1, 2. (a) Laksawng pakhat cu zeinihdah na caah man a ngeihter? (b) Zeicah tlanhnak man cu Pathian i a ngan bikmi laksawng a si?

NA HMUH balmi laksawng lakah zei laksawng dah a ṭha bik? A ṭha bikmi si awkah a man a fah a hau lo. Nangmah aan nuamhtertu asiloah na herh taktakmi a si ahcun na caah a ṭha bikmi laksawng a si ko lai.

² Pathian nih a kan pekmi laksawng vialte lakah pakhat cu zei dang vialte nakin kan herh deuhmi a si. Mah cu Pathian nih minung a kan pekmi a ngan bikmi laksawng a si. Jehovah nih zungzal nunnak kan hmuh khawh nakhnga a Fapa Jesuh Khrih a rak thlahnak kong kha hi ṭhen ah kan i ruah lai. (Matthai 20:28 rel.) Tlanhnak man caah Jesuh kha vawleicung a rak thlahnak thawngin Jehovah nih a kan dawt taktak kha a langhter.

3. Minung hi zeicah kan thih?

³ Tlanhnak man timi cu sualnak le thihnak in minung luatternak caah Jehovah hmanmi lam a si. (Efesa 1:7) Tlanhnak man a herhnak a ruang hngalhthiam awkah a luancia kum tampi lio i Eden dum ah a rak cangmi kong kha hngalh a hau. Hmasa bik kan nu le kan pa, Adam le Evi nih sualnak an tuah. Cucaah misual an si i an thi. Kannih zong Adam le Evi sinin sualnak ro kan co caah kan thih vemi a si.— A Donghnak I Fianternak 9 ah zoh.

4. Adam cu ahodah a si, zeidah a ngeih?

⁴ Pathian nih hmasa bik mipa Adam a ser tikah a sunglawi  tukmi thil pakhat a pek. Mah cu a tlingmi nunnak a pekmi kha a si. A tlingmi ruahnak le a tlingmi pum a ngei. Cucaah zeitikhmanh ah a zaw lai lo, a tar lai lo i a thi lai lo. Adam cu Jehovah nih a sermi a si caah Jehovah cu a pa bantuk a si. (Luka 3:38) Jehovah nih Adam sinah hmaan tein pehtlaihnak a tuah. Pathian nih Adam sinin aa ruahchanmi kha fiang tein a chimh i lungsinak a pemi rian kha a pek.—Genesis 1:28-30; 2:16, 17.

5. Baibal nih Adam cu “Pathian he i lo in” ser a si a ti tikah zeidah a chimduhmi a si?

⁵ Adam cu “Pathian he i lo in” ser a si. (Genesis 1:27) Jehovah nih dawtnak, fimnak, dinnak le ṭhawnnak telin a ngeihmi sining hna a pek. Zalong tein i thimnak nawl zong a pek. Adam cu seh in sermi minung a si lo. A hmaan le hmaan lo i thim kho dingin Pathian nih a ser. Adam nih Pathian nawlngaih awkah aa thim ahcun Paradis ah zungzal in a nung kho.

6. Adam nih Pathian nawl a ngaih lo tikah zeidah a sungh? Mah nih zeitindah a kan hnorsuan?

⁶ Adam cu Pathian nawl a ngai lo i thih dantat a si tikah Adam nih a sunglawi tukmi thil a rak sung. Jehovah he a sunglawi tukmi an i pehtlaihnak, a tlingmi nunnak le Paradis hmun a rak sung. (Genesis 3:17-19) Adam le Evi nih Pathian nawlngaih lo awk an i thim caah an caah ruahchannak a um ti lo. “Sualnak cu mipa pakhat thawngin vawleicung ah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.” (Rom 5:12) Adam nih sualnak a tuah tikah amah le a tefa dihlak kha sualnak le thihnak sal ah a ‘zuar’ hna. (Rom 7:14) Kan caah tah ruahchannak a um maw? A um.

7, 8. Tlanhnak man timi cu zeidah a si?

 ⁷ Tlanhnak man timi cu zeidah a si? Sullam pahnih a ngei. Pakhatnak, tlanhnak man cu luatter awkah asiloah cawk ṭhan awkah pekmi a man khi a si. Pahnihnak, tlanhnak man cu khuhpiakmi asiloah thil pakhatkhat caah pekmi a man khi a si.

⁸ Adam chuahtermi sunghnak nganpi kha khuhpiak awk, sualnak le thihnak sal in luatter awkah minung ahohmanh nih a man an pe kho lo. Asinain sualnak le thihnak in luatternak lam kha Jehovah nih a kan timhpiak. Tlanhnak man nih rian a ṭuanning le mah in ṭhatnak kan hmuh khawhning kha i ruah u sih.

9. Tlanhnak man cu zeitindah pek khawh a si?

⁹ Adam nih a sunghmi a tlingmi nunnak caah ahohmanh nih tlanhnak man kan pe kho lo. Zeicahtiah kan dihlak in mitlinglo kan si caah a si. (Salm 49:7, 8) Tlanhnak man pek awkah a dang a tlingmi minung nunnak a hau. Adam sunghmi nunnak he a man aa tlukmi tlanhnak man a herh. Cucaah Baibal nih ‘a man aa tlukmi tlanhnak’ tiah a ti.—1 Timote 2:6, NW.

10. Jehovah nih tlanhnak man kha zeitindah a timh?

¹⁰ Jehovah nih tlanhnak man kha zeitindah a timh? Jehovah nih a dawt tukmi a Fapa kha vawlei ah a rak thlah. Mah a Fapa Jesuh cu a ser hmasa bikmi a si. (1 Johan 4:9, 10) Jesuh nih a Pa le vancung i a inn kha lungtho tein a kaltak. (Filipi 2:7) Jehovah nih Jesuh kha van in vawlei ah a ṭhial i Jesuh cu sualnak a ngei lomi a tlingmi minung pakhat in hrin a si.—Luka 1:35.

11. Mi pakhat nih mi vialte caah zeitindah tlanhnak man a pek khawh?

¹¹ A hmasa bik mipa Adam nih Jehovah nawl a ngaih  lo ruangah mi vialte nih a tlingmi nunnak kan sung. Midang pakhat nih Adam tefa dihlak caah thihnak kha a hlo kho lai maw? A hloh khawh lai. (Rom 5:19 rel.) Sualnak a tuah bal lomi Jesuh nih a tlingmi a nunnak kha tlanhnak man caah a pek. (1 Korin 15:45) A tlingmi a nunnak nih Adam tefa vialte caah thihnak kha a hloh khawh.—1 Korin 15:21, 22.

12. Jesuh nih zeicah cu tlukin harnak a in a herh?

¹² Jesuh nih a thih hlanah zeitluk in dah fahnak a in ti kha Baibal nih a langhter. Zaangfahnak ngei loin an tuk, tung cungah an khenh chih i fahnak in buin a thi. (Johan 19:1, 16-18, 30) Jesuh nih zeicah cu tlukin harnak a in a herh? Mi nih a fakmi hneksaknak an ton ahcun ahohmanh Pathian cungah zumhawktlak tein an um lai lo tiah Satan nih a ti caah a si. Mitling pakhat nih a fak tukmi harnak a in hmanhah Pathian cungah zumhawktlak tein um khawh a si ko ti kha Jesuh nih a langhter. Jehovah nih Jesuh kha zeitluk in dah aa uanthlarpi lai khi ruathmanh.—Phungthlukbia 27:11; A Donghnak I Fianternak 15 ah zoh.

13. Tlanhnak man cu zeitindah pek a si?

¹³ Tlanhnak man cu zeitindah pek a si? Jesuh nih tlanhnak man kha a Pa sinah a pek. AD 33, Judah calendar Nisan 14 ah a ral pawl nih Jesuh an thahmi kha Jehovah nih a rak awnh. (Hebru 10:10) Jesuh a thih hnu, nithumnak ni ah Jehovah nih Jesuh kha minung pum in si loin thlarau pum in a thawhter ṭhan. A hnu, vancung i a Pa sin a kir ṭhan tikah tlanhnak man caah a tlingmi a nunnak kha Jehovah sinah a pek. (Hebru 9:24) Tlanhnak man pek a si cang caah sualnak le thihnak in luatnak caanṭha kan ngei cang.—Rom 3:23, 24 rel.

14, 15. Kan sualnak ngaihthiam kan si nakhnga zeidah kan tuah awk a si?

¹⁴ Pathian i a ngan bikmi laksawng in ṭhatnak kan hmuh cang. Atu ah le hmailei ah kan hmuh laimi ṭhatnak kha zohhmanh u sih.

¹⁵ Kan sualnak ngaihthiam kan si. A zungzal in a hmaanmi thil tuah cu a fawi lo. Kan dihlak in kan biachim le kan tuahsernak ah kan palh tawn. (Kolose 1:13, 14) Zeitindah ngaihthiamnak kan hmuh khawh? Kan tuahmi palhnak ruangah lungtak tein i ngaihchih in Jehovah sinah toidor tein ngaihthiamnak kan hal awk a si. Cun kan sualnak ngaihthiam kan si lai kha kan zumh khawh.—1 Johan 1:8, 9.

16. A ṭhami chiaṭha thleidannak lungthin ngeih awkah zeidah kan tuah a herh?

¹⁶ A ṭhami chiaṭha thleidannak lungthin kan ngei kho. Kan chiaṭha thleidannak lungthin nih ka tuahmi a palh, ka sual timi ruahnak a kan ngeihter ahcun ruahchannak ka ngei lo i man ka ngei lo timi lungput hmanh a kan ngeihter khawh. Asinain kan lung a dongh awk a si lo. Ngaihthiamnak hmuh awkah Jehovah kan nawl ahcun Jehovah nih a kan ngaihpiak lai i a kan ngaihthiam lai ti kha kan zumh khawh. (Hebru 9:13, 14) Jehovah nih kan tonmi buaibainak le kan derthawmnak a zeipaoh kha ka chim hna seh ti a kan duh. (Hebru 4:14-16) Mah ruangah Pathian he remnak kan hmu kho.

17. Jesuh cu kan caah a thih caah zei thluachuah dah kan hmuh khawh?

¹⁷ Zungzal nunnak ruahchannak kan ngei. “Sualnak man cu thihnak a si, sihmanhsehlaw Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si.” (Rom 6:23) Jesuh  cu kan caah a thih caah a tlingmi ngandamnak kan ngei kho i zungzal in kan nung kho. (Biathlam 21:3, 4) Mah thluachuah hmuh awkah zeidah kan tuah a herh?

18. Jehovah nih a kan dawt ti kha zeitindah kan hngalh?

¹⁸ Mi pakhat nih a ṭha tukmi laksawng aan pek tikah zeitluk in dah naa lawmh lai khi ruathmanh. Tlanhnak man cu laksawng vialte lakah a sunglawi bikmi a si i mah caah Jehovah cungah kan i lawmh tuk awk a si. Johan 3:16 nih “Pathian nih vawlei hi a dawt hringhran caah a Fapa ngeihchunte kha a pek” tiah a ti. Jehovah nih a kan dawt tuk caah a dawt tukmi a Fapa Jesuh kha a kan pek. Jesuh nih kan caah lungtho tein a nunnak a pek caah a kan dawt tuk ve ti kha kan hngalh. (Johan 15:13) Tlanhnak man laksawng nih Jehovah le Jesuh nih an in dawt taktak ti kha aan zumhter awk a si.—Galati 2:20.

19, 20. (a) Jehovah hawi zeitindah na hun si khawh? (b) Jesuh tlanhnak man raithawinak na cohlan kha zeitindah na langhter khawh?

¹⁹ Atu ah Pathian i a nganmi a dawtnak kong kha na hngalh cang i zeitindah a hawi na hun si khawh? Na hngalh lomi mi pakhat dawt timi cu a fawi lo. Johan 17:3 nih Jehovah kha kan hun hngalh khawh tiah a ti. Jehovah na hun hngalh tikah amah na dawtnak a ṭhang chin lai, a lungton na duh lai i a hawi na hung si lai. Cucaah Baibal hlathlainak thawngin Jehovah kong kha cawng zungzal.—1 Johan 5:3.

²⁰ Jesuh tlanhnak man raithawinak kha cohlang. “Fapa a zummi paoh cu zungzal nunnak an ngei” tiah Baibal nih a ti. (Johan 3:36) Zumhnak langhter timi cu zeidah a si? Jesuh nih a kan cawnpiakmi ningin tuah kha a si. (Johan 13:15) Jesuh kan zumh ti chim sawhsawh lawngin a za lo. Tlanhnak man kan cohlan ahcun kan  zumhnak kha tuahsernak in kan langhter a hau. Jeim 2:26 nih ‘zumhnak cu tuahnak loin a thi’ tiah a ti.

21, 22. (a) Kum fatin tuahmi Khrih a thih Ruahnolhnak ah zeicah kan i pumh awk a si? (b) Ṭhen 6nak le 7nak ah zei kong dah kan i ruah lai?

²¹ Khrih a thih Ruahnolhnak ah i pum. Jesuh nih a thih lai zanlei ah a thih philhlonak tuah awkah a kan cawnpiak. Mah cu kum fatin kan tuah i Ruahnolhnak asiloah “Bawipa Zanriah” tiah auh a si. (1 Korin 11:20; Matthai 26:26-28) Jesuh nih kan caah a tlingmi a nunnak a pekmi kha i cinken hna seh ti a kan duh. Cucaah Jesuh nih “keimah philhlonak ah run tuah u” tiah a ti. (Luka 22:19 rel.) Ruahnolhnak i naa pumh tikah tlanhnak man le Jehovah le Jesuh nih an langhtermi dawtnak ngan bik naa cinken kha na langhter a si.—A Donghnak I Fianternak 16 ah zoh.

²² Tlanhnak man cu kan hmuh khawhmi laksawng vialte lakah a sunglawi bikmi a si. (2 Korin 9:14, 15) Mah a sunglawimi laksawng nih a thi cangmi mi nuai tampi hmanh kha ṭhatnak a pek hna lai. Mah cu zeitindah a si khawh ti kha ṭhen 6nak le 7nak ah kan i ruah lai.