1, 2. (a) Ni enki ekiri kutuma ekiconco caba ec’omugasho ahari iwe? (b) Ahabw’enki ekiconco ekiri kuruga ahari Ruhanga kiri kukira ebindi?

NI KIHA kiconco ec’amani eki bakuhire kikakushemeza? Ekiconco tikiri kuba ec’omugasho ahabw’okuba kiguzirwe esente nyingi. Ekiconco nikikushemeza caba kiri ekintu eki obire noyenda.

² Omu biconco byona ebi Ruhanga yatuhire, harimu kimwe eki twabire nitwenda munonga kukira ebindi. Ni co kiconco ekiri kukira ebindi aha bantu. Omuri eki kicweka twaza kwega oku Yehova yayoherize Omwana weye Yesu Kristo kugira ngu tubase kubaho ebiro byona. (Shoma omuri Matayo 20:28.) Yehova akatworeka ku natukunda ari kohereza Yesu omu nsi kutufera.

3. Ahabw’enki abantu bari kufa?

³ Ekitambo ni oburyo obu Ruhanga ari kutukizamu ekibi n’okufa. (Abaefeso 1:7) Kugira ngu tucenge ge enshonga eyatumire twayenda ekitambo, tushemerire kumanya ge ecabireho omu musiri gwa Edeni. Abazire bitu b’okubanza, Adamu na Eva, bakacumura ahari Ruhanga. Ahabw’okucumura, bakafa. Twena nitufa ahabw’okuba tukahungura ekibi ekiri kuruga ahari Adamu na Eva.—Reba Enyongezo ya 9.

4. Adamu ni oha, kandi shi ni enki eki Ruhanga yamuhire?

⁴ Obu Yehova yahangire omushija ow’okubanza,  Adamu, akamuha ekintu c’omuhendo. Akaha Adamu amagara agahikirire. Akaba ayine ebitekateko n’omubiri bihikirire. Akaba atari kwija kurwara, kukura n’okufa. Yehova akaba ari Ishe wa Adamu ahabw’okuba ni we owamuhangire. (Luka 3:38) Yehova akaba nagamba na we. Ruhanga akashobororera Adamu eki yabire ari kwenda ngu akore kandi yamuha omurimo murungi g’okukora.—Okutandika 1:28-30; 2:16, 17.

5. Bibuli yagamba ngu Adamu akahangwa omu “kushusha kwa Ruhanga,” neba eri kumanyisa ki?

⁵ Adamu akahangwa omu “kushusha kwa Ruhanga.” (Okutandika 1:27) Yehova akamuhanga ayine emitwarize nk’eyeye, harimu rukundo, obwenge, oburinganiza n’amani. Akamuha obugabe bw’okwetoraniramu. Adamu akaba atari nka mashini, ahobwe akaba nabasa kwetoraniramu ekirungi ninga ekibi. Kuri yashaziremu korobera Ruhanga akaba arije kugumaho ebiro byona omuri Paradiso.

6. Ni enki eki Adamu yaferirwe, bwanyima y’okugomera Ruhanga? Eco nikitukwataho kita?

⁶ Obu Adamu yagomire Ruhanga akacwerwa orw’okufa, akaba yashashura ibanja. Akaferwa obunywani bweye na Yehova, amagara agahikirire, na paradiso eyi yabire atwiremu. (Okutandika 3:17-19) Adamu na Eva bakatorana kugomera Ruhanga, ni ahabw’eco bakaba batakine masiko. Ahabw’okushisha kwa Adamu, ‘ekibi kikija omu nsi, n’okufa kwabuga omu bantu bona, aha kuba bona bakashisha.’ (Abarooma 5:12) Obu Adamu yashishire, akeguza kandi n’itwe yatuguza kutegekwa ekibi n’okufa. (Abarooma 7:14) Mbwenu shi hine amasiko agu twine? Yego, gariho!

7, 8. Ekitambo ni enki?

⁷ Ekitambo ni enki? Ekitambo nikimanyisa ebintu  ebiri kuhika ahari bibiri. Ecokubanza: Ekitambo ni esente eziri kushashurwa ngu bagarure omuntu ninga shi ekintu ecaba kitwirwe. Ecakabiri: Ekitambo ni ekiguzi eki ori kwihura ekintu.

⁸ Tihariho omuntu owabire nabasa kushashurira ebintu ebyashishirwe Adamu obu yashishire akatuma twafa. Konka Yehova akatuteraho omuhanda g’okutwiha omu kibi n’okufa. Reka twege ebirungi ebi turi kutunga ahabw’ekitambo.

9. Ni bata oku ekitambo cabire kirashashurwe?

⁹ Tihariho omuntu n’omwe omuri itwe owabire ari kubasa kushashurira amagara agu Adamu yaburize. Ahabw’enki? Ahabw’okuba twena tituhikirire. (Zaaburi 49:7, 8) Omuntu owabire arafere abantu akaba ashemerire kuba ayine amagara agahikirire nk’agu Adamu yabire ayine. Ni yo nshonga Yesu Kristo yabire ‘ow’okucungura abantu bona.’ (1 Timoseo 2:6) Amagara agahikirire agu Yesu yatangire gakaba gari kwingana n’agu Adamu yaburize.

10. Ni bata oku Yehova yatuhire ekitambo?

¹⁰ Ni bata oku Yehova yatuhire ekitambo? Yehova akohereza Omwana weye ow’omuhendo omu nsi. Omwana weye Yesu, ni we owahangirwe aha murundi g’okubanza. (1 Yohaana 4:9, 10) Yesu akikiriza kusiga Ishe, yaruga omu iguru ahu yabire atwire. (Abafilipi 2:7) Yehova akafururira Yesu omu nsi, bwanyima yazarwa ari omuntu ohikirire, atine ekibi.—Luka 1:35.

11. Ni bata oku omuntu omwe yabire arabase kucungura abantu bona?

¹¹ Omuntu ow’okubanza, Adamu, akatuma abantu bona baferwa amagara agahikirire ahabw’okuba yagomire  Yehova. Mbwenu shi hine ondijo muntu owabire nabasa kwihiraho abana ba Adamu orufu? Yego. (Shoma omu Barooma 5:19.) Yesu owabire atine ekibi akatanga amagara geye agahikirire ngu atucungure. (1 Abakorinso 15:45) Amagara geye agahikirire ni go gabire garabase kwihiraho abana ba Adamu orufu.—1 Abakorinso 15:21, 22.

12. Ahabw’enki Yesu yabire ashemerire kubonabonesibwa munonga?

¹² Bibuli neshoborora oku Yesu yabonabonesibwe obu yabire yaza kwitwa. Bakamutera munonga, bamuhanika aha kiti, kandi yafa ari kushasha munonga. (Yohaana 19:1, 16-18, 30) Ahabw’enki Yesu yabire ashemerire kubonabonesibwa munonga? Ahabw’okuba Sitaane akaba yagambire ngu tihine omuntu ori kubasa kubonabonesibwa ngu agume ari omwesigwa ahari Ruhanga. Yesu akereka ku omuntu ohikirire ari kubasa kuguma ari omwesigwa n’obu yakubonabona biri kwingana ki. Tekateka oku Yehova yashemererirwe Yesu munonga!—Enfumu 27:11; Reba Enyongezo ya 15.

13. Ni bata oku ekitambo cashashwirwe?

¹³ Ni bata oku ekitambo cashashwirwe? Yesu akereka Ishe omugasho gw’amagara geye. Aha kiro ca 14 Nisani, omu mwaka gwa 33, tukuratize karenda y’Abayudaya, Yehova akikiriza ngu Yesu ayitwe n’abazigu beye. (Abaheburaayo 10:10) Ku hahwire ebiro bishatu, Yehova akazora Yesu atine omubiri g’omuntu, ahobwe ayine omubiri g’omwika. Bwanyima Yesu ku yahikire omu iguru, akereka Ishe Yehova omugasho gw’amagara geye agahikirire agu yashashwireho ekitambo. (Abaheburaayo 9:24) Hati twine omugisha g’okuruga omu kibi n’orufu ahabw’ekitambo ecashashwirwe.—Shoma omu Barooma 3:23, 24.

14, 15. Ni enki eki tushemerire kukora kugira ngu ebicumuro byitu bisasirwe?

¹⁴ Tukatandika kuroza aha migisha eri kuretwa n’ekitambo. Mbwenu ho reka turebe oku kiri kutugasira hati n’oku kirije kutugasira omu biro eby’omu misho.

¹⁵ Nitusasirwa ebicumuro byitu. Okuguma turi kukora ebirungi kusha, kigumire. Nitushobya, kandi hine obu turi kugamba ninga shi tukora ekintu ekitahikire. (Abakolosai 1:13, 14) Ni bata oku turi kubasa kusasirwa? Tushemerire kushasha munonga ahabw’ekibi eki twakora kandi twecureza tushaba Yehova embabazi. Twakikora tusyoya, nitugira obwesige ku ebicumuro byitu twabisasirwa.—1 Yohaana 1:8, 9.

16. Ni enki eki tushemerire kukora ngu tugire omuntuwomunda murungi?

¹⁶ Nitugira omuntuwomunda murungi. Omuntuwomunda ku ari kutugambira ngu twashobya nitwecwera orubanja, kandi bumwe tuhurira tutine amasiko. Konka titushemerire kuhwa amani. Twashaba Yehova ngu atusasire tushemerire kwesigira kimwe ku aratuhurire kandi akatusasira. (Abaheburaayo 9:13, 14) Yehova nayenda ngu tumugambire ebizibu byona ebi twine n’obweremwa bwitu. (Abaheburaayo 4:14-16) Eco kiryatuma twagira obusinge na Ruhanga.

17. Ni eha migisha eyi turyatunga ahabw’okuba Yesu yatuferire?

¹⁷ Nitugira amasiko g’okubaho ebiro byona. ‘Ebihembo by’ekibi ni okufa konka ekiconco ca Ruhanga ni amagara agatahwaho omuri Kristo Yesu Mukama witu.’ (Abarooma 6:23) Ahabw’okuba Yesu yatuferire, turyabaho ebiro byona twine amagara marungi. (Okushuuruurwa 21:3, 4) Konka shi tushemerire kukora ki ngu twije kubona eyo migisha?

18. Nitumanya tuta ku Yehova ari kutukunda?

¹⁸ Tekateka oku ori kwehurira hagira omuntu owakuha ekiconco kirungi. Ekitambo ni co kiconco ekiri kukira ebindi byona, ni ahabw’eco tushemerire kusima Yehova ahabw’okutuha eco kitambo. Omuri Yohaana 3:16 nihagamba ku ‘Ruhanga yakunzire ensi akahayo Omwana weye omwe nyamunegere.’ Mazima, Yehova natukunda munonga kuhika n’aha kutuha Omwana weye owu ari kukunda, Yesu. Kandi nitumanya ku Yesu na we ari kutukunda, ahabw’okuba akikiriza kutufera. (Yohaana 15:13) Ekiconco c’ekitambo nikituma twamanya ngu buzima Yehova na Yesu nibatukunda.—Abagalatia 2:20.

19, 20. (a) Ni bata oku ori kubasa kuba munywani wa Yehova? (b) Ni bata oku ori kubasa kwereka ku ori kwikiriza ekitambo ca Yesu?

¹⁹ Hati ku waheza kumanya Rukundo ya Ruhanga, ni bata oku ori kubasa kuba munywani weye? Ticorobi kukunda omuntu owu otari kumanya. Omuri Yohaana 17:3 nihagamba ku turi kubasa kumanya Yehova. Ku oramumanye noyija kukizaho kumukunda, ohurire wayenda kumworobera kandi obe munywani weye. Rero, gumizamu kumanya Yehova ori kwega Bibuli.—1 Yohaana 5:3.

²⁰ Yikiriza Ekitambo ca Yesu. Bibuli negamba ku ‘ori kwikiriza Omwana aryagira amagara agatahwaho.’ (Yohaana 3:36) Kugira okwikiriza nikimanyisa ki? Nikimanyisa kukora ebi Yesu yatwegesize kukora. (Yohaana 13:15) Tituri kubasa kugamba kusha ngu nitwesiga Yesu. Kugira ngu twereke ku nitwikiriza ekitambo, tushemerire kugira eki twakora. Omuri Yakobo 2:26 nihagira ngu: ‘Okwikiriza kutine kukora nikuba kufire.’

21, 22. (a) Ahabw’enki tushemerire kwija aha Kijusyo c’orufu rwa Kristo buri mwaka? (b) Ni enki eki turiyega omu Kicweka ca 6 n’eca 7?

 ²¹ Guma oyije aha Kijusyo c’orufu rwa Yesu. Aha mwebazyo gumwe, Yesu atakafire, akaturagira ngu tugume twijuke okufa kweye. Obwo bugenyi nitubukora buri mwaka, kandi nibwetwa Ekijusyo ninga shi ‘Obugyenyi bwa Mukama bw’Omwebazyo.’ (1 Abakorinso 11:20; Matayo 26:26-28) Yesu nayenda ngu tugume twijuke ku yahireyo amagara agahikirire ngu atucungure. Akagira ngu: ‘Mugume mukore mutyo okunyijukiraho.’ (Shoma omuri Luka 22:19.) Wija aha Kijusyo noba noyereka ku noyijuka ekitambo kandi ku nosima Yehova na Yesu aha bwa rukundo eyi batwerekire.—Reba Enyongezo ya 16.

²² Ekitambo ni co kiconco ekiri kukira ebindi byona. (2 Abakorinso 9:14, 15) Eco kitambo nikija kugasira n’abantu bingi abafire ku barizoka. Ekicweka ca 6 n’eca 7 nibyija kukwereka oku ebyo biri kubasika.