1, 2. (a) Mfa’a wôé, das é ne mfi éyoñ évé? (b) Amu jé ntañ ô ne beta das a so bia be Zambe?

DASE fé da dañe biôm bise be veya wo? É nji sili na das é bo dia asu na ô yene mfi ya été. Éyoñe das da ve wo mevak, nge jalé ñyian éziñ, wo yene de mvaé.

² Abime biôm ése Zambe a daséya wo, jôme jia ja dañe biôm bivo’o bise. A ne beta das Zambe a nga ve môt a binam. E kabetôlô nyi, bia zu yé’é na, Yéhôva a nga lôme Mone wé Yésus Krist asu na, bi bo ngule ya nyiñe nnôm éto. (Lañe Matthieu 20:28.) Yéhôva a nga liti na a nye’e bia amu a nga ve ntañ.

3. Amu jé môt a binam a wu?

³ Ntañ ô ne zene Yéhôva a belane je asu na, a kôté môt a binam abé a awu. (Beéphésien 1:7) Asu na bi yem amu jé ntañ ô nga yiane veban, bia yiane yeme jam é nga lôtan afube ya Éden, den a nto betoyini mimbu. Adam ba Ève be nga bo abé, be nga wu be buta’an abé dap. Bia fe bia wu amu bi nga nyoñ abé be bebiaé bangan.​—Fombô’ô Ayemé 9.

4. Za a mbe Adam, a jé a mbe a bili?

⁴ Éyoñe Yéhôva a nga té fam ôsu Adam, a nga ve nye jôme ja dañe mfi, ényiñe ya melu mese. Ôsimesane wé a nyôle jé, bi mbe teke’e ayeñ. A nga ye bo  te kon, nge ke nnôm, nge wu môs éziñ. Yéhôva a mbe Adam ane ésa, amu nnye a nga té nye. (Luc 3:38) Yéhôva a mbe a kobô’ô a nye éyoñ ése. Zambe a nga kat Adam ne sañesañe jôm a nga yi na Adam a bo, a ve fe nye mbamba ésaé ya bo.​—Metata’a 1:28-30; 2:16, 17.

5. Éyoñe Kalate Zambe a jô na, Adam a nga téban “éve’ela Zambe” nalé a tinan aya?

⁵ Adam a nga téban “éve’ela Zambe.” (Metata’a 1:27) Yéhôva a nga ve nye mefulu mé ane nye’an, fek, zôsô, a ngul. A nga ve nye fili ya nyoñe mintyi’an. Adam a nji be minsini. Zambe a nga té nye a ngule ya tobe na a bo mvaé nge abé. Nge Adam a nga ye tobe na a bo mvaé, a nga ye nyiñe nnôm éto Paradis.

6. Éyoñ Adam a nga bo Zambe melo, jé a nga jañele? Abé Adam a nga bo da nambe bia aya?

⁶ Éyoñ a nga bo Zambe melo, ane Zambe a nga tyi’i na Adam a yian awu. Adam a nga jañele angôndô ya abui mam. A nga jañele beta amvôé a mbe a bili a Yéhôva, ényiñ é mbe teke bijô ya nsem, a nga jañele fe Paradis. (Metata’a 3:17-19) Amu Adam ba Ève be nga tobe na ba bo Zambe melo, teke na be mbe ngule ya beta nyiñe nnôm éto. Amu jam Adam a nga bo, “abé é nga zu si nyô  . . . a awu é nga zu amu abé; a nalé awu é nga kui be bôte bese amu bese be nga bo abé.” (Beromain 5:12) Éyoñ Adam a nga bo abé, a nga ‘kuan’ émien a bia bese éto ôlo ya abé a awu. (Beromain 7:14) Ye ndi nlem éziñ é ne asu dangan? Ôwé.

7, 8. Jé é ne ntañ?

⁷ Jé é ne ntañ? Éfia ntañ ja tinane biôme bibaé.  Ôsusua: ntañ ô ne tañe môt a ya’an asu na a kôté môt éziñ, nge kôté jôm éziñ. Baa: ntañ ô ne tañe ba ya’an asu na be kôm étom éziñ.

⁸ Teke’e môt éziñ a mbe ve mane kôm abé Adam a nga bo éyoñ a nga sem, momo, teke’e môt éziñ a mbe va bia awu été. Ve Yéhôva a ve bia zene ya kôtéban abé a awu. Bi tame zu yen avale ntañe wo volô bia, a avale bi ne yene mfi ya été.

9. Ntañ ô nga yiane ya’aneban aya?

⁹ Teke’e môt éziñe ya be bia a ne ya’ane ntañ asu ényiñ é mbe te bijô ya nsem Adam a nga jañele. Amu jé? Amu bia bese bi ne bebo mam abé. (Besam 49:7, 8) É nga sili ényiñe môte mfe é mbe te bijô ya nsem asu na ntañ ô ya’aneban. Jôme te nje ba loone wô na “ntañe [wo yian].” (1 Timothée 2:6, MN) Ntañ ô nga yiane bo dia aval ane ényiñ Adam a nga jañele.

10. Aval avé Yéhôva a nga ve ntañ?

¹⁰ Aval avé Yéhôva a nga ve ntañ? Yéhôva a nga lôm édima Mone dé e si. Mon ate, Yésus a mbe ététéa ôsu Zambe a nga té. (1 Jean 4:9, 10) Yésus a nga yebe na a li’i Ésa wé a étaba’a jé yôp. (Bephilippien 2:7) Yésus a nga bialé zôsô, teke’e ayeñ.​—Luc 1:35.

11. Aval avé môte wua a mbe ve ya’ane ntañ asu bôte bese?

¹¹ Môt ôsu, Adam a nga bo na bôte bese be jañele ényiñ é mbe te bijô ya nsem éyoñ a nga bo Yéhôva melo. Ye môt a binam mfe a mbe ve kôté mvoñ Adam awu? Yaa. (Lañe Beromain 5:19.) Yésus, nyi a mbe te metyi ya abé a nga ve ényiñe jé ane ntañ.  (1 Becorinthien 15:45) Ényiñe jé é mbe te bijô ya nsem é nga va bone b’ Adam bese été ya awu.​—1 Becorinthien 15:21, 22.

12. Amu jé Yésus a nga jibi abui mintaé?

¹² Kalate Zambe a kañete bia minju’u Yésus a nga bi ôsusua na a wu. Be nga bôme nye mbia ébôm, be tyele nye élé, a nga taté juk a mintaé ôsusua na a wu. (Jean 19:1, 16-18, 30) Amu jé Yésus a nga jibi abim abui mintaé te? Amu Satan a nga jô na teke’e môt éziñ a ne tabe zôsô éyoñ a tele minju’u été. Yésus a nga liti na môt a ne te ayeñ a ne ke ôsu a bo Yéhôva mewôk, ja’a a tôban avale minju’u avé. Tame fas avale meva’a Yéhôva a nga bi nlem été éyoñe Yésus a nga bo nye mewôk!​—Minkana 27:11; fombô’ô Ayemé 15.

13. Aval avé ntañ ô nga ya’aneban?

¹³ Aval avé ntañ ô nga ya’aneban? Yésus a nga liti Ésa wé tañe ya ényiñe jé. Mbu 33 ya ngone Nisan é to melu 14, Yéhôva a nga jô’é na besiñe be Yésus be wôé nye. (Behébreu 10:10) Mvuse melu melal, Yéhôva a nga wômôlô nye, sa ke ane môt a binam, ve ane nsisim. Mvuse ya valé, éyoñe Yésus a nga bulane be Ésa wé yôp, a nga ke liti nye tañe ya ényiñe jé é mbe teke metyi me abé. (Behébreu 9:24) Éyoñe ji, amu ntañ ô ya’anebaneya, bi nto ngule ya kôtéban été ya abé a awu.​—Lañe Beromain 3:23, 24.

14, 15. Jé bia yiane bo asu na Yéhôva a jamé bia?

¹⁴ Bi nga yene na, beta das a so be Zambe a ne fo’o  bia mfi. Bi tame yen avale bia yene mfi ya dase te éyoñe ji, a avale bia ye yene mfi ya été melu ma zu.

¹⁵ Yéhôva a jamé mam abé mangan. É ne ayaé ya bo mbamba be mam éyoñ ése. Bia kop, a biyoñe biziñe bia jô a bo mame me ne te yian. (Becolossien 1:13, 14) Jé bia yiane bo asu na Yéhôva a jamé bia? Bia yiane tu’a mem abé bi nga bo a sili Yéhôva njaman. Bi ne tabe ndi na Yéhôva a ye jamé abé dangan.​—1 Jean 1:8, 9.

16. Jé bia yiane bo asu na mone môte ya nleme wongan a tabe mfuban?

¹⁶ Bi ne bi mone môte ya nlem a ne mfuban. Nge mone môte ya nleme wongan a kate bia na bia te bo jôm éziñ é ne abé, bi ne ve biabebiene mekua, jame te é ne te’e bia nyôl, nge bo na bi wô’ôtane biabebiene na bi ne zesé. É nji bo mfi ya bi aval asimesane te. Nge bia sili Yéhôva njaman, bi ne tabe ndi na Yéhôva a ye fo’o jamé bia, ndembene bia ye bi mone môte ya nlem a ne mfuban. (Behébreu 9:13, 14) Yéhôva a yi na bi kate nye minju’u mise bi ne tôbane mie a bikop biangane bise. (Behébreu 4:14-16) Nge bi bo nalé, bia ye ba’ale amvôé dangan a Yéhôva.

17. Bibotane bivé bi ne bi amu Yésus a nga wu?

¹⁷ Bi bili ndi nleme ya nyiñe nnôm éto. “Ma’ane ya abé me ne awu; ve mveane zesé ya Zambe ô ne ényiñe ya melu mese be Krist Yésus, Tate wongan.” (Beromain 6:23) Bi ne bi ényiñe ya nnôm éto a meva’a ya ényiñ é ne te bijô ya nsem, amu Yésus a nga wu asu dangan. (Nlitan 21:3, 4) Ve jé bia yiane bo asu na bi bi bibotane bite?

18. Aval avé bia yeme na Yéhôva a nye’e bia?

¹⁸ Tame simesan abime meva’a ô nga bi éyoñe môt a nga ve wo das. Ntañ ô ne édima das asu bôte bese, jôme te nje bia yiane dañe ve Yéhôva akéva asu dase te. Kalate Jean 3:16 a jô bia na: “Zambe a nga nye’e bôte ya si nyô, a nga lôm atyi’i Mone dé.” Yaa, Yéhôva a nye’e bia abui, jôme te nje a nga ve bia édima Mone jé, Yésus. Bia yeme na, Yésus fe a nye’e bia, amu a nga kañese na a wu asu dangan. (Jean 15:13) Dase ntañe da yiane ve wo ndi nleme na Yéhôva ba Yésus ba nye’e fo’o wo.​—Begalate 2:20.

19, 20. (a) Jé ô ne bo asu na ô bo mvôé Yéhôva? (b) Aval avé ô ne liti na wo kañese metuna’a Yésus a nga ve?

¹⁹ Mbôl ô maneya yé’é abui mame mfa’a ya beta nye’ane Zambe, aval avé ô ne bo mvôé jé? É nji bo tyi’ibi ya nye’e môt ô nji yem. Kalate Jean 17:3 a jô na bi ne kui na bi yeme Yéhôva. Nté wo ye ke ôsu a yé’é yeme Yéhôva, nye’ane wôé asu dé wo aye yaé, wo ye jeñe na ô bo mam a nye’e, a wo ye bo mvôé jé. Nde ñhe, kele ôsu a jeñe na ô yem abui mam a lat a Yéhôva a zene ya ayé’é ya Kalate Zambe.​—1 Jean 5:3.

²⁰ Kañese’e metuna’a Yésus a nga ve. Kalate Zambe a jô na, “môt a buni Mon, nnye a ne ényiñe ya melu mese.” (Jean 3:36) Jé ja tinane na e bi mbunan? Nalé a tinane na bia yiane bo mame Yésus a ye’ele bia na bi bo. (Jean 13:15) Bi nji bo ngule ya jô ve na bia buni Yésus. Asu na bi liti na bia kañese ntañ, bia yiane bo jôm éziñe mfa’a ya mbunane wongan. E Kalate Jacques 2:26 bia lañe na: “Mbunan ô ne te mimboane mi mam ô ne ñwuan.”

21, 22. Amu jé bia yiane tabe Mesimesa’ane ya awu Krist mbu ôse? (b) Jé bia ye yene bekabetôlô 6 a 7?

 ²¹ Kele tabe Mesimesa’ane ya awu Krist. E ngô’é Yésus a mbe na a wu, a nga ye’ele bia na bia yiane simesan awu dé. Bia bo de mbu ôse, a ba loone jamete na Mesimesa’ane ya awu Yésus nge na “Bidi bi Tate.” (1 Becorinthien 11:20; Matthieu 26:26-28) Yésus a yi na bi simesane na a nga ve ényiñ jé, é ne te bijô ya nsem ane ntañ asu dangan. A nga jô na: “Boka’ane mi boane jame di, simesa’ane ma.” (Lañe Luc 22:19.) Éyoñe wo ke tabe Mesimesa’ane ya awu Yésus, wo liti na wo simesane ntañ, a beta nye’ane Yéhôva ba Yésus be bili mfa’a wongan.​— Fombô’ô Ayemé 16.

²² Ntañ ô ne édima dase bi ngenane teke bi môs éziñ. (2 Becorinthien 9:14, 15) Bizu’u bi bôte bi maneya wu bia ye bi bibotane ya édima dase te. Bekabetôlô 6 a 7 be aye liti bia avale jamete da ye boban.