1, 2. (1) ?Wanem i mekem se yu yu glad tumas long wan presen? (2) ?From wanem sakrefaes blong Jisas i nambawan presen we God i givim?

LONG olgeta presen we yu yu kasem finis, ?yu ting se weswan nao i moa gud? Yu yu glad tumas long wan presen taem i wan samting we yu nidim mo i mekem yu yu harem gud.

² Long olgeta presen we God i givim long yumi, i gat wan we yumi nidim tumas. Hem i gud moa i bitim ol narafala presen. Long japta ya, bambae yumi tokbaot olsem wanem Jehova i sanem Pikinini blong hem Jisas Kraes i kamdaon, blong yumi save kasem laef we i no save finis. (Ridim Matiu 20:28.) Taem hem i sanem Jisas i kam long wol olsem wan ransom sakrefaes, hem i soemaot se hem i lavem yumi tumas.

3. ?From wanem ol man oli stap ded?

³ Ransom sakrefaes blong Jisas, hemia rod we Jehova i yusum blong tekemaot ol man long sin mo ded. (Efesas 1:7) Blong save from wanem yumi nidim sakrefaes ya, yumi mas tingbaot samting we i hapen plante taosen yia bifo, long garen blong Iden. Fas papa mo mama blong yumi, Adam mo Iv, tufala i mekem sin. From samting ya, tufala i ded. Yumi evriwan i stap ded from we yumi kasem sin blong tufala.—Yu luk Ol Not 9.

4. ?Adam hem i hu, mo God i givim wanem long hem?

⁴ Adam i fas man we Jehova i mekem, mo Jehova i  givim wan samting long hem we i gud tumas. Hem i givim laef we i stret gud olgeta. Bodi mo tingting blong Adam i stret gud. Hem i no save sik, i no save kam olfala, mo i no save ded. From we Jehova i mekem Adam, hem i olsem pikinini blong God. (Luk 3:38) Oltaem Jehova i toktok long hem. Hem i talemaot long Adam ol samting we hem i wantem, mo i givim gudfala wok long Adam.—Jenesis 1:28-30; 2:16, 17.

5. ?Baebol i minim wanem taem i talem se God i mekem Adam “olsem pija blong hem”?

⁵ God i mekem Adam “olsem pija blong hem.” (Jenesis 1:27, NW) Hemia i min se Adam i naf blong soemaot ol fasin blong Jehova, olsem lav, waes, stret fasin, mo paoa. Mo tu, Adam i save jus. Hem i no olsem wan robot we man i mas kontrolem. God i mekem hem blong i save jusumaot rod we i stret no rod we i no stret. Sipos Adam i jus blong obei long God, hem i save laef olwe long Paradaes.

6. ?Taem Adam i no moa obei long God, hem i lusum wanem?

⁶ Taem Adam i no moa obei long God, God i talemaot panis blong hem se bambae hem i ded. Adam i lusum Paradaes, bodi we i stret gud, mo hem i no moa fren gud wetem Jehova. (Jenesis 3:17-19) Adam mo Iv i jus blong brekem loa blong God, taswe tufala i no moa save laef olwe. From we Adam i no obei, “sin i kam long wol, mo ded i kamaot from sin. Mo ded i kasem olgeta man from we olgeta evriwan oli mekem sin.” (Rom 5:12) Taem Adam i mekem sin, i olsem se hem i salem hem mo yumi tu, i go long sin mo ded, nao tufala i kam masta blong yumi. (Rom 7:14) ?Olsem wanem? ?I gat rod blong kamaot? !Yes i gat!

7, 8. ?Ransom hem i wanem?

⁷ ?Ransom i minim wanem? Hem i praes blong  mekem wan man i kamfri, no blong pemaot wan samting. Mo tu, hem i stret praes blong wan samting.

⁸ I no gat wan man long wol we i save pemaot yumi long sin blong Adam, we i givim ded. Be Jehova i mekem rod blong tekemaot yumi long sin mo ded. Bambae yumi tokbaot olsem wanem ransom sakrefaes blong Jisas i givhan long yumi, mo ol blesing we yumi kasem from.

9. ?I nidim wanem blong pemaot yumi?

⁹ I no gat wan long yumi we i save pemaot ol man, blong oli save gat gudfala laef ya we Adam i lusum. ?From wanem? From we yumi evriwan i sinman. (Ol Sam 49:7, 8) I nidim wan man we i stret gud olgeta blong pemaot yumi. Olsem Baebol i talem, i mas gat “wan ransom we i stret gud blong pemaot olgeta man.” (1 Timoti 2:6) Taswe, laef we bambae i pemaot yumi i mas sem mak long laef we Adam i lusum.

10. ?Olsem wanem Jehova i mekem rod blong pemaot ol man?

¹⁰ ?Olsem wanem Jehova i mekem rod blong pemaot ol man? Hem i sanem Pikinini blong hem we hem i lavem tumas, i kam long wol. Pikinini ya Jisas, hem i faswan long ol samting we Jehova i mekem. (1 Jon 4:9, 10) Jisas i rere blong lego Papa blong hem mo gudfala ples blong hem long heven. (Filipae 2:7) Jehova i tekemaot laef blong Jisas long heven, mo i putum long bel blong Meri, nao hem i bon long wol olsem wan man we i stret gud, i no gat sin.—Luk 1:35.

11. ?Olsem wanem Jisas i save pemaot olgeta man?

¹¹ Taem fas man ya Adam i no obei long Jehova, hem i lusum gudfala laef we hem i sud pasem i go long ol pikinini blong hem. ?Olsem wanem? ?I gat wan man we i save tekemaot ol pikinini blong Adam long ded? Yes i  gat. (Ridim Rom 5:19.) Jisas, we i no gat sin, i givim gudfala laef blong hem blong pemaot yumi. (1 Korin 15:45) Laef ya we i stret gud i naf blong tekemaot olgeta pikinini blong Adam long ded.—1 Korin 15:21, 22.

12. ?From wanem Jisas i mas safa bitim mak?

¹² Baebol i eksplenem olsem wanem Jisas i safa, bifo we hem i ded. Oli wipim hem, oli nilim hem long pos, mo hem i harem nogud tumas long bodi blong hem gogo hem i ded. (Jon 19:1, 16-18, 30; yu luk Ol Not 15) ?From wanem Jisas i mas safa olsem? Hemia from we Setan i talem se, i no gat wan man we i save holemstrong long God taem i kasem bigfala trabol. Be Jisas i pruvum se man we i stret gud olgeta i save holemstrong long God nating se hem i safa bitim mak. !Traem tingbaot olsem wanem Jehova i glad long hem!—Ol Proveb 27:11.

13. Taem Jisas i gobak long heven, ?hem i mekem wanem?

¹³ Long namba 14 Nisan, long yia 33, ol enemi blong Jisas oli kilim hem i ded. (Hibrus 10:10) Tri dei biaen, Jehova i mekem Jisas i laef bakegen long wan spirit bodi, i no moa bodi blong man long wol. Taem hem i gobak long heven, hem i givim sakrefaes blong hem i go long God, nao God i yusum olsem wan ransom, blong pemaot ol pikinini blong Adam. (Hibrus 9:24) Long rod ya, sakrefaes blong Jisas i tekemaot yumi long sin mo ded.—Ridim Rom 3:23, 24.

14, 15. ?Yumi mas mekem wanem blong God i fogivim yumi?

¹⁴ Yumi kasem blesing finis from nambawan presen ya we God i givim long yumi. Bambae yumi tokbaot olsem wanem sakrefaes blong Jisas i stap givhan long yumi naoia, mo olsem wanem bambae i givhan long yumi long fiuja.

 ¹⁵ God i save fogivim sin blong yumi. (Kolosi 1:13, 14) I no isi blong mekem i stret oltaem. Plante taem yumi mestem, nao yumi talem no mekem samting we i no stret. ?Yumi mas mekem wanem blong God i fogivim yumi? Yumi mas sore from mastik blong yumi, yumi mekem tingting blong yumi i stap daon, mo yumi askem long Jehova blong i fogivim yumi. Nao yumi save gat strong tingting se God bambae i fogivim sin blong yumi.—1 Jon 1:8, 9.

16. ?Yumi mas mekem wanem blong tingting blong yumi i klin long fes blong God?

¹⁶ Tingting blong yumi i save klin long fes blong God. Taem tingting blong yumi i stikim yumi from we yumi mekem samting we i no stret, yumi harem se yumi gat fol, mo maet yumi harem se yumi gud blong nating nomo. Be yumi no mas harem nogud tumas. Yumi mas askem long Jehova blong i fogivim yumi, nao yumi save sua se bambae hem i lesin mo i fogivim yumi. (Hibrus 9:13, 14) Jehova i wantem se yumi prea long hem, mo yumi talemaot ol problem mo ol slak fasin blong yumi long hem. (Hibrus 4:14-16) Long rod ya, yumi save gat pis wetem God.

17. From we Jisas i ded blong pemaot yumi, ?yumi gat janis blong kasem wanem?

¹⁷ Yumi gat hop blong kasem laef we i no save finis. Baebol i talem se: “Pei blong sin, hemia ded. Be presen we God i givim tru long Masta blong yumi Kraes Jisas, hemia laef we i no save finis.” (Rom 6:23) From we Jisas i ded blong pemaot yumi, yumi gat janis blong kasem laef blong olwe, we yumi no moa sik bakegen. (Revelesen 21:3, 4) ?Be yumi mas mekem wanem blong kasem ol blesing ya?

18. ?Olsem wanem yumi save se Jehova i lavem yumi?

¹⁸ Yu traem tingbaot olsem wanem yu harem gud taem narafala i givim wan naes presen long yu. Ransom sakrefaes blong Jisas i wan presen we i gud moa i winim ol narafala presen, mo yumi mas talem tangkiu oltaem long Jehova from presen ya. Jon 3:16 i talem se: “God i lavem tumas ol man long wol, nao hem i givim stret Pikinini blong hem, wan nomo we hem i gat.” Yes, Jehova i lavem yumi. From samting ya, hem i givim Jisas, Pikinini blong hem we hem i lavem tumas, blong pemaot yumi. Mo yumi save se Jisas i lavem yumi, from we hem i rere blong ded blong pemaot yumi. (Jon 15:13) Taswe, ransom sakrefaes blong Jisas i wan presen we i mas mekem yu yu luksave, se Jehova mo Jisas i lavem yu.—Galesia 2:20.

19, 20. (1) ?Olsem wanem blong kam fren blong Jehova? (2) ?Olsem wanem blong soemaot bilif long ransom sakrefaes?

¹⁹ Naoia we yu lanem finis se God i lavem yu, ating yu harem se yu wantem lavem hem tu.Be sipos yu wantem kam fren blong wan man mo lavem hem, yu mas save gud hem fastaem. Jon 17:3 i talem se yumi naf blong kasem save long Jehova. Taem yu kasem save long hem, bambae yu lavem hem moa, yu wantem mekem hem i glad, mo bambae yu kam fren blong hem. Taswe, yu mas gohed nomo blong stadi Baebol blong kasem save long Jehova.—1 Jon 5:3.

²⁰ Soemaot bilif long ransom sakrefaes. Baebol i talem se: “Man we i soemaot se hem i bilif long Pikinini ya, bambae hem i gat laef we i no save finis.” (Jon 3:36) ?Olsem wanem blong soemaot bilif? I no naf blong talem nomo se yu bilif long Jisas. Blong soemaot se yu bilif long sakrefaes blong hem, yu mas mekem sam samting. Yu mas mekem ol samting we Jisas i tijim yumi blong  mekem. (Jon 13:15) Jemes 2:26 i talem se: “Bilif we i no gat wok i go wetem, hem . . . i ded.”

21, 22. (1) ?From wanem yumi mas go long Memoriol blong ded blong Jisas evri yia? (2) ?Long Japta 6 mo 7, bambae yumi tokbaot wanem?

²¹ Kam long Memoriol blong ded blong Jisas. Long naet bifo we Jisas i ded, hem i talem se, oltaem yumi mas tingbaot ded blong hem bakegen. Taswe mifala i mekem Memoriol no “Kakae Blong Masta” evri yia. (1 Korin 11:20; Matiu 26:26-28) Jisas i wantem we yumi tingbaot se, hem i givim laef blong hem we i stret gud blong pemaot yumi. Hem i talem se: “Yufala i mas gohed blong mekem samting ya oltaem blong tingbaot mi.” (Ridim Luk 22:19.) Taem yu kam long Memoriol, yu soemaot se yu stap tingbaot sakrefaes blong Jisas mo bigfala lav we Jehova mo Jisas i soemaot long yumi.—Yu luk Ol Not 16.

²² Ransom sakrefaes blong Jisas i wan presen we i gud moa i winim ol narafala presen we yumi save kasem. (2 Korin 9:14, 15) Nambawan presen ya i save givhan tu long plante milian man we oli ded finis. Long Japta 6 mo 7, bambae yumi tokbaot olsem wanem sakrefaes blong Jisas i save givhan long ol dedman long fiuja.