesus na magsakit nin grabe?

¹² Sinasabi kan Bibliya kun gurano kasakit an inagihan ni Jesus bago siya nagadan. Daing hirak siyang linatigo, ipinako sa hariging pasakitan, asin nagtios nin grabeng kulog sagkod na magadan. (Juan 19:1, 16-18, 30) Taano ta kaipuhan pa ni Jesus na magsakit nin grabe? Huli sa sahot ni Satanas na mayong tawo na padagos na magigin maimbod sa Diyos pag mag-agi ini nin grabeng kasakitan. Pinatunayan ni Jesus na kaya kan sarong perpektong tawo na magin maimbod sa Diyos dawa pa mag-agi siya nin grabeng pagsakit. Siguradong ugmahon na marhay si Jehova ki Jesus!—Talinhaga 27:11; hilingon an Dagdag na Impormasyon 15.

13. Paano ibinayad an pantubos?

¹³ Paano ibinayad an pantubos? Paagi sa pagtao ni Jesus sa saiyang Ama kan halaga kan saiyang buhay. Kan taon 33, Nisan 14 sa Judiong kalendaryo, itinugot ni Jehova na gadanon si Jesus kan mga kaiwal kaini. (Hebreo 10:10) Pakalihis nin tulong aldaw, binuhay ni Jehova si Jesus, bako bilang tawo kundi bilang sarong espiritung persona. Dangan, nagbalik si Jesus sa saiyang Ama sa langit tapos iprinesentar niya ki Jehova bilang pantubos an halaga kan saiyang perpektong buhay bilang tawo. (Hebreo 9:24) Ngunyan na naibayad na an pantubos, igwa na kita nin oportunidad na makabutas sa kasalan asin kagadanan.—Basahon an Roma 3:23, 24.

14, 15. Ano an dapat niyatong gibuhon tanganing mapatawad an satong mga kasalan?

¹⁴ Nakikinabang na kita sa pinakamahalagang regalo nin Diyos. Aramon ta kun paano kita nakikinabang ngunyan asin kun paano kita makikinabang sa maabot na panahon.

¹⁵ Napapatawad an satong mga kasalan. Bakong pirming pasil na gibuhon an tama. Nasasala kita, asin kun minsan nakakataram o nakakagibo nin bakong tama. (Colosas 1:13, 14) Ano an dapat tang gibuhon para mapatawad? Dapat na sinsero an pagbasol ta sa nagibo tang sala asin mapakumbabang makiulay ki Jehova na patawadon kita. Dangan makakapagtiwala kita na napatawad na an satong mga kasalan.—1 Juan 1:8, 9.

16. Ano an dapat niyatong gibuhon para magkaigwa nin malinig na konsiyensiya?

¹⁶ Puwede kitang magkaigwa nin malinig na konsiyensiya. Pag aram tang nakagibo kita nin sala, nakokonsiyensiya kita saka tibaad pagmati ta pa ngani mayo na kitang pag-asa asin mayo nang halaga. Pero dai mawaran nin paglaom. Kun makikimahirak kita ki Jehova para sa kapatawadan, makakasigurado kita na dadangugon asin papatawadon niya kita. (Hebreo 9:13, 14) Gusto ni Jehova na isabi niyato sa saiya an ano man na problema asin kaluyahan ta. (Hebreo 4:14-16) Bilang resulta, magkakaigwa kita nin marahay na relasyon sa Diyos.

17. Huling nagadan si Jesus para sa sato, anong mga bendisyon an puwede niyatong kamtan?

¹⁷ May paglaom kita na mabuhay nin daing katapusan. “An bayad nin kasalan iyo an kagadanan, alagad an regalo nin Diyos iyo an buhay na daing katapusan paagi ki Cristo Jesus na satuyang Kagurangnan.” (Roma 6:23) Huling nagadan si Jesus para sa sato, puwede kitang mabuhay nin daing sagkod, asin dai na kita magkakahilang. (Kapahayagan  21:3, 4) Pero ano an dapat niyatong gibuhon tanganing kamtan an mga bendisyon na iyan?

18. Paano ta naaraman na namumutan kita ni Jehova?

¹⁸ Isipon kun gurano ka kaugma kan may magtao saimo nin sarong magayon na regalo. An pantubos an pinakamahalagang regalo sa gabos, asin dapat sanang ipagpasalamat tang marhay iyan ki Jehova. Sinasabi sa sato kan Juan 3:16 na “an Diyos namuot na gayo sa kinaban kaya itinao niya an saiyang bugtong na Aki.” Iyo, namumutan kitang marhay ni Jehova kaya itinao niya an saiyang namumutan na Aking si Jesus. Asin aram ta na namumutan man kita ni Jesus, huling andam siyang magadan para sa sato. (Juan 15:13) Sinisigurado saimo kan regalong pantubos na talagang namumutan ka ni Jehova asin ni Jesus.—Galacia 2:20.

19, 20. (a) Ano an dapat mong gibuhon para magin amigo ka ni Jehova? (b) Ano an dapat mong gibuhon para ipahiling na inaako mo an atang na pantubos ni Jesus?

¹⁹ Ngunyan na naaraman mo na an manungod sa dakulaon na pagkamuot nin Diyos, ano an dapat mong gibuhon para magin amigo ka niya? Bakong madali na mamutan an saro na dai mo man midbid. Sinasabi kan Juan 17:3 na puwede niyatong mamidbid si Jehova. Mantang namimidbid mo siya, mas mamumutan mo siya, gugustuhon mo na mapaugma siya, asin magigin amigo ka niya. Kaya padagos na midbidon si Jehova paagi sa pag-adal nin Bibliya.—1 Juan 5:3.

²⁰ Akuon an atang na pantubos ni Jesus. Sinasabi kan Bibliya na “an nagtutubod sa Aki may buhay na daing katapusan.” (Juan 3:36) Paano ta maipapahiling na nagtutubod kita sa Aki? Dapat niyatong sunudon an mga itinukdo sa sato ni Jesus. (Juan 13:15) Bako iyan basta sana pagsabing nagtutubod kita ki Jesus. Para maipahiling na inaako ta an  pantubos, an satong pagtubod dapat na may kaibang gibo. Mababasa ta sa Santiago 2:26: “An pagtubod . . . na daing mga gibo gadan.”

21, 22. (a) Taano ta dapat kitang mag-atender sa Memoryal kan kagadanan ni Cristo kada taon? (b) Ano an pag-uulayan niyato sa Kapitulo 6 asin 7?

²¹ Mag-atender sa Memoryal kan kagadanan ni Cristo. Kan banggi bago si Jesus magadan, sinabi niya na girumdumon ta an saiyang kagadanan. Ginigibo mi ini kada taon, asin inaapod iyan na Memoryal o “Pamanggihan kan Kagurangnan.” (1 Corinto 11:20; Mateo 26:26-28) Gusto ni Jesus na girumdumon ta na itinao niya an saiyang perpektong buhay bilang pantubos para sa sato. Sinabi niya: “Padagos nindong gibuhon ini sa pagrumdom sa sako.” (Basahon an Lucas 22:19.) Pag nag-aatender ka sa Memoryal, ipinapahiling mo na ginigirumdom mo an pantubos asin an dakulaon na pagkamuot sa sato ni Jehova asin ni Jesus.—Hilingon an Dagdag na Impormasyon 16.

²² An pantubos an pinakamahalagang regalo na itinao sa sato. (2 Corinto 9:14, 15) Makikinabang digdi dawa an milyon-milyon na mga tawong nagadan na. Paano? Ipapaliwanag iyan sa Kapitulo 6 asin 7.